1-3. (a) Ke thuto efe yeo re swanetšego go e bala gare ga dithuto tša rena tše bohlokwa kudu? (b) Ke ka baka la’ng thuto ya tsogo ya bahu e le bohlokwa kudu? (Bona seswantšho se se lego ka mo godimo.)

O BE o ka re’ng ge motho a ka go botšiša gore: ‘Dithuto tše bohlokwa kudu bodumeding bja gago ke dife?’ Ga go pelaelo gore o be o ka bolela gore Jehofa ke Mmopi le gore ke yena a re filego bophelo. Mohlomongwe o ka bolela le gore o dumela go Jesu Kriste yo a re hwetšego e le topollo. Le gona o be o ka bolela le gore lefase la paradeise le kgauswi, moo batho ba Modimo ba tlago go phela ka mo go sa felego. Eupša na o be o ka bolela ka tsogo ya bahu e le e nngwe ya dithuto tše bohlokwa kudu tša tumelo ya gago?

² Gaešita le ge re na le kholofelo ya go tlo phologa masetlapelo a magolo le go phela mo lefaseng ka mo go sa felego, re na le mabaka a kwagalago a go bolela ka tsogo ya bahu e le e nngwe ya dithuto tše bohlokwa kudu go seo re se dumelago. Moapostola Paulo o ile a bontšha gore ke ka baka la’ng tsogo ya bahu e le e nngwe ya dithuto tše bohlokwa go Bakriste. O itše: “Ge e ba ruri go se na tsogo ya bahu, gona le Kriste ga se a tsošwa.” Ge e ba Kriste a se a ka a tsošwa bahung, gona o be a ka se be Kgoši ya rena yeo e bušago, le gona go ruta batho gore o a buša e be e tla ba ga lefeela. (Bala 1 Bakorinthe 15:12-19.) Lega  go le bjalo, re a tseba gore Jesu o ile a tsošwa bahung. Ka ge re dumela gore Jesu o ile a tsošwa bahung, ga re swane le Basadutsei bao ba ilego ba gana ba tiišitše gore bahu ba ka phela gape. Gaešita le ge batho ba re kwera, re dula re na le tumelo e tiilego ya gore bahu ba tlo tsošwa.​—Mar. 12:18; Dit. 4:2, 3; 17:32; 23:6-8.

³ Ge Paulo a be a ngwala ka ‘thutatumelo ya pele ya mabapi le Kriste,’ o ile a bolela le ka ‘thuto ya tsogo ya bahu.’ (Baheb. 6:1, 2) Le gona, Paulo o ile a bolela a tiišitše gore o na le kholofelo ya gore bahu ba tlo tsošwa. (Dit. 24:10, 15, 24, 25) Le ge thuto ya tsogo ya bahu e le thutatumelo ya pele, e lego yeo re ithutago yona ge re thoma go ithuta Beibele, re swanetše go ithuta yona ka kelohloko. (Baheb. 5:12) Ka baka la’ng?

4. Re ka ipotšiša dipotšišo dife mabapi le tsogo ya bahu?

⁴ Ge batho ba thoma go ithuta Beibele, gantši ba ithuta ka dipego tša tsogo, tše bjalo ka tsogo ya Latsaro. Le gona ba ithuta ka gore Aborahama, Jobo le Daniele ba be ba na le tumelo ya gore go tla ba le tsogo ya bahu nakong e tlago. Eupša o be o ka re’ng ge motho yo mongwe a be a ka re o mo nee bohlatse bja go tšwa ka Beibeleng bja gore ke ka baka la’ng o tshepa kholofetšo ya gore go tla ba le tsogo ya bahu, gaešita le ge e boletšwe mengwageng e makgolo e fetilego? Le gona, na ge e le gabotse Beibele e a bolela gore bahu ba tlo tsošwa neng? Go hwetša dikarabo tša dipotšišo tše go bohlokwa ka gobane go tla re thuša go tiiša tumelo ya rena. Ka gona a re kweng gore Mangwalo a di araba bjang.

