戰車同王冠保護你
“如果你哋切實聽從耶和華你哋上帝嘅話,呢一切就必然實現。”——撒迦利亞書6:15
唱詩17,136首
1,2.撒迦利亞第七個異象結束嘅時候,當時喺耶路撒冷嘅猶太人處於點樣嘅情況?
第七個異象結束嘅時候,撒迦利亞先知有好多嘢要思考。耶和華已經作出保證,佢會使嗰啲唔誠實嘅人為自己嘅邪惡行為承擔後果。呢個承諾肯定强化咗撒迦利亞。不過,當時嘅情況並冇任何改變。唔誠實同其他邪惡嘅行為仍然存在。喺耶路撒冷重建耶和華聖殿嘅工作唔知幾時先可以完工。點解猶太人咁快就放棄佢哋嘅神聖職務呢?佢哋返翻故鄉,唔通只係為咗自己嘅個人利益咩?
2 撒迦利亞知道,嗰啲重返耶路撒冷嘅男男女女都係有信心嘅猶太人。呢啲人“内心受上帝激動”,放棄佢哋喺巴比倫嘅生意同舒適嘅家。(以斯拉記1:2,3,5)佢哋要離開自己熟悉嘅環境,搬去一個佢哋大部分人從未見過嘅地方。如果佢哋唔重視耶和華聖殿嘅重建工作,就唔會踏上呢趟全程大約1600公里(1000英里),路途崎嶇嘅艱苦旅程。
3,4.重返家園嘅猶太人面對乜嘢障礙?
3 呢個係一趟點樣嘅旅程呢?喺途中,呢啲猶太人肯定有好多時間去諗吓佢哋嘅新家園。佢哋聽過耶路撒冷曾經係一個幾咁美麗嘅城市。佢哋當中嗰啲最年長嘅人已經見過聖殿以前嘅榮美。(以斯拉記3:12)如果你同佢哋一齊,當第一眼見到新家園耶路撒冷嗰時,你會有乜嘢感覺呢?你睇到一片廢墟,到處雜草叢生,會唔會感到哀傷難過呢?耶路撒冷嘅城牆破敗不堪,曾經聳立城門同守望台嘅地方,而家得翻個大缺口。相比之下,巴比倫嘅雙重城牆就又高大又堅固。猶太人並冇因為噉而灰心喪氣。喺漫長嘅歸家旅程中,佢哋已經見過耶和華親手為佢哋施行拯救。佢哋到達之後做嘅第一件事就係,喺以前嘅聖殿旁邊起個祭壇,開始每日向耶和華獻上祭牲。(以斯拉記3:1,2)佢哋充滿熱情,幹勁十足,睇起嚟冇乜嘢可以阻擋佢哋。
4 除咗要重建聖殿,以色列人仲要重建佢哋嘅城市同房屋。為咗提供食物俾家人,佢哋要耕種田地。(以斯拉記2:70)佢哋前頭好似有做唔晒嘅工作。好快,佢哋就面對猛烈嘅反對嘞。雖然起初佢哋意志堅定,但係經受咗15年嘅反對之後,佢哋慢慢變得心灰意冷。(以斯拉記4:1-4)公元前522年,波斯王禁止耶路撒冷嘅一切建造工程,呢個對佢哋嚟講係一個沉重嘅打擊。睇嚟耶路撒冷永遠都冇機會重建。(以斯拉記4:21-24)
5.耶和華點樣幫助佢嘅子民?
5 耶和華清楚知道佢子民嘅需要。喺撒迦利亞嘅最後一個異象裏面,耶和華表明佢真係好愛自己嘅子民,欣賞佢哋所付出嘅一切努力。耶和華亦都保證,如果猶太人重返崗位,就一定會保護佢哋。關於重建聖殿嘅工作,耶和華保證話:“如果你哋切實聽從耶和華你哋上帝嘅話,呢一切就必然實現。”(撒迦利亞書6:15)
天使大軍
6.(甲)撒迦利亞第八個異象係點樣開始嘅?(請睇吓課文開頭嘅圖片)(乙)點解馬匹嘅顔色各不相同?
6 撒迦利亞嘅第八個異象,即係最後一個,可能係最强化人信心嘅。(請讀撒迦利亞書6:1-3)想像一下,四駕戰車“從兩座[銅]山之間”衝過嚟,似乎已經裝備齊全,隨時可以應戰。拉戰車嘅馬匹顔色各不相同,噉樣就可以區分駕車嘅人。撒迦利亞問:“呢啲係乜嘢?”(撒迦利亞書6:4)我哋都好想知道答案係乜嘢,因為呢個異象直接影響到我哋。
耶和華依然派佢嘅天使去保護同强化佢嘅子民。
7,8.(甲)呢兩座山象徵乜嘢?(乙)兩座山係銅嘅,有乜嘢含意呢?
