1-3. (a) Anni nakuan i ilaguttam ta primero ira nga kurugattam? (b) Ngatta kuruga importante i paginnolay? (Innan i letratu ta gafu na artikulo.)

NU MEYAVU nikaw, ‘Anni i importante ira nga tuddu na relihiommu?’ anni i tabbag mu? Siguradu nga kagiammu nga si Jehova i Namaratu anna Minangngiyawa-Inango. Baka ikagim paga nga kurugammu si Jesu-Cristo, nga natay bilang tavvu. Iyammummu paga nga mabbalin tu paraiso i davvun, nga paddianan na totolay na Dios adde ta mannanayun. Ngem ilagummu kari nga tadday ta tagibalorammu nga tuddu i meyannung ta paginnolay?

² Aru i rasottam tapenu ilagum i paginnolay bilang tadday nga importante nga tuddu maski nu iddanamattam mismu nga mapaliag ta dakal nga ziga anna mattolay tu mannanayun ta davvun. Kinagi ni apostol Pablo nu ngatta importante ta pangurug tam i paginnolay: “Nu ari nga maginnolay i natay ira, ikaya na nga kagian tu ari nga naginnolay si Cristo.” Nu ari napaginnolay si Cristo, ari nakuan yaya nga mammaguray nga Patul tam, anna awan nakuan tu serbi na tuddu tam meyannung ta pammaguray ni Cristo. (Bibbigan i 1 Corinto 15:12-19.) Ngem, ammu tam nga napaginnolay si Jesus. Megafu ta kumbinsidu tam tatun, neruma ittam ta Judio ira nga Saduceo, nga ariadda talaga alawatan nga mapaginnolay i natay. Maski nu meparubang ta panguyu-uyaw, itaddaggattam i pangurug tam ta paginnolay.​—Mar. 12:18; King. 4:2, 3; 17:32; 23:6-8.

 ³ Tagga ta nitura ni Pablo i “ollu [onu primero] ira nga magigiammu meyannung kani Cristo,” nilagumna “i tuddu meyannung ta . . . paginnolay na natay.” (Heb. 6:1, 2) Kinagi ni Pablo nga mangurug yaya ta paginnolay. (King. 24:10, 15, 24, 25) Ngem i kelagum na paginnolay ta primero nga doktrina, nga tadday ta “ollu ira nga gigiammuan meyannung ta uvovug na Dios,” ay arianna kayà kagian nga ari kuruga importante nga tuddu yatun. (Heb. 5:12) Ngatta gapa?

4. Anni ira i luttuag nga pakkiavu meyannung ta paginnolay?

⁴ Durante nga igafu na totolay i maggigiammu tu Biblia, mabibbigda i rekord na paginnolay ira gari, kagitta na paginnolay ni Lazaro. Tapus mammuadda i meyannung kani Abraham, Job, anni Daniel nga makkomfiansa nga mapaginnolay i natay ira ta mappange. Ngem, anni i itabbag mu nu egga i mangiyavu nikaw tu pamakurug nga mesimmu lagapa i pamaginnolay maski nu piga ragun onu aru siglo ngana nga nekagi yatun? Talaga kari nga kagian na Biblia nu sonu anni mesimmu i pamaginnolay? Makafekto yatun ira nga aspeto ta pangurug tam, yatutta innattam nu anni i kagian na Katurakan.

5. Anni nga klase na paginnolay i ollu tam labbi nga tabbagan?

⁵ Alistu para nittam nga nonopan nga maginnolay i bagu natay nga tolay. (Juan 11:11; King. 20:9, 10) Ngem kunnasi nu nepromesa i paginnolay tu piga dagun onu siglo ngana i nappasa? Makapattalo ka kari ta kunnatun nga nabinnay ngana nga promesa, maski nu nepromesa yatun ta bagu laman nga natay onu ta tadday nga nabayag ngana nga natay? Ta kakuruganna, talaga nesimmu i tadday nga paginnolay maski piga siglo ngana nga nepromesa yatun, anna kinurug mu. Kunnasi? Anni i koneksion natun ta iddanamammu nga paginnolay ta mappange?

