1,2．撒迦利亚第七个异象结束嘅时候，当时喺耶路撒冷嘅犹太人处于点样嘅情况？

 第七个异象结束嘅时候，撒迦利亚先知有好多嘢要思考。耶和华已经作出保证，佢会使嗰啲唔诚实嘅人为自己嘅邪恶行为承担后果。呢个承诺肯定强化咗撒迦利亚。不过，当时嘅情况并冇任何改变。唔诚实同其他邪恶嘅行为仍然存在。喺耶路撒冷重建耶和华圣殿嘅工作唔知几时先可以完工。点解犹太人咁快就放弃佢哋嘅神圣职务呢？佢哋返翻故乡，唔通只系为咗自己嘅个人利益咩？

² 撒迦利亚知道，嗰啲重返耶路撒冷嘅男男女女都系有信心嘅犹太人。呢啲人“内心受上帝激动”，放弃佢哋喺巴比伦嘅生意同舒适嘅家。（以斯拉记1:2,3,5）佢哋要离开自己熟悉嘅环境，搬去一个佢哋大部分人从未见过嘅地方。如果佢哋唔重视耶和华圣殿嘅重建工作，就唔会踏上呢趟全程大约1600公里（1000英里），路途崎岖嘅艰苦旅程。

3,4．重返家园嘅犹太人面对乜嘢障碍？

 ³ 呢个系一趟点样嘅旅程呢？喺途中，呢啲犹太人肯定有好多时间去谂吓佢哋嘅新家园。佢哋听过耶路撒冷曾经系一个几咁美丽嘅城市。佢哋当中嗰啲最年长嘅人已经见过圣殿以前嘅荣美。（以斯拉记3:12）如果你同佢哋一齐，当第一眼见到新家园耶路撒冷嗰时，你会有乜嘢感觉呢？你睇到一片废墟，到处杂草丛生，会唔会感到哀伤难过呢？耶路撒冷嘅城墙破败不堪，曾经耸立城门同守望台嘅地方，而家得翻个大缺口。相比之下，巴比伦嘅双重城墙就又高大又坚固。犹太人并冇因为噉而灰心丧气。喺漫长嘅归家旅程中，佢哋已经见过耶和华亲手为佢哋施行拯救。佢哋到达之后做嘅第一件事就系，喺以前嘅圣殿旁边起个祭坛，开始每日向耶和华献上祭牲。（以斯拉记3:1,2）佢哋充满热情，干劲十足，睇起嚟冇乜嘢可以阻挡佢哋。

⁴ 除咗要重建圣殿，以色列人仲要重建佢哋嘅城市同房屋。为咗提供食物俾家人，佢哋要耕种田地。（以斯拉记2:70）佢哋前头好似有做唔晒嘅工作。好快，佢哋就面对猛烈嘅反对嘞。虽然起初佢哋意志坚定，但系经受咗15年嘅反对之后，佢哋慢慢变得心灰意冷。（以斯拉记4:1-4）公元前522年，波斯王禁止耶路撒冷嘅一切建造工程，呢个对佢哋嚟讲系一个沉重嘅打击。睇嚟耶路撒冷永远都冇机会重建。（以斯拉记4:21-24）

5．耶和华点样帮助佢嘅子民？

⁵ 耶和华清楚知道佢子民嘅需要。喺撒迦利亚嘅最后一个异象里面，耶和华表明佢真系好爱自己嘅子民，欣赏佢哋所付出嘅一切努力。耶和华亦都保证，如果犹太人重返岗位，就一定会保护佢哋。关于重建圣殿嘅工作，耶和华保证话：“如果你哋切实听从耶和华你哋上帝嘅话，呢一切就必然实现。”（撒迦利亚书6:15）

6．（甲）撒迦利亚第八个异象系点样开始嘅？（请睇吓课文开头嘅图片）（乙）点解马匹嘅颜色各不相同？

⁶ 撒迦利亚嘅第八个异象，即系最后一个，可能系最强化人信心嘅。（请读撒迦利亚书6:1-3）想象一下，四驾战车“从两座［铜］山之间”冲过嚟，似乎已经装备齐全，随时可以应战。拉战车嘅马匹颜色各不相同，噉样就可以区分驾车嘅人。撒迦利亚问：“呢啲系乜嘢？”（撒迦利亚书6:4）我哋都好想知道答案系乜嘢，因为呢个异象直接影响到我哋。

