1–3. а) Захари пехуымпарӕй лӕггад кӕнын куы райдыдта, уӕд Йегъовӕйы адӕм цы уавӕры уыдысты? б) Йегъовӕ йӕ адӕмӕн цӕмӕн загъта, раздӕхут мӕм, зӕгъгӕ?

ТЫХТОН фӕтӕхы, чыргъӕды мидӕг сылгоймаг бады ӕмӕ, къадзы базыртӕ кӕуыл ис, дыууӕ ахӕм сылгоймаджы ӕрбатӕхынц. Ахӕм ӕнахуыр цӕстылуайӕнтӕ федта Захари (Зах. 5:1, 7–9). Цымӕ Йегъовӕ йӕ пехуымпарӕн ахӕм диссаджы цӕстылуайӕнтӕ цӕмӕн равдыста? Уыцы рӕстӕг израилӕгтӕ цы уавӕры уыдысты? Ӕмӕ уыцы цӕстылуайӕнтӕ абон махмӕ куыд хауынц?

² Уый уыди н. э. размӕ 537 азы. Йегъовӕйы адӕмӕй амондджындӕр нӕ уыд – 70 азы дӕргъы уыдысты уацары Вавилоны, ӕмӕ ныр ссӕрибар сты! Гъемӕ Иерусалиммӕ ӕрыздӕхтысты ӕмӕ тынг зӕрдиагӕй бавнӕлдтой кувӕндон аразынмӕ, цӕмӕй та Йегъовӕйӕн уым куывтаиккой. Н. э. размӕ 536 азы кувӕндонӕн бындур куы сӕвӕрдтой, уӕд адӕм фырцинӕй «афтӕ хъӕр кодтой, ӕмӕ сӕ хъӕр дардмӕ хъуысти» (Езд. 3:10–13). Фӕлӕ знӕгтӕ райдыдтой сӕ ныхмӕ цӕуын ӕмӕ сӕ къуылымпы кодтой.  Уый тыххӕй израилӕгтӕн сӕ ныфс асаст ӕмӕ ӕппынфӕстаг кувӕндон нал арӕзтой. Уыдон райдыдтой сӕхи хӕдзӕртты ӕмӕ хуымты куыст кӕнын. Кувӕндонӕн бындур ӕвӕрд куы ’рцыд, уымӕй 16 азы куы рацыд, уӕд дӕр арӕзт нӕма уыд. Уымӕ гӕсгӕ Хуыцауы адӕмӕн хъуыди сӕ зӕрдыл ӕрлӕууын кӕнын, Йегъовӕмӕ кӕй хъуамӕ раздӕхой ӕмӕ сӕхи мӕт кӕй хъуамӕ мауал кӕной. Йегъовӕйы фӕндыд, цӕмӕй та йын зынгзӕрдӕйӕ лӕггад кодтаиккой ӕмӕ мацӕмӕй тарстаиккой.

³ Гъемӕ н. э. размӕ 520 азы Йегъовӕ йӕ пехуымпар Захарийы йӕ адӕммӕ арвыста, цӕмӕй сын сӕ зӕрдыл ӕрлӕууын кодтаид, Вавилоны уацарӕй сӕ цӕмӕн ссӕрибар кодта, уый. Цымыдисаг у, Захарийы ном кӕй нысан кӕны «Йегъовӕ йӕ зӕрдыл дары». Израилӕгтӕ ферох кодтой, Йегъовӕ сӕ куыд фервӕзын кодта, уый, фӕлӕ сӕ Йегъовӕ та нӕ ферох кодта, йӕ зӕрдыл сӕ дардта. (Бакӕс Захарийы 1:3, 4.) Йегъовӕ сын зӕрдӕ бавӕрдта, кӕй сын ӕххуыс кӕндзӕн раст дин фӕстӕмӕ йӕ къахыл слӕууын кӕнынӕн. Фӕлӕ ма сӕ фӕдзӕхсгӕ дӕр бакодта, ӕппӕт зӕрдӕйӕ йын куы нӕ лӕггад кӕной, уӕд сӕ райгонд кӕй нӕ уыдзӕн. Уӕдӕ ӕркӕсӕм Захарийы цӕстылуайӕнтӕй ӕхсӕзӕммӕ ӕмӕ ӕвдӕммӕ ӕмӕ базонӕм, Йегъовӕ израилӕгты архайынмӕ куыд разӕнгард кодта ӕмӕ уыцы цӕстылуайӕнтӕй абон махӕн дӕр нӕ бон зондӕн райсын цы у, уый.

