1, 2. I te fakaotiotiga o te fitu o fakaasiga a Sakalia, se a te tulaga o te kau Iutaia i Ielusalema?

I TE taimi ko fakaotioti ei te fitu o fakaasiga a Sakalia, ne uke ‵ki a mea ne mafaufau ki ei a te pelofeta. Ne fakamaoni atu ne Ieova me ka fakasala ne ia a tino sē fakamaoni mō olotou faifaiga ma‵sei. E mautinoa eiloa me ne fakamalosi atu te folafolaga tenei ki a Sakalia. Kae e seai eiloa se mea ne ‵fuli. Koi tumau eiloa a faifaiga sē fakamaoni kae ma‵sei, kae ne seki taitai eiloa o palele a te ‵toe faitega o te faletapu o Ieova i Ielusalema. Ne mafai pefea o tiaki fakavave ne te kau Iutaia te lotou galuega mai te Atua? E mata, ne toe ‵foki atu latou ki te lotou fenua ke fakataunu fua olotou manakoga totino?

² Ne iloa ne Sakalia me i tino Iutaia kolā ne toe ‵foki atu ki Ielusalema ne tāgata mo fāfine fakatuanaki. Ko latou kolā ne “ulufia ne te agaga o te Atua” ke tiaki olotou fale mo pisinisi kolā ne fai pelā me ne kope fakaleoleo. (Esela 1:2, 3, 5) Ne tiaki ne latou se fenua telā ne masani latou i ei ko te mea ke toe ‵foki atu ki se koga telā kāti e seki lavea aka eiloa muamua ne latou. Moi ne seki tāua te ‵toe faitega o te faletapu o Ieova, penei ne seki fai ne latou te malaga faigata tenei telā kāti e 100 maila (1,600 km) te ‵mao i loto i vaopupu.

3, 4. Ne a mea faiga‵ta ne fe‵paki mo te kau Iutaia kolā ne ‵foki atu?

 ³ Ne ‵tau o pefea te faiga o te malaga tenā? I te taimi ne faima‵laga atu ei a te kau Iutaia, e mautinoa eiloa me ne mafau‵fau latou i te fia o itula ki olotou fale ‵fou. Ne lagona ne latou te gali o te fa‵kai o Ielusalema i aso mua. Ko oti ne lavea ne tino ma‵tua i a latou a te ‵malu mua o te faletapu. (Esela 3:12) Moi ne faimalaga atu koe mo latou, ne a ou lagonaga i te taimi ne kilo muamua atu ei koe ki Ielusalema, tou fale fou? E mata, ka fanoanoa koe i te taimi ne lavea ne koe a fale ne fakamaofagina ko ‵solo i ei a mouku? E mata, ka fakatusatusa ne koe a ‵pui tapolo ‵lasi o Papelonia ki ‵pui maofa o Ielusalema, mo vāga ‵lasi i koga ne ‵tu i ei a mataloa fiti mo faleleoleo maluga? Kae ne mafaufau faka‵lei eiloa a tino. Ko oti ne lavea ne latou a faifaiga faka‵sao a Ieova mō latou i te lotou malaga loa ki te lotou fenua. A te mea muamua ne fai ne latou i te lotou okoatuga ko te faitega o se fatafaitaulaga i te feitu o te faletapu mua, kae ne kamata o ofo atu olotou taulaga i aso katoa ki a Ieova. (Esela 3:1, 2) Ona ko te lotou fia‵fia i te kamataga, ne foliga mai me e seai eiloa se mea ne mafai o fakavāivāi atu ki a latou.

⁴ I tafa o te galuega ki te faletapu, ne ‵tau foki o toe faite ne te kau Isalaelu olotou fa‵kai. Ne ‵tau foki o faite olotou fale, ‵toki olotou fatoaga, kae fagai olotou tino. (Esela 2:70) Ne foliga faigata mai eiloa a galuega e ‵tau o fai ne latou. Kae ne oko atu eiloa a ‵tekeatuga—kolā ne faiga‵ta kae vave foki. E tiga eiloa ne ‵mautakitaki muamua latou, ne kamata eiloa o faigata ki a latou a te 15 tausaga o ‵tekeatuga. (Esela 4:1-4) Ne fakafesagai atu eiloa latou ki te fakalavelave muamua i te 522 T.L.M. i te taimi ne fakatapu ei ne te tupu o Pelesia a te faitega o Ielusalema. Ne foliga sē ‵lei mai eiloa a te tulaga o te fa‵kai tenā mō aso mai mua.—Esela 4:21-24.

