1-3. (a) Baisiraele ba be ba phela bjang ge Sakaria a be a thoma go porofeta? (b) Ke ka baka la’ng Jehofa a ile a kgopela batho ba gagwe gore ba ‘boele go yena’?

LENGWALO la go phuthwa leo le fofago. Mosadi yo a tswaleletšwego ka gare ga seroto. Basadi ba babedi bao ba akaletšego moyeng go swana le nonyana yeo e bitšwago mogolodi. Tše ke diswantšho tša go makatša tšeo di tšwelelago ka pukung ya Sakaria. (Sak. 5:1, 7-9) Ke ka baka la’ng Jehofa a ile a bontšha moporofeta wa gagwe dipono tše? Baisiraele ba be ba phela bjang nakong yeo? Dipono tše, tšeo di ilego tša ngwalwa kgale tša Sakaria di re kgoma bjang?

² Ka ngwaga wa 537 B.C.E., batho bao ba bego ba ineetše go Jehofa ba be ba thabile kudu. Ka morago ga mengwaga e 70 Baisiraele ba le bokgobeng kua Babilona, ba ile ba lokollwa. Ka morago ga moo, ba ile ba bontšha mafolofolo tabeng ya go tsošološa borapedi bja therešo kua Jerusalema. Ka 536 B.C.E., ba ile ba aga motheo goba fantišeni ya tempele. Ka nako yeo batho ba Modimo ba be ba “hlabile mokgoši o  mogolo gomme mokgoši woo o be o kwewa kgole kudu.” (Esera 3:10-13) Lega go le bjalo, mošomo woo wa go aga o ile wa thoma go thibelwa. Ka ge batho ba be ba nyamišitšwe ke mathata le dilo tše dingwe, ba ile ba tlogela go aga tempele gomme ba dira dilo tša malapa a bona le go lema mašemo. Ka morago ga mengwaga e 16 fantišeni e agilwe, tempele ya Jehofa e be e se ya tšwa e fetšwa go agwa. Batho ba Modimo ba ile ba swanelwa ke go gopotšwa gore ba boele go Jehofa gomme ba tlogele go etiša dilo tša bona pele. Jehofa o be a nyaka gore ba boele go yena, ba be le mafolofolo ao ba bego ba na le ona a go mo hlankela!

³ E le gore Jehofa a gopotše Baisiraele lebaka la go ba lokolla bothopša kua Babilona, ka ngwaga wa 520 B.C.E., o ile a romela moporofeta wa gagwe Sakaria gore a yo ba gopotša. Leina Sakaria, leo le bolelago gore: “Jehofa o Gopotše,” le ka ba le ile la ba gopotša therešo e bohlokwa kudu. Le ge ba ile ba lebala dilo tšeo Jehofa a ilego a ba direla tšona go ba phološa, eupša Jehofa yena ga se a ka a ba lebala. (Bala Sakaria 1:3, 4.) Ka lerato, o ile a ba kgonthišetša gore o tla ba thuša go tsošološa borapedi bja therešo. Eupša o ile a ba botša a tiišitše gore a ka se amogele batho bao ba sa mo rapelego ka dipelo tša bona ka moka. Anke re boneng kamoo Jehofa a ilego a kgothatša Baisiraele a diriša pono ya Sakaria ya botshelela le ya bo šupa, re bone le seo re ka ithutago sona diponong tšeo?

4. Ke’ng seo Sakaria a se bonego ponong ya gagwe ya botshelela, gona taba ya gore lengwalo leo le be le ngwadilwe ka mahlakoreng ka moka e be e bontšha’ng? (Bona seswantšho 1, seo se lego mathomong a sehlogo.)

⁴ Ditemana tša mathomo kgaolong ya bohlano ya Sakaria di re botša ka pono yeo e makatšago. (Bala Sakaria 5:1, 2.) Sakaria o bona lengwalo la go phuthwa la botelele bja dimithara tše e ka bago tše 9 le bophara bja dimithara tše e ka bago tše 4.5, le fofa lefaufaung. Lengwalo leo le be le phutholotšwe, le loketše go balwa. Le be le na le molaetša wa mabapi le kahlolo, woo o bego o ngwadilwe ka mahlakoreng ka moka a letlakala. (Sak. 5:3) Gantši lengwalo la go phuthwa le be le ngwalwa ka lehlakoreng le tee feela eupša le, le be le ngwadilwe ka mahlakoreng ka moka go bontšha gore le be le na le molaetša o bohlokwa kudu.

