1, 2. Nen anampot so komapiton pasingawey ed si Zacarias, antoy situasyon na saray Judio ed Jerusalem?

NEN anampot so komapiton pasingawey ed si propetan Zacarias, dakel so kaukolan ton pannonotan. Impaseguro nen Jehova ya dusaen to iray totoon aliwan matua lapud mauges ya kagagawa ra. Seguradon apabiskeg ed satan si Zacarias. Balet anggapo nin siansia so anguman. Wala ni ray totoon aliwan matua tan manggagawa na mauges tan agmet ni asumpal so templo nen Jehova ed Jerusalem. Akin a tinaynan ya tampol na saray Judio so kimey ya pagagawa na Dios? Kasin pinmawil ira ed bansa ra pian labat paaligwasen so bilay da?

² Amta nen Zacarias ya saray Judion pinmawil ed Jerusalem et mabiskeg so pananisia ra. Sikara may totoon “say puso [ra] et pinakiwas na tuan Dios” pian taynan so komportablen ayaman da tan saray negosyo ra. (Esd. 1:2, 3, 5) Tinaynan day dalin ya apasalan da la pian onalis ed pasen ya agnin balot anengneng na maslak ed sikara. No aliwan importante ed sikara so pangipaalagey na templo nen Jehova, agda komon labay so manbiahe na arawi ya manga 1,600 kilometro diad mapalandey tan mapeligron dalan.

3, 4. Anto ran subok so inarap na saray pinmawil ya Judio?

 ³ Kasin naimadyin moy impanbiahe ra? Legan iran manbiabiahe, seguradon dakel ya oras dan ninonot so nipaakar ed balon ayaman da. Nadngelan da la ya marakdakep so syudad na Jerusalem nensaman. Anengneng na saray mamasiken ed sikara so datin karakpan na templo. (Esd. 3:12) No kaiba da kan nambiahe, anto kasi aliknam nen unaan mon anengneng so Jerusalem, say balon ayaman mo? Kasin naermenan ka lapud anengneng mo ray aderal ya paalagey ya tinuboan na saray dika? Kasin ikomparam iray angkakabaleg ya doblin padir na Babilonia ed saray ageban padir na Jerusalem, ya angkakabaleg iray bungaw diad datin kawalaan na saray puerta tan tore ya panagbantayan? Balet, ag-adismaya iray totoo. Anengneng da la so pakayari nen Jehova ya mangiliktar legan na andukey ya biahe ra pasempet. Kasabi ra, say unonan ginawa ra et angipaalagey iray altar diad kawalaan na datin templo, tan ginapoan day mangiyapay na inagew-agew ya bagat ed si Jehova. (Esd. 3:1, 2) Diad gapo et malikeliket ira, ya singa anggapoy nayarin mandismaya ed sikara.

⁴ Likud ed pangipaalagey lamet na templo, kaukolan met ya apigeren na saray Israelita iray syudad da. Kaukolan da met so mangipaalagey na abung, mantanem ed uma, tan pakanen so pamilya ra. (Esd. 2:70) Dakdakel so kimey ya gawaen da. Insan biglan sinmabi so graben isusumpa tan nambayag itan na 15 taon. Anggano diad gapo et makpel ira, kalkalna ran adismaya. (Esd. 4:1-4) Tan say talagan amakapuy ed sikara et nen insebel na ari na Persia so pangipaalagey lamet ed Jerusalem nen 522 B.C.E. Singa aglan talaga naapiger so syudad.​—Esd. 4:21-24.

5. Antoy ginawa nen Jehova nen tinmundan mankimey iray totoo to?

⁵ Amta nen Jehova so kaukolan na totoo to. Impanengneng na Dios ed si Zacarias so sampot ya pasingawey pian ipaseguro ed saray Judio so panangaro tan apresasyon to ed amin ya agawaan da la tan insipan to ya protektaan to ra no ituloy day kimey ya pagagawa to. Oniay impromisa nen Jehova nipaakar ed pangipaalagey lamet ed templo: “Nagawa itan​—no naynay yon dengelen so boses nen Jehova a Dios yo.”​—Zac. 6:15.

