1-3. (a) Ano an kahimtang han katawohan ni Jehova han nagtikang hi Sakarias ha pagpanagna? (b) Kay ano nga ginhangyo ni Jehova an iya katawohan nga ‘bumalik ha iya’?

USA nga nalupad nga linukot nga basahon, babaye nga gintakloban ha usa nga surudlan, ngan duha nga babaye nga nalupad nga may mga pako nga pariho han kanan sigueña—inin urusahon nga mga bisyon mababasa ha libro han Sakarias. (Sak. 5:1, 7-9) Kay ano nga iginhatag ni Jehova inin makatirigamnan nga mga bisyon ha iya propeta? Ano an kahimtang han mga Israelita hito nga panahon? Paonan-o ini nga mga bisyon ni Sakarias nakakaapekto ha aton yana?

² An 537 B.C.E. makalilipay gud nga tuig para ha dedikado nga katawohan ni Jehova. Katapos hin 70 ka tuig nga pagkabihag ha Babilonya, nakagawas hira. Tungod han ira duro nga kadasig ha tinikangan, ginsuportaran nira an buruhaton ha pagpahiuli han tinuod nga pagsingba ha Jerusalem. Han 536 B.C.E., iginpahamutang an pundasyon han templo. Hito nga panahon, an mga tawo “naggugliat hinduro nga gugliat, ngan an aringasa hinbatian ha harayo.” (Esra 3:10-13) Pero waray pag-iha,  nagtikaduro an pagkontra ha ira proyekto han pagtukod. Tungod han damu nga problema ngan kakurian, nanluya an mga Israelita salit ginbayaan nira an pagtukod han templo ngan nagtikang pagpokus ha pag-ayad han ira mga balay ngan ha pag-uma. Paglabay hin 16 ka tuig, waray pa gihapon matatapos an pagtukod han templo ni Jehova. An katawohan han Dios sadang pahinumdoman nga kinahanglan hira bumalik kan Jehova ngan umundang ha ira pagkinabuhi nga nakapokus ha ira kalugaringon nga mga bentaha. Karuyag ni Jehova nga bumalik hira ha iya—ipadayon nira an ira maisugon ngan bug-os-kasingkasing nga pagsingba ha iya.

³ Basi mapahinumdoman an iya katawohan kon ano gud an hinungdan nga ginpagawas hira ha Babilonya, ginsugo han Dios an iya propeta nga hi Sakarias han 520 B.C.E. An ngaran mismo nga Sakarias, nga nangangahulogan nga “Nahinumdom hi Jehova,” bangin nagpahinumdom ha mga Israelita hin importante nga kamatuoran. Bisan kon nakalimtan na nira an pagtalwas ha ira ni Jehova, nahinumdoman pa gihapon han Dios an iya katawohan. (Basaha an Sakarias 1:3, 4.) Mahigugmaon nga ginpasarig niya hira nga bubuligan niya hira nga maestablisar utro an putli nga pagsingba, pero marig-on nga ginpahamangnoan liwat niya hira nga diri niya kakarawaton an diri bug-os-kasingkasing nga pagsingba. Kitaon naton kon paonan-o ni Jehova ginpagios an mga Israelita pinaagi han ikaunom ngan ikapito nga bisyon ni Sakarias. Ngan ano nga mga leksyon an aton mahibabaroan tikang hini?

4. Ano an nakita ni Sakarias ha iya ikaunom nga bisyon, ngan kay ano nga makatirigamnan nga an linukot nga basahon ginsuratan hin paluyoluyo? (Kitaa an retrato 1 ha tinikangan hini nga artikulo.)

⁴ An kapitulo 5 han Sakarias nagtitikang pinaagi hin urusahon nga bisyon. (Basaha an Sakarias 5:1, 2.) Nakita ni Sakarias an usa nga nalupad nga “likid,” o linukot nga basahon nga mga 9 ka metros an kahilaba ngan 4.5 ka metros an kahilapad! Nakabuklad ito ngan nakaandam para basahon. Nagsusulod ito hin mga mensahe han paghukom, nga nakasurat hin paluyoluyo ha linukot nga basahon. (Sak. 5:3) Kasagaran na nga an linukot nga basahon diri ginsusuratan hin paluyoluyo, salit ini nga linukot nga basahon matin-aw nga nagsusulod hin importante ngan seryoso nga mensahe.