5, 6. Jehofa o re’ng ka mokgwa le ge e le ofe wa go utswa?

⁵ Bala Sakaria 5:3, 4. Batho ka moka ba ikarabela go Jehofa ka baka la ditiro tša bona. Eupša bao ba bitšwago ka leina la gagwe ba ikarabela le go feta. Batho bao ba ratago Modimo ba a tseba gore mokgwa le ge e le ofe wa go utswa o ka “goboša leina la Modimo [wa bona].” (Die. 30:8, 9) Go sa šetšwe gore motho o utswa ka lebaka lefe, ge a utswa o bontšha gore o na le megabaru, le gore o rata dilo tše di bonagalago kudu go feta Modimo. O nyenyefatša molao wa Modimo. Le ge motho a ka nagana gore o na le lebaka le le kwagalago la go utswa, ge a utswa o bontšha gore o na le megabaru e bile leina la Jehofa le melao ya gagwe ga di bohlokwa go yena.

⁶ Na o bone gore Sakaria 5:3, 4 e re, “thogako . . . e tla wela ntlo ya lehodu . . . e tla tsena dintlong tša bona ya di senya”? Jehofa o kgona go bona ka moka bao ba utswago e bile o tla ba ahlola. Ka gare ga batho ba gagwe o kgona go bona le badiradibe bao ba iphihlilego. Le ge motho yo a utswago a ka kgona go dira gore maphodisa, beng ba mošomo wa gagwe, bagolo ka phuthegong, goba batswadi ba gagwe ba se bone bohodu bjo a bo dirago, eupša Jehofa o a mmona. (Baheb. 4:13) Ruri go a thabiša go ba gare ga batho bao ba dirago sohle seo ba ka se kgonago go dula ba botega “dilong tšohle”!​—Baheb. 13:18.

7. Re ka phema bjang kahlolo yeo e lego lengwalong la go phuthwa leo le fofago?

⁷ Jehofa ga a rate mokgwa le ge e le ofe wa go utswa. Go phela ka melao ya Modimo ya boitshwaro ke selo seo re se tšeelago godimo, le gona re dula re itshwere gabotse gore re se goboše  leina la gagwe. Ge re dira bjalo, Jehofa a ka se re ahlole le batho bao ba sa kwego melao ya gagwe ka boomo.

8-10. (a) Keno ke’ng? (b) Ke keno efe yeo Kgoši Tsedekia a ilego a palelwa ke go e phetha?

⁸ Lengwalo la go phuthwa leo le fofago le lemoša bao ba ‘enago ka maaka ka leina la Modimo.’ (Sak. 5:4) Go ena ke go bolela mantšu a itšego go kgonthišetša gore seo o se bolelago ke therešo, goba ke go holofetša gore o tla dira selo se itšego goba o ka se se dire.

⁹ Go ena ka leina la Jehofa ga se taba yeo re swanetšego go e tšeela fase. Se ke seo kgoši ya mafelelo yeo e bego e tlo buša Jerusalema e ilego ya se dira. Tsedekia o ile a ena ka leina la Jehofa gore o be a tla dula a ekwa kgoši ya Babilona. Lega go le bjalo, Tsedekia ga se a ka a phetha keno yeo ya gagwe. Ka baka leo, Jehofa o ile a mo ahlola ka mantšu a rego: “Ke ikana ka nna yo a phelago gore lefelong la kgoši yeo e hlomilego [Tsedekia] yeo e ilego ya nyatša keno le go roba kgwerano ya yona, ke gona moo gare ga Babilona moo e tlago go hwela gona.”​—Hesek. 17:16.

¹⁰ Jehofa o be a letetše gore Kgoši Tsedekia a phethe keno yeo a e dirilego ka leina la Gagwe. (2 Dikor. 36:13) Go e na le gore Tsedekia a phethe keno yeo, o ile a kgopela Egipita gore e mo thuše. Lega go le bjalo, maiteko a gagwe a ile a folotša.​—Hesek. 17:11-15, 17, 18.

11, 12. (a) Keno e bohlokwahlokwa yeo re ka e dirago ke efe? (b) Keno yeo re e dirilego ge re be re ineela go Jehofa e ama bophelo bja rena bja letšatši le letšatši bjang?

