1-3. (a) Sekadya pababangile butemuki, nshalelo a mwilo wa Yehowa badi naminyi? (b) Bwakinyi Yehowa balungwile mwilo waye bwashi walukile kwadi?

MUFUNGOFUNGO aupapuka mwiyilu, mwana mukashi mushale mu kisaku, na bana bakashi babidi abasanyisha mbaba mu lupapi i bu ya konyi ka kàapòòpo. Bino mbimune bya ku bimonwa bya Sekadya. (Sekadya 5:1, 7-9) Bwakinyi Yehowa badi muleshe mutemuki aye bino bimonwa bya kukanya? Bena Isalele abadi na nshalelo e naminyi aa mafuku? Bino bimonwa bi kwitukwasha naminyi lelo uno?

² Bibadi mu kipwa kya 537 kumpala kwa Kidishitu, mwilo wa Yehowa ubadi na muloo. Babadi bakwatshibwe mu bupika mu Babilone munda mwa bipwa 70, anka binobino tabadi balungantu! Babadi na muloo wa kwalukila ku Yeelusaleme bwa nkebakula ntempelo na kulangwilo Yehowa kwanka. Kunyima kwa kipwa kimune, bena Isalele abatudile kitako kya ntempelo. Mwilo ubadi na muloo ngofu, na ubadi awele “tukundakunda twibukopo,  atupushika na kulakula.” (Esela 3:10-13) Anka mushikwa wa mudimo wa lwibako ubadi awende na kutama. Bena Isalele abadi babofule ku mashimba abo nkuleka kwibaka ntempelo. Nyi abo nkwipana mu kwibaka kwa mashibo aabo na kudima kwa mafuba. Kunyima kwa bipwa Ekumi na bisamombo, ntempelo a Yehowa tabadi mupwe kwibakibwa nya. Mwilo wa Yehowa ubadi na lukalo lwa muntu a kwiutentekyesha bwashi walukile kwi Yehowa ulekye kutula binangu penda ku bintu byao. Yehowa badi ebatekye bwashi bamulangwile na kisumi na mashimba anyingye.

³ Mu kipwa kya 520, Yehowa batumine mutemuki aye Sekadya bwashi akwashe mwilo utentekyeshe bwakinyi badi mwibatushe mu Babilone. Mmwanda wa kukanya pa kutala shi, eshina dya Sekadya adipatula shi: “Yehowa mmutentekyeshe.” Sunga bena Isalele abadi balube bibadi Yehowa mwibakitshine, Efile Mukulu badi nka mwibatentekyeshe. (Badika Sekadya 1:3, 4.) Yehowa bebalayile bwa kwalushula lulangwilo lwi selele. Anka badi mwibadimushe shi, akumina lulangwilo lwabo nka su bakwete kumupa bintu byabo bya muulo. Tubandeyi kutala kimonwa kya kasamombo na kya musambo kya Sekadya. Atukyebe kumona mushindo ubadi Yehowa munyingyishe bena Isalele na mushindo ukumbene kwitukwasha bino bimonwa bibidi lelo uno.

4. Sekadya bamwene kinyi mu kimonwa kyaye kya kasamombo? Bwakinyi mufungofungo ubadi ufundwe mu mpese yoso ibidi? (Tala kifwatulo ki ku mbangilo 1.)

⁴ Shapitre 5 a mukanda wa Sekadya abanga na kimonwa kilekene na bingi byoso. (Badika Sekadya 5:1, 2.) Sekadya bamwene mufungofungo wa mukanda aupapuka mu lupapi. Mufungofungo ubadi bula bwa metre 9 na mbwipi ubadi metre 4,5. Mufungofungo ubadi ufungulwe, na munda mubadi mukandu. (Sekadya 5:3) Ubadi mmukandu ukata wa kiimu. Mu mafuku a kala, bantu abadi abafundu penda ku lupese lumune lwa mufungofungo. Anka, uno mukandu ubadi na muulo mu mushindo ubabadi beufunde mpese yoso ibidi.