5. Ke dipotšišo dife tša mabapi le tsogo ya bahu tšeo re tlago go di araba?

⁵ Go bonolo go dumela gore motho yo a sa tšwago go hwa a ka tsoga. (Joh. 11:11; Dit. 20:9, 10) Eupša na re ka dumela gore motho yo e lego kgale a hwile—gaešita le ge a hwile mengwageng e makgolo e fetilego—a ka tsoga bahung nakong e tlago? Na re ka dumela gore o tla tsoga bahung go sa šetšwe gore ke kgale a hwile goba o sa tšwa go hwa? Ge e le gabotse go na le tsogo yeo o šetšego o dumela go yona yeo e ilego ya direga ka morago ga mengwaga e makgolo e tshepišitšwe. Ke tsogo efe yeo re bolelago ka yona? Gona e ama bjang kholofelo yeo o nago le yona ya gore go tla ba le tsogo nakong e tlago?

6. Jesu o ile a akaretšwa bjang go phethagaleng ga boporofeta bjo bo lego go Psalme 118?

⁶ Ga bjale a re boleleng ka tsogo yeo go ilego gwa bolelwa ka yona mengwaga e mentši e sa le pele. Ela hloko Psalme 118, yeo ba bangwe ba naganago gore e ngwadilwe ke Dafida. E na le kgopelo yeo e rego: “Ao hle Jehofa, re phološe hle! . . . A go šegofatšwe yo a tlago ka leina la Jehofa.” Mohlomongwe o gopola gore batho ba ile ba tsopola boporofeta bjo bja mabapi le Mesia ge Jesu a be a tsena Jerusalema ka pokolwana ka Nisani 9, pejana ga lehu la gagwe. (Ps. 118:25, 26; Mat. 21:7-9) Eupša Psalme 118 e ile ya bontšha bjang gore tsogo yeo go boletšwego ka yona e sa le pele, go be go tlo feta mengwaga e mentši pele e ka direga? Ela hloko se sengwe seo boporofeta bja psalme bo se boletšego. E itše: “Leswika leo baagi ba le gannego le fetogile hlogo ya sekhutlo.”​—Ps. 118:22.

7. Bajuda ba ile ba gana Jesu go fihla bokgoleng bofe?

⁷ “Baagi,” bao e lego baetapele ba Bajuda, ba ile ba gana Mesia. Ba ile ba dira se se fetago go gana Jesu goba go mo amogela e le Kriste. Bajuda ba bantši ba ile ba gana Jesu go fihla bokgoleng bja gore ba gapeletše Pilato gore a mo ahlolele lehu. (Luka 23:18-23) Ee, ba ile ba kgatha tema e kgolo ya gore Jesu a bolawe.

8. Go be go tla kgonega bjang gore Jesu e be “leswika le legolo la sekhutlo”?

⁸ Ge e ba Jesu a ile a ganwa le go bolawa ke Bajuda, o be a tlo ba bjang “leswika le legolo la sekhutlo”? Seo se be se tlo kgonega ge feela a be a ka tsošwa bahung. Jesu o ile a dira gore batho ba kwešiše taba ye ka go ba botša papišo yeo e bego e šupa go yena. Papišong yeo o boletše ka balemi bao ba bego swara gampe batho bao mong wa serapa  a bego a ba rometše go bona. Seo balemi bao ba se dirilego se ile sa swana le ge Baisiraele ba be ba swara gampe baporofeta bao Modimo a bego a ba rometše go bona. Mafelelong a papišo ye, mong wa serapa o ile a romela morwa wa gagwe yo a mo ratago e bile e le mojabohwa. Na morwa yoo o ile a amogelwa? Le gatee. Balemi bao ba ile ba fihla bokgoleng bja gore ba mmolaye. Ka morago ga gore Jesu a bolele ka papišo ye, o ile a tsopola boporofeta bjo bo lego go Psalme 118:22. (Luka 20:9-17) Moapostola Petro le yena o ile a bolela se se swanago mabapi le boporofeta bjoo ge a be a bolela le Bajuda bao e lego “babuši, . . . banna ba bagolo le bamangwalo.” O ile a bolela ka “Jesu Kriste wa Monatsaretha, yo [ba] mo kokotetšego koteng eupša e le yo Modimo a mo tsošitšego bahung.” Ka morago ga moo Petro o ile a bolela ka mo go kwagalago gore: “Le ke ‘leswika leo le ilego la swarwa ke lena baagi e se la bohlokwa gomme le fetogile hlogo ya sekhutlo.’”​—Dit. 3:15; 4:5-11; 1 Pet. 2:5-7.