6. (a) Panon ya ginmapo so komawalon pasingawey ed si Zacarias? (Nengnengen so litratod gapo na artikulo.) (b) Akin ya nandurumay kolor na saray kabayo?

⁶ Say komawalo tan sampot ya pasingawey ed si Zacarias so nagkalalo lan makapabiskeg na pananisia. (Basaen so Zacarias 6:1-3.) Imadyin yoy eksena: Ompapaway ed “baetan na duaran palandey . . . [ya] gansa” so apatiran karwahe, ya nayarin parad guerra. Nandurumay kolor na kabayo ya mangiguguyor ed saray karwahe. Lapud saya, mainomay ya nibiig iray akalugan ed karwahe. “Anto iraya?” so intepet nen Zacarias. (Zac. 6:4) Labay tayo met ya naamtaan, ta walay epekto na sayan pasingawey ed sikatayo natan.

7, 8. (a) Antoy irerepresenta na duaran palandey? (b) Akin ya saray palandey et gansa?

⁷ Diad Biblia, nayarin irepresenta na palandey iray panarian, odino gobierno. Saray palandey ya anengneng nen Zacarias et mipara ed duaran palandey ya adeskribe ed propesiya nen Daniel. Say irerepresenta na sakey a palandey et say agmanganggan uley nen Jehova diad interon uniberso. Say irerepresenta na sakey nin palandey et say Mesianikon Panarian ya si Jesus so Ari. (Dan. 2:35, 45) Manlapu nen nitrono si Jesus nen 1914, wala la irayan palandey tan walay importantin betang da pian nasumpal so linawa na Dios diad dalin.

⁸ Akin ya saray palandey et gansa? Singa say balitok, say gansa et sakey a metal ya  mabmabli. Ingganggan nen Jehova ya usaren iyan masileng a metal ed pangipaalagey na tabernakulo tan ed templo diad Jerusalem. (Exo. 27:1-3; 1 Ara. 7:13-16) Sirin, say duaran simbolikon palandey a gansa so mangipapanonot ed sikatayo ya sankaabigan so inkasoberano nen Jehova tan say Mesianikon Panarian, ya mangiter na kaligenan tan bendisyon ed amin ya totoo.

9. Siopa ray akalugan ed karwahe, tan antoy asainmin da?

⁹ Pawilen tayo pay nipaakar ed saray karwahe. Antoy irerepresenta na saray karwahe tan saray akalugan ditan? Saray akalugan et saray anghel, a nayarin saray grupo na anghel. (Basaen so Zacarias 6:5-8.) Sikaray ompapaway “kayari ran inmarap ed Katawan na interon dalin,” ya walay espisyal ya misyon da. Antoy asainmin da? Saray karwahe tan saray akalugan ditan et imbakin mangasikaso ed espisipiko iran lugar. Say responsabilidad da et protektaan iray totoo nen Jehova, nagkalalo la manlapud “dalin ed amianen,” say Babilonia. Seguroen nen Jehova ya aglamet naaripen na Babilonia so totoo to. Seguradon aligliwa iray managpaalagey na samay templo diad panaon nen Zacarias! Agda la kaukolan so manpaga ya patundaen ira na kakabusol da.

10. Anton panamaseguro ed totoo na Dios so iiter na propesiya nen Zacarias nipaakar ed saray karwahe tan saray akalugan ditan?

¹⁰ Singa nen panaon nen Zacarias, saray anghel et uusaren nin siansia nen Jehova na saray armada pian protektaan tan pabiskegen iray totoo to. (Mal. 3:6; Heb. 1:7, 14) Manlapu la nen nibulos so espiritual ya Israel ed simbolikon impakaaripen ed Makapanyarin Babilonia nen 1919, nantultuloy ya linmaknab so dugan panagdayew anggano grabe so isusumpa. (Apo. 18:4) Lapud proprotektaan itayo na saray anghel, agtayo natatakot ya ompan naaripen lamet na palson relihyon so organisasyon nen Jehova. (Sal. 34:7) Imbes, makaseguro itayo ya saray lingkor na Dios ed interon mundo et mantultuloy ya onaligwas ed espiritual. Legan tayon dadalepdepen so pasingawey ed si Zacarias, agtayo panduaruwaan ya maligen itayo tan proprotektaan itayo na duaran palandey.