5, 6. Yehowa apushaa naminyi pabitale kwiba kwa kipaso kyoso?

⁵ Badika Sekadya 5:3, 4. Bantu boso abatwala bushito bwa bikitshino byabo kwi Efile Mukulu. Abikalaa bino bwa bantu ba Yehowa, mwanda abayitaminyibwa mwishina dyaye. Mbamufule na abauku shi kwiba akukwatshisha eshina dyaye buufu. (Nkindji 30:8, 9) Bangi bantu mbalombene kupwandikisha shi kwiba ta kwi bubi su be na akibatakula mu kwiba. Anka sunga twekala na kabingilo kinyi, muntu ayibi alesha shi malaka aye e na muulo kwadi kukila Yehowa, Eshina Dyaye, na miiya Yaye.

⁶ Bomono byabamba mu Sekadya 5:3, 4 shi mulwa ‘aukumu nshibo ya ngifi’ na shi “ushaale mu nshibo yaaye, wiyituute”? Byabya Yehowa afumbula na kutshibila muntu akitshi bubi munkatshi mwa bantu baye kiimu. Sunga ngifi afwamisha bwifi bwaye kwi mpulushi, mukata aye a mudimo, bakulu, sunga baledi baye, ta mulombene kwibufwamisha Yehowa. Efile Mukulu akitshi byashi kwiba kwa kipaso kyoso kutukye patoka. (Beena-Ebelu 4:13) Twi na muloo binyibinyi wa kwikala na bantu abakitshi mwabo moso bwa kwikala balulame mu “myanda yooso”!​—Beena-Ebelu 13:18.

7. Twi kusuka mulwa wi mu mufungofungo aupapuka naminyi?

⁷ Kwiba kwa kipaso kyoso akwinyongoshaa Yehowa. Twi na muloo wa kuuka na kukokyela miiya ya Yehowa pabitale kibuwa na kibubi na, kwikala na nshalelo shakwatshisha eshina dyaye bufu. Nsaa yatukitshi byabya  tatwikala mu kiimu kya Yehowa kwi bantu abapele kumukokyela nya.

8-10. (a) Mutshipo nkinyi? (b) Nfumu Sedekiya bakutshilwe kulombasha mutshipo kinyi?

⁸ Akupu, mufungofungo aupapuka wina ungi mukandu kwi baasha “kutshipa kwa madimi” mwishina dy’Efile Mukulu. (Sekadya 5:4) Mutshipo nyi mmwaku aushinkamisha shi, kintu kampanda nkya binyibinyi, sunga shi mmulayilo ukata aulesha shi okumina sunga kupela kukita kintu kampanda.

⁹ Kutshipa mwishina dya Yehowa ta mwanda wa miseku nya. Atulongyela bino ku bibadi bifwile Sedekiya, nfumu a nfudiilo a mu Yuuda badi mumune mu Yeelusaleme. Sedekiya badi mwitshipe mwishina dya Yehowa shi, alamata kwi nfumu a mu Babilone. Anka Sedekiya ta mulombashe mutshipo waye nya. Pa mwanda wa byabya, Yehowa bambile shi Sedekiya, “akafwila mu Babilone, eumbo dya yawa nfumu bamubikêshe, mwanda ta mumone mutshipo ubadi mumutshipile bu kintu”​—Esekyele 17:16, EEM.

¹⁰ Nfumu Sedekiya badi mwitshipe mwishina dy’Efile Mukulu, na Yehowa badi akulupila shi alombasha mutshipo waye. (2 Myanda 36:13) Anka, Sedekiya badi mukutwe kulombasha mutshipo waye, aye nkuteka Ejipitu bwashi amukwashe atukye mbupika bwa Babilone. Anka, Ejiipitu tabadya kumukwasha.​—Esekyele 17:11-15, 17, 18.

