1-3. (a) Chuma muka chize katwatela kuvulyama kuvulukako nge tuli nakulava vyuma twafwelela? (b) Mwomwo ika kusanguka chapwila chachilemu? (Talenu muvwimbimbi wakulivanga.)

KACHI nge navamihulisa ngwavo, ‘Vyuma muka mwafwelela,’ kaha namukumbulula ngwenu ngachilihi? Munahase kukumbulula ngwenu, twafwelela ngwetu Yehova ikiye Tengi kaha nawa Muka-kuhana Kuyoya. Munahase nawa kuvuluka ngwenu mwafwelela muli Yesu Kulishitu uze afwile nakupwa ndando yakusokola. Munahase nawa kuvuluka ngwenu kulutwe hamavu nahakapwa palachise muze namukatwamanga vatu jaKalunga haya myaka yosena. Kutala namuvuluka navyakusanguka tahi?

² Tukwechi unjiho wakutulingisa tulweze vatu ngwetu twafwelela mukusanguka numba tuhu yetu vamwe natukahita haluyando lwalunene nakukayoya haya myaka yosena hano hamavu. Kaposetolo Paulu asolwele ovyo kusanguka chapwila chachilemu hakwamba ngwenyi: “Kachi nge kusanguka chavafu chauchiko chikupu, kahanyi naKulishitu vene kavamusangulako.” Nge Kulishitu kavamusangwileko kachi kapwa mwanganako kaha nawa vyuma tweji kunangulanga hachiyulo chenyi kachi vyeji kuyanga mwangana vene. (Tangenu Wavaka-Kolinde 1, 15:12-19.) Oloze twatachikiza ngwetu Yesu asangukile chikupu. Shikaho twalihandununa navaSatuse vavaYuleya  vaze vakanyinenga ngwavo kakwatwama kusangukako. Numba tuhu vatu navatusekeleka oloze natutwalaho lika kufwelela ngwetu kusanguka nachikapwako.—Mako 12:18; Vili. 4:2, 3; 17:32; 23:6-8.

³ Omu Paulu asonekele ‘vyakunangula chamaputukilo chakuvuluka Kulishitu’ avulukile nawa “nakunangula . . . [cha]kusanguka chavafu.” (Hepe. 6:1, 2) Kaha nawa Paulu asolwele hatoma ngwenyi afwelelele mukusanguka. (Vili. 24:10, 15, 24, 25) Numba tuhu kusanguka vachilavila havyuma tweji kulinangulanga vize vyapwa “vyamaputukilo vyavihande vyajila vyaKalunga,” oloze echi kachalumbununa nge chihande kana chapwa chachashiko. (Hepe. 5:12) Mwomwo ika?

4. Vihula muka twatela kulihulisa hachihande chakusanguka?

⁴ Omu vatu veji kuputukanga kulinangula Mbimbiliya, veji kutanganga mijimbu yakusanguka chize chalingiwile kunyima, chakufwana nge kusanguka chaLazalu. Kaha veji kulinangulanga ngwavo Apalahama, naYopa, naNdanyele vafwelelele ngwavo kulutwe vafu navakasanguka. Jino munahase kukumbulula ngachilihi nge vatu navamihulisa muvalumbunwine kuzachisa Mbimbiliya ovyo mwafwelela ngwenu kusanguka nachikapwako numba tuhu vachishikile lyehi kunyima? Uno Mbimbiliya yalumbununa lwola nakukapwa kusanguka tahi? Vyuma kana vyakwata havyuma twafwelela, shikaho tutalenu omu Visoneka vyahanjika.

5. Natuvangila kushimutwila hakusanguka muka?

⁵ Chinahase kupwa chachashi kufwelela ngwetu mutu uze nafu mukalinwaha mwasanguka. (Yowa. 11:11; Vili. 20:9, 10) Oloze kutala munahase kufwelela ngwenu vatu vaze vafwile lyehi navakasanguka kulutwe numba tuhu namuhita myaka yayivulu tahi? Kutala munahase kufwelela lushiko kana numba tuhu kalweshi kutesamo mukalinwomuko tahi? Twatachikiza ngwetu mwafwelela mukusanguka chize vahanjikilile chimweza kunyima chize chejile nakutesamo. Uno kusanguka muka vene echi? Kaha nachimikafwa ngachilihi mufwelele mukusanguka chize nachikapwako kulutwe?

