Вурдона и корона, савэ тумэн фэрин
«Кадя авэла, если тумэ андэ вся лэна тэ кандэн тумарэ Дэвлэс лэ Иеговас» (ЗАХ. 6:15).
1, 2. Со терэласпэ андо Иерусалимо, кала о Захария диқля седьмо видения?
ПОСЛЕ кода, сар о Захария додиқля седьмо видения, лэсти трэбуй сас пала бут со тэ погиндой. О Иегова сыкадя, кай на ашавэла вся кадя лэ найлашэ манушэнди, ай спушэла лэндар. Хоть кадэва алав, саво дя о Иегова, фартэ чалеля лэ Захариясти, но во диқэлас, кай и израильтяноря пока на парудёнаспэ. Вонэ кадяжэ терэнас найлащи дила. Кай тэ достроин андо Иерусалимо лэ Иеговаско храмо, прожала инке бут время. Васо и евреёря кадя йто забистэрдэ пала кода, со о Дэл ԥэндя лэнди тэ стерэн? Вонэ со, рисайлэ андо Иерусалимо кати важ кода, кай тэ жувэн май драго?
2 О Захария патялас, кай лэ муршэндэ и лэ жувляндэ, савэ рисайлэ андо Иерусалимо, сас састи вера. Андо Вавилоно лэндэ сас пэстирэ цэра и бути. Котэ вонэ нисостар и никастар на даранас. Но лэ Дэвлэско духо стердя кадя, кай вонэ тэ ашавэн вся када (Езд. 1:2, 3, 5). Вонэ ашадэ кодэя страна, сави фартэ драго ӷанэнас, кай тэ пэрэладэн андэ кодэя ԥув, сави бут мануша даже и на диқлэ. Евреёря жанас па дром, па саво сас ԥарэс тэ жан. Пэ кадэва дром слинэ бут плая и вонэ жанас варикай 1 600 киломметров. Жылоп вонэ пэ када вся, если важ лэндэ тэ на авелоп фартэ важно тэ ваздэн лэ Иеговаско храмо?
3, 4. Саво ԥаримос сас кай и евреёря, кала вонэ рисайлэ анда плено?
3 Со сас па дром, кала и евреёря жанас цэрэ? Кала вонэ сас андо дром, вонэ бут гиндонас пала пэско нэво цэр. Вонэ най еқвар ашунэнас пала кода, саво шукарно сас о Иерусалимо. Машкар лэндэ сас ԥурэ мануша, савэ пэстирэ яқэнца диқлэ, пэ скати баро и шукарно варикала сас о храмо (Езд. 3:12). Погиндон, если бы тумэ тэ жылоп лэнца андо дром, со тумэндэ авелоп по ди, кала дурал додиқлоп о Иерусалимо? Тумэндэ кадяжэ линоп тэ дуқал оди, кала диқлоп, кай вся розмардо и забарярдо чаряса. Тумэ драго сэрэн, кай андо Вавилоно сас двойни стины, савэ фартэ барэ и буӷлэ. Сар же акана тумэнди ԥарэс тэ диқэн пэ стины андо Иерусалимо, савэ розмардэ. Андэ вороты и котэ, кай сас сторожеви башни, акана барэ ямы. Но через када вся израильтяноря на умэклэ и вас. Важ кода кай о Иегова вся кадэва баро дром, кала вонэ жанас цэрэ, подритярэлас лэн пэстирэ зоралэ вастэса. Кала вонэ авелэ андо Иерусалимо, пэрво, со вонэ линэ тэ терэн, када тэ строин о жертвеннико. Тэ строин пэ кодэва ҭан, кай сас о храмо, кай кажно дес тэ анэн пэр лэстэ лэ Иеговасти жертвы (Езд. 3:1, 2). Вонэ фартэ камэнас када тэ терэн и здэласпэ, кай нисо лэн на тердярэла.
