1—3. а) Захарияның үезинде Бурганның чону кандыг байдалга турган? б) Иегова израильчилерни Олче эглип кээрин чүге дилеп турган?

 УЖУП бар чыдар дүрүг-ном, халыптыг доскаарда олурар херээжен кижи, шилен куштуу ышкаш чалгыннарлыг ийи херээжен кижи. Бо кайгамчык овур-хевирлерни Захария медээчи көстүүшкүнге көрген (Зах. 5:1, 7—9). Иегова оларны медээчизинге чүү дээш көргүскенил? Захарияның үезинде Бурганның чону кандыг байдалга турган? Захария медээчиниң номунда көстүүшкүннер биске кандыг хамаарылгалыг?

² Б. э. чедир 537 чыл Иегованың чонунга улуг өөрүшкү чылы болган. Вавилоннуң туттуруушкунунга турганындан бээр 70 чыл эрте берген, ам олар хосталгаже үнүп келген. Өөрээнинден олар Иерусалимде өргээни, Иеговага мөгеер черни, катап тудуп эгелээн. Б. э. чедир 536 чылда өргээниң үндезини салдынган. Ынчан оларның өөрүшкүзү кызыгаар чок турган. Библияда: «Чон ынчаар шимээргеп, хөлзээрге... Ыыт-шимээн кайы ырактан дыңналып турган» — дээн (Эзра 3:10—13).  Ынчалза-даа удатпаанда олар хөй бергелерге таварышкаш, өргээни тударын соксаткан. Оларга боттарының бажыңнары болгаш шөлдери чугула апарган. 16 чыл эрткен, өргээ ам-даа туттунмаан хевээр. Бурганның чону хүн-бүрүнүң ажаанзыралдарынга алыскаш, эң-не чугула чүүлдү уттупкан. Ынчалза-даа Иегова израильчилерни Олче эглип келгеш, кымдан-даа кортпайн, Аңаа чүлдү-чүрээнден катап бараалгап эгелээрин күзеп турган.

³ Б. э. чедир 520 чылда израильчилерни Вавилондан чүү дээш хостаанын оларга сагындырар дээш, Иегова Захария медээчини чоргузупкан. Захария деп аттың утказы «Иегова сактып келген» дээн. Ол ат оларга чугула алыс шынны сагындырып турган чадавас. Израильчилер Иегованың оларны канчаар камгалап турганын уттупкан-даа болза, Иегова чонун утпаан. (Захария 1:3, 4 номчувут.) Бурган израильчилерни Аңаа катап таарымчалыг кылдыр бараалгаарынга дузалаарын ынакшылдыы-биле бүзүреткен. Оон аңгыда Иегова чүгле чүлдү-чүрээнден бараалгалды хүлээп алыр мен деп оларга сагындырган. Захарияның алдыгы биле чедиги көстүүшкүннериниң дузазы-биле Иегованың оларны хөделиринче канчаар оттурганын болгаш оон чүнү өөренип ап болурувусту сайгарыптаалыңар.

4. Захария алдыгы көстүүшкүнүнге кандыг дүрүг-номну көрген? Ол дүрүг-ном чүге ийи талазында бижиктиг? (Статьяның эгезинде 1-ги чурукту көрүңер.)

⁴ Захария номунуң бешки эгези онзагай көстүүшкүн-биле эгелээн. (Захария 5:1, 2 номчувут.) Медээчи узуну 9 метр, а дооразы 4,5 метр ужуп чоруур, шииткел бижээн ажык дүрүг-номну көрүп турар. Ол ийи талазында бижиктиг (Зах. 5:3). Дүрүг-номнарга бижикти колдуунда чаңгыс талазынга бижиир турган. Ынчап кээрге, Захарияның көргени дүрүг-номда медээ дыка чугула турган.

5, 6. Иегова оор чорукка кандыг хамаарылгалыг?

⁵ Захария 5:3, 4-тү номчувут. Кижи бүрүзү Иегованың мурнунга харыы тудар, а Ооң бараалгакчылары оон-даа улуг харыы тудар. Оор чорук «Бурганны бак атка киирер» деп, Бурганга ынак улус билип турар (У. ч. 30:8, 9). Оор чорукту кижиниң байдалы-даа, оорланганының чылдагааны-даа агартып шыдавас, чүге дээрге ооржу кижиниң чазый чоруу ону эт-хөреңгини Бурган-биле харылзаадан бедик салырынче оттуруп турар. Ооржу кижи Иегованың адын, хоойлуларын болгаш Ооң санал-оналын херекке албайн турар.

⁶ Эскерер болзувусса, Захарияның бижээни каргыш «оорнуң бажыңынче... кире бээр», оон «аңаа турумчуп алгаш... бажыңын... ол узуткап кааптар». Ынчап кээрге, Иегова чонунуң аразынга үүлгеттинген бачыттарны ажыы-биле көргүскеш, шиидер. Оор чоруктуң дугайында эрге-чагыргалар, ажыл берикчилери, хуралдың удуртукчулары азы ада-ие билбейн баар-даа болза, шупту ооржуларны илередирин аазап турар Бурган ону көрүп турар (Евр. 4:13). Кезээде шынчы алдынарын күзеп чоруур улустуң аразынга турары биске дыка-ла өөрүнчүг-дүр! (Евр. 13:18).

