“我知道……佢一定復活”
“我哋嘅朋友拉撒路瞓咗，而家我要去叫醒佢。”——約翰福音11:11
1． 馬大相信佢死咗嘅弟弟會有乜嘢希望？（請睇吓課文開頭嘅圖片）
耶穌嘅好朋友兼門徒馬大正喺度悲傷痛哭。佢嘅弟弟拉撒路啱啱死咗。有乜嘢可以減輕佢嘅悲痛？耶穌向佢保證:“你嘅兄弟一定會復活。”雖然呢個未必可以完全消除馬大嘅一切悲痛，但係佢對耶穌嘅保證有信心。馬大話:“我知道喺最後嘅日子復活嘅時候，佢一定復活。”（約翰福音11:20-24）佢好肯定呢件事會喺將來發生。不過就喺當日，耶穌施行奇迹，復活咗拉撒路。
2． 點解你想有馬大噉樣嘅信心？
2 今日，我哋唔會期望耶穌或者天父為我哋施行噉樣嘅奇迹。但係你會唔會好似馬大一樣，深信去世咗嘅親友會喺將來被復活？佢可能係你深愛嘅配偶、爸爸、媽媽、祖父母，又或者係你最痛錫嘅仔女。你一定感到好悲痛，好想再次攬實佢，同佢傾計，同佢一齊笑。好似馬大一樣，我哋可以好肯定噉話:“我知道我嘅親友一定會復活。”不過，每個基督徒都應該沉思點解自己相信復活嘅希望。
3，4． 耶穌所做嘅點樣强化馬大嘅信心？
3 由於馬大住喺耶路撒冷附近，佢可能冇機會親眼見到耶穌喺加利利嘅拿因城復活寡婦個仔。但係，佢有可能聽過呢件事。另外，耶穌亦都復活咗崖魯嘅女。嗰啲喺崖魯屋企嘅人都“知道個女仔已經死咗。”不過，耶穌拉住佢冰冷嘅手話:“細路女，起身！”跟住，佢就即刻起咗身。（路加福音7:11-17；8:41，42，49-55）馬大同妹妹馬利亞，都知道耶穌有能力醫好病人。由於係噉，佢哋覺得如果耶穌當時在場，拉撒路就唔會死。但係而家拉撒路都死咗嘞，將來佢有乜嘢希望？請留意，馬大提到拉撒路“喺最後嘅日子”，即係喺將來會被復活。點解馬大可以咁肯定？點解你相信喺將來自己嘅親友有機會被復活？
4 我哋有充分嘅理由相信復活嘅希望一定會實現。你可能喺聖經裏面揾到一啲同復活有關嘅要點，係你從來都冇諗過嘅。呢啲要點可以强化你嘅信心，使你確信可以見翻死去嘅親友。
帶嚟希望嘅例子！
5． 點解馬大確信拉撒路一定會復活？
5 請留意，馬大唔係話“我希望我弟弟復活”，而係話“我知道……佢一定復活”。馬大知道喺耶穌開始傳道之前同復活有關嘅一啲奇迹，所以佢對復活懷有堅定嘅信心。佢可能自細就喺屋企喺會堂學過呢啲記載，或者佢諗到聖經裏面嘅三個例子。
6． 以利亞施行咗乜嘢奇迹？呢個同馬大有乜嘢關係？
6 第一個同復活有關嘅事件發生喺先知以利亞嘅時候。當時，上帝賜力量俾佢施行奇迹。喺腓尼基嘅沿海城鎮撒勒法，一個窮寡婦向以利亞表現好客精神。上帝就施行奇迹，供應寡婦油同麪粉，使佢同個仔都可以繼續維持生命。（列王紀上17:8-16）後來佢個仔患咗重病，冇幾耐就死咗嘞。以利亞為寡婦帶嚟安慰，佢伏喺細路仔身上，禱告話:“上帝啊，求你使呢個細路仔有翻生命。”真係出現咗奇迹！上帝垂聽咗以利亞嘅禱告，復活咗細路仔。呢個就係聖經記載嘅第一個同復活有關嘅例子。（請讀列王紀上17:17-24）馬大肯定亦都知道呢個聖經記載。
7，8． （甲）請描述以利沙點樣減輕婦人嘅悲痛。（乙）以利沙施行嘅奇迹，表明耶和華有能力做乜嘢？
