1-3. (a) Long taem bilong Zechariah, wanem nao happen long olketa Israelite? (b) Why nao Jehovah askem pipol bilong hem for ‘kam bak long hem’?

WANFALA scroll wea flae, wanfala woman insaed container, and tufala woman wea garem wing olsem bird olketa flae long skae. Olketa spesol vision hia stap long buk bilong Zechariah. (Zech. 5:1, 7-9) Why nao Jehovah showim olketa barava interesting vision hia long profet bilong hem? Wanem nao happen long olketa Israelite long datfala taem? And wanem nao iumi savve lanem from olketa vision hia?

² Long 537 B.C.E. pipol bilong Jehovah barava hapi tumas. Olketa bin stap olsem prisoner long Babylon for 70 year and then olketa kamap free. Olketa hapi for go bak long Jerusalem and startim bak tru worship long there. Insaed wanfala year nomoa olketa wakem bak faondeson bilong datfala temple. From olketa barava hapi tumas long datfala taem olketa “shout big tumas and nomata  pipol wea stap farawe herem olketa.” (Ezra 3:10-13) Bat gogo, pipol start for againstim olketa taem olketa buildim datfala temple. From olketa barava wikdaon olketa stop nao for buildim datfala temple. Olketa start for busy nomoa for buildim haos and wakem garden bilong olketa seleva. So for sixtinfala year olketa no duim eni waka for finisim temple bilong Jehovah. God need for remindim olketa for kam bak long hem and no busy for duim olketa samting for olketa seleva. Jehovah laekem olketa for worshipim hem witim strong and wei for no fraet.

³ So long year 520 B.C.E., Jehovah sendem go profet Zechariah for helpem pipol bilong hem for tingim bak why hem mekem olketa kamap free from Babylon. Hem interesting hao nem bilong Zechariah minim “Jehovah Hem Rememberim.” Nomata olketa Israelite forgetim samting wea Jehovah duim for olketa, Jehovah still rememberim olketa. (Readim Zechariah 1:3, 4.) Jehovah promis for helpem olketa for startim bak tru worship. Bat, hem warnim olketa sapos olketa no worshipim hem witim full heart, bae hem no acceptim datwan. Bae iumi story raonem mek-six and mek-seven vision bilong Zechariah and bae iumi lane abaotem samting wea Jehovah duim for helpem olketa Israelite bifor. And tu, hao tufala vision hia savve helpem iumi distaem.

4. Wanem nao Zechariah lukim long mek-six vision bilong hem, and why nao datfala message stap long tufala saed bilong scroll? (Lukim piksa 1 long start bilong study.)

⁴ Long start bilong Zechariah chapter 5, hem storyim wanfala interesting vision. (Readim Zechariah 5:1, 2.) Zechariah lukim wanfala scroll flae long skae. Datfala scroll hem samting olsem 9 meter long and waed bilong hem 4.5 meter. Scroll hia open and wanfala message stap long hem. (Zech. 5:3) Toktok wea olketa raetem insaed hem serious bikos hem judgment message. Long bifor, pipol savve raet nomoa long wansaed bilong scroll. Bat disfala message hem barava important, dastawe olketa raetem long tufala saed bilong datfala scroll.

5, 6. Wanem nao tingting bilong Jehovah abaotem evri difren wei for steal?

⁵ Readim Zechariah 5:3, 4. Evri man mas ansa long God for samting wea olketa duim. Diswan barava important for pipol bilong Jehovah for tingim, bikos olketa garem nem bilong hem. From olketa lovem God, olketa savve wei for steal bae spoelem nem bilong hem. (Prov. 30:8, 9) Samfala pipol tingse hem no rong for steal bikos olketa garem gudfala reason for duim datwan. Nomata wanem reason man wea steal hem garem, hem showimaot hem greedy and tinghae tumas long material samting, and hem nating tinghae long nem bilong Jehovah and law bilong hem.

⁶ Tingim hao Zechariah 5:3, 4 sei datfala judgment bae “go insaed long haos bilong man wea steal,” and bae hem “stap insaed datfala haos and finisim.” So diswan minim no eniting savve haed from Jehovah and bae hem judgem pipol bilong hem wea duim eni rong samting. Nomata sapos samwan wea steal hem savve haedem datwan from police, boss bilong hem, olketa elder, or parents, datwan hem nating haed long Jehovah. God bae mek sure evri difren wei for steal bae showaot. (Heb. 4:13) Iumi barava hapi tumas for stap witim pipol wea traem best for “honest long evri samting”!—Heb. 13:18.

