მუს ბგურაფლენთ ზაქარიაშ ხილუეფშე?
„დუმართით დო მა ხოლო დუგართუთ“ (ზაქ. 1:3).
ობირეშეფი: 120, 117
1—3. ა) მუ სიტუაციას რდუ იეჰოვაშ ხალხი, მუჟამსით დიჭყ ზაქარიაქ წინასწარმეტყველება? ბ) მუშენ უწუ იეჰოვაქ მუშ ხალხის, ნამდა დურთინდესკო თიშა?
ბიბლიაშე ბგებულენთ, ნამდა ზაქარიაქ ხილუას ძირ გილაფურინუნდუნ ფერ გრაგნილი, ეფაშ ოზიმალ ჭკუდის ენოხედუნ ფერ ოსურ დო ყარყანტიშ ფსუალამ ჟირ ოსურ, ნამუთ გილაფურინუნდეს (ზაქ. 5:1, 7—9). მუშენ ოძირუ იეჰოვაქ მუშ წინასწარმეტყველს თეცალ სარკო ხილუა? მუ მდგომარეობას რდეს ისრაელეფ თი დროს? მუს ბგურაფლენთ ზაქარიაშ ხილუეფშე?
2 ჯვ. წ. 537 წანა იეჰოვაშ მეძღვინელ ხალხშო მანგარ სახიოლო რდუ, მუშენდა თინეფქ ბაბილონიშ 70 წანიან მონობაშე გეთავისუფალეს. თინეფქ ხეთეშე ქიდიჭყეს იერუსალიმს ჭეშმარიტ თაყვანიშმცემლობაშ აღდგენა დო ჯვ. წ. 536 წანას ტაძარიშ ცოკოლ უკვე ენობუნილ აფდეს. ხალხი გახარებულ რდუ (ეზრ. 3:10—13). მარა მალას წინააღმდეგობაქ ქირჩქინ დუდ დო თინეფს გურქ გოუტირხეს, მიოტეს ტაძარიშ შენება, ქიდიჭყეს მუნეფიშ ყუდეეფიშ მონწყუალა დო დიხაშ დამუშება. შენებაშ დოჭყაფაშე ვითაამშვ წანა რდუ მიკულირ დო თე საქმე ხოლო ვაფდეს თებული. ღორონთიშ ხალხშა გაშინალ რდუ, დართესკო იეჰოვას დო თიშ ნება პირველ ადგილს ქიგიორინესკო. იეჰოვას ოკოდ, ნამდა თინეფქ კინ მთელ გურით, უშქურანჯო ემსახურესკო თის.
3 ღორონთიქ ჯვ. წ. 520 წანას მუშ წინასწარმეტყველ ზაქარია ქიმიაშკვ მუშ ხალხშა, ნამდა ქუგუშინუდკო, მუშენ გათავისუფალ თინეფ ბაბილონშე. სახელ ზაქარია ნიშნენს „იეჰოვას ირიათო შუ‘‘. მართალ რე ისრაელეფქ გიჭყოლიდეს ღორონთიშ საქმეეფი, მარა თე წინასწარმეტყველიშ დანიშნებათ იეჰოვაქ ქაძირუ, ნამდა ირიათო შუდ თინეფ (წეკითხით ზაქარია 1:3, 4). * ღორონთ პირობას არზენდ ისრაელეფს, ნამდა ქიმეხვარებუდ წმინდა თაყვანიშმცემლობაშ აღდგენას. მარა თინა ხოლო უწუ, ნამდა მთელ გურით თაყვანს ვაცენდეს-და, ვემიწონუანდ. მორთ, ქობძირათ, მუჭო მეხვარ იეჰოვაქ ისრაელეფს ზაქარიაშ მაამშვა დო მაშქვითა ხილუეფიშ საშვალებათ, კინ გუგრძელებდესკო მეტებულ საქმე. თეს გეძინელ, ქიგებგენთ ჩქი მუშ გურაფა შემლებნა თავრეშე?
