‘Ke a Tseba Gore o tla Tsoga’
“Mogwera wa rena o robetše, eupša ke ya moo go yo mo tsoša.”—JOH. 11:11.
DIKOPELO: 129, 154
1. Ke’ng seo Mareta a bego a kgodišegile ka sona mabapi le kgaetšedi ya gagwe? (Bona seswantšho se se lego ka mo godimo.)
MARETA yo e bego e le mogwera yo mogolo wa Jesu e bile e le morutiwa wa gagwe, o be a nyamile kudu. Kgaetšedi ya gagwe Latsaro o be a hwile. Na go be go na le selo seo se ka dirago gore a ikwe a le kaone? Ee. Jesu o ile a kgonthišetša Mareta gore ‘kgaetšedi ya gagwe o tla tsoga.’ Mantšu ao a Jesu a ka no ba a se a tloša manyami ka moka a Mareta, lega go le bjalo o ile a dumela kgonthišetšo yeo ya Jesu. O itše: “Ke [a] tseba gore o tla tsoga tsogong letšatšing la mafelelo.” (Joh. 11:20-24) Mareta o be a kgodišegile gore Latsaro o be a tla tsoga bahung nakong e tlago. Ka morago ga moo, Jesu o ile a dira mohlolo. O ile a tsoša Latsaro bahung letšatšing lona leo.
2. Ke ka baka la’ng o nyaka go ba le kgodišego yeo Mareta a bego a na le yona?
2 Lehono re ka se letele gore Jesu goba tatagwe ba re direle mohlolo wa go swana le woo. Lega go le bjalo, na le wena o kgodišegile go swana le Mareta gore motho yo o bego o mo rata o tlo tsoga bahung nakong e tlago? Mohlomongwe o hlokofaletšwe ke molekane wa gago, mmago, tatago, makgolo’ago, rakgolo’ago goba ngwana wa gago. O hlologela go gokarela motho yoo, go bolela le yena le go sega le yena. Se se thabišago ke gore go swana le Mareta, o na lebaka le le kwagalago
la go bolela gore: ‘Ke a tseba gore motho yo ke mo ratago o tla tsoga bahung.’ Go sa dutše go le bjalo Mokriste yo mongwe le yo mongwe o swanetše go tseba gore ke ka baka la’ng a dumela gore go tla ba le tsogo ya bahu.3, 4. Ke’ng seo Jesu a bego a sa tšwa go se dira, gona seo se ile sa matlafatša Mareta bjang?
3 Go ka direga gore Mareta yo a bego a dula kgauswi le Jerusalema, ga se a bona ge Jesu a be a tsoša morwa wa mohlologadi kgauswi le motse wa Naini, kua Galilea. Lega go le bjalo, ga go pelaelo gore o ile a kwa ka seo Jesu a se dirilego le gore o ile a tsoša morwedi wa Jairo bahung. Batho bao ba bego ba le ka gabo ngwanenyana yoo “ba be ba tseba gore o hwile.” Lega go le bjalo, Jesu o ile a swara seatla sa ngwanenyana yoo a re go yena: “Ngwanenyana, tsoga!” Ke moka ngwanenyana a tsoga gateetee. (Luka 7:11-17; 8:41, 42, 49-55) Mareta le ngwanabo e lego Maria ba be ba tseba gore Jesu o be a kgona go fodiša balwetši. Ke ka baka leo ba ilego ba bolela gore ge nkabe Jesu a be a le gona, Latsaro nkabe a se a hwa. Eupša ka ge ga bjale mogwera wa Jesu a hwile, go be go tla direga’ng? Ela hloko gore Mareta o ile a bolela gore Latsaro o be a tla tsoga nakong e tlago, “letšatšing la mafelelo.” Ke ka baka la’ng a be a kgodišegile ka taba yeo? Le gona ke ka baka la’ng le wena o kgodišegile gore batho bao o bego o ba rata ba tlo tsošwa bahung nakong e tlago?
4 Go na le mabaka a kwagalago a gore o be le kgodišego yeo. Ge re dutše re ahlaahla a mangwe a ona, o ka hwetša gore ka Beibeleng go na le dilo tšeo o bego o sa fele o di tswalanya le kholofelo yeo o nago le yona ya go tlo bona motho yo o bego o mo rata a tsošwa bahung.
