1. Pakasoˈlinay ci Marta to manan a demak hani? (Nengnengen ko satapangan coka.)

TADA masomaday ko nisawawaan ni Yis ci Marta, samanen mapatayay ko salikaka ningra ci Lacarus. O manan ko mamisayar to rarom ni Marta hani? Misayaran ni Yis cingra pasowal: ‘O mamiliyaw a maˈorip ko salikaka iso.’ Soˈlin cowa ko papalahedaw to somad ni Marta koniya sowal, kawra micadaan ningra ko misadakan ni Yis a sakiˈok. Sanay ko sowal ni Marta: ‘Mafanaˈ kako to nika o mamiliyaw a maˈorip cingra nai patay i saikoray a romiˈad.’ (Yohani 11:20-24) Pasoˈlinay ci Marta mamiliyaw a maˈorip ko tamdaw noikor. Dotocto, midemakay ci Yis to kafahekaˈan, miliyaw a paˈorip ci Lacarusan toya romiˈad.

2. Misamaanay hano sakahecadaw kiso ci Martaan, pakasoˈlin to mamiliyaw a maˈorip ko mapatayay?

² Anini, cowa ko mamitala kita ci Yisan ato Wama ningra ci Yihofa, patado kitanan midemak to kafahekaˈan. Kawra, mahecad kiso ci Martaan, pasoˈlin to mamiliyaw a maˈorip ko mapatayay a salawina noikor han? Alatek i, mapatayay a salawina iso, o  raramod, wina, wama, akong ato fofo, anca wawa no niyah, sapiliyawaw kiso mitakec cangranan, masasowal ato malacafay a matawa. Mahecad ci Martaan, ira ko lalangian a pasowal: “Mafanaˈay kako mamiliyaw a maˈorip ko salawina ako!” Soˈlin mafanaˈay kita mamiliyaw a maˈorip ko mapatayay, kawra, haharatengen no kahacecay a Krisciyang, hano pakasoˈlin ko niyah toni a demak.

3, 4. (1) Ci Yis na midemakay to manan a kafahekaˈan a demak miliyaw a paˈorip? (2) Pasoˈlinay ci Marta iraayho ko manan hatokel ni Lacarus hani?

³ Itiniay i ngata no Yirusalim ko kitiraan ni Marta, soˈlin cowa pakaˈaraw cingra to piliyaw a paˈorip ni Yis to wawa no maponengay i Kalili a Naing a niyaroˈ, kao tahatengilay cingra toni a demak. Alatek, matengilay ningra ko piliyaw paˈorip ni Yis, to fafahiyan a wawa ni Yayrus. Itiya, ilomaˈay ni Yayrus a tamdaw, mafanaˈay maemin to “mapatayayto ko fafahiyan a wawa.” Metmet han ni Yis ko kamay nora wawa, pasowal cingranan: “Wawaaw, kalomowad”! Tangsol a lomowad kora wawa. (Luka 7:11-17; 8:41, 42, 49-55) Ci Marta ato safa ningra ci Mariya, mafanaˈay to iraay ko ˈicel ni Yis miadah to adada, harateng nangra ano kalikiay ci Yis a tayni, cato ka patay ci Lacarus. Kawra, mapatayayto cingra nohatini, wa iraho ko hatokel ningra han? Haharatengen i, masowal ni Marta miliyaw a maˈorip ci Lacarus, wa itini noikoran, “i saikoray a romiˈad.” Hano pakasoˈlin ci Marta tonini hani? Hano pakasoˈlin kiso wa miliyaw a maˈorip ko mapatayay noikor, wa miliyaw kiso pakaˈaraw to mapatayay salawina hani?

⁴ Adihayay ko lalangian ita pasoˈlin to mamalaˈosi ko tokel, miliyaw a maˈorip ko mapatayay, dotocto nengnengen ita ko pina maˈoningay i Fangcalay Cudad, wa paˈicel to pasoˈlin no falocoˈ iso, pasoˈlin to mamiliyaw kiso pakaˈaraw to mapatayay salawina.

