1-3. (a) Ang’o ma wacopo kwanu ikind ponji mwa ma pigi tek? (b) Pirang’o cer utie gin ma pire tek akeca? (Nen cal mir acaki.)

 KA NG’ATU moko upenji nia ponji mir ukungu ma yioyic peri ucungo i wigi utie makani, icopo yero ang’o? M’umbe jiji, icopo koro ire nia iyio nia Yehova utie Jacwic man en re m’emio iwa kwo. Bende, icopo yero ire nia itie ku yioyic i Yesu Kristu m’utho pi nilaruwa. Wii copo wil ungo bende niweco pi Paradiso ma bibedo iwi ng’om, kaka ma dhanu pa Mungu bikwo i ie pi nja. Re nyo, icopo kwanu bende cer ikind ponji m’imaru lee nisagu?

² Etie lembe maber dit nikwanu bende cer ikind ponji mwa ma pigi tek, kadok nwang’u wageno nia wabikadhu kud i masendi madit man wabikwo rondo ku rondo iwi ng’om. Jakwenda Paulo unyutho thelembe m’uketho cer utie gin ma pire tek akeca, kinde m’ewacu kumae: “Ento tek cer mi ju m’utho mbe, kadok Kristu de cer ungo.” Eyo, ka nwang’u Yesu ucer ungo, nwang’u eni ebebimo ngo i polo; bende nwang’u rweyo lembanyong’a mwa de tije mbe. (Som 1 Jukorinto 15:12-19.) Ento wan wayio nia Yesu ucer andha; watie ngo ve Juyahudi ma Jusadukayo ma giyio ngo nyanok de nia ng’atu m’utho copo cer. Pieno,  yioyic ma watie ko nia Mungu copo cero ju m’utho ucikere ngo nijwik, kadok saa ma dhanu ubecayuwa.​—Marko 12:18; Tic mi Jukwenda 4:2, 3; 17:32; 23:6-8.

³ Jakwenda Paulo uyero nia ponji mi “cer mi ju m’utho” utie thenge mi “ponji ma kwong’a pa Kristu.” (Juebrania 6:1, 2) Eyero wang’ dupa nia etie ku yioyic nia cer bibedo nuti. (Tic mi Jukwenda 24:10, 15, 24, 25) Kadok nwang’u cer utie ponji ma kwong’a, niwacu acel m’ikind ponji mir ukungu ma walar wang’eyo pigi i Lembe pa Mungu de, re asu ubekwayu waponj lembe kilili iwi cer. (Juebrania 5:12) Pirang’o?

4. Penji makani ma romo wok iwi cer?

⁴ Wang’ mapol kinde ma ng’atini ucaku niponjo Biblia, kokoro esomo pi cer ma tung’ tung’ m’utimere yang’ con, calu ve cer pa Lazaru. Eponjo bende nia Abraham, Yob man Daniel, gibino ku genogen ma tek mandha nia i nindo m’ubino, ju m’utho gibikwo kendo. Re icopo dwoko ang’o, ka ng’atu moko upenji nia ikekor ku Biblia, thelembe m’uketho iyio nia cer copo timere andha kadok oro dupa ing’ei ma jung’olo pire? Man nyo Biblia unyutho saa ma tap ma cer bitimere i ie i nindo m’ubino? Dwokowang’ penji maenogi biteng’o yioyic mwa.

5. Wabiweco kawoni iwi lembang’o?

⁵ Saa moko ecopo bedo iwa yot niparu nia ng’atu m’utho copo cer ndhundhu ing’ei tho pare. (Yohana 11:11; Tic mi Jukwenda 20:9, 10) Re ka jung’olo nia ng’atu moko bicer ing’ei oro moko kunoke oro dupa ing’ei tho pare, nyo wacopo bedo ku yioyic? Ka jutimo lembang’olane pi ng’atu m’utho yang’ con kunoke pi ng’atu m’utho ikind nindo ma kago, nyo asu wacopo yio? Ma jiji mbe, itie ku yioyic iwi cer moko m’ugam utimere oro dupa ing’ei ma jung’olo pire. Etie cer makani? Cerne copo bedo ku matoke makani iwi genogen ma watie ko iwi cer mi nindo m’ubino?

