Kuda-karreta sira ho koroa ida proteje Ita
“Neʼe sei akontese duni se imi rona ba Jeová, imi-nia Maromak, nia lian.”—ZACARIAS (ZAKHARIA) 6:15.
KNANANUK: 17, 136
1, 2. Iha tempu Zacarias haree ninia vizaun ba dala hitu nia rohan, ema judeu nia situasaun iha tempu neʼebá oinsá?
BAINHIRA Zacarias nia vizaun ba dala hitu ramata ona, profeta neʼe hanoin kona-ba buat barak. Jeová fó garantia katak nia sei husu ema laran-aat sira atu hatán ba hahalok aat sira neʼebé sira halo. Ita bele fiar katak Jeová nia promesa neʼe hametin tebes Zacarias. Maibé iha tempu neʼebá, situasaun seidauk troka tanba ema barak sei halo nafatin hahalok aat no laran la moos. Jeová nia templu iha Jeruzalein mós seidauk ramata. Tanbasá mak ema judeu sira husik lalais serbisu importante neʼebé Jeová fó ba sira atu halo? Sira-nia objetivu atu fila ba Jeruzalein mak atu buka moris neʼebé diʼak liu ka lae?
2 Zacarias hatene katak ema judeu sira neʼebé fila ba Jeruzalein mak ema neʼebé adora Jeová. Sira mak ema neʼebé “Maromak loos book sira hotu nia laran” hodi husik hela sira-nia uma no negósiu iha Babilónia hodi fila ba Jeruzalein. (Esdras [Ezra] 1:2, 3, 5) Ba ema barak, sira muda husi fatin neʼebé sira toman ona hodi bá fali rai neʼebé sira nunka haree. Harii fali Jeová nia templu mak buat neʼebé importante tebes ba ema judeu sira-neʼe, tan neʼe ho sira-nia hakarak rasik, sira fila ba Jeruzalein hodi laʼo maizumenus kilómetru 1.600 liuhusi dalan neʼebé aat no perigu.
3, 4. Ema judeu sira neʼebé fila ba Jeruzalein hasoru susar saida deʼit?
3 Hanoin toʼok durante sira laʼo ba tempu naruk husi Babilónia ba Jeruzalein, sira iha tempu barak atu hanoin no koʼalia kona-ba sira-nia futuru iha Jeruzalein. Ita bele fiar katak ferik-katuas sira konta ona ba sira kona-ba iha tempu uluk Jeruzalein ho Jeová nia templu mak fatin neʼebé furak tebes. (Esdras [Ezra] 3:12) Se Ita mak laʼo hamutuk ho sira, Ita sente oinsá bainhira Ita foin haree Jeruzalein ba dala primeiru? Karik Ita sei sente triste hodi haree uma barak neʼebé aat ona nakonu ho duʼut no sidade nia moru sira aat hotu, portaun no riin aas hotu lakon ona. Karik neʼe bele halo Ita kompara fali ho Babilónia nia moru boot neʼebé forte tebes. Maibé ema judeu sira la sai laran-tun, tanbasá? Tanba durante sira halo viajen mai Jeruzalein, sira haree ona oinsá Jeová mak ajuda no proteje sira. Bainhira sira toʼo iha Jeruzalein, sira harii kedas altár ida iha templu nia fatin no hahú hasaʼe sakrifísiu ba Jeová loroloron. (Esdras [Ezra] 3:1, 2) Sira sai laran-manas tebes no prontu atu halo serbisu. Iha tempu neʼebá, ba sira, la iha buat ida mak bele halo sira laran-tun.
4 Bainhira ema judeu sira harii fali Jeová nia templu, sira mós presiza harii fali sira-nia sidade ho uma sira. Sira presiza halo toʼos hodi bele fó han ba sira-nia família. (Esdras [Ezra] 2:70) Sira bele sente halo serbisu sira-neʼe boot tebes ba sira. Lakleur, inimigu sira mai no koko hapara sira. Inimigu kontra sira ba tinan 15. Foufoun ema judeu sira-neʼe hamriik metin, maibé neineik-neineik sira komesa sai laran-tun. (Esdras [Ezra] 4:1-4) Tempu susar ida tan neʼebé sira hasoru mak iha tinan 522 molok Kristu. Neʼe mak tempu neʼebé liurai Pérsia bandu atu labele harii buat ida iha Jeruzalein. Buat sira-neʼe halo ita haree hanesan sidade neʼe nunka sei harii fali.—Esdras (Ezra) 4:21-24.