7. Hao nao iumi savve misstim judgment bilong datfala scroll wea flae?

⁷ Jehovah barava heitim evri wei for steal. Hem wanfala privilege for savve and obeyim olketa nambawan principle bilong Jehovah, and for no duim eni samting wea bae mek shame long nem bilong hem. Taem iumi duim olsem, iumi bae misstim judgment wea bae kasem olketa wea no obeyim Jehovah.

8-10. (a) Wanem nao hem minim for mekem wanfala serious promis? (b) Wanem serious promis nao King Zedekiah no keepim?

⁸ Narafala warning message wea stap long datfala scroll hem for olketa wea ‘mekem laea promis long nem bilong God.’ (Zech. 5:4) Wanfala serious promis hem for strongim samting wea man talem hem tru. Or for strongim hao bae iu duim or no duim wanfala samting.

⁹ Hem serious samting sapos iumi iusim nem bilong Jehovah taem iumi talem wanfala promis. Iumi savve lane from samting wea happen long Zedekiah, lastfala king wea rul long Jerusalem. Hem iusim nem bilong Jehovah taem hem promis for stap anda long king bilong Babylon. Bat hem no keepim promis bilong hem. From diswan Jehovah sei: “From mi stap for olowe, samting mi talem hem tru. Zedekiah bae dae long Babylon, hom bilong King Nebuchadnezzar wea mekem Zedekiah for kamap king, and wea Zedekiah no faithful for keepim promis and agreement wea hem mekem.”—Ezek. 17:16.

¹⁰ King Zedekiah iusim nem bilong God for mekem datfala promis, so Jehovah expectim hem for keepim datfala promis. (2 Chron. 36:13) Bat Zedekiah no keepim datwan and hem askem Egypt for helpem hem for faet againstim Babylon. Nomata hem duim olsem, olketa no win.—Ezek. 17:11-15, 17, 18.

11, 12. (a) Wanem promis nao hem important winim eni nara promis? (b) Hao nao dedication bilong iumi shud affectim laef bilong iumi?

¹¹ Wanem nao iumi lanem from samting wea happen long Zedekiah? Jehovah herem evri promis wea iumi talem. Hem bae no acceptim iumi sapos iumi no keepim olketa promis wea iumi talem. (Ps. 76:11) Promis wea important tumas winim eni nara promis, hem nao dedication bilong iumi long Jehovah. Taem iumi dedicate long hem, iumi  promis for duim wanem hem laekem for full laef bilong iumi.

¹² Hao nao iumi savve keepim promis bilong iumi long Jehovah? “Evriday” iumi savve kasem olketa difren kaen test. Wei wea iumi deal witim olketa test hia bae showimaot sapos iumi ting strong long promis bilong iumi long Jehovah. (Ps. 61:8) Olsem example, wanem nao bae iu duim sapos samwan wea iu waka witim or skul witim, hem trae for switim feeling bilong iu? Waswe, bae iu obeyim Jehovah and rejectim kaen wei olsem? (Prov. 23:26) Or hao sapos iu nomoa wanfala long famili wea worshipim Jehovah? Waswe, iu askem Jehovah for helpem iu for garem olketa gudfala wei nomata olketa narawan long famili no duim olsem? Waswe, evriday iu prea long Jehovah and thankiu long hem from hem lovem and leadim iu? Waswe, iu markem taem for readim Bible evriday? Taem iumi dedicate long Jehovah, iumi promis for duim olketa samting hia. Taem iumi obey and duim best bilong iumi for Jehovah, iumi showimaot iumi lovem hem and iumi bilong hem. Worship bilong iumi hem main samting long laef bilong iumi. And taem iumi faithful for keepim promis bilong iumi, Jehovah bae givim iumi nambawan future.—Deut. 10:12, 13.

13. Wanem nao iumi savve lanem from mek-six vision bilong Zechariah?

¹³ Mek-six vision bilong Zechariah helpem iumi for luksavve sapos iumi lovem Jehovah bae iumi no steal or brekem promis bilong iumi. Iumi lanem tu, olketa Israelite duim staka mistek bat Jehovah no forgetim olketa. Hem luksavve long hard samting wea olketa feisim from olketa enemy stap raonem olketa. Jehovah showimaot nambawan example for iumi from hem evritaem keepim promis bilong hem. And iumi sure hem bae helpem iumi for duim datwan. Wanfala wei wea Jehovah helpem iumi, hem givim iumi hope hao klosap nao hem bae finisim evri nogud samting from disfala earth. Mek-seven vision bilong Zechariah bae storyim diswan.

