1, 2. Índo̱ gaʼyee Zacarías niguámbóo ndiʼyoo juwan visión, xú káʼnii ninindxu̱u̱ xkujndu rí niraʼníí judios bi̱ nikuwa náa Jerusalén rá.

ÍNDO̱ gaʼyee Zacarías niguámbóo ndiʼyoo rí maʼni juwan visión, nigiʼdoo mbaʼa rí mandxaʼwáminaʼ. Rí nikudaminaʼ Jeobá rí maxnúu castigo bi̱ nuni kuʼwáʼ mbáa rígi̱ niʼni rí maxnúu tsiakii. Mú ikháá má rígá. Mbaʼin nuni kúwáʼ má xúʼko̱ ga̱jma̱a̱ nuni eʼwáʼ dí ra̱májánʼ. Ma̱ngaa, bi̱ ni̱ndxu̱ún judíos xóo tseguámbu̱u̱n runi̱i̱ templo ndrígóo Jeobá. Náa numuu niniñaaʼ mbá nacha̱ ñajunʼ rí Dios nixnún muni xá. Lá nitangi̱i̱n náa ku̱búnʼ mú mbuyáaʼ rí makuwá májánʼ xá.

² Zacarías ndiʼyoo májánʼ rí judíos bi̱ nitangi̱i̱n náa Jerusalén niguáʼdáá fe náa Jeobá. Náa Biblia naʼthí rí “Dios bi̱ gajkuwiin nixkaxi̱i̱n” judíos mu muniñaʼ xóo kuwaa náa guʼwún ma̱ngaa ñajunʼ ndrígu̱ún (Esd. 1:2, 3, 5). Niniñaaʼ mbá ku̱ba̱ʼ náa nuniʼnuʼ májánʼ mu magún náa mbá ku̱ba̱ʼ rí nimbáa tseniʼnuʼ nditháan. Rí muni̱i̱ templo ndrígóo Dios gíʼdoo wéñuʼ numuu náa ikhiin, rí asndu nindúún matangi̱i̱n mbá 1,600 kilómetros náa mbá ku̱ba̱ʼ gamíi wéñuʼ.

3, 4. Ndiéjunʼ xkujndu niraʼníí judíos bi̱ nitangi̱i̱n náa Jerusalén rá.

³ Índo̱ nagun kamba̱a̱, bi̱ judíos nindxa̱ʼwa̱a̱ má xúʼko̱ edxu̱ún xú káʼnii ganindxu̱u̱ Jerusalen, náa makuwa. Nidxawíín rí xuajen  ninindxu̱u̱ mitsaan wéñuʼ. Ga̱jma̱a̱ xa̱bu̱ guanii ndiyáá rí templo ninindxu̱u̱ mitsaan wéñuʼ (Esd. 3:12). Á mu ikháánʼ ni̱jkua̱ gajmiúlú, xú káʼnii gakumulú índo̱ guʼyáá timbá aʼphu̱ Jerusalén rá. Lá makuwáanʼ gíná índo̱ gúʼyáá rí xúgíʼ dí nirígá niguámbáa ga̱jma̱a̱ i̱ndó iná nikráʼáan ráʼ. Lá muʼni mbrigui xtátsí ndrígóo Babilonia ga̱jma̱a̱ xtátsí ndrígóo Jerusalén, rí niguámbáa ma̱ngaa rí imbóó iñáʼ tima náa xkrugua ga̱jma̱a̱ náa torres ráʼ. Mú bi̱ judíos takanajkhúnʼ, numuu rí ndiyáá rí niñewu̱u̱n ga̱jma̱a̱ nimbáñun Jeobá náa xúgíʼ kamba̱a̱ náa nigúun. Timbá rí nini índo̱ niguánu ninindxu̱u̱ mbá altar náa nigi̱ʼi̱ templo nákha ginii. Ikhí nigi̱ʼdi̱i̱ nixnaxi̱ tsigijñaʼ náa Jeobá xúgíʼ mbiʼi (Esd. 3:1, 2). Nadxún wéñuʼ rí nakujmaa rí nimbá xáʼngo̱o̱ gaʼni rí makawabiinʼ.

