1, 2. Zakari ka yelifɛn wolonfilanan bannin kɔ, Yahutuw ka koow tun be cogo di Zeruzalɛmu?

KIRA ZAKARI ka yelifɛn wolonfilanan banna ani a be miirila o koo la kosɔbɛ. Jehova tun y’a fɔ ko a bena mɔgɔ juguw hakili. Siga t’a la, o kumaw ye Zakari jija kosɔbɛ. Nka, koow ma yɛlɛma fɔlɔ sabu mɔgɔ juguw bele tun be yen. Alabatoso lɔli baara min tun be kɛra Zeruzalɛmu, o fana tun ma ban fɔlɔ. Jehova tun ye baara min kalifa Yahutuw ma, mun na u y’o baara dabila joona joona ten? Yala u tun nana Zeruzalɛmu walisa k’u ka ɲɛnamaya kɛcogo lo fisaya wa?

² Zakari tun b’a lɔn ko Yahutu minw kɔsegira Zeruzalɛmu, olu tun ye cɛɛw ni muso limaniyaninw lo ye. “Masaba tun ye miiriya don” olu kɔnɔ walisa u ka taga k’u ka soow n’u ka baaradaw to yen Babilonɛ (Ɛsid. 1:2, 3, 5). U tun be jamana min lɔn, u bɔra yen ka taga jamana wɛrɛ la u fanba tun tɛ min lɔn. U ye kilomɛtɛrɛ 1600 ɲɔgɔn kɛ tagama na sira juguw kan, kuluyɔrɔw la. Ni Jehova batoso lɔli baara tun kɔrɔtanin tɛ u fɛ, u tun tɛna sɔn k’o kɛ.

3, 4. Yahutu minw kɔsegira Zeruzalɛmu, olu ye gwɛlɛya jumanw lo sɔrɔ?

 ³ Miiri k’a filɛ o tagama kɛra cogo min na! K’u to sira kan, n’a sɔrɔ u tora ka miiri u ka sigiyɔrɔ kura koo la lɛri caaman kɔnɔ. Cɛkɔrɔba minw tun be n’u ye, olu y’a fɔ u ye ko Zeruzalɛmu n’a ka Alabatosoba tun cɛ ka ɲi kosɔbɛ (Ɛsid. 3:12). Zeruzalɛmu lo tun bena kɛ u ka sigiyɔrɔ kura ye. N’i tun be n’u ye, i tun bena mun lo miiri tuma min na i ɲɛɛ lara Zeruzalɛmu kan siɲɛ fɔlɔ la? Yala i dusu tun bena tiɲɛ k’a ye ko boonw benbennin lo biinw cɛma wa? Zeruzalɛmu kogow tun benbenna fana, wobabaw lo tun be daaw ani kɔrɔsili sangasow nɔɔ na. Yala i tun bena Babilonɛ ka kogo barikamanw suma ni Zeruzalɛmu taw ye wa? O bɛɛ n’a ta, Yahutuw fari ma faga. Mun na do? Sabu Jehova tun y’u dɛmɛ ani k’u tanga u ka tagamajan na. U senin kɔ Zeruzalɛmu dɔrɔn, u ye sarakabɔlan lɔ Alabatosoba nɔɔ na ani u y’a daminɛ ka sarakaw bɔ Jehova ye loon o loon (Ɛsid. 3:1, 2). A daminɛ na, u tun kisɛyanin lo kosɔbɛ. A be komi foyi tun tɛ se k’u fari faga.

⁴ Ka fara Alabatoso lɔli baara kan, Israɛldenw tun ka ɲi k’u ka dugu lɔ kokura. U tun ka ɲi k’u ka soow lɔ, ka forow sɛnɛ ani k’u ka denbaya balo (Ɛsid. 2:70). A be komi u ka baara kɛta tun ka ca kojugu! A ma mɛɛn, u juguw y’a ɲini k’u bali k’o baaraw kɛ. O kɔrɔbɔli mɛɛnna saan 15 ɲɔgɔn ani dɔɔni dɔɔni, Yahutuw fari fagara (Ɛsid. 4:1-4). U ye kɔrɔbɔli wɛrɛ sɔrɔ saan 522 Krista Tile Ɲɛ (K.T.Ɲ.). O tuma na, Pɛrɛsi masacɛ ye cii di k’u ka Zeruzalɛmu lɔli baara bɛɛ dabila. A be komi, o dugu tun tɛna lɔ kokura tugun.—Ɛsid. 4:21-24.

