1, 2. A Zakari sẽn yã bõn-makr a yopoe-n-soabã poore, yɛlã ra yaa wãn Zerizalɛm?

D TÕE n yeelame t’a Zakari sẽn yã bõn-makr a yopoe-n-soabã poore, bũmb wʋsg n da be a yamẽ, t’a tõe n bʋgse. A Zeova sẽn pʋlem t’a na n sɩbga sẽn pa maand-b pʋ-peelmã tog n kenga a raoodo. La yɛlã ra ket n yaa wa pĩndã bala. Nebã ra ket n maanda pʋ-lik la b tʋmd tʋʋm-wẽns a taaba. A Zeova roogã meeb me ra nan pa sa ye. Bõe yĩng tɩ Israyɛll nebã wẽneg n bas tʋʋmd ning a Zeova sẽn kõ-bã? Rẽ yĩnga, b sẽn lebg n wa b tẽngẽ wã, yaa sẽn na n maan b mensã raab bɩ?

² A Zakari ra miime tɩ zʋɩf-rãmb nins sẽn lebg n wa Zerizalɛmmã yaa pagb la rap sẽn tar tẽebo. A ra miime tɩ yaa neb a Zeova meng “sẽn sɩɩs b sũy,” tɩ b sak n na n bas b zags la b nug-tʋʋm b sẽn da tar Babilonde. (Ɛsd. 1:2, 3, 5) B sak n yii Babilond sẽn yaa tẽng b sẽn minimã, n na n wa zĩnd zĩig b wʋsg sẽn pa mi. Sã n da mik t’a Zeova roogã meeb yell da pa pak-ba, b ra pa na n sak n tog sor kilo 1600 ye. Rẽ me, b ra segd n pasga zĩis sẽn yaa tãms la kuga.

3, 4. Zʋɩf-rãmbã sẽn ta wã, bõe n da tõe n koms b raoodo, la zu-loe-bʋs me la b paam-yã?

 ³ Mams-y y yamẽ n ges so-toakã sẽn yɩ to-to. Sorã sẽn da wogmã, b paama sẽk n bʋgs b vɩɩmã sẽn na n yɩ to-to Zerizalɛm. Sẽn kʋʋl-bã togs-b-la tẽngã la wẽnd-doogã sẽn da yaa neer to-to pĩndã. (Ɛsd. 3:12) Yãmb sã n da beẽ be, n ta n yã Zerizalɛm, y manesem da na n yɩɩ wãna? Y sũur da kõn sãame, y sẽn ne ro-wõrsã la lal-wedsã moodã sẽn limi, la tẽngã lalg sẽn po võ-bɛdã, zĩis nins kʋɩlensã ne gũudbã zĩis sẽn da be wã? Tõe tɩ y na n tagsa Babilond tẽngã lalg sẽn yaa lals a yiib b sẽn me n yɛgl taabã, n mak rẽ ne Zerizalɛm lalgã sẽn lebg weds-wedsã. La woto fãa pa koms zʋɩf-rãmbã raood ye. Bõe yĩnga? Bala, so-toakã sasa, b yã a Zeova sẽn sõng-b la a kogl-ba. B sẽn ta wã bala, b reng n mee tẽn-kugr zĩig ning wẽnd-doogã sẽn da be wã, n sɩng maand kʋʋb n kõt a Zeova daar fãa. (Ɛsd. 3:1, 2) B sẽn sɩng ne yẽesem woto wã, wõnda bũmb ra pa tõe n koms b raood ye.

⁴ Wẽnd-doogã meeb sẽn yãk a toogo, zʋɩf-rãmbã ra tog n lebs n mee b tẽngã, la b me b mensã roto. Ra yaa tɩlɛ me tɩ b ko, n paam n ges b zagsã rãmb yelle. (Ɛsd. 2:70) Wõnda tʋʋmã looga b nugu. Wakat kãng me la b bɛɛbã yik n na n maan b sẽn tõe, n gɩdg tʋʋmã. Yʋʋm 15 la b bɛɛbã sẽn nams-bã. Bilf-bilfã, nin-buiidã yẽesmã la b raoodã fãa wa n boogame. (Ɛsd. 4:1-4) Yʋʋmd 522 sẽn deng a Zeezi rogmã, Pɛrs rĩmã tolg n yiisa noor n yeel tɩ b bas meebã tʋʋm fãa. Ra wõnda Zerizalɛm meebã na n paa bɛk woto.—Ɛsd. 4:21-24.

