1–3. а) Йеговӕ ӕ адӕнмӕ Захарий ку рарвиста, уӕд цӕхуӕн уавӕри адтӕнцӕ? б) Йеговӕ ӕ адӕнӕн цӕмӕн загъта, раздӕхетӕ мӕмӕ, зӕгъгӕ?

ТӔХГӔ тухтонӕ, тӕскъи ӕхгӕд силгоймаг, удта, къадзи хузӕн пъазуртӕ кӕбӕл ес ӕма тӕхгӕ ка кӕнуй, дууӕ уӕхӕн силгоймаги. Атӕ ӕнцӕ, Захари ке фӕууидта, еци цӕстӕбӕлуайӕнтӕ (Зах. 5:1, 7–9). Йеговӕ ӕ пахампарӕн аци дессаги цӕстӕбӕлуайӕнтӕ цӕмӕн бавдиста? Израилӕгтӕ еци рӕстӕг цӕхуӕн уавӕри адтӕнцӕ? Ӕма Захарий цӕстӕбӕлуайӕнтӕ абони махӕн цӕбӕл дзорӕг ӕнцӕ?

² Нӕ эри размӕ 537 анзи Хуцауи адӕнбӕл ӕркодта цийни рӕстӕг. Етӕ 70 анзи Вавилони цагъартӕ адтӕнцӕ ӕма нур иссӕнцӕ сӕребарӕ. Еци игъӕлдзӕгӕй февналдтонцӕ Йерусалими ковӕндонӕ рӕвдзӕ кӕнунмӕ, цӕмӕй си нӕуӕгӕй Йеговӕн кувтайуонцӕ.  Еу анзмӕ ин ӕ бундор райвардтонцӕ. Адӕн фур цийнӕй «гъӕр кодтонцӕ, ӕма сӕ гъӕр идардмӕ игъустӕй» (Езд. 3:10–13). Фал еци куст ке зӕрдӕмӕ нӕ цудӕй, етӕ ба сӕ бонӕй-бонмӕ хъӕбӕрдӕр ӕфхуардтонцӕ, ӕма еу афони израилӕгтӕ сӕ къохтӕ ӕруагътонцӕ ӕма куст ӕрлӕудтӕй. Уой фӕсте сӕхе хӕдзӕрттӕ кӕнунбӕл фӕцӕнцӕ, удта сӕ зӕнхити куст кодтонцӕ. 16 анзей фӕсте дӕр ма Йегови ковӕндонӕ рӕвдзӕ нӕма адтӕй. Хуцауи адӕнӕн гъудӕй сӕ зӕрдӕбӕл ӕрлӕуун кӕнун, Йеговӕ сӕ Вавилонӕй цӕмӕн раздахта, уой, удта син балӕдӕрун кӕнун, айдагъ сӕхе сагъӕс ке гъӕуама ма кӕнонцӕ. Йегови фӕндадтӕй, цӕмӕй ин ӕ адӕн зӕрдиагӕй лӕггадӕ кодтайуонцӕ ӕма макӕмӕй тарстайуонцӕ.

³ Уомӕ гӕсгӕ сӕмӕ нӕ эри размӕ 520 анзи Йеговӕ ӕ пахампар Захарий рарвиста, цӕмӕй син сӕ зӕрдӕбӕл ӕрлӕуун кодтайдӕ, Вавилонӕй сӕ цӕмӕн исуӕгъдӕ кодта, уой. Хӕдӕгай, Захарий ном комкоммӕ нисан кӕнуй «Йеговӕ ӕргъуди кодта». Израилӕгтӕ Йегови хуарздзийнӕдтӕ феронх кодтонцӕ, фал сӕ Йеговӕ ба нӕ байронх ӕй. (Бакӕсӕ Захари 1:3, 4.) Йеговӕ зӕрдӕ байвардта, ӕ адӕн ин нӕуӕгӕй куд ӕмбӕлуй, уотӕ ке ковдзӕнцӕ. Удта ма син бафӕдзахста, сӕ лӕггадӕй син арази ке нӕ уодзӕй, хуӕздӕрӕй сӕмӕ ци ес, уой ин ку нӕ дӕттонцӕ, уӕд. Мадта ӕркӕсӕн, Захарий ӕхсӕзӕймаг ӕма ӕвдӕймаг цӕстӕбӕлуайӕнтӕмӕ ӕма базонӕн, Йеговӕ ӕ адӕни архайунмӕ куд баразӕнгард кодта ӕма си абони мах цӕбӕл ахур кӕнӕн.

