1-3. (a) Yuma yadiña ñahi kudi antu jaYehova hampinji yatachikiliyi Zekariya kuprofweta? (b) Muloñadi Yehova chayilejeleliyi antu jindi ‘kufunta kudi yena’?

ZEKARIYA wamwenu yimwenu. Wamweni mukanda wavuñañawu neyi chikaña, wunakutuuka. Mukachi kachimpaya mudi mumbanda iyanabutilimu nawa ambanda ayedi akweti mpuula neyi jakakumbikumbi anakutuuka. (Zek. 5:1, 7-9) Muloñadi Yehova chamumwekesheleliyi kaprofwetu kindi iyi yimwenu? Yuma yadiña ñahi kudi aIsarela hayina mpinji? Yimwenu yasonekeliyi Zekariya yatukwashaña ñahi makonu?

² Mwaaka wa 537 B.C.E. wadiña mwaaka wakuzalañala kudi antu jaYehova. Ayifumishili muwunkoli muBabiloni hanyima yakushakamamu yaaka 70. Atiyili kuwaha kuya nakufuntisha kudifukula kwalala muYerusalema. Mu 536 B.C.E., alili chikuku chatembeli. Hayina mpinji “antu adikuwili nañovu yayeni, niipumba datiyakeni kwakulehi.” (Ezera 3:10-13) Hela chochu, atachikili kuyikañesha kuzata mudimu wawu wakutuña. Chineli  ayizeyesheli nawa amweni kukala kwakuvulu, antu alekeli kutuña tembeli nakutachika kusha maana hakutuña matalawu nikudima mahawu. Mudimu wakutuña tembeli yaYehova wemeni hadi yaaka 16. Antu jaNzambi akeñekeleña kuyileja nawu atela kufunta kudi Yehova chatela asheña maana hayuma yafwilileñawu. Yehova wakeñeleña nindi afunti kudi yena kulonda atachiki kudifukula cheñi kudi yena namuchima wejima.

³ Muchaaka cha 520 B.C.E., Nzambi watemesheli kaprofwetu kindi Zekariya kulonda yakwashi antu kwanuka chayifumishiliwu muBabiloni. Ijina dakwila nawu Zekariya daya mukwila nawu “Yehova Nanuki,” dayanukishili chikuma chalema. Hela chakwila avulameneni chayipulwishiliyi Yehova, ilaña Nzambi watwalekelihu kwaanuka antu jindi. (Tañenu Zekariya 1:3, 4.) Wayilejeli nindi wukuyikwasha kufuntisha kudifukula kwalala, ilaña wayisoñamishili nindi wukwiteja wanyi antu kudifukula nanyichima yiyedi. Tuhanjekenu chimwenu chaZekariya chamu 6 nichamu 7 kulonda tumoni Yehova chayisañumwiniyi kuzata. Nawa, yumanyi yitunateli kudizila kuniyi yimwenu?

4. Zekariya wamwenidi muchimwenu chindi chamu 6, nawa muloñadi muvuñilu chiyawusonekeleliwu kwishinadi nikwishinadi? (Talenu mwevulu wakutachikilahu 1.)

⁴ Kapetulu 5 kamukanda waZekariya katachika nachimwenu chakuhayamisha. (Tañenu Zekariya 5:1, 2.) Zekariya wamweni muvuñilu wukweti mamita 9 muwuleha nawa muwihi mamita 4.5 wunakutuuka mwiwulu. Wadiña wakuvuñulula dehi kulonda awutañi. Nawa asonekelihu nsañu yawunsompeshi kwishinadi nikwishinadi. (Zek. 5:3) Kakavulu, nyivuñilu ayisonekeleña hohu kabadi kamu, ilaña iwu wadiña nansañu yalema dichawusonekeleliwu kwishinadi nikwishinadi.

5, 6. Yehova wamonaña ñahi wukombi wejima?

⁵ Tañenu Zekariya 5:3, 4. Hela chakwila antu ejima akayisompesha kudi Yehova, antu ejina dindi wena akayisompesha chikupu. Antu amukalakelaña Nzambi eluka nawu wukombi wejima wakojejaña antu kutena “ijina daNzambi [yawu] chatama.” (Yish. 30:8, 9) Antu amakwawu ahoshaña nawu neyi kukankila hela lwisu dilunaleteshi wiyi chidi hohu chiwahi. Ilaña muntu neyi wukwiya muloña wayumiyi dikwila nawu nalemeshi nankashi yilwilu yindi yalwisu kubadika Yehova, Ijina dindi ninshimbi Jindi.

⁶ Mwatiya Zekariya 5:3, 4 chiyahosha nawu “ishiñu . . . [dikeñila] mwitala dekombi . . . [dakashakama] mukachi ketala dindi, dakadinoñesha”? Wunsompeshi waYehova kwila muntu yawukañesha nayikuñu hela nanyikomenu nehi. Wunateli kuhanuka nakwiñila mwajindama (mwaswamanyika) mudi antu jaYehova anakwila yuma yatama. Hela chakwila muntu nateli kusweka wukombi windi kudi akwanshimbi, akwanyidimu, aeluda hela kudi anvwali, hanateli kuswama kudi Nzambi, wahosha nindi wukombi wejima akawusololaku. (Heb. 4:13) Twatiyaña kuwaha kudikunda nawantu afwilaña mpinji yejima kwikala ashinshika “muyuma yejima.”—Heb. 13:18.