5. Nin-buiidã sẽn bas a Zeova tʋʋmdã, bõe la a maan-yã?

⁵ A Zeova ra mii bũmb ning sẽn na n sõng a nin-buiidã. A kɩtame t’a Zakari yã a yaoolem bõn-makr sẽn na n sõng tɩ b bas b yam t’a Zeova nong-b lame, t’a nanda modgr ning fãa b sẽn zoe n maanã, la tɩ b sã n lebg n sɩng yẽ tʋʋmdã, a na n kogl-b lame. A wilgame tɩ b na n tõog n mee wẽnd-doogã. A yeel-b lame yaa: “Yãmb sã n sak Sẽn-Ka-Saab sẽn yaa yãmb Wẽnnaamã koɛɛg neere, bõn-kãng na n paama pidsgu.”—Zaka. 6:15.

6. a) Bõn-makr a nii-n-soabã sɩngrẽ, a Zakari yãa bõe? (Ges-y sõsgã sɩngrẽ fotã.) b) Bõe yĩng tɩ wed-moosã kõbg yaa toor-toore?

⁶ Bõn-makr a nii-n-soabã a Zakari sẽn yã wã n yɩ yaoolem soaba. La wõnda yaa bõn-makr kãng n kengd tẽeb n yɩɩd a taabã. (Karm-y Zakari 6:1-3.) A Zakari yãa wed-moos saar-dãmb a naas sẽn yit ‘tãms a yiib’ sʋk n watẽ. Tãmsã rag n yaa zũudu. Wed-moosã kõbg me ra yaa toor-toore, tɩ b tõe n bãng-b n bake. A Zakari sokame yaa: “Bãmb yaa bõe?” (Zaka. 6:4) Tõnd me rat n bãnga bõn-makrã võore, bala d miime tɩ tara yõod ne-do.

7, 8. a) Tãms a yiibã makda bõe? b) Bõe yĩng tɩ tãmsã yaa zũudu?

⁷ Biiblã pʋgẽ, b mi n gomda tãms yelle, tɩ yaa sẽn makd rĩung bɩ goosneema-rãmba. Tãmsã a Zakari sẽn yã wã ne tãms a yiibã b sẽn bilg Dãniyɛll sebrã pʋgẽ wã fãa yaa a ye. Tãng a ye n makd a Zeova naam sẽn ka to wã, tɩ tãng a to wã makd rĩung ning a Zeova sẽn lugl n kõ a Zeezi sẽn yaa Mesi wã. (Dãn. 2:35, 45) Yʋʋmd 1914 tɛk a Zeezi sẽn deeg a naamã, tãms a yiibã sẽn makd Wẽnnaam naamã ne Mesi wã Rĩungã tʋmda Wẽnnaam daabã na tõog n maan tẽngã zugu.

⁸ Bõe yĩng tɩ tãmsã yaa zũudu? Zũud  pɩndame, leb n yaa bũmb nebã sẽn nand wʋsgo. Sɩd me, Israyɛll nebã sẽn wa n na n maan sɛk-roogã, a Zeova kɩtame tɩ b maan a teed wʋsg ne zũudu. B sẽn wa n na n me Zerizalɛm wẽnd-doogã me, yɩɩ woto. (Yik. 27:1-3; 1 Rĩm. 7:13-16) Dẽnd tãms a yiibã fãa sẽn yaa zũudã wilgdame t’a Zeova naamã ne Rĩungã a Zeezi sẽn so wã sõmblem ka to ye. Ne a Zeova naamã la a Biigã Rĩungã maasem, ãdem-biisã na n paama bãan hakɩɩka, la bark ka tɛka.