ხირუას დასაჯება მოჸუნს
4. მუ ძირ ზაქარიაქ მაამშვა ხილუას დო მუშენ გეჭარუდ გრაგნილს მელე-მოლე? (ქოძირით 1 სურათი 21-ა გვერდის)
4 ზაქარიაშ მახუთა დუდ სარკო ხილუეფით იჭყაფ (წეკითხით ზაქარია 5:1, 2). * ზაქარიაქ ძირ მეფურინუნდუნ ფერ გრაგნილი, ნამუთ სიგინძათ სოდგარენ 9 მეტრა დო სიგანეთ 4.5 მეტრა რდუ. თინა გონწყუმილ რდუ დო მელე-მოლე ჭყალა გეჭარუდ (ზაქ. 5:3). ჯვეშ დროს გრაგნილს ხვალე ართ მხარეს გიოჭარანდეს. მარა თენა თიცალ მნიშვნელოვან ამბე რდუ, ნამდა გრაგნილიშ ჟირხოლო მხარეს გეჭარუდ.
ქრისტიანეფშო მიუღებელ რე ხირუა (ქოძირით აბზაცეფი 5—7)
5, 6. მუს ფიქრენს იეჰოვა ხირუაშე?
5 წეკითხით ზაქარია 5:3, 4. * იეჰოვა პასუხის მოთხინს არძას, განსაკუთრებულო მუშ ხალხის, მუშენდა თინეფს თიშ სახელ გეძნა. ღორონთიშ მოჸოროფე ხალხის არჩქილე, ნამდა ხირუათ ღორონთიშ სახელს ონჯღორეს ქაძირანა (იგავ. 30:8, 9). ნამთინე ფიქრენს, ნამდა ხირუაშო მინშა სერიოზულ მიზეზეფ არსებენს. მარა შხვეფ მუდგას ვა ფიქრენდანინ, კოჩ ნამუთ ხირულენსინ ჰარამ რე დო პირველ ადგილშა მატერიალურ ნივთეფ გეურე. თინა პატის ვა ცენს ვართ იეჰოვას, ვართ თიშ სახელს დო ვართ თიშ კანონეფს.
6 ზაქარიაშ 5:3, 4 მუხლეფშე იძირე, ნამდა ჭყალა „გემნურს მახინჯიშ ჸუდეშა . . . ქუდოსკიდუ თიშ ჸუდეს დო მოსპუნს თექიანობას“. იეჰოვაშ განაჩენშა წოხოლე მუთუნს ვეწარინე. თის შეულებ ფულირ საქმე ხოლო გეგმაარგამას. ნამთინექ შილებე მიხირას დო დუფულას თენა მთავრობაშ კათას, მუშ უნჩაშის, უხუცესეფს ვარდა მშობლეფს, მარა ღორონთშა მუთუნ ვემკახირე. იეჰოვა იჩიებ, ნამდა მახირალეფს გეგმაარგამენს (ებრ. 4:13). ჯგირობუას მომღანა თიცალ კათაწკუმა საქმეშ დაკინება, მიდგა ირიათო პატიოსნებას გიმირჩქინანს (ებრ. 13:18).
7. მუჭო ეუჩილითუათ დუდ დასაჯებას?
7 ვა უღუ მნიშვნელობა, აკაბცხას იფხირთ დო ვარ ბრელს, იეჰოვას ჯოგ ხირუა. ჩქინო დიდ პატი რე იეჰოვაშ მაღალ ნორმეფით ცხოვრება დო თიშნერო მოქციება, ნამდა განვადიდათ თიშ სახელი. თეს გეძინელ, თაშ ქიმიფქციებუთ-და, დუც ეუჩილითუანთ დასაჯებას, მუშენდა მიჩქნა, ღორონთ პასუხის მოთხინს თინეფს, მით გარძახ ვადოჸუნს თიშ კანონეფს.