6. Uno Yesu ateselemo ngachilihi mazu vasoneka hali Samu 118?

⁶ Tushimutwilenu hakusanguka chize vashikile lyehi kunyima. Hali Samu 118 hatwama mazu akwamba ngwavo: “Tunakulembelela ove Yehova, tulwile. . . . Vakisula ou mweza mulijina lyaYehova.” Pamo munahase kwanuka ngwenu vatu vahanjikile cheka mazu kana omu Yesu engilile muYelusalema haNyisane 9 halwola kwasalile makumbi amandende nakufwa chenyi. (Samu 118:25, 26; Mateu 21:7-9) Uno Samu 118 yavulukile ngachilihi vyakusanguka chize nachikapwako kulutwe? Achitalenu vyuma vyeka vize vapolofwetele chimweza hali Samu kana ngwavo: “Lilolwa lize vakanyine vaka-kutunga Linapu jino lilolwa lyalinene lyamumbango.”—Samu 118:22.

7. Kujinda Yesu chalingishile vaYuleya valinge ika?

⁷ Vatwamina vavaYuleya vaze vemanyinako “vaka-kutunga” vakanyine Meshiya. Ava vaYuleya kavakanyine Yesu kupwa Kulishitu kahako, oloze vamujinjile chikuma nakusaka kumujiha. (Luka 23:18-23) Ngocho vakundwijile vatu mangana vamujihe.

8. Uno Yesu ejile nakupwa ngachilihi “lilolwa lyalinene lyamumbango”?

⁸ Nge Yesu vamukanyine nakumujiha, kaha nahase kupwa ngachilihi “lilolwa lyalinene lyamumbango”? Nahase kupwa ngocho kuvanga kaha nge vamusangwile. Yesu ivene alumbunwine vyuma kana. Ahanjikile chifwanyisa chavaka-kulima vaze vayanjishilenga vatu vaze atuminenga mwenya-wande, nganomu vaIsalele vayanjishilenga vapolofweto jaKalunga. Kufumaho akukulwile ngwenyi, uze mwenya wande atumine mwanenyi uze azanga kaha nawa  swana yenyi. Uno ou mwana vamwitavilile tahi? Nduma. Ava vaka-kulima vamujihile. Yesu ahanjikile chifwanyisa kana hakuvuluka mazu aupolofweto atwama hali Samu 118:22. (Luka 20:9-17) Kaposetolo Petulu nawa ahanjikile chihande chakulifwanako omu apwile nakuhanjika kuli ‘vaka-kuyula, navakulwane, navaka-kusoneka vavaYuleya vaze valikungulwilile muYelusalema.’ Ahanjikile hali ‘Yesu Kulishitu wakuNazaleta uze vasukikile hachitondo, uze Kalunga asangwile kuvafu.’ Ngocho Petulu ahanjikile ngwenyi: “Ou ikiye ‘lilolwa lize mwamwene enu vaka-kutunga kupwa lyamokomoko, lize linapu jino lilolwa lyalinene lyamumbango.’”—Vili. 3:15; 4:5-11; Petu. 1, 2:5-7.

9. Uno mukanda waSamu 118:22 wenyikilile kuvyuma muka vyakulipwila?

⁹ Mazu aupolofweto atwama hali Samu 118:22 aze vasonekele lyehi kunyima, asolola nge kusanguka nachikapwako chikupu. Asolwele nge Meshiya navakamukana nakumujiha oloze mwakasanguka nakupwa lilolwa lyalinene lyamumbango. Lijina lyaYesu ou vasangwile likiko ‘vahanyine muli vatu lize vatela kuvalwila nalyo.’—Vili. 4:12; Efwe. 1:20.

