1-3. a) ¿Ximodo nuu xquidxi Dios dxi bizulú Zacarías biʼniʼ de profeta? b) ¿Xiñee gunabaʼ Jiobá xquidxi guibiguetaʼ ra nuu?

TI ROLLO ni zipapa, ti gunaa deguyoo ndaaniʼ ti dxumi ne chupa gunaa ziyasa lu bi ni napa xhiaa casi ti cigüeña. Ndaaniʼ libru ni bicaa profeta Zacarías zeeda cani bizéʼtenu riʼ ne dede zanda guxuíʼlunu cani (Zac. 5:1, 7-9). ¿Xiñee biluíʼ Jiobá ca visión riʼ profeta stiʼ? ¿Ximodo nuu ca israelita tiempu que? ¿Ximodo zanda gacané ca visión riʼ laanu tiempu riʼ?

² Lu iza 537 ante de ca dxi stiʼ Jesús guizáʼ nayecheʼ bibani xquidxi Jiobá. Guyuucabe de esclavu Babilonia setenta iza, peru yanna maʼ libre laacabe. Nacubigá que, guizáʼ cayecheʼ ca israelita purtiʼ maʼ chi guibiguétacaʼ Jerusalén para gucuicaʼ yuʼduʼ que sti biaje ne guni adorarcaʼ Dios raqué. Ti iza despué, lu iza 536, bíʼnicabe base stiʼ yuʼduʼ que. Biblia ná «reciu cuguaʼ ca binni que ridxi, dede zitu zanda gunadiágacabe ridxi que» (Esd. 3:10-13). Peru cani qué riuulaʼdxiʼ gaca adorar Jiobá jneza la?  jmaruʼ si bicaalucaʼ para cadi cuí yuʼduʼ que. Biree ca israelita que gana pur ca guendanagana bidxagalucaʼ dede bisaanacaʼ dxiiñaʼ que. Jma gucuá íquecabe gucuícabe lídxicabe ne gúnicabe dxiiñaʼ lu ca layú stícabe. Dieciséis iza despué de bíʼnicabe base stiʼ yuʼduʼ que, biaanadxí dxiiñaʼ de nucuícabe ni sti biaje. Gupa xidé bisietenalaʼdxiʼ Jiobá ca israelita que gusaana de guyúbicaʼ puru para laasicaʼ ne guibiguétacaʼ ra nuube para guni adorarcaʼ laabe sin guidxíbicaʼ ne gúnicaʼ ni né stale gana.

³ Ngue runi lu iza 520 biseendaʼ Jiobá profeta Zacarías para gusietenalaʼdxiʼ xquidxi xiñee guleebe laacaʼ de Babilonia. Risaca gánnanu lá Zacarías ca riníʼ ni «Rietenalaʼdxiʼ Jiobá». Zándaca bicaa ndiʼ ca israelita que guiníʼ íquecaʼ ti cosa nabé risaca: neca bisiaandacabe ni biʼniʼ Jiobá pur laacabe, laabe qué nusiaandabe laacaʼ (biindaʼ Zacarías 1:3, 4). Né stale cariñu biʼniʼ prometer Jiobá zacané laacabe guni adorárcabe laa jneza sti biaje. Peru laaca gudixhená laacabe, qué ziuulaʼdxiʼ modo guni adorárcabe laa pa qué gúnicabe ni de guidubi ladxidóʼcabe. Guidúʼyanu ximodo biquiiñeʼ Jiobá visión xhoopaʼ ne visión gadxe ni gucuaa Zacarías para cuʼ gana laacabe gúnicabe ni jneza ne xi rizíʼdinu de laacani.

4. a) ¿Xi biʼyaʼ Zacarías lu visión xhoopaʼ? b) ¿Xiñee cá mensaje guiropaʼ ladu rollo que? (Biiyaʼ dibuju númeru 1).

⁴ Ruzulú capítulo gaayuʼ stiʼ Zacarías né ti visión ni nabé ridxagayaanu (biindaʼ Zacarías 5:1, 2). Biiyaʼ profeta riʼ ti rollo ni zipapa, ziuulaʼ ni 9 metru ne 4 metru arondaʼ de xilaga ni. Zuxeleʼ ni, maʼ nuu ni listu para guiuundaʼ ni. Guiropaʼ ladu rollo que cá mensaje lu (Zac. 5:3). Costumbre gúpacabe dxiqué nga gucaacabe ti ladu si de ca rollo que. Nga runi, cumu guiropaʼ ladu rollo riʼ cá mensaje la? ndiʼ riníʼ guizáʼ risaca ni cá luni. Ne zacá ni, purtiʼ nácani ti mensaje ni caníʼ ziabanácabe.