6. Kunnasi nelagum si Jesus ta ketuppal na Salmo 118?

⁶ Meyannung ta paginnolay nga nabayag ngana nga nepromesa, ikonsidera tam i Salmo 118, nga kagian na tanakuan nga nitura ni David. Nelagum tatun i pakimemallo: “O AFU, ipakimallo mi tu paliaram-mukami! . . . Bendisionan paray na Dios i duttal ta ngagan na YAFU!” Awayyana tu meraddammammu nga nibase na totolay yaw ta Mesianiko nga profesiya nguri ta nappange si Jesus ta Jerusalem turi Nisan 9, piga aggaw nige na patena. (Sal. 118:25, 26; Mat. 21:7-9) Ngem, kunnasi nga tukuyan na Salmo 118 i paginnolay nga mesimmu kabalin na piga ragun? Innan paga i niprofesiya natun nga salmo: “I batu nga nanakitan na mamataddag ira tu balay, ay nabbalin tu kuruga importante nga batu na balay.”​—Sal. 118:22.

7. Kunnasi kagrabe i pammanaki na Judio ira kani Jesus?

⁷ Pinammanakitan na “mamataddag ira,” danuri Judio nga lider, i Mesias. Ariadda laman nilikuran si Jesus onu ari inalawa nga Cristo. Aru nga Judio i nammanaki sa adde ta punto nga kayàda nga ipapatay yaya. (Luc. 23:18-23) Wan, sinuportadda i kapatay ni Jesus.

8. Kunnasi mabbalin tu “kuruga importante nga batu na balay” si Jesus?

⁸ Nu napammanakitan anna napatay si Jesus, kunnasi yaya nabbalin tu “kuruga importante nga batu na balay”? Mesimmu laman yatun gukaban na paginnolena uli. Si Jesus mismu i nangipakanawag tatun. Inistoriana i ilustrasion nu sitaw minaltratu na trabahador ta koman yuri i zinog nira na makakkua ta koman, kagitta na pinammaltratu na Israelita ira ta profeta nga zinog na Dios nira. Ta ultimo na ilustrasion, zinog na makakkua ta koman i meddu nga anana nga mangirensia. Inalawada kari i anana? Ari vuluvuga. Grabe i pinattratu na trabahador ira sa megafu ta pinateda yaya. Kabalin ni Jesus  nga iyistoria yatun nga ilustrasion, tinukoyna i profesiya nga mabibbig ta Salmo 118:22. (Luc. 20:9-17) Kunnatun gabbalaman i nitura ni apostol Pedro turi ta nakiyuvovug yaya ta “mammaguray ira na Judio, i mannakam ira tuange ta mestru ira na Dob” ta Jerusalem. Tinukoyna nira si “Jesu-Cristo nga taga-Nazaret nga nipepato [da] ta krus (“nipapateda ta estaka,” NW), ngem pinaginnolay na Dios.” Tapus, niyammunna: “Yaw ‘i batu nga nanakitan na mamataddag ira tu balay ay nabbalin tu kuruga importante nga batu na balay.’”​—King. 3:15; 4:5-11; 1 Ped. 2:5-7.

9. Anni i kappabbaw nga nesimmu nga mabibbig ta Salmo 118:22?

⁹ Wan, ginatu nga dagun nigena, nipasingan na profesiya na Salmo 118:22 nga mesimmu i tadday nga paginnolay. Mapammanakitan anna matay i Mesias, ngem mapaginnolay mangana tapenu mabbalin tu kuruga importante nga batu na balay. Nabbalin gafu yaw nga napaginnolay nga Ana bilang i tadday nga “ngagan ta interu mundo nga niyawa na Dios tu makapaliag nittam.”​—King. 4:12; Efe. 1:20.