10. (a) Vyuma muka wahanjikilile chimweza mukanda waSamu 16:10? (b) Twatachikiza ngachilihi ngwetu mazu ahali Samu 16:10 kawateselemo kuli Ndavichiko?

¹⁰ Tuchishimutwilenu havesi yikwavo yize yenyikilile kukusanguka. Vesi kana vayisonekele lyehi kunyima ngocho yinahase kumikafwa mufwelele ngwenu kusanguka nachikapwako numba tuhu namuhita myaka yayivulu. Mumukanda waSamu 16 uze vasonekele kuli Ndavichi vasonekamo ngwavo: “Kaweshi kukanguseza muFukako. Kaweshi kukechelela ou wove wakushishika akapole muwinako.” (Samu 16:10) Ndavichi kapwile nakulumbununa ngwenyi keshi kukafwa chipwe kumufundako. Mazu ahanjika hatoma ngwawo, Ndavichi ashinakajiwile nakufwa ngana mwavakakuluka jenyi. Ngocho “vamufunjile muNganda yaNdavichi.” (Vamya. 1, 2:1, 10) Jino mazu ahali Samu 16:10 ahanjikile hali mutu muka?

11. Lwola muka Petulu ahanjikile hali Samu 16:10?

¹¹ Omu mwahichile kafwe myaka likombakaji kufuma haze vasonekele eyi Samu kaha nawa omu hahichile vyalumingo kufuma haze afwile Yesu nakusanguka, Petulu ahanjikile hali Samu 16:10 kuli vaYuleya navaze valumukile nakupwa vaYuleya. (Tangenu Vilinga 2:29-32.) Ambile ngwenyi Ndavichi afwile chikupu, kaha vamufunjile. Vaze vapwile nakumwivwilila vatachikijile chuma kana. Kaha nawa Mbimbiliya kayahanjika ngwayo vatu vamuhamikile omu ambile ngwenyi “Ndavichi amwene chimweza vyuma vyakulutwe, kaha ahanjikile vyakusanguka” chaMeshiya uze vashikileko.

12. Uno Samu 16:10 yateselemo ngachilihi, kaha mazu kana atukafwa ngachilihi tufwelele mulushiko lwakusanguka?

¹² Petulu ashindakanyine chishina kana hakuvuluka mazu ahanjikile Ndavichi aze atwama hali Samu 110:1. (Tangenu Vilinga 2:33-36.) Petulu hakulumbununa kweseka naVisoneka chamukafwile akunyule vatu vetavile ngwavo Yesu ikiye “Mwata kaha nawa Kulishitu.” Kaha nawa vatu vejivile ngwavo Samu 16:10 yateselemo omu Yesu vamusangwile. Mukuhita chalwola, kaposetolo Paulu ashindakanyine hachishina chochimwe omu apwile nakuhanjika navaYuleya munganda yaAndeyoka muPishicha. Mazu ahanjikile avakwachile kumuchima, ngocho vasakile kwivwa vyavivulu. (Tangenu Vilinga 13:32-37, 42.) Nayetu twatela kufwelela ngwetu upolofweto wamuMbimbiliya uze wahanjika hakusanguka naukatesamo numba tuhu mazu kana vawahanjikile chimweza myaka yakunyima.

13. Vatu vanahase kuhulisa vihula muka hachihande chakusanguka?

¹³ Cheji kutukolezezanga chikuma hakuwana nge mazu vahanjikilile chimweza kutalisa kukusanguka ejile nakutesamo numba tuhu hahichile  myaka. Chipwe ngocho vatu vamwe vanahase kuhulisa ngwavo: ‘Uno ngwatela kuvandamina myaka yayivulu numba ngukamone vausoko wami vaze vafwa tahi? Uno kusanguka nachikapwako mwaka uka?’ Yesu alwezele vaposetolo jenyi ngwenyi kwapwile vyuma vimwe vize kavatelelele kutachikizako. Kaha ambile ngwenyi, kuli “lwola chipwe jingonde vize Tata atongola mungolo jenyi.” (Vili. 1:6, 7; Yowa. 16:12) Oloze echi kachalumbunwine nge kakweshi unjiho wakutukafwa tutachikize lwola lwakusangukako nduma.