9. Wed-moos saar-dãmbã ne b wed-rʋʋdbã makda bõe, la b tʋʋmd yaa bõe?

⁹ La wed-moos saar-dãmbã ne b wed-rʋʋdbã makda bõe? Makda malɛgse. Tõe tɩ yaa malɛgs sul toɛy-toɛya. (Karm-y Zakari 6:5-8.) B yii “dũni gill fãa soaalã taoore,” n na n tɩ tʋm tʋʋmd a sẽn kõ-ba. Wẽnnaam tʋm-b lame tɩ b na n kẽng zĩis takɩ n tɩ kogl yẽ nin-buiidã. Sẽn yɩɩd fãa, b tog n gesame tɩ Babilond sẽn be “nug-rɩtg tẽmsã sẽnẽ” wã ra wa maan Wẽnnaam nin-buiidã bũmb ye. Bõn-makrã yaa sẽn na n sõng Wẽnnaam nin-buiidã tɩ b bãng tɩ b pa na n le yɩ Babilond yembs a bada! Hakɩɩka, woto kenga sẽn da met-b wẽnd-doogã raoodo! B mii vẽeneg masã tɩ bɛɛbã pa na n tõog n sãam tʋʋmdã ye.

10. A Zakari bãngr-gomd ning pʋgẽ b sẽn gomd wed-moos saar-dãmb yellã wilgda tõnd bõe?

¹⁰ Hal ne rũndã, a Zeova ket n tũnugda ne a malɛgsã n kogend a nebã, la a kengd b raoodo. (Mal. 3:6; Ebre. 1:7, 14) Yʋʋmd 1919 wã la kiris-neb hakɩɩkã paam b mens ne Babilon-kãsengã yembdã. La rẽ tɛka, b bɛɛbã maana b sẽn tõe fãa n na n kɩt tɩ tũudum hakɩɩkã ra paam pãnga, la b pa tõog ye. (Vẽn. 18:4) Malɛgsã sẽn kogend a Zeova nin-buiidã yĩnga, d pa tar bʋʋm n na n maan dabeem, n yɛɛsd d na n le wa yɩ Babilon-kãsengã yembs ye. (Yɩɩn. 34:8) D pʋd n kɩsa sɩd t’a Zeova nin-buiidã sẽn be dũniyã gill zugã na n ket n fɩɩgdame, tɩ b tẽebã me pãng paasdẽ. Bõn-makrã a Zakari sẽn yã wã wilgdame tɩ d bee tãms a yiibã maasmẽ, tɩ baa fʋɩ pa tõe n maan-d ye.

11. Baa b sẽn na n wa zab ne Wẽnnaam nin-buiidã, bõe yĩng tɩ d pa segd n maan rabeem?

¹¹ Ka la bilfu, dũni-kãngã sẽn yaa a Sʋɩtãan n so wã goosneema-rãmbã na n naaga taab n dat n sãam Wẽnnaam nin-buiidã. (Eze. 38:2, 10-12; Dãn. 11:40, 44, 45; Vẽn. 19:19) A Ezekɩyɛll sebrã pʋgẽ, b mak-b-la ne sawat sẽn lud tẽngã gilli, la b yet tɩ b zaoo wiidi, n wat ne sũ-yikr n na n zab ne Wẽnnaam nebã. (Eze. 38:15, 16) * Wakat kãngã, d segd n maana rabeem bɩ? A bada! A Zeova malɛgsã na n zab n kõo tõndo. To-kãsengã sasa, malɛgsã na n kogla a Zeova nin-buiidã, la b sãam neb nins fãa sẽn pa sakd a naamã. (2 Tes. 1:7, 8) Ad sɩd na n yɩɩ ra-kãsenga! La ãnd n na n lʋɩ malɛgsã taoor tɩ b zabe?

12, 13. a) Bõe la a Zeova yeel a Zakari t’a maan masã? b) Bõe n kɩt tɩ d miẽ tɩ yaa a Zeezi Kirist la b sẽn boond t’a Bõn-bullã?

¹² Bõn-makr a nii wã fãa yaa a Zakari bal n yã. La masã wã, a na n maana  bũmb neb a taabã sẽn na n yã. Yaa bũmb sẽn na n keng neb nins sẽn met wẽnd-doogã raoodo. (Karm-y Zakari 6:9-12.) Wẽnnaam yeela a Zakari t’a tɩ reeg wanzuri ne sãnem a Hɛldayi ne a Tobiya la a Yedaya nengẽ, n maan maanfo. (Zaka. 6:11) Nin-kãensa nan yii Babilond n wa paalem. Rẽ yĩnga, maanfã yaa sẽn na n fõgen a Zorobabɛll sẽn yaa Zida neda, n yaa a Davɩɩd yagengã bɩ? Ayo! A Zeova yeelame t’a tɩ fõgen maan-kʋʋdb kãsem a Zozuwe. Tog n linga sẽn yã-b rẽ wã.