5. Misamaanay hano pasoˈlin ci Marta mamiliyaw a maˈorip ci Lacarus hani?

⁵ Pakayni piliyaw a maˈorip ni Lacarus, cowa pasowal ci Marta to ‘nanay miliyaw a maˈorip cingra, somowalay to “mafanaˈ kako to nika o lalomowad cingra a maˈorip.” Pasoˈlinay ci Marta to mamiliyaw a maˈorip ko mapatayay, kaemangho cingra i, itini i lomaˈ anca i sefi no Yutaya tahatengilayto mamiliyaw a maˈorip a maˈoningay. Nohatini, nengnengen ita ko tolo a maˈoningay i Fangcalay Cudad.

6. Matengilay ni Marta ko manan kafahekaˈan a demak hani?

⁶ Pafelian no Kawas ci Iliya to ˈicel, papidemak to sakacecay miliyaway paˈorip a kafahekaˈan. Oniya maˈoningay mifekaday i Carifat no Foinikiya a niyaroˈ, misalafangan no cecay maponengay ci Iliya. Midemakay ko Kawas to kafahekaˈan pafeli toniya maponengay to cowa kaemin a dawdaw ato ponpon no emi, hato ngaˈay sakaˈorip ningra ato wawa. (1 Hongti 17:8-16) Ikor, adadaay mapatay ko wawa noni maponengay, padamaan ni Iliya cingra. Mitelian ni Iliya ko kamay i tireng no wawa, mitolonay: “Tapang a Kawas ako, nanay paˈoripen haca konini a wawa.” Maˈoripayto koya wawa! Mitengilan no Kawas ko satolon ni Iliya, miliyaw paˈorip toniya wawa, o sakinacecay miliyaway maˈorip a maˈoningay i Fangcalay Cudad koni. (ˈOsien ko 1 Hongti 17:17-24.) Maedeng matengilay ni Marta koniya miliyaway maˈorip a kafahekaˈan.

7, 8. (1) Tadtaden, samanan ni Ilisa misayar ko rarom no Sunim a fafahiyan? (2) Midemakan ni Ilisa a kafahekaˈan, misawacayay to iraay ko manan a ˈicel ni Yihofa hani?

⁷ O saka tosa kafahekaˈan miliyaway paˈorip, ci Ilisa ko midemakay, midotocay ci Ilisa to pairasolay a demak ni Iliya. Itini i Sunim, o cecay fafahiyan no Israil hinapaladaˈay ci Ilisaan. Oniya fafahiyan ato matoˈasay a faˈinay awaay ko wawa, pakaynian no Kawas i pairasolay  pafeli cangranan to cecay faˈinayan wawa. Ikor no pina miheca, mapatayay koniya wawa. Haratengen hena, hakowaay ko kararom noniya wina no wawa hani? Mihayay ko faˈinay ningra, palowad romakat to 30 kongli. Tayra i Karmil a mikilim ci Ilisaan. Orato, miocoran ni Ilisa ko koli ci Kihaci, tayra i Sunim miliyaway paˈorip to wawa ningra, kawra, awaay ko ˈicel ni Kihaci miliyaw paˈorip toya faˈinayan wawa. Ikor, malacafayay ci Ilisa atoniya fafahiyan tayra i Sunim.

⁸ Itini i lomaˈ noya fafahiyan ci Ilisa, tayra i tatihi noya mapatayay wawa, mitolon to Kawas. Dotoc, maˈoripay koya wawa, tada mahemekay koya fafahiyan maˈaraw a miliyaw maˈorip koya wawa! (ˈOsien ko 2 Hongti 4:32-37.) Alatek, maharatengay noniya fafahiyan ko satolon ni Hana i fangcalay kopang: “Patayraen Ningra ko tamdaw i kaitiraan no mapatayay. Pacakaten Ningra cangra a pasadak naitira.” (1 Samuil 2:6) Nohatini, soˈlinay paˈoripen no Kawas koniya faˈinayan wawa, misawacay to iraay ko ˈicel no Kawas miliyaw paˈorip to mapatayay a tamdaw.