⁴ Ma̱ngaa rí muni templo, bi̱ israelitas gíʼmaa muʼni májáánʼ xuajñún. Gíʼmaa muni guʼwún ga̱jma̱a̱ rí mudu mu muxniʼtsún bi̱ kuwa náa guʼwún (Esd. 2:70). Rígá mbaʼa wéñuʼ rí maguma. Mú, xa̱bu̱ sia̱nʼ ndrígu̱ún ninimijna mu mutsiji̱i̱ ñajunʼ. Nákha ginii, bi̱ israelitas tuniña̱a̱nʼ ruñajunʼ. Mú ga̱jma̱a̱ numuu rí nini xa̱bu̱ sia̱nʼ ndijyúuʼ gu̱wa̱ʼ nítsu tsiguʼ, ga̱jma̱a̱ ikhiin mañu mañu ni̱jkha̱ rakanajkhúnʼ (Esd. 4:1-4). Rí itháan ra̱májánʼ niʼni, nákha tsiguʼ, 522 tsiguʼ ginii, índo̱ rey Persia niʼtáñajunʼ rí mawiji̱ xúgíʼ ñajunʼ rí naguma náa Jerusalén. Nakujmaa rí nditháan xáguma̱a̱ xuajen (Esd. 4:21-24).

5. Ndiéjunʼ niʼni Jeobá mu maxnúu tsiakii xuajñu rá.

⁵ Jeobá ndiʼyoo rí ndiñúnʼ judíos. Ikha jngó, nixnúu mbaʼyoo Zacarías rí iwáá visión mu masngájmuu rí gajkhun nandoo kaʼñún ga̱jma̱a̱ nixnáa núma̱aʼ ga̱jma̱a̱ numuu xúgíʼ rí nini. Ma̱ngaa nindoo rí mbuyáá rí á mu natangi̱i̱n muni ñajunʼ rí nijuixnún, ikhaa má gáñewu̱u̱n. Ga̱jma̱a̱ numuu Zacarías, nikudaminaʼ ga̱jma̱a̱ numuu rí maguma̱a̱ templo: “Gíʼdoo rí marigá... á mu ikháanʼ nudxawíín aʼwóo Jeobá Dios ndrígála” (Zac. 6:15).

6. a) Xú káʼnii egiʼdu̱u̱ rí ma’ni migiñuʼ visión ndrígóo Zacarías rá. (Atayáá timbá xtiʼkhu.) b) Náa numuu rí mixtiʼkhu color nindxu̱u̱ wáyú rá.

⁶ Rí maʼni migiñuʼ visión ndrígóo Zacarías naʼni itháan gujkhuʼ fe ndrígúlú (atraxnuu Zacarías 6:1-3). * Guʼnimíjna̱ mbuʼyáá dí ndiʼyoo gaʼyee: A̱jkhui̱i̱n carros nakujmaa rí kuwa xawii mu muxmijná, nagájnún nacha̱ wéñuʼ náa a̱jma̱ kúbá rí nindxu̱u̱ cobre. Wáyú bi̱ nuxmajtaa carros mixtiʼkhu color ni̱ndxu̱ún, rígi̱ naʼni rí xáʼni mingíjyúuʼ ma̱ta̱ya̱a̱ xú káʼnii mixtiʼkhu nindxu̱u̱ carros. Zacarías naraxi: “Tátá, ndiéjunʼ ñajunʼ rígi̱ rá.” (Zac. 6:4.) Numuu rí visión rígi̱ gíʼdoo wéñuʼ numuu náa ikháanʼlu, ma̱ngaa nuraximíjná ndiéjunʼ eyoo gáʼthúu̱n.

7, 8. a) Ndiéjunʼ eyoo gáʼthúu̱n nájma̱ kúbá rá. b) Náa numuu rí kúbá kiʼni ga̱jma̱a̱ cobre rá.

⁷ Náa Biblia naʼthí rí kúbá ma̱ndoo mani̱ndxu̱u̱ reinos o Xa̱bu̱ Ñajunʼ. Rí naʼthí náa visión ndrígóo Zacarías ikháá má kayúʼ nájma̱ kúbá rí niʼtáriyaʼ Daniel. Mbóʼ nindxu̱u̱ náa maʼtáñajunʼ Jeobá kámuu mbiʼi. Imbo̱ʼ nindxu̱u̱ Reino mesiánico, rí gajkuáa ñawúunʼ Jesús (Dan. 2:35, 45). Asndu nákha nákha tsiguʼ 1914 nigi̱ʼi̱ Jesús mu maʼtáñajunʼ, nájma̱ kúbá rígi̱ wájun mbóó ga̱jma̱a̱ guáʼdáá mbá ñajunʼ rí gíʼdoo numuu rí xóo mambanúu rí nandoo Dios náa tsu̱du̱u̱ Ku̱ba̱ʼ.