5. Jehova y’a sagokɛlaw dɛmɛ cogo di?

⁵ Jehova tun b’a lɔn a sagokɛlaw tun mako be min na. O kama, a ye yelifɛn laban yira Zakari la walisa ka Yahutuw hakili sigi. A y’a yira o fɛ fana ko a b’u kanu ani ko u be jijali minw bɛɛ kɛra k’ale bato, o ka di a ye. A ye layidu ta u ye ko a bena u tanga n’u ye Alabatoso lɔli baara daminɛ kokura. Jehova y’a fɔ Alabatoso lɔli baara koo la ko: “O bena kɛ, n’aw sɔnna ka Masaba aw ka Ala ka fɔta kɛ sɔbɛ la.”—Zak. 6:15.

6. a) Zakari ka yelifɛn seeginan be daminɛ cogo di? (Jaa lajɛ, barokun daminɛ na.) b) Mun na soow kulɛriw be dan na?

⁶ A be komi Zakari ka yelifɛn seeginan be mɔgɔ ka limaniya sabati ka tɛmɛ a ka yelifɛn tɔɔw kan (Zakari 6:1-3 kalan). Miiri k’a filɛ: Kɛlɛkɛwotoro naani labɛnnin lo kɛlɛ kama ani “u be bɔra kulu fila cɛma. Kulu nunu tun ye zira ye.” Soo minw tun b’o kɛlɛkɛwotorow samana, olu kulɛriw tun be dan na. An be se ka sobolilaw faranfasi o sababu lo fɛ. Kira Zakari ye ɲiningali kɛ ko: “Nunu kɔrɔ ye mun ye, matigi?” (Zak. 6:4). An fana b’a fɛ k’o kɔrɔ lɔn sabu o yelifɛn ɲɛsinna an fana ma.

7, 8. a) Kulu fila nunu ye mun lo tagamasiɲɛ ye? b) Mun na o kulu fila kɛra ni ziranɛgɛ ye?

⁷ Bibulu kɔnɔ, kuluw ye masayaw wala gofɛrɛnɛmanw tagamasiɲɛ lo ye tuma dɔw la. Zakari ye kulu minw ye ani kulu fila minw kofɔra Daniyɛli ka kiraya kumaw kɔnɔ, u bɛɛ ye kelen ye. Kulu kelen ye Jehova ka Masabaya n’a ka Kuntigiya tagamasiɲɛ lo ye, o min ye banbali ye. Kulu filanan ye Masiya ka Masaya tagamasiɲɛ lo ye. Yezu lo b’o Masaya kun na (Dan. 2:35, 45). O kulu fila be baara kɛra ɲɔgɔn fɛ kabi tuma min na Yezu kɛra Masacɛ ye saan 1914 la. U be baara kɛrɛnkɛrɛnnin kɛra walisa Ala sago ka dafa dugukolo kan.

 ⁸ Mun na o kulu fila kɛra ni ziranɛgɛ ye? Ziranɛgɛ ye nɛgɛ sɔngɔ gwɛlɛ lo ye i ko sanu. Jehova tun ye cii di ko u ka ziranɛgɛ kɛ ka fanibugu yɔrɔ dɔw dilan. Kɔfɛ, a y’a fɔ fana k’u ka Alabatosoba yɔrɔ dɔw lɔ ni ziranɛgɛ ye Zeruzalɛmu (Ɛkiz. 27:1-3; 1 Mas. 7:13-16). Komi o kulu fila ye ziranɛgɛ ye, o b’a yira ka gwɛ ko Jehova ka Masabaya ni Yezu ka Masaya ɲɔgɔn tɛ yen. O Masaya fila bena hɛɛrɛ sigi dugukolo kan ani u bena duga lase adamadenw bɛɛ ma.

