1—3. а) Кыӵе улон вакытэз вал Инмарлэн калыкезлэн Захария улон нуналъёсы? б) Малы Иегова израиль калыкез ас дораз берытскыны куриз?

 ЛОБИСЬ бинялтэм книга, кудые пытсам кышномурт но аистлэн выллем бурдъёсын тӧлъя поръясь кык кышномуртъёс — ваньмыз со Захария пророклэн книгаяз гожтэм яркыт образъёс (Зах. 5:1, 7—9). Малы Иегова пророкезлы сокем паймымон адӟонъёс сётӥз? Кыӵе улон вакытэз вал Инмарлэн калыкезлэн Захария улон нуналъёсы? Но кызьы Захария пророклэн книгаысьтыз адӟонъёс милемын герӟаськемын?

² Иеговалэн калыкез понна а. э. азьло 537-тӥ ар шумпотон вакыт вал. 70 ар ӵоже вавилон пленын улэмзы бере израиль пиос мозмытэмын вал. Лӧптэм мылкыдын соос выльысь пуктыны кутскизы Иерусалимысь храмез, кытын соос Иеговалы йыбыртъяны  быгатысалзы. А. э. азьло 536-тӥ арын храмлы инъет понэмын вал. Соку израиль калык туж шумпотӥз. Библиын верамын: «Калык бадӟым куараен черекъяз, куаразы кыдёкысен кылӥськылӥз» (Езд. 3:10—13). Но ӝоген израиль калыклы люкетыны кутскизы. Трос шуг-секытъёсын пумиськыса, мар карыны паймеменызы, адямиос храмез пуктэмысь дугдӥзы. Соос понна валтӥсез луизы ас коркаоссы но бусыоссы. Инъет понэм дырысен 16 ар ортчиз, нош храм озьы ик пуктэмын ӧй вал на. Нуналысь нуналэ быдэсъяно ужъёсыз пӧлы выйыса но ас мыл потонъёссэ быдэсъяны тыршыса, Инмарлэн калыкез вунэтӥз, мар самой валтӥсез луэ. Нош Иеговалэн потэ вал, израиль калык со доры мед берытскоз но вань сюлмысьтыз, нокинлэсь кышкатэк, выльысь солы ужаны-тыршыны мед кутскоз шуыса.

³ Израиль калык тодаз мед ваёз шуыса, малы Иегова сое Вавилонысь пленысь мозмытӥз, а. э. азьло 520-тӥ арын со отчы Захария пророкез ыстӥз. Захария ним «Иегова тодаз вайиз» шуэм луэ, соин ик со тодазы вайытэ вал, вылды, одӥг кулэ луись зэмлыкез. Израиль калык вунэтӥз ке но, кызьы Иегова сое утьылӥз, Иегова азьло сямен ик аслэсьтыз калыксэ тодаз возе вал. (Лыдӟы Захариялэсь 1:3, 4.) Инмар оскытӥз калыксэ, со солы юрттоз шуыса выльысь озьы ужаны-тыршыны, кызьы солы ярамон луэ. Со сяна, Иегова вераз, калыклэсь сюлэмзэ понытэк ужамзэ-тыршемзэ уз чида шуыса. Ойдолэ учкомы, кызьы Иегова Захариялэн куатетӥ но сизьыметӥ адӟонъёсыз пыр израиль калыклэсь мылкыдзэ ӝутӥз ужзэ быдэстыны, но эскеромы, малы со милемыз дышетыны быгатэ.

4. Кыӵе бинялтэм книгаез адӟе Захария аслаз куатетӥ адӟоназ? Малы со бинялтэм книгалэн кык палаз ик гожъямын? (Учке статья кутсконысь 1-тӥ суредэз.)

⁴ Захариялэн книгаезлэн витетӥ люкетэз аспӧртэмлыко адӟонысен кутске. (Лыдӟы Захариялэсь 5:1, 2.) Пророк лобись бинялтэм книгаез адӟе, кудӥзлэн кузьдалаез укмыс метр пала, нош пасьталаез ньыль но ӝыны метр пала. Отын приговор гожтэмын. Бинялтэм книга усьтэмын, но адӟиське, солэн кык палаз ик гожъямын шуыса (Зах. 5:3). Бинялтэм книгаосы одӥг палаз гинэ гожъяло вал, соин ик Захариялэн адӟонысьтыз бинялтэм книгаын туж кулэ луись ивор гожтэмын, шӧдске.

