1-3. (1) O manan ko kalimelaan a kimad no pihakelongan ita? (2) Misamaanay hano masakalimelaan ko miliyaway maˈorip a kimad? (Nengnengen ko satapangan a coka.)

ANO ira ko milicayay tisowanan: “O manan ko kalimelaan a kimad no pidoyongan iso?” Wa samaan ko caˈof iso? Wa pasowalen iso cingra, o misangaˈay a Tatapangan ci Yihofa, pafeliay to ˈorip kitanan, anca somowal to kinafalahay ci Kristo to ˈorip malo sapatefoc. Wa mahemek kiso a milengo, mamalakoing koniya cikiw noikor, wa tahadaˈoc ko finawlan no Kawas, maˈorip i fafekang no sera. Kawra, o kalimelaan a kimad ko mamiliyaw maˈorip, wa saan kiso a minengneng, halo patenak i tamdaw han?

² Tokel no harateng ita, milakowit kako to taˈangayay padiing, tahadaˈoc maˈorip i fafekang no sera saan, Kawra iraayho ko lalangian ita, pasoˈlin to mamiliyaw maˈorip, o kalimelaan a kimad no pidoyongan. Mitadtaday ko tarokos ci Pawlo, to hano kalimelaan ko miliyaway maˈorip no Krisciyang, sanay: “Ano soˈlinay caay ko lalomowad a maˈorip ko mapatayay i, kona caay ka lomowad ci Kristo a maˈorip nai patay.” Ano cowa ka patikol ci Kristo a maˈorip, caka mala hongti cingra. Ano pasowalen ita ko tamdaw to mamikowan ci Kristo, o awaay ko epoc. (ˈOsien ko 1 Korinto 15:12-19.) Mafanaˈay kita to patikolayto ci Yis a maˈorip. Kawra, cowa ka hecad ko Satukay tamdaw, cowa pihai  cangra to mamiliyaw a maˈorip ko mapatayay. Anini mamalikaf no tamdaw kita, kamayan a pakasoˈlin to mamiliyaw maˈorip ko mapatayay.​—Marko 12:18; Dmak 4:2, 3; 17:32; 23:6-8.

³ Sowal ni Pawlo: “Saˈayaway a ninanaman ita to pakayniay i ci Kristoan ko haharatengen.” Mahawpay ko “pipalowad a paˈorip to mapatayay” a kimad. (Hipray 6:1, 2) Pakasoˈlinay cingra to mamiliyaw maˈorip a hatokel. (Dmak 24:10, 15, 24, 25) O miliyaway maˈorip, o “saˈayaway a ninanaman” no pihakelongan ita, ‘o taˈenengan a kimad no Kawas, soˈlin hatira, midotim kita toniya kimad wa ira ko haepoc. (Hipray 5:12) Misamaanay hani?

4. Wa milengo kita to manan milingatay to miliyaway maˈorip a salicay?

⁴ Minanam ko ˈalomanay tamdaw to Fangcalay Cudad i, maˈosiay ko miliyaway maˈorip a maˈoningay, mahaen o malifetay ni Lacarus. Mananamay nangra ci Apraham, Yopu, aci Taniil, pakasoˈlinay to papatikolen no Kawas paˈorip ko mapatayay noikor. Kawra, saan ko roma tamdaw milicay: “Mikiˈok ko Kawas miliyaw paˈorip to tamdaw, o halafinayto a demak, hano pakasoˈlin kiso to mamatoor Ningra koniya sowal hani? Soˈlinay somowal ko Fangcalay Cudad to hahacowa mifekad ko miliyaway maˈorip a demak han?” Dotimen a miharateng ko caˈof noniya salicay, wa mapaˈicel ko pasoˈlin no mita, nengnengen ita nohatini samanay ko sowal no Fangcalay Cudad.

5. Pakayni sakiˈok no miliyaw maˈorip, o roma tamdaw iraay ko maanan salicay hani?

⁵ Sapatikolaw paˈorip to patay sanayho a tamdaw, cowa ko pasangaray a haratengen. (Yohani 11:11; Dmak 20:9, 10) Kawraan, mamiliyaw maˈorip a sakiˈok, ano ikor no pinato a miheca, anca pina soˈot a miheca ngaˈ malaˈosi samaan aki? Ano halafinayto a mapatay ko tamdaw, wa matoorho no Kawas ko sakiˈok, miliyaw paˈorip cingranan, wa pakasoˈlin kiso han? Soˈlinay i, masowalay no Fangcalay Cudad ko pakayniay miliyaway maˈorip a sapairasol, pinato hahekalan soˈlinay malaˈosi koniya demak. Mihaenay, oniya maˈoningay iraay ko maanan kalaliting to mamiliyaw maˈorip no ikor hani?