9. Kɛlɛkɛwotorow bolibagaw ye jɔn lo tagamasiɲɛ ye ani baara juman lo kalifara u ma?

⁹ Kɛlɛkɛwotorow n’u bolibagaw ye mun lo tagamasiɲɛ ye? Mɛlɛkɛw tagamasiɲɛ lo. N’a sɔrɔ mɛlɛkɛw jɛnkulu caaman lo (Zakari 6:5-8 kalan). U bɔra “dugukolo bɛɛ Masa ɲakɔrɔ” walisa ka taga baara kɛrɛnkɛrɛnnin dɔ kɛ, Jehova y’o min kalifa u ma. O ye baara juman lo ye? O mɛlɛkɛw ka ɲi ka taga Ala sagokɛlaw tanga yɔrɔ dɔw la, sanko Babilonɛ dugu la, “kɔgɔdugu ɲafan fɛ.” Jehova bena koo bɛɛ kɛ walisa a sagokɛlaw kana taga jɔnya la tugun Babilonɛ. Zakari ka wagati la, o koo ye Alabatoso lɔbagaw jija yɛrɛ le! U tun man ɲi ka siran sabu u juguw tun tɛna se k’u bali u k’u ka baara kɛ.

10. Zakari ye kiraya kuma min fɔ kɛlɛkɛwotorow n’u bolibagaw koo la, o b’an dɛmɛ cogo di bi?

¹⁰ Bi fana, Jehova bele be tɛmɛ mɛlɛkɛw fɛ k’a sagokɛlaw tanga ani k’u jija i ko a y’a kɛ cogo min na Zakari ka wagati la (Mal. 3:6; Eburuw 1:7, 14). Saan 1919, Jehova y’a sagokɛlaw hɔɔrɔnya ka bɔ jɔnya la Alako ta fan fɛ, Babilonɛba la. Kabi o wagati la, u juguw be koo bɛɛ kɛra walisa ka tiɲɛn batoli bali a ka yiriwa (Yir. 18:4). Nka, u ma se k’o kɛ. Komi mɛlɛkɛw b’an dɛmɛna, an man ɲi ka siran ko Jehova ka jɛnkulu bena kɛ ngalon diinan ka jɔɔn ye tugun (Zab. 34:8). Nka, an ka la a la ko Jehova sagokɛlaw bena to ka yiriwa Alako ta fan fɛ duniɲa kuru bɛɛ kɔnɔ. An ka to ka miiri kira Zakari ka yelifɛn koo la. O la, an bena la a la ko foyi tɛna an sɔrɔ o kulu fila suma kɔrɔ, o minw ye Jehova ka Masabaya ni Yezu ka Masaya ye.

11. Mun na Jehova sagokɛlaw man ɲi ka siran ni politiki jɛnkuluw wulila u kama?

¹¹ Sanni dɔɔni, Sutana ka politiki jɛnkuluw bena jɛn walisa ka wuli Ala sagokɛlaw kama (Ezek. 38:2, 10-12; Dan. 11:40, 44, 45; Yir. 19:19). Kira Ezekiyɛli y’a fɔ k’o jɛnkuluw ye dugukolo datugu i n’a fɔ sankaba. U yɛlɛla soow kan ani u dimininba be nana Ala sagokɛlaw kama (Ezek. 38:15, 16). * Yala an ka ɲi ka siran u ɲɛ wa? An man ɲi ka siran abada sabu Jehova ka kɛlɛbolo be n’an ye! Tɔɔrɔba wagati la, Kɛlɛbolow Matigi Jehova ka mɛlɛkɛw bena a sagokɛlaw tanga. Mɔgɔ minw tɛ kolo a ka Masabaya ye, a bena olu halaki (2 Tes. 1:7, 8). O bena kɛ loonba ye dɛ! Nka, jɔn lo bena Jehova ka kɛlɛbolo ɲɛminɛ?

12, 13. a) A fɔra Zakari ye ko a ka mun lo kɛ sisan? b) An b’a lɔn cogo di ko n’u ko Yiribolo, u kaan be Yezu lo ma?