4. Захари ӕхсӕзӕймаг цӕстӕбӕлуайӕни ци фӕууидта? Тухтонӕбӕл дууердиги дӕр финст цӕмӕн адтӕй? (Кӕсӕ 1 хузӕмӕ статьяй райдайӕни.)

⁴ Захарий 5 сӕр райдайуй цидӕр ӕнахур цӕстӕбӕлуайӕнӕй. (Бакӕсӕ Захари 5:1, 2.) Захари уинуй тухтонӕ куд фӕттӕхуй, уой. Ӕ дӕргъӕ адтӕй фараст метри ӕ уӕрхӕ ба – цуппар ӕма ӕрдӕг. Тухтонӕ игон адтӕй ӕма ӕ дууӕ фарсебӕл дӕр финст адтӕй тӕрхони хабар (Зах. 5:3). Рагидзаманти тухтӕнттӕн ӕрмӕстдӕр сӕ еу фарсбӕл финстонцӕ, фал аци тухтонӕн ба ӕ дууӕ фарсебӕл дӕр финст ке адтӕй, уомӕй бӕрӕг ӕй, еци хабар хъӕбӕр ӕхсидзгӕ ке адтӕй.

5, 6. Давгӕ ка кӕнуй, еци адӕнмӕ Йеговӕ цӕхуӕн цӕстӕй кӕсуй?

⁵ Бакӕсӕ Захари 5:3, 4. Алли адӕймаг дӕр ӕ гъуддӕгти туххӕй Хуцауи рази дзуапп дӕтдзӕй. Уӕлдайдӕр ба е хауй Хуцауи адӕнмӕ, уомӕн ӕма ин етӕ ӕ ном хӕссунцӕ. Етӕ ’й уарзунцӕ ӕма ’й зонунцӕ, давгӕ ку кӕнонцӕ, уӕд ин ӕ ном ке ӕгадӕ кӕндзӕнцӕ (Ӕмб. 30:8, 9). Еуӕй-еу адӕнмӕ уотӕ кӕсуй, ӕма давун алкӕд лӕгъуз нӕ ’й, уӕлдайдӕр ба хуарз гъуддаги рӕуонӕй. Фал дин цийфӕнди рӕуонӕ ма уа, уӕддӕр е уобӕл дзорӕг уодзӕй, ӕма дин дӕ фӕндтӕ Хуцауӕй, ӕ номӕй ӕма закъӕнттӕй уӕлдӕр ӕнцӕ.

⁶ Захарий 5:3, 4 куд финст ӕй, уомӕ  гӕсгӕ ӕлгъист бацӕудзӕй «ка давуй, уой хӕдзарӕмӕ», «ӕ хӕдзари ӕрбунат кӕндзӕй» ӕма ’й «фесафдзӕй». Мадта Йегови тӕрхонӕй неке райервӕздзӕй. Хуцауи адӕнӕй неке бон исуодзӕй ӕ тӕрегъӕдтӕ баримӕхсун. Ка радавта, уой нӕдӕр полиций косгутӕ, нӕдӕр ӕ кусти хецау, нӕдӕр хестӕр нӕлгоймӕгтӕ ӕма нӕдӕр ӕ ниййергутӕ ку нӕ базононцӕ, уӕддӕр Хуцауӕй ба баримӕхсӕн неци ес (Дзиуит. 4:13). Махӕн хъӕбӕр ӕхцӕуӕн ӕй, «алли гъуддаги дӕр... рӕстӕй архайун» ке фӕндуй, уӕхӕн адӕни астӕу ке цӕрӕн! (Дзиуит. 13:18).

7. Тӕхгӕ тухтони финст ка ’рцудӕй, еци тӕрхонӕй нӕ бон куд ӕй нӕхе бахезун?

⁷ Йеговӕ давунмӕ хъӕбӕр лӕгъуз цӕстӕй кӕсуй. Махӕн устур кадӕ ӕй Йегови уагӕвӕрдтӕмӕ гӕсгӕ цӕрун, удта ин ӕ кадгин ном ка фегадӕ кӕндзӕй, уӕхӕн гъуддӕгтӕй нӕхе хезун. Ӕрмӕстдӕр уотемӕй нӕ бон ӕй нӕхе бахезун, Йеговӕ, ӕ закъӕнттӕ ин ка ихалуй, уонӕн ци тӕрхон рахаста, уомӕй.

8–10. а) Адӕймаг соми кӕд ракӕнуй? б) Седеки цӕй туххӕй расоми кодта ӕма ӕ соми куд фехалдта?