7 聖經記載嘅第二個復活係以利亞嘅繼承人以利沙施行嘅。一個喺書念為人所知嘅以色列婦人慷慨對待以利沙。上帝通過先知賜咗一個仔俾呢個婦人同佢上咗年紀嘅丈夫。幾年之後，佢哋個仔死咗。你可以想像到，呢個母親幾咁悲痛欲絶。佢得到丈夫嘅同意，起程去到30公里（19英里）外嘅迦密山，喺嗰度揾到以利沙。先知派侍役基哈西先返去書念，不過基哈西救唔翻呢個細路，之後以利沙同婦人亦到咗書念。（列王紀下4:8-31）
8 以利沙去到婦人屋企，喺細路仔身邊禱告。耶和華垂聽咗以利沙嘅禱告，將細路仔復活過嚟。婦人可以同個仔再次團聚，可想而知佢有幾咁興奮！（請讀列王紀下4:32-37）婦人可能諗起哈拿帶撒母耳去聖殿服務嗰時作嘅禱告:“耶和華……使人落到墳墓，亦都使人復活。”（撒母耳記上2:6）上帝復活呢個細路仔，表明佢有能力復活死人。
9． 請解釋第三個有關復活嘅事件同以利沙有乜嘢關係。
9 不過，呢個唔係發生喺以利沙身上最後嘅一件奇妙事件。佢做咗50年先知，後來佢“病咗，好快就死嘞”。之後一支敵軍入侵以色列，當時以利沙嘅屍體已經化為骸骨。有啲以色列人喺度埋葬緊一個死人，佢哋一見到入侵者，就將屍體掉喺埋葬以利沙嘅地方。聖經記載:“死屍一掂到以利沙嘅骸骨就復活，企咗起身。”（列王紀下13:14，20，21）可想而知，呢啲復活嘅記載對馬大嚟講，意義幾咁重大！上帝的確有能力戰勝死亡。你可以沉思吓，復活嘅記載對你有乜嘢意義。呢啲記載應該使你確信上帝有强大、無窮嘅力量。
發生喺公元1世紀嘅事件
10． 彼得點樣復活一個死咗嘅基督徒姊妹？
10 希臘語經卷裏面都記載咗一啲同復活有關嘅事件，係上帝嘅忠僕親眼目睹嘅。耶穌喺拿因城外同埋喺崖魯屋企都施行過奇迹，復活死咗嘅人。使徒彼得亦都復活咗基督徒女子多加（塔比莎）。彼得去到安放屍體嘅房間，喺屍體旁邊禱告，之後佢話:“塔比莎，起身！”多加即刻被復活。其他基督徒都“睇見［佢］活過嚟”。因為噉，“好多人就成為主嘅信徒”。佢哋可以證實耶穌，特别係耶和華有能力復活死人。（使徒行傳9:36-42）
11． 根據醫生路加喺使徒行傳嘅記載，有乜嘢事發生喺一個年輕人身上？呢件事對其他人有乜嘢影響？
11 聖經亦都記載有好多人目擊咗另一次復活。有一晚，使徒保羅參加喺特洛阿斯（而家嘅土耳其西北部）一個樓上房間舉行嘅聚會。保羅發表演講直到半夜。一個叫猶推古嘅年輕人坐喺窗口度，佢聽吓聽吓就瞓着咗，從三樓跌落去。路加可能係第一個去到猶推古身邊嘅人。作為醫生，佢根據醫學判斷睇出猶推古唔係昏迷，而係死咗！保羅走落樓攬住猶推古，跟住向大家宣布:“佢有翻生命嘞。”呢件事對在場嘅人産生咗深遠嘅影響！親眼見到保羅復活死咗嘅人，佢哋都“大感安慰”。（使徒行傳20:7-12）
穩確嘅希望
12，13． 有關復活嘅希望，我哋需要考慮乜嘢問題？
12 以上嘅記載必定可以使你同馬大有一樣嘅信心，確信生命嘅源頭耶和華上帝有能力復活死咗嘅人。呢啲例子顯示，喺上帝施行奇迹復活死人嘅時候，忠僕以利亞、耶穌、彼得都分别在場。但係，嗰啲喺其他時代死咗嘅人又點呢？生活喺其他時代嘅忠心僕人從來都冇見過復活嘅奇迹，噉佢哋會唔會確信上帝喺將來復活死去嘅人呢？佢哋會唔會同馬大有一樣嘅信心？馬大話:“我知道［我弟弟］喺最後嘅日子復活嘅時候，佢一定復活。”點解佢有咁穩確嘅信心？點解你都可以呢？
13 喺上帝嘅話語裏面，有啲經文表明耶和華嘅忠僕相信將來一定會有復活發生。請考慮幾個例子。