5. Ne saga atu pefea a Ieova ki te sē ga‵lue o ana tino?

⁵ Ne iloa ne Ieova a mea e manakogina ne ana tino. Ne tuku atu ne te Atua a te ‵toe fakaasiga ki a Sakalia ke fakatalitonu atu ki te kau Iutaia e uiga ki Tena alofa mo te amanaia ne ia a mea katoa ko oti ne fai ne latou kae ke fakamaoni atu foki tena puipuiga ki a latou māfai e toe ‵foki atu latou o fai Tena galuega. I tafa o te ‵toe faitega o te faletapu, ne tauto atu a Ieova: “Ka taunu katoa a mea konei manafai e tausi faka‵lei koe ki fakatonuga a [Ieova] tou Atua.”—Saka. 6:15.

6. (a) Ne kamata pefea te valu o fakaasiga a Sakalia? (Onoono ki te ata i te kamataga.) (e) Kaia ne kese‵kese ei a ‵lanu o solofanua?

⁶ A te ‵toe fakaasiga a Sakalia mai i fakaasiga e valu kāti ko te ‵toe mea sili telā ne fakamalosi aka ei te fakatuanaki. (Faitau te Sakalia 6:1-3.) Fakaataata te tulaga tenei: Ne ulu mai ki tua a ‘kaliota e fa i te vāga o mauga kopa e lua,’ telā e fetaui ‵lei mō te taua. A solofanua kolā e ‵taki atu ei a kaliota e kese‵kese olotou ‵lanu. Ne fesoasoani mai i ei ke faka‵kese a tino faka‵tele mai i te suā tino. Ne fesili atu a Sakalia: “Se a te uiga o kaliota konei?” (Saka. 6:4) E fia iloa foki ne tatou me e pokotia tonu eiloa tatou i te fakaasiga tenei.

7, 8. (a) Ne a mea e fakaata mai i mauga e lua? (e) Kaia ne faite ei a mauga ki kopa?

⁷ I te Tusi Tapu, e mafai o fakaata mai i mauga a malo, io me ko pulega. A mauga i te tala a Sakalia e tai ‵pau mo mauga e lua kolā ne fakamatala mai i te valoaga a Tanielu. A te mauga e tasi e fakaata mai i ei a te pulega sili kae tumau a Ieova. A te suā mauga e fakaata mai i ei a te Malo faka-Mesia i lima o Iesu. (Tani. 2:35, 45) Talu mai te fakasopoga a Iesu i te ‵tau mafanafana o te 1914, ko oti ne faka‵tu aka a te avā mauga konā kae fai foki se tusaga tāua i te fakataunuga o te loto o te Atua i te lalolagi nei.

⁸ Kaia ne faite ei a mauga ki kopa? E pelā mo te aulo, a te kopa se fiti telā ne fakatāua  malosi. Ne fakatonu atu a Ieova me e ‵tau o fakaaoga a te fiti matilotilo tenei i te faitega o te faleie tapu kae fakamuli ifo ko te faletapu i Ielusalema. (Eso. 27:1-3; 1 Tupu 7:13-16) Se mea ‵lei, me e fakamasaua mai ne te kopa i mauga fakatusa e lua a te ‵lei katoatoa o te pulega sili a Ieova mo te Malo faka-Mesia, telā ka tuku mai i ei a te malosi ‵mautakitaki mo fakamanuiaga ki tino katoa.

