Saragallunna Baˈlatto Agartannonke
“Kuni baalunku woˈmannohu Maganiˈne Kaaliiqira hajajantinirooti.”—ZAK. 6:15.
FAARSO: 61, 22
1, 2. Zakkaariyaasi lamalki ajuuja lai gedensaanni, Yerusaalamete noohu Yihudu manni hiitto ikke no?
ZAKKAARIYAASI lamalki ajuuja lae kai gedensaanni lowohu yaachishannosi coyi no. Yihowa ammanaminokki manna bushu assootinsara qorichisheemmo yee qaale eino. Tini Zakkaariyaasira jawaante ikkitinositi egennantinote. Ikkirono woyyaawe yiinori dino. Ammanama xeˈinore assannohunna bushu manni xaano noolla. Qoleno Yerusaalamete wirro mina hananfoonnihu qullaawu mini umo nafa dihigino. Yihudu manni bayichonko hexxo mudhe Maganu uyinonsa looso loosa agurinohu mayiraati? Insa Yerusaalame higginohu uminsa injo hasidheetini?
2 Zakkaariyaasi Baabiloonetenni Yerusaalame higino mannira kaajjado ammana noonsata afino. Insa qaensara noonsa qiniitenna loosonsa facci assite agurte, Yerusaalame higganno gede ‘kakkayisinonsahu Maganoho.’ (Izi. 1:2, 3, 5) Insa rossino gobbanni agurte higgino; insa giddo rooru Yerusaalame affe diegentinoreeti. Yihudu manni Yihowa mine wirro mina hasiˈra hoogoommero, 1,600 km meddi yitannota ilaalaamenna eaafulcho doogo tayise didaanno!
3, 4. Baabiloonetenni higinohu Yihudu mannira mayi qarri iillinonsa?
Izi. 3:12) Ati ledonsa hadhanni noottoha ikkoommero, xeertote heedhe konni kaˈa qaekki ikkannoha Yerusaalamete katama laittoro mayi macciishshamannohe? Katamu giddo noota diigantino minnanna dubbino ishine laittoro dadillatto? Yerusaalamenniha diigamino huxxa Baabiloonennihu seedunna kaajjadu huxxi ledo heewisiisatto? Yihudu manni umi qara hexxo dimudhino. Mayira? Insa Baabiloonetenni Yerusaalame higgu wote Yihowa kaaˈlinonsa gara laˈino. Insa hakkira iillitanni heedhenni alba qullaawu mini noowa kakkallanni bayicho qixxeessitino; hakkiinni barru baala Yihowara kakkalo shiqishiˈra hanaffino. (Izi. 3:1, 2) Umi qara insa looso hanafate quqquxantino gara hendiro, badhera higgannoha dilawanno.
3 Hanni Yihudu manni Baabiloonetenni Yerusaalame higi wote ikkinore hedi. Insa doogote heedhe, haaro qaensa daafira heddukki digattino. Insa Yerusaalamete katami alba biifadoho yinanna macciishshitino. Mereeronsa noohu jajjabbu manni qullaawu mini ayirrado ikkinota affinoreeti. (4 Israeele qullaawa mine mintannotano agurranna katamansano wirro miˈna hasiissinonsa. Insa uminsa mine miˈna, gate loosiˈranna maatensara hasiisannore shiqisha hasiissannonsa. (Izi. 2:70) Yihudu mannira lowo loosi noonsa. Shiima yanna gedensaanni mitu manni insa loossanno looso hoola hanafino. Umi qara insa hinko gaˈmidhe loossinoha ikkirono, mannu 15 diro woˈma waadinonsa daafira hexxo mudhitino. (Izi. 4:1-4) Hakkiinni 522 K.A. Faarsi moote Yerusaalamete giddo mitto mineno minnannita hoolino. Hatte yannara xaate Yerusaalamete katama horo minnannikkiha lawino.—Izi. 4:21-24.
5. Yihowa mannisi hexxo mudhi yannara maa assino?
5 Yihowa dagasira hasiisinnonsare afino. Maganu Zakkaariyaasira jeefote ajuuja leellishinosi; tenne ajuujara Isi mannasi baxannotanna assitino coye naadannota buuxisinonsa, hattono uyinonsa looso wirro loosa hanaffuro agarannonsata kule jawaachishinonsa. Yihowa qullaawa mine wirro minate daafira coyiˈranni anera ‘hajajantiniro kuni baalunku woˈmanno’ yiino.—Zak. 6:15.