ირიათო შევასრულათ ღორონთწკუმა დოდვალირ აღთქმა
8—10. ა) მუს ნიშნენს აღთქმაშ დოდვალა? ბ) მუ პირობაქ ვეშიასრულებუ ციდკიას?
8 გრაგნილს ენოჭარილ ამბე თინეფს ხოლო აფრთხილენს, მით ღორონთიშ სახელით ტყურათ იფუჩუანს (ზაქ. 5:4). აღთქმაშ დოდვალათ კოჩ იფუჩუანს, ნამდა მუდგარენ დასურო თაშ რე; ვარდა პირობას დვანს, ნამდა მუდგარენს გაკეთენს ვარდა ვა გაკეთენს.
9 იეჰოვაშ სახელით პირობაშ დოდვალა მანგარ სერიოზულ ამბე რე. თეს ვორწყეთ იუდაშ ბოლო მეფე ციდკიაშ მაგალითშე. ციდკიაქ პირობა დოდ, ნამდა ბაბილონიშ მეფეშ მსახურ იჸუაფუდ, მარა მუშ სიტყვას გეგნორთ. შედეგო, იეჰოვაქ ციდკიაშ გურშენ თქუ, ნამდა თინა ბაბილონს დოღურუდ (ეზეკ. 17:16).
10 იეჰოვა ელუდ, ნამდა ციდკია ღორონთიშ სახელით დოდვალირ პირობას შეასრულენდ. (2 მატ. 36:13). მარა თიქ გეგნურთ მუშ სიტყვას დო ბაბილონიშ ხეშე დუდიშ დარსხებელო ეგვიპტეს ქოთხუ მოხვარა. მარა ეგვიპტეს მუთუნნერო ვამახვარებუ თიშა (ეზეკ. 17:11—15, 17, 18).
11, 12. ა) ნამ რე არძაშ უმოს მნიშვნელოვან პირობა, ნამუთ ღორონც მეფჩით? ბ) მუჭო შევასრულათ მეძღვინუაშ აღთქმა?
11 ციდკიაშ მაგალითშე ვორწყეთ, ნამდა იეჰოვა ჩქინ დოდვალირ პირობას ხოლო სერიოზულო უჯინე. ქუმოკონა ღორონთიშ მოსაწონეფქ ქიპჸუათ-და, ოკო შევასრულათ თინა (ფსალმ. 76:11). ჩქი ბრელშა დომდვალნა პირობა, მარა თინეფშე არძაშ უმოს მნიშვნელოვან რე იეჰოვაშა დუდიშ მეძღვინუაშ დროს დოდვალირ პირობა. თე დროს ღორონც აღთქმა დუდვით, ნამდა მუდგაქ ვა მოხვადასინ, ირიათო ვემსახურებუთ თის.
12 მუჭო ოკო შევასრულათ ღორონთშა დუდიშ მეძღვინუაშ აღთქმა? მუჟამსით ჭიჭე დო დიდ განსაცდელეფიშ უმკუჯინუო ღორონთიშ ართგურეფ ფსიკდუთინ, ვოძირნათ, ნამდა მეჩამილ პირობას სერიოზულო ვუჯინეთ დო ირიათო განვადიდენთ იეჰოვას (ფსალმ. 61:8). შილებე ნამთინექ სამუშას ვარდა სკოლას არშიყობა ქუდომჭყან, მარა იეჰოვაშ კანონ ქომიჸორან-და, ვევაჸუნუთ თეს (იგავ. 23:26). თქვან ოჯახიშ წევრეფ იეჰოვაშ მოწმეეფ ვა რენან-და, თინეფწკუმა ურთიერთობაშ დროს ქოთხინთო იეჰოვას, ქიმგეხვარან ქრისტიანულ თვისებეფიშ გიმორჩქინას? ქურაგადუთო ღორონც ირ დღას მადლობას ჸოროფას დო ხემძღვანელობას ვა გარკენან თიშენ? ქოკითხულენთო ირ დღას ბიბლიას? ჩქი თიშ პირობა დობდვით, ნამდა თე ირფელს გუვაკეთენდით დო დევემორჩილებუდით ღორონც. მსახურებას სრულაშე მონაწილებათ ვოძირანთ, ნამდა მიჸორა იეჰოვა დო დასურო თიშ მეძღვინელ მსახურეფ ვორეთ. ჩქინო ღორონთიშ თაყვანიშცემა ცხოვრებაშ წესი რე დო ვართ ხოლო ფორმალობა. მეჩამილ პირობაშ შესრულება დო ღორონთიშ ართგურობა ჯგირობუას დო ბედნერ მომავალს მომღანა (კან. 10:12, 13).