9. Ko oi a tino faka‵tele i kaliota, kae se a te lotou galuega?

⁹ Nei la ke toe mafau‵fau tatou ki kaliota. Ko oi e fakaata mai i ei mo olotou tino faka‵tele? A tino faka‵tele i kaliota ne agelu, kāti se potukau io me ne kau agelu. (Faitau te Sakalia 6:5-8.) E ulu atu latou ki tua “mai mua o te Aliki o te lalolagi kātoa” ke fai se galuega fakapito. Se a te galuega ne tuku atu ke fai ne latou? Ne uga atu a kaliota mo olotou tino faka‵tele ke tausi atu ki se koga e tasi. A te lotou tiute ko te puipuiga o tino o Ieova, maise eiloa mai i te feitu ki “matū i Papelonia.” Ne fakamautinoa aka ne Ieova me e se toe fakapologa ne Papelonia ana tino. Ko oko eiloa te fakamafanafana atu o te mea tenei ki tino ne faite ne latou te faletapu i aso o Sakalia! Ne seki ‵tau o manava‵se latou ki te fakalavelave atu o olotou fili.

10. Se a te fakamaoniga e mafai o maua ne tino o te Atua i aso nei mai te valoaga a Sakalia e uiga ki kaliota mo olotou tino faka‵tele?

¹⁰ E pelā eiloa mo aso o Sakalia, koi fakaaoga eiloa ne Ieova o kautau ana agelu ke puipui kae fakamalosi atu ki ana tino. (Mala. 3:6; Epe. 1:7, 14) Talu mai eiloa te taimi ne fakasaoloto ei a Isalaelu mai te ‵nofo fakapagota i se auala fakatusa ki Papelonia te Sili, ne seki mafai o taofi aka te gasolo atu ki mua o te tapuakiga tonu faitalia a ‵tekemaiga tumau. (Faka. 18:4) Ona ko te puipuiga a te kau agelu, e se ‵tau o manava‵se tatou māfai ko ‵tau o toe fe‵paki a te fakapotopotoga a Ieova mo puapuaga faka-te-agaga. (Sala. 34:7) I lō te fai penā, e mafai o fakamautinoa aka ne tatou me ka tumau eiloa te gasolo aka o te malosi faka-te-agaga o tavini a te Atua. I te taimi e mafaufau ‵mafa ei tatou ki te fakaasiga a Sakalia, e se fakalotolotolua tatou me e saogalēmū tatou i malumaluga o te avā mauga konā.

11. Kaia e se ‵tau ei o manava‵se tatou māfai ko oso atu ki tino o te Atua?

¹¹ Ko pili eiloa o fakatu aka ne malo fakapolitiki i te lalolagi a Satani se potukau ke saga atu ki te fakaseaiga o tino o te Atua. (Eseki. 38:2, 10-12; Tani. 11:40, 44, 45; Faka. 19:19) E fakamatala mai i te valoaga a Esekielu a kautau e pelā me e ufi ne latou te laukele e pelā mo kaumana kae ‵tele mai mo te mata kaitaua i luga i solofanua. (Eseki. 38:15, 16) * E a, e isi se mea e ‵tau o manava‵se tatou ki ei? E seai lele eiloa! E isi se fesoasoani mai i ‵tou feitu. I te taimi faigata tenā i te fakalavelave lasi, ka ‵kau fakatasi a sotia agelu a Ieova o kautau ke puipui a tino o te Atua kae fakaseai atu a tino kolā e ‵teke atu ki tena pulega sili. (2 Tesa. 1:7, 8) Ko tafaga la te fakaofoofogia o te aso tenā! Kae ko oi ka takitaki ne ia te kautau faka-te-lagi a Ieova?

12, 13. (a) Se a te mea ne fai atu ki a Sakalia ke fai ne ia? (e) Fakamatala mai me i te tagata ne fakaigoa ki te Somo ko Iesu Keliso i se auala fakapelofeta.