9. Psalme 118:22 e ile ya bolela ka tiragalo efe e kgahlišago?

⁹ Ke therešo gore boporofeta bjo bo lego go Psalme 118:22 bo ile bja bolela mengwaga e makgolo e sa le pele gore tsogo e be e tla ba gona. Mesia o be a tlo ganwa gomme a bolawa, eupša o be a tlo tsošwa bahung gore e be leswika le legolo la sekhutlo. Ka gona Morwa yo a tsošitšwego e ile ya ba yena a nnoši yo a neilwego leina “leo ka lona re tlago go phološwa.”​—Dit. 4:12; Baef. 1:20.

10. (a) Ke’ng seo Psalme 16:10 e se boletšego e sa le pele? (b) Ke ka baka la’ng re ka kgodišega gore Psalme 16:10 e be e sa bolele ka Dafida?

¹⁰ Ela hloko temana e nngwe yeo e ilego ya bolela gore go tla ba le tsogo. Tsogo yeo e ile ya direga ka morago ga mengwaga e fetago e sekete e boletšwe. Taba ye e re kgodiša gore tsogo ya bahu e tla ba gona go sa šetšwe gore e ile ya holofetšwa mengwaga e mentši pele e ka direga. Go Psalme 16, yeo e ngwadilwego ke Dafida, re bala gore: “O ka se tlogele moya wa ka o le Bodulabahu. O ka se dumelele mohlanka wa gago yo a botegago a bola ka lebitleng.” (Ps. 16:10) Dafida o be a sa bolele gore o be a ka se tsoge a hwile goba a ya ka lebitleng. Lentšu la Modimo le bolela ka mo go kwagalago gore Dafida o ile a tšofala. Ka morago ga go re a hwe, o ile “a robala le borakgolokhukhu ba gagwe gomme ba mmolokela Motseng wa Dafida.” (1 Dikg. 2:1, 10) Ka gona, Psalme 16:10 e ra go re’ng?

11. Petro o boletše neng ka Psalme 16:10?

¹¹ Ka morago ga mengwaga e fetago e sekete Psalme ye e ngwadilwe, e bile go fetile dibeke tše mmalwa Jesu a tsošitšwe bahung, Petro o ile a bolela ka Psalme 16:10 le Bajuda ba diketekete le batho bao ba sokologetšego tumelong ya Sejuda. (Bala Ditiro 2:29-32.) O ile a bolela gore Dafida o be a hwile e le ka kgonthe e bile a bolokilwe. Batho bao ba bego ba theeditše Petro ba be ba tseba seo. Le gona, pego yeo ga e bolele gore go bile le motho yo a ilego a ganetša seo Petro a bego a se bolela mabapi le Dafida gore “o bone e sa le pele gomme a bolela ka tsogo” ya Mesia yo a holofeditšwego.

12. Psalme 16:10 e ile ya phethagala bjang, gona seo se tiišetša bjang taba ya gore go tla ba le tsogo ya bahu?

¹² Petro o ile a gatelela taba yeo a bego a bolela ka yona ka go tsopola mantšu a Dafida ao a lego go Psalme 110:1. (Bala Ditiro 2:33-36.) Tsela yeo Petro a beilego mabaka ka yona a diriša Mangwalo e ile ya kgodiša mašaba gore Jesu e be e le “Morena le Kriste.” Eupša se bohlokwa le go feta ke gore batho ba ile ba bona gore Psalme 16:10 e ile ya phethagala ge Jesu a be a tsošwa bahung. Ka morago ga moo, moapostola Paulo le yena o ile a nea mabaka a kwagalago ge a be a bolela le Bajuda motseng wa Antiokia kua Pisidia. Seo a bego a se bolela se ile sa ba kgahla kudu gomme ba nyaka go kwa ka mo go oketšegilego. (Bala Ditiro 13:32-37, 42.) Le rena re swanetše go thabišwa ke gore diporofeto tše tša Beibele tša mabapi le tsogo di ile tša phethagala. Le gona re swanetše go thabišwa ke gore di a tshepagala gaešita  le ge go ile gwa feta mengwaga e makgolo pele di ka phethagala.

