1, 2. Zacarías profetajj paqallqöri visión uñjañ tukuyjjäna ukhajja, ¿kunjamansa judionakajj Jerusalenan uñjasipjjäna?

 ZACARÍAS profetajj paqallqöri visión uñjañ tukuyjjäna ukhajj wal lupʼpachäna. Lunthatanakarojj castigasiniwa sasaw Jehová Diosajj uka visionan säna. Ukampis uka tiempotakejja, taqe kunas nayrjamakiskänwa. Lunthatanakajj utjaskakïnwa, jan wal luriri jaqenakas utjaskakïnwa. Judionakasti, Jehová Diosan templop lurañ janiw tukuyapkänti. ¿Kunatsa uka templo lurañjja akatjamat jaytanukupjjpachäna? ¿Jukʼamp sum jakasiñatakikit Jerusalenar kuttʼapjjpachäna?

² Judionakajj taqe chuymaw Diosar confiyapjjäna, Zacariasajj uk sum yatïna. Biblianjja, ‘Diosan chʼamañchtʼataw’ utanakapa, negocionakapa Babiloniar jaytanukusajj Jerusalenar kuttʼapjjäna sasaw qhanañchi (Esd. 1:2, 3, 5). Jupanakajja, jan uñtʼapkäna uka markar sarjjañatakejj sum uñtʼapkäna uka markwa jaytapjjäna.  Niyakejjay Diosan templop utachañajj jupanakatak wali wakiskirïchïnjja, Jerusalenar puriñatakejj jan sarnaqañjam thaknama, qollu qollunaknamaw 1.600 kilometronak sarapjjatayna.

3, 4. ¿Kuna jan walinakansa Jerusalenar kuttʼapkäna uka judionakajj uñjasipjjäna?

³ Babiloniat Jerusalenar sarkasajja, judionakajj walja horanakaw ‘Jerusalenajj kunjamäpachasa’ sasin lupʼipjjpachäna. Jilïrinakajja, uka markasa templosa nayrajj kunjamänsa uk jupanakar yatiyapjjänwa (Esd. 3:12). Jerusalenar jupanakamp chika viajisäna ukhajja, ¿uka marka uñjasajj kuns amuyasnäna? ¿Perqanakapajj qʼala allthapita, qoranakampi, chʼaphinakampi alintat uñjasajj llakisisänti? ¿Perqanakapas janirakis Babilonian utjki uka jachʼa perqanakar uñtasitäkitejjä, qʼala allthapita, punkunak lantejj jachʼa pʼiyanakani ukhamakirakisä sasati amuyasnäna? Judionakajj janiw aynachtʼapkänti, antisas kunjamsa Jehová Diosajj Jerusalenar sarapkäna ukhajj yanaptʼäna, jan walinakatsa jarkʼaqarakïna ukanakwa amtapjjäna. Jerusalenar purisajja, templojj utjkäna ukawjaruw mä altar lurapjjäna. Ukanwa Jehová Diosarojj sacrificionak sapüru loqtapjjäna (Esd. 3:1, 2). Wali kusisitäpjjapunïnwa, janipuniw kunampis aynachtʼapkaniti sañjamänwa.

⁴ Jupanakajj janiw templo mayak saytʼayapjjañapäkänti, jan ukasti utanaksa markanaksa saytʼayapjjañapänwa. Manqʼasiñatakis yapuchapjjañaparakïnwa (Esd. 2:70). Walja lurañanakaw utjäna. Ukampis Diosar servipjjañap jan munapkäna uka jaqenakajj janiw Jerusalén marka wasitat lurasiñap munapkänti. Qalltanjja, israelitanakajj trabajisipkakïnwa, ukampis uñisirinakapajj 15 maranakaw jarkʼasipkakïna, ukatwa jukʼat jukʼata lurañ jaytjjapjjäna (Esd. 4:1-4). 522 (antes de Cristo [a.C.]) maransti, Persia markan apnaqeriw Jerusalenan jan kunas jukʼamp lurasjjañapatak mä ley apsüna. Jerusalenajj janipuniw kunapachas tukuyaskaniti sañjamänwa (Esd. 4:21-24).