4. Захари ӕхсӕзӕм цӕстылуайӕны цы федта? Тыхтоныл дыууӕрдыгӕй дӕр фыстытӕ цӕмӕн уыд? (Кӕс 1-аг нывмӕ статьяйы райдианы.)

⁴ Захарийы 5-ӕм сӕр райдайы ӕнахуыр цӕстылуайӕнӕй. (Бакӕс Захарийы 5:1, 2.) Захари федта, тыхтон куыд фӕтӕхы, уый. Йӕ дӕргъ уыд 9 метры, йӕ уӕрх та – 4,5 метры. Уыцы тыхтон уыд гом ӕмӕ йыл дыууӕрдыгӕй дӕр фыст уыд тӕрхоны хабар (Зах. 5:3). Раджы заманты-иу тыхтонӕн ӕрмӕстдӕр йӕ иу фарсыл фыстой. Фӕлӕ ацы хабар афтӕ ахсджиаг уыд, ӕмӕ фыст уыд дыууӕрдыгӕй дӕр.

5, 6. Йегъовӕ давынмӕ цы цӕстӕй кӕсы?

⁵ Бакӕс Захарийы 5:3, 4. Адӕм иууылдӕр сӕ хъуыддӕгты тыххӕй дзуапп дӕттынц Хуыцауы раз. Ӕмӕ уый уӕлдайдӕр хауы Хуыцауы адӕммӕ, уымӕн ӕмӕ йын йӕ ном хӕссынц. Чи йӕ уарзы, уыдон ӕй зонынц, ӕмӕ, куы адавой, уӕд ын йӕ ном кӕй фӕхудинаг кӕндзысты (Ӕмб. 30:8, 9). Гӕнӕн ис, ӕмӕ адӕймаг хъуыды кӕна, зӕгъгӕ, уымӕн адавтон, ӕмӕ мын ӕндӕр гӕнӕн нӕ уыд. Фӕлӕ йын адавынӕн цавӕрфӕнды ӕфсон ма уа, уӕддӕр афтӕ уайы, ӕмӕ у зыд ӕмӕ кӕрӕф, ӕмӕ, цӕмӕ бӕллы, уый йын Йегъовӕйӕ дӕр, йӕ номӕй дӕр ӕмӕ йӕ закъӕттӕй дӕр ахсджиагдӕр у.

⁶ Дӕ хъус-ма ӕрдар, Захарийы 5:3, 4 фыст кӕй ис, зӕгъгӕ, ӕлгъыст бацӕудзӕн, «чи давы, уый хӕдзармӕ», «йӕ хӕдзары ӕрбынат кӕндзӕн» ӕмӕ йын йӕ хӕдзар «фесафдзӕн». Йегъовӕйы карз тӕрхон нӕ бауромдзысты нӕдӕр дуарӕхгӕнӕн хъӕдтӕ, нӕдӕр гуыдыртӕ. Йӕ адӕмӕй исчи сусӕгӕй цыфӕнды ӕвзӕр хъуыддӕгтӕ ма араза, уӕддӕр ын сӕ раргом кӕндзӕн. Адӕймаг давгӕ кӕй кӕны, уый йӕ бон у басусӕг кӕнын пъӕлицӕйӕ, йӕ куысты хицауӕй, хистӕр нӕлгоймӕгтӕй кӕнӕ йӕ ныййарджытӕй. Фӕлӕ йӕ Йегъовӕйӕ нӕ басусӕг кӕндзӕн. Ӕмӕ йӕ уый ӕнӕраргомгӕнгӕ нӕ фӕуыдзӕн (Дзут. 4:13). Куыд хорз у, «алы хъуыддаджы дӕр» ӕнӕзӕрдӕхудтӕй архайын кӕй фӕнды, уыцы адӕмы ’хсӕн кӕй стӕм! (Дзут. 13:18).