11, 12. (a) Mmulayilo kinyi ukile bukata watudi balee? (b) Mushindo kinyi wi kwilambula kwetu kwi na bukitshishi mu nshalelo etu?

¹¹ Mwanda ubadi ukitshikile Sedekiya awitulongyesha shi, Yehowa apushaa nteko yatwele. Bwa kumusangasha abitungu tulombashe mitshipo yetu. (Misambo 76:11) Mutshipo ukile bukata watudi balombene kutshipa, nyi nkwilambula kwetu kwi Yehowa. Nsaa y’atwilambula kwadi, atulaa  shi, atumufubila sunga twafumankana na mwanda wi naminyi mu muwa wetu.

¹² Twi kulombasha mulayilo wetu kwi Yehowa naminyi? “Kwifuku n’efuku” atufumankanaa na bitompwanga bikata na bipela. Atulesha bukata bwa kipwano kyetu na Yehowa ku mushindo watukidi nabyo. (Misambo 61:8) Kileshesho, we kukita naminyi ku mudimo sunga ku kalasa su muntu kampanda shi mulume sunga mukashi nobe abanga kukimba kwikala nka pepi nobe? We kupela kwikala pepi naye na kulesha shi okumina kukokyela Yehowa? (Nkindji 23:26) Kadi su byekala’shi we nka bupenka bobe mu kifuko okwete kulangwila Yehowa? Otekaa Yehowa bwashi akukwashe wekale nka na mwikelo aulesha shi we mwina Kidishitu su? Sunga wekala mu nshalelo e naminyi, otumbulaa Yehowa efuku dyoso bwa kifulo na bukunkushi bwaye su? Wateyaa nsaa ya kwibadikila Bible efuku dyoso? Mu mushindo umune, tubalayile Yehowa shi, atukitshi bino bintu nsaa yatubelambwile kwadi. Nsaa y’atumukokyela na kumupa bintu byetu bya muulo, atulesha Yehowa shi twi bamufule na’shi twi bantu baye. Lulangwilo lwetu, ndjo nshalelo etu. Na bu byatudi na lulamato kwi Yehowa, mwitulee myanda ibuwa mu mafuku e kumpala.—Miiya Ikituulwe 10:12, 13.

13. Kimonwa kya Sekadya kibetulongyesha kinyi?

¹³ Kimonwa kya kasamombo kya Sekadya akitukwasha bwa kupusha shi su twi bafule Yehowa, tatwi balombene kwiba sunga kukutwa kulombasha mutshipo wetu. Tubalongo dingi shi, sunga bena Isalele abakitshine milwisho ibungi, Yehowa badi mulombashe mulayilo waye na tabadi musumbushene mwilo waye nya. Badi auku shi be mu nshalelo e bukopo na beshikwanyi nabo bebefunyishe. Ku kileshesho kyaye, Yehowa etulongyesha shi, abitungu twikale atulombasha milayilo yetu. Na twi balombene kukulupila shi etukwasha bwatudya kwiyilombasha. Umune wa ku mishindo ayitukwasha Yehowa mpa kwitupa lukulupilo lwa myanda i kumpala. Kubashala mafuku apela, afudiishe bubi boso bwi pa nsenga. Luno lukulupilo atwilubadika mu kimonwa kya Sekadya akilondo.

14, 15. (a) Sekadya bamwene kinyi mu kimonwa kyaye kya musambo? (Tala kifwatulo ki kumbangilo 2.) (b) Mwana mukashi badi mu kisaku nkinyi? Bwakinyi mwikeyilu baputshile kyanka bi bukopo?

¹⁴ Kuyima kwa Sekadya kumona mufungofungo aupapuka, mwikeyilu bamulungwile shi: “Ebweshe meeso.” Sekadya bamwene kintu kyabetamina bu “kisaku.” (Badika Sekadya 5:5-8, EEM.) Kisaku kibadi na mputo a kilonda. Nsaa yabekibulwile, Sekadya bamwene “mwana mukashi mushale mwanka.” Mwikeyilu nkupatulwila Sekadya shi, mukashi mushale mu kyakya kintu nyi, ‘mbubi.’ Banda kunangushena kinemo kibadi nakyo Sekadya pa kumona yawa mwana mukashi atompo kutuka mwanka! Anka mwikeyilu nkumwalusha mwanka mususa umune, na aye nkwikifunga ngofu na mputo akyo a kyamo. Bino abipatula kinyi?