6. O lalakaw no ˈOlic saka 118 fedengan, iraay ko maanan kalaliting ci Yisan?

⁶ Nengnengen ita nohatini ko cecay pakayniay miliyaw maˈorip a sapairasol, oniya maˈoningay no Fangcalay Cudad, itiniay i ˈOlic 118 fedengan, ci Tafiti ko mitiliday halatek. Sanay ko sinael: “[Yihofaaw], nanay paˈoripenho Iso kami. . . . Nanay mapalemed [ni Yihofa] ko niocoran pakayni i ngangan Ningra.” Maharatengay iso halatek, itini i Nisan a folad 9 romiˈad, mikalicay ci Yis to lofa micomod i Yirusalim, somowalay ko ˈalomanay to pakayniay ci Misiyaan a sowal, mangataayto kinafalah ci Yis to ˈorip. (ˈOlic 118:25, 26; Matay 21:7-9) Kawra, o ˈOlic saka 118 fedengan ato mamalaˈosi a mamiliyaw maˈorip, iraay ko maanan kalaliting hani? Paˈayaway ko sinael a somowal: ‘O kinafalah no misalomaˈay a fakeloh i, mala kalimelaanto a taˈenengan a fakeloh no lomaˈ.’​—ˈOlic 118:22.

7. Samanay ko Yutaya tamdaw a mifalah ci Yisan?

⁷ ‘O misalomaˈay a tamdaw, o ˈaˈideman no Yutaya, mifalahan nangra ci Misiya. Misakahemawan nangra ci Yis, cowa pihaito ci Kristo cingra. Sapipatayaw ko ˈalomanay Yutaya tamdaw ci Yisan. (Luka 23:18-23) Wa mitamorong to ˈinorong no kapatay ni Yis cangra.

8. Samanay ci Yis malo ‘taˈenengan a fakeloh no lomaˈ’ hani?

⁸ Ano mifalahan mipatayan no tamdaw ci Yis, wa misamaan a malo ‘taˈenengan a fakeloh no lomaˈ’ cingra hani? Miliyaw maˈorip cingra ngaˈ ngaˈay. Patinakoay ci Yis mitadtad tonini. Masowalay ningra ko roma maomahay mikariˈangay to miocoran no tawki a tamdaw, mahecad o pikariˈang no Israil tamdaw to miocoran no Kawas a pairasolay. Salikor, miocoran no tawki ko kaolahan a wawa ningra, oya mamidotoc a tamdaw  tayra i maomahay. Samanay ko harateng noya maomahay hani? Patay hananay nangra ko wawa no tawki. Maharek somowal ci Yis toniya sapatinako, dotoc misaka dademakay to sapairasol no ˈOlic 118:22. (Luka 20:9-17) Ikor, misaka dademakan no tarokos ci Pitiro ko mahecaday a sinael mitadtad tonini. Itiya, itiniay i Yirusalim cingra pasayra i “kakerikeridan no finawlan ato matoˈasay, ato pasifanaˈay to rikec a tamdaw,” no Yutaya a pasowal: ‘Oya Nacali tamdaw ci Yis Kristo, na mipacekan namo i hecek, patikolanto no Kawas paˈorip cingra nai patay.’ Dotoc, ihekalay mifanaˈ ci Pitiro: “O kinafalah a fakeloh no misalomaˈay a tamdaw i, malataˈenenganto no lomaˈ.”—Dmak 3:15; 4:5-11; 1 Pitiro 2:5-7.

9. Paˈayaway ko ˈOlic 118:22 to manan a kalimelaan a demak hani?

⁹ ˈAyaw no miliyaw maˈorip ci Yis to pina hahekalan, paˈayawayto ko ˈOlic 118:22 to mamifekad koniya demak. Wa falahen wa patayen ci Misiya, kawra wa miliyaw maˈorip cingra, malo ‘taˈenengan a fakeloh no lomaˈ. Sowal no Fangcalay Cudad, edeng oya miliyaway maˈorip a Yisan, “awaayto icowacowa no hekal ko roma a nitoroˈan no Kawas to papakapaˈorip titaanan.”​—Dmak 4:12; Ifiso 1:20.