6. Lembe mi Zaburi 118 upong’o nenedi iwi Yesu?

⁶ Wakewec kawoni iwi cer moko ma jular jung’olo pire oro dupa i wang’e. Pieno, wabitio ku Zaburi mi 118 ma copere Daudi re m’ukiewo. Verse moko mi Zaburi maeno uyero kumae: “Bodh kawono, wakwei, E Yehova!” man “Mugisa kwany ng’atu m’ubino ku nying’ Yehova.” Nindo moko i wang’ tho pa Yesu, niwacu nindo 9 mi dwi mi Nisan kinde m’ebemondo i Yerusalem ku wi nyathi kana, dhanu udok iwi lembila maeno m’uweco iwi Masiya. (Zaburi 118:25, 26; Matayo 21:7-9) Re Zaburi mi 118, unyutho nenedi pi cer ma jular jung’olo pire, ma re udok utimere oro dupa i ng’eye? Kenen lembe mange ma e, ma Zaburi eno uwacu: ‘Kidi ma jugom ot gikwero udoko ni [kidi ma] wi gul.’​—Zaburi 118:22.

7. Juyahudi gitimo ang’o pi ninyutho nia gikwero Yesu?

⁷ Jutelwic mi Juyahudi re ma gibino ‘jugom ot’ m’ukwero Masiya. Gicayu Yesu, man kadok ayia de giyie ngo nia etie Kristu. M’umedo maeno, Juyahudi mange dupa gikwero Yesu, eno uketho girero Pilato nia eketh jugure. (Luka 23:18-23) Andha, gin bende gidiko cing’gi ikum tho pa Yesu.

8. Yesu udoko ni ‘kidi ma wi gul’ nenedi?

⁸ Dong’ calu ma jukwero Yesu man junege, edoko ni ‘kidi ma wi gul’ ke nenedi? Lembuno utimere kende kende ing’ei cer pare. Pi nikoro lembe maeno, Yesu umaku lapor pa won podho moko m’uoro jumiru ibang’ jufurpodho pare. Giwok gifwodo  jumirune. I ng’eye won podho udok uoro wode ngi, egeno nia gibiwinje, re giwok ginege. Ing’ei ma Yesu umaku lapor maeni, edok eyero lembila ma nwang’ere i Zaburi 118:22. (Luka 20:9-17) Jakwenda Petro de utio ku verse maeno kinde m’ebino weco ibang’ Juyahudi ma gitie ‘jubim ku judongo man jugorcik ma gicoko dhoggi i Yerusalem.’ Eyero igi nia, “Yesu Kristu ma Nazareti ma wugure, Mungu ketho ecer ku kind ju m’utho.” I ng’eye emedo kumae: ‘En e kidi ma wun wu jugom ot wudwoke ni gin mananu, ma judwoke ni wic mi gul.’​—Tic mi Jukwenda 3:15; 4:5-11; 1 Petro 2:5-7.

9. Zaburi 118:22 ular uewo pi lembang’o ma pire tek?

⁹ Ubenen kamaleng’ nia lembila mi Zaburi 118:22 ular uewo pi cer ma re udok utimere oro dupa dit i ng’eye. Jular juewo nia jubikwero Masiya man jubinege. Re ebicer man ebidoko ni kidi ma wi gul. Ing’ei ma Yesu ucer, en re m’edoko ng’atu ma jumio ire nying’ “i kind dhanu ma wakowaboth be ni kume.”​—Tic mi Jukwenda 4:12; Juefeso 1:20.