7. Tunateli kupuluka ñahi kwishiñu damuvuñilu wunakutuka?

⁷ Yehova wahela wukombi wejima. Twatela kulemesha nikwovwahila nshimbi jaYehova, nikutwalekahu kwikala nayilwilu yayiwahi yikubula kuleta kasawuntu hejina dindi. Neyi twila mwenimu, Yehova wakatusompeshela hamu wanyi nawantu abulaña kumwovwahila.

8-10. (a) Kusanyika kwatalisha mudihi? (b) Kusanyikanyi kwabulili kushikijayi Zedekiya?

⁸ Nsañu yidi hamuvuñilu wunakutuka yinakusoñamisha cheñi antu ‘asanyikaña mwiijina daNzambi chakutwamba.’ (Zek. 5:4) Kusanyika himazu akukana amwekeshaña nawu ochu chuma chalala, hela hichikaninu chakanañayi muntu nindi wukwila ochu chuma hela nehi.

⁹ Neyi muntu yasanyika mwijina daYehova watela kwilamu. Tuneluki chumichi nacheliliyi mwanta wakukumishaku waswanini muYerusalema. Zedekiya wamukanini Yehova nindi wukwovwahilaña mwanta wakuBabiloni. Hela chochu, Zedekiya welili wanyi mwasanyikiliyi. Chafuminimu, Yehova wamusompesheli namazu akwila nindi: “Chalala chinahandichi kwaamu, mwenomu mwekala mwanta wamudiishili wanta, wukweti kusanyika kwadiwiliyi, wukweti chitiyañenu chajahiliyi, mwomwenomu muBabiloni mwekala yenowu dimu mwakafwilayi [Zedekiya].”—Ezek. 17:16.

¹⁰ Mwanta Zedekiya wamusanyikili Yehova nindi wukwila mwasanyikiliyi mwijina daNzambi. (2 Kushi. 36:13) Ilaña, Zedekiya wayili kuEjipitu nakulomba wukwashu kulonda yekali wasubuka muBabiloni.—Ezek. 17:11-15, 17, 18.

11, 12. (a) Chikaninwinyi chalema chitwakanaña? (b) Yumanyi yitwatela kwila hakwila nawu tushikiji chikaninu chetu chakudihana?

¹¹ Yehova welukaña cheñi yuma yitwamukanaña. Wakeñaña nindi twileña mutunasanyiki nawa twatela kwilamu hakwila nawu twikali amambwambu jindi. (Mas. 76:11) Hayikaninu yejima yitwakanaña, chikaninu chalema hichikaninu chitwakanini chakudihana kudi Yehova. Kudihana hichikaninu chakumukalakela Yehova hela yuma yinakali ñahi.

¹² Tunateli kumwekesha ñahi netu tunakushikija chikaninu chetu chakudihana?  Neyi tuumika kukala kweneni nikwanyanya tukumwekesha netu tunakuhemba chikaninu chetu chakumushimeka Yehova “hefuku-hefuku.” (Mas. 61:8) Chakutalilahu, neyi muntu nakuyikenkamina kumudimu hela kushikola, mwatela kushinda iku kweseka kuhitila mukulondela kufumba kwakwila nawu “tiyaku kuwaha [mudi Yehova].” (Yish. 23:26) Neyi twashakamaña nawantaña abula kwitiya, komana twalombaña wukwashu kudi Yehova kulonda yatukwashi kwikala nayilwilu yawakwaKristu hela chakwila wena dichinakwilawu wanyi? Komana twalombaña kudi Tata yetu wamwiwulu ifuku nifuku nakumusakilila hakutuleta muchiyuulu chindi nihakutukeña? Twatañaña Bayibollu hefuku-hefuku? Komana hitwamukanini netu tukwilaña yuma yejimiyiku? Hakwila twili nawu yumiyi, twatela kwovwahila. Kudifukula mpinji yejima kwamwekeshaña nawu twamukeña Yehova nawa nawu twadihana chikupu kudi yena. Twatela kudifukulaña mpinji yejima. Kwila mutwakanini kwatukwashaña etu aweni; nawa neyi tutwalekahu kwikala ashinshika mwakafuma yayiwahi.—Kuhit. 10:12, 13.

13. Chumanyi chitwadizilaña kuchimwenu chaZekariya chamu 6?

¹³ Chimwenu chaZekariya chamu 6 chinatukwashi kwiluka netu antu amukeña Yehova hiyatela kwiya hela kusanyika mwakutwambaku. Tunadizi cheñi netu hela chakwila aIsarela aluwañesheleña, Yehova halekeli kuyikwashaku. Welukili kukala kwamweneñawu kwafumineña kudi ayilumbu jawu. Twatela kushikija mutwakanini neyi cheliliyi nawa wukutukwasha kushikijamu. Njila yimu mwatukwashilañayi hikutwinka kuchiñeja kwakwila nawu keña yafumishihu kutama kwejima hamaseki. Chimwenu chaZekariya chalondelelihu chatukwashaña kuchiñeja ichi chikaninu.