7. Цы хъуамӕ аразӕм, цӕмӕй нӕ ӕлгъыст, ома Йегъовӕйы тӕрхон, ма баййафа?

⁷ Адӕймаг цыфӕнды ма адава ӕмӕ йӕхи куыдфӕнды ма рӕстытӕ кӕна – Йегъовӕйы цӕсты ахӕм хъуыддӕгтӕ ӕлгъаг сты. Мах цӕрӕм, Йегъовӕ уаг ӕмӕ ӕгъдауы тыххӕй цы уагӕвӕрдтӕ радта, уыдонмӕ гӕсгӕ ӕмӕ архайӕм, цӕмӕй йын йӕ ном мацӕмӕй фӕчъизи кӕнӕм, ӕмӕ уый махӕн стыр кад у. Ӕмӕ хъуамӕ дарддӕр афтӕ кӕнӕм,  цӕмӕй нӕ ма баййафа, йӕ закъӕтты сӕрты зонгӕ-зонын чи хизы, уыдонӕн цы тӕрхон рахаста, уый.

8–10. а) Адӕймаг сомы кӕд ракӕны? б) Паддзах Седеки йӕ сомы куыд фӕсайдта?

⁸ Чи фӕцӕйтахт, уыцы тыхтоны ма ис тӕрхон, Хуыцауы номӕй «мӕнг сомытӕ чи кӕны», уыдонӕн дӕр (Зах. 5:4). Адӕймаг сомы ракӕны, йӕ ныхӕстӕ ӕцӕг кӕй сты, уый равдисын ӕй куы фӕфӕнды йе та дзырд куы ратты, цыдӕр кӕй сараздзӕн кӕнӕ кӕй нӕ сараздзӕн.

⁹ Йегъовӕйы номӕй сомы кӕнынмӕ уӕлӕнгай цӕстӕй кӕсӕн нӕй. Уый базонӕн ис, Иерусалимы фӕстагмӕ паддзах чи уыд, уый хабарӕй. Седеки Йегъовӕйы номӕй расомы кодта, Вавилоны паддзахы дӕлбар кӕй уыдзӕн. Фӕлӕ йӕ ныхас нӕ сӕххӕст кодта. Ӕмӕ йын уый тыххӕй Йегъовӕ тӕрхон рахаста: «Ӕз, удӕгас Хуыцау, сомы кӕнын мӕхицӕй... уый амӕлдзӕн Вавилоны – йӕ сомы чи ницӕмӕ ӕрдардта ӕмӕ йӕ бадзырд чи фехӕлдта, уый паддзахӕй чи сӕвӕрдта, уыцы паддзахы горӕты» (Йез. 17:16).

¹⁰ Паддзах Седеки Хуыцауы номӕй расомы кодта, ӕмӕ Йегъовӕйы раз хӕсджын уыд йӕ ныхас сӕххӕст кӕнын (2 Аз. 36:13). Фӕлӕ йӕ сомы фӕсайдта, ӕмӕ цӕмӕй Вавилонӕй ссӕрибар уыдаиккой, уый тыххӕй Египетмӕ ӕххуысмӕ арвыста. Фӕлӕ йын Египет дӕр ницӕмӕй баххуыс кодта (Йез. 17:11–15, 17, 18).

11, 12. а) Адӕймаг дзырд цы хъуыддӕгты тыххӕй ратты, уыдонӕй ӕппӕты ахсджиагдӕр кӕцы у? б) Нӕхи Йегъовӕйӕн кӕй снывонд кодтам, уый алы бон дӕр нӕ цардӕй куыд хъуамӕ уа бӕрӕг?