5. Oinsá mak Jeová ajuda ninia povu?
5 Jeová hatene duni katak ninia povu presiza kbiit no aten-brani. Tan neʼe, liuhusi vizaun ikus neʼebé Zacarias haree, Jeová fó fiar ba ema judeu katak nia hadomi sira no hafolin tebes sira-nia hakaʼas-an atu serbí nia. Nia promete ba sira katak, se sira fila fali ba serbisu, nia sei proteje sira. Kona-ba harii fali templu, Jeová hatete: “Neʼe sei akontese duni se imi rona ba Jeová, imi-nia Maromak, nia lian.”—Zacarias (Zakharia) 6:15.
TROPA HUSI LALEHAN
6. (a) Zacarias nia vizaun ba dala ualu hahú ho saida? (Haree dezeñu iha pájina 26.) (b) Tanbasá mak kuda sira iha kór oioin?
6 Karik Zacarias nia vizaun ikus ba dala ualu mak vizaun neʼebé hametin duni fiar. (Lee Zacarias [Zakharia] 6:1-3. *) Koko imajina toʼok buat neʼebé Zacarias haree. Husi foho riti rua nia leet mosu kuda-karreta haat. Kuda sira neʼebé kór oioin mak dada karreta. Neʼe halo fasil atu hatene sira neʼebé lori kuda-karreta. Zacarias husu: “Neʼe saida?” (Zacarias [Zakharia] 6:4) Ita mós hakarak hatene, tanba vizaun neʼe kona ita hotu.
Jeová uza nafatin ninia anju sira atu proteje no hametin ninia povu
7, 8. (a) Foho rua reprezenta saida? (b) Tanbasá mak foho sira-neʼe halo husi riti?
7 Iha Bíblia, foho bele reprezenta ukun ka governu sira. Foho sira neʼebé Zacarias haree mak atu hanesan ho foho rua neʼebé ita lee husi Daniel nia profesia. Foho ida reprezenta Jeová nia ukun ba lalehan no rai neʼebé rohan-laek, no foho ida seluk reprezenta Mesias nia Ukun husi Liurai Jesus. (Daniel 2:35, 45) Husi tempu neʼebé Jesus sai Liurai iha tinan 1914, foho rua neʼe apoia malu no halaʼo knaar espesiál ida hodi halo Maromak nia hakarak atu sai loos iha rai.
8 Tanbasá mak foho rua neʼe halo husi riti? Riti mak besi neʼebé iha folin-boot no nabilan. Iha tempu uluk, Jeová mós haruka ema Izraél atu uza riti bainhira harii tabernákulu no Jeruzalein nia templu. (Êxodo [Keluaran] 27:1-3; 1 Reis [Raja-Raja] 7:13-16) Tanba foho sira-neʼe halo husi riti, neʼe hatudu katak Jeová nia ukun ba lalehan no rai, no Mesias nia Ukun mak diʼak tebes neʼebé sei halo ema sente seguru no lori bensaun oioin.
9. Sé mak sira neʼebé lori kuda-karreta, no sira iha knaar saida?
9 Kuda-karreta ho sira neʼebé lori reprezenta saida? Sira reprezenta anju, karik anju lubun ida-idak. (Lee Zacarias [Zakharia] 6:5-8. *) Sira sai husi “Naʼi ba mundu tomak nia oin” ho knaar espesiál ida. Anju sira hetan knaar atu bá fatin ida-idak. Sira-nia responsabilidade mak atu proteje Maromak nia povu, liuliu husi Babilónia, “rai parte norte”. Liuhusi vizaun neʼe Jeová fó-hatene ba ninia povu katak sira sei nunka sai atan tan ba Babilónia. Ita bele fiar katak Zacarias nia vizaun fó kmaan tebes ba badain sira neʼebé atu harii templu! Sira hatene katak sira-nia inimigu sei la bele hapara sira.