5. ¿Kunjamsa Diosajj markapar chʼamañchtʼäna?

⁵ Israelitanakajj yanaptʼatäña, chʼamachtʼatäñwa munapjjäna, Jehová Diosajj uk sum yatïna. Ukatwa Zacarías profetarojj qhep qhepa visión uñjayäna, ukhamatwa qhawqsa jupanakar munasïna, luratanakapatsa yuspäräna uk amuyapjjañapatak yanaptʼäna. Templo wasitat saytʼayañatak chʼamachasisipkakïta ukhajja, nayaw jarkʼaqasipkäma sasaw amtayarakïna. Jehová Diosajj uka toqet akham sänwa: “Ukasti lurasiniwa kunapachatï jumanakajj Tatitu Diosaman arupa istʼapjjäta, iyawsapjjarakïta ukapacha” sasa (Zac. 6:15).

6. 1) ¿Kunjamsa kimsaqallqöri visionajj qallti? (Página 26 ukankir dibujo uñjjattʼäta). 2) ¿Kunatsa caballonakajj jan mä pachpa colorakïpkäna?

⁶ Zacariasajj kimsaqallqöri visión uñjkäna ukaw Diosar jukʼamp confiyañatak yanaptʼistaspa (Zacarías 6:1-3 liytʼañataki). Profetajj kunsa uka visionan uñjpachäna uk amuytʼañäni: ‘Pusi guerra carronakwa pä bronce (cobre) qollunak taypit’ ratuk tʼijsunir uñjäna, uka carronakajj nuwasiñatak listokïkaspas ukhamänwa. Khitis uka carronak apaskäna uk yatiñatakejja, carronak qatatir caballonakajj janiw mä pachpa colorakïpkänti. Zacariasajj akham jisktʼäna: ‘Tata, ¿kun sañs muni akajja?’ sasa (Zac. 6:4). Niyakejjay uka visionajj jichha tiemponakan phoqasiskchejja, kun sañs muni uk jiwasajj yatiñ munaraktanwa.

7, 8. 1) ¿Kunamp sasisa pä qollunakajja? 2) ¿Kunatsa uka qollunakajj broncet luratäpjje?

⁷ Biblianjja, qollunakajj reinonaka jan ukajj gobiernonaka sañwa munaspa. Zacariasajj visionan uñjkäna uka pä qollunakajja, Daniel chachajj profeciapan pä qollunakat parlkäna niya uka kikparakiwa. Mä qollojja, Jehová Diosajj Taqe Kunjjaru Munañanïtapa, wiñayatakïtapa sañ muni. Maynïristi, Mesiasana jan  ukajj Jesusan apnaqat Reinompi sasirakiwa (Dan. 2:35, 45). Jesusajj 1914 maran Reyit alajjpachan uttʼayatäjjäna ukhatpachaw uka pä qollunakajj utji, Diosan munañap aka oraqen phoqasiñapatakis yanaptʼaskaraki.

⁸ ¿Kunatsa uka qollunakajj broncet luratäpjjpacha? Broncejja, qori metaljamarakiw wali munata, kʼajkiriraki. Jehová Diosajj kunanakatï tabernaculonsa templonsa utjkäna ukanakajj broncetwa lurasiñapa sänwa (Éxo. 27:1-3; 1 Rey. 7:13-16). Ukhamajj bronce qollunakajja, Jehová Diosan Taqe Kunjjar Munañanïtapasa, Mesiasana apnaqat Reinosa jan kikpanïtapwa uñachtʼayi, ukaw jaqenakajj jutïrin jan ajjsaras jakasipjjañapatakisa, walja bendicionanak katoqapjjañapatakis yanaptʼani.

9. 1) ¿Khitinakäpjjes carronak apnaqerinakajja? 2) ¿Kuna amtampis jupanakar khitasi?