DITIRAGALO TŠEO DI DIRAGO GORE RE BE LE KHOLOFELO!
5. Ke’ng seo se dirilego gore Mareta a kgodišege gore Latsaro o be a tla tsoga bahung?
5 Ela hloko gore mathomong a sehlogo se Mareta ga se a re: ‘Ke duma eka kgaetšedi ya ka a ka tsoga bahung.’ Eupša o itše: “Ke [a] tseba gore o tla tsoga.” Ke ka baka la’ng Mareta a be a kgodišegile gore Latsaro o tlo tsoga bahung? Ka gobane o be a kwele ka mehlolo ya batho bao ba ilego ba tsošwa le pele ga ge Jesu a ka thoma bodiredi bja gagwe mo lefaseng. O be a kwele ka mehlolo yeo ka lapeng la gabo le sinagogeng ge e be e sa le yo mofsa. Mohlomongwe o ka ba o gopola ka mehlolo e meraro yeo go boletšwego ka yona ka Beibeleng ya batho bao ba ilego ba tsošwa bahung.
6. Ke mohlolo ofe woo Eliya a ilego a o dira, gona Mareta o tsebile bjang ka wona?
6 Ka Beibeleng re kwa ka tsogo ya mathomo yeo e ilego ya direga ge Modimo a be a nea moporofeta Eliya matla a go tsoša mohu. Kua Tsarepata toropong yeo e lego lebopong la Fenikia, mosadi yo mongwe wa mohlologadi o ile a amogela moporofeta ka lapeng la gagwe. Ke moka Modimo o ile a dira mohlolo. O ile a dira gore a se felelwe ke bupi le makhura e le gore yena le morwa wa gagwe ba se hwe. (1 Dikg. 17:8-16) Ka morago ga moo, morwa wa gagwe o ile a babja gomme a hwa. Eliya o ile a mo thuša. O ile a swara setopo sa ngwana yoo gomme a rapela a re: “Modimo wa ka, hle anke ngwana yo a boele a phele.” Ka nnete go ile gwa ba bjalo! Modimo o ile a kwa thapelo ya Eliya gomme mošemane yoo a boela a phela. Yeo e be e le pego ya mathomo ya ka Beibeleng ya motho yoo a ilego a tsošwa bahung. (Bala 1 Dikgoši 17:17-24.) Mareta o swanetše go ba a ile a kwa ka tiragalo ye, yeo e kgahlišago kudu.
7, 8. (a) Anega seo Elisha a ilego a se dira go homotša mosadi wa kua Shunema. (b) Mohlolo wa Elisha o ile a bontšha’ng ka Jehofa?
7 Motho wa bobedi yo a ilego a tsošwa yoo go bolelwago ka yena ka Beibeleng o ile a tsošwa ke moporofeta Elisha e lego mohlatlami wa Eliya. Mosadi yo mongwe wa Moisiraele yo a bego a dula Shunema o ile a amogela Elisha ka lapeng la gagwe. Mosadi yoo o be a se na bana. Ka gona Jehofa o ile a putsa mosadi yo le monna wa gagwe yo a bego a tšofetše ka ngwana wa mošemane, ka gobane ba be ba amogetše moporofeta ka lapeng 2 Dikg. 4:8-31.
la bona. Eupša ka morago ga mengwaga e itšego, mošemane yoo o ile a hwa. Nagana ka bohloko bjo mmagwe a ilego a bo kwa. Monna wa gagwe o ile a mo dumelela gore a sepele dikhilomithara tše 30 go ya go Elisha yo a bego a le thabeng ya Karamele. Moporofeta Elisha o ile a kgopela mohlokomedi wa gagwe e lego Gehasi gore a ba ete pele go yo tsoša mošemane yoo kua Shunema. Ge Gehasi a fihla moo o ile a palelwa ke go tsoša mošemane yoo bahung. Mafelelong Elisha o ile a fihla le mosadi yoo motseng wa Shunema.—8 Ge Elisha a fihla kua Shunema, moo go bego go na le setopo sa mošemane yoo, o ile a rapela. Jehofa o ile a araba thapelo ya Elisha gomme a tsoša mošemane yoo ka mohlolo. Ka morago ga moo Elisha o ile a mo nea mmagwe. (Bala 2 Dikgoši 4:32-37.) Mohlomongwe mosadi yo o ile a gopola seo Hanna yo e bego e le moopa a ilego a se rapelela ge a be a iša Samuele go yo hlankela taberenakeleng. Hanna o itše: “Jehofa . . . o kgona go iša motho Bodulabahu, le go mo ntšha go bjona.” (1 Sam. 2:6) Ge Jehofa a be a tsoša mošemane wa kua Shunema, o bontšhitše gore o na le bokgoni bja go tsoša bahu.