¹¹ Le lehono, Jehofa o a re kwa ge re dira dikeno. O tšeela godimo dikholofetšo tšeo re di dirago, e bile re swanetše go di phetha ge e ba re nyaka go mo kgahla. (Ps. 76:11) Le ge go na le dikeno tše dintši tšeo re di dirago, ya bohlokwahlokwa ke ya ge re holofetša Jehofa gore re ineela go yena. Ge re ineela go Jehofa, re dira keno ya gore re tla mo hlankela le ge go le thata.

¹² Re ka dira’ng go bontšha gore re phelela keno yeo re e dirilego ya go ineela go Jehofa? “Letšatši  le letšatši” re kopana le diteko tše dikgolo le tše dinyenyane, ka gona tsela yeo re itshwarago ka yona e swanetše go bontšha gore re tšeela godimo keno yeo re e dirilego go Jehofa. (Ps. 61:8) Ka mohlala, a re re motho yo o tsenago le yena sekolo, goba mošomigotee le wena o go bontšha ka ditsela tše itšego gore o nyaka go ratana le wena. Na o tla bontšha gore o ‘kgahlwa ke ditsela tša Jehofa’ ka go laetša motho yoo gore ga o kgahlwe ke seo a se dirago? (Die. 23:26) O tla dira’ng ge e ba ka gae o dula le batho bao e sego Dihlatse tša Jehofa gomme ba sa bontšhe dika tša Bokriste? Na o tla kgopela Jehofa gore a go thuše go bontšha dika tša Bokriste le ge e le wena feela yoo a lwelago go di bontšha? Na letšatši le letšatši o leboga Modimo wa rena ka thapelo gore o a go rata le gore o go tlišitše ka mokgatlong wa gagwe? Na o bala Beibele letšatši le letšatši? Ge e le gabotse, re tshepišitše Jehofa gore re tla dira dilo tše ge re be re ineela go yena. Ge re ekwa Jehofa e bile re dira sohle seo re ka se kgonago go mo hlankela, re bontšha gore re a mo rata le gore re ineetše go yena. Borapedi bja rena bo bohlokwa kudu maphelong a rena, ga se taba ya go no itloša bodutu. Ge re phetha dikeno tšeo re di holofeditšego Jehofa re a holega, le gona re tlo hwetša meputso e megolo nakong e tlago ka baka la go botega ga rena.​—Doit. 10:12, 13.

13. Re ka ithuta’ng ponong ya Sakaria ya botshelela?

¹³ Pono ya Sakaria ya bo tshelela e re thušago bona gore batho bao ba ratago Jehofa ga se ba swanela utswa, goba go ena ka maaka. Gaešita le ge Baisiraele ba be ba dira diphošo, Jehofa ga se a ka a ba felela pelo. O be a kwešiša kgateletšego ya bona yeo e bego e bakwa ke manaba a bona. Jehofa o re beetše mohlala ka go phetha dikholofetšo tša gagwe, ka gona o tla re thuša gore le rena re phethe dikholofetšo tša rena. Tsela e nngwe yeo a re thušago ka yona ke ka go re holofetša gore kgauswinyane o tla fediša dilo tše mpe lefaseng ka moka. Pono e latelago ya Sakaria e kgonthišetša seo.

14, 15. (a) Ke’ng seo Sakaria a se bonago ponong ya gagwe ya bošupa? (Bona seswantšho 2, seo se lego mathomong a sehlogo.) (b) Mosadi yo a lego ka gare ga seroto o swantšhetša’ng, gona ke ka baka la’ng a tswaleletšwe ka gare ga sona?

¹⁴ Ka morago ga gore Sakaria a bone lengwalo la go phuthwa leo le fofago, morongwa o ile a mmotša gore a ‘emiše mahlo.’ Pono ye ya bošupa e be e swere dife? Sakaria o ile a bona sebjana sa “seroto.” (Bala Sakaria 5:5-8.) Seroto se e be e le sa bogolo bja go lekanela e bile se na le “sekhurumelo sa ntikodiko sa morodi.” Ge seroto seo se bulwa, Sakaria o bona ‘mosadi a dutše ka gare ga sona.’ Ke moka morongwa o ile a hlalosa gore mosadi yo a lego ka gare ga sebjana seo ke “Bokgopo.” Nagana kamoo Sakaria a ilego a tšhoga ka gona, ge a be a bona mosadi yoo a leka go tšwa ka gare ga seroto seo! Ka pejana morongwa o ile a katela mosadi yo ka serotong, ke moka a se khurumela ka sekhurumelo se boima. Tiragalo ye e ra gore’ng?