5, 6. Ano an panhunahuna ni Jehova may kalabotan ha bisan ano nga klase hin pangawat?

⁵ Basaha an Sakarias 5:3, 4. Bisan kon an ngatanan nga tawo may baratunon kan Jehova ha ira mga ginbubuhat, labi na nga may baratunon ha iya an iya katawohan nga gintatawag ha iya ngaran. Maaram adton mga nahigugma ha Dios nga an bisan ano nga klase hin pangawat ‘magpapasipara han ngaran han ira Dios.’ (Prob. 30:8, 9) Anoman an motibo o anoman kamakatadunganon an rason han usa nga nangawat, iginpapakita niya nga mas importante ha iya an iya hakugnon nga hingyap kay han iya relasyon ha Dios ngan mas ginpapabilhan niya an materyal nga mga panag-iya. Ginmiminos niya an balaud han Dios ngan ginhuhunahuna nga diri importante hi Jehova ngan an Iya ngaran.

⁶ Tigamni nga an Sakarias 5:3, 4 nasiring nga “an panhimaraut . . . masulud ngada ha balay han kawatan . . . ngan ini mapabilin ha butnga han iya balay, ngan maglalamoy hini.” Ano an iginpapasabot hito? An paghukom ni Jehova diri mapupugngan hin mga purtahan o mga kandado. Maibubuhayhag hito an anoman nga sala nga patago nga ginbubuhat han iya katawohan. Bisan kon maitago han usa nga nangawat an iya ginbubuhat tikang ha mga awtoridad, agaron, tigurang, o kag-anak, diri niya ito maitatago ha Dios, nga nagpapasarig nga ibubuhayhag niya an ngatanan nga pangawat. (Heb. 4:13) Makalilipay gud nga makig-upod ha mga tawo nga nangangalimbasog nga magin tangkod ha “ngatanan nga butang.”—Heb. 13:18.

7. Paonan-o naton malilikyan an panhimaraot han nalupad nga linukot nga basahon?

⁷ Nasisina gud hi Jehova ha ngatanan nga klase hin pangawat. Gintatagad naton nga kadungganan an pagkinabuhi uyon ha hitaas nga suruklan ni Jehova ha moral ngan pagtipig han aton panggawi ha paagi nga diri magpapasipara ha iya ngaran. Sugad nga resulta, malilikyan naton an paghukom ni Jehova  kontra ha mga tinuyo nga nagtatalapas ha iya balaud.

8-10. (a) Ano an panumpa? (b) Ano nga panumpa an waray tumana ni Hadi Sedekia?

⁸ An sunod nga mensahe nga nakasurat ha nalupad nga linukot nga basahon nagpapahamangno ha mga ‘nanunumpa hin buwa ha ngaran han Dios.’ (Sak. 5:4) An panumpa amo an pagpahayag nga totoo an usa nga butang o pagsaad nga bubuhaton o diri bubuhaton han usa nga indibiduwal an partikular nga butang.

⁹ Seryoso gud nga butang an pagpanumpa ha ngaran ni Jehova. Ito an ginbuhat han ultimo nga hadi nga nagmando ha Jerusalem. Hi Sedekia nanumpa ha ngaran ni Jehova nga magpapabilin hiya nga maunungon ngan magpapasakop ha hadi han Babilonya. Pero waray niya tumana an iya iginpanumpa. Salit ginhukman hiya ni Jehova ha pagsiring: “Sugad nga ako buhi, . . . ha waray ruhaduha dida ha lugar diin an hadi [hi Sedekia] uukoy nga naghimo ha iya nga hadi, kanay pagsumpa iya gintamay, ngan kanay kaoyonan iya ginbungkag, bisan upud ha iya ha butnga han Babilonia hiya mamamatay.”—Esek. 17:16.

¹⁰ Obligado hi Sedekia nga tumanon an saad nga iya iginpanumpa ha ngaran han Dios. Pero waray niya ito tumana. (2 Kron. 36:13) Lugod, nagpabulig hiya ha Ehipto basi makagawas tikang ha pagkabihag ha Babilonya, kondi waray ito maglampos.—Esek. 17:11-15, 17, 18.

11, 12. (a) Ano an pinakaimportante nga saad nga aton mahihimo? (b) Paonan-o an aton dedikasyon sadang makaapekto ha aton adlaw-adlaw nga pagkinabuhi?