4 Израильтяноря трэбуй сас най кати тэ ваздэн о храмо, но и упалэ тэ лэн тэ строин и фороря. Вонэ трэбуй сас тэ ваздэн и цэра, тэ терэн пэ маля и тэ правэрэн пэстирэ еря (Езд. 2:70). Бути сас фартэ бут. Но йто авелэ и ворогоря и 15 бэрш на дэнас тэ терэн лэнди бути. Спэрва и евреёря на умэкэнас и вас, но прожыля время и вонэ уже на строинас анда вся оди, сар спэрва (Езд. 4:1—4). Андо 522 бэрш жы кай И. Х. о персидско царё приԥэндя, кай тэ парашэн тэ строин о Иерусалимо. И када сас фартэ ԥарэс важ лэндэ, сар бар па шэрэстэ. Здэласпэ, кай о Иерусалимо будэр никала на лэна тэ строин (Езд. 4:21—24).
5. Сар о Иегова подритярдя пэстирэ народос?
5 О Иегова ӷанэнас, кай лэстирэ народости трэбуй сас, кай во лэн тэ подритярэл и тэ ԥэнэн лашэ алава, савэндар ашэла май вушэро. Во дя лэ Захариясти инке ек послиднё видения, кай тэ сыкавэл лэ иудеёнэнди, кай любий лэн. О Иегова драго сыкадя, кай цений вся, со и евреёря уже важ лэстэ стердэ. И сыкадя, кай фэрия лэн, если вонэ упалэ лэна тэ терэн кодэя бути, сави во дя лэнди. О Иегова дя алав, кай о храмо ваздэна. Во ԥэндя: «Кадя авэла, если тумэ андэ вся лэна тэ кандэн тумарэ Дэвлэс лэ Иеговас» (Зах. 6:15).
ВОИНОРЯ ПО НЭБО
6. а) Со сас спэрва андэ восьмо лэ Захариястири видения? (Диқэн и картинка англа статья.) б) Васо кай и граста разни цветоря?
6 И послиднё восьмо лэ Захариястири видения поможый, кай и вера тэ авэл май састи. (Адиносар Захарии 6:1—3 *). Кати представьте, машкар дуй медни плая ашэлэ штар вурдона, андэ савэ сас вся важ и война. Кай и граста, савэн динэ андрэ, разни цветоря. Када поможыяс тэ ӷалярэс ек вурдон аврэ вурдонэстар. О Захария пушэл кай о ангело: «Со када, мэрно господино?» (Зах. 6:4). Амэ кадяжэ камас тэ уӷанас, важ кода кай кадэя видения поджал и каринг амэндэ.
7, 8. а) Со када дуй плая? б) Васо кадэла плая медни?
7 Андэ Библия ԥэнэнпэ, кай и плая, када царства, или правительства. Дуй плая анда лэ Захариясти видения шонпэ пэ кодэла, пала савэ дэлмут сас запистромэ андэ Даниила. Ек плай сыкавэл, кай лэ Иеговастэ исин право вечно тэ правий всаворэса. Дуйто плай, када Царство, саво спасыя и андэ саво правий о Иисусо (Дан. 2:35, 45). Андо 1914 бэрш, осенью, о Иисусо ашэля царёса. Кодэла времятар, кадэла дуй плая фартэ важни кодэлэса, кай о Дэл тэ стерэл кода, со загиндосардя важ и ԥув.
О Иегова вся кадяжэ через и ангелоря фэрий и терэл кадя, кай лэско народо тэ авэл май састо
8 Васо кадэла плая медни? И медь, сар и о сомнак, кучутни и фартэ лащи. О Иегова приԥэндя, кай анда кадэя медь, сави блестий, тэ стерэн и бари катуна, ай сар прожала время анда кацави же медь тэ строин о Иерусалимско храмо (Исх. 27:1—3; 1 Цар. 7:13—16). Кода, кай кадэла плая медни, сыкавэл амэнди, кай кати кай о Иегова исин право тэ правий всаворэса и лэстири правления и лэско Царство фартэ лашэ. Вся када анэна англэ кацави жизня, кай всаворэ мануша лэна драго тэ жувэн и никастар и нисостар на лэна тэ даран.