¹¹ Седекийы хабарӕй бӕрӕг у, искӕмӕн истӕй тыххӕй дзырд куы раттӕм, уӕд ӕй Йегъовӕ кӕй фехъусы. Цы фӕзӕгъӕм, уымӕ уӕлӕнгай цӕстӕй никуы фӕкӕсы, ӕмӕ нӕ цӕмӕй райгонд уа, уый тыххӕй-иу хъуамӕ нӕ дзырд сӕххӕст кӕнӕм (Пс. 76:11).  Адӕймаг дзырд цы хъуыддӕгты тыххӕй ратты, уыдонӕй ӕппӕты ахсджиагдӕр у, йӕхи Йегъовӕйӕн кӕй снывонд кӕны, уый, ома йын дзырд ратты, йӕ царды цыфӕнды ма ’рцӕуа, уӕддӕр ын кӕй лӕггад кӕндзӕн.

¹² Нӕ бон куыд у, Йегъовӕйӕн цы дзырд радтам, уый ӕххӕст кӕнын? Мах «алы бон дӕр» бахауӕм стыр ӕмӕ гыццыл фӕлварӕнты, ӕмӕ нӕхи куыд фӕдарӕм, уымӕй бӕрӕг вӕййы, Йегъовӕмӕ ӕввахс стӕм ӕви нӕ (Пс. 61:8). Зӕгъӕм, куысты кӕнӕ скъолайы чидӕр йӕхи афтӕ дары, цыма йӕ зӕрдӕмӕ цӕуыс, ӕмӕ дӕм ныхасӕппарӕнтӕ кӕны кӕнӕ демӕ хъазӕн митӕ кӕны. Уӕд куыд бакӕндзынӕ? Бамбарын ын кӕндзынӕ, ахӕм митӕ дӕ зӕрдӕмӕ кӕй нӕ цӕуынц, ӕмӕ афтӕмӕй равдисдзынӕ, Йегъовӕйы коммӕ кӕсын дӕ кӕй фӕнды? (Ӕмб. 23:26). Кӕд дӕ бинонтӕй дӕу йеддӕмӕ Йегъовӕйӕн ничи лӕггад кӕны, уӕд Йегъовӕмӕ фӕкувыс, цӕмӕй, чырыстонӕн куыд ӕмбӕлы, дӕхи афтӕ дарай? Алы бон дӕр Йегъовӕйӕн йӕ уарзондзинад ӕмӕ йӕ разамынды тыххӕй бузныг фӕзӕгъыс? Библи бакӕсынӕн алы бон дӕр рӕстӕг ссарыс? Нӕхи Йегъовӕйӕн куы снывонд кодтам, уӕд ын, зӕгъӕн ис, дзырд радтам, ӕппӕт адӕттӕ дӕр кӕй араздзыстӕм. Йӕ коммӕ куы кӕсӕм ӕмӕ йын ӕппӕт зӕрдӕйӕ куы лӕггад кӕнӕм, уӕд уымӕй ӕвдисдзыстӕм, кӕй йӕ уарзӕм ӕмӕ уымӕн кӕй цӕрӕм. Нӕ лӕггад нӕ цардимӕ ӕнгом баст у. Ӕмӕ нын Йегъовӕ зӕрдӕ ӕвӕры, иузӕрдион ыл кӕй стӕм, уый тыххӕй нын диссаджы цард кӕй балӕвар кӕндзӕн (Дык. з. 10:12, 13).

13. Ӕхсӕзӕм цӕстылуайӕнӕй цы ис базонӕн?