¹² Kira Zakari dɔrɔn lo ye yelifɛn seegi  nunu bɛɛ ye. O kɔ, a ye koo dɔ kɛ Alabatoso lɔbagaw tun bena min ye. O koo tun bena u jija kosɔbɛ (Zakari 6:9-12 kalan). Ala y’a fɔ Zakari ye ko a ka warigwɛ ni sanu minɛ bolomafara ye Ɛlidayi, Tobiya ani Yedaya fɛ “k’o kɛ masafugulan ye.” O cɛɛ saba tun bɔra Babilonɛ ka na Zeruzalɛmu (Zak. 6:11). Komi gofɛrɛnɛrɛ Zorobabɛli tun ye Zuda bɔnsɔn dɔ ye ka bɔ Dawuda buruju la, yala o masafugulan tun ye ale ta lo ye wa? Ayi! Jehova y’a fɔ kira Zakari ye ko a k’o masafugulan biri Sarakalasebagaw Kuntigiba Zozuwe kuun na. N’a sɔrɔ o ye mɔgɔw kabakoya yɛrɛ le!

¹³ Komi u ye masafugulan biri Zozuwe kuun na, yala a kɛra masacɛ ye wa? Ayi, sabu Zozuwe tun tɛ Dawuda bɔnsɔn dɔ ye. O kama, a tun tɛ se ka kɛ masacɛ ye. Masafugulan min birila a kuun na, o tun ye tagamasiɲɛ lo ye. O tun ɲɛsinna mɔgɔ dɔ lo ma min tun bena kɛ masacɛ ani sarakalasebaga ye. O tigi be weele ko Yiribolo ani a ka masaya tɛna ban abada. Bibulu b’a yira ka gwɛ k’o tigi ye Yezu Krista lo ye.—Ezayi 11:1; Mat. 2:23. *

14. Masacɛ ani Sarakalasebagaw Kuntigiba Yezu be baara juman lo kɛra?

¹⁴ Yezu ye Masacɛ ni Sarakalasebagaw Kuntigiba ye. Ale lo be Jehova ka kɛlɛbolo ɲɛminɛna sankolo la ani a jijanin lo walisa Ala sagokɛlaw ka to lafiya la duniɲa juguman nin kɔnɔ (Zer. 23:5, 6). Sanni dɔɔni, Yezu bena wuli siyaw kama ani ka see sɔrɔ u kan. O cogo la, a bena dɛmɛ don Ala ka Masabaya koo la ani ka Ala sagokɛlaw lafasa (Yir. 17:12-14; 19:11, 14, 15). Sanni o cɛ, Yezu, ale min be weele ko Yiribolo, ale ka ɲi ka baaraba dɔ dafa fɔlɔ.

15, 16. a) Cogo juman na kerecɛn kafo sigira kokura ani Ala sagokɛlaw saniyara cogo di? Jɔn lo y’o kɛ? b) Krista ka saan waa kelen mara bannin kɔ, dugukolo bena kɛ cogo di?

¹⁵ Yezu tɛ Masacɛ ni Sarakalasebagaw Kuntigiba dɔrɔn ye. Ala ye cii di a ma fana ko a ka ale ka batoso lɔ (Zakari 6:13 kalan). Saan 1919, Yezu ye Ala sagokɛlaw hɔɔrɔnya ka bɔ Babilonɛba la, o min ye ngalon diinanw jɛnkulu ye. A ye kerecɛn kafo sigi kokura ani ka “Jɔnkɛ dannamɔgɔ hakiliman” fana sigi walisa a ka waajuli baara ɲɛminɛ Alabatosoba lukɛnɛ kɔnɔ, o kɔrɔ, dugukolo kan (Mat. 24:45, ABM). Yezu ye Ala sagokɛlaw saniya Alako ta fan fɛ ani k’u dɛmɛ u ka se ka Ala bato cogo saniyanin na.—Mal. 3:1-3.

¹⁶ Saan wa kelen mara tuma na, Yezu ni mɔgɔ 144000 bena masaya kɛ. O mɔgɔw fana ye sarakalasebagaw ye. Olu ni Yezu bena adamaden kantigiw dɛmɛ u ka kɛ mɔgɔ dafaninw ye. N’o kɛra, Ala sagokɛlaw dɔrɔn lo bena to dugukolo saniyanin kan. A laban, tiɲɛn batoli bena sigi bɛrɛbɛrɛ sen kan kokura.