¹³ B sẽn fõgen maan-kʋʋdb kãsem a Zozuwe maanfã kɩtame t’a lebg rĩm bɩ? Ayo. A Zozuwe ra pa a Davɩɩd yageng ye. Dẽnd a ra pa tõe n yɩ rĩm ye. B sẽn fõgen-a maanfã yaa makr sẽn wilgd tɩ b na n wa yãka ned t’a yɩ rĩm la maan-kʋʋd wakat sẽn kõn sa. Maan-kʋʋdb kãsem ning b sẽn yãk t’a lebg rĩmã yʋʋr la a Bõn-bulli. Biiblã wilgda vẽeneg tɩ yaa a Zeezi Kirist la b sẽn boond t’a Bõn-bullã.—Eza. 11:1; Mat. 2:23. *

14. A Zeezi sẽn yaa rĩm la maan-kʋʋdb kãsmã, bõe la a maanda?

¹⁴ A Zeezi sẽn yaa rĩm la maan-kʋʋdb kãsmã, a lʋɩta a Zeova malɛgsã taoore, n tʋmd sẽn na yɩl tɩ Wẽnnaam nin-buiidã sẽn be dũniyã gill zugã zĩnd bãane, baa ne dũniyã sẽn pid ne nen-kɛglmã. (Zer. 23:5, 6) Ka la bilfu, a na n lʋɩ taoor n zab n deeg soolem toɛy-toɛyã fãa. A na n maana woto n fãag Wẽnnaam nin-buiidã la a wilg t’a teenda Wẽnnaam naamã. (Vẽn. 17:12-14; 19:11, 14, 15) La nananda, a tara tʋʋm-kãseng a sẽn segd n tʋme.

15, 16. a) Wãn to la Wẽnnaam nin-buiidã paam yɩlgre, la ãnd n sõng tɩ b paam yɩlgre? b) Yʋʋm tusrã poore, na n yɩɩ wãn tẽngã zugu?

¹⁵ A Zeezi yaa rĩm la maan-kʋʋdb kãsma, leb n yaa “yẽnda n na n me Sẽn-Ka-Saab roogã.” (Karm-y Zakari 6:13.) Yʋʋmd 1919 wã, a maana bũmb d sẽn tõe n mak ne roog meebo. A yiisa Wẽnnaam nin-buiidã Babilon-kãsengã yembd pʋgẽ, n lebs n lugl kiris-neb hakɩɩk tigingã. Sẽn paase, a yãka tʋm-tʋmd sẽn tũud sɩd la sẽn tar yamã t’a lʋɩt taoore, n get Wẽnnaam tʋʋmdã yelle. Yaa tʋʋmd b sẽn tʋmd wẽnd-doog ning sẽn pa ninsaalb nus n me wã samandã pʋgẽ, tẽngã zug ka. (Mat. 24:45) A Zeezi leb n tʋma wʋsg n sõng Wẽnnaam nin-buiidã tɩ b yɩlg b mens tũudmã wɛɛngẽ, sẽn na yɩl tɩ b sẽn tũud Wẽnnaam to-to wã ta a yam.—Mal. 3:1-3.

¹⁶ A Zeezi ne neb 144000 sẽn na n yɩ rĩm-dãmb la maan-kʋʋdbã na n dɩɩ naam yʋʋm tusri, n kɩt tɩ wẽn-sakdbã lebg neb sẽn zems zãnga. Rẽ poor tɩ lebga wẽn-sakdb hakɩɩk bal n be dũniyã gill zugu. Dẽnd wakat kãng tɩ lebga tũudum hakɩɩkã bal n be zĩig fãa.