7 喺聖經入面,山可以用嚟代表王國或者政府。撒迦利亞描述嘅山同但以理預言所講嘅兩座山好相似。一座山代表耶和華永恆嘅宇宙統治權,另一座山代表耶穌統治嘅彌賽亞王國。(但以理書2:35,45)自從耶穌喺1914年秋天登基作王之後,喺實現上帝對 地球嘅旨意方面,呢兩座山都發揮咗特别嘅作用。
8 兩座山係銅嘅,有乜嘢含意呢?就好似黃金一樣,銅係一種貴重嘅金屬。耶和華指示人用呢種閃閃發光嘅金屬嚟建造聖幕同埋耶路撒冷嘅聖殿。(出埃及記27:1-3;列王紀上7:13-16)用銅呢種優質嘅金屬嚟象徵耶和華嘅宇宙至高統治權同埋彌賽亞王國,真係非常貼切。因為呢兩座有象徵意義嘅山將會帶嚟安穩嘅生活,造福全人類。
9.駕駛戰車嘅人象徵乜嘢?佢哋有乜嘢任務?
9 而家講翻異象入面嘅戰車。呢啲戰車同駕駛嘅人象徵乜嘢呢?佢哋都係靈體,象徵四群天使。(請讀撒迦利亞書6:5-8)佢哋從“全地嘅主面前”出去,執行一個特别任務。佢哋接獲乜嘢任務呢?戰車同駕駛嘅人都被派去照顧特定嘅地區。佢哋嘅職責係去保護耶和華嘅子民,尤其要保護佢哋免受“北方之地”巴比倫嘅傷害。耶和華確保佢嘅子民唔會再俾巴比倫奴役。對當時重建聖殿嘅人嚟講,呢個係幾咁大嘅安慰!佢哋知道敵人唔能够阻止佢哋。
10.沉思撒迦利亞關於戰車同駕駛嘅人嘅預言,使我哋可以確信乜嘢?
10 今日,萬軍之主耶和華依然派佢嘅天使去保護同强化佢嘅子民。(瑪拉基書3:6;希伯來書1:7,14)1919年,屬靈嘅以色列從大巴比倫獲得釋放之後,雖然敵人不斷發動攻擊,但係都阻止唔到正確崇拜嘅擴展。(啟示錄18:4)因為有天使嘅幫助,我哋唔使擔心耶和華嘅組織喺屬靈方面再次受到迫害。(詩篇34:7)我哋可以確信,全球嘅弟兄姊妹都會繼續熱心、喜樂噉事奉耶和華上帝。沉思撒迦利亞嘅異象,我哋可以確信自己喺呢兩座山嘅保護下會非常安全。
11.對於耶和華嘅子民將會受到嘅攻擊,點解我哋唔使驚?
11 好快,撒但世界嘅政治勢力就會聯合埋一齊,企圖消滅上帝嘅子民。(以西結書38:2,10-12;但以理書11:40,44,45;啟示錄19:19)以西結嘅預言將呢啲政治勢力描述為一支軍隊,佢哋好似密雲遮蓋大地,騎住馬,來勢洶洶噉攻擊上帝嘅子民。(以西結書38:15,16) *我哋使唔使驚呢?一啲都唔使驚!我哋呢邊有耶和華嘅軍隊。到時,喺大患難期間,耶和華嘅天使大軍就會保護上帝嘅子民,毁滅所有反對上帝至高統治權嘅人。(帖撒羅尼迦後書1:7,8)呢一日真係好值得期待!噉邊個會帶領耶和華天上嘅軍隊呢?
耶和華立佢做君王同祭司
12,13.(甲)耶和華吩咐撒迦利亞做乜嘢?(乙)點解話新芽所預告嘅就係耶穌基督?
12 撒迦利亞係唯一一個睇到呢八個異象嘅人。佢按照預言採取行動,使嗰啲重建聖殿嘅人得到鼓勵。(請讀撒迦利亞書6:9-12)耶和華吩咐撒迦利亞,要從希玳、多比雅、耶大雅呢三個啱啱從巴比倫返嚟嘅人嗰度收取捐獻,用收到嘅金銀整一頂華美嘅王冠。(撒迦利亞書6:11)耶和華係咪吩咐撒迦利亞將王冠戴喺大衛嘅子孫,出自猶大部族嘅省長所羅巴伯嘅頭上呢?並唔係。耶和華叫撒迦利亞將王冠戴喺大祭司約書亞頭上。呢個一定令在場嘅人覺得好驚訝。
13 將王冠戴喺大祭司約書亞頭上,係咪意味住立佢做君王呢?唔係。因為約書亞唔係出自大衛王嘅家系,所以佢唔符合成為君王嘅資格。約書亞戴上王冠呢件事,預告未來會有一位永恆嘅君王同祭司。成為君王嘅大祭司被稱為新芽。經文清楚指出新芽就係耶穌基督。(以賽亞書11:1;馬太福音2:23 *)
14.作為君王同祭司,耶穌會點樣做?