17. Jehova y’a daa di Yahutuw ma koo jumanw lo la? O kumaw ye nɔɔ juman lo to u kan?

¹⁷ Kira Zakari ka kumaw ye nɔɔ juman lo to Yahutuw kan a ka wagati la? Jehova tun y’a daa di ko a bena u dɛmɛ ani k’u tanga walisa u ka se ka Alabatoso lɔ k’a ban. U fari tun faganin lo minkɛ, n’a sɔrɔ o kumaw ye jigiya di u ma. Nka, n’a sɔrɔ u tun b’u yɛrɛ ɲiningara ko mɔgɔ damanin dɔrɔn be se k’o baaraba kɛ cogo di? Jehova y’a fɔ u ye ko mɔgɔ caaman bena na fara Ɛlidayi, Tobiya ani Yedaya kan ka “baara kɛ Masaba batoso lɔko la.”  O kumaw y’u jaa gwɛlɛya ani k’a to u ma sigasiga tugun (Zakari 6:15 kalan). Yahutuw tun lanin b’a la ko Jehova bena u dɛmɛ. O kama, u sinna ka Alabatoso lɔli daminɛ kokura hali k’a sɔrɔ Pɛrɛsi masacɛ tun ye bali sigi o baara kan. O bali tun be i n’a fɔ kuluba u ka sira kan. Nka dɔɔni o baara daminɛni kɔ, Jehova y’o bali bɔ yen ani Alabatosoba lɔli baara banna saan 515 K.T.Ɲ. (Ɛsid. 6:22; Zak. 4:6, 7, ABM). Jehova ka kumaw tun b’a yira fana kooba minw tun bena kɛ an ka wagati la.

18. Zakari 6:15 be dafara cogo di an ka wagati la?

¹⁸ Bi, mɔgɔ miliyɔn caaman be Jehova batora. U dusu ka di k’u ka fɛɛn nafamanw di a ma: u ka wagati, u fanga ani u bololafɛnw. U b’o kɛ ka dɛmɛ don Jehova ka baara la (Talenw 3:9). N’an be dɛmɛ don o baara la ni kantigiya ye, an be se k’a lɔn cogo di k’o ka di Jehova ye? An k’a to an hakili la ko Ɛlidayi, Tobiya ani Yedaya nana ni warigwɛ ni sanu minw ye, kira Zakari y’o lo ta ka masafugulan dilan. U tun ye nili min kɛ walisa ka dɛmɛ don tiɲɛn batoli koo la, o masafugulan kɛra ka “mɔgɔw hakili jigi” o la (Zak. 6:14). O cogo kelen na, an be kanuya min yira ani an be baara min kɛ Jehova ye, a tɛna ɲinɛ o kɔ abada!—Eburuw 6:10.

19. Zakari ka yelifɛn ka ɲi ka nɔɔ juman lo to an kan?

¹⁹ Laban loon nunu na, Jehova sagokɛlaw be baaraba kɛra a ye. An be sera k’o kɛ sabu Jehova b’an dugara ani Krista fana b’an ɲɛminɛna. An dusu ka di ka kɛ Jehova ka ɔriganisasiyɔn kɔnɔ min bena to fɔɔ abada. O jɛnkulu sabatinin lo ani a ka mɔgɔw lafiyanin lo. An b’a lɔn ko Jehova sagonata bena dafa batoli saniyanin koo la. O kosɔn, i be ni lɔyɔrɔ min ye Jehova ka ɔriganisasiyɔn kɔnɔ, sɔn o ma ani to ka ‘Masaba i ka Ala ka fɔta kɛ sɔbɛ la.’ N’i y’o kɛ, an ka Masacɛ, o min ye Sarakalasebagaw Kuntigiba ye, ale ni mɛlɛkɛw bena i latanga. I seko bɛɛ kɛ walisa ka dɛmɛ don tiɲɛn batoli koo la. O la, Jehova bena i latanga duniɲa juguman nin laban loonw na ani fɔɔ abada!