13. მუს ბგურაფლენთ ზაქარიაშ მაამშვა ხილუაშე?
13 ზაქარიაშ მაამშვა ხილუაშე ქიგებგით, ნამდა იეჰოვაშ მოჸოროფეეფ ვართ ხირულენა დო ვართ ტყურა პირობეფს დვანა. ჩქი თინა ხოლო ქობძირით, ნამდა ბრელშა დაშესინ თიშ უმკუჯინუო, იეჰოვას ვემუტებ ისრაელეფი. ღორონც ჯგირო არჩქილედ, ნამდა თინეფ ნტერიშ გავლენაშ თუდო რდეს. იეჰოვა მარზენა თიშ მაგალითის, მუჭო ოკო შევასრულათ პირობეფ დო თეწკუმა ართო, თიშ შესრულებას ხოლო მიმეხვარებნა. ართ-ართ საშვალება, მუდგათ ღორონთ მოხვარნა, თიშ იმენდ რე, ნამდა თინა მალას მოსპუნს უბადობას. ზაქარიაშ ხოლო ართ ხილუაშე ბგებულენთ, ნამდა თენა დასურო თაშ იჸუაფ.
უბადობას მუშ ადგილ ქიმურჩქინეს
14, 15. ა) მუს ორწყე ზაქარია მაშქვითა ხილუას? (ქოძირით 2 სურათი 21-ა გვერდის). ბ) მუშ სიმბოლო რე ოსური, ნამუთ ეფაშ ოზიმალ ჭკუდის ინოხე დო მუშენ ინოხვილ თექ?
14 გილაფურინუნდუნ ფერ გრაგნილიშ ძირაფაშ უკულ, ანგელოზიქ ზაქარიას უწუ ჟი ქეუჯინუდკო. თინა მაშქვითა ხილუას ეფაშ ოზიმალ ჭკუდის ორწყე (წეკითხით ზაქარია 5:5—8). * თე მოკაბეტე ჭკუდის ტყვიაშ კვარკვალია ოფორალ უღუდ. მუჟამსით თიქ გემნინწყუნ, ზაქარიაქ ქოძირ „ოსურ, ნამუთ თექ ინოხედ“. ანგელოზიქ ზაქარიას უწუ, ნამდა თე ოსურ „უბადობა“ რდუ. წერმიდგინით, მუჭო აშკურნედ ზაქარიას, მუჟამსით ქოძირუნდ, ნამდა თე ოსურ თევრეშე ეშულას ოცადუდ. ანგელოზიქ კინ ქინარაგუ თინა ეფაშ ოზიმალ ჭკუდის დო ტყვიაშ ოფორალ ქიმნაფორ. მუს ნიშნენს თენა?
15 თე ხილუა თის ოძირანს, ნამდა იეჰოვა მუშ ხალხ შკას უბადობას ვემითვინენს. ღორონთიქ მუთუნ გლახა ქოძირ-და, ხეთეშე ქიმოქმედენს დო მოსპუნს თის (1 კორ. 5:13). თეშა მარწმუნენა თინა, ნამდა ანგელოზიქ ეფაშ ოზიმალ ჭკუდის ტყვიაშ ოფორალ ქიმნაფორ.
16. ა) მუქ აღოლ ეფაშ ოზიმალ ჭკუდის? (ქოძირით 3 სურათი 21-ა გვერდის). ბ) სო იღეს ყარყანტიშ ფსუალამ ოსურეფქ თე ჭკუდი?