¹¹ Namamati liwat hi Jehova ha aton mga iginsasaad. Para kan Jehova, seryoso an aton mga saad salit sadang naton ito tumanon basi makarawat an iya pag-uyon. (Sal. 76:11) An pinakaimportante nga saad nga aton mahihimo amo an pagdedikar kan Jehova. An dedikasyon amo an seryoso nga saad nga mag-aalagad kita kan Jehova anoman an mahitabo.

¹² Paonan-o naton maipapakita nga gintutuman naton an aton dedikasyon kan Jehova? An aton  reaksyon ha mga pagsari, dagku man o gudtiay, sadang magpakita nga gintutuman gud naton an aton saad nga dayawon hi Jehova ‘kada adlaw.’ (Sal. 61:8) Pananglitan, kon may katrabaho o kaeskwela kita nga nagpipikat ha aton, ginhuhunahuna ba naton nga higayon ito nga ipakita nga ‘nalilipay kita ha mga dalan ni Jehova’ pinaagi ha pagsalikway han sugad nga pagsulay? (Prob. 23:26) Ano man kon diri Saksi an aton mga kapamilya? Nangangaro ba kita kan Jehova hin bulig nga maipakita naton pirme an Kristiano nga personalidad bisan kon kita la an nagbubuhat hito? Nag-aampo ba kita kada adlaw ha aton mahigugmaon nga Amay ha langit ngan nagpapasalamat kay nagin sakop kita han iya pagmando ngan hinigugma kita niya? Naggagahin ba kita hin panahon ha pagbasa han Biblia kada adlaw? Diri ba sugad hin nagsaad kita nga bubuhaton naton ito? An pagtuman han aton dedikasyon nagpapasabot hin pagin masinugtanon. An aton bug-os nga pakigbahin ha pag-alagad kan Jehova nagpapakita nga hinigugma naton hiya ngan dedikado gud kita ha iya. An aton pagsingba sadang magin bahin han aton kinabuhi, diri kay pormalidad la. Para ha aton kaopayan an pagtuman han aton mga saad, ngan an aton pagin matinumanon naghahatag ha aton hin makalilipay nga tidaraon.—Deut. 10:12, 13.

13. Ano an aton mahibabaroan ha ikaunom nga bisyon ni Sakarias?

¹³ An ikaunom nga bisyon ni Sakarias nabulig ha aton nga masabtan nga an mga nahigugma kan Jehova diri sadang magbuhat hin bisan ano nga klase hin pangawat ngan sadang nira tumanon an ira iginpanumpa. Hinbaroan liwat naton nga bisan pa han mga kapakyasan han mga Israelita, waray hira bayai ni Jehova. Nasasabtan niya nga makuri an ira kahimtang tungod han mga kaaway nga nakapalibot ha ira. Iginpapakita niya ha aton an maopay nga susbaranan pinaagi ha pagtuman han iya mga saad, ngan bubuligan kita niya nga matuman naton an aton mga saad. An usa nga paagi nga ginbubuligan kita niya amo an paghatag ha aton hin paglaom nga ha diri na maiha iya wawad-on an ngatanan nga karaotan ha bug-os nga tuna. An sunod nga bisyon ni Sakarias nagpapasarig ha aton hinin makalilipay nga paglaom.

14, 15. (a) Ano an nakita ni Sakarias ha iya ikapito nga bisyon? (Kitaa an retrato 2 ha tinikangan hini nga artikulo.) (b) Ano an ginrirepresentaran han babaye ha sulod han epa nga surudlan, ngan kay ano nga iginsulod hiya hito ngan gintakloban?

¹⁴ Katapos makita ni Sakarias an nalupad nga linukot nga basahon, ginsidngan hiya han anghel nga ‘isiplat an iya mga mata.’ Ano an iya makikita ha iya ikapito nga bisyon? Nakakita hiya hin usa nga surudlan, nga gintatawag nga “epa,” nga nagawas. (Basaha an Sakarias 5:5-8.) Inin kasadangan la an kadaku nga surudlan may taklob nga tingga. Han ginkuha an taklob, may nakita hi Sakarias nga ‘usa nga babaye nga nalingkod’ ha sulod han surudlan. Iginsaysay han anghel nga an babaye ha surudlan amo an “Karautan.” Handurawa an kahadlok ni Sakarias samtang nakikita niya an babaye nga nagsasari paggawas hito nga surudlan! Ginios dayon an anghel, iginduso niya an babaye tipasulod han surudlan, ngan ginsadhan ito han mabug-at nga taklob. Ano an iginpapasabot hini?