14. Uno kusanguka chaYesu chalihandununa ngachilihi nachize chapwileko hakavanga?

¹⁴ Hakusaka twivwishise, tushimutwilenu hamijimbu yakusanguka yize vavuluka muMbimbiliya. Mujimbu umwe waulemu chikuma shina waYesu. Nge Yesu kavamusangwileko kachi katwatwama nalutalililo lwakukamona cheka vatu vaze vafwako. Vatu vaze vasangwile kuli Elija naElisha shimbu kanda Yesu, kavayoyele haya myakako. Vafwile cheka nakuvafunda. Oloze Yesu ‘vamusangula lyehi kuvafu, keshi kukafwa chekako, kufwa kacheshi cheka nangolo hali ikiyeko.’ Atwama mwilu, kaha mwayoyanga “haya myaka namyaka” keshi kukafwa chekako.—Loma 6:9; Kuso. 1:5, 18; Kolo. 1:18; Petu. 1, 3:18.

15. Mwomwo ika Yesu apwila “mihako yatete”?

¹⁵ Kusanguka chaYesu chikiko kaha chapwa chakulipwila. (Vili. 26:23) Oloze keshi Yesu kaha asanguka nakuyoyela mwilu mwamutu wakushipilituko. Yesu afwelelesele vaposetolo jenyi ngwenyi, navakayulanga hamwe mwilu. (Luka 22:28-30) Vatu kana vatela chatete kufwa numba jino vayenga mwilu. Kufumaho navakavasangula namijimba yakushipilitu ngana muze chapwile kuli Yesu. Paulu asonekele ngwenyi, “Kulishitu vamusangula kuvafu, ikiye mihako yatete yavaze vanasavala lyehi tulo twakufwa.” Paulu atwalileho kuhanjika ngwenyi nakukapwa vatu veka vaze navakasanguka nakukayoyela mwilu, hakwamba ngwenyi: “Mutu himutu nahenyi: Mihako yatete ivene Kulishitu, kaha namwiza vaze vakuli Kulishitu halwola lwakupwako chenyi.”—Koli. 1, 15:20, 23.

16. Chuma muka nachitukafwa tutachikize lwola navakasanguka vaze navakayoyela mwilu?

¹⁶ Mujimbu kana watukafwa tutachikize lwola navakasanguka vaze navakayoyela mwilu. Nachikapwako “halwola lwakupwako chenyi.” Vinjiho jaYehova vanazachisanga Visoneka nakuwana ngwavo kuputuka vene mu 1914 tunakuyoyela mulwola “lwakupwako” chaYesu, kaha nawa kukuma chamyaka yino chinapandama jino hakamwihi.

17, 18. Vyuma muka navikasoloka kuli vawavisa vamwe halwola lwakupwako chaKulishitu?

¹⁷ Mbimbiliya yahanjika nawa hali vaze navakasangukila mwilu ngwayo: “Kaha nawa enu vandumbwetu, etu katwasakile ngwetu muhone kutachikiza vyavaze vali nakusavala tulo twakufwako . . . Mwomwo kachi nge tunafwelela ngwetu Yesu afwile kaha nawa asangukile, ngocho  navaze nawa vanasavala tulo twakufwa . . . Kalunga mwakavaneha cheka naikiye hamwe. . . . Etu vavatonyi natuyoyanga palanga nakukupwako chaMwata, katweshi kukalivanga kulutwe lwavaze vanasavala lyehi tulo twakufwako, mwomwo ivene Mwata mwakafuma mwilu namutambi wangolo, . . . kaha vaze vanafwila muli Kulishitu navakalivanga kusanguka. Kufumaho, etu vavatonyi tuchili nakuyoya, navakatuhukula mumavwi navakiko hamwe nakuliwana naMwata mupeho, kaha natukapwanga naMwata shimbu yosena.”—Teso. 1, 4:13-17.