9. Hlalosa kamoo Elisha a ilego a akaretšwa ka gona pegong ya boraro ya motho yoo a ilego a tsošwa bahung.
9 Wo e be e se mohlolo wa mafelelo woo o bego o akaretša Elisha. O be a hlanketše e le moporofeta ka mengwaga e fetago e 50, gomme a “[swarwa] ke bolwetši bjo bo bego bo tlo mmolaya.” Ka morago ga ge a hwile e bile go šetše marapo feela lebitleng la gagwe, go ile gwa tla bahlasedi ba Bamoaba. Ge Baisiraele ba bangwe ba be ba le tseleng ya go yo boloka monna tsoko, ba ile ba bona bahlasedi bao. Gateetee ba lahlela setopo sa monna yoo ka lebitleng leo go bego go na le marapo a Elisha, ka ge ba be ba tšhaba bahlasedi bao. Beibele e re: “Ge setopo sa monna yoo se kgwatha marapo a Elisha, monna yoo a tsoga a ema ka maoto.” (2 Dikg. 13:14, 20, 21) Nagana kamoo dipego tše tša tsogo di ka bego di ile tša kgoma Mareta ka gona. Ruri Modimo o na le matla a go fenya lehu! Le gona nagana kamoo wena di go kgomago ka gona. Di swanetše go go kgodiša gore Jehofa o na le matla a magolo le ao a sa lekanywego le selo.
DITIRAGALO TŠA LEKGOLONG LA PELE LA MENGWAGA
10. Go ile gwa direga’ng ka mosadi wa Mokriste yo a bitšwago Thabitha, gona Petro o ile a dira’ng?
10 Ka Mangwalong a Bakriste a Segerika re bala le ka bahlanka ba bangwe ba Modimo bao ba ilego ba tsoša bahu. Ge re bala mangwalo a re kwa ka mehlolo ya go tsoša bahu yeo Jesu a e dirilego ge a be a le ka ntle ga motse wa Naini, le ge a be a le legaeng la Jairo. Moapostola Petro le yena o ile a tsoša mosadi wa Mokriste yo a bitšwago Dorokase, yo gape a bego a bitšwa Thabitha. Petro o ile a ya ka phapošing yeo setopo sa mosadi yoo se bego se le ka go yona. Ge a le kgauswi le setopo seo o ile a rapela. Ke moka a re: “Thabitha tsoga!” Gateetee mosadi yoo a tsoga gomme Petro a mo ‘iša go Bakristegotee le yena a phela.’ Tiragalo yeo e be e le e kgodišago kudu moo e lego gore “ba bantši ba [ile ba] dumela go Morena.” Batho bao ba ile ba kgona go botša ba bangwe gore Jehofa o kgona go tsoša bahu.—Dit. 9:36-42.
11. Ke’ng seo ngaka Luka a ilego a se lemoga ka lesogana leo le bitšwago Oitiko, gona seo se ile sa kgoma batho ba bangwe bjang?
11 Go na le batho ba bangwe bao ba ilego ba bona ge motho yo mongwe a be a tsošwa bahung. Ka letšatši le lengwe moapostola Paulo o ile a ya sebokeng se sengwe kua Teroa, yeo ga bjale e lego ka leboabodikela bja Turkey. Paulo o ile a nea polelo go fihla bošegogare a le phapošing ya ka godimo. Sebokeng seo, go be go na le lesogana leo le bego le bitšwa Oitiko leo le bego le theeditše polelo yeo le dutše lefasetereng. Eupša lesogana leo, le ile la ya ka boroko gomme la wela fase le le lebatong la boraro. Mohlomongwe ngaka Luka e bile yena wa mathomo go fihla go lesogana le gore a le thuše eupša o ile a lemoga gore Oitiko ga se a fo gobala goba go idibala, o be a hwile! Paulo o ile a theogela lebatong la ka tlase gomme a Dit. 20:7-12.