¹⁵ Bino bimonwa abitushinkamiisha shi Yehowa ta mulombene kutadila bubi bwa mushindo oso bwashi bwikale munkatshi mwa mwilo waye. Su Yehowa bamono kintu kampanda kibubi, akitshi mususa umune bwa kwikikatusha. (1 Beena-Kodinda 5:13) Mwikeyilu baleshele byanka nsaa ibatudile mputo e bushito ku kyakya kisaku.

16. (a) Nkinyi kibadi kikitshikile kisaku? (Tala kifwatulo ki ku mbangilo 3.) (b) Bana bakashi be na mbaba abayile na kisaku kunyi?

¹⁶ Akupu, Sekadya bamwene bana bakashi babidi babadi na mbaba bu ya konyi ka kàapòòpo. (Badika Sekadya 5:9-11.) Bano bakashi  abadi belekene ngofu na mukashi ebubi e mu kisaku. Na mbaba yabo ibukome, abasemwine kisaku ki na “bubi” benda nakyo. Babayile nakyo kunyi? Babayile na kisaku “kwiumbo dya Shineare,” dibadi Babilone. Bwakinyi abayile naye kwakwa?

17, 18. (a) Bwakinyi Babilone badi “mbalo ilombane” bwa “Bubi”? (b) We na kitshibilo kya kukita kinyi?

¹⁷ Beena Isalele abadi mu mafuku a Sekadya babadi abauku bwakinyi Babilone badi mbalo ilombane bwa kutula “Bubi.” Abadi abauku shi nyi eumbo dya bubi diule myanda ibutete na lulangwilo lwa madimi. Sekadya na bangi be na Yunda babadi mwanka babadi abakitshi mwabo moso bwa kukambila bukitshishi bwa lulangwilo lwa ba mpangano. Byabya kino nkimonwa kibadi akilesha shi Yehowa akasula lulangwilo lwaye.

¹⁸ Byaba; kimonwa kibadi akitentekyesha beena Yunda shi abo dingi abadi na bushito bwa kulama lulangwilo lwabo selele. Ta mbalombene kutadila bubi munkatshi mwa mwilo w’Efile Mukulu. Lelo uno, Yehowa mwitutweshe mu ndumbulwilo e selele, mwatupete kifulo na bulami bwaye. Oso akwatudi e na bushito bwa kukwasha bwashi lulangwilo lwikale selele. Bubi ta mbulombene kwikala mu mwilo wa Yehowa nya.

19. Bimonwa bya kukanya bya Sekadya abilesha kinyi kwatudi?

¹⁹ Kimonwa kya kasamombo na kya musambo kya Sekadya nyi mwanda ukata wa kudimusha nao boso abakitshi bubi. Yehowa tatadiila bubi bwashi butungunukye nya. Bu byatudi bafubi baye, abitungu tushikwe bubi. Bino bimonwa abitushinkamiisha shi su tubakitshi mwetu moso bwa kusangasha Nshetu sha kifulo, tetwele mulwa nya etukalwila na kwitwelela myabi. Sunga byekala bukopo bwa kushala selele mu uno ndumbulwilo e bubi, ku bukwashi bwa Yehowa atoobesha! Kadi twi kukulupila naminyi shi, lulangwilo lwa binyibinyi alwikala nka kwanka? Na dingi, bu byatukwete kwifubwila pepi ngofu na mpombo ikata, atuku naminyi shi Yehowa akakalwila ndumbulwilo aye? Ino nkonko atwiyitalula mu mwisambo aulondo.