14, 15. (a) Zekariya wamwenidi muchimwenu chamu 7? (Talenu mwevulu wakutachikilahu 2.) (b) Mumbanda wudi muchimpaya wemenañaku yikahi, nawa muloñadi chamufuntishiliwu muchimpaya nakumubutilamu cheñi?

¹⁴ Hanyima yakumona muvuñilu wunakutuuka, Zekariya amulejeli kudi kañelu nawu “fumbulaku mesu eyi.” Chumanyi chikumonayi muchimwenu chamu 7? Namoni chimpaya chinakwidika. (Tañenu Zekariya 5:5-8.) Ichi chimpaya chadiña “nachifwiku chansumbu.” Chinajikuliwu chifwiku, Zekariya namoni “mudi mumbanda washakama.” Kañelu hakumulumbulwila nindi mumbanda wudi muchimpaya “diku kutama.” Zekariya watiyili woma chamweniyi mumbanda hakukeña kufumamu. Kañelu wanyakeli kumubutilamu cheñi muchimpaya nakujikaku chifwiku chalema. Ichi chimwenu chinatalishi mudihi?

¹⁵ Ichi chimwenu chinakumwekesha nawu Yehova waketeja wanyi yilwilu yatama hakachi kawantu jindi. Yilwilu yejima yatama wakayibutila muchimpaya nakuyifumishahu swayi. (1 Kor. 5:13) Tunakuhweleli chumichi muloña kañelu wabutili cheñi chifwiku chansumbu hachimpaya.

16. (a) Chimpaya chamweniyi Zekariya achilili ñahi? (Talenu mwevulu wakutachikilahu 3.) (b) Ambanda ayedi adi nampuula anakutwala kudihi chimpaya?

¹⁶ Kuhiñahu hakumona ambanda ayedi adi nampuula neyi kakumbikumbi. (Tañenu Zekariya 5:9-11.) Awa ambanda anambuki chikupu namumbanda wudi muchimpaya. Awa ambanda anazatishi mpuula jawu kwinza nakusenda chimpaya mudi “kutama.” Anakuchitwala kudihi? Anakuchitwala nakuchinatila “kwituña daShinari,” hela Babiloni. Hanu dinu muloñadi chinakutwalilawu chimpaya kuBabiloni?

17, 18. (a) Muloñadi Shinari chidinekalili ‘iluña datelela’ kutwalaku “kutama”? (b) Chumanyi chitwatela kwila nakutama?

 ¹⁷ A Isarela amumafuku aZekariya, diwu atela kwiluka chuma chaletesheli kutama akutwali kuShinari. Zekariya niakwawu aYudeya elukili nawu Babiloni dadiña iluña datama munana mafuku. Mpinji yejima afwilileña kwikala ashinshika muloña akulilili mumusumba mwadiña yilwilu yatama nawa mwadiña kudifukula kwakutwamba. Ichi chimwenu chatela chayikolesheli chikupu chelukiliwu nawu Yehova wukahemba kudifukula kwalala chakadi majilu.

¹⁸ Hela chochu, chimwenu chayanukishili cheñi aYudeya nawu atela kuhemba kudifukula kwawu chakadi majilu. Kutama hiyakakwiteja kwikala hakachi kawantu jaYehovaku. Chineli tudi mukuloñesha kwaNzambi kwakadi majilu, mwatukiñilañayi nawa mwatumwekeshelañayi kukeña, twatela kuzata nañovu kulonda kutwalekihu kukuhemba chakadi majilu. Kutama hikwatela kwikala hakachi kawantu jaYehovaku.

19. Yimwenu yaZekariya yatukwashaña ñahi makonu?

¹⁹ Yimwenu yamweniyi Zekariya yamu 6 ni 7 yasoñamishaña antu elaña yuma yatama, yayisoñamishaña nawu Yehova wahela antu elaña yuma yatama. Sweje-e akwakudifukula indi alala, atela kuhela chikupu yuma yatama. Iyi yimwenu mudi cheñi yikaninu yayiwahi yatukanayi Tata yetu wamwiwulu. Neyi tukuzata nañovu kwikala amabwambu jaNzambi nikwikala mukuloñesha kwindi, hitwakamona ishiñu dakufwaku. Ilaña, Yehova wakatukiswila. Neyi tukuzata nañovu kwikala akadi majilu mwakafuma yuma yayiwahi. Twatela kukuhwelela netu Yehova wukutukwasha kushinda kutama. Hanu dinu tunateli kwiluka ñahi netu kudifukula kwalala kukutwalekahu mukanu kaayi mudi yilwilu yatama? Chumanyi chinaleteshi tukuhweleli chikupu netu Yehova wukukiña kuloñesha kwindi halukadi lwasweja lunakwinza? Awa malwihu twakayihanjeka muchibaaba chinalondelihu.