gokarela setopo sa lesogana leo ke moka a botša batho mantšu ao a ilego a ba makatša, a re: “Le boetše le a phela.” Ruri seo se swanetše go ba se ile sa kgoma batho bao ba bego ba bogetše! Ka ge ba be ba bone gore lesogana leo le be le hwile gomme la tsošwa, ba ile ‘ba homotšega kudu.’—KHOLOFETŠO YEO E KA BOTWAGO
12, 13. Mehlolo yeo re boletšego ka yona ya gore bahu ba ile ba tsošwa, e ka dira gore re ipotšiše dipotšišo dife?
12 Dipego tšeo re boletšego ka tšona ka mo godimo, di swanetše go go nea kgodišego yeo Mareta a bego a na le yona. Kgodišego yeo ke ya gore Modimo wa rena le Monei wa Bophelo o kgona go tsoša bahu. Le gona se se thabišago ke gore bahlanka ba Modimo ba botegago ba go swana le Eliya, Jesu goba Petro ba be ba le gona ge Modimo a tsoša bahu. Lega go le bjalo, go thwe’ng ka batho ba bangwe bao ba hwilego nakong ya ge Modimo a be a sa dire mehlolo ya go tsoša bahu? Na banna le basadi ba botegago bao ba bego ba phela mehleng yeo ba be ba ka letela gore Jehofa a tsoše bahu nakong e tlago? Na ba be ba ka kgodišega go swana le Mareta yo a itšego: “Ke [a] tseba gore [kgaetšedi ya ka] o tla tsoga tsogong letšatšing la mafelelo”? Ke ka baka la’ng Mareta a be a dumela gore Latsaro o be a tlo tsošwa bahung, gona ke ka baka la’ng wena o dumela gore bahu ba tlo tsoga?
13 Go na le dipego tše dintši ka Lentšung la Modimo tšeo di bontšhago gore bahlanka ba Modimo ba be ba tseba gore go tlo ba le tsogo ya bahu nakong e tlago. Ela hloko mehlala e sego kae.
14. Pego ya Aborahama e re ruta’ng ka tsogo ya bahu?
14 Nagana ka seo Modimo a ilego a botša Aborahama gore a se dire ka Isaka, e lego mojabohwa yoo Aborahama e bego e le kgale a mo letetše. Jehofa o ile a re: “Hle tšea morwa wa gago, morwa wa gago o tee feela yo o mo ratago Isaka, o . . . mo dire sebego sa go fišwa.” (Gen. 22:2) O nagana gore Aborahama o ile a ikwa bjang ge a be a newa taelo yeo? Jehofa o be a holofeditše gore ditšhaba ka moka di be di tla šegofatšwa ka peu ya Aborahama. (Gen. 13:14-16; 18:18; Baroma 4:17, 18) Le gona, Jehofa o be a boletše gore ditšhegofatšo tšeo di be di tlo tla “ka Isaka.” (Gen. 21:12) Eupša seo se be se tla kgonega bjang ge nkabe Aborahama a ile a dira sehlabelo ka Isaka? Modimo o ile a laela Paulo go ngwala gore Aborahama o be a dumela gore Isaka o tla tsošwa bahung. (Bala Baheberu 11:17-19.) Beibele ga e re botše gore Aborahama o ile a nagana gore Isaka o be a tla tsoga bahung ka morago ga diiri tše itšego, letšatši goba beke. Aborahama o be a sa tsebe gore morwa wa gagwe o be a tla tsošwa neng bahung. Eupša o be a tshepa gore Jehofa o tla tsoša Isaka bahung.
15. Mopatriareka Jobo o be a na le kholofelo efe?
15 Mopatriareka Jobo le yena o be a tseba gore go tlo ba le tsogo ya bahu. O ile a lemoga gore ge Jobo 14:7-12; 19:25-27) Ge motho a ka hwa a ka se kgone go itsoša lebitleng gomme a phela gape. (2 Sam. 12:23; Ps. 89:48) Ke therešo gore seo se be se sa bolele gore Jehofa a ka palelwa ke go tsoša mohu. Ge e le gabotse, Jobo o be a dumela gore go be go tla ba le nako yeo Jehofa a tlago go mo tsoša bahung. (Bala Jobo 14:13-15.) Jobo o be a sa tsebe gore nako yeo e tla tla neng. Lega go le bjalo, o be a tseba gore Mmopi wa batho o be a tlo mo gopola gomme a mo tsoša bahung.
mohlare o ripša o ka hloga gape gomme wa ba bjalo ka mohlare o mofsa. Eupša ga go bjalo ka motho. (16. Morongwa wa Jehofa o ile a kgothatša Daniele bjang?