10. (a) Anni i niprofesiya na Salmo 16:10? (b) Ngatta makasiguradu ittam nga ari natuppal kani David i Salmo 16:10?

¹⁰ Ikonsidera i tadday paga nga bersikulo meyannung ta paginnolay. Maturu tu tanga-rivu dagun ngana nga dati nga netura yaw, i kinakurug nga mamatuyag nakuan ta komfiansam nga posible nga mesimmu i paginnolay maski nu nabayag ngana nga neprofesiya onu nepromesa yatun. Ta Salmo 16 nga meyannung kani David, mabibbig tam: “Ariam-mà nga pagurayan ta livun na natay, ta ariam-mu ipamavulun tu i napasikkal nikaw ay mavunno.” (Sal. 16:10) Ari kagian ni David nga ari yaya vuluvuga nga matay onu meyangay ta attanamman. Manawag nga kagian na Uvovug na Dios nga nallakay si David. “Nepedda [yaya] kavulu i ginafuanna ira anna nekokko yaya ta Siudad ni David” turi ta patena. (1 Pat. 2:1, 10) Anni gafu i kayà kagian na Salmo 16:10?

11. Kanni nakkomento si Pedro ta Salmo 16:10?

¹¹ Ngem mas paga nga manawagan ittam. Maturu tu tanga-rivu dagun kabalin nga netura yatun nga salmo anna piga ligguan kabalin na patay anna kapaginnolay ni Jesus, nikagi ni Pedro ta rinivu nga Judio anna proselita ira i meyannung ta Salmo 16:10. (Bibbigan i Kingngua 2:29-32.) Kinagina nga talaga natay si David anna netanam. Ammu yatun danuri maggigginna kani Pedro. Awan paga tu kinagi na Katurakan nga egga maski sinni nira nga nanuria ta kinagi ni Pedro nga “dana ammu [ni David] gapa tu paginnolayan na Dios” i duttal nga Mesias.

12. Kunnasi natuppal i Salmo 16:10, anna anni i pinakurug natun meyannung ta promesa na paginnolay?

¹² Pinaladda ni Pedro i puntona gukaban na pangipakolina ta kinagi ni David ta Salmo 110:1. (Bibbigan i Kingngua 2:33-35.) Nakoffun i pangipakanawag ni Pedro nga nebase ta Katurakan tapenu makumbinsi i aru nga totolay nga si Jesus ay “Yafu anna Cristo.” (King. 2:36) Tatun paga nga punto, nangurug i totolay nga natuppal i Salmo 16:10 turi ta napaginnolay si Jesus. Yatun gapa i nipakanawag ni Pablo turi ta nakipaddiskusion yaya ta Judio ira ta Antiokia ta Pisidia. Nakumbinsi ira ta argumentona, yatutta kayàda paga i magginna. (Bibbigan i Kingngua 13:32-37, 42.) Pakurugan gapa nakuan danatun nga profesiya na Biblia nga kurug i mappange nga paginnolay, maski nu piga siglo ngana i nappasa turi ta neprofesiya yatun nga milagro.

13. Anni nga pakkiavu i awayyana nga luttuag meyannung ta paginnolay?

¹³ Mapagaram tam nakuan nga talaga mesimmu i paginnolay maski piga siglo ngana nga nepromesa yatun. Ngem, baka manono  na tadday: ‘Kayà na kari kagian natun nga mabayag ngà paga maginnag tapenu masingan i iddeddukakku? Sonu anni mesimmu i paginnolay nga ekspektakku?’ Bueno, talaga kinagi ni Jesus ta apostolesna nga egga ira i gannug nga ariadda ammu anna ariadda mammuan. Egga ira i detalye meyannung ta “oras anna tiempo ira nga sinullo na Yama megafu ta pakawayya na.” (King. 1:6, 7; Juan 16:12) Ngem, ari kebalinan naw nga awan tu informasiottam meyannung ta tiempo na paginnolay.