10. (1) Paˈayaway ko ˈOlic 16:10 to manan a demak hani? (2) Oniya sinael misamaanay hano caka laˈosi i tireng ni Tafiti hani?

¹⁰ Nohatini, nengnengen ita ko roma milingatay to miliyaway maˈorip a sinael. Ikor no 1,000 miheca malaˈosiay koniya sinael, mipasoˈlinay koni kitanan, soˈlin halafin ko toki, kamayan malaˈosi ko sapairasol. Ci Tafiti ko mitiliday toniya sinael, sanay cingra: ‘Caay ko fafalahen Iso kako i tadem, caay ko fafalahen Iso ko madimadiay a sikawdan i patademan.’ (ˈOlic 16:10) Coka pasowal ci Tafiti to tatahadaˈoc eca ka patay, anca eca picomod i tadem cingra. Sowal no Fangcalay Cudad palidlid sanay maliteng ci Tafiti, salikor “mapatayayto ci Tafiti, tademen cingra i Tafiti a niyaroˈ.” (1 Hongti 2:1, 10) Ano hatiraay, o cima ko mitoroˈan no ˈOlic 16:10 a tamdaw hani?

11. Hacowaay somowal ci Pitiro to ˈOlic 16:10 hani?

¹¹ Ikor no miliyaw maˈorip ci Yis to pina lipay, tiya mikimad ci Pitiro to ˈalomanay Yutaya ato mihakelongay tamdaw, somowalay to ˈOlic 16:10, na maharek mitilid to ˈOlic 16 fedengan mataˈlifayto ko 1,000 miheca. (ˈOsien ko Dmak 2:29-32.) Sowal ni Pitiro mapatayayto a tademen ci Tafiti, mafanaˈay koya mitengilay a tamdaw toniya demak. Hanaca tiya somowal ci Pitiro ci Tafitian, “i ˈayawto ko nika fanaˈ ni Tafiti to nika o lalomowad ko Misiya a maˈorip nai patay” i, awaay ko micoliay a tamdaw ci Pitiroan, to mararaway ko sowal ningra.

12. Samanay malaˈosi ko ˈOlic 16:10 hani? Mafanaˈ toni samaan padama titaanan, matongal ko pasoˈlin to miliyaway maˈorip a hatokel hani?

¹² Misaka dademakayho ci Pitiro to sowal ni Tafiti i ˈOlic 110:1, padama to mitengilay a misa haraterateng. (ˈOsien ko Dmak 2:33-36.) Saka dademakan ni Pitiro ko Fangcalay Cudad, padama to ˈalomanay pasoˈlinto o tapang ci Yis, ci Kristo. Kalimelaan i padamaan ningra ko ˈalomanay, cipinang to malaˈosiay ko piliyaw ni Yis maˈorip to ˈOlic 16:10. Ikor, o tarokos ci Pawlo, itini Antiyok no Pisitiya a pala, pasowal to Yutaya tamdaw i, misaka dademakay to ˈOlic 16:10. Caay ka pawan no Yutaya tamdaw konini, sapiliyawaw cangra mitengil to pitadtad ni Pawlo. (ˈOsien ko Dmak 13:32-37, 42.) Anini, oniya maˈoningay pasoˈlinay kitanan, o soˈliˈlinay ko sowal no Fangcalay Cudad to miliyaway maˈorip, soˈlin mataˈlif ko pina hahekalan, o mamalaˈosi ko sapairasol.

13. Pakayni miliyaw maˈorip, iraay ko maanan a salicay no tamdaw hani?

¹³ Mafanaˈ kita o pairasolan no Fangcalay Cudad, o miliyaway maˈorip a itini pina hahekalan a malaˈosi, coko tataˈangay ko hemek han? Kawra, saan ko salicay no roma tamdaw: “Hakowa ko halafin a mitala kako, ngaˈ maˈaraw ko mapatayay a  salawina hani? Hacowa mifekad koya mitalaan ako to miliyaway maˈorip a demak hani?” Kawraan, na pasowalan ni Yis ko tarokos, o roma demak cowa ko mamafanaˈ cangra, sanay ci Yis: “Ano o pakayniay i toki ato romiˈad i, o Wama ako ko citodongay a mihapinang tonini. Saka, caay ko kakafanaˈen namo konini.” (Dmak 1:6, 7; Yohani 16:12) Kawraan, pakayni miliyaw maˈorip hacowa mifekad, wa ngaˈay kita mikitini Fangcalay Cudad a cipinang to demak.