SOKKAASINETE OLANTO
6. (a) Zakkaariyaasi settikki ajuujara maa laino? (Umi misile lai.) (b) Faradu addi addi dana afiˈrinoha ikkinohu mayiraati?
6 Zakkaariyaasi laino ajuuja baalantenni roore ammana kaajjishshannoti jeefote lainote settikki ajuujaati yaa dandiinanni. (Zakkaariyaasi 6:1-3 nabbawi.) Hanni tenne ikkito hedi: Shoolu saragalli “lame camote ilaalla mereerinni” fulanni no; saragallu olunniha ikkikki digatino. Saragalla goshooshanno faradi addi addi dana afiˈrinoho. Tini saragalla guluffinore bade afate kaaˈlitanno. Zakkaariyaasi “Kuri maati?” yee xaˈmino. (Zak. 6:4, NW) Ninkeno isinte gede, kuri coyi maatiro afa hasiˈneemmo; korkaatuno tenne ajuujara kulloonniri ninkerano kaaˈlannonke.
Yihowa xaano mannasi agaratenna jawaachishate sokkaasinesi soyanno
7, 8. (a) Zakkaariyaasi lainoti lame ilaalla maa riqibbanno? (b) Ilaalla camonnita ikkase maa leellishshanno?
7 Qullaawu Maxaafi garinni, ilaalla mangistuwa woy gashshoote riqibbara dandiitanno. Zakkaariyaasi maxaafira kulloonni ilaalla, Daanieeli maxaafira kulloonnite lame ilaalla ledo mittete. Mittu ilaali, Yihowaha hegeriha kalqete alame gashshoote riqiwanno. Wolu ilaali qole, Yesuusi moote ikkinoha Mesihichu Gashshoote riqiwanno. (Dan. 2:35, 45) Yesuusi 1914nni moohi yannanni kayise, lamenti ilaalla uullate aana Maganu fajjo woˈmitanno gede assitanni no.
8 Ilaalla camonnita ikkase maa leellishshanno? Culkate gede, camono lowo waaga afidhino. Yihowa xaadooshshu dunkaananna Yerusaalamete qullaawa mine minni wote camo horoonsiˈnanni gede hajajino. (Ful. 27:1-3; 1 Mot. 7:13-16) Konni daafira, lamenti lawishshu ilaalla camonnita ikkase, Yihowati kalqete aliidimmanna Mesihichu Mangiste dhaggennita ikkitinota qaangeemmo gede assitannonke. Kuni lamunku gashshooti mannu ooso baala teesse heedhannonna atoote afidhanno gede assanno.
9. Saragalla guluffinori ayeooti? Insa loosi maati?
9 Xa hanni saragallu daafira laˈno. Saragallunna konne saragalla guluffinori maa riqibanno? Saragalla guluffinori sokkaasinete; insa addi addi gaamo ikkitara dandiitanno. (Zakkaariyaasi 6:5-8 nabbawi.) Insa mitto baxxino looso loosate ‘Maganuwiinni fulte’ hadhino. Kuni loosi maati? Saragallunna saragalla guluffinori hadhanno qoqqowo kulloonninsa. Loosinsa Yihowa manna agarate; roorenkanni insa mannasi ‘aliyye gobbanni’ yaanno Baabiloonetenni agartanno. Yihowa tenne ajuujanni Baabiloone wirro mannasi gadachitannokkita buuxisino. Tini ajuuja Zakkaariyaasi waro heeˈrinoha qullaawa mine minanno manna lowo geeshsha sheshifachishshinonsati dihuluullissannote! Insa xaate diinnansa loossannota hooltannonke yite diyaaddanno.
10. Zakkaariyaasi saragallunna saragalla guluffinori daafira laino ajuuja, xaa yannara Maganu manna jawaachishshannohu hiittoonniiti?
10 Zakkaariyaasi waro assinte gede, olantote mootichi Yihowa xaano mannasi agaratenna jawaachishate sokkaasinesi soyanno. (Mil. 3:6; Ibi. 1:7, 14) Ayyaanaamittete Israeele 1919nni Bayira Baabiloone borojjimmanni fultu yannanni kayise, mannu giwannoha ikkirono halaalu magansiˈra baasa halaˈlitanni no. (Aju. 18:4) Sokkaasine Yihowa dirijjite agartanno daafira, wirro kaphu ammaˈnora borojje ikkineemmo yine dimanseemmo. (Far. 34:7) Hatteentenni, alame woˈmate Maganu soqqamaano ayyaanaamittetenni lophitannota addaxxa dandiineemmo. Zakkaariyaasi laino ajuuja hedanke, lamente ilaalla hunda heeˈnummo geeshsha waajjishannonkeri nookkita huwanteemmo gede assitannonke.
