撒迦利亞嘅異象對你有乜嘢影響
“要回頭歸向我……我就回頭眷顧你哋。”——撒迦利亞書1:3
唱詩120，117首
1-3．（甲）喺撒迦利亞開始講預言嘅時候，上帝嘅子民處於點樣嘅情況？（乙）點解耶和華呼籲佢嘅子民“回頭歸向”佢？
一卷喺空中飛緊嘅書；一個婦人被封喺量籃入面；兩個婦人展翅乘風飛翔，佢哋嘅翅膀好似鸛鳥嘅翅膀——呢啲生動嘅景象就記錄喺撒迦利亞書。（撒迦利亞書5:1,7-9）點解耶和華要俾佢嘅先知睇呢啲驚人嘅異象呢？當時猶太人嘅情況係點樣嘅呢？撒迦利亞所記錄嘅呢啲異象，對今日嘅我哋有乜嘢影響？
2 對耶和華嘅子民嚟講，公元前537年係好值得開心嘅一年。佢哋被擄去巴比倫70年之後，終於獲得自由。起初，佢哋又興奮又開心，喺耶路撒冷着手恢復正確嘅崇拜。喺公元前536年，佢哋奠定咗聖殿嘅根基。喺嗰陣，猶太人“大聲呼喊，喊聲喺好遠嘅地方都聽得見”。（以斯拉記3:10-13）不過，喺建築工程上受到嘅反對好快就變得越來越猛烈。由於遇到好多挑戰同困難，猶太人就灰心喪氣，於是停手唔再修建聖殿，開始淨係顧住起屋耕田。16年之後，耶和華聖殿嘅建造工程仲係未完工。上帝嘅子民需要受到提醒，應該回頭歸向耶和華，唔好再將個人追求放喺首位。耶和華希望佢嘅子民可以回頭，重新振作，鼓起勇氣，全心事奉佢。
3 喺公元前520年，耶和華差派先知撒迦利亞去提醒自己嘅子民，要佢哋回想自己從巴比倫獲得釋放嘅主要原因。撒迦利亞呢個名嘅意思係“耶和華已經顧念”。呢個可能會使猶太人記得，雖然佢哋已經忘記上帝曾經點樣拯救佢哋，但係上帝並冇忘記佢嘅子民。（請讀撒迦利亞書1:3,4）佢仁愛噉向猶太人保證，佢會幫助佢哋恢復正確崇拜，同時亦都警告話，佢唔會接受三心兩意嘅崇拜。等我哋嚟睇吓，耶和華點樣通過撒迦利亞嘅第六同第七個異象嚟推動佢哋採取行動。然後再睇吓，今日我哋從呢兩個異象學到乜嘢？
上帝會懲罰偷竊嘅人
4．撒迦利亞喺佢嘅第六個異象入面睇到乜嘢？書卷嘅正反兩面都記錄咗文字，呢個有乜嘢特别嘅含意？（請睇吓課文開頭嘅圖片1）
4 撒迦利亞書第5章以一個非比尋常嘅異象作為開頭。（請讀撒迦利亞書5:1,2）撒迦利亞見到空中飛過一卷書，有成9米長（30英尺），4.5米闊（15英尺）！書卷係展開嘅，入面嘅内容清晰可見。書卷嘅正反兩面都記錄咗一個審判信息。（撒迦利亞書5:3）書卷一般只會用一面嚟做記錄，既然呢個書卷兩面都有文字，表明書卷上嘅信息一定好重要。
基督徒唔應該有任何形式嘅偷竊行為 （請睇第5-7段）
5,6．耶和華對任何形式嘅偷竊行為有乜嘢睇法？
5 請讀撒迦利亞書5:3,4。既然全人類都要向耶和華上帝交賬，佢名下嘅子民就更加有責任要噉樣做。愛上帝嘅人都清楚知道，任何形式嘅偷竊行為都會“羞辱［佢哋］上帝嘅名”。（箴言30:8,9）無論出於乜嘢目的，或者幾咁情有可原，偷竊就係過度重視物質財富，將滿足自己嘅貪慾睇得比事奉上帝更重要。呢啲人唔尊重上帝嘅律法，完全無視耶和華同佢嘅聖名。