⁸ Náa numuu rí kiʼni ga̱jma̱a̱ cobre rá. Xó má oro, cobre gíʼdoo wéñuʼ numuu. Jeobá nikuʼma rí majmaa ajua̱nʼ rí naxpíbiʼ rígi̱ náa niguma tabernáculo ga̱jma̱a̱ náa templo ndrígóo Jerusalén (Éx. 27:1-3; 1 Rey. 7:13-16). Ikha jngó, rí nájma̱ kúbá rí najmaa xóo xkri̱da rí kiʼni ga̱jma̱a̱ cobre naʼni marmáʼáan a̱jkiu̱lú rí itháan májánʼ nindxu̱u̱ rí Jeobá maʼtáñajunʼ ga̱jma̱a̱ Reino mesiánico, maʼni rí xa̱bu̱ makuwa májánʼ ga̱jma̱a̱ maguma tsajkurámiinʼ wéñuʼ.

9. Tsíin ni̱ndxu̱ún bi̱ nagún ku̱ñu̱u̱n carro, ga̱jma̱a̱ ndiéjunʼ ñajunʼ guáʼdáá xá.

 ⁹ Ndiéjunʼ eyoo gáʼthúu̱n carros ga̱jma̱a̱ bi̱ nagún ku̱ñu̱u̱n rá. Bi̱ nagún ku̱ñu̱u̱n carros ni̱ndxu̱ún ángeles, mbáa bugi̱ kuwa náa mbaʼa grupo (atraxnuu Zacarías 6:5-8). * Nagájnún “náa inuu Tátá bi̱ kaʼyoo xúgíʼ ku̱ba̱ʼ” ga̱jma̱a̱ mbá ñajunʼ kiejunʼ. Ndiéjunʼ nindxu̱u̱ rá. Nuxuʼmiin magún náa kaʼñún mu muñewa̱a̱n xuajñu Jeobá náa xa̱bu̱ sia̱nʼ, itháan náa xuajen Babilonia, “ku̱ba̱ʼ dí rígá xígií náa norte”. Jeobá mbaʼyoo májánʼ rí xa̱bi̱i̱ xágutangi̱ín makuwá mbu̱júu̱ xóo ñumbáá náa Babilonia. Mbáa rígi̱ niʼni maʼni̱i̱ a̱jkiu̱ún mbaʼin bi̱ nini̱i̱ templo nákha nixtáa Zacarías. Nikumu̱ún gajkhun rí xa̱bu̱ sia̱nʼ xáʼngu̱u̱n gurikhún.

10. Ndiéjunʼ eʼyáá ga̱jma̱a̱ numuu rí niʼtáriyaaʼ Zacarías ga̱jma̱a̱ numuu carros ma̱ngaa bi̱ nagún ku̱ñu̱u̱n carros rá.

¹⁰ Xó má nirígá nákha nixtáa Zacarías, Jeobá bi̱ gíʼdiin mbaʼin ejércitos najmiuu má xúʼko̱ ángeles mu muñewa̱a̱n ga̱jma̱a̱ maʼni gujkhuʼ xuajñu (Mal. 3:6; Heb. 1:7, 14). Asndu nákha tsiguʼ 1919 Israel bi̱ niraʼwíin Dios nánguá nikuwa xóo ñumbáá ndrígóo Babilonia ri ñajunʼ xuajin apa, religión rí gajkhun na̱jkha̱ ra̱ja̱a̱ má xúʼko̱ maski ajndu xa̱bu̱ sia̱nʼ nuni gíníi (Rev. 18:4). Ga̱jma̱a̱ numuu rí ángeles nuñawunlú, ragíʼmaa mamiñúlú rí xuajñu Dios matangi̱i̱n nákhi náa religión dí ragájkhun (Sal. 34:7). Nduʼyáá májánʼ rí xa̱bi̱i̱ Jeobá náa xúgíʼ numbaaʼ muʼni má xúʼko̱ ñajunʼ Dios ga̱jma̱a̱ gagi. Índo̱ nundxa̱ʼwa̱míjna̱ ga̱jma̱a̱ numuu rí niʼtáriyaaʼ Zacarías, kuwáanʼ májánʼ ga̱jma̱a̱ nañeunlú xkamixa ndrígóo nájma̱ kúbá rígi̱.