7,8．（甲）呢两座山象征乜嘢？（乙）两座山系铜嘅，有乜嘢含意呢？

⁷ 喺圣经入面，山可以用嚟代表王国或者政府。撒迦利亚描述嘅山同但以理预言所讲嘅两座山好相似。一座山代表耶和华永恒嘅宇宙统治权，另一座山代表耶稣统治嘅弥赛亚王国。（但以理书2:35,45）自从耶稣喺1914年秋天登基作王之后，喺实现上帝对 地球嘅旨意方面，呢两座山都发挥咗特别嘅作用。

⁸ 两座山系铜嘅，有乜嘢含意呢？就好似黄金一样，铜系一种贵重嘅金属。耶和华指示人用呢种闪闪发光嘅金属嚟建造圣幕同埋耶路撒冷嘅圣殿。（出埃及记27:1-3；列王纪上7:13-16）用铜呢种优质嘅金属嚟象征耶和华嘅宇宙至高统治权同埋弥赛亚王国，真系非常贴切。因为呢两座有象征意义嘅山将会带嚟安稳嘅生活，造福全人类。

9．驾驶战车嘅人象征乜嘢？佢哋有乜嘢任务？

⁹ 而家讲翻异象入面嘅战车。呢啲战车同驾驶嘅人象征乜嘢呢？佢哋都系灵体，象征四群天使。（请读撒迦利亚书6:5-8）佢哋从“全地嘅主面前”出去，执行一个特别任务。佢哋接获乜嘢任务呢？战车同驾驶嘅人都被派去照顾特定嘅地区。佢哋嘅职责系去保护耶和华嘅子民，尤其要保护佢哋免受“北方之地”巴比伦嘅伤害。耶和华确保佢嘅子民唔会再俾巴比伦奴役。对当时重建圣殿嘅人嚟讲，呢个系几咁大嘅安慰！佢哋知道敌人唔能够阻止佢哋。

10．沉思撒迦利亚关于战车同驾驶嘅人嘅预言，使我哋可以确信乜嘢？

¹⁰ 今日，万军之主耶和华依然派佢嘅天使去保护同强化佢嘅子民。（玛拉基书3:6；希伯来书1:7,14）1919年，属灵嘅以色列从大巴比伦获得释放之后，虽然敌人不断发动攻击，但系都阻止唔到正确崇拜嘅扩展。（启示录18:4）因为有天使嘅帮助，我哋唔使担心耶和华嘅组织喺属灵方面再次受到迫害。（诗篇34:7）我哋可以确信，全球嘅弟兄姊妹都会继续热心、喜乐噉事奉耶和华上帝。沉思撒迦利亚嘅异象，我哋可以确信自己喺呢两座山嘅保护下会非常安全。

11．对于耶和华嘅子民将会受到嘅攻击，点解我哋唔使惊？

¹¹ 好快，撒但世界嘅政治势力就会联合埋一齐，企图消灭上帝嘅子民。（以西结书38:2,10-12；但以理书11:40,44,45；启示录19:19）以西结嘅预言将呢啲政治势力描述为一支军队，佢哋好似密云遮盖大地，骑住马，来势汹汹噉攻击上帝嘅子民。（以西结书38:15,16） *我哋使唔使惊呢？一啲都唔使惊！我哋呢边有耶和华嘅军队。到时，喺大患难期间，耶和华嘅天使大军就会保护上帝嘅子民，毁灭所有反对上帝至高统治权嘅人。（帖撒罗尼迦后书1:7,8）呢一日真系好值得期待！噉边个会带领耶和华天上嘅军队呢？

12,13．（甲）耶和华吩咐撒迦利亚做乜嘢？（乙）点解话新芽所预告嘅就系耶稣基督？

¹² 撒迦利亚系唯一一个睇到呢八个异象嘅人。佢按照预言采取行动，使嗰啲重建圣殿嘅人得到鼓励。（请读撒迦利亚书6:9-12）耶和华吩咐撒迦利亚，要从希玳、多比雅、耶大雅呢三个啱啱从巴比伦返嚟嘅人嗰度收取捐献，用收到嘅金银整一顶华美嘅王冠。（撒迦利亚书6:11）耶和华系咪吩咐撒迦利亚将王冠戴喺大卫嘅子孙，出自犹大部族嘅省长所罗巴伯嘅头上呢？并唔系。耶和华叫撒迦利亚将王冠戴喺大祭司约书亚头上。呢个一定令在场嘅人觉得好惊讶。

¹³ 将王冠戴喺大祭司约书亚头上，系咪意味住立佢做君王呢？唔系。因为约书亚唔系出自大卫王嘅家系，所以佢唔符合成为君王嘅资格。约书亚戴上王冠呢件事，预告未来会有一位永恒嘅君王同祭司。成为君王嘅大祭司被称为新芽。经文清楚指出新芽就系耶稣基督。（以赛亚书11:1；马太福音2:23 *）