10. Oinsá mak Zacarias nia profesia kona-ba kuda-karreta ho sira neʼebé lori ajuda ita ohin loron?
10 Ohin loron, Jeová uza nafatin ninia anju sira atu proteje no hametin ninia povu. (Malaquias [Maleakhi] 3:6; Ebreu 1:7, 14) Husi tinan 1919, iha tempu neʼebé Jeová nia povu sai livre husi Babilónia Boot, adorasaun neʼebé loos sai buras ba beibeik no habelar ba fatin oioin maski hetan kontra makaʼas husi inimigu sira. (Apokalipse 18:4) Inimigu sira la hetan susesu tanba anju sira mak proteje hela Jeová nia organizasaun. Tan neʼe ita la presiza taʼuk katak, relijiaun falsu sei domina tan Jeová nia povu. (Salmo [Mazmur] 34:7) Ita bele fiar katak Maromak nia atan iha mundu tomak sei kontinua laʼo ba oin iha dalan espirituál tanba Zacarias nia vizaun ajuda ita atu komprende katak foho rua mak fó seguransa no proteje hela ita.
11. Tanbasá mak ita la presiza taʼuk bainhira inimigu ataka Maromak nia povu?
11 Lakleur tan forsa polítiku husi Satanás nia mundu sei serbisu hamutuk atu koko halakon Maromak nia povu. (Ezequiel [Yehezkiel] 38:2, 10-12; Daniel 11:40, 44, 45; Apokalipse 19:19) Iha Ezequiel nia profesia hatete katak forsa sira-neʼe mai nadodon hanesan kalohan taka rai. Sira mai ho kuda no hirus makaʼas atu ataka Maromak nia povu. (Ezequiel [Yehezkiel] 38:15, 16) * Ita presiza taʼuk ba sira ka lae? Lae duni! Tanba ita iha Jeová nia tropa hamutuk ho ita. Iha tempu terus boot, Jeová nia anju sira sei proteje Jeová nia povu no halakon ema hotu neʼebé kontra Jeová nia ukun. (2 Tesalónika 1:7, 8) Maibé sé mak atu dirije Maromak nia tropa husi lalehan neʼe?
JEOVÁ TAU KOROA BA NINIA LIURAI NO AMLULIK
12, 13. (a) Tuirmai Jeová haruka Zacarias atu halo saida? (b) Oinsá mak ita hatene katak ema neʼebé naran Dikin reprezenta Jesus Kristu?
12 Zacarias mesak mak haree vizaun ualu hotu. Maibé ema seluk sei haree buat neʼebé nia atu halo tuirmai no neʼe sei fó laran-manas ba sira neʼebé harii daudauk Maromak nia templu. (Lee Zacarias [Zakharia] 6:9-12. *) Jeová haruka nia atu kobra osan-mutin no osan-mean husi mane naʼin-tolu neʼebé mai husi Babilónia no uza buat sira-neʼe atu halo “koroa” kmanek ida. Mane sira-neʼe mak Heldai, Tobias, no Jedaias. (Zacarias [Zakharia] 6:11) Koroa neʼe atu fó ba Zorobabel ka lae, Governadór neʼebé mai husi suku Judá husi David nia umakain? Lae. Jeová haruka Zacarias atu tau koroa neʼe ba Amlulik Boot Josué nia ulun. Karik neʼe halo ema sira neʼebé haree sai hakfodak.
13 Koroa neʼe halo Josué atu sai Amlulik Boot no liurai ka lae? Lae, tanba Josué la mai husi David nia umakain, tan neʼe nia la iha direitu atu sai liurai. Tuir loloos nia simu koroa neʼe atu reprezenta buat neʼebé amlulik no liurai rohan-laek sei halo iha futuru, ninia naran mak Dikin. Bíblia esplika katak Dikin neʼe mak Jesus Kristu.—Isaías (Yesaya) 11:1; Mateus 2:23. *
14. Jesus sei halo saida nuʼudar Liurai no Amlulik Boot?
14 Jesus mak kaer pozisaun rua nuʼudar Liurai no Amlulik Boot. Nia mak dirije Jeová nia tropa anju sira no serbisu makaʼas hodi proteje Maromak nia povu iha mundu aat neʼe. (Jeremias [Yeremia] 23:5, 6) Lakleur tan Jesus sei halakon nasaun hotu atu apoia Maromak nia ukun no hodi proteje ninia povu. (Apokalipse 17:12-14; 19:11, 14, 15) Maibé antes loron neʼe toʼo mai, Jesus, ka Dikin sei iha serbisu importante ida atu halo.
NIA SEI HARII TEMPLU
15, 16. (a) Serbisu harii no hamoos saida mak halaʼo iha tinan 1919, no sé mak halo serbisu neʼe? (b) Toʼo tiha Kristu nia Ukun ba Tinan Rihun Ida nia rohan, mundu sei sai oinsá?