⁹ ¿Guerrasiñataki carronakasa, uka carronak apnaqerinakasa kunamp sasipjjesa? Uka carro apnaqerinakajj angelanakäpjjewa. Jupanakajj grup grupo jalanoqatäpjjpachänwa (Zacarías 6:5-8 liytʼañataki). “Taqe akapachan Tatitupan nayraqatapat[wa]” mä amtampi mistunipjjäna. Jupanakarojj walja cheqanakaruw Diosan markapar jarkʼaqapjjañapatak khitasïna, jukʼampis ‘amstankir markatwa’, mä arunjja Babiloniatwa jarkʼaqapjjañapäna. Jehová Diosajja, jan mayampis Babiloniampi katuntatäñapatakiw markapar yanaptʼani. Uk yatiñajja, Zacariasajj jakkäna uka tiempon templo saytʼayirinakarojj wal chuymachtʼpachäna. Enemigonakasajj janiw jarkʼapkistaniti sasaw confiyapjjpachäna.

10. ¿Kunatakis Zacariasan profeciapajj yanaptʼistu?

¹⁰ Nayrajj kunjamatï servirinakapar jarkʼaqkänjja, ukhamarakiw Diosajj jichhürunakan angelanakapampi markapar jarkʼaqaski, chʼamañchaskaraki (Mal. 3:6; Heb. 1:7, 14). Diosan Israelapajj 1919 maratwa Jachʼa Babiloniampi jan katuntatäjjeti. Ukhat aksarojj uñisirinakapan jan waltʼayañataki arknaqatpachasa, Diosan markapajj jiltaskakiwa (Apo. 18:4). Angelanakaw jarkʼaqasipki, ukhamajja ‘Jachʼa Babiloniajj mayampiw Diosan markapar katuntani’ sasin janiw ajjsarañasäkiti (Sal. 34:7). Antisas taqe chuymaw Diosar kusisita serviskakiñasa. Zacariasan profeciapajja, Diosar jan ajjsaras serviskakiñatakiw yanaptʼistu, visionan uñjkäna uka pä qollunakampi jarkʼaqatätas amuyañatakis yanaptʼarakistuwa.

11. Mayachtʼat politiconakajj Diosan markap contra saytʼapkani ukarojj ¿kunatsa jan ajjsarañasäki?

¹¹ Supayan apnaqat akapachankir politiconakajj niyaw Diosan markapar tukjañatakejj mayachtʼasipjjani (Eze. 38:2, 10-12; Dan. 11:40, 44, 45; Apo. 19:19). Ezequiel chachan profeciaparjamajja, uka politiconakajj mä chʼiyar qenayäkaspas ukhamaw oraqer chhaqtayapjjani. Jupanakajj caballería soldadonakampiw Diosan markapar nuwantapjjani sasaw qhanañcharaki (Eze. 38:15, 16). * ¿Ukanak yatisajj ajjsarayasiñasati? Janiwa. Diosan angelanakapaw yanaptʼistani. Wali tʼaqesiñ tiempojj qalltkani ukhajja, jupanakaw jarkʼaqapjjestani, Jehová Diosajj Taqe Kunjjar Munañanïki uka contra saytʼirinakarus tukjapjjarakiniwa (2 Tes. 1:7, 8). ¡Uka urojj wali kusiskañäniwa! ¿Khitis Diosan angelanakaparojj pʼeqtʼpachäni?

12, 13. 1) ¿Kun lurañapsa Jehová Diosajj Zacariasar mayïna? 2) “Machaq Külli” sasin uñtʼatäki uka chachajja, Jesucristowa sasin ¿kunatsa sistanjja?