5, 6. Кызьы Иегова лушкаськон шоры учке?

⁵ Лыдӟы Захариялэсь 5:3, 4. Котькуд адями Иегова азьын кыл кутэ, нош солэн ужась-тыршисьёсызлэсь эшшо но тросгес юамын луоз на. Инмарез яратӥськомы ке, ми ум лушкаське, малы ке шуоно лушкаськыса ми Инмарлэсь нимзэ сантэмаломы (Мад. 30:8, 9). Куд-ог адямиос малпало, умой муген лушкад ке, отын номыр уродэз ӧвӧл шуыса. Но номыр но лушкаськемез шонере поттыны уз быгаты, малы ке шуоно со, кин лушкаське, возьматэ, ваньбур солэн  улоназ нырысетӥ интыын луэ, нош Инмарлэн законэз но нимыз солы нокыӵе ик уг поты шуыса.

⁶ Адӟиды-а, Захариялэн азьпалзэ ивортоназ верамын, карган «лушкаськисьлэн корказ... пыроз, солэн корказ улоз, быдтоз сое» шуыса? Озьыен, Иеговалэн кыл кутытонэзлэсь нокыӵе но тунгонъёс уз уте. Нокин но ватыны уз быгаты Инмарлэн калыкез пӧлын лэсьтӥськись сьӧлыкъёсты. Лушкаськемез кивалтӥсьёслэсь, кузёослэсь, тӧроослэсь яке анай-атайлэсь ватыны быгатӥд ке но, Инмарлэсь уд ваты. Со вань лушкаськисьёсты шарае поттыны кылзэ сётэ (Евр. 4:13). Макем ми шумпотӥськомы улыны соос пӧлын, кинъёслэн котьку шонер улэмзы потэ! (Евр. 13:18).

7. Кызьы палэнсконо карганлэсь, кудӥз лобись бинялтэм книгаын гожтэмын?

⁷ Инмар котькыӵе лушкаськонэз адӟемпотостэм каре. Со кыл кутытоз соосты, кинъёс солэн законъёсызлэсь уг кылзӥсько. Милемлы дан Иеговалэн вылӥ эсэпъёсызъя улыны но котьку асьмеды возьыны озьы, солэсь ӟеч нимзэ медам сапталэ шуыса. Соку гинэ ми быгатомы палэнскыны Иеговалэн кыл кутытонэзлэсь.

8—10. а) Мар со сыӵе кыл сётон? б) Кыӵе кыл сётонзэ Седекия эксэй ӧз быдэсты?

⁸ Лобись бинялтэм книгаысь мукетъёсыз кылъёс чакласькыны косо соосты, кинъёс Инмарлэн нимыныз ӧрекчаськыса кыл сёто (Зах. 5:4). Кыл сётон — со верам кылъёсмы  зэм луо шуыса оскытыса веран, яке оскытон, адями мае ке одно ик лэсьтоз яке уз лэсьты шуыса.

⁹ Иеговалэн нимыныз кыл сётӥсьёслы кылзэс одно ик быдэстыны тыршоно вал. Сыӵе кыл сётон вераз Седекия — Иерусалимысь престол вылын пукись берпуметӥез эксэй. Со Иегова азьын кыл сётӥз, вавилон эксэйлы киулалоз шуыса, но аслэсьтыз сётэм кылзэ ӧз быдэсты. Соин Иегова солы таӵе приговор ялӥз: «Сое эксэй карыса пуктэм эксэйлэн улон интыяз, со эксэй дорын Вавилонын со [Седекия] кулоз, малы ке шуоно солы сётэм кылзэ ӧз быдэсты, соин кусыпсэ сӧриз» (Иез. 17:16).

¹⁰ Иегова возьмаз, Седекия сётэм кылзэ быдэстоз шуыса, малы ке шуоно со Инмарлэн нимыныз кылзэ сётӥз вал (2 Пар. 36:13). Но Седекия, юрттэт курыса, Египетлы вазиськиз. Озьы со токма Вавилонлэн ки улысьтыз мозмыны тыршиз (Иез. 17:11—15, 17, 18).

11, 12. а) Кудӥз кыл сётон тужгес но кулэез луэ? б) Кызьы сӥзиськыкумы сётэм кыл улонмы вылын шӧдӥське?