⁸ Тухтони иннӕ тӕрхон хауй, Хуцауи номӕй «мӕнгӕ сомитӕ ка кӕнуй», уонӕмӕ (Зах. 5:4). Адӕймаг расоми кӕнуй, цӕмӕй иннетӕ баууӕндонцӕ, ӕцӕгӕйдӕр раст ке дзоруй, уобӕл, кенӕ ба расоми кӕнуй, цӕхуӕндӕр гъуддаг ке нӕ бакӕндзӕй кенӕ ке бакӕндзӕй, уой туххӕй.

⁹ Хуцауи номӕй ка расоми кӕнуй, е ӕхемӕ уӕлдай устурдӕр ихӕс райсуй. Е бӕрӕг ӕй Седекий хабарӕй.  Седеки Израили паддзах ку адтӕй, уӕд Хуцауи номӕй расоми кодта, ӕхе Вавилони паддзахи дӕлбарӕ ке бакӕндзӕй. Фал ӕ дзурд не ’сӕнхӕст кодта. Уой туххӕй Йеговӕ Седекийӕн тӕрхон рахаста: «Е рамӕлдзӕй Вавилони – ӕ соми ка нецӕмӕ ӕрдардта ӕма ӕ бадзурд ка фехалдта, уой паддзахӕй ка исӕвардта, еци паддзахи горӕти» (Йез. 17:16).

¹⁰ Паддзах Седеки Йегови номӕй расоми кодта, ӕма Йеговӕ дӕр ӕнгъӕлмӕ кастӕй, ӕ дзурд ке исӕнхӕст кӕндзӕй, уомӕ (2 Анз. 36:13). Фал Седеки ӕ дзурдӕн лӕг нӕ разиндтӕй ӕма Вавилони уацарӕй фӕййервӕзуни туххӕй ӕнхус Египетӕй ракурдта. Фал ин е неци фенхус ӕй (Йез. 17:11–15, 17, 18).

11, 12. а) Нӕ царди ци дзурдтӕ равардтан, уонӕй тӕккӕ сӕйрагдӕр кӕци ӕй? б) Нӕхе Хуцауӕн ке иснивонд кодтан, е нӕ цардбӕл куд гъӕуама бӕрӕг кӕна?

¹¹ Седекий хабарӕй фӕууинӕн ес, Йеговӕ цийфӕнди цӕстӕй ке нӕ кӕсуй, ци дзурд ин раттӕн, уомӕ, ӕма ни цӕмӕй арази уа, уой туххӕй ба гъӕуама ци дзурд равардтан, уой алкӕддӕр ӕнхӕст кӕнӕн (Пс. 76:11). Уомӕ хауй, Йеговӕн нӕхе ку иснивонд кодтан, уӕд ин ци дзурд равардтан, е дӕр. Е нӕ царди тӕккӕ ӕхсидзгӕдӕр къахдзӕф адтӕй. Мах ин дзурд равардтан алкӕддӕр ин ке лӕггадӕ кӕндзиан, цийфӕнди уавӕрти ма бахауӕн, уӕддӕр.

¹² Цума цӕмӕй бӕрӕг уодзӕй, Хуцауӕн ци дзурд равардтан, уой ке ӕнхӕст кӕнӕн? Алли бон дӕр не ’ууӕндундзийнадӕ фӕлвӕрд цӕуй устур кенӕ минкъий гъуддӕгти. Ӕма еци гъуддӕгти Йеговӕбӕл еузӕрдон ку уӕн, уӕд бӕрӕг уодзӕй, ци дзурд ин равардтан, уомӕ уӕлӕнгай цӕстӕй ке нӕ кӕсӕн (Пс. 61:8). Зӕгъӕн, скъолай кенӕ дин кусти еске ку ’вдеса, ӕ зӕрдӕмӕ ке цӕуис, уой, уӕд дӕхе куд дардзӕнӕ? Гъуддаг еци фӕдбӕл ниллух кӕндзӕнӕ ӕма ’й бавдесдзӕнӕ, Йеговӕмӕ игъосун дӕ ке фӕндуй? (Ӕмб. 23:26). Кенӕ дӕ бийнонтӕй айдагъ ду ку уай Ӕвдесӕн, уӕд Йеговӕй ӕнхус кордзӕнӕ, цӕмӕй идарддӕр дӕр Хуцауи надбӕл цӕуай? Цийфӕнди уавӕри дӕр Йеговӕй боз уодзӕнӕ ӕ уарзондзийнадӕ ӕма ӕ разамунди туххӕй? Библи алли бон дӕр кӕсдзӕнӕ? Аци гъуддӕгтӕ дӕр хаунцӕ, нӕхе Йеговӕн ку иснивонд кодтан, уӕд ин ци дзурд равардтан, уомӕ. Коммӕгӕс ин ку уӕн ӕма нӕмӕ хуӕздӕрӕй ци ес, уой ин ку дӕттӕн, уӕд бӕрӕг уодзӕй, ке ’й уарзӕн ӕма ибӕл еузӕрдон ке ан. Мах Йеговӕн ӕгас зӕрдӕй лӕггадӕ кӕнӕн ӕма нӕмӕ нӕ еузӕрдондзийнади туххӕй дессаги федӕн ӕнгъӕлмӕ кӕсуй (Дук. з. 10:12, 13).