9. Tadtaden, o roma milingatay ci Ilisaan a patikolay paˈorip to mapatayay a maˈoningay.

⁹ O roma miliyaway maˈorip a maˈoningay, itiniay i ikor no mapatay ci Ilisa a mafekad. Mataˈlifay ko 50 miheca malo pairasolay ci Ilisa, ikor adadaay mamapatayto cingra. Mapatay ci Ilisa to cecay liyad, mifekaday ko cecay demak. Itiya, mitademay ko Israil tamdaw to cecay mapatayay, fahal sanay ira ko ˈada. Macalohay milaliw ko Israil tamdaw, fahekol hananay koya mapatayay i tadem ni Ilisa, sanay ko sowal no Fangcalay Cudad: “Patefo i ˈokak ni Ilisa koya mapatayay a tireng i, patatikol a maˈorip koya mapatayay a tamdaw, lowad sa a tomireng.” (2 Hongti 13:14, 20, 21) Haratengen koniya miliyaway maˈorip a maˈoningay taˈangayay ko pakalalok ci Martaan! Iraay ko ˈicel no Kawas a milowid to patay. Oniya maˈoningay no Fangcalay Cudad, wa ngaˈay padama tisowanan, pasoˈlin to awaay ko tolas no ˈicel no Kawas.

10. Tadtaden ko midemakan ni Pitiro to miliyaway paˈorip a maˈoningay.

¹⁰ Itini i Krisiya Sowal Fangcalay Cudad, milengoay to midemakan no sikawdan no Kawas, miliyaway paˈorip a maˈoningay. Tinakoen, itini ci Yis i ngata no Naing ato i lomaˈ ni Yayrus, na midemakay to miliyaw paˈorip a kafahekaˈan. O tarokos ci Pitiro, na midemakay to kafahekaˈan, miliyaw paˈorip ci Torkasan (Tapita). Itiya, tayraay ci Pitiro i cecay kafotiˈan, itatihi ni Torkas a mitolon to Kawas, dotoc sanay ci Pitiro: “Tapitaaw, kalomowad!” Maˈoripayto ci Torkas, pacomodan ni Pitiro ko roma tamdaw i kafotiˈan, paˈaraw cangranan ci Torkasan. Pakayni toniya demak, “ˈalomanto ko pasoˈlinay to Tapang,” patenakay cangra to pakayniay ci Yisan a ngaˈayay lihaf, misawacay to iraay ko ˈicel ni Yihofa, miliyaw paˈorip to mapatayay tamdaw.​—Dmak 9:36-42.

11. Pakayni i mitilidan ni Luka ising, mafekaday ko manan a demak ci Yutikusan hani? Maˈaraway no ˈalomanay koni a demak, samanay ko harateng hani?

¹¹ Ikorto iraay ko roma tamdaw misawacayay to miliyaway paˈorip a demak. Kina cecayay, o tarokos ci Pawlo itini i Troas masaˈopoay ato roma tamdaw i cecay kafotiˈan, o Troas itiniay i kaˈamis no Tureky. Tahiraay lafii ko pikimad ni Pawlo, o cecay ci Yutikus a kapah maroˈay i sasingalan mitengil to kimad, matokatokay matefaday nai saka tolo tingroh. O ising ci Luka saka cecay tahira ci Yutikusan a minengneng. Cowa ko kadokaˈ aca a mapehel ci Yutikus, mapatayay koniya kapah. Malikelon ci Pawlo, mitakec to tireng ningra, dotoc somowalay to kafahekaˈan no tamdaw a sowal: “Maˈoripayho cingra!” Taˈangayay ko pilingat noniya demak toya pakaˈaraway a tamdaw. Maˈaraway nangra mapatay koniya  kapah, miliyaway a maˈorip, masayaray ko harateng.​—Dmak 20:7-12.