¹¹ Иегова тодэ, мар карыны ми кыл сётӥмы, но со солы саклык висъя. Сое шумпоттон понна, милемлы сётэм кылъёсмес быдэсъяно (Пс. 75:12). Сётэм кылъёсмы пӧлын тужгес кулэез — со Иеговалы сӥзиськыкумы сётэм кылмы. Соку ми Инмарлы кыл сётӥмы, солы вань сюлмысьтымы ужаломы-тыршомы шуыса.

¹² Но кызьы быдэстоно сӥзиськыкумы сётэм кылмес? Пичи ужъёсын но, бадӟым шуг-секытъёсын но Иеговалы оскымон кылиськомы ке, ми возьматӥськомы, «нуналлы быдэ» Иеговаез данъяны сётэм кылмес быдэстыны тыршиськомы шуыса (Пс. 60:9). Мар ми каромы, кин ке уж дорамы яке школаын милемын флиртовать карыны кутскиз ке? Кылзӥськомы-а ми Иеговалэсь но сыӵе адямиослэсь палэнтӥськомы-а? (Мад. 23:26). Семьяысьтымы ми огнамы Иеговалы ужаськомы-тыршиськомы ке, вӧсяськиськомы-а ми, асьмеды христианъёс кадь возьыны мед быгатомы шуыса, ми сяна нокин но ассэ озьы уг возьы ке но? Тау кариськомы-а ми котькуд нунал инмысь Атаймылы, милемыз яратэмез но шонер сюрестӥ мыныны юрттэмез понна? Шедьтӥськомы-а ми дыр котькуд нунал Библиез лыдӟыны? Малпано ке, ваньзэ сое лэсьтыны ми кылмес сётӥмы. Озьы ми Инмарлэсь кылзӥськеммес возьматыны быгатӥськомы. Ужан-тыршонэ мылысь-кыдысь пыриськеммы возьматэ, ми Иеговаез яратӥськомы но зэмзэ ик солы оскымонэсь кылиськомы шуыса. Иеговалы ми вань сюлмысьтымы ужаськомы-тыршиськомы, адямиос азьын чеберъяськон понна ум. Солы оскымон кылимы ке, со милемлы пайда ваёз (К. Зак. 10:12, 13).

13. Малы дышетэ милемыз Захариялэн куатетӥ адӟонэз?

¹³ Захариялэн куатетӥ адӟонысьтыз валамон луэ, Иеговаез яратӥмы ке, лушкаськыны ум кутске но сётэм кылъёсмылэсь ум куштӥське шуыса. Озьы ик со адӟонысь ми валаськомы: израиль калык янгыша вал ке но, Иегова сое ӧз кельты. Со вала вал,  макем секыт югдуре шедиз калык, малы ке шуоно котыр ласянь сое тушмонъёсыз котырто вал. Озьы Иегова милемлы пример возьматӥз, кызьы сётэм кылъёсмес быдэсъяно. Ми оскыны быгатӥськомы: со милемлы кыл сётонъёсмес быдэсъяны юрттоз. Кылсярысь, Иегова вера милемлы, ӝоген со музъем вылысь вань уродзэ быдтоз шуыса. Захариялэн мукетыз адӟонэз оскытэ милемыз, со озьы ик луоз шуыса.

14, 15. а) Вералэ, мае адӟиз Захария сизьыметӥяз адӟоназ. (Учке статья кутсконысь 2-тӥ суредэз.) б) Мае возьматэ кудыын пукись кышномурт но малы сое отысь потыны уг лэзё?

¹⁴ Захария лобись бинялтэм книгаез адӟем бере кылчин куриз сое вылӥе учкыны. Мае адӟе меда пророк сизьыметӥяз адӟонын? Со доры матэктэ ефа,— яке шоро-куспо куды,— кудӥз «узвесь люкетэн» ӵоксамын. (Лыдӟы Захариялэсь 5:5—8.) Узвесь люкетсэ ӝутэм бере Захария адӟиз, отын кышномурт пуке шуыса. Кылчин валэктӥз солы, кин со. Со вераз: «Та кышномурт — сьӧлыклэсь кышкатэк улон». Пуктэ ай син азяды, макем кышказ Захария, со кышномуртлэсь потыны турттэмзэ адӟыса! Кылчин соку ик сое берен кудые туйназ но узвесь люкетэн ӵоксаз. Мае со возьматэ?