11. Maganu manna siˈannore waajja hasiissannonkekkihu mayiraati?
11 Muli yanna giddo, Sheexaanu alame gashshooti, Maganu manna gudate mixiˈre mitteenni kaˈˈanno. (Hiz. 38:2, 10-12; Dan. 11:40, 44, 45; Aju. 19:19) Hiziqeeli masaalora, insa Maganu manna gawajjate farado guluffe baatto guggushshino gomichi gede ikkite daggannota kulloonni. (Hiz. 38:15, 16) * Ikkina waajjishannonkeri nooyya? Dino! Ninke agarte noo olanto no. Bayiru qarri yannara, Yihowati sokkaasinete olanto Maganu daga agaratenna Yihowa aliidimma gibbannore hunate mitteenni dagganno. (2 Tes. 1:7, 8) Hakku baxxino barraati! Ikkina, Yihowata iimi olanto massagannohu ayeti?
YIHOWA KAKKALAANCHO MOOTE ASSINO
12, 13. (a) Zakkaariyaasi maa assi yinoonnisi? (b) Sina woy Ciiro yini manchi Yesuusi Kiristoosi leellishannoho yineemmohu mayiraatiro xawisi.
12 Zakkaariyaasi settenta ajuuja lainohu callisi heeˈreeti. Xa qole wolootu laˈˈa dandiitannohanna Maganunniha qullaawa mine wirro mintannore jawaachishanno coye assaraati. (Zakkaariyaasi 6:9-12 nabbawi.) Zakkaariyaasi Heldayi, Xobbiyanna Yidaiya uyitino culkanninna birrinni “ayirrado baˈlatto” loosanno gede hajanjoonnisi; kuri sasunku Baabiloonetenni higginoreeti. (Zak. 6:11) Zakkaariyaasi tenne baˈlatto woranno gede hajanjoonnisihu, Yihudu mootenna Daawiti sircho ikkinohu Zerubaabeeliraatini? Deeˈni. Zakkaariyaasi baˈlatto Kakkalaanote Biilo ikkinohu Iyyaasu umira woranna laino manni dhagge assiˈrinoha ikkara dandaanno.
13 Kakkalaanote biilo ikkinohu Iyyaasura umoho baˈlatto worroonnisi daafira calla moote ikkannoni? Diˈˈikkanno; korkaatuno Iyyaasu ilaminohu Daawiti maatenni ikkinokki daafira, moote ikka didandaanno. Konni daafira, Iyyaasu umira baˈlatto worroonnihu albillitte daannoha hegere mootenna kakkalaancho leellishateeti. Moote assinoonni kakkalaancho Sinaho woy Ciiˈroho yinoonni. Qullaawa Borro Ciiro yinihu Yesuusi Kiristoosi ikkinota xawisse kultanno.—Isa. 11:1; Mat. 2:23.
14. Mootenna Kakkalaanote Biilo ikkinohu Yesuusi Kiristoosi maa assanno?
14 Yihowata iimi olanto massagannohu Mootenna Kakkalaanote Biilo ikkinoho Yesuusi Kiristoosiiti. Maganu daga heedhannohu bunshe woˈmitino alamera ikkirono, isi gaamote deerrinni agarannonsa daafira, beˈe yitukki heeˈra dandiitanno. (Erm. 23:5, 6) Muli yanna giddo, isi gashshoote baala qeele, Maganu aliidimma irkisanno, hattono Yihowa daga gatisanno. (Aju. 17:12-14; 19:11, 14, 15) Ikkirono, Yesuusi bunshe baala hunara albaanni loosannohu mittu lowo loosi no.
QULLAAWA MINE MINANNO
15, 16. (a) Yannankera hiikkonne xalashshatenna wirro xintate looso loonsoonni? (b) Kiristoosihu Kumu Diri Gashshooti yannara mayi ikkanno?
15 Yesuusi Mootenna Kakkalaanote Biilo ikke loosanno loosono agurranna, Yihowaha “Qullaawa Mine” minate looso uyinoonnisi. (Zakkaariyaasi 6:13 nabbawi.) Yannankera, Yesuusi Magano halaalunni magansiˈranno manna Bayira Baabiloonenni fushshenna Kiristaanu songo wirro xinte qullaawa mine minino; isi konne looso loosinohu 1919nniiti. Hattono Yesuusi ayyaanaamittennihu qullaawu minite uullayidi hoowera loonsanni loosira albisa ikkanno gede “ammanaminohanna wodanaamo borojjicho” shoomino. (Mat. 24:45, NW) Qoleno Yesuusi Maganu daga qullaawa soqqansho soqqama dandiitanno gede kaaˈlate, insa xalashshate looso loosanni keeshshino.—Mil. 3:1-3.