¹² Zacarías libron kimsaqallqo visionanakat qellqatäki ukanakjja, Zacarías profetakiw uñjäna. Ukatsti kunatï templo luririnakar chʼamañchtʼkaspa ukwa lurarakïna (Zacarías 6:9-12 liytʼañataki). Jehová Diosajja, Babiloniat kuttʼanipki uka Heldai, Tobías, Jedaías chachanakampi parlasin qori, qollqe mayim sasaw Zacariasar säna. Uka metalanakampejj mä coronwa profetajj lurañapäna (Zac. 6:11). ¿Uka coronajj khititakïpachänsa? Janiw David chachat jutiri Judá tribunkir Zorobabel sat gobernadoratakïkänti, jan ukasti, Josué sat jilïr sacerdotetakïnwa. Pʼeqepjjaruw uchäta sasaw Diosajj Zacariasar säna. Uk uñjasajja yaqhanakajj wal musparapjjpachäna.

¹³ Ukhamajja, ¿Josué sat jilïr sacerdotejj reyïñapänti? Janiwa. Jupajj janiw David reyit jutirïkänti. Josué chachan pʼeqepjjaru corona uchañajja, jutïr urunakan reyiñapäki sacerdoteñapäkaraki ukampejj kunatï paskani ukwa uñachtʼayaskäna. Juparojj “Machaq Külli”, mä arunjja mä ali saphipat chʼichtaniri (brote) sasinwa uñtʼasiraki. “Machaq Külli” sasin uñtʼatäki uka chachajj Jesucristowa sasaw Bibliajj qhanañchi (Isa. 11:1; Mat. 2:23). *

14. ¿Kunsa Jesusajj reyjama sacerdotjamajj luraski?

¹⁴ Jesucristow Reyisa Jilïr Sacerdotesa, jupaw Diosan angelanakaparojj pʼeqtʼaski. Diosan markapajj taqe jan walinakat jarkʼaqatäñapatakis yanaptʼaskaraki (Jer. 23:5, 6). Niyaw akapachankir markanakar atipjani, ukhamatwa Jehová Diosan Taqe Kunjjar Munañanïtap arjjatani, servirinakaparus arjjatarakini (Apo. 17:12-14; 19:11, 14, 15). Ukampis uka uru janïr purinkipanjja, ‘Machaq Küllejj’, mä arunjja Jesusajj walja lurañanakaniwa.

15, 16. 1) ¿Khitis cristiano congregacionarojj wasitat saytʼayi, kunjamsa uk lurawayi? 2) Cristojj Waranqa Maranak apnaqañ tukuyjjani uka qhepatjja ¿kunas aka oraqen pasani?

¹⁵ Jesusajj Reyjama, Jilïr Sacerdotjamajja, Jehová Diosan ‘templopwa wasitat saytʼayañapäna’ (Zacarías 6:13 liytʼañataki). Jesusajj 1919 maranwa uk luräna. Uka maranwa Diosan markaparojj Jachʼa Babilonia taypit apsüna, ukhamatwa cristiano congregacionarojj wasitat saytʼayäna. Uka maranwa “suma phoqeri amuyasir esclavo[rojj]” uttʼayarakïna, ukhamat jupanakajj Diosan templopan patiojj utjki ukana, mä arunjja aka oraqen Diosar servirinakaru yanaptʼapjjañapataki (Mat. 24:45). Jesusajja, Diosan markapa qʼomäñapatakisa, Diosar cheqaparjam adorasiñapatakis yanaptʼaskarakiwa (Mal. 3:1-3).

¹⁶ Jesusampi 144.000 reyinakampi sacerdotenakampejj Waranq Maranakaw jutïrin apnaqapjjani. Uka tiemponjja, jan juchanëjjapjjañapatakiw Diosat jan jitheqtirinakarojj yanaptʼapjjani. Uka qhepatjja, Diosan servirinakapakiw aka oraqen utj-jjani. Taqeniw Diosarojj cheqaparjam adorapjjarakini.

17. 1) ¿Kamsasas Jehová Diosajj judionakar chuymachtʼäna? 2) ¿Kunjamsa Diosan arunakapajj judionakar yanaptʼäna?