9. Со када вурдона и кодэла, ко пэр лэндэ ладэл? Васо лэн бишалдэ?
9 Ай кас сыкавэн и вурдона и кодэла, ко пэр лэндэ ладэл? Када ангелоря, савэ андэ вурдона. (Адиносар Захарии 6:5—8 *). Вонэ «вижан после кода, сар... авэнас англа кодэва, ко исин Хулай па вся ԥув», и лэндэ особо дила. Сави? Кажно вурдон бишалдэ андэ пэстири ԥув, кай тэ фэрин лэ Иеговастирэ народос. Само фартэ трэбуй сас тэ фэрин лэ Вавилоностар, када северно ԥув. О Иегова на дэла, кай о Вавилоно упалэ тэ залэл лэстирэ народос андо плено. Сар же када подритярдя кодэлэн, ко строияс о храмо андэ лэ Захариястирэ деса! Лэнди на трэбуй сас тэ даран лэ ворогонэндар, савэ на дэнас тэ строин.
10. Сар лэ Захариястири видения важ и вурдона, поможый амэнди адес?
10 Адес кадяжэ, сар андэ лэ Захариястирэ деса о Иегова, савэстэ бут воиноря, через лэндэ фэрий и терэл кадя, кай лэско народо тэ авэл май састо (Мал. 3:6; Евр. 1:7, 14). Андо 1919 бэрш о Нэво Израилё сас вимыкло анда хохавнэ религии, пэ савэ ԥэнэнпэ Вавилоно Велико. Кодэла времятар и ворогоря терэнас вся, кай лэ Дэвлэско народо тэ на служий, но нико и нисо нэ может тэ тердярэл, кай тэ на росԥэнэн важ о Дэл (Отк. 18:4). Важ кода кай амэн фэрин и ангелоря, амэнди на трэбуй тэ дарас, кай андэ лэ Иеговастири организация упалэ авэла кода, сости сытярэн хохавнэ религии (Пс. 34:7). Амэ патяс, кай лэ Дэвлэстирэ служителя па вся миро лэна и май дур и май драго тэ ритярэн лэ Дэвлэско законо. Кода, со сас дэлмут запистромэ андэ Захария, инке трэбуй тэ авэл. Кала амэ гиндосарас пала кадэя видения, амэ никастар и нисостар на дарас, важ кода кай полас, кай амэн фэрин, сар бы дуй плая.
11. Васо амэнди на трэбуй тэ дарас, кала жана против лэ Дэвлэско народо?
11 Фартэ йто кодэла, ко андэ политика, сави лэ Сатанасти, доԥэндёнапэ, кай тэ дэн пэ Дэвлэско народо и тэ умарэн лэс (Иез. 38:2, 10—12; Дан. 11:40, 44, 45; Отк. 19:19). Андэ кода, со дэлмут запистросардя о Иезекиилё, но инке трэбуй тэ авэл, ԥэнэнпэ, кай вонэ анда фартэ бари холи жана против амэндэ, сар и туча, кай тэ заушаравэн и ԥув. Вонэ авэна пэ граста (Иез. 38:15, 16) *. Трэбуй амэнди тэ дарас кадэлэстар? Най! Важ кода кай пэ амари риг воиноря, савэ по нэбо. Андэ кодэя время, кала авэла фартэ бари бида, сави инке никала на сас, и ангелоря фэрина лэ Иеговастирэ народос и умарэна кодэлэн, ко жал против кода, кай тэ правий о Дэл (2 Фес. 1:7, 8). Пэ скати дэ важно авэла кадэва дес! Но, ко лэла тэ андярэл лэ Иеговастирэ воинонэн, савэ по нэбо?