11. Náa numuu dí ragíʼmaa mamiñúlú índo̱ gúgíʼ muni gámbáa xuajñu Dios rá.

¹¹ Inuu má, políticos bi̱ kuwa náa numbaaʼ ndrígóo Satanás muruwamijná mu muni gámbáa xuajñu Dios (Ezeq. 38:2, 10-12; Dan. 11:40, 44, 45; Rev. 19:19). Rí niʼtáriyaʼ Ezequiel naʼthí rí tsiakii rígi̱ narugoo Ku̱ba̱ʼ asndu xóo du̱u̱n. Ma̱ngaa naʼthí rí kurúwíin wáyú ga̱jma̱a̱ asndu nakiʼníin wéñuʼ índo̱ mugíʼ muni gámbáa xuajñu Dios (Ezeq. 38:15, 16). * Lá gíʼmaa mamiñúlú ráʼ. Na̱nguá. Ejército ndrígóo Jeobá maxtáa ga̱jma̱á ni̱ndxu̱lú. Ikhú índo̱ marigá majphú mba̱a̱ gaʼkhu, ángeles ndrígóo Dios mañewu̱u̱n xa̱bi̱i̱, ikhiin muni gámbíin bi̱ tsíñún rí Jeobá maʼtáñajunʼ (2 Tes. 1:7, 8). ¡Ra̱ʼkhá tháán nagui̱i̱ gáʼni mbiʼi rúʼko̱! Mú tsáa eʼtáñajunʼ ejército ndrígóo Jeobá náa mekhuíí rá.

12, 13. a) Ndiéjunʼ eʼthúu̱n Jeobá Zacarías rá. b) Náa numuu eʼyáá rí xa̱bu̱ bi̱ nagumbiʼyuu “Makráʼáan” nandoo gáʼthúu̱n Jesús rá.

¹² I̱ndó Zacarías ndiʼyoo migiñuʼ visión rí na̱ʼkha̱ náa libro ndrígóo. Rí xúgi̱ rígá mbá rí naʼni náa inún eʼwíínʼ ga̱jma̱a̱ mbá rí maxnún tsiakii bi̱ kuwa runi̱i̱ templo ndrígóo Dios (atraxnuu  Zacarías 6:9-12). * Jeobá naʼthúu̱n rí maʼtámíjná ga̱jma̱a̱ Heldai, Tobiya ga̱jma̱a̱ Jedayá, bi̱ ndiʼkhún niguáʼnu bi̱ niguwáʼ náa Babilonia, ga̱jma̱a̱ mandu̱ʼu̱u̱n plata ga̱jma̱a̱ oro. Ga̱jma̱a̱ ajua̱nʼ rúʼko̱, gaʼyee gíʼmaa maʼni mbá “corona rí mitsaan wéñuʼ” (Zac. 6:11). Tsáa gáyá corona rúʼko̱ rá. Lá mbayá Xa̱bu̱ Ñajunʼ Zorobabel, bi̱ nixtáa náa xuajen chíʼgíʼ rí nigumbiʼyuu Judá ga̱jma̱a̱ bi̱ ni̱ʼkha̱ náa David ráʼ. Na̱nguá. Jeobá naʼthúu̱n Zacarías rí marígu corona náa edxu̱u̱ Josué bi̱ kayá edxu̱u̱ náa ndxajkun. Rígi̱ niʼniún tsiánguá xa̱bu̱ bi̱ ndiyáá.

¹³ Lá rígi̱ nandoo gáʼthúu̱n rí Josué bi̱ kayá edxu̱u̱ náa ndxajkun mani̱ndxu̱u̱ rey ráʼ. Na̱nguá. Ikhaa xándoo mani̱ndxu̱u̱ rey numuu rí tséʼkha̱ náa David. Rí marigu corona náa edxu̱u̱ nandoo gáʼthúu̱n rí magíʼnuu rey ga̱jma̱a̱ ndxajkun nda̱wa̱á bi̱ maxtáa kámuu bi̱ nagumbiʼyuu “Makráʼáan”. Tsáa numuu eʼthá rá. Náa Santas Escrituras nasngájma kaʼwu rí nindxu̱u̱ Jesucristo (Is. 11:1; Mat. 2:23).