14. O piliyaw ni Yis maˈorip ato roma miliyaway maˈorip, samanay a eca ka hecad hani?

¹⁴ Saka cipinangaw to hacowa mifekad ko miliyaw maˈorip, haharatengen ita ko pairasolan no Fangcalay Cudad, pakayni i miliyaway maˈorip a maˈoningay, sakakaay o piliyaw ni Yis a maˈorip. Ano cowa patikol maˈorip ci Yis, cowa to ko mamiliyaw kita pakaˈaraw to mapatayay a salawina. O roma iˈayaway ni Yis patikol maˈorip a tamdaw, oya patikolan ni Iliya aci Ilisa paˈorip a tamdaw, ikor mapatayay cangra, cowa padotoc a maˈorip. Cowa ka hecad ci Yis, “o lomowadayto ci Kristo a maˈorip nai patay. Caayto ko mamiliyaw cingra a mapatay.” Itiniayto i kakarayan ci Yis, “maˈoripay Kako a midaˈoc,” cowato ko mamaponiˈ.​—Loma 6:9; Paˈarawan 1:5, 18; Kolosay 1:18; 1 Pitiro 3:18.

15. Misamaanay hano o ‘salakatay milidongan’ ci Yis hani?

¹⁵ Miliyaw maˈorip malo ˈadingo a tatirengan, o salakatay a milidongan ci Yis, kalimelaan ko tatodong no piliyaw ningra maˈorip. (Dmak 26:23) Kawra, iraayho ko roma tamdaw miliyaw maˈorip tatayra i kakarayan. Mikiˈokan ni Yis ko madimadiay a tarokos ningra, wa kalacafay cangra cingranan i kakarayan mala hongti. (Luka 22:28-30) Sapilifokaw ko tarokos to kakarayan a halifon, salakat o mamapatayho, ikor wa mahecad cangra ci Kristoan, miliyaw maˈorip malo ˈadingoan a tireng. Sanay ci Pawlo: “Soˈlin ko nika lomowad ni Kristo a maˈorip nai patay. O pawacayay Cingra to nika o [salakatay a milidongan] i lalomowad a maˈorip ko mapatayay a tamdaw.” Padotocay ci Pawlo milengo to tatayra kakarayan a tamdaw, sanay: “Madadoedo konini a [miliyaw maˈorip]. Ci Kristo ko saˈayaway a lomowad a maˈorip. Doedo sa i, o ici Kristoananay a tamdaw. Itiya i piliyawan ni Kristo a tayni a miliyaw cangra a maˈorip.”​—1 Korinto 15:20, 23.

16. Hahacowa miliyaw maˈorip ko mapasimalay Krisciyang tayra kakarayan, mafanaˈayto kita to maanan?

¹⁶ O sinael, pasifanaˈay kitanan to hahacowa miliyaw maˈorip ko mapasimalay Krisciyang tayra i kakarayan, oniya demak wa itini “piliyawan ni Kristo a tayni” a mifekad. Mahapinangayto no Misawacayay Tamdaw ni Yihofa ko sapairasol no Fangcalay Cudad, piliyaw ni Kristo a “tayni” itiniay i 1914 miheca misatapang, maˈoripay toniya lintad kita nohatini, mangataayto ko kahererekan noniya tatiihay a hekal.

17, 18. Itini piliyaw ni Kristo a tayni i, o mapasimalay Krisciyang wa mifekad ko manan a demak hani?

¹⁷ Pakalingaday ko Fangcalay Cudad milengo  to tayraay kakarayan patikolay maˈorip, sanay: “Mafanaˈ kamo to pakayniay i mapatayay a tamdamdaw . . . Pasoˈlin kita to nika patay ni Yis ato nika lomowad ningra a maˈorip nai patay. Saka, o hahaenento no Kawas a mikerid a papihakelong i ci Yisan ko mitooray ci Yisan a mapatayay a tamdaw . . . Kita o maˈoripayho tangasa i nipiliyaw no tapang a tayni i, caay ko mamikiˈayaw to mapatayayto a tamdamdaw. Nawhani ano ira ko lekal no palimoˈotay . . . Itiya a maepod ko tapang nai kakarayan. Ta malasaˈayaway a lomowad ko mitooray ci Kristoan a mapatayay . . . Kita o maˈosaway a maˈorip ko mamikapot i cangraan a makakoy a tayra i toˈem a malalitemoh ato tapang i fatad no kakarayan. Saka, o mamidaˈoc kita a mikapot to tapang.”​—1 Tisalonika 4:13-17.