13. Захарий ӕхсӕзӕймаг цӕстӕбӕлуайӕнӕй цӕбӕл ахур кӕнӕн?

¹³ Захарий ӕхсӕзӕймаг цӕстӕбӕлуайӕнӕй бӕрӕг ӕй, Йегови ку уарзӕн, уӕд ке некӕд давдзиан, удта ци дзурд равардтан, уой ке некӕд фехалдзиан. Уомӕй уӕлдай ма базудтан, Йеговӕ израилӕгти ке нӕ ниууагъта ӕма син зӕрдӕ цӕмӕй байвардта, уой ке исӕнхӕст кодта, кӕд берӕ рӕдудтитӕ фӕккодтонцӕ, уӕддӕр. Йеговӕ ’й лӕдӕрдтӕй, хъӕбӕр зин  уавӕри ке адтӕнцӕ, уомӕн ӕма сӕ алливарс знӕгтӕ цардӕнцӕ. Йеговӕ нин ӕхецӕй ӕвдесуй, ци дзурд равардтан, уой куд ӕнхӕст кӕнун гъӕуй, уой. Ӕма нӕ бон ӕй федарӕй ӕууӕндун, уотӕ ку архайӕн, уӕд нин ке ӕнхус кӕндзӕй, уобӕл. Йеговӕ нин нифс ӕвӕруй дессаги федӕнӕй. Тагъд рӕстӕги зӕнхӕбӕл ци фуддзийнадӕ ес, уой фесафдзӕй. Ӕма еци нифси туххӕй нӕ бон ӕй бакӕсун Захарий иннӕ цӕстӕбӕлуайӕни.

14, 15. а) Захари ӕвдӕймаг цӕстӕбӕлуайӕни ци фӕууидта? (Кӕсӕ 2 хузӕмӕ статьяй райдайӕни.) б) Тӕскъи хурфи, еци силгоймаг ка адтӕй ӕма изӕд тӕскъи сӕр цӕмӕн фехгӕдта?

¹⁴ Захари тӕхгӕ тухтонӕ ку фӕууидта, уӕд ин изӕд загъта: «Дӕ хуарзӕнхӕй искӕсай». Цума Захари ӕ ӕвдӕймаг цӕстӕбӕлуайӕни ци фӕууидта? Хӕстӕгдӕргӕнгӕ имӕ цудӕй «барӕн къос», «издийӕй конд тумбул сӕрӕй» ӕхгӕд ка адтӕй, уӕхӕн тӕскъӕ. (Бакӕсӕ Захари 5:5–8.) Тӕскъи сӕр ку исигон кодтонцӕ, уӕд Захари фӕууидта, ӕ хурфи «силгоймаг» ке бадтӕй. Изӕд ин балӕдӕрун кодта, еци силгоймаг «Фуддзийнадӕ» ке адтӕй. Расагъӕс кӕнӕ, Захари куд истухстӕй, еци силгоймаг ӕндӕмӕ лӕсун ку райдӕдта, уӕд. Фал ӕй изӕд фӕстӕмӕ нитътъунста ӕма тӕскъӕбӕл ӕ уӕззау сӕр ӕрӕхгӕдта. Цума еци цӕстӕбӕлуайӕн ци нисан кодта?

¹⁵ Еци цӕстӕбӕлуайӕнӕй бӕрӕг ӕй: Йеговӕ, ӕ адӕни астӕу нецӕхуӕн  фуддзийнадӕн бухсдзӕй. Ести цъумур гъуддаг ку фӕууинуй, уӕд ӕй еци фӕдбӕл фесафуй (1 Кор. 5:13). Ӕма е бӕрӕг ӕй, изӕд тӕскъӕ куд тагъд фехгӕдта, уомӕй.

16. а) Тӕскъӕ идарддӕр ци бацӕй? (Кӕсӕ 3 хузӕмӕ статьяй райдайӕни.) б) Къадзи хузӕн пъазуртӕ кӕбӕл адтӕй, еци силгоймӕгтӕ тӕскъи хӕццӕ кумӕ фӕттахтӕнцӕ?