14 身為君王同祭司嘅耶穌會帶領耶和華嘅天上軍隊。佢努力工作,使耶和華嘅子民喺呢個動盪不安嘅世界裏面可以得到保護。(耶利米書23:5,6)喺不久嘅將來,耶穌基督會帶頭征服世上嘅列國,支持上帝嘅至高統治權,而且保護耶和華嘅子民。(啟示錄17:12-14;19:11,14,15)但係,新芽喺執行判決之前要先完成一項重大嘅工作。
佢會建造聖殿
15,16.(甲)現代嘅基督徒會衆點樣得到復興同煉淨?上帝委派邊個完成呢個工作呢?(乙)基督嘅千年統治最終會有乜嘢成就?
15 除咗被任命為君王同祭司,耶穌仲受到委派“建造耶和華嘅殿”。(請讀撒迦利亞書6:13)喺現代,耶穌嘅建造工作包括幫助上帝嘅子民擺脱大巴比倫嘅影響,同埋喺1919年復興基督徒會衆。佢又委任一個“忠信睿智嘅奴隸”喺屬靈聖殿嘅地上院子帶頭指揮重要嘅工作。(馬太福音24:45)耶穌亦都煉淨上帝嘅子民,幫助佢哋以潔淨嘅方式崇拜上帝。(瑪拉基書3:1-3)
16 喺千年統治期間,有14萬4000位受膏基督徒同耶穌一齊作王作祭司。耶穌同佢哋會幫助忠心嘅人恢復完美。當佢哋完成呢個工作嘅時候,只有真正崇拜上帝嘅人會留喺潔淨嘅地球上。最終,正確嘅崇拜會完全復興!
參與建造工作
17.耶和華再次向猶太人保證乜嘢?呢個對佢哋有乜嘢影響?
17 撒迦利亞嘅信息對當時嘅猶太人有乜嘢影響?耶和華承諾會幫助同保護佢哋,使佢哋能够完成重建聖殿嘅工作。呢個承諾肯定為身心疲累嘅猶太人帶嚟希望。但係咁少人,又點能够完成 咁龐大嘅工作呢?撒迦利亞接住落嚟講嘅話,將猶太人内心嘅恐懼同疑惑都一掃而空。除咗希玳、多比雅、耶大雅呢三個忠心嘅人嘅支持之外,上帝話一定仲會有好多人“嚟建造耶和華嘅殿”。(請讀撒迦利亞書6:15)當時波斯王禁止重建聖殿,呢個官方禁令對猶太人嚟講係一個如山嘅障礙。不過,佢哋深信耶和華一定會支持佢哋,所以又重新開工,繼續建造聖殿。冇幾耐,耶和華就消除咗波斯王嘅禁令,而聖殿嘅工程終於喺公元前515年完成。(以斯拉記6:22;撒迦利亞書4:6,7)耶和華所講嘅同我哋今日有更加密切嘅關係。
耶和華永遠唔會忘記我哋對佢表現嘅愛! (請睇第18,19段)
18.撒迦利亞書6:15點樣喺今日應驗?
18 今日,幾百萬人加入正確嘅崇拜,佢哋都甘心樂意獻出自己“寶貴嘅資産”,例如時間、精力同金錢,嚟支持耶和華偉大屬靈聖殿嘅安排。(箴言3:9)點解可以肯定耶和華珍視我哋忠心嘅支持呢?撒迦利亞所整嘅王冠,係用希玳、多比雅同耶大雅捐獻嘅金銀整成嘅。聖經嘅記載使我哋知道,王冠成為一個憑證,“記念”佢哋三個對正確崇拜所作出嘅貢獻。(撒迦利亞書6:14)同樣,耶和華永遠唔會忘記我哋表現嘅愛心,同埋為佢所做嘅工作。(希伯來書6:10)呢一切都會永遠被珍藏喺耶和華嘅記憶入面。
19.撒迦利亞嘅異象對我哋有乜嘢影響?
19 喺最後嘅日子,耶和華嘅子民之所以能够完成咁多偉大嘅工作,都係因為有耶和華嘅祝福同耶穌基督嘅領導。我哋好開心可以屬於一個穩定、安全、永恆嘅組織,而且知道耶和華喺正確崇拜方面嘅旨意“必然實現”。要珍視身為耶和華子民嘅殊榮,“切實聽從耶和華你哋上帝嘅話”,噉就可以得到君王同大祭司,仲有天使嘅保護。要盡己所能支持正確嘅崇拜,噉耶和華就一定會保護我哋,使我哋安全渡過呢個事物制度剩餘嘅日子,直至永遠!
^ 11段 想了解更多資料,請睇《守望台》2015年5月15日刊29-30頁“讀者來函”。
^ 13段 拿撒勒人呢個詞喺聖經原文好可能係出於希伯來語詞“新芽”。