¹⁵ Кылчинлэн со кышномуртэз соку ик берен кудые туйнамез оскытэ милемыз, Иегова калыкез пӧлын сьӧлыклэсь кышкатэк улонэз уз чида шуыса. Ужась-тыршисьёсыз пӧлысь  мае ке уродзэ Иегова адӟе ке, со соку ик сое выжытэм быдтэ (1 Кор. 5:13).

16. а) Мар луэ кудыен азьланяз но кытчы сое нуо? (Учке статья кутсконысь 3-тӥ суредэз.)

¹⁶ Собере потӥзы аистлэн выллем бурдъёсын кык кышномуртъёс. (Лыдӟы Захариялэсь 5:9—11.) Макем пӧртэм луо та кышномуртъёс кудыын пукись кышномуртлэсь! Кужмо бурд вылъёсазы со кышномуртъёс «Сьӧлыклэсь кышкатэк улонэн» куды доры лыкто но сое нуо. Кытчы? «Сеннаар музъеме», яке Вавилонэ. Нош малы отчы?

17, 18. а) Малы Сеннаар музъем «Сьӧлыклэсь кышкатэк улонлы» самой тупась инты вал? б) Кызьы милемлы учконо сьӧлыклэсь кышкатэк улон шоры?

¹⁷ Захария улон нуналъёсы израиль калык малпаны быгатэ вал, Сеннаар музъем «Сьӧлыклэсь кышкатэк улонлы» самой тупась инты луэ шуыса. Захария но мукет еврейёс умой тодо вал, макем кырсь ужъёс лэсьтӥськизы со дыръёсы Вавилонын. Отын вӧлмемын вал азон-калгон но сульдэръёслы йыбыртъян. Вавилонын улӥсь еврейёслы котькуд нунал нюръяськоно вал, сыӵе кырсь мылкыд соослы медаз пыӵа шуыса. Захариялэн адӟонэз соосты оскытӥз, луоз, Иегова номырлы но уз лэзьы шуыса солы йыбырттонэз саптаны.

¹⁸ Озьы ик со адӟон еврейёслы мае ке но туж кулэзэ тодазы вайытӥз: соос кыл куто вал, Инмарлы йыбырттонзы солы ярамон мед луоз шуыса. Инмарлэн калыкезлы лэзёно ӧй вал, сьӧлыклэсь кышкатэк улон соос пӧлы мед «пыроз» но отын «мед улоз» шуыса. Иеговалэн организацияз ми асьмеды кышкыттэм интыын кадь шӧдӥськомы. Ми шӧдӥськомы Инмарлэсь яратэмзэ но ӟечлыксэ. Но тодамы возёно, Иеговалэн организациез чылкыт мед луоз шуыса, котькудӥз нимысьтыз сюлмаськыны кулэ. Сьӧлыклэсь кышкатэк улонлы Инмарлэн калыкез пӧлын инты ӧвӧл!

19. Кызьы милемын герӟаськемын Захариялэн книгаысьтыз адӟонъёс?

¹⁹ Захариялэн куатетӥ но сизьыметӥ адӟонъёсыз чакласькыны косо соосты, кинъёс шонертэм ужъёс лэсьто, но тодамы вайыто, Иегова сьӧлыкез адӟемпотостэм каре шуыса. Иеговаез яратӥсь адямиос но сьӧлыклэсь кышкатэк улонэз адӟемпотостэм карыны кулэ. Со сяна, Захариялэн адӟонъёсыз милемыз туж кулэ луись зэмлыклы дышето: ми вань кужыммес поныса тыршиськомы ке Инмарлы ярамон луыны, соку милемлы Инмарлэн кыл кутытонэзлэсь кышкано уз луы. Инмысь Атаймы шумпотыса милемыз утёз но бакель кароз. Та кырсь дуннеын чылкыт кылён понна тыршеммы юнме уз луы. Оске: Иегова котьку юрттоз. Нош малы ми оскиськомы, зэмос йыбырттон Инмарлэсь палэнскем дуннеын вормоз шуыса? Вань-а милям мугмы оскыны, Иегова, бадӟым куректон матэктыку, аслэсьтыз организацизэ утёз шуыса? Та юанъёсты ми эскеромы мукетаз статьяын.