6 你有冇留意到撒迦利亞書5:3,4點樣講呢？經文話：“咀咒必進入偷竊之人嘅家……必留喺佢家中，以致房屋……毁滅。”冇任何事物可以阻擋得到耶和華施行審判。無論上帝子民嘅錯誤行為有幾咁隱密，上帝都能够揭發出嚟。就算一個人喺司法人員、老闆、長老或者父母面前有辦法隱瞞自己嘅偷竊行為，但佢點都瞞唔到上帝，而上帝一定會將所有偷竊行為揭發出嚟。（希伯來書4:13）能够同嗰啲“行事盡都誠實”嘅人做朋友，真係令人舒暢！（希伯來書13:18）
7．我哋點樣先可以免受書卷嘅咀咒？
7 耶和華憎恨任何形式嘅偷竊行為。我哋努力符合耶和華嘅崇高道德標準，而且將呢個視為殊榮，同時保持良好嘅品行，避免令耶和華嘅聖名蒙羞。噉樣，喺耶和華對嗰啲蓄意違反佢律法嘅人施行審判嘅時候，我哋或者可以免受懲罰。
“天天”履行我哋嘅誓願
8-10．（甲）誓言係乜嘢？（乙）西底家王背棄咗乜嘢誓言？
8 接住落嚟，書卷又向嗰啲“奉［上帝嘅］名發假誓之人”發出咗一個警告。（撒迦利亞書5:4）發誓嘅意思係，通過誓言嚟保證某件事屬實，又或者一個人對於會唔會做某件事而作出嚴肅嘅承諾。
9 用耶和華嘅名嚟發誓係一個好嚴肅嘅問題。我哋從最後一個統治耶路撒冷嘅猶大王西底家身上可以學到呢一點。佢用耶和華嘅名發誓，話自己會忠心服從巴比倫王，不過佢並冇履行自己嘅誓言。結果，耶和華宣判話：“我以我嘅永生發誓，巴比倫王立［西底家］作王，但係佢毁約背誓，所以佢一定會死喺巴比倫王嘅京城。”（以西結書17:16）
10 既然西底家王用上帝嘅名嚟發誓，佢就有義務要向耶和華履行誓言。（歷代志下36:13）不過，西底家試圖擺脱巴比倫嘅控制，轉而投靠埃及。（以西結書17:11-15,17,18）
11,12．（甲）喺我哋所作嘅承諾當中，邊一個係最重要嘅？（乙）我哋嘅獻身誓願應該點樣影響我哋每日嘅生活？
11 耶和華知道我哋所作嘅承諾，而且將我哋嘅誓言睇得好重要。為咗得到耶和華嘅悦納，我哋必須履行諾言。（詩篇76:11）喺我哋所作嘅承諾當中，最重要嘅就係向耶和華所作嘅獻身誓願。獻身係一個嚴肅嘅誓願，表明自己願意無條件事奉耶和華。
12 我哋可以點樣實踐自己嘅獻身誓願呢？我哋每日都會遇到大大小小嘅考驗，我哋所作嘅選擇應該表明自己重視“天天”讚美耶和華呢個誓願。（詩篇61:8）例如，喺學校或者工作嘅地方有人向我哋調情，我哋會唔會堅決拒絶，通過噉樣嚟表明自己“喜悦［耶和華］嘅道路”呢？（箴言23:26）就算喺家人當中只有我哋一個崇拜耶和華，我哋有冇祈求耶和華幫助自己繼續表現基督徒嘅美好特質？我哋有冇每日向仁愛嘅天父禱告，感謝佢俾我哋成為佢嘅子民同埋感激佢咁愛我哋？我哋有冇每日撥出時間研讀聖經呢？事實上，我哋唔係向耶和華承諾過會噉樣做嘅咩？呢啲牽涉到我哋對上帝嘅服從。我哋全心事奉耶和華，就表明我哋愛佢，真正履行對佢嘅獻身誓願。崇拜耶和華係一種生活方式，而唔係一種形式。履行誓願對我哋有益；忠貞事奉耶和華可以帶俾我哋一個穩確嘅將來。（申命記10:12,13）
13．我哋從撒迦利亞嘅第六個異象學到乜嘢？
13 撒迦利亞嘅第六個異象幫助我哋睇出，愛耶和華嘅人唔應該發假誓或者有任何偷竊行為。我哋知道，就算猶太人經常犯錯，耶和華都冇放棄佢哋。佢好理解猶太人因為四面受敵而面對嘅壓力。耶和華言出必行，為我哋立下榜樣，佢一定會幫助我哋履行諾言。佢幫助我哋嘅一個方法就係，俾我哋知道佢好快就會終止地上嘅一切罪惡，使我哋懷有希望。撒迦利亞嘅下一個異象證明呢個光明嘅希望一定會實現。