7. Ужуп чоруур дүрүг-номда бижээн каргыштан канчаар чайлап болур бис?

⁷ Бурган оор чоруктуң шупту хевирлерин шиидип турар. Иегованың адын бужартатпас дээш, бедик мөзү-шынар негелделеринден туттунуп чурттаары — биске улуг алдар-хүндү-дүр. Иегованың хоойлуларын сагыштыы-биле үреп турар улуска Ооң белеткээн кеземчезинден чүгле ынчаар чайлап болур бис.

8—10. а) Даңгырак деп чүл ол? б) Седекия хаан кандыг даңгыракты күүсетпээн?

⁸ Ужуп чоруур дүрүг-номда сөстер Бурганның ады-биле «мегелеп даңгыраглап» турар улусту база оваарындырып турар (Зах. 5:4). Даңгырак — чугаалаан чүүлдүң алыс шынныын азы чугаалап турар кижиниң кандыг-бир чүвени кылырын азы кылбазын аазаары-дыр.

⁹ Иегованың ады-биле даңгыраглаан улус оозунга дыка шыңгыы хамаарылгалыг болур ужурлуг турган. Ындыг даңгыракты Иерусалимде дүжүлгеге сөөлгү олурган хаан Седекия берген. Ол Иеговага Вавилоннуң хаанынга чагыртыр мен деп даңгыраглааш, оозун күүсетпээн. Ынчангаш Иегова аңаа мындыг шииткел үндүрген: «Ол хаан [Седекия] Вавилонга, ону дүжүлгеге олурткан хаанның черинге өлүп каар; ол хаан Вавилоннуң хаанынга берген даңгыраан үреп, ооң-биле чарган керээзин күш чок болдурган болгай» (Иез. 17:16).

¹⁰ Седекия сөзүнге ээ болур деп, Иегова манап турган, чүге дизе ол Ооң ады-биле даңгырак берген (2 Чыл. 36:13). Ынчалза-даа Седекия Вавилоннуң дарлалындан хосталыр дээш, дузаны Египеттен дилээн (Иез. 17:11—15, 17, 18).

11, 12. а) Даңгырактарывыстың кайызы эң-не чугула? б) Бурганга бодувусту бараалгаткан даңгыраавыс чуртталгавысче кандыг салдар чедирип турар?

¹¹ Кандыг аазаашкыннарны берип турарывысты Иегова билир. Ол оларга шыңгыы хамаарылгалыг. Ынчангаш Ону өөртүр дээш, даңгырактарывысты күүседир ужурлуг бис (Ыд. ыр. 75:12). Оларның аразында эң-не кол даңгыраавыс — Иеговага чуртталгавысты бараалгатканывыс.  Ынчан бис Бурганга, бодувусту хайыралавайн, бараалгаарын аазаан бис.

¹² Ол даңгыраавысты канчаар күүседип болур бис? Бичии-даа, улуг-даа шенелделерге Иеговага шынчы боор болзувусса, даңгыраавыска шыңгыы хамаарылгавысты көргүзер бис (Ыд. ыр. 60:9). Ажылывыска азы школага бир кижи бистиң-биле ылчыңнажыр болза, канчаар бис? Иеговага дыңнангыр бооп, оон ойталаар бис бе? (У. ч. 23:26). Өг-бүлевисте Иеговага чааскаан бараалгап турар болзувусса, христиан шынарларны илередир дээш, мөргүп турар бис бе? Дээрде Адавыстың биске шын орук-биле чоруурунга дузалап, ынакшылын көргүзүп турары дээш, Аңаа хүннүң-не четтиргенивисти илередип турар бис бе? Библияны хүннүң-не номчуур дээш, үени үндүрүп турар бис бе? Бо бүгүнү кылырын аазаан бис. Бо дээрге Бурганга дыңнангыр чорукту илередир арга-дыр. Идепкейлиг бараалгап турарывыс Иеговага ынакшылывысты болгаш бердингенивисти көргүзүп турар. Иеговага бараалгал — бистиң чуртталгавыс-тыр. Иеговага шынчы чоруувус кайгамчыктыг келир үеде чурттаарывысты магадылап турар (Ы. х. к. 10:12, 13).

13. Захарияның алдыгы көстүүшкүнү биске чүзү-биле ажыктыг?

¹³ Захарияның алдыгы көстүүшкүнүнден алырга, Иеговага ынак болзувусса, бис оорланмас азы даңгырактарывысты үревес ужурлуг бис. Солун чүүл, израильчилер хөй частырыгларны кылып-даа турда, Иегова сөзүнге ээ бооп, оларны кагбаан. Чүге дээрге олар дайзыннарының аразынга чурттап, оларның салдарынга алзып турганын Ол билип турган. Ынчаар Иегова биске аазаашкыннарны күүседиринге хамаарыштыр үлегер көргүскен. Ол биске даңгырактарывысты күүседиринге дузалаар. Чижээ, Иегова чер кырында бузутту удавас ап кааптар деп идегелди биске берип турар. Ооң дугайында Захарияның дараазында көстүүшкүнүнден билип алыр бис.