14. Kunnasi neruma i paginnolay ni Jesus ta ollu ira nga napaginnolay?

¹⁴ Tapenu malippawa yatun, daddamman i paginnolay ira nga niprofesiya na Biblia. Siempre, i pinaka-importante ay i paginnolay ni Jesus. Nu ari yaya napaginnolay, awan nakuan tu iddanama tam nga masingan i paginnolay na minatay tam ira. Ari nga nattolay tu mannanayun danuri napaginnolay nige ni Jesus, kagitta na pinaginnolay da Elias anni Eliseo. Natay gabbalaman ira anna navunno ta pangitanamman. Ngem, “naginnolay si Cristo anna ari ngana vuluvuga nga matay, megafu ta awan ngana tu pakawayya sa na patay.” Ta langi, mattolay yaya “adde noka nga awan tu panuppalan na,” nga ari vuluvuga mavunno.​—Roma 6:9; Nep. 1:5, 18; Col. 1:18; 1 Ped. 3:18.

15. Anni kayà na kagian nga si Jesus “i ollu ta ngamin”?

¹⁵ I paginnolay ni Jesus i ollu ta kunnatun nga klase na paginnolay, anna siguradu gapa nga yatun i pinaka-importante. (King. 26:23) Ngem, ari laman tu yaya i nepromesa nga mapaginnolay ta langi nga mabbalin tu espiritu nga pinaratu. Nipasiguradu ni Jesus ta matalo nga apostolesna nga makipammaguray ira sa ta langi. (Luc. 22:28-30) Ngem tapenu malada yatun nga regalu, matay labbi ira. Tapus, kagitta ni Cristo, mapaginnolay ira ta espiritu nga baggi. Kunnatun gapa i niyesplika ni Pablo. Kinagina nga ari laman tu si Jesus i mapaginnolay, ngem egga gapa i karuan nga mapaginnolay ta langi. “I kada tadday ta natullo nga patturunug da: si Cristo i ollu ta ngamin, ay noka ta panoli na [“durante ta presensiana,” NW], ngamin ngana i totolay na.”​—1 Cor. 15:20, 23.

16. Anni i indikasion nga neyawa nittam meyannung ta tiempo na nelangitan nga paginnolay?

¹⁶ Mangiyawa yatun tu indikasion nittam nu sonu anni mesimmu i nelangitan nga paginnolay. Mesimmu yatun “noka ta panoli na” [“durante ta presensiana,” NW]. Nabayag ngana nga napakurug na Saksi ira ni Jehova base ta Katurakan nga namegafu turi ta 1914 ay nattolay ittam ngana ta nepromesa nga tiempo na “presensia” ni Jesus. Tulu-tuloy paga yatun, anna umara-aranni ngana i panuppalan naw nga sistema na ganna-gannug.

17, 18. Anni i mesimmu ta karuan nga nazelugan durante ta presensia na Cristo?

¹⁷ Mangikagi paga i Biblia tu detalye ira meyannung ta nelangitan nga paginnolay: “Ikaya mi tu kannammuan nu i kurug  nga meyannung ta natay ngana ira, . . . Kurugat-tam tu natay si Jesus, ngem naginnolay gabbalaman. Yatun tu ammu tam tu i Dios ay paginnolayan anna pevulunan na kani Jesus i natay ira nga nangurug sa, . . . Sittam nga matolay paga laman noka ta aggaw na panoli na Yafu, ay ariattam nga olluan i natay ngana ira. Maginna noka i mandu nga mekulle ta masikan, . . . Ay umulug mismu i Yafu nga maggafu ta langi. Danuri i natay nga nangurug kani Cristo i ollu nga maginnolay. Sittam gapa nga matolay paga tatun nga aggaw ay mattaradday nga mevulu nira, tapenu dafungat-tam i Yafu ta dian na kunam ira ta langi. Ay kanayun ngana ittam ta dian na Yafu.”​—1 Tes. 4:13-17.