¹⁸ Saˈayaway miliyaw maˈorip wa itini ikor no piliyaw ni Kristo a tayni misatapang. Tahirato pifekadan no taˈangayay padiing, oya maˈoripayho a mapasimalay Krisciyang wa “makakoy a tayra i toˈem.” (Matay 24:31) Oya ‘macadaay talafekang’ a tamdaw, cowa ko ‘hahalafin mafotiˈ, tatodong noni, cowa ko mamaterek cangra i kapatayan a mitala. Wa “itiya i saikoray a soni no laepa to cecay a melet, fahal asa kita a mafalic a maemin.”​—1 Korinto 15:51, 52.

19. O manan ko ‘tadamaanay a miliyaway maˈorip’ hani?

¹⁹ Anini, ˈalomanay madimadiay Krisciyang cowa ka mapasimal no fangcalay saocor, cowa ko mamatahidang cangra tayra kakarayan malacafay ci Kristoan mala hongti. Kawra, hinatalaay cangra to sakaira no ‘romiˈad ni Yihofa’, mipalaˈafo toni tatiihay a hekal. Soˈlin awaay ko mafanaˈay to hahacowa mifekad ko sakalaˈafo, kawra, paihekalay ko wacay to mangataayto koniya romiˈad. (1 Tisalonika 5:1-3) Ano irato ko faelohay hekal no Kawas i, wa ira ko roma miliyaway maˈorip. Itiya, wa itini fafekang no sera a lakoing miliyaw maˈorip, patatikol a malo malefotay, halo tahadaˈoc a maˈorip. Iti:yaho, “o mitiˈeray to Kawas ko fafahiyan saka, mapanokay i cangraan ko mapalowaday a mapaˈorip nai patay a tamdaw nangra.” Kawra oya patikolay maˈorip a tamdaw ikor mapatayay. Palalinien to hatiniay miliyaw maˈorip, itiniay faelohay hekal a miliyaw maˈorip, o ‘tadamaanay a miliyaway maˈorip.’​—Hipray 11:35.

20. Misamaanay hano pakasoˈlin kita, miliyaway maˈorip no ikor o madadoedoay a pakayraan ko sapidemak?

²⁰ Sowal no Fangcalay Cudad o tatayra kakarayan a miliyaway maˈorip a tamdaw, wa “madadoedo konini a [miliyaw maˈorip].” (1 Korinto 15:23) Pakasoˈlin kita, o pakayraan no miliyaway maˈorip i fafekang no sera, wa tano madadoedoay a pakayraan ko pidemak. Mihaenay, milicayay ko roma tamdaw: “O mapatayay tamdaw anini, wa itini satapangan no pikowan ni Kristo 1,000 miheca a miliyaw maˈorip, micadato pilitemoh no salawina han? O mafanaˈay mikayat a madimadiay faˈinayan iti:yaho, wa salakat a miliyaw maˈorip, padama to finawlan no Kawas malikakawa i faelohay hekal han? Oya cowa pidoko ci Yihofaan a tamdaw, wa icowa a miliyaw maˈorip, hahacowa a miliyaw maˈorip hani?” Adihayay ko mahecaday a salicay. Ano haharateng han ko hatiniay a salicay, ka pihadidi a mitala ci Yihofaan ko tada ngaˈayay kira? Pakasoˈlin kita, ano maˈaraw ita ko pidemak ni Yihofa to taˈangayay ˈicel palowad to mapatayay tamdaw i, wa satelocteloc saan a mahemek.

21. Pakayni miliyaway maˈorip, hinatalaay kiso to maanan?

²¹ Nohatiniho kita mipaˈicel to pasoˈlin ci Yihofaan, pakayraan Ningra ci Yisan a mikiˈok kita, o materekay i ponoˈ Ningra a tamdaw oha mamiliyaw a maˈorip. (Yohani 5:28, 29; 11:23) O sowal ni Yis paihekalay iraay ko ˈicel ni Yihofa palowad to mapatayay tamdaw, sowal ni Yis, itini pinengneng no Kawas ci Apraham, Isak, Yakop ‘sahetoay o maˈoripay.’ (Luka 20:37, 38) Mihaenay, iraay ko lalangian ita mahecad ci Pawloan ko sowal: ‘O materekay a tokel ako i Kawas, o moecelay tamdaw ato cowa ka moecelay tamdaw wa miliyaw maˈorip maemin.’​—Dmak 24:15.