10. (a) Zaburi 16:10 ular uyero lembang’o? (b) Ang’o m’ucwaluwa ninyang’ nia Zaburi maeno uweco ngo pi Daudi?

¹⁰ Wakeng’ii kawoni i verse mange m’uweco iwi cer, ma re ubin utimere ing’ei oro ma kadhu elufu acel. Lembe ma wabing’io ie ne bitielo genogen mwa nia cer copo timere kadok nindo ma dupa ing’ei ma jung’olo pire. I Zaburi mir 16, Daudi ukiewo kumae: “Ibiweko ng’eyong’ec para ngo i liel: kadi ng’atu maleng’ peri de ibiweko ngo ya enen top.” (Zaburi 16:10) Daudi umito yero ngo nia en ebitho ngo man nia ebibedo ngo i liel. Biblia unyutho kamaleng’ nia Daudi utii, i ng’eye ke etho, e “enindo ku kwaru pare, man juyike i adhura pa Daudi.” (1 Ubimo 2:1, 10) Dong’, verse maeno uweco pi ng’a ke?

11. Jakwenda Petro ukoro i Zaburi 16:10 saa makani?

¹¹ Oro ma kadhu elufu acel ing’ei ma Daudi ukiewo wec maeno, jakwenda Petro udok ukoro nia Zaburi 16:10 uweco iwi ng’a. Yenga moko ing’ei tho man cer pa Yesu, Petro uponjo Juyahudi dupa man dhanu ma gilokiri gidoko ni Juyahudi. (Som Tic mi Jukwenda 2:29-32.) Epoyo wigi nia Daudi utho, man juyike. Emedo bende nia, Daudi ‘ular uneno man eyero pi cer’ pa Masiya. Re Biblia ukoro ngo nia ng’atu moko m’ikindgi unyayu piem, kinde ma Petro umedo wec maeno.

12. Lembe mi Zaburi 16:10 upong’o nenedi, man eno ubenyutho ang’o iwi lembang’ola mi cer?

¹² Petro udok iwi wec ma Daudi ular uyero i Zaburi 110:1 pi ninwoyo tok wec pare. (Som Tic mi Jukwenda 2:33-36.) Petro utio ku Lembagora pi ninyamu i lembe karacelo kud udul dhanu, pieno, ju ma dupa m’ikindgi giyio nia Yesu utie “Rwoth ku Kristu bende.” Ginyang’ nia Zaburi 16:10 upong’o kinde ma Yesu ucer ku kind ju m’utho. I ng’eye, jakwenda Paulo de utio ku lembe marom eno kinde m’ebeweco ibang’ Juyahudi i adhura mir Antiokia mi Pisidia. Korolembe pa Paulo utelo nen migi akeca, uketho gimito ekor igi lembe dupa. (Som Tic mi Jukwenda 13:32-37, 42.) Lembe maeno ucikere nicwalu wan bende niyio andhandha nia lembila ma Biblia uewo iwi cer m’udok utimere i ng’eye ubino andha, kadok nwang’u edok epong’o oro ma dupa yor i ng’eye de.

13. Wacopo penjara saa moko ku penji makani iwi cer?

¹³ Ning’eyo nia cer copo timere kadok oro dupa ing’ei ma jung’olo pire, tielo cwinywa  lee dit. Re saa moko wacopo penjara kumae: ‘Nyo eno ubenyutho nia wabikuro pi nindo ma dupa ka wabineno wedi mwa ma wamaru lee ma githo? Cer bitimere awene?’ Yesu uwacu ni jukwenda pare nia lembe moko nuti ma ging’eyo ngo, man ma gicopo ng’eyo de ngo. Lembe dupa unuti iwi ‘nindo kadi oro, ma wego ketho gire ka tegone.’ (Tic mi Jukwenda 1:6, 7; Yohana 16:12) Re wang’eyo lembe moko nyanok iwi nindo ma cer bitimere i ie.