¹⁸ Kusanguka chakulivanga nachikapwako hanyima ‘yakupwako’ chaKulishitu. Vawavisa vaze navakapwako halwola lwaluyando lwalunene ‘navakavahukula mumavwi.’ (Mateu 24:31) Vaze ‘navakahukula’ kaveshi “[kuka]savala tulo twakufwako” kulumbununa nge kaveshi kukasavala tulo twakufwa hashimbu yayisukuko. Oloze “[navakavalumuna] mweka, mukapyapya kaha, mukukemwina chaliso, halwola nalukavuma luneta lwamakumishilo.”—Koli. 1, 15:51, 52.

19. ‘Kusanguka muka chamwenemwene’ tuli nakuvandamina?

¹⁹ Makumbi ano, vaka-Kulishitu vakushishika vavavulu kavapwa vakuwavisako, ngocho kaveshi kukaya mwilu nakuyula naKulishituko. Oloze vavandamina kukuma chakatwamino kamyaka yino halwola “[lwa]likumbi lyaYehova.” Kakweshi mutu atachikiza likumbi kanako, oloze kweseka navyuma vili nakusoloka chili nakusoloka nge likumbi kana lili hakamwihi. (Teso. 1, 5:1-3) Kufumaho jino numba kukapwe kusanguka cheka, kusangula vatu vakapwe mupalachise hamavu. Vatu vaze navakasanguka navakavalingisa vakapwe vakukupuka kaha kaveshi kukafwa chekako. ‘Kusanguka kana nachikapwa chamwenemwene’ kuhambakana chize chapwileko kunyima omu “mapwevo vatambwile . . . vafu javo vaze vasangwile” nakufwa cheka omu mwahichile lwola.—Hepe. 11:35.

20. Mwomwo ika twatela kufwelela ngwetu kusanguka nachikalingiwa mujila yakulonga?

²⁰ Mbimbiliya yahanjika hali vaze navakasanguka nakuyoyela mwilu ngwayo, navakavasangula “mutu himutu nahenyi.” (Koli. 1, 15:23) Hakuwana nge vaze navakasanguka nakuyoyela mwilu navakavasangula mujila yakulonga, shikaho twafwelela ngwetu mukiko nachikapwa nakuli vaze navakasanguka nakuyoyela hamavu. Chapundu vene tuli nakutalilila chuma chamwaza chikuma. Uno vatu vaze navakafwa mukukotokela vakiko navakalivanga kusanguka hakuputuka chaChiyulo chaKulishitu chaMyaka Likombakaji mangana vakavasambilile kuli vausoko wavo vaze vavatachikiza tahi? Nyi navakavangila kusangula malunga vakushishika vakushikulu vaze vakwechi uhashi mangana vakatwaminyine kanawa vatu mukaye kakahya tahi? Uno nachikapwa ngachilihi kuli vatu vaze kavazachililenga Kalungako? Uno lwola muka navakavasangula, kaha navakavasangwila kuchihela muka? Tunahase kuhulisa vihula vyavivulu hachihande kana. Oloze kutala chinahase kuneha ukalu nge katweshi kushimutwila havihula kanako tahi? Nachipwa chakutamo kuvandamina tukamone omwo navikapwa vyuma. Twafwelela ngwetu nachikapwa chamwaza chikuma kukamona omwo Yehova mwakalingilamo vyuma.

21. Vyuma muka muli nakutalilila kulutwe?

²¹ Oholyapwa twatela kaha kufwelela muli Yehova, uze atushika kuhichila muli Yesu ngwenyi, vafu vaze vali muvishinganyeka vyaKalunga navakasanguka. (Yowa. 5:28, 29; 11:23) Yesu asolwele ngwenyi Yehova akwechi ngolo jakusangula vafu hakwamba ngwenyi, Apalahama, naIsaka, naYakova “kuli ikiye vosena vavatonyi.” (Luka 20:37, 38) Shikaho tuli naunjiho wauvulu wakutukafwa tuhanjike ngana muze ahanjikile Paulu ngwenyi: “Nguli nalutalililo muli Kalunga, . . . ngwami nakukapwa kusanguka.”—Vili. 24:15.