13. Ke dipotšišo dife tšeo re ka ipotšišago tšona mabapi le tsogo?

¹³ Re swanetše go thabišwa ke gore tsogo e ka ba gona le ge e ile ya tshepišwa mengwaga e mentši pele e ka direga. Lega go le bjalo, motho a ka ipotšiša gore: ‘Na ke swanetše go leta nako e telele e le gore ke tle ke bone motho yo ke mo ratago a tsoga bahung? Ge e le gabotse, bahu ba tlo tsoga neng?’ Jesu o ile a botša baapostola ba gagwe gore go be go na le dilo tšeo ba bego ba sa di tsebe le tšeo ba bego ba ka se di tsebe. O itše: “Ga se taba ya lena go tseba dinako goba mehla yeo Tate a e laolago.” (Dit. 1:6, 7; Joh. 16:12) Lega go le bjalo, se ga se bolele gore re leswiswing mabapi le gore tsogo e tlo ba neng.

14. Tsogo ya Jesu e ile ya fapana bjang le ya bao ba ilego ba tsošwa pele ga gagwe?

¹⁴ Tsogo e bohlokwa kudu yeo go bolelwago ka yona ka Beibeleng ke ya Jesu. Ge nkabe Jesu a se a ka a tsošwa, re be re ka se be le kholofelo ya go tlo bona baratiwa ba rena ba phela gape. Batho bao ba ilego ba tsošwa bahung pele Jesu a ka tla mo lefaseng, bao ba ilego ba tsošwa ke Eliya le Elisha, ga se ba ka ba phela ka mo go sa felego. Ba ile ba hwa gape gomme ba bola ka lebitleng. Go fapana le bona, Jesu ‘o ile a tsošwa bahung, e bile ga a sa hwa; lehu ga le sa mmuša.’ Ka ge ga bjale a phela legodimong, o phela go iša “mehleng ya neng le neng,” e bile a ka se tsoge a bodile.​—Baroma 6:9; Kut. 1:5, 18; Bakol. 1:18; 1 Pet. 3:18.

15. Ke ka baka la’ng Jesu a bitšwa “thakangwaga”?

¹⁵ Tsogo ya Jesu ya go tsošetšwa legodimong e bile ya mathomo le e bohlokwa kudu. (Dit. 26:23) Lega go le bjalo, ga se yena a nnoši yo a ilego a tsošwa bahung gore a yo phela legodimong e le sebopiwa sa moya. Jesu o ile a kgonthišetša baapostola ba gagwe bao ba botegago gore ba tlo ya go buša le yena legodimong. (Luka 22:28-30) Ba be ba tla swanelwa ke go hwa pele e le gore ba yo phela legodimong. Ka morago ga moo, go fo swana le Kriste, ba be ba tla tsošwa e le dibopiwa tša moya. Paulo o ngwadile gore “Kriste o tsošitšwe bahung, yena thakangwaga ya bao ba robetšego lehung.” Paulo o ile a tšwela pele ka go bolela gore go tlo ba le bao ba tlago go tsošetšwa go yo phela legodimong. O itše: “Yo mongwe le yo mongwe o phedišwa go ya ka boemo bja gagwe. Thakangwaga ke Kriste, ka morago ga moo ya ba bao e lego ba Kriste nakong ya go ba gona ga gagwe.”​—1 Bakor. 15:20, 23.

16. Ke seetša sefe seo re se hwetšago mabapi le nako yeo tsogo ya go tsošetšwa legodimong e bego e tlo thoma ka yona?

¹⁶ Mantšu a Paulo a re nea seetša mabapi le tsogo ya go tsošetšwa legodimong gore e be e tla direga neng. E be e tla direga “nakong ya go ba gona ga gagwe.” Ke kgale Dihlatse tša Jehofa di hweditše bohlatse bja go tšwa Mangwalong bjo  bo bontšhago gore re phela “nakong ya go ba gona ga [Kriste]” yeo e thomilego ka 1914. Nako yeo e sa dutše e tšwela pele le lehono, le gona lefase le la Sathane le kgauswi le go fedišwa.

17, 18. Go tla direga’ng ka ba bangwe ba batlotšwa nakong ya go ba gona ga Kriste?

¹⁷ Beibele e hlalosa ka mo go oketšegilego mabapi le tsogo ya go tsošetšwa legodimong. E re: “Ga re nyake gore le hloke tsebo mabapi le bao ba robalago lehung . . . Ge e ba re dumela gore Jesu o hwile a ba a tsoga, gona le bao ba robetšego lehung . . . Modimo o tla ba bušetša bophelong. . . . Bao gare ga rena ba tla bego ba phela nakong ya go ba gona ga Morena, le gatee re ka se ke ra eta pele bao ba robetšego lehung; gobane Morena o tla theoga legodimong ka mokgoši wa taelo, . . . gomme bao ba hwilego e le barutiwa ba Kriste ba tla tsoga pele. Ka morago ga moo rena ba ba phelago bao ba sa dutšego ba le gona, re tla išwa gotee le bona ka maru go yo gahlana le Morena sebakeng; ka go re’alo ka mehla re tla ba le Morena.”​—1 Bathes. 4:13-17.