О ИЕГОВА ПО РАШАЙ СТОЛ ЦАРСКО КОРОНА
12, 13. a) Со о Иегова ԥэндя тэ стерэл о Захария? б) Росԥэнэн, васо о Отростко анда лэ Захариястирэ алава сыкавэн лэ Иисусос?
12 Кати о Захария диқля кодэла восемь видении, савэ сыкадя лэсти о Иегова. Акана о Захария терэл кода, со диқэна авэр мануша. Када дэла помощь лэ израильтянонэнди, савэ ваздэн лэ Иеговаско храмо. (Адиносар Захарии 6:9—12 *). О Иегова ԥэнэн лэ Захариясти тэ лэл руп, и о сомнак кай о Хелдаё, Товия, и Иедаиё, савэ найдэлмут рисайлэ анда Вавилоно, кай тэ стерэл «фартэ шукарни корона» (Зах. 6:11). Пэр кастэ о Захария трэбуй сас тэ стол и корона? По Зоровавелё анда племя Иуды, саво сас правителё, и саво жыля лэ Давидостар? Най. О Захария стодя и корона по шэро само барэ рашасти, лэ Иисусости, саво шаво лэ Иоседекоско. Кодэла, ко диқэлас када, удивисайлэ.
13 После када о Само Баро Рашай о Иисусо ашэля Царёса? Най. Во на сас анда царско лэ Давидоско родо, важ кода во нэ мог тэ авэл Царё. Кода, сар стодэ и корона по шэро сыкавэлас, кай англэ авэла кодэва, ко ашэла и андэ ек время и Царё и Само Баро Рашай пэ вечность. О Иегова дя лэсти алав Отростко. И Библия драго сыкавэл, кай о Отростко, када о Иисус Христос (Ис. 11:1; Матф. 2:23 *).
14. Со терэл о Иисусо, сар Царё и сар Само Баро Рашай?
14 О Иисусо андэ ек время и Царё и Само Баро Рашай. О Иисусо барэдэр анда воиноря, савэ кай о Иегова по нэбо. Во терэл вся, кай тэ фэрий лэ Дэвлэстирэ служителёнэн, важ кода кай вонэ жувэн андо миро, саво жал против лэндэ (Иер. 23:5, 6). Уже фартэ йто о Христос лэла тэ марэлпэ и победия кодэлэн, ко жал против кода, кай о Дэл тэ правий. Во фэрия лэ Дэвлэстирэ народос (Отк. 17:12—14; 19:11, 14, 15). Но спэрва, о Отростко трэбуй тэ стерэл важно дила.
ВО ПОСТРОИЯ О ХРАМО
15, 16. а) Через кастэ андэ амарэ деса лэ Дэвлэско народо упалэ ля тэ служий и тэ кандэл лэс кадя, сар во камэл? б) Сави авэла жизня пэ ԥув, после кода, сар тысяча бэрш правия о Иисус Христос?
15 О Дэл най кати стодя лэ Христос Царёса и Само Барэ Рашаса. Но о Иегова ԥэндя лэсти, кай во тэ построий о «храмо». (Адиносар Захарии 6:13 *). Андо 1919 бэрш во стердя кадэя дила. Через о Иисусо лэ Иеговастирэ служителя, савэ кандэнас лэ Иеговас, парашэлэ тэ патян и тэ терэн кадя, сости сытярэнас хохавнэ религии, пэ савэ ԥэнэн Вавилоно Велико. Инке о Иисусо стердя кадя, кай упалэ тэ авэл христианско собрания. Во кадяжэ стодя «вернонэ благоразумнонэ рабос». Када и помазанникоря, савэ диқэн пала служения пэ ԥув, сави ужал андэ лэ Дэвлэско порядко, через саво о Дэл поможый лэ манушэнди тэ тэлён лэсти кадя, сар во камэл (Матф. 24:45). Кадяжэ о Иисусо бут со терэл, кай лэ Дэвлэско народо нисо тэ на терэл анда кода, сости сытярэн хохавнэ религии. Инке дэл помощь лэ Дэвлэстирэ народости, кай вонэ тэ служин лэ Иеговасти кадя, сар во камэл (Мал. 3:1—3).