¹³ Захарийы ӕхсӕзӕм цӕстылуайӕнӕй цы базыдтам? Кӕд Йегъовӕйы уарзӕм, уӕд давгӕ нӕ кӕндзыстӕм ӕмӕ-иу нӕ сомытӕ дӕр нӕ фӕсайдзыстӕм. Базыдтам ма, Йегъовӕ израилӕгтыл йӕ къух кӕй нӕ ауыгъта, кӕд арӕх рӕдыдысты, уӕддӕр. Уый ӕмбӕрста, се знӕгтӕ-иу сӕ алырдыгӕй куы ӕрылхъывтой, уӕд-иу тынг уынгӕджы кӕй уыдысты. Йегъовӕ йӕ дзырд кӕй сӕххӕст кӕны, уымӕй нын ӕвдисы, мах дӕр афтӕ кӕй хъуамӕ кӕнӕм. Ӕмӕ нын нӕ дзырд сӕххӕст кӕнынӕн йӕхӕдӕг дӕр ӕххуыс кӕндзӕн. Куыд нын ӕххуыс кӕны, уымӕн иу цӕвиттон у, зӕрдӕ нын кӕй ӕвӕры, тагъд ӕнӕхъӕн зӕххӕй дӕр фыддзинад кӕй фесафдзӕн, уый. Ӕмӕ ма Захари ноджыдӕр цы цӕстылуайӕн федта, уый дӕр ууыл дзурӕг у.

14, 15. а) Захари ӕвдӕм цӕстылуайӕны цы федта? (Кӕс 2-аг нывмӕ статьяйы райдианы.) б) Чыргъӕды мидӕг цы сылгоймаг бадти, уый цӕмӕ амоны? Зӕд уыцы чыргъӕд цӕмӕн сӕхгӕдта?

¹⁴ Уый фӕстӕ зӕд Захарийӕн загъта: «Акӕс-ма». Ӕмӕ Захари федта, «барӕн къус» кӕй ӕрбахӕстӕг кӕны. Ам «барӕн къус»-ӕй тӕлмац ныхас комкоммӕ у «ефӕ», ӕмӕ амоны барӕн чыргъӕдмӕ дӕр. (Бакӕс Захарийы 5:5–8.) Уыцы чыргъӕдӕн йӕ сӕр уыд здыйӕ конд. Ӕмӕ йӕ куы систой, уӕд Захари федта, йӕ мидӕг кӕй бады сылгоймаг. Зӕд ын бамбарын кодта, уыцы сылгоймаг кӕй у «Фыддзинад». Хӕрзаг, Захарийӕн йӕ хъуын арц слӕууыд, уыцы сылгоймаг чыргъӕдӕй куы сцӕйхызт, уӕд! Фӕлӕ йӕ зӕд уайтагъд фӕстӕмӕ чыргъӕдмӕ ныппӕрста ӕмӕ чыргъӕд уӕззау сӕрӕй ӕрӕхгӕдта. Уыдӕттӕ цӕуыл дзурӕг сты?

¹⁵ Ацы цӕстылуайӕн нӕ фидар ныфс уадзы, Йегъовӕ йӕ адӕмы ’хсӕн иу фыдхъуыддагмӕ дӕр ӕнцад кӕй нӕ кӕсдзӕн. Ахӕмӕй дзы исты куы фена, уӕд ын ӕнӕ ракӕ-бакӕйӕ кӕрон скӕндзӕн (1 Кор. 5:13). Уый зӕд дӕр равдыста, чыргъӕд уайтагъд фӕстӕмӕ уӕззау сӕрӕй кӕй ӕрӕхгӕдта, уымӕй.

16. Чыргъӕд цы баци? (Кӕс 3-аг нывмӕ статьяйы райдианы.)

¹⁶ Уый фӕстӕ Захари федта, къадзы базырты хуызӕн тыхджын базыртӕ кӕмӕн уыд, дыууӕ ахӕм сылгоймаджы. (Бакӕс Захарийы 5:9–11.) Чыргъӕды цы сылгоймаг бадти, уый хуызӕн ӕппындӕр нӕ уыдысты. Уыдон сӕ тыхджын базыртӕй уыцы чыргъӕд ӕд «Фыддзинад» хӕрдмӕ систой ӕмӕ атахтысты. Цымӕ йӕ кӕдӕм ахастой? «Сеннаары  зӕхмӕ», ома Вавилонмӕ. Фӕлӕ уырдӕм цӕмӕн?