14. Xú káʼnii ñajunʼ eʼni Jesús xóo rey ga̱jma̱a̱ bi̱ kayá edxu̱u̱ náa ndxajkun rá.

¹⁴ Jesús nindxu̱u̱ rey ga̱jma̱a̱ bi̱ kayá edxu̱u̱ náa ndxajkun, ga̱jma̱a̱ naʼtáñajúúnʼ ángeles ndrígóo Jeobá. Nañajunʼ wéñuʼ mu xuajñu Dios makuwa tsímáá náa numbaaʼ xkawiʼ rígi̱ (Jer. 23:5, 6). Inuu má rí maʼngo̱o̱ maʼni gajmíi̱n xuajen ga̱jma̱a̱ xúʼko̱ mayambáá mu masngájma rí Jeobá kaʼyoo maʼtáñajunʼ ga̱jma̱a̱ mañewu̱u̱n xa̱bi̱i̱ (Rev. 17:12-14; 19:11, 14, 15). Mú nákha xóó tséʼkha̱nú mbiʼi rúʼko̱, Jesús o “Makráʼáan” gíʼdoo mbá ñajunʼ mba̱a̱ rí maʼni.

15, 16. a) Tsáa eʼni̱i̱ májáánʼ congregación cristiana rí mbiʼi xúgi̱, ga̱jma̱a̱ xú káʼnii eʼni xá. b) Xú káʼnii gánindxu̱u̱ Ku̱ba̱ʼ índo̱ gámbóo raʼtáñajunʼ mbá Míí tsiguʼ Cristo rá.

¹⁵ Jesús raʼkháa i̱ndó nigi̱ʼi̱ xóo rey ga̱jma̱a̱ bi̱ kayá edxu̱u̱ náa ndxajkun, ma̱ngaa nikhánaa ñajunʼ rí maʼni “templo ndrígóo Jeobá” (atraxnuu Zacarías 6:13). * Nákha tsiguʼ 1919, niʼni ñajunʼ rígi̱ índo̱ niʼni kríyaaʼ xuajñu Dios náa Babilonia ri ñajunʼ xuajin apa ga̱jma̱a̱ maʼni̱i̱ congregación cristiana. Ma̱ngaa nigíʼ “ñumba tsi jmbi tsi majan indxaʼhuaminaʼ” mu maxná ikha náa ñajunʼ rí naguma náa rexo̱o̱ ku̱ba̱ʼ ndrígóo templo rí na̱ʼkha̱ náa Dios (Mat. 24:45). Jesús ma̱ngaa xtáa raʼni májáánʼ xuajñu Jeobá ga̱jma̱a̱ nambáyúu mu mbaʼyamajkuu Dios xó má gíʼmaa (Mal. 3:1-3).

¹⁶ Índo̱ Jesús gáxtáa raʼtáñajunʼ mbá Míí tsiguʼ, gajmíi̱n mbá 144,000 reyes ga̱jma̱a̱ ndxajkun mumbañún xa̱bu̱ bi̱ naguáju̱n jmbu mu ní xaguaʼdáá aʼkhá. Índo̱ gúni rígi̱, i̱ndó makuwá bi̱ mbuyamajkuíí Dios náa mbá Ku̱ba̱ʼ kaʼwu. Asndu ikhú rí xúgínʼ mbuyamajkuíí Jeobá.

17. a) Ndiéjunʼ niʼthún Jeobá judíos rá. b) Xú káʼnii nimbáñun ajngáa rúʼko̱ xá.