17. Bõe la a Zeova yeel zʋɩf-rãmbã sẽn na yɩl tɩ b bas b yam, la wãn to la rẽ sõng-ba?

¹⁷ A Zakari sẽn taas zʋɩf-rãmbã koɛɛg ningã yõod yaa bõe ne tõnd rũndã-rũndã? A Zeova ra yeela zʋɩf-rãmbã tɩ b bas b yam t’a na n kogl-b lame la a sõng-b tɩ b me wẽnd-doogã n baase. Woto sɩd kenga b raoodo. La wãn to la neb a wãn bal na n tõog n tʋm tʋʋm-kãnga fãa? A Zakari yeel-b-la bũmb sẽn sõng-b tɩ b bas b rabeemã la b sãmbsã fãa. A wilgame t’a Hɛldayi ne a Tobiya la a Yedaya sõngrã sẽn yãk a toogo, a Zeova yeelame tɩ ‘neb nins sẽn be zĩ-zãrsẽ wã na n waame, n wa me yẽ roogã.’ (Karm-y Zakari 6:15.) Tao-tao bala, zʋɩf-rãmbã le sɩnga wẽnd- doogã meebo, baa ne Pɛrs rĩmã sẽn yiis noor n yeel tɩ b bas tʋʋmdã. Bala, b ra kɩsa sɩd t’a Zeova sõngd-b lame. Rĩmã sẽn gɩdg tʋʋmdã ra yaa yel-bedr sẽn yaa wa tãnga, la a Zeova sarem-a lame. B tõog n mee wẽnd-doogã n sa yʋʋmd 515 sẽn deng a Zeezi rogmã. (Ɛsd. 6:22; Zaka. 4:6, 7) La a Zeova sẽn yeel bũmb ning a Zakari wakatẽ wã pidsda tõnd wakatã me.

18. Wãn to la Zakari 6:15 goamã pidsd rũndã-rũndã?

¹⁸ Rũndã-rũndã, neb milyõ-rãmb n tũud a Zeova. B kẽesda b sẽkã, b pãngã la b paoong buud fãa ne yamleoogo, n teend tʋʋmd ning sẽn tʋmd a Zeova wẽnd-doog ning sẽn pa ninsaalb nus n me wã pʋgẽ wã. (Yel. 3:9) Bõe yĩng tɩ d tõe n kɩs sɩd t’a Zeova nanda bũmb nins fãa d sẽn maand n teend a tʋʋmdã? Tẽeg-y tɩ yaa a Hɛldayi ne a Tobiya la a Yedaya n kõ wanzuri wã ne sãnemã t’a Zakari maan maanfã. Maanfã yɩɩ bũmb sẽn da “tẽegd” kũun ning nin-kãensã sẽn kõ tũudum hakɩɩkã na kẽng taoor yĩngã. (Zaka. 6:14) A Zeova pa na n tol n yĩm tʋʋm nins tõnd me sẽn tʋme, la nonglem ning d sẽn wilg a yʋʋrã yĩngã ye.—Ebre. 6:10.

19. A Zakari sẽn yã bũmb ninsã segd n kɩtame tɩ d maan bõe?

¹⁹ Yaoolem wakatã, a Zeova nin-buiidã sẽn tõog n maan bũmb ninsã yaa kaset t’a sõngd-b lame, la t’a Zeezi me wilgd-b-la sore. D sũy yaa noog d sẽn paam n be a Zeova siglgã pʋgẽ, tɩ bũmb fãa sigl sõma, tɩ laafɩ la bãan beẽ wã. Yaa siglg sẽn na n pa wakat sẽn kõn sa. Bala, d miime tɩ yaa a Zeova tũudum hakɩɩkã n na n wa zĩnd zĩig fãa wa a sẽn da sɩng n datã. Woto wã, bɩ d ned kam fãa maan sũ-noog ne a sẽn paam n maand bũmb ning a Zeova siglgã pʋgẽ wã, la a sak a Zeova sẽn yaa d “Wẽnnaamã koɛɛg neere.” Rẽ, d na n paamame t’a Zeezi sẽn yaa d Rĩm la d maan-kʋʋdb kãsmã ne a malɛgsã kell n kogl-do. D maan d sẽn tõe fãa tũudum hakɩɩkã na kẽng taoor yĩnga, t’a Zeova na n kogl-d-la rũndã-rũndã, la wakat sẽn kõn sa!