¹⁷ Zacariasajj uñjkäna uka visionajj ¿kunjamsa judionakar yanaptʼäna? Templo tukuyañatakejj nayaw yanaptʼapjjäma, jan walinakatsa jarkʼaqapjjarakïma sasaw Diosajj judionakar säna. Uka arunakajj walpun jupanakar chuymachtʼpachäna. Ukampis inas akham sas jisktʼasipjjchïna: ‘¿Kunjamaraki mä jukʼanikejj templo lurañ tukuyañänisti?’ sasa. Kuntï Zacariasajj qhepat siskäna uka yatiyäwinakaw jan ajjsarapjjañapatakisa jan pächasipjjañapatakis yanaptʼpachäna. Templo lurañjja Heldai,  Tobías, Jedaías jupanakajj walsa yanaptʼapkchïnjja, waljaniw ‘templo saytʼayañ yanaptʼapjjani’ sasaw Diosajj säna (Zacarías 6:15 liytʼañataki). Ukhamasti judionakajj Diosaw yanaptʼistani sasin taqe chuymaw confiyapjjäna. Persia marka apnaqerejj mä leysa templo jan lurapjjañapatak apskchïnjja, ukspachaw lurañ qalltapjjäna. Mä jukʼa tiempotjja, Jehová Diosajj jachʼa qollur uñtasit uka jan waltʼäw chhaqtayjjänwa. 515 (antes de Cristo [a.C.]) maranjja, templo lurañajj tukuyasjjänwa (Esd. 6:22; Zac. 4:6, 7). Kuntï Jehová Diosajj judionakar siskäna uka arunakajja, jichha tiemponwa phoqasiskaraki.

18. ¿Kunjamsa Zacarías 6:15 textojj jichhürunakan phoqasiski?

¹⁸ Jichhürunakanjja waranq waranqa jaqenakaw Diosar servisipki. Taqe chuymarakiw wali valorani utjirinakapampejj Diosar adorasiñapatak yanaptʼasipki, mä arunjja tiempopampi, qollqempi, chʼamapampi, yaqha ukhamanakampiw yanaptʼapjje (Pro. 3:9). Ukham yanaptʼapjjatap uñjasajja, Jehová Diosajj walpun kusispacha. Amtañäni, Heldai, Tobías, Jedaías jupanakajj qorimpi qollqempiw yanaptʼapjjäna, ukanakampiw Zacariasajj mä corona luräna. Uka coronajja, Diosar adorasiñapatakejj kuntï lurapkäna uk ‘amtañatakïnwa’ (Zac. 6:14). Jichhürunakanjja ukhamarakiw Jehová Diosajj kuntï jupar serviñatak lurktan ukanaksa Jupar munasktan uksa jan armaskaniti (Heb. 6:10).

19. Zacariasajj uñjkäna uka visionanakajja, ¿kunjamsa yanaptʼapjjestaspa?

¹⁹ Aka qhepa urunakanjja, Diosar cheqaparjam adorañatakejj walpun servirinakapajj chʼamachasiwayapjje. Ukham lurapjjatapatjja, Diosajj jupanakar bendisitapa, Cristojj jupanakar pʼeqtʼatapwa uñachtʼayi. Diosan markapajj suma uttʼayatawa, jan walinakatsa jarkʼaqatawa, wiñayatakirakiwa, jiwasajj uka markanktanwa. Jutïrinjja, Diosarojj cheqaparjamaw taqenis adorjjañäni. Ukhamajja, Diosan markapan kuna lurañanïktantï uk taqe chuyma phoqapjjañäni, Jehová Diosan ‘arupsa istʼarakiñäni’. Ukhamtï lurañänejja, Reyïki, Jilïr Sacerdotëkaraki jupasa, guerrasiñatak carronak apnaqapki uka angelanakasa jarkʼaqapjjestaniwa. Jehová Diosar cheqaparjama adorañatak taqe chuyma chʼamachasipjjañäni. Ukhamatwa, ejercitonakan Jehová Diosapajj aka qhepa urunakansa wiñayan wiñayapatakis jan walinakat jarkʼaqestani.