¹⁸ Mamegafu i nelangitan nga paginnolay “ta aggaw na panoli na Yafu” [“ta presensia na Yafu,” NW]. Danuri nazelugan ira nga matolay paga ta davvun ta dakal nga ziga ay ‘dafungadda i Yafu ta dian na kunam ira.’ (Mat. 24:31) Danuri ‘manafung ta Yafu’ ay makagi nga ‘ari nga matay’ megafu laman ta ariadda maekspiriensa i mabayag nga patay. “Ta pangurianan nga kapaguni na trumpeta, moli [ira] ngamin ta manganannuan laman nga kagitta na kalistu na pakkuridam na mata.”​—1 Cor. 15:51, 52.

19. Anni i mas makasta nga paginnolay ta mappange?

¹⁹ Ari nga nazelugan i aru ta matalo nga Cristiano ta maddaggun anna ari nagalan nga masserbi ta langi kavulu si Cristo. Ngem, innaggadda i pangultimo naw nga marake nga sistema na ganna-gannug sonu aggaw ni Jehova. Awan tu makannammu ta eksakto nga tiempo na panuppalan, ngem ipasingan na ebidensia ira nga aranni ngana yatun. (1 Tes. 5:1-3) Kabalin natun, mesimmu noka i tadday paga nga klase na paginnolay​—paginnolay ta paraiso nga davvun. Egga i tiansa danuri napaginnolay nga mabbalin tu perfekto nga tolay anna ari ngana vuluvuga nga matay uli. Siguradu nga egga i mas makasta nga paginnolay anne turi ta nappasa nga “inalawa uli na babbay ira i naginnolay nga minatay da” ta natay gabbalaman ira.​—Heb. 11:35.

20. Ngatta makapattalo ittam nga organisado i paginnolay?

²⁰ Meyannung ta nelangitan nga paginnolay, kagian na Biblia nga mapaginnolay “i kada tadday ta natullo nga patturunug da.” (1 Cor. 15:23) Makasiguradu ittam nga mesimmu gapa i paginnolay ta davvun ta mepangngo nga patturunugna. Kakkasta yatun nga iddanama. Magollu kari nga mapaginnolay danuri natay nige na pamegafu na Tanga-rivu Dagun nga Pammaguray ni Cristo anna dafungan danuri iddeddukadda nga makannammu nira? I matalo kari nga lallaki gari nga egga i abilidadda nga mangirollu i magollu nga mapaginnolay tapenu tangngallan i totolay na Dios ta bagu nga mundo? Kunnasi danuri ari vuluvuga nga nasserbi kani Jehova? Sonu anni anna sitaw ira mapaginnolay? Aru paga i awayya nga mepakkiavu. Ngem, talaga kari nga mawag nga nonopan ta maddaggun danatun? Ari kari nga mas makasta nga innaggan yatun? Makapattalo ittam gafu nga kappagayaya nga obserban mismu nu kunnasi tuppalan ni Jehova danatun.

21. Anni i iddanamammu meyannung ta paginnolay?

²¹ Ta maddaggun, paladdattam nakuan i pangurug tam kani Jehova, nga namasiguradu nittam nga gukaban ni Jesus ay maginnolay danuri egga ta memoria na Dios. (Juan 5:28, 29; 11:23) Tapenu mapakurug nga egga i pakawayya ni Jehova nga mamaginnolay tu natay, kinagi ni Jesus nga “matolay ta pagimamma na Dios” da Abraham, Isaac, anni Jacob. (Luc. 20:37, 38) Aru i rasottam tapenu kagian gapa i kinagi ni Pablo: “Magiddanama ngà ta Dios . . . nga egga noka i paginnolay.”​—King. 24:15.