11. Akin et agtayo nepeg ya takotan so onsabin panangataki ed totoo na Dios?

¹¹ Magano lan mankakasakey iray pakayari na politika ed mundo nen Satanas, ya say gagala ra et deralen so totoo na Dios. (Eze. 38:2, 10-12; Dan. 11:40, 44, 45; Apo. 19:19) Deneskribe ed propesiya nen Ezequiel ya singa ra lurem ya manakbong ed dalin tan akakabayo ira ya onataki lapud sanok da. (Eze. 38:15, 16) * Kasin walay nepeg tayon takotan? Anggapo! Lapud walad dapag tayo so armada na saray anghel. Diad panaon na baleg ya kairapan, saray anghel nen Jehova na saray armada et maniiba pian protektaan iray totoo na Dios tan deralen da iray onsusumpa ed inkasoberano to. (2 Tes. 1:7, 8) Seguradon agnalinglingwanan itan ya agew! Balet siopay mangidaulo ed armada nen Jehova ed tawen?

12, 13. (a) Antoy ingganggan ed si Zacarias ya gawaen to? (b) Ipaliwawa no panon ya say laki a tinawag ya Simit et mangililitrato ed si Jesu-Kristo.

¹² Samay waloran pasingawey ed si Zacarias  et sikato labat so akanengneng. Balet natan et walay ginawa to ya mangililitrato ed nagawad arapen tan mamaseseg ed saramay mangipaalagey lamet na templo na Dios. (Basaen so Zacarias 6:9-12.) Sikatoy ingganggan ya mangala na pilak tan balitok ed si Heldai, Tobia, tan Jedaias​—ya kakkasabi da manlapud Babilonia—​tan usaren to iratan pian manggawa na “marakdakep a korona.” (Zac. 6:11, paimanod leksab) Kasin ingganggan si Zacarias ya iyan toy korona ed ulo nen Gobernador Zerubabel ya kabiangan ed tribu na Juda tan nanlapud kailalakan nen David? Andi. Nayarin nikelawan iray akanengneng nen inyan toy korona ed ulo na Atagey a Saserdoten si Josue.

¹³ Kasin nagmaliw ya ari si Josue ya Atagey a Saserdote lapud sikatoy kinoronaan? Andi, ta si Josue et agnanlapud linya na pamilya nen David tan agkualipikadon magmaliw ya ari. Say impankorona ed sikato et mangililitrato ed magmaliw ya ari tan saserdote ed arapen tan diad andi-anggaan. Say atagey a saserdote ya ginawan ari et tinawag ya Simit. Malinew ya ipapanengneng na Kasulatan ya say Simit et si Jesu-Kristo.​—Isa. 11:1; Mat. 2:23, paimanod leksab.

14. Anton kimey so gagawaen nen Jesus bilang Ari tan Atagey a Saserdote?

¹⁴ Bilang Ari tan Atagey a Saserdote, si Jesus so mangidadaulo ed armada nen Jehova ed tawen. Kanian, sikatoy makulikulin mankikimey pian saray totoo na Dios bilang grupo et manayam ed kaligenan anggano wala rad mundon napnoy kaugsan. (Jer. 23:5, 6) Diad asingger lan arapen, idaulo nen Kristo so pilaban ed saray nasyon tan taloen to ra pian suportaan so inkasoberano na Dios tan idepensa iray totoo nen Jehova. (Apo. 17:12-14; 19:11, 14, 15) Balet wala ni baleg ya kimey ya gawaen na Simit antis ton idapo so panangukom.

15, 16. (a) Anton panangipawil tan panagpino ya kimey so nagagawa ed panaon tayo, tan siopay mangidadaulo ed satan? (b) Antoy nagawa kayari na Sanlibon Taon ya Uley nen Kristo?

¹⁵ Niarum ni ed kimey nen Jesus bilang Ari tan Saserdote, sikatoy ingganggan met ya “mangipaalagey ed templo nen Jehova.” (Basaen so Zacarias 6:13.) Diad panaon tayo, kaiba ed panagpaalagey ya kimey nen Jesus so pangibulos ed saray tuan managdayew manlapud Makapanyarin Babilonia tan say pangipawil ed Kristianon kongregasyon, ya agawa nen 1919. Sikatoy anuro met na “matoor tan makabat ya aripen” ya mangidaulo ed kimey diad sular na baleg ya espiritual a templo ed dalin. (Mat. 24:45) Tuloytuloy met ya pipinoen nen Jesus iray totoo na Dios tan tutulongan to ran pansiansiaen ya malinis so panagdayew da.​—Mal. 3:1-3.