¹⁷ Xú káʼnii niʼni a̱jkiu̱ún judíos ga̱jma̱a̱ ajngáa ndrígóo Zacarías rá. Jeobá niʼthún rí makuwá májánʼ ga̱jma̱a̱ mañewu̱u̱n mu mambún muni̱i̱ templo, ga̱jma̱a̱ rígi̱ niʼni maxnún tsiakii mu mambún muni̱i̱ templo. Mú, xú káʼnii gáʼngu̱u̱n gúní xúgíʼ ñajunʼ á mu ni̱ndxu̱ún nguéjmi̱i̱n xá. Rí nimíñuun ga̱jma̱a̱ rí nini a̱jma̱ a̱jkiu̱ún nindáti̱ga̱a̱ índo̱ Zacarías niʼthí ajngáa rí Dios niʼthún. Ma̱ngaa rí nimbañúún xa̱bu̱ bi̱ niguájun jmbu xóo Heldai, Tobiya ga̱jma̱a̱ Jedayá, Dios niʼthí  rí mbaʼin mumbañún muni̱ “templo ndrígóo Jeobá” (atraxnuu Zacarías 6:15). * Ikha jngó judíos ndiyáá májánʼ rí Jeobá mambáñun. Ikha jngó, nigíʼdi̱i̱ niñajunʼ nacha̱ maski ajndu rey ndrígóo Persia na̱nguá nindoo maguma ñajunʼ rígi̱. Dios tájyúuʼ niʼni gámbóo xkujndu rúʼko̱ rí nindxu̱u̱ xóo mbá kúbá mba̱a̱ rí wíji̱ inún ikhiin. Ga̱jma̱a̱ nákha tsiguʼ 515 tsiguʼ ginii niguámbá niguma gáxi templo (Esd. 6:22; Zac. 4:6, 7). Mú, ajngóo ndrígóo Jeobá naʼthí ga̱jma̱a̱ numuu rí itháan mba̱a̱ rí xtáa rarígá mbiʼi xúgi̱.

18. Xú káʼnii embánuu rí mbiʼi xúgi̱ Zacarías 6:15 rá.

¹⁸ Mbaʼin wéñuʼ xa̱bu̱ rí mbiʼi xúgi̱ nuni ñajunʼ Dios. A̱jkiu̱ún naxkaxi̱i̱n muyambáá ga̱jma̱a̱ rí “gíʼdoo wéñuʼ numuu”, xóo mbiʼi ndrígu̱ún, mbújku̱ún ga̱jma̱a̱ tsiakii ndrígu̱ún (Prov. 3:9). Xúʼko̱ nuyambáá náa templo rí na̱ʼkha̱ náa Dios. Ga̱jma̱a̱ nduʼyáá májánʼ rí Jeobá ndaʼyoo rí gíʼdoo numuu rí xóo eyambáá ga̱jma̱a̱ rí naguajun jmbu. Garmáʼáan a̱jkiu̱lú ga̱jma̱a̱ numuu Heldai, Tobiya ga̱jma̱a̱ Jedayá bi̱ nixná rí majmaa mu maguma corona rí niʼni Zacarías. Corona rígi̱ nijmaa ‹niʼni marmáʼáan a̱jkiu̱ún› rí nixna mu muyambáá rí xóo mbuyamajkuíí Jeobá (Zac. 6:14). Xúʼko̱ má, Jeobá xambumuu nditháan rí nuʼni ga̱jma̱a̱ numuu ikhaa ga̱jma̱a̱ rí nandulúʼ kuʼyáá (Heb. 6:10).

19. Xú káʼnii gándoo gambáyulú ikháanʼ visión ndrígóo Zacarías rá.

¹⁹ Xúgíʼ rí eguma ga̱jma̱a̱ numuu rí mbuʼyamajkuíí Jeobá rí mbiʼi xúgi̱ nasngájma májánʼ rí Jeobá naʼni tsajkurámáánʼ ga̱jma̱a̱ ikha rí naxná Cristo. Ikháanʼ bi̱ ni̱ndxu̱lú xa̱bi̱i̱ Dios kuwáanʼ náa mbá xuajen májánʼ ga̱jma̱a̱ rí marigá kámuu. Rí nikudaminaʼ Jeobá maʼni náa xuajñu mambanúu, xó má niʼtáriyaʼ Zacarías. Ikha jngó, gangajulú ñajunʼ rí kuaʼdáá náa xuajñu Jeobá ga̱jma̱a̱ guʼdxawíín “aʼwóo Jeobá” Dios ndrígúlú. Á mu nuʼni, rey ndrígúlú ga̱jma̱a̱ bi̱ naxná ikha náa ndxajkun ga̱jma̱a̱ ángeles bi̱ nagún ku̱ñu̱u̱n carro muñewunlú. Guʼni xúgíʼ rí gándoo mu mumbayíí rí gajkhun. Xúʼko̱ makuwáanʼ gajkhun rí Jeobá bi̱ gíʼdiin mbaʼin ejércitos mañewu̱nlú índo̱ gáʼni iwáá mbiʼi rí mambáa xúgíʼ dí rígá náa numbaaʼ rígi̱ ga̱jma̱a̱ kámuu mbiʼi.