16 Monna yo mongwe yoo a bego a botega yo re balago ka yena ka Mangwalong a Seheberu ke Daniele. O ile a hlankela Modimo ka mengwaga e mentši gomme Modimo o ile a mo thekga. Nakong e nngwe, morongwa wa Jehofa o ile a bitša Daniele gore ke “monna yo a rategago kudu,” gomme a mmotša gore ‘khutšo e be le yena’ le gore a ‘tie matla.’—Dan. 9:22, 23; 10:11, 18, 19.
17, 18. Jehofa o ile a holofetša Daniele eng?
17 Ge Daniele a be a na le mengwaga e ka bago e 100 e bile a le kgauswi le go hwa, a ka ba a ile a naganišiša ka seo se bego se tla mo diragalela. Na Daniele o be a tla tsošwa bahung gomme a phela gape? Ee! Mafelelong a puku ya Daniele re bala ka seo Modimo a ilego a se holofetša Daniele. O itše: “Ge e le wena eya bofelong; o tla khutša.” (Dan. 12:13) Daniele yo a bego a tšofetše o be a tseba gore bahu ba khuditše. Le gore Bodulabahu moo a bego a le kgauswi le go ya gona, “ga go na modiro le ge e le maano goba tsebo.” (Mmo. 9:10) Eupša se se be se sa bolele gore go fedile ka yena. Jehofa o ile a mo holofetša bokamoso bjo bo kgahlišago.
18 Molaetša woo morongwa a ilego a o botša Daniele o tšwela pele ka gore: “[O tla] emelela gore o tšee kabelo ya gago bofelong bja matšatši.” Morongwa yoo ga se a botša Daniele gore seo se be se tlo direga ka morago ga nako e kaakaang. Eupša Daniele o be a tlo hwa gomme a khutša. Lega go le bjalo, ge morongwa a be a mmotša gore nakong e tlago ‘o tlo emelela gore a tšee kabelo ya gagwe,’ Daniele o ile a kwešiša gore o be a tlo tsošwa nakong e tlago. Seo se be se tlo direga ka morago ga nako e telele a hwile, e lego “bofelong bja matšatši.”
Go swana le Mareta le wena o ka kgodišega gore bahu ba tlo tsoga (Bona serapa 19 le 20)
19, 20. (a) Dilo tšeo re šetšego re ithutile tšona di tswalana bjang le seo Mareta a ilego a se botša Jesu? (b) Ke’ng seo re tlago go se ahlaahla sehlogong se se latelago?
19 Go molaleng gore Mareta o be a na le mabaka a kwagalago a go mo kgodiša gore kgaetšedi ya gagwe Latsaro o be a tla “tsoga tsogong letšatšing la mafelelo.” Kholofetšo yeo Jehofa a ilego a e nea Daniele e swanetše go re kgodiša gore bahu ba tlo tsoga. Le gona mabaka ao Mareta a bego a na le wona a gore bahu ba tlo tsoga, le rena a swanetše go re kgodiša gore bahu ba tlo tsoga.
20 Go tšwa dipegong tšeo re boletšego ka tšona sehlogong se, re bone gore bahu ba tlo tsoga e le ka kgonthe. Re bone le gore banna le basadi bao ba bego ba hlankela Jehofa ba be ba na le kholofelo ya gore bahu ba tlo tsoga nengneng nakong e tlago. Lega go le bjalo, na go na le seo se bontšhago gore bahu ba ka tsoga le ge e le kgale ba hwile? Ge e ba go le bjalo, seo se tla re nea lebaka le lengwe le le kwagalago la go swana le la Mareta la gore bahu ba tlo tsoga nakong e tlago. Eupša seo se tla direga neng? Sehlogo se se latelago se tlo araba dipotšišo tše.