14. Tung’ tung’ ang’o m’ubino ikind cer pa Yesu ku cer mi jumange m’utimere yor i wang’e?

¹⁴ Cer ma pire tek akeca ma Biblia ukoro pire utie cer pa Yesu. Ka nwang’u ecer ungo ku kind ju m’utho, nwang’u ng’atu acel de mbe m’ikindwa ma copo bedo ku genogen nia ebineno kendo wedi pare m’utho. Dhanu ma gicer yor iwang’ Yesu, calu ve ju ma Eliya man Elica gicero, gigam gikwo ngo nja. Ento gidok githo kendo man gidoko ni utur i liel. Re Yesu “m’ucer ku kind ju m’utho etho kendo ngo; tho umbe ku kero kendo i wie.” Kawoni ebekwo i polo, man ebimedere nikwo “rondo ku rondo.”​—Jurumi 6:9; Lembanyutha 1:5, 18; Jukolosai 1:18; 1 Petro 3:18.

15. Pirang’o julwong’o Yesu nia “mwoka ma kwong’a”?

¹⁵ Yesu ubino ng’atu ma kwong’a m’ucer ku kum mi tipo pi kwo mi polo, man cerne pire bino tek nisagu cer mange ceke mi kite maeno. (Tic mi Jukwenda 26:23) Re cer pi kwo mi polo ujik ungo nikume kende. Yesu ung’olo ni jukwenda pare ma gigwoko bedoleng’ migi nia, gibibimo gikugi i polo. (Luka 22:28-30) Re kara ginwang’ sukuliane, ubekwayu gilar githo, kan i ng’eye gidok gicer ku kum mi tipo calu Yesu. Paulo ukiewo nia “Kristu cer ku kind ju m’utho, en e mwoka ma kwong’a mi ju m’unindo [i tho].” Edok eyero nia dhanu mange de nuti ma gibicer man gibicidho i polo. Ekoro kumae: “Dhanu acel acel ku kakagi kendgi: Kristu landu wi mwoka; macen ju ma gi pa Kristu, i [saa mi bedonuti] pare.”​—1 Jukorinto 15:20, 23.

16. Ang’o m’ubekonyowa ning’eyo saa ma cer ma pi kwo mi polo ucikere nitimere i ie?

¹⁶ Wec ma jakwenda Paulo ukoro ubekonyowa ning’eyo saa ma cer ma pi kwo mi polo ucikere nitimere i ie. Cerne ucikere nitimere i saa mi bedonuti pa Kristu. Pi oro ma dupa, Jumulembe pa Yehova gitio ku Biblia pi nikoro nia saa mi bedonuti pa Kristu eno ucaku i oro 1914. Fodi asu wabekwo i saa mi bedonuti parene, man dong’ ajiki mi ng’om maeni marac ni ceng’ini magwei.

17, 18. I saa mi bedonuti pa Kristu, ang’o ma bitimere ikum Jukristu moko ma juwiro ku tipo?

¹⁷ Biblia ukoro lembe lee iwi cer ma pi  kwo mi polo, eyero kumae: ‘Wayenyo kud wubed cobo (niwacu, m’umbe ng’eyo) pi ju m’unindo [i tho] . . . Kum tek wayio nia Yesu tho man ecer kendo, kumeno ju ma ginindo . . . bende Mungu bikelogi gikugi . . . Wan ma wabedo kwo, ma wadong’ nitundo i [saa mi bedonuti] pa Rwoth, wabitelo yo ki ngo ni ju ma ginindo. Kum Rwoth ku kite biai i polo biloro piny, ku kok ma dit . . . e ju m’utho i Kristu gibilar cer; e ka wan ma wabedo kwo, ma wadong’, jubilund ting’owa malu wakugi i afuru, nirombo ku Rwoth i lietho; e kumeno wabidong’ bedo nja ku Rwoth.’​—1 Jutesaloniki 4:13-17.