15 Nuʼudar Liurai no Amlulik, Jesus mós simu knaar atu “harii Jeová nia templu”. (Lee Zacarias [Zakharia] 6:13. *) Jesus nia serbisu harii neʼe inklui mós halo Maromak nia povu sai livre husi relijiaun falsu, ka Babilónia Boot nia liman iha tinan 1919. Iha tempu neʼebá nia harii fali kongregasaun kristaun no foti “atan laran-metin no matenek”. Irmaun sira neʼebé sei ukun hamutuk ho Kristu mak serbí iha grupu neʼe no sira mak tau matan ba serbisu importante neʼebé halaʼo daudauk iha Jeová nia templu espirituál parte rai nian. (Mateus 24:45) Jesus mós hamoos daudauk Maromak Jeová nia povu no ajuda sira atu bele adora Jeová iha dalan neʼebé moos.—Malaquias (Maleakhi) 3:1-3.
16 Jesus hamutuk ho ema naʼin–144.000 neʼebé serbí nuʼudar liurai no amlulik sei ukun ba tinan rihun ida. Iha tempu neʼebé sira ukun, sira sei ajuda ema neʼebé laran-metin atu sai perfeitu fali. Bainhira sira halaʼo kompletu ona sira-nia serbisu neʼe, ema neʼebé moris iha rai mak ema neʼebé adora deʼit Jeová. Ikusmai adorasaun neʼebé loos sei harii duni iha mundu tomak!
HOLA PARTE IHA SERBISU HARII NIAN
17. Jeová fó laran-manas saida ba ema judeu sira, no Jeová nia liafuan book sira hodi halo saida?
17 Ema judeu sira sente oinsá kona-ba Zacarias nia mensajen iha tempu neʼebá? Jeová promete ona katak nia sei ajuda no proteje sira hodi sira bele harii templu neʼe toʼo ramata. Jeová nia promesa neʼe fó esperansa ba sira. Maibé karik sira sei duvida nafatin kona-ba oinsá mak ema uitoan deʼit bele halaʼo serbisu neʼe. Tan neʼe Zacarias hatete ba sira katak iha buat ida bele halakon sira-nia taʼuk no duvida. Jeová dehan katak, laʼós Heldai, Tobias, no Jedaias deʼit mak sei ajuda, ema seluk mós sei “mai hodi hola parte atu harii Jeová nia templu”. (Lee Zacarias [Zakharia] 6:15. *) Ema judeu sira fiar katak Jeová mak fó apoiu ba sira-nia serbisu. Ho aten-brani sira fila fali hodi harii templu maski liurai Pérsia bandu atu labele halo serbisu neʼe. Bandu neʼe sai hanesan foho boot ida ba sira-nia dalan, maibé lakleur Jeová hasai tiha foho neʼe. Ikusmai templu neʼe ramata duni iha tinan 515 molok Kristu. (Esdras [Ezra] 6:22; Zacarias [Zakharia] 4:6, 7) Maibé Jeová nia liafuan mós koʼalia kona-ba buat boot liu neʼebé sei akontese iha ita-nia tempu.
Jeová nunka haluha kona-ba domin neʼebé ita hatudu ba nia! (Haree parágrafu 18, 19)
18. Oinsá mak Zacarias 6:15 sai loos daudauk iha ita-nia tempu?
18 Ohin loron, iha ema naʼin millaun ualu liu mak adora Jeová. Sira-nia laran book sira atu uza “sasán neʼebé folin-boot” hanesan sira-nia tempu, forsa, no sasán sira atu apoia harii Jeová nia templu espirituál. (Provérbios [Amsal] 3:9) Ita bele fiar katak Jeová hafolin tebes apoiu neʼebé ita fó ba nia. Hanoin-hetan katak Heldai, Tobias, no Jedaias lori sira-nia osan-mutin no osan-mean ba Zacarias hodi halo sai koroa ida. No koroa neʼe mak “fó-hanoin” kona-ba kontribuisaun neʼebé sira fó atu apoia adorasaun neʼebé loos. (Zacarias [Zakharia] 6:14) Sin, Jeová nunka haluha kona-ba serbisu neʼebé ita halo no domin neʼebé ita hatudu ba nia.—Ebreu 6:10.