¹⁵ Ini nga bahin han bisyon nagpapakita nga diri tutugotan ni Jehova an bisan ano nga klase hin karaotan nga makasulod ha iya katawohan. Sisiguruhon niya nga mapugngan ito, ngan iya ito wawad-on dayon. (1 Cor. 5:13) Ini an iginpapasarig ha aton han anghel han iginbalik dayon niya an taklob han surudlan.

16. (a) Ano an sunod nga nakita ni Sakarias nga nahitabo ha epa nga surudlan? (Kitaa an retrato 3 ha tinikangan hini nga artikulo.) (b) Iginkain han duha nga babaye nga may mga pako an epa nga surudlan?

¹⁶ An sunod nga nakita ni Sakarias amo an duha nga babaye nga may magkusog nga pako nga pariho han kanan sigueña. (Basaha an Sakarias 5:9-11.) Inin duha nga babaye iba gud ha babaye ha sulod han surudlan! Gin-gamit nira an ira magkusog nga pako ha pagdagit han surudlan nga nagsusulod han “Karautan.” Ngain nira hiya dadad-on? An “Karautan” ira gindara ha “tuna ha Sinar,”  o Babilonya. Kay ano nga dadad-on nira an surudlan ngadto ha Babilonya?

17, 18. (a) Kay ano nga an Sinar an angayan nga lugar para butangan han “Karautan”? (b) Ano an sadang naton magin determinasyon may kalabotan ha karaotan?

¹⁷ Para ha mga Israelita ha panahon ni Sakarias, an Sinar angayan nga lugar para butangan han “Karautan.” Maaram gud hi Sakarias ngan an iya mga igkasi-Judio nga an Babilonya usa nga lugar han karaotan ha ira panahon. Tungod kay nag-ukoy hira hini nga syudad nga kalyap an imoralidad ngan pagsingba ha mga dios-dios, kinahanglan nira atohan kada adlaw an impluwensya hinin pagano nga syudad. Sigurado nga nalipay gud hira hini nga bisyon, nga usa nga garantiya nga titipigan ni Jehova nga limpyo an putli nga pagsingba!

¹⁸ Pero an bisyon nagpahinumdom liwat ha mga Judio han ira responsabilidad nga tipigan nga putli an ira pagsingba. An karaotan diri makakasulod ngan diri tutugotan nga makasulod ha katawohan ni Jehova. Tungod kay gindara kita ni Jehova ha iya limpyo nga organisasyon diin inaabat naton an iya gugma ngan panalipod, may responsabilidad kita nga bumulig ha pagtipig hito nga limpyo. Diri ba kita napapagios nga tipigan nga limpyo an organisasyon han Dios? An bisan ano nga klase hin karaotan waray gud lugar ha aton espirituwal nga paraiso.

19. Ano an kapulsanan para ha aton yana han urusahon nga mga bisyon ni Sakarias?

¹⁹ An ikaunom ngan ikapito nga bisyon ni Sakarias seryoso nga pahamangno para hadton nagpapadayon ha pagin diri tangkod, usa nga pahinumdom nga diri ginkukonsinter ni Jehova an maraot nga buhat. Ngan para hadton iya sinsero nga mga magsiringba, sadang gud nira kangalasan an karaotan. Ini nga mga bisyon usa liwat nga mahigugmaon nga pasarig tikang ha aton langitnon nga Amay. Kon mangangalimbasog kita nga magin an klase han tawo nga gin-uuyonan ngan ginpapanalipdan han Dios, diri naton maieksperyensyahan an makamaratay nga sirot. Lugod, malilipay hi Jehova nga bendisyonan kita. Bawi gud an ngatanan naton nga pangalimbasog nga magpabilin nga limpyo hinin kalibotan nga puno hin karaotan. Makakasarig kita nga maglalampos kita ha bulig ni Jehova! Pero paonan-o kita makakasiguro nga magpapadayon an tinuod nga pagsingba ha kalibotan nga puno hin karaotan? Kay ano nga kombinsido kita nga papanalipdan ni Jehova an iya organisasyon samtang nagtitikahirani an daku nga kasakitan? Ini nga mga pakiana babatunon ha sunod nga artikulo.