14, 15. (a) Wanem nao Zechariah lukim long mek-seven vision bilong hem? (Lukim piksa 2 long start bilong study.) (b) Wanem nao datfala woman insaed container hem piksarem, and why nao hem mas stap insaed datfala container?

¹⁴ Bihaen Zechariah lukim datfala scroll wea flae, wanfala angel talem hem for “luk ap.” Then Zechariah lukim tu wanfala container wea olketa kolem “ephah.” (Readim Zechariah 5:5-8.) Datfala container garem raon lid wea olketa wakem long led wea hevi tumas. Taem lid bilong datfala container hem open, Zechariah lukim “wanfala woman sidaon insaed.” Datfala angel explainim long Zechariah hao datfala woman insaed container hem piksarem “Nogud Samting.” Zechariah hem seke and fraet fogud taem datfala woman stragol for kamaot from datfala container! Bat datfala angel kwiktaem torowem datfala woman go bak insaed and satem bak container witim datfala hevi lid. Wanem nao diswan minim?

¹⁵ Disfala vision mekem iumi trustim hao Jehovah bae no letem eni nogud samting for happen midolwan pipol bilong hem. Sapos hem lukim eni nogud samting happen, hem bae kwiktaem stopem and aotem datwan. (1 Cor. 5:13) Samting wea angel duim for kwiktaem putim bak datfala hevi lid, hem showimaot Jehovah bae kwiktaem duim samting.

16. (a) Wanem nao happen long datfala container? (Lukim piksa 3 long start bilong study.) (b) Tufala woman wea garem wing tekem datfala container go long wea?

¹⁶ Then Zechariah lukim tufala woman wea garem strongfala wing olsem bird wea olketa kolem long stork. (Readim Zechariah 5:9-11.) Tufala woman hia barava difren from  datfala woman insaed container. Tufala flae go and liftim ap and karem datfala container wea datfala “Nogud Samting” stap insaed. Tufala karem go long wea? Tufala tekem datfala container go “long Shinar,” wea hem nao Babylon. Why nao tufala tekem hem go long there?

17, 18. (a) Why nao hem stret for olketa tekem datfala “Nogud Samting” go long Babylon? (b) Wanem nao iumi mas disaed strong for duim?

¹⁷ Olketa Israelite long taem bilong Zechariah luksavve why hem stret for tekem datfala “Nogud Samting” go long Babylon. Babylon hem ples wea fulap long olketa nogud samting olsem olketa heathen teaching and wei for durong. Taem Zechariah and olketa nara Jew stap long there, olketa waka hard evriday for no letem datwan affectim olketa. So disfala vision pruvim long olketa hao Jehovah bae keepim tru worship for klin.

¹⁸ Datfala vision remindim olketa Jew, hao olketa garem responsibility for keepim worship bilong olketa klin. Iumi tu mas no letem eni nogud samting for gohed happen midolwan pipol bilong Jehovah. Jehovah letem iumi for kam insaed organization bilong hem wea klin and wea iumi savve kasem love and protection bilong hem. Each wan long iumi garem responsibility for keepim organization bilong Jehovah klin. Iumi mas no letem eni nogud samting gohed happen midolwan pipol bilong Jehovah.

19. Wanem nao iumi lanem from olketa interesting vision bilong Zechariah?

¹⁹ Mek-six and mek-seven vision bilong Zechariah hem strongfala warning for olketa wea no honest and wea duim nogud samting. Jehovah bae no letem olketa nogud samting for gohed. From iumi pipol bilong hem, iumi mas heitim olketa nogud samting. Olketa vision hia helpem iumi for sure sapos iumi duim samting wea mekem Dadi bilong iumi long heven for hapi, bae hem no cursim iumi, bat bae hem protectim and blessim iumi. Jehovah bae helpem iumi for stap klin nomata iumi stap insaed disfala nogud world. Hao nao iumi savve sure tru worship bae gohed? And from iumi klosap long taem bilong bigfala trabol, hao nao iumi savve Jehovah bae protectim organization bilong hem? Bae iumi storyim olketa kwestin hia long nextfala study.