19. Oinsá mak Zacarias nia vizaun kona ita-nia moris?
19 Iha loron ikus sira-neʼe Jeová nia povu halo ona serbisu importante barak. Ida-neʼe hatudu duni katak Jeová mak haraik bensaun no Kristu mak dirije Maromak nia povu. Ita haksolok tebes hodi bele sai parte ba organizasaun ida neʼebé metin, seguru, no dura ba nafatin, no ita hatene katak Jeová nia hakarak kona-ba adorasaun neʼebé moos sei sai loos. Tan neʼe, hafolin nafatin Ita-nia parte iha Jeová nia povu nia leet no ‘rona ba Jeová, ita-nia Maromak, nia lian’. Hodi halo nuneʼe mak ita-nia Liurai no Amlulik Boot ho anju sira bele proteje Ita. Hakaʼas an atu kontinua fó apoiu ba adorasaun neʼebé loos, no Jeová sei fó protesaun ba Ita toʼo mundu aat neʼe ramata, no ba nafatin!
^ par. 6 Zacarias 6:1-3 1 Dala ida tan haʼu foti matan no haree kuda-karreta haat halai mai daudaun husi foho rua nia leet, no foho sira-neʼe mak riti. 2 Kuda mean sira mak dada kuda-karreta primeiru, no kuda metan sira mak dada kuda-karreta segundu. 3 Kuda mutin sira mak dada kuda-karreta terseiru, no kuda sira neʼebé makerek no kór oioin mak dada kuda-karreta ida ikus.
^ par. 9 Zacarias 6:5-8 5 Anju neʼe hatán mai haʼu: “Neʼe mak espíritu haat husi lalehan neʼebé hamriik ona iha Naʼi ba mundu tomak nia oin no agora sira sai mai daudaun. 6 Kuda-karreta neʼebé kuda metan sira dada, halai daudaun ba rai parte norte; kuda-karreta neʼebé kuda mutin sira dada, halai daudaun ba tasi sorin; no kuda-karreta neʼebé kuda makerek sira dada, halai daudaun ba rai parte súl. 7 No kuda sira kór oioin hakarak tebes atu laʼo haleʼu mundu tomak.” Tuirmai nia dehan: “Bá, laʼo haleʼu mundu tomak.” No sira komesa laʼo haleʼu mundu tomak. 8 Tuirmai nia koʼalia mai haʼu, hodi dehan: “Haree bá, kuda sira neʼebé halai ba rai parte norte halo Jeová la hirus tan ba rai neʼe.”
^ par. 11 Bele haree informasaun liután iha Livru Haklaken, 15 Maiu 2015, pájina 29-30, iha “Pergunta husi lee-naʼin”.
^ par. 12 Zacarias 6:9-12 9 Jeová koʼalia tan ba haʼu, hodi dehan: 10 “Foti buat sira neʼebé Heldai, Tobias, no Jedaias lori husi povu neʼebé sai dadur; no iha loron neʼebá, ó tenke bá Sofonias nia oan-mane Josias nia uma, hamutuk ho mane sira-neʼe neʼebé mai husi Babilónia. 11 Ó tenke foti osan-mutin ho osan-mean hodi halo koroa ida no tau neʼe iha Jeozadak nia oan-mane Josué nia ulun, neʼebé nuʼudar amlulik boot. 12 No hatete ba Josué: “‘Jeová neʼebé ukun tropa lalehan nian, dehan nuneʼe: “Neʼe mak mane neʼebé naran Dikin. Nia sei moris iha ninia fatin, no nia sei harii fali Jeová nia templu.
^ par. 13 Liafuan “Nazaré” mai husi liafuan ebraiku “dikin”.
^ par. 15 Zacarias 6:13 Nia sei harii Jeová nia templu, no nia sei hetan dignidade. Nia sei tuur iha ninia kadunan hodi ukun, no nia mós sei sai nuʼudar amlulik iha ninia kadunan, no nia sei halo knaar rua neʼe atu haburas dame.
^ par. 17 Zacarias 6:15 No ema sira neʼebé hela iha fatin dook sei mai hodi hola parte atu harii Jeová nia templu.” Ho ida-neʼe, imi sei hatene katak Jeová, ukun-naʼin ba tropa lalehan nian, mak haruka haʼu ba imi. No neʼe sei akontese duni se imi rona ba Jeová, imi-nia Maromak, nia lian.’”