16 თეშ უკულ ზაქარიაქ ქოძირ ჟირ ოსური, ნამუსით ყარყანტიშ ძალიერ ფსუალეფ უღდეს (წეკითხით ზაქარია 5:9—11). * თინეფ შურო ვა გუდეს ჭკუდის ენოხედუნ თი ოსურს. თე ოსურეფქ მუნეფიშ ძალიერ ფსუალეფით გეჭოფეს ეფაშ ოზიმალ ჭკუდი, სოდეთ „უბადობა“ ენოხედ დო მიდეღეს „შინარიშ დიხაშა“, ნამუსით უმოს გვინო ბაბილონქ ქიგიადვუ. მარა საინტერესო რე, მუშენ იღეს თინა იშენდოიშენ ბაბილონშა?
17, 18. ა) მუშენ რე ბაბილონი „უბადობას“ ოსქუნ ფერ ადგილი? ბ) მუშ კეთება გაფნა გინოჭყვიდილი?
17 ზაქარიაშ დროს ცხოვრენდესინ თი ისრაელეფს, ჯგირო არჩქილედეს, მუშენ რდუ ბაბილონი უბადობას ოსქუდუნ ფერ ადგილი. თინეფს უჩქდეს, ნამდა თე უბადო ქალაქ ეფშა რდუ უზნეობათ დო კერპეფიშ თაყვანიშცემათ. ისრაელეფს ირიათო აფდეს ობრძოლებელ თე გლახა გავლენაშა. თე ხილუა თინეფშო გურიშ ემაკინალ იჸიდ, მუშენდა იეჰოვა პირობას დვანდ, ნამდა გასუფთენდ მუშ თაყვანიშცემას.
18 თე ხილუა ისრაელეფს თის ხოლო გაშინანდ, ნამდა მუნეფს ხოლო ოვალდეს თაყვანიშცემაშ დროს სიწმინდეშ დაცვება. ღორონთიშ ხალხ შკას მუთუნნერ უბადობაქ ოკო ვეჸუას. ჩქი ღორონთიშ წმინდა ორგანიზაციაშ წევრეფ ვორეთ, სოდეთ დუც თხილერო ბგინაფლენთ დო ჸოროფა ვა მორკუნა. ათეშენ ვალდებულ ვორეთ, ნამდა ხე ქეშუნწყუათ თიშ სიწმინდეს დო მუთუნნერ უბადობას ვემეფჩათ ადგილ ჩქინ სულიერ სამოთხეს.
სუფთა ხალხი განადიდენს იეჰოვას
19. მუს ბგურაფლენთ ზაქარიაშ ხილუეფშე?
19 ზაქარიაშ მაამშვა დო მაშქვითა ხილუა აფრთხილენს თინეფს, მით აგრძელენს უპატიოსნო საქმეეფიშ კეთებას დო გაშინანს, ნამდა იეჰოვა ვემითვინენს უბადობას. მით ღორონც შურ დო გურით ცენს თაყვანსინ, უბადობა ოკო ჯოგუდას. თე ხილუეფ თიშ იმენდის ხოლო მარზენა, ნამდა ღორონთიშ მოსაწონო ქიმიფქციებუთ-და, თინა მაკურთხენა. თე უბადობათ ეფშა ქიანას ეფი ვა რე, სიწმინდეშ დაცვება, მარა იეჰოვაშ მოხვარათ შემალებენა თენა. საინტერესო რე, სოვრეშე მიჩქნა, ნამდა უბადობათ ეფშა ქიანას ჭეშმარიტ თაყვანიშმცემლობა ვემისპუ? მუ მარწმუნენა, ნამდა იეჰოვა დეცვენს მუშ ორგანიზაციას ასე, მუჟამსით დიდ გასაჭირ მონჭაფილ რე? ანწიან სტატიას თე კითხვეფ იჸუაფ გარჩიებული.