5, 6. ¿Ximodo ruuyaʼ Jiobá guiráʼ modo ribaʼnaʼ binni?

⁵ (Biindaʼ Zacarías 5:3, 4). Guiranu zabidxi Dios cuenta laanu pur ni gúninu. Ne laanu, cani zinenu labe, jma naroʼbaʼ responsabilidad nápanu. Laanu cani nadxiinu Dios nánnanu guiráʼ modo ribaʼnaʼ binni runi biidiʼ ni labe (Prov. 30:8, 9). Nuu binni riníʼ ique cadi malu cuanaʼ ora nuu ti razón para guni ni. Peru ni dxandíʼ la? ora ribaʼnaʼ binni rusihuinni jma risaca ca cosa material ca para laa que Jiobá, labe ne ca ley stibe.

⁶ Cadi guiaandaʼ laanu Zacarías 5:3, 4 ná maldición ca «napa xidé chuʼ ni ra lidxi gubaanaʼ ca», guiaana ni ra lidxi ne gunduuxeʼ ni laa. Ndiʼ riníʼ zanda gusihuinni Jiobá ne guni juzgar intiica pecadu ni guni tobi de ca siervu stiʼ. Zándaca gucaachiʼ tuuxa ni maʼ biʼniʼ nezalú ca autoridad, jefe stiʼ, ca ancianu, o bixhoze ne jñaa. Peru qué zanda gucaachiʼ ni nezalú Dios, purtiʼ laabe maʼ guniʼbe zusihuínnibe guiráʼ ni ribaʼnaʼ (Heb. 4:13). Laanu, ca xpinni Dios, riéchenu purtiʼ nuunu lade binni ni runi stipa pur gaca honradu lu «irá ni guni» (Heb. 13:18).

7. ¿Xi rizíʼdinu de visión ra biʼyaʼ Zacarías ti rollo ni zipapa?

⁷ Guiráʼ modo ribaʼnaʼ binni ruchiichi ni Jiobá. Laanu, ca xpinni Dios, rusisácanu ndaayaʼ ni nápanu de gunibiaʼnu ne gúninu ni ná ca norma moral stibe ne gusisácanu labe pur modo guibáninu. Zacá qué zeeda castigu stiʼ Dios luguianu casi gueeda ni luguiáʼ cani qué riná guni ni ná ca ley stibe.

8-10. a) ¿Xii nga ti juramentu? b) ¿Xi juramentu qué ñuni respetar Sedequías?

⁸ Despué, gudixhená mensaje ni zeeda lu rollo que cani runi jurar lu lá Dios neca cadi dxandíʼ ti cosa (Zac. 5:4). Ti juramentu zanda gaca ni ca diidxaʼ riníʼ tuuxa para gusihuinni dxandíʼ xiixa o ti promesa ni rúnicabe para gusihuínnicabe dxandíʼ zaca ti cosa o qué zaca.

⁹ Cadi guendariguite nga guni tuuxa ti juramentu lu lá Jiobá. Guidúʼyanu xi bizaaca Sedequías, últimu rey ni biʼniʼ mandar Jerusalén. Biʼniʼ jurarbe lu lá Jiobá zuzuubabe stiidxaʼ rey stiʼ Babilonia. Peru maʼ qué nulábibe juramentu bíʼnibe ne maʼ qué ñuni cumplirbe pactu ni bíʼnibe. Ne pur ni bíʼnibe riʼ, gudxi Dios laabe zátibe Babilonia (Ezeq. 17:16).

¹⁰ Guleza Jiobá ñuni respetar Sedequías juramentu ni biʼniʼ lu lá Dios (2 Crón. 36:13). Peru maʼ qué ñuni cumplir rey riʼ promesa ni biʼniʼ ne gunabaʼ gacané Egipto laa para ganda guireecaʼ de lu naʼ ca binni de Babilonia. Peru qué niquiiñeʼ ni bíʼnibe riʼ (Ezeq. 17:11-15, 17, 18).

11, 12. a) ¿Gunáʼ nga voto jma risaca ni zanda gúninu? b) Pa maʼ bidiʼnu xquendanabáninu Dios, ¿xi rucaa ni laanu gúninu?

¹¹ Laaca rucaadiaga Jiobá ca voto o ca promesa ni rúninu. Laabe qué ruuyabe cani casi guendariguite, ne naquiiñeʼ guni respetarnu cani para chuuláʼdxibe cani rúninu (Sal. 76:11). Voto ni jma risaca ni rúninu nga ora rudiʼnu laanu Dios. Ora rudiʼnu xquendanabáninu Jiobá la? runi prometernu laabe zúninu ni nabe neca guizaaca intiica cosa lu xquendanabáninu.