14．作为君王同祭司，耶稣会点样做？

¹⁴ 身为君王同祭司嘅耶稣会带领耶和华嘅天上军队。佢努力工作，使耶和华嘅子民喺呢个动荡不安嘅世界里面可以得到保护。（耶利米书23:5,6）喺不久嘅将来，耶稣基督会带头征服世上嘅列国，支持上帝嘅至高统治权，而且保护耶和华嘅子民。（启示录17:12-14；19:11,14,15）但系，新芽喺执行判决之前要先完成一项重大嘅工作。

15,16．（甲）现代嘅基督徒会众点样得到复兴同炼净？上帝委派边个完成呢个工作呢？（乙）基督嘅千年统治最终会有乜嘢成就？

¹⁵ 除咗被任命为君王同祭司，耶稣仲受到委派“建造耶和华嘅殿”。（请读撒迦利亚书6:13）喺现代，耶稣嘅建造工作包括帮助上帝嘅子民摆脱大巴比伦嘅影响，同埋喺1919年复兴基督徒会众。佢又委任一个“忠信睿智嘅奴隶”喺属灵圣殿嘅地上院子带头指挥重要嘅工作。（马太福音24:45）耶稣亦都炼净上帝嘅子民，帮助佢哋以洁净嘅方式崇拜上帝。（玛拉基书3:1-3）

¹⁶ 喺千年统治期间，有14万4000位受膏基督徒同耶稣一齐作王作祭司。耶稣同佢哋会帮助忠心嘅人恢复完美。当佢哋完成呢个工作嘅时候，只有真正崇拜上帝嘅人会留喺洁净嘅地球上。最终，正确嘅崇拜会完全复兴！

17．耶和华再次向犹太人保证乜嘢？呢个对佢哋有乜嘢影响？

¹⁷ 撒迦利亚嘅信息对当时嘅犹太人有乜嘢影响？耶和华承诺会帮助同保护佢哋，使佢哋能够完成重建圣殿嘅工作。呢个承诺肯定为身心疲累嘅犹太人带嚟希望。但系咁少人，又点能够完成 咁庞大嘅工作呢？撒迦利亚接住落嚟讲嘅话，将犹太人内心嘅恐惧同疑惑都一扫而空。除咗希玳、多比雅、耶大雅呢三个忠心嘅人嘅支持之外，上帝话一定仲会有好多人“嚟建造耶和华嘅殿”。（请读撒迦利亚书6:15）当时波斯王禁止重建圣殿，呢个官方禁令对犹太人嚟讲系一个如山嘅障碍。不过，佢哋深信耶和华一定会支持佢哋，所以又重新开工，继续建造圣殿。冇几耐，耶和华就消除咗波斯王嘅禁令，而圣殿嘅工程终于喺公元前515年完成。（以斯拉记6:22；撒迦利亚书4:6,7）耶和华所讲嘅同我哋今日有更加密切嘅关系。

18．撒迦利亚书6:15点样喺今日应验？

¹⁸ 今日，几百万人加入正确嘅崇拜，佢哋都甘心乐意献出自己“宝贵嘅资产”，例如时间、精力同金钱，嚟支持耶和华伟大属灵圣殿嘅安排。（箴言3:9）点解可以肯定耶和华珍视我哋忠心嘅支持呢？撒迦利亚所整嘅王冠，系用希玳、多比雅同耶大雅捐献嘅金银整成嘅。圣经嘅记载使我哋知道，王冠成为一个凭证，“记念”佢哋三个对正确崇拜所作出嘅贡献。（撒迦利亚书6:14）同样，耶和华永远唔会忘记我哋表现嘅爱心，同埋为佢所做嘅工作。（希伯来书6:10）呢一切都会永远被珍藏喺耶和华嘅记忆入面。

19．撒迦利亚嘅异象对我哋有乜嘢影响？

¹⁹ 喺最后嘅日子，耶和华嘅子民之所以能够完成咁多伟大嘅工作，都系因为有耶和华嘅祝福同耶稣基督嘅领导。我哋好开心可以属于一个稳定、安全、永恒嘅组织，而且知道耶和华喺正确崇拜方面嘅旨意“必然实现”。要珍视身为耶和华子民嘅殊荣，“切实听从耶和华你哋上帝嘅话”，噉就可以得到君王同大祭司，仲有天使嘅保护。要尽己所能支持正确嘅崇拜，噉耶和华就一定会保护我哋，使我哋安全渡过呢个事物制度剩余嘅日子，直至永远！