16 Кала о Иисус Христос правия тысяча бэрш, во и 144 000, савэ правина лэса, ашэна рашанца и дэна помощь лэ Дэвлэстирэ манушэнди, савэ кандэн лэс тэ авэн совершенни. После кода, пэ ԥув, пэ сави авэла раё, лэна тэ жувэн кати лэ Дэвлэстирэ служителя, савэ кандэн лэс. Тоди тэлёна кати лэ чачунэ Дэвлэсти!
ТЕРЭН ЛЭ ДЭВЛЭСТИ ДИЛА
17. Со ԥэндя о Иегова лэ евреёнэнди и со, после кадэла алава, вонэ линэ тэ терэн?
17 Сар кода, со ԥэндя о Захария парудя кода, со гиндонас и евреёря, савэ жувэнас андэ лэстирэ деса? О Иегова дя алав, кай поможыя лэнди и фэрия лэн. Во ԥэндя, кай о храмо ваздэна. И через када вонэ упалэ линэ тэ гиндон, кай кадэя дила вонэ стерэна. Но исин зор кай кадэла мануша, савэн най фартэ бут, тэ стерэн кадэя ԥари дила? Кода, со запистросардя о Захария май дур, поможый андэ када тэ патяс. О Иегова ԥэндя, кай най кати авэна тэ строин о Хелдая, Товия и Иедаиё, но и авэр бут мануша. (Адиносар Захарии 6:15 *). Акана и евреёря патяе, кай о Дэл поможыя и сразу линэ тэ терэн кадэя дила. Вонэ упалэ линэ тэ строин и на диқлэ пэ кода, кай лэнди на дэнас тэ строин. Йто, после кода о Иегова уля, со на дэлас лэнди тэ строий. Важ лэндэ када сас, сар фартэ «баро плай». Тэ строин о храмо лэнди упалэ мэклэ и каринг 515 бэрш жы кай И. Х. вонэ вазглэ о храмо (Езд. 6:22; Зах. 4:6, 7). Но май бут лэ Иеговастирэ алава поджан каринг амари время.
О Иегова никала на бистрэла амари любовь, сави амэ пэ дила сыкавас каринг лэстэ (Диқэн и абзацоря 18, 19.)
18. Сар андэ амарэ деса терэлпэ кода, со запистромэ анда Захария 6:15?
18 Адес лэ чачунэ Дэвлэсти служин миллионоря мануша. Вонэ анда вся оди дэн кода, со важ лэндэ фартэ куч, када зор, время и ловэ. Через када амэ терас вся, кай и май дур тэ авэл лэ Дэвлэско порядко, через саво о Дэл поможый лэ манушэнди тэ тэлён лэсти кадя, сар во камэл (Прит. 3:9). Со поможыя амэнди тэ патяс, кай о Иегова цений кода, со амэ дас лэсти? Вспомним, кай о Хелдаё, Товия и Иедаиё андэ́ кода, андар со о Захария стердя и корона. Кодэя корона сас важ кода, кай тэ сэрэн, со вонэ андэ́, кай тэ тэлён лэ чачунэ Дэвлэсти (Зах. 6:14). Кадяжэ о Иегова никала на бистрэла кода, со амэ терас важ лэстэ и амари любовь, сави амэ пэ дила сыкавас каринг лэстэ (Евр. 6:10).
19. Со тумэ акана лэна тэ терэн, кала уӷанглэ пала лэ Захариястирэ видении?