¹⁸ Tsogo ya mathomo, e lego ya go tsošetšwa legodimong, e be e tla direga nengneng ka morago ga gore “go ba gona” ga Kriste go thome. Batlotšwa bao ba tla bego ba phela nakong ya masetlapelo a magolo ba “tla išwa . . . ka maru” legodimong. (Mat. 24:31) Bao ba ‘tlago go išwa’ ka maru legodimong ba ka se “robale . . . lehung” ka kgopolo ya gore ba ka se tšee nako e telele ba hwile. “Ka moka . . . [ba] tla fetošwa, ka nakwana, ka go ponya ga leihlo, nakong ya phalafala ya mafelelo.”​—1 Bakor. 15:51, 52.

19. Ke ‘tsogo efe e kaone’ yeo re e letetšego?

¹⁹ Lehono, Bakriste ba bantši bao ba botegago ga se batlotšwa e bile ga se ba bitšwa gore ba yo hlankela le Kriste legodimong. Ka gona ba fela pelo ya go tlo bona “letšatši la Jehofa” ge a tla be a fediša lefase le la Sathane. Ga go na motho yo a ka tsebago tlwaa nako yeo bofelo bo tlago ka yona, eupša Beibele e re nea bohlatse bjo bo bontšhago gore bofelo bo kgauswi. (1 Bathes. 5:1-3) Ka morago ga moo, go tla ba le tsogo e nngwe ya bahu bao ba tlago go tsošetšwa go phela lefaseng la paradeise. Bao ba tla bego ba tsošitšwe ba tla phethagala gomme ba se sa hwa gape. Yeo ruri e tla ba e le “tsogo e kaone” go feta ya batho bao ba ilego ba tsošwa bahung nakong e fetilego eupša ka morago ba hwa.​—Baheb. 11:35.

20. Ke ka baka la’ng re ka kgodišega gore tsogo ya bahu e tlo direga ka thulaganyo?

²⁰ Re sa bolela ka tsogo ya go tsošetšwa go yo phela legodimong, Beibele e re yo mongwe le yo mongwe o tla tsošwa ka nako ya gagwe. (1 Bakor. 15:23) Le rena re ka kgodišega gore batho bao ba tlago go tsošwa mo lefaseng le bona ba tlo tsošwa ka thulaganyo. Se se ka dira gore re ipotšiše gore: Na bao ba sa tšwago go hwa ba tlo tsošwa mathomong a Pušo ya Kriste ya Mengwaga e Sekete gomme ba amogelwa ke batho bao ba ba tsebago? Na banna ba botegago ba bogologolo bao ba bego ba na le bokgoni bja go etelela batho ba Modimo pele, ba tla tsošwa pele e le gore ba tle ba hlahle batho ba Modimo lefaseng le lefsa? Go thwe’ng ka batho bao ba sa kago ba hlankela Jehofa? Ba tla tsošwa neng le gona kae? Re ka ipotšiša dipotšišo tše dintši. Eupša ga go hlokagale gore re ikopiše hlogo ka go ipotšiša dipotšišo tše gona bjale. Go kaone gore rena re no letela Jehofa. Re ka tshepa gore e tlo ba nako e thabišago go bona ka tsela yeo Jehofa a tlago go dira dilo ka yona.

21. Wena o na le kholofelo efe ka tsogo ya bahu?

²¹ Ge re sa dutše re letetše Jehofa, re swanetše go tiiša tumelo ya rena go yena. A diriša Kriste, o re tshepišitše gore bahu bao ba lego ka mogopolong wa gagwe ba tla tsošwa. (Joh. 5:28, 29; 11:23) Go bontšha gore Jehofa Modimo o tlo tsoša bahu, Jesu o kile a bolela gore Aborahama, Isaka le Jakobo “ba a phela go [Jehofa].” (Luka 20:37, 38) Go molaleng gore re na le mabaka a mantši a go bolela go swana le Paulo yo a itšego: “Ke na le kholofelo go Modimo . . . ya gore go tla ba le tsogo.”​—Dit. 24:15.