14, 15. а) Захарияның чедиги көстүүшкүнүнүң дугайында чугаалап көрүңерем. (Статьяның эгезинде 2-ги чурукту көрүңер.) б) Доскаарда херээжен чүнү илередип турар база ону чүге үндүрбейн турар?

¹⁴ Захарияның ужуп чоруур дүрүг-номну көргениниң соонда, дээрниң төлээзи ону өрү көөрүн дилээн. Чедиги көстүүшкүнге медээчи чүнү көрген? Олче коргулчун халыптыг доскаар кел чыткан. (Захария 5:5—8 номчувут.) Ооң халывын ажыдыптарга, иштинде «херээжен кижи олурар» болган. Дээрниң төлээзи: «Бо херээжен дээрге бачыт-тыр!» — деп тайылбырлаан. Кажан ол үндүр чүткүп эгелээрге, Захария аажок корткан чадавас. Дээрниң төлээзи ону күш-биле дедир киир идипкеш, доскаарны аар халып-биле дуглап каан. Ооң утказы кандыгыл?

¹⁵ Иегова чонунуң аразынга бачытты шыдажып турбас деп чүүлдү дээрниң төлээзиниң шиитпирлиг хөделип турганы көргүзүп турар. Бир эвес Иегова бараалгакчыларының аразынга бужар-бак чүүл эскерзе, Ол ону дораан-на ап кааптар (1 Кор. 5:12—13).

16. а) Доскаарны оон канчалган? (Статьяның эгезинде 3-кү чурукту көрүңер.) б) Чалгынныг херээженнер доскаарны кайнаар аппарган?

¹⁶ Оон шилен куштуу ышкаш чалгыннарлыг ийи херээжен кижи ужуп бар чыдар. (Захария 5:9—11 номчувут.) Олар демги доскаарда херээженден аажок ылгалып турар. Ол херээженнер «бачытты» суп каан доскаарны алгаш, ужуп чорупкан. Кайнаар? «Сеннаар черже», өскээр чугаалаарга, Вавилонче. Чүге?

17, 18. а) Чүге Сеннаар чер «бачыттың» турумчуурунга таарымчалыг чер турган? б) Бачытка кандыг хамаарылгалыг болур ужурлуг бис?

 ¹⁷ Захарияның үезинде чурттап турган израильчилерге Сеннаар чер «бачыттың» турумчуурунга эң-не таарымчалыг чер турган чадавас. Захария болгаш өске-даа еврейлер Вавилонда кандыг бузут-бак үүлгеттинип турарын эки билир турган. Ол хоорайга мөзү-шынар чок чорук биле дүрзү-бурганнарга мөгеер чорук тергиидеп турган. Вавилонда еврейлер бужартадыр салдардан хүннүң-не камгаланыр ужурга таваржып турган. Иегова арыг мөгейиишкинниң бужартаарын болдурбас деп чүүлдү Захарияның көстүүшкүнү оларны бүзүреткен.

¹⁸ Оон аңгыда ол көстүүшкүн еврейлерге оларның Бурганга бараалгалы арыг болур ужурлуг деп сагындырып турган. Ынчангаш бачытты Иегованың чонунуң аразынче «киргеш», аңаа «турумчуй бээрин» канчап-даа болдурбас ужурлуг бис. Иегованың организациязында бис боттарывысты айыыл чок кылдыр миннип, Ооң ынакшылын болгаш буянныын көрүп чоруур бис. Ынчалзажок Бурганның чонунуң арыг чоруу дээш харыысалга кижи бүрүзүнде деп сактыр ужурлуг бис. Иегованың чонунуң аразынга бачыт турбас ужурлуг!

19. Захарияның номунда көстүүшкүннер биске кандыг хамаарылгалыг?

¹⁹ Захарияның алдыгы биле чедиги көстүүшкүннери шынчы эвес алдынып турар улусту оваарындырып, Иегова бачытты көөр хөңнү чок деп сагындырып турар. Иеговага ынак улус бачыттан ческинер ужурлуг. Оон аңгыда Иегованың ээ көрнүүшкүнүн болгаш камгалалын дилеп, эки талаже өскерлирин уламчылап чоруур болзувусса, Ооң шииткелинден корткан ажыывыс чок. Дээрде Адавыс бисти удавас күзелдии-биле йөрээр. Бо каржы делегейге арыг артар дээш кызып чоруурувус хилис барбас. Иегова силерни дуза чок арттырбас. Ынчалза-даа алыс шын чүдүлге бо бузуттуг делегейни тиилээр деп, чүге бүзүреп турар бис? Коргунчуг хилинчек оккуру-биле кел чорда, Иегова амгы үеде Бодунуң организациязын камгалаар деп үндезин бисте бар бе? Бо айтырыгларны дараазында статьяга сайгарар бис.