¹² ¿Ximodo runi cumplirnu voto ni rúninu ora rudiʼnu laanu Dios yaʼ? Pur cani gúninu ora guidxaagalunu ca guendanagana ca, pa naroʼbaʼ o pa nahuiiniʼ cani, zusihuinni cani pa dxandíʼ rusisácanu promesa ni bíninu de gúninu xhiiñaʼ Jiobá «guiráʼ  dxi» (Sal. 61:8). Guzéʼtenu ti ejemplu, pa tuuxa guni coquetearné laanu ra dxiiñaʼ o ra scuela, ¿ñee rucáʼnanu guiráʼ ni rúnicabe para gulábinu laacabe ne rusihuínninu racaláʼdxinu guzúʼbanu stiidxaʼ Jiobá la? (Prov. 23:26). O pa laasinu nácanu xpinni Dios ndaaniʼ familia stinu, ¿ñee rinábanu laabe gacanebe laanu para gaca xpiaʼnu casi naquiiñeʼ gaca xpiaʼ ti xpinni Cristu la? Intiica si guendanagana guidxaagalunu, ¿ñee runi orarnu Jiobá guiráʼ dxi para gudiʼnu xquíxepeʼ laa pur guendarannaxhii stiʼ ne pur ruluíʼ laanu modo guibáninu la? ¿Ñee ribeenu tiempu para guidúʼndanu Biblia guiráʼ dxi la? Ndiʼ nga ca cosa ni biʼniʼ prometernu zúninu dxi bidiʼnu xquendanabáninu Dios. Nga runi, pa gúninu cani zahuinni pa cuzúʼbanu diidxaʼ. Pa gudiʼnu ni jma galán de laanu lu xhiiñaʼ Jiobá, zusihuínninu nadxiinu laabe ne dxandíʼ bidiʼnu laanu laabe. Qué rúninu xhiiñaʼ Jiobá purtiʼ si caquiiñeʼ gúninu ni, sínuque reeda gaca ni parte de guendanabani stinu. Pa guni cumplirnu promesa ni bíninu, zacané ni laanu para guibáninu jma galán, purtiʼ Dios maʼ biʼniʼ prometer ti futuro sicarú para cani guzuubaʼ diidxaʼ (Deut. 10:12, 13).

13. ¿Xi rizíʼdinu de visión xhoopaʼ ni biʼyaʼ Zacarías?

¹³ Visión xhoopaʼ ni biʼyaʼ Zacarías racané ni laanu, cani nadxiinu Jiobá, gánnanu qué zanda diʼ cuánanu ne qué guni cumplirnu ni maʼ bidii stiidxanu. Laaca rizíʼdinu qué nusiaandaʼ diʼ Dios ca israelita neca bicheecaʼ. Gunna Jiobá gúpacabe stale enemigu ne pur ngue stale biaje qué nidxélacabe xi ñúnicabe. Runi cumplir Jiobá guiráʼ promesa ni runi, ne zacá nga rusaanabe ti ejemplu de ximodo naquiiñeʼ gúninu. Ne zanda chuʼnu seguru zacanebe laanu para gúninu ni maʼ bidii stiidxanu. Ti modo racanebe laanu nga ra cayábibe laanu mayaca gunduuxebe ca guendaquéiquiiñeʼ ni nuu lu Guidxilayú. Sti visión ni biʼyaʼ Zacarías racané laanu guni crenu dxandíʼ zaca ni cuzéʼtenu riʼ.

14, 15. a) ¿Xi biʼyaʼ Zacarías lu visión gadxe que? (Biiyaʼ dibuju númeru 2). b) ¿Tuu nga zeeda gaca gunaa nuu ndaaniʼ dxumi que? c) ¿Xiñee biseguyoo ángel que gunaa que ndaaniʼ ti dxumi?

¹⁴ Biiyaʼ si Zacarías visión de rollo que, gudxi ti ángel laabe: «Rinabaʼ lii guindisaʼ luluʼ». ¿Xi biʼyaʼ profeta riʼ lu visión gadxe riʼ yaʼ? Biiyabe zedaree ti «ni riguubiaʼnécabe ti efá», o ti dxumi ni biquiiñeʼ para cuʼbiáʼcabe ti efá (biindaʼ Zacarías 5:5-8). Napa dxumi riʼ ti «tapa redondo de plomo». Ora gundísacabe tapa que, biiyaʼ Zacarías «zuba ti gunaa ndaaniʼ ni». Bisiene ángel que laabe gunaa que nga «Guendaquéiquiiñeʼ». Guxuíʼlunu pabiáʼ bidxibi profeta riʼ ora biʼyaʼ racalaʼdxiʼ gunaa riʼ guiree. Peru nagueendaca guluu ángel que laa sti biaje ne biteeguʼ ruaʼ dxumi que né tapa ni nanaa que. ¿Xi riníʼ guiráʼ ndiʼ yaʼ?