¹⁶ Legan na Sanlibon Taon ya Uley, si Jesus tan say 144,000 ya kaiba ton ari tan saserdote et tulongan da ray totoo ya magmaliw a perpekto. No nagawa la iya, saray tuan mandadayew ed Dios labat so natilak ed alinisan ya dalin. Diad satan et sigpot lan nipawil so dugan panagdayew.

17. Antoy sinmublay ya impaseguro nen Jehova ed saray Judio, tan antoy epekto na mensahe to ed sikara?

¹⁷ Balet antoy epekto na mensahe nen Zacarias ed saray Judio nen panaon to? Insipan nen Jehova ya nawalaan iray kaligenan tan protektaan to ra ed kimey da. Nen impaseguro to ya nipaalagey lamet so templo, seguradon naikdan iray ilalo tan apabiskeg so liknaan da. Balet panon dan nasumpal so baleg ya kimey anta daiset labat ira? Say sinmublay ya imbaga nen Zacarias so angekal ed takot tan panduaruwa da. Likud ed suporta na saray matoor ya lingkor ya singa si Heldai, Tobia, tan Jedaias, imbaga na Dios  ya dakel ni so “onsabi . . . tan mibiang ira ed pangipaalagey ed templo nen Jehova.” (Basaen so Zacarias 6:15.) Lapud matalek iray Judio ya tulongan ira na Dios, kinmiwas iran tampol tan intuloy day kimey ya panagpaalagey anggano insebel itan. Ag-abayag, sayan pananebel a singa palandey ya subok et inekal nen Jehova, tan asumpal so templo nen 515 B.C.E. (Esd. 6:22; Zac. 4:6, 7) Balet saray imbaga nen Jehova et wala ni mas baleg ya kasumpalan to ed panaon tayo.

18. Panon ya nasusumpal so Zacarias 6:15 diad panaon tayo?

¹⁸ Natan et minilyon so mibibiang ed dugan panagdayew, tan mabunbunlok dan iiter iray “mablin kaykayarian” da, kaiba lay panaon, biskeg, tan materyal a bengatla pian suportaan so baleg ya espiritual a templo nen Jehova. (Pro. 3:9) Panon tayon naseguro ya papablien nen Jehova so matoor ya suporta tayo? Tandaan ya angiter si Heldai, Tobia, tan Jedaias na saray usaren parad korona ya ginawa nen Zacarias. Say korona et kinmanan “pakanodnonotan” odino “panonot” ya angiter ira parad dugan panagdayew. (Zac. 6:14; paimanod leksab) Ontan met natan, saray gagawaen tayo tan say aro ya ipapanengneng tayo parad si Jehova et agbalot nalingwanan. (Heb. 6:10) Papablien iratan nen Jehova tan mansiansia ed memorya to ya anggad angga.

19. Anto so nepeg ya epekto ed sikatayo natan na saray pasingawey ed si Zacarias?

¹⁹ Amin ya nagagawaan parad dugan panagdayew ed sayan kaunoran iran agew et mabiskeg ya ebidensya na panamendisyon nen Jehova tan panangidaulo nen Kristo. Kabiangan itayo na sakey ya organisasyon ya maligen, naproprotektaan, tan agmangangga. Say gagala nen Jehova parad dugan panagdayew et seguradon “nagawa.” Pablim so pasen mo ed organisasyon nen Jehova, tan ‘naynay mon dengelen so boses nen Jehova a Dios mo.’ Diad ontan, mansiansia kad proteksion na Ari tan Atagey a Saserdote tan saray anghel ya akalugan ed saray karwahe. Gawam so amin a nayarian mo ya suportaan so dugan panagdayew. Legan mon gagawaen itan, makaseguro kan protektaan ka nen Jehova na saray armada tan ikdan to kay kaligenan diad nakekeraan a panaon na sayan sistema na mundo​—tan diad anggad angga!