12, 13. Maˈosiay ko miliyaway maˈorip a maˈoningay i Fangcalay Cudad, haharatengen ita ko manan a salicay?

¹² Maˈosiay ko iˈayaway a maˈoningay no Fangcalay Cudad, mahecaday kiso ci Martaan, ira ko tanoktokay a pasoˈlin han? O misangaˈay a Tatapangan ita ci Yihofa, iraay ko ˈicel miliyaw paˈorip to mapatayay a tamdaw. Ti:yaay madimadiay sikawdan, ci Iliya, ci Yis aci Pitiro, pakaˈaraway to midemakan ni Yihofa kafahekaˈan miliyaw paˈorip to mapatayay. Kawra, o roma sikawdan no Kawas cowa pakaˈaraw to pidemak ni Yihofa to kafahekaˈan, wa mitala cangra a noikor patikolen no Kawas, paˈorip ko mapatayay a tamdaw han? Wa ngaˈay cangra mahecad ci Martaan a pasoˈlin han? Na matomesay ko pasoˈlin ni Marta a pasowal: “Mafanaˈ kako to nika o lalomowad [ko salikaka ako] a maˈorip nai patay i saikoray a romiˈad.” Hano pakasoˈlin ci Marta to mamifekad ko hatiniay a demak noikor hani? Iraay ko malecaday a pasoˈlin no falocoˈ iso han?

¹³ Adihayay ko maˈoningay i Fangcalay Cudad paihekalay, o madimadiay sikawdan no Kawas, soˈlinay mafanaˈ cangra, wa ira ko miliyaway maˈorip a demak. Nengnengen ita ko pina tinakoan.

14. Pakayni miliyaw maˈorip, mikitini malifetay ni Apraham mananamay ita ko maanan?

¹⁴ Haratengen ko limoˈot no Kawas ci Aprahaman, pakayni nano demak ningra ci Isakan. Sanay ko sowal ni Yihofa: “Keriden ko wawa iso, oya kaolahan iso a dengan a wawa iso ci Isak . . . sapatoˈaya i Takowanan cingra.” (Satapangan 22:2) Masasifoday ko harateng ni Apraham, samanen mikiˈokan ni Yihofa ci Apraham, mikitini teloteloc ningra a mapalemed ko polong a kitakit. (Satapangan 13:14-16; 18:18; Loma 4:17, 18) Somowlay ci Yihofa wa “nai ci Isakan a masadak” ko teloc. (Satapangan 21:12) Ano patayen ni Apraham ci Isak a patoˈaya, wa misamaan malaˈosi koni kihecod hani? Patemeran no Kawas ci Pawlo, mitadtad to pakasoˈlinay ci Apraham to Kawas, wa ngaˈay patikol paˈorip ci Isakan. (ˈOsien ko Hipray 11:17-19.) Cowa ka somowal ko Fangcalay Cudad, ano mihakelong ci Apraham to Kawas, mataˈlif ko pina toki, cecay romiˈad anca cecay lipay, patikolto maˈorip ci Isak. Cowa ka fanaˈ ci Apraham, hakowa ko halafin ngaˈ miliyaw maˈorip ko wawa, kao pakasoˈlinay cingra papatikolen ni Yihofa paˈorip ci Isak.

15. Pakasoˈlinay ci Yopu, iraay ko manan a hatokel no niyah?

¹⁵ Kakitaan ci Yopu mitalaay to mamiliyaw maˈorip. Cipinangay cingra ano leteken ko kilang,  wa miliyaw a cicengoˈ, lomahad a malo faelohay kilang. Kawra cowa ka lecad ko tamdaw. (Yopu 14:7-12; 19:25-27) Ano mapatay ko cecay tamdaw, awaay ko pakayraan no niyah miliyaw maˈorip nai tadem. (2 Samuil 12:23; ˈOlic 89:48) Kawrira, awaay ko ˈicel no Kawas miliyaw paˈorip to tamdaw, cowa ka saan. Pakasoˈlinay ci Yopu, cowa ko mamapawan ci Yihofa cingranan. (ˈOsien ko Yopu 14:13-15.) Cowa ka fanaˈ ci Yopu, wa hacowa mifekad ko miliyaway maˈorip noikor. Soˈlin hatira, pasoˈlinay cingra toya pafeliay to ˈorip a Kawas, miharatengay cingranan, wa ngaˈay miliyaw paˈorip cingranan noikor.