¹² E valu a fakaasiga a Sakalia ne lavea tokotasi eiloa ne ia. Nei la, ko aofia a ia i se faifaiga fakapelofeta ke fai pelā me se fakamalosiga ki a latou kolā ko toe faite te faletapu  o te Atua. (Faitau te Sakalia 6:9-12.) Ne fai atu ki a Sakalia ke taetae mai a siliva mo aulo mai i a Heletai, Topita, mo Ietaia—ko tino ‵fou e tokotolu kolā ne fatoa ‵foki mai i Papelonia—kae ke faite se “kalauna” mai i meaalofa konā. (Saka. 6:11) E mata, ne fai atu ki a Sakalia ke tuku atu te kalauna ki te ulu o te Kovana ko Selupapelu mai te matakāiga o Iuta kae se tino foki ne tupu mai i a Tavita? Ikai. Kāti ne ‵tau o ‵poi a tino maimoa i te taimi ne tuku atu ei ne ia te kalauna ki luga i te Faitaulaga Sili, ko Iosua.

¹³ E mata, ne fai ei a te Faitaulaga Sili, ko Iosua, mo tupu? Ikai, a Iosua ne seki vau mai te lainā tupu o Tavita kae ne seki ‵tau o fai a ia mo fai te tupu. A te fakapeiga ki te kalauna se fakaasiga fakapelofeta, telā e fakasino atu ki te tupu mo te faitaulaga tumau i aso mai mua nei. A te faitaulaga sili telā ne fai mo tupu e taku ki te Somo. E fakaasi faka‵lei mai i te Tusi Tapu me i te Somo tenā ko Iesu Keliso.—Isa. 11:1, NW; Mata. 2:23.

14. Se a te galuega e fai ne Iesu e pelā me ko te Tupu mo te Faitaulaga Sili?

¹⁴ Ona ko tena fai mo Tupu mo te Faitaulaga Sili, a Iesu ko te takitaki o te kautau faka-te-lagi a Ieova. Ona ko te mea tenā, e galue eiloa a ia mo te loto fiafia ko te mea ke mafai tokagamalie a tino o te Atua e pelā me se potukau faitalia a te ola o latou i te kogaloto o te lalolagi saua tenei. (Iele. 23:5, 6) I se aso mai mua nei, ka takitaki ne Keliso a te fakatakavalega o atufenua i te ‵lago atu ki te pulega sili a te Atua mo te ‵puluga o tino o Ieova. (Faka. 17:12-14; 19:11, 14, 15) Kae koi tuai o fakaoko atu te fakasalaga, e isi se galuega lasi a te Somo e ‵tau o fai.

15, 16. (a) Se a te galuega ko te fakafouga mo te faka‵māga telā ko oti ne fai, kae ko oi ne fai ne ia? (e) Se a te mea ka iku mai i te fakaotiga o te Pulega a Keliso i te Afe Tausaga?

¹⁵ I tafa o tena galuega e pelā me ko te Tupu mo te Faitaulaga Sili, ne ‵tofi aka foki a Iesu ke “faite ne ia a te Faletapu” o Ieova. (Faitau te Sakalia 6:13.) I aso nei, e aofia i te galuega fakatūtū a Iesu a te fakasaolotoga o tino tapuaki ‵tonu mai i Papelonia te Sili kae toe fakafou aka te fakapotopotoga Kelisiano i te 1919. Ne ‵tofi aka foki ne ia a “te tavini fakamaoni kae poto” ke fai ne ia te takitakiga i te fakatonutonuga o te galuega i te lalolagi i te koga ateatea o te faletapu faka-te-agaga sili. (Mata. 24:45) Ne fakalavelave foki a Iesu i te faka‵māga o tino o te Atua kae fesoasoani atu ke tuku atu ne latou a te tapuakiga telā e ‵ma.—Mala. 3:1-3.

¹⁶ I te Afe Tausaga o te Pulega a Iesu, ka toe faka‵foki a tino fakamaoni katoa ki te tulaga ‵lei katoatoa ne Iesu mo ana tupu mo faitaulaga lagolago e toko 144,000. Kafai ko oti ne fakataunu te mea tenei, ka ‵toe mai fua a tino tapuaki ‵tonu a te Atua i te lalolagi ‵ma. Kae i te fakaotiga loa, ka toe fakafou katoatoa aka ei te tapuakiga tonu!