¹⁵ Parte de visión riʼ rusihuinni ni qué zudii Jiobá lugar chuʼ nin ti clase de guendaquéiquiiñeʼ ndaaniʼ xquidxi. Pa gúʼyabe xiixa cosa malu la? nagueendaca zabeebe ni (1 Cor. 5:13). Zacá bisihuinni ángel que ni ora gudixhe tapa de plomo que ruaa dxumi que nagueendaca.

16. a) ¿Xi biʼyaʼ Zacarías bizaaca né dxumi que? (Biiyaʼ dibuju númeru 3). b) ¿Paraa ziné ca gunaa ni napa xhiaa dxumi que?

¹⁶ Despué bihuinni chupa gunaa ni napa xhiaa nadipaʼ casi stiʼ ti cigüeña (biindaʼ Zacarías 5:9-11). Gadxepeʼ ca gunaa riʼ de gunaa ni láʼ «Guendaquéiquiiñeʼ», ni nuu ndaaniʼ dxumi que. Biiyaʼ Zacarías gundísacabe dxumi que ne zinécabe ni né ca  xhiaacabe ni nadipaʼ que. ¿Paraa zinécabe gunaa riʼ yaʼ? «Lu layú stiʼ Sinar» o Babilonia. ¿Xiñee zinécabe laabe lugar ca yaʼ?

17, 18. a) ¿Xiñee biáʼsipeʼ Sinar nga «lugar» stiʼ «Guendaquéiquiiñeʼ»? b) ¿Xi naquiiñeʼ chuʼnu dispuestu gúninu né ca cosa malu?

¹⁷ Tiempu bibani Zacarías ne ca israelita que, biaʼsi guidxi Sinar o Babilonia nga lugar naquiiñeʼ chinécabe «Guendaquéiquiiñeʼ» que. Laacabe bibánicabe lugar que, ti guidxi ra nabé runi adorar binni bidóʼ ne riuunecaʼ tutiica binni, guiráʼ dxi bidxiilúcabe cani para cadi gúnicabe ni runi ca binni ni qué runi adorar Dios. Ngue runi zanda guiníʼcabe dxandíʼ puru si guendaquéiquiiñeʼ nuu lugar que. Guizáʼ guluu visión riʼ gana laacabe, purtiʼ bisihuinni ni dxandíʼ qué zudii Jiobá lugar gaca biidiʼ modo runi adorárcabe laa.

¹⁸ Laaca bisietenalaʼdxiʼ visión riʼ ca judíu laaca naquiiñeʼ gúʼyacaʼ cadi gaca biidiʼ modo runi adorarcaʼ Dios. Qué zanda diʼ chuʼ guendaquéiquiiñeʼ ndaaniʼ xquidxi Jiobá ne qué ziuu dxi chuʼ ni. Maʼ guluube laanu ndaaniʼ guidxi nayá stibe, ra runi sentirnu guendarannaxhii stibe ne modo rápabe laanu. Peru lu nanu nuu gacanenu para chuʼ ni nayá. ¿Ñee runi sentirnu caquiiñeʼ gúninu ni la? Qué zanda diʼ chuʼ nin ti clase de guendaquéiquiiñeʼ ndaaniʼ paraísu espiritual ni rudii Dios laanu.

19. ¿Pabiáʼ risaca ca visión ni biʼyaʼ Zacarías para laanu?

¹⁹ Rihuinni dxíchica caguixhená visión xhoopaʼ ne gadxe ni biʼyaʼ Zacarías que cani cadi naca honradu. Laaca rusietenalaʼdxiʼ cani laanu qué riuulaʼdxiʼ Jiobá guendaquéiquiiñeʼ. Laanu, ca xpínnibe, naquiiñeʼ gaca nanaláʼdxinu cosa malu. Né ca visión riʼ, cayabi Jiobá laanu pa gúninu stipa pur gusiéchenu laa qué zeeda diʼ maldición luguianu. Zápabe laanu ne zaguube ndaayaʼ laanu. Ne nuunu seguru zanda gacanebe laanu para ganda gudxíʼlunu intiica si ti chuʼnu nayá ndaaniʼ Guidxilayú malu riʼ. Peru ¿ximodo zanda chuʼnu seguru qué ziuu dxi guinitilú modo raca adorar Dios jneza yaʼ? Yanna ra maʼ nuunu gaxha de gran tribulación ¿xiñee nanna dxíchinu zapa Jiobá xquidxi? Lu sti tema ca zacábinu ca pregunta riʼ.