16. O manan ko sowal no coyoh ci Taniilan?

¹⁶ Hipray Sowal Fangcalay Cudad somowalay, ci Taniil, o pakasoˈlinay to Kawas a madimadiay a sikawdan. Halafinay madimadi a mihodop to Kawas cingra, kalacafayan ni Yihofa cingra. Kinacecayay, somowalay ko coyoh ci Taniilan, ‘o kalimelaan a tamdaw’ sanay, wa dipayal cingra, pakalalokay cingranan a tanoktok.—Taniil 9:22, 23; 10:11, 18, 19.

17, 18. Ano ikor wa milifok ci Taniil to maanan sapalemed?

¹⁷ Maedeng 100 ko mihecaan ni Taniil itiya, mamapatayto cingra. sakafanaˈaw to sasamaan ko hanoikor. Wa miliyaw maˈorip ci Taniil han? Wa miliyaw a maˈorip cingra! Saikoray no Taniil milengoay to sakiˈok no Kawas ci Taniilan: “Taniilaw, kao soˈlinay ko falocoˈ iso tangasa i patay. O mamapatay kiso.” (Taniil 12:13) Mafanaˈay cingra paselaˈay ko mapatayay tamdaw, o picomodan no tamdaw a tadem, “caayto pisahalaka, caayto ka fanaˈ, awaayto ko taneng.” (Patnakay 9:10) Soˈlin mamapatayto ci Taniil, kawraan, cowa ko hererekan ningra, samanen papafelien ni Yihofa cingra to makapahay a hatokel.

¹⁸ O roma, pasowalan no coyoh ci Taniil: “I paherekan a romiˈad i, o lalomowad kiso a maˈorip. O mamilayap kiso to sapakaolah itiya.” Cowa pasowal ko coyoh hakowa ko halafin noya romiˈad, kawra mafanaˈay ci Taniil wa mapatay a paselaˈ ko niyah. Kawra, matengilay ni Taniil wa “lalomowad” ko niyah milifok to sapalemed, mafanaˈay cingra, wa miliyaw a maˈorip ko niyah noikor, kawra, wa halafinho ko toki ngaˈ miliyaw a maˈorip cingra, itira “paherekan a romiˈad.”

19, 20. (1) O malengoay noni lalakaw a maˈoningay no Fangcalay Cudad, ato nano caˈof ni Marta ci Yisan a sowal, samanay ko kalaliting? (2) O saka tosa lalakaw wa milengo to manan?

¹⁹ Iraay ko lalangian ni Marta a pasoˈlin, oya madimadiay a salikaka ningra ci Lacarus, “o lalomowad cingra a maˈorip nai patay i saikoray a romiˈad.” Haratengen ita ko sakiˈok no Kawas ci Taniilan ato paihekalan ni Marta a pasoˈlinay falocoˈ, coko mamatongal ko pasoˈlin to mamifekad ko patatikol a maˈorip han?

²⁰ Mikitini maˈoningay no Fangcalay Cudad mahapinang, patatikol a maˈorip ko mapatayay tamdaw. O nolitengan madimadiay sikawdan no Kawas, mitalaay to patatikol a maˈorip ko mapatayay. Kawraan, iraay ko wacay paihekal to mikiˈokan no Kawas a patatikol a maˈorip, wa halafinho malaˈosi han? Ano mafanaˈ kita to caˈof noniya salicay, wa mahecad ci Martaan mitala to piliyaw no mapatayay a maˈorip. Ano hatiraay i, wa hacowa a patatikol a maˈorip ko mapatayay hani? O saka tosa lalakaw wa milengo toniya salicay.