¹⁸ Cer ma kwong’a ucaku timere nindo ma nok ing’ei ma bedonuti pa Kristu ucaku i ie. Jukristu ma juwiro ku tipo, ma gibibedo kwo i saa mi masendi madit, jubiting’ogi “malu i afuru.” Eno ubenyutho ang’o? Ju ma ‘jubiting’ogi malu’ ‘gibinindo ngo [i tho],’ niwacu tekene githo ci, e ‘jubilokogi kagi ceke, nyapil calu goyowang’, kinde ma agwara ywak ma cen.’​—1 Jukorinto 15:51, 52; Matayo 24:31.

19. “Cer ma ber m’usagu” utie makani?

¹⁹ Tin eni, Jukristu ma dupa gitie ngo ju ma juwiro ku tipo, man gitie ngo ju ma jung’iogi pi nibimo karacelo ku Kristu i polo. Jukristu maeno gibekuro “ceng’ pa [Yehova],” niwacu nindo m’ebinyotho i ie ng’om maeni marac. Ng’atu moko mbe m’ung’eyo nindone ma tap, re lembe m’ubetimere tin eni ubenyutho nia etie kago. (1 Jutesaloniki 5:1-3) Kinde ma dhanu bimondo i ng’om manyen ma Mungu ung’olo, kit cer mange bitimere. I saa maeca, dhanu bicer pi nikwo iwi ng’om, man nok nok gibidoko leng’, niwacu kumgi bibedo mbe ku dubo man dong’ gibitho kendo ngo. Eno bibedo “cer ma ber m’usagu” mi dhanu ma jucerogi yang’ con, ma gidok githo kendo i ng’eye.​—Juebrania 11:35.

20. Pirang’o wacopo geno m’umbe jiji nia cer bitimere i kite m’upangere maber?

²⁰ Biblia uyero nia ju ma gibecidho i polo gicer “acel acel ku kakagi kendgi.” (1 Jukorinto 15:23) Pieno, wacopo geno m’umbe jiji nia cer ma bitimere iwi ng’om bende bikadhu i kite m’upangere maber. Lembuno copo cwaluwa nipenjara kumae: Nyo dhanu ma githo ikind nindo ma ceng’ini re ma gibilar cer kinde ma bimobim mi oro elufu acel pa Kristu bicaku, kara wedi migi ma ging’eiri kugi ujolgi? Nyo jumaco ma giweg bedopwe, ma yang’ con gibino jutelwic mabeco re ma gibilar cer, kara gipang lembe uwoth maber ni dhanu pa Mungu i ng’om manyen? Ka dong’ dhanu ma gitimo ngo ni Yehova kadok nyathuthuthu de, gin ke lembe migi bibedo nenedi? Gibicer awene man kakani? Penji utie dupa dit ma wacopo penjara ko. Re pi kawoni, cwinywa kud ukeudieng’ ikum lembe maeno. Kende kende wakur, man wabineno lembe ma bikadhu. Wacopo bedo ku yioyic nia lembe ma Yehova bitimo binyayu mutoro lee i iwa.

21. In itie ku genogen makani?

²¹ Re ma fodi eni, ukwayu waketh yioyic mwa i Yehova ubed tek. Eng’olo nikadhu kud ibang’ Yesu nia ju m’utho gitie i poi Pare, man gibikwo kendo. (Yohana 5:28, 29; 11:23) Lembe mange m’unyutho nia Yehova bicero ju m’utho utie wec ma nindo moko Yesu uyero, nia Abraham, Isak man Yakobo, gin “ceke gitie kwo ire.” (Luka 20:37, 38, NWT) Andhandha wan de watie ku thelembe mandha m’ubecwaluwa niyero calu jakwenda Paulo kumae: “Abedo ku genogen yo ba Mungu . . . nia cer ma jucer ko bibedo nuti.”​—Tic mi Jukwenda 24:15.