¹⁶ Идарддӕр Захари уинуй, къадзи хузӕн пъазуртӕ кӕбӕл адтӕй, дууӕ уӕхӕн силгоймаги. (Бакӕсӕ Захари 5:9–11.) Еци силгоймӕгтӕ, тӕскъи ка бадтӕй, уой хузӕн ӕппундӕр н’ адтӕнцӕ. Етӕ сӕ устур пъазуртӕбӕл ӕрбатахтӕнцӕ, «Фуддзийнадӕ» кӕми адтӕй, еци тӕскъӕ исистонцӕ ӕма кумӕдӕр фӕттахтӕнцӕ. Цума кумӕ? «Сеннаари зӕнхӕмӕ», гъома Вавилонмӕ. Уордӕмӕ ба цӕмӕн?

17, 18. а) «Фуддзийнадӕн» Вавилон тӕккӕ хуӕздӕр бунат цӕмӕн адтӕй? б) Фуддзийнадӕмӕ цӕхуӕн цӕстӕй гъӕуама кӕсӕн?

¹⁷ Захарий рӕстӕги ка цардӕй, етӕ ’й балӕдӕрдтайуонцӕ, «Фуддзийнадӕн» Вавилон тӕккӕ хуӕздӕр бунат цӕмӕн адтӕй, уой. Еци горӕт хъӕбӕр ихӕлд адтӕй, берӕ фудгъуддӕгтӕ си цудӕй, удта си адӕн мӕнгӕ хуцӕуттӕн кувтонцӕ. Уоми цӕргӕй, дзиуиттӕгтӕ ӕма Захари ӕхуӕдӕг дӕр алли бон дӕр тох кодтонцӕ, цӕмӕй сӕбӕл еци цъумур адӕни зундахаст ма рабӕрӕг адтайдӕ. Мадта Захарий цӕстӕбӕлуайӕнӕй бӕрӕг адтӕй, Йеговӕ раст дин ницъцъумур кӕнун ке нӕ бауагътайдӕ!

¹⁸ Еци цӕстӕбӕлуайӕн ма дзиуиттӕгтӕн сӕ зӕрдӕбӕл лӕуун кодта, цӕхуӕн ихӕс сӕбӕл адтӕй, уой. Гъӕуама сӕ дин цъумур кӕнун ма бауагътайуонцӕ. Абони Йеговӕ мах дӕр ӕрбахудта, ӕ уарзондзийнадӕ ин кӕми лӕдӕрӕн ӕма нин ӕдас кӕми ӕй, уӕхӕн кӕдзос организацимӕ. Ӕма ни алкӕмӕндӕр ӕ ихӕс ӕй, еци кӕдзосдзийнадӕ гъӕуай кӕнун. Фуддзийнадӕн гъӕуама Йегови адӕни астӕу бунат ма уа.

19. Захарий цӕстӕбӕлуайӕнтӕ нин абони цӕбӕл дзорӕг ӕнцӕ?

¹⁹ Захарий ӕхсӕзӕймаг ӕма ӕвдӕймаг цӕстӕбӕлуайӕнти карз фӕдзӕхст ес, лӕгъуз гъуддӕгтӕ ка кӕнуй, уонӕн. Йеговӕ фуддзийнадӕн некӕд бухсдзӕй. Мах ба ӕ лӕггадгӕнгутӕ ке ан, уомӕ гӕсгӕ гъӕуама фуддзийнадӕй не ’сӕфт уинӕн. Аци цӕстӕбӕлуайӕнтӕ нин нифс дӕттунцӕ, нӕ уӕларвон Фиди зӕрдӕ ку рохс кӕнӕн, уӕд нӕ ке нӕ ниууадздзӕй, фал нӕ гъӕуай кӕндзӕй ӕма нин арфӕ кӕндзӕй. Аци цъумур дуйней цӕргӕй кӕдзосдзийнадӕ гъӕуай кӕнун хъӕбӕр зин ӕй, фал нин Йеговӕ ӕнхус кӕндзӕй. Фал раст дин ке ӕрфедар уодзӕй, уобӕл федарӕй ӕууӕндун нӕ бон цӕмӕн ӕй? Цӕмӕ гӕсгӕ нӕ бон ӕй зӕгъун, Йеговӕ ӕ организаци ке гъӕуай кӕндзӕй, уӕлдайдӕр ба нур, устур бӕллӕх кӕми фӕххӕстӕгдӕр кӕнуй, еци рӕстӕг? Аци фарстатӕбӕл радзубанди кӕндзиан фӕстаг статьяй.