14． 我哋從亞伯拉罕嘅記載了解到同復活有關嘅乜嘢事？
14 上帝吩咐亞伯拉罕獻上佢嘅繼承人以撒，耶和華話:“請帶你嘅仔，就係你深愛嘅獨生仔以撒，……將佢獻做全燒祭。”（創世記22:2）想像一下，亞伯拉罕聽到呢個吩咐嘅時候有乜嘢感覺。耶和華曾經作出應許，所有國族都會通過亞伯拉罕嘅後代得到福分。（創世記13:14-16；18:18；羅馬書4:17，18）耶和華亦都講過福分會嚟自“以撒生嘅”後代。（創世記21:12）但係如果亞伯拉罕將以撒獻做祭牲，噉福分又點可以嚟自以撒呢？保羅受聖靈啟示，解釋亞伯拉罕深信上帝有能力復活以撒。（請讀希伯來書11:17-19）聖經冇話亞伯拉罕認為只要佢服從上帝，以撒就會喺短短幾個鐘，一日，或者一個星期内被復活。亞伯拉罕唔知道以撒幾時會復活，不過，佢相信耶和華一定會復活以撒。
15． 族長約伯懷有乜嘢希望？
15 族長約伯亦都期待見到將來嘅復活。佢睇出如果一棵樹被斬斷之後，可能會再發芽而成為一棵新嘅植物。但係，人就唔得嘞。（約伯記14:7-12；19:25-27）如果一個人死咗，佢唔能够使自己從死裏復活，繼續生活落去。（撒母耳記下12:23；詩篇89:48）但係，呢個唔代表上帝唔可以復活人。事實上，約伯深信耶和華一定會記得佢。（請讀約伯記14:13-15）約伯唔知道呢件事會喺將來幾時發生，不過佢相信創造人類嘅上帝會記得佢，亦都會復活佢。
16． 一個天使點樣鼓勵先知但以理？
16 我哋從希伯來語經卷認識到但以理係另一個忠心嘅人。佢忠貞噉事奉上帝多年，而耶和華亦都一直支持佢。有一次，一個天使鼓勵但以理呢位 “極可貴嘅人”，“要堅强”同得享“平安”。（但以理書9:22，23；10:11，18，19）
17，18． 有關自己嘅未來，但以理得到乜嘢應許？
17 但以理差唔多100歲，就嚟行完佢嘅人生旅程，好可能佢喺度思考緊自己嘅將來。但以理會唔會被復活呢？當然會！喺但以理書嘅最後一章，我哋讀到上帝對佢嘅保證:“你即管去，堅持到底。你將會安息。”（但以理書12:13）年老嘅但以理知道死咗嘅人會安息，因為喺“墳墓……冇計劃，冇知識，冇智慧”。但以理就快去世嘞。（傳道書9:10）不過呢個唔係佢人生嘅終點，因為上帝承諾佢會有一個美好嘅未來。
18 上帝跟住對先知但以理講:“嗰段日子終結嘅時候，你就要起嚟，得享你嘅福分”。經文冇提到任何日期或者但以理要等幾耐，不過有講到但以理死後會得享安息，喺將來亦都會“得享［佢］嘅福分”。呢個清楚表明復活嘅應許喺“終結嘅時候”必然實現。
同馬大一樣，你都可以對復活有信心（請睇第19，20段）
19，20． （甲）我哋討論過嘅例子同馬大對耶穌嘅回應有乜嘢關係？（乙）下一篇課文會討論乜嘢？
19 馬大有充分嘅理由相信，佢忠心嘅弟弟拉撒路喺“最後嘅日子……一定復活。”耶和華對但以理作出嘅應許，加上馬大對耶穌堅定嘅回答，都可以强化今日基督徒對復活嘅信心，確信將來一定會有復活。
20 以往有關復活嘅例子證明，喺將來死咗嘅人有希望復活。忠心事奉耶和華嘅男男女女都盼望將來會發生嘅復活。但係，有冇證據表明喺好耐之前應許嘅復活都會發生？如果有，噉我哋就有理由同馬大一樣期待將來嘅復活。但係，呢個會喺幾時發生呢？下一篇課文會討論呢啲問題。