¹⁵ Karolo ye ya pono ya Sakaria e bontšha gore Jehofa a ka se kgotlelele go bona batho ba gagwe ba dira selo le ge e le sefe se sebe. Ge Jehofa a bona selo se sebe, o se tloša ka pejana. (1 Bakor. 5:13) Morongwa o re kgonthišetša se ka go khurumela seroto seo ka pejana, ka sekhurumelo se boima.

16. (a) Ponong e latelago Sakaria o bona go direga’ng ka seroto? (Bona seswantšho 3, seo se lego mathomong a sehlogo.) (b) Basadi bao ba nago le diphego ba iša kae seroto seo?

¹⁶ Ponong e latelago, Sakaria o bona basadi ba babedi bao ba nago le diphego tše di etšago tša nonyana yeo e bitšwago mogolodi. (Bala Sakaria 5:9-11.) Ruri basadi ba ba fapane le mosadi yo a lego ka gare ga seroto! Basadi ba, ba diriša diphego tša bona tše dikgolo go kukela seroto seo se nago le “Bokgopo” sebakabakeng. Ba se iša kae? Ba se iša “nageng ya Shineara,” goba Babilona. Eupša ke ka baka la’ng ba iša seroto seo Babilona?

17, 18. (a) Ke ka baka la’ng Shineara e le lefelo le le swanetšego la go lahlela seroto seo se nago le “Bokgopo”? (b) Re na le boikarabelo bofe ge go tliwa tabeng ya bokgopo?

 ¹⁷ Baisiraele bao ba phetšego mehleng ya Sakaria ba be ba tseba gore Shineara e be e le lefelo le le swanetšego mo go ka lahlelwago seroto seo se nago le Bokgopo. Sakaria le setšhaba sa gabo sa Bajuda ba be ba ka bolela ba tiišitše gore Babilona e be e le lefelo leo le tletšego bokgopo mehleng ya bona. Ba be ba tseba gore naga ye, e be e tletše ka batho bao ba rapelago medimo ya diswantšho le borapedi bja maaka. Ka ge Sakaria le Bajuda ba bangwe ba goletše motseng wo o bego o tletše ka batho ba go rapela medingwana, letšatši le letšatši ba be ba swanetše go ganetša mekgwa yeo. Ruri pono ye e ile ya ba kgonthišetša gore Jehofa o tla dula a dira gore borapedi bja gagwe bo dule bo hlwekile!

¹⁸ Le gona, pono ye e ile ya gopotša Bajuda gore ba be ba swanetše go kgonthišetša gore borapedi bja bona bo dule bo hlwekile. Bahlanka ba Jehofa ba ka se dumelele bokgopo gare ga bona e bile ga se ba swanela go bo dumelela. Ka ge Jehofa a re tlišitše ka mokgatlong wa gagwe wo o hlwekilego, le rena re swanetše go kgonthišetša gore o dula o hlwekile. Ka moka ga rena re na le boikarabelo bja go dira gore ntlo ya Jehofa e dule e hlwekile. Mohuta le ge e le ofe wa bokgopo ga se wa swanela go ba gona gare ga batho ba Modimo.

19. Dipono tša Sakaria tše di makatšago di bolela’ng go rena?

¹⁹ Pono ya Sakaria ya botshelela le ya bošupa di lemoša batho bao ba dirago bobe gore Jehofa ga a bo kgotlelele. Rena bao re hlankelago Jehofa, re swanetše go hloya bobe ka mo go feletšego. Le gona dipono tše di re kgonthišetša gore Tatago rena wa legodimong o re rata kudu. Ge e ba re ka šoma ka thata gore Modimo a re amogele le go re šireletša, re ka se fedišwe. Go e na le moo, Jehofa o tla re šegofatša. Maiteko ka moka ao re a dirago a go dula re hlwekile lefaseng le leo le tletšego bokgopo e ka se be a lefela. Re ka kgodišega gore Jehofa o tla re thuša gore re atlege. Eupša re ka kgodišega bjang gore borapedi bja therešo bo tla dula bo le gona lefaseng le leo le tletšego ka batho bao ba sa ratego Modimo? Ke’ng seo se re bontšhago gore Jehofa o tla šireletša mokgatlo wa gagwe, ge masetlapelo a magolo a dutše a batamela? Sehlogo se se latelago se tlo araba dipotšišo tše.