19 Андэ кадэла послидни деса лэ Иеговаско народо бут со стердя. Када драго сыкавэл, кай о Иегова благословий амэн и, кай пала лэ Иеговаско народо диқэл о Христос. Амэ андэ кацави организация, савяса нисо на терэлапэ и сави авэла вечно. О Иегова стерэла кода, со загиндосардя, кай лэско народо тэ тэлёл лэсти кадя, сар во камэл. Ценин кода, со тумэнди динэ тэ терэн андэ лэ Дэвлэско народо и андэ вся кандэн лэ Иеговас. Тоди тумэн фэрия амаро Царё и Само Баро Рашай, ай кадяжэ и ангелоря. Терэн вся, со тумэ можете, кай и май дур тэ тэлён лэ Иеговасти. Кала тумэ кадя терэн, тумэ можете тэ патян, кай о Иегова, савэстэ бут воиноря, лэла тэ фэрий тумэн, пока жувэн андэ кадэва найлашо миро и вся вечность.
^ абз. 6 Захарии 6:1—3: «Мэ упалэ вазглэм и яқа, диқлэм и додиқлэм штар вурдона, савэ ашэлэпэ машкар дуй плая. Кадэла плая сас анда медь. Андэ пэрво вурдон динэ андрэ лолэ грастэн, андо дуйто вурдон, калэ грастэн, андо трито вурдон, парнэ грастэн, ай андо штарто, рябонэ, ԥабэндирэ грастэн».
^ абз. 9 Захарии 6:5—8: «И о ангело ԥэндя манди: „Када штар небесни ангелоря, савэ вижан после кода, сар вонэ авэнас англа кодэва, ко исин Хулай па вся ԥув. Вурдон, андэ саво динэ андрэ калэ грастэн, жал андэ северно ԥув, парнэ граста жана пала моря, ай ряби жана андэ южно ԥув. Ԥабэнди граста жана и лэна тэ жан каринг трэбуй, кай тэ прожан па ԥув“. Тоди во ԥэндя: „Жан, прожан па ԥув“. И вонэ жылэ па ԥув. Во цыписайля манди: „Дик, кодэла, ко жан андэ северно ԥув улинэ лэ Дэвлэско духо“».
^ абз. 11 Май бут пала када можешь тэ уӷанэс андэ «Вопросы читателей» андэ брошюра «Бодрствуйте! Сатана хочет вас поглотить» (bw558-U), страницы 29—30.
^ абз. 12 Захарии 6: 9—12: «И упалэ каринг мандэ сас лэ Иеговаско алав: „Мэк кай о народо, савэс видарадэ, лэн часть кодэлэстар, со андэ́ лэ Дэвлэсти, лэн кай о Хелдаё, Товия и Иедаиё. И ту екжэно ав андэ кодэва дес андэ лэ Иосиёско цэр, кай лэ Софонияско шаво, ав кодэлэнца, ко авеля анда Вавилоно. Лэ руп и сомнак, стер фартэ шукарни корона, сто ла по шэро лэ барэ рашасти, лэ Иисусости, саво сас лэ Иоседекоско шаво, и ԥэн лэсти: „Кадя ԥэнэн о Иегова, савэстэ бут воиноря: „Акэ о мануш, каско алав Отростко. Во вибарёла пэ пэско ҭан и построия лэ Иеговаско храмо“».
^ абз. 13 Алав «назаретянино» жал лэ древнееврейсконэ алавэстар не́цер. Кадэва алав сыкавэл «отростко».
^ абз. 15 Захарии 6:13: «Во построия лэ Иеговаско храмо и прилэла слава, во бэшэла пэ пэско престоло и лэла тэ правий и ашэла рашаса пэ пэско престоло и када сжалапэ ек еқэса».
^ абз. 17 Захарии 6:15: «И кодэла, ко дур, авэна и лэна тэ строин лэ Иеговаско храмо. И тумэ уӷанэна, кай о Иегова, савэстэ бут воиноря, бишалдя ман каринг тумэндэ. Кадя авэла, если тумэ андэ вся лэна тэ кандэн тумарэ Дэвлэс лэ Иеговас».