17. Se a te fakatalitonuga ne tuku atu ne Ieova mai tua ifo ki te kau Iutaia, kae ne pokotia pefea latou i tena fekau?

¹⁷ Ne pokotia pefea a te kau Iutaia i aso o Sakalia i tena fekau? Ne fakamautinoa aka ne Ieova ke fakatumau kae puipui te faiga o te lotou galuega. Kāti ne fakamalosi aka a fakamoemoega o tino loto vāi‵vai ne tena fakatalitonuga me ka toe faite te faletapu. Kae ka fakataunu pefea ne nai tino a galuega e uke katoa konei? A nisi pati a Sakalia ne ave keatea ei so se lagonaga mataku io me se lagonaga fakalotolotolua. I tafa o te ‵lago atu ki tino fakamaoni e pelā mo Heletai, Topita, mo Ietaia, e taku mai ne te Atua a nisi tino e tokouke kolā ne “o‵mai o fesoasoani ki te faitega o te Faletapu o [Ieova].” (Faitau te Sakalia 6:15.) Ona ko te loto tali‵tonu ki te fesoasoani o te Atua, ne gasue‵sue fakavave a te kau Iutaia kae toe kamata te lotou galuega fakatūtū faitalia te  fakatapuga. E seki leva kae ne fakagata atu ne Ieova a mea faiga‵ta o fakataputapuga a te malo e pelā me ne mauga, kae ne fakaoti ei te faitega o te faletapu i te 515 T.L.M. (Esela 6:22; Saka. 4:6, 7) Kae ne fakamatala mai i muna a Ieova a mea e sili atu mō ‵tou aso nei.

18. Ko fakataunu pefea te Sakalia 6:15 i ‵tou aso nei?

¹⁸ I aso nei, ko lau i miliona o tino ko ‵kau atu ki te tapuakiga tonu, kae ko fakaosofia olotou loto ke fakaaoga olotou kope “tafasili i te ‵lei,” kolā e aofia i ei olotou taimi, malosi, mo kope ke ‵lago atu ki te faletapu faka-te-agaga sili o Ieova. (Faata. 3:9) E mautinoa pefea i a tatou me e fakatāua malosi ne Ieova a te ‵tou ‵lago atu mo te fakamaoni? Masaua a Heletai, Topita, mo Ietaia kolā ne avatu ne latou a mea mō te kalauna telā ne faite ne Setekaia. Ne fai a te kalauna e pelā me se “mea fakamanatu,” io me se ‘fakamasauaga,’ o te lotou meaalofa ki te tapuakiga tonu. (Saka. 6:14) E penā foki loa, a te galuega mo te alofa e fakaasi atu ne tatou mō Ieova ka se mafai o puli i a ia. (Epe. 6:10) Ka tumau eiloa latou ki te se-gata-mai, kae fakatāua malosi foki latou i te mafaufau o Ieova.

19. E ‵tau o pokotia pefea tatou i aso nei i fakaasiga a Sakalia?

¹⁹ A mea katoa kolā ko oti ne fakataunu mō te tapuakiga tonu i aso fakaoti konei se fakamaoniga mautinoa o te fakamanuiaga a Ieova mo te takitakiga a Keliso. E fai tatou mo vaega o se fakapotoptooga telā e ‵mautakitaki, e tokagamalie, kae tumau. Ka “taunu” eiloa a te fuafuaga a Ieova e uiga ki te tapuakiga ‵ma. Fakatāua tou tulaga i va o tino o Ieova, kae “tausi faka‵lei koe ki fakatonuga a [Ieova] tou Atua.” E mafai ei o tumau koe mai lalo i te puipuiga a te ‵tou Tupu mo te Faitaulaga Sili mo tino faka‵tele kaliota i te lagi. Ke ‵lago katoatoa atu ki te tapuakiga tonu. Kafai e fai koe penā, e mafai eiloa o mautinoa me ka tausi koe ne Ieova o kautau i se auala saogalēmū kae tokagamalie i te ‵toega o taimi o te olaga masei tenei—kae penā foki eiloa ki te se-gata-mai!