17, 18. а) Вавилон «Фыддзинадӕн» аккаг бынат цӕмӕн уыд? б) Фыддзинадмӕ цы цӕстӕй хъуамӕ кӕсӕм?

¹⁷ Захарийы рӕстӕджы израилӕгтӕ хорз бамбӕрстаиккой, «Фыддзинадӕн» Вавилон аккаг бынат цӕмӕн уыд, уый. Уыдон зыдтой, уыцы горӕт алы фыдхъуыддӕгтӕй ӕмӕ ӕнӕгъдау митӕй йедзаг кӕй уыд. Адӕм дзы куывтой мӕнг хуыцӕуттӕн, ӕмӕ Захари ӕмӕ иннӕ дзуттӕгтӕ уым куы цардысты, уӕд сӕ алы бон дӕр хъуыди ӕппӕт тыхтӕй архайын, цӕмӕй сыл уыцы адӕмы зондахаст ма бандӕвтаид. Уӕдӕ ацы цӕстылуайӕн уыд фидар бӕлвырдгӕнӕн, Йегъовӕ сыгъдӕг дин фӕчъизи кӕнын кӕй нӕ бауадздзӕн, уымӕн.

¹⁸ Уыцы цӕстылуайӕн ма дзуттӕгтӕн сӕ зӕрдыл ӕрлӕууын кодта, сӕхиуыл дӕр уыцы хӕс кӕй уыд, цӕмӕй раст дин фӕчъизи кӕнын ма бауагътаиккой. Хуыцауы адӕмы ’хсӕн фыддзинадӕн бынат нӕй. Йегъовӕ нӕ абон ӕрбакодта йӕ сыгъдӕг организацимӕ, ӕмӕ уым уынӕм, куыд нӕ уарзы ӕмӕ нӕ куыд хъахъхъӕны, уый. Уымӕ гӕсгӕ ныл ис хӕс, цӕмӕй йын йӕ организацийы сыгъдӕгдзинад хъахъхъӕнӕм. Йегъовӕйы адӕмӕн хъуамӕ фыддзинадимӕ иумӕйагӕй мацы уа.

19. Захари цы диссаджы цӕстылуайӕнтӕ федта, уыдон абон махӕн цӕуыл дзурӕг сты?

¹⁹ Ӕвзӕр хъуыддӕгтӕ чи кӕны, уыдон хъуамӕ сӕ хъус лӕмбынӕг ӕрдарой Захарийы ӕхсӕзӕм ӕмӕ ӕвдӕм цӕстылуайӕнмӕ. Йегъовӕ фыддзинадӕн ӕнустӕм нӕ быхсдзӕн. Йӕ лӕггадгӕнджытӕ кӕй стӕм, уымӕ гӕсгӕ хъуамӕ фыддзинадӕй не сӕфт уынӕм. Ацы цӕстылуайӕнтӕ ма нын ууыл дзурӕг сты, ӕмӕ, нӕ уарзӕгой Фыды зӕрдӕ куы рухс кӕнӕм, уӕд нӕ хъахъхъӕндзӕн ӕмӕ нын арфӕ кӕндзӕн, ӕмӕ нӕ йе ’лгъыст нӕ баййафдзӕн. Ацы фыддунейы сыгъдӕг цард кӕнай, уый ӕнцон нӕу, фӕлӕ нын Йегъовӕйы фӕрцы уый алкӕддӕр ӕнтысдзӕн. Фӕлӕ йӕ куыд базонӕм, раст дин кӕй фӕуӕлахиз уыдзӕн? Уымӕй уӕлдай ма йӕ зонӕм, стыр бӕллӕх хӕстӕгӕй-хӕстӕгдӕр кӕй кӕны. Ӕмӕ нӕ бон цӕй фӕрцы у фидарӕй ӕууӕндын, Йегъовӕ йӕ организаци кӕй бахъахъхъӕндзӕн? Ацы фарстатыл аныхас кӕндзыстӕм иннӕ статьяйы.