16 Kumu Diri Gashshooti yannara, Yesuusinna ledosi mookkannori 144,000 kakkalaano ammanantinori mannu ooso guuta ikkitanno gede assitanno. Kuni ikkanno wote, uullate aana Magano halaalunni magansiˈranno manni calla heeˈranno. Jeefote, halaalu magansiˈra xintate loosi woˈmunni woˈma gumulamanno!
QULLAAWA MINE MINATE LOOSIRA KAAˈLAMME
17. Yihowa Yihudu mannira mayyee qaale eino? Tini insa jawaachishshinonsahu hiittoonniiti?
17 Zakkaariyaasi sokka hatte yannara noohu Yihudu manni maa assanno gede kakkayissinonsa? Yihowa insa qullaawa mine mintanno wote kaaˈlannonsatanna agarannonsata kule jawaachishinonsa. Tini wodaninsa hagiidhanno gede assitinonsa. Kayinni shiimu Yihudu manni konne looso umo fushsha dandaannohu hiittoonniiti? Zakkaariyaasi 6:15 nabbawi.) Yihudu manni Maganu kaaˈlannonsata addaxxe, bayichonko looso hanafino; giwannonsa manni heeˈrirono insa loosa diagurino. Yihowa ilaalu gede ikkino guficho hooleenna shiima yanna gedensaanni qullaawa mine 515 K.A. minne gundoonni. (Izi. 6:22; Zak. 4:6, 7) Yihowa eino qaali yannankerano loosannoho.
Zakkaariyaasi hakkiinni aanche coyiˈrinori insa waajjitannokkinna mittoreno huluullantannokki gede assannoreeti. Heldayi, Xobbiyanna Yidaiyano aguranna Maganu batinyu “fafowa heeˈranno manni” Yihowaha qullaawa mine mina kaaˈlara daannota coyiˈrino. (Yihowa isira leellinsheemmo baxille horo dihawanno! (Gufo 18, 19 lai)
18. Zakkaariyaasi 6:15 yannankera woˈmitinohu hiittoonniiti?
18 Yannankera lowo miliyoone ikkanno manni halaalu magansiˈrawa dayino; insa giddonsanni kaˈe yannansa, wolqansanna woxensa uyite, ayyaanaamittennihu qullaawu minira loonsanni loosira kaaˈlantanni no. (Law. 3:9) Yihowa ammanamme assineemmore naadannota mayinni anfeemmo? Zakkaariyaasi baˈlatto seekkinohu Heldayi, Xobbiyanna Yidaiya abbitinorinni ikkinota qaagi. Hatti baˈlatto insa halaalu magansiˈrara assitinore ‘qaanganni’ gede assitino. (Zak. 6:14) Hatteente gede, Yihowa isira assineemmorenna leellinsheemmo baxille horo dihawanno. (Ibi. 6:10) Yihowa konne coye hegere geeshsha qaaganno.
19. Zakkaariyaasi laino ajuuja maa assineemmo gede kakkayissannonke?
19 Konni goofimarchu dirira, Yihowa daga loossinohu dhagge ikkanno coyi, Isi maassiˈranni noonketanna Massagaanchinke Kiristoosi ikkinota leellishanno. Salaametenni hegerera teesse heedhanno dirijjite miilla ikkankenni tashshi yaannonke. Yihowa halaalu magansiˈra daafira hedinori “woˈmanno.” Yihowa daga mereero nooˈne bayicho naadde, hattono Maganiˈne Yihowara ‘hajajamme.’ Hatto assitinoro, Mootenna Kakkalaanote Biilo ikkinohu Yesuusi, hattono iimi saragalla guluffinori agartannoˈne. Halaalu magansiˈra irkisate dandaamiˈnere baala asse. Hatto assitiniro, olantote mootichi Yihowa, tenne gatte noote shiima yanna giddono ikko hegerera salaametenni teessine heedhinanni gede assannoˈne!
^ GUFO 11 Tenne daafira ledde afate, Birra 1, 2015nite Agarooshshu Shaera qoola 10-11 nooha “Nabbawaano Xaˈmitanno Xaˈmo” yaanno birxicho lai.