^ აბზ. 3 ზაქ. 1:3, 4: 3 ქუწი თინეფს, მუს იჩიებ ლაშქარიშ ღორონთი იეჰოვა: „დუმართით დო მა ხოლო დუგართუთ — იჩიებ ლაშქარიშ ღორონთ იეჰოვა. 4 ვაგურათ თქვან მუმალეფს, მიდგასით დიო ხოლო ულირ წანეფს ურაგადდეს წინასწარმეტყველეფ, მუდგას ლაშქარიშ ღორონთ იეჰოვა იჩიებუდ: მიოტეთ თქვან უბადო შარეფ დო თქვან უბადო საქმეეფი. მარა თინეფქ ჸუჯ ვამოთხის, — იჩიებ იეჰოვა“.
^ აბზ. 4 ზაქ. 5:1, 2: 1 კინ ქეიბჯინ დო ქობძირ გილაფურინუნდუნ ფერ გრაგნილი. 2 თიქ პკითხ: მუს ორწყექია? ვუწი: „ვორწყექ გილაფურინუნსინ ფერ გრაგნილს, ნამუთ სიგინძათ ეჩ წყრთა რე დო სიგანეთ — ვით წყრთა“.
^ აბზ. 5 ზაქ. 5:3, 4: 3 თიქ მიწუ: «თენა რე ჭყალა, ნამუთ მთელ ქიანას გინულუანს, მუშენდა მით ხირულენსინ, მუჭოთ თიშ ართ მხარეს რე ჭარილინ, მითინ ვა დასაჯებე; მით იფუჩუანსინ, მუჭოთ თიშ მაჟია მხარეს რე ჭარილინ, მითინ ვა დასაჯებე. 4 ლაშქარიშ ღორონთ იეჰოვა იჩიებ: „მა გიშებჭანე თინა. გემნურს თინა მახინჯიშ ჸუდეშა დო ჩქიმ სახელით ტყურას იფუჩუანსინ თიშ ჸუდეშა; ქუდოსკიდუ თიშ ჸუდეს დო მოსპუნს თექიანობას თიშ ჯაშ ბიჯეფ დო ქუალეფწკუმა ართო“».
^ აბზ. 14 ზაქ. 5:5—8: 5 «თიმწკუმა ანგელოზიქ, ნამუთ მირაგადუდუნ, ქუმორთ დო მიწუ: „ქეიჯინ დო ქოძირ, მუ მოურს“. 6 ქოპკითხ თის, მუ რე-მაქ თენა? თიქ მიწუ: „ეფაშ ოზიმალ ჭკუდ მოურს“. კინ მიწუ: „თეცალ მეჯინელ რენა თინეფ მთელ დედამიწას“. 7 გეინჯ ტყვიაშ კვარკვალია ოფორალქ დო ოსურ ენოხედ ეფაშ ოზიმალ ჭკუდის. 8 თიქ თქუ: „თენა უბადობა რე“. კინ ქინარაგუ ოსურ ეფაშ ოზიმალ ჭკუდის დო ტყვიაშ ოფორალ ქიმნაფორ».
^ აბზ. 16 ზაქ. 5:9—11: 9 «ქეიბჯინ დო ქობძირ ჟირ ოსური, ნამუთ ჩქინდა მოფურინუნდეს; ბორია რდუ თინეფიშ ფსუალეფს, თინეფიშ ფსუალეფ ყარყანტიშ ფსუალეფს ქოგუდ. თინეფქ დიხა დო ცა შკას გეჭოფეს ეფაშ ოზიმალ ჭკუდი. 10 ანგელოზის, ნამუთ მირაგადუდუნ პკითხი: სო მეუღნა-მაქ ეფაშ ოზიმალ ჭკუდი? 11 თიქ მიწუ: „შინარიშ დიხაშა, ნამდა ქიგუდგან თი ოსურს ჸუდე. თის თექ მუშ ადგილს ქიმურჩქინანა“».