將邪惡安置喺“適當嘅地方”
14,15．（甲）撒迦利亞喺第七個異象睇到乜嘢？（請睇吓課文開頭嘅圖片2）（乙）量籃入面嘅婦人代表乜嘢？點解天使要封實個量籃？
14 睇完書卷嘅異象之後，一個天使叫撒迦利亞 “舉目觀看”。佢睇到嘅第七個異象透露咗乜嘢呢？而家，佢見到一個量籃出現。（請讀撒迦利亞書5:5-8）呢個量籃有個“圓形嘅鉛蓋”。鉛蓋打開嘅時候，撒迦利亞睇到“有個婦人坐喺量籃入面”。天使解釋話，量籃入面嘅婦人就係“邪惡”。試想像吓，睇到呢個婦人從量籃爬出嚟嗰時，撒迦利亞一定非常恐懼！天使即刻將婦人推返去量籃入面，冚實沉重嘅鉛蓋。噉有乜嘢含意呢？
15 異象嘅呢個部分强調，耶和華一定唔會容忍喺佢子民當中有任何形式嘅邪惡行為。天使迅速採取行動冚翻個鉛蓋，呢個使我哋確信，耶和華一見到邪惡嘅事就會即刻將佢除去。（哥林多前書5:13）
耶和華會使正確崇拜保持潔淨 （請睇第16-18段）
16．（甲）關於量籃，撒迦利亞接住落嚟睇到有乜嘢事發生？（請睇吓課文開頭嘅圖片3）（乙）兩個有翅膀嘅婦人將量籃帶去邊度？
16 喺下一幕，出現咗兩個婦人，佢哋强壯嘅翅膀好似鸛鳥嘅翅膀。（請讀撒迦利亞書5:9-11）呢兩個婦人同量籃入面嘅婦人完全唔一樣！憑住有力嘅翅膀，佢哋俯衝落嚟，將裝住“邪惡”嘅量籃提起。呢兩個婦人要帶邪惡去邊度呢？佢哋要將佢帶去“示拿地”，即係巴比倫。點解要將量籃安置喺巴比倫呢？
17,18．（甲）點解示拿地係安置“邪惡”嘅“適當嘅地方”？（乙）呢個異象提醒我哋應該有點樣嘅決心？
17 對撒迦利亞日子嘅猶太人嚟講，示拿地係一個適合囚禁邪惡嘅地方。撒迦利亞同佢嘅同胞都清楚知道巴比倫係一個邪惡嘅地方。佢哋喺呢個道德敗壞，充滿偶像崇拜嘅地方長大，每日都要奮力抵抗異教世界嘅精神。異象肯定使當時嘅猶太人大感安慰！因為耶和華通過呢個異象保證，佢一定會使正確嘅崇拜保持潔淨。
18 異象亦都提醒猶太人有責任喺崇拜方面保持潔淨。邪惡嘅行為唔會被容許，亦都唔能够潛入同留喺耶和華嘅子民當中。耶和華將我哋帶入佢純潔嘅組織之後，我哋得到關愛同保護嘅同時，都有責任要維持組織嘅潔淨。我哋每個人都可以出一分力保持會衆嘅潔淨。喺我哋嘅屬靈樂園，唔應該存在任何形式嘅邪惡行為。
潔淨嘅子民榮耀耶和華
19．撒迦利亞生動嘅異象對我哋有乜嘢意義？
19 撒迦利亞嘅第六同第七個異象向嗰啲繼續有唔誠實行為嘅人發出嚴肅嘅警告，亦都提醒我哋耶和華唔會容忍錯誤嘅行為。嗰啲真心支持正確崇拜嘅人，必定痛恨一切邪惡嘅事。呢啲記載亦都係嚟自我哋天父嘅仁愛保證。如果我哋努力得到上帝嘅悦納同保護，就唔會遭受毁滅嘅咀咒。耶和華會祝福我哋。喺呢個充滿邪惡嘅世界，我哋為保持潔淨而作出嘅一切奮鬥同努力都係值得嘅。喺耶和華嘅幫助下，我哋確信一定能够成功！但係，點解我哋可以肯定正確崇拜會戰勝呢個充滿邪惡嘅世界呢？我哋點知道喺大患難嚟到之前耶和華會保護佢嘅組織？下一篇課文會討論呢啲問題。
