1-3. (a) Ammanankehu qaru rosi giddo mittu hiikkonneeti? (b) Kaote hexxo hasiissannota ikkitinohu mayiraati? (Hanafote noo misile lai.)

MITTU manchi ‘Ammanakkihu qaru rosi maati?’ yee xaˈmihero mayite qolatto? Yihowa Kalaqaanchonna Heeshsho Uyinonkeha ikkinota ammanattota kulattositi egennantinote. Wodo ikke reyinonkeha Yesuusi Kiristoosi ammanattota kulattora dandaatto. Qoleno albillitte uulla gannate ikkitannotanna hakkiicho Maganu manni hegerera heeˈrannota hagiirrunni kulattosira dandaatto. Kayinni kaote hexxo ammanankehu qaru rosi wido ikkitinota kulatto?

² Bayira qarra lubbotenni heeˈne saˈne hegerera heeˈrate hexxineemmoha ikkirono, kaote hexxo ammanankehu qaru rosi wido ikkitinota ammanneemmo gede assannonkeri no. Soqqamaasinchu Phaawuloosi kaote hexxo ammanankera qara coye ikkitinota xawisanni togo yiino: “Reyotenni kaˈˈa nookkiha ikkiro, Kiristoosino reyotenni dikaino yaate.” Yesuusi reyotenni kainokkiha ikkiro, isi xa iima Maganu Mangiste Moote ikke gashsha didandaanno; hatto ikkiro qole Yesuusi gashshooti daafira rosiinseemmo rosi waaga diafiˈranno. (1 Qorontoosi 15:12-19 nabbawi.) Ninke kayinni Yesuusi reyotenni kainota anfoommo. Ninke Yesuusi kainota ammanneemmo daafira, Ayihudete Saduqooti gede diˈˈikkinoommo; insa Yesuusi reyotenni kainota kaaddino.  Mannu mishannonkeha ikkirono, Maganu reyitinore kayisannota ammana diagurreemmo.—Maq. 12:18; Soq. 4:2, 3; 17:32; 23:6-8.

³ Phaawuloosi “reyotenni kaˈˈa” ‘Kiristoosi daafira uyinoonnihu umi rosi’ wido ikkitinota coyiˈrino. (Ibi. 6:1, 2) Qoleno isi reyino manni reyotenni kaˈˈannota ammanannota xawisino. (Soq. 24:10, 15, 24, 25) Kaote hexxo “Maganu qaaliha umi roso” ikkiturono, tenne hexxo daafira seekkine xiinxalla hasiissannonke. (Ibi. 5:12) Mayira?

4. Kaote daafira hiikkuri xaˈmuwa xaˈminammora dandiineemmo?

⁴ Mannu Qullaawa Maxaafa xiinxalla hanafanno wote, hunda reyotenni kaino mannire rosanno; kuri manni giddo mittu Aliaazaariiti. Qoleno kuni manni Abirihaami, Iyyoobinna Daanieeli albillitte reyitinori kaˈannota ammantinota rosanno. Kayinni mittu manchi mannu reyotenni kaˈˈanno yine qaale eˈnihunni lowo xibbi diri gedensaanni reyitinori kaˈannota leellishshanno taje kulattosira xaˈmihero mayite qolatto? Qullaawu Maxaafi reyitinori kaˈanno yanna kulanno? Kuri xaˈmuwara dawaro afiˈranke ammananke kaajjishshanno; hanni tenne haja daafira Qullaawu Maxaafi mayyaannoro xiinxallino.

5. Balanxe hiittenne kaore ronseemmo?

⁵ Reyino manchi bayichonko reyotenni kaino yiniro tenne ammane adha diqarrissannonke. (Yoh. 11:11; Soq. 20:9, 10) Kayinni albillitte lowo xibbi diri albaanni reyitinori kaˈanno yiniro tenne ammana dandiineemmo? Muli yannara reyino manchino ikko alba reyino manchi kaˈˈanno yine lowo diri albaanni eˈnoonninke qaale ammana dandiineemmo? Lowo xibbi diri albaanni masaalloonniti woˈmite kaˈino kao no; tini kao ninkeno ammanneemmote. Tini kao hiittenneeti? Tini kao albillitte reyino manni kaˈˈannota ammanneemmo gede kaaˈlitannonkehu hiittoonniiti?

6. Faarso 118 Yesuusi aana woˈmitinohu hiittoonniiti?

⁶ Lowo xibbi diri albaanni kulloonni kaore afate hanni Daawiti borreessino yine hendannita Faarso 118 xiinxallino. Tenne faarsora isi togo yee huucciˈrino: “Kaaliiqa ballo eeggatena gatisinke! . . . Kaaliiqi [“Yihowa,” NW] suˈminni daannohu maassaminoha ikko.” Tini Mesihichu daafira coyiˈnoonni hedooti; Yesuusi reyara shiima yannara albaanni Niisaani 9nni Yerusaalame haˈranna mannu tenne hedo qummi asse qeexaaˈlino. (Far. 118:25, 26; Mat. 21:7-9) Faarso 118 lowo diri gedensaanni woˈmitino kao kultannonkehu hiittoonniiti? Faarsaasinchu hatte fooliishshonkura togo yiino: “Mine mintannori mishshe agurtino kinchi woˈmunkura umo ikkino.”—Far. 118:22.

7. Ayihude Mesihicha adha gibbinohu hiittoonniiti?

⁷ “Mine mintannori” yiniri Ayihudete murrooti Mesihicha adha gibbino. Insa iso buuraminoha ikkinota ammante adha gibbe calla diagurtino. Batinyu Ayihudete manni, Philaaxoosi Yesuusa shaanno gede xaˈmirino. (Luq. 23:18-23) Ee, insa Yesuusa shinanni gede gano gantino.

8. Yesuusi “dhaawate kincho” ikkinohu hiittoonniiti?

⁸ Ayihude Yesuusa adha gibbinohanna shitinosiha ikkina, isi “woˈmunkura umo” ikka dandaannohu hiittoonniiti? Kuni ikkannohu isi reyotenni kairo callaati. Yesuusi umisi tenne daafira coyiˈrino. Isi togo yee lawishsha kulino: Mittu gawartichi loosaasinesiwa soqqamaasinchosi soyino; hakkiinni Israeele Maganu masaalaano assidhunte gede loosaasineno konne soqqamaasincho beebba assidhino. Jeefote gatu anni  baxanno beettosi soyino. Insa konne beetto macciishshituyya? Dimacciishshitino. Isinni loosaasine beetto shitino. Yesuusi lawishsha kule gudi gedensaanni, Faarso 118:22 aana noo hedo qummi asse coyiˈrino. (Luq. 20:9-17) Soqqamaasinchu Pheexiroosino “Yihudu roorrootinna geerru, seeru rosiisanno Yerusaalamete” songite noowa konne qummeeshsha qummi assino. Isi “Kiˈne suttinihunna Maganu reyotenni kayisisihu Naaziretete Yesuusi Kiristoosi” yee coyiˈrino. Hakkunni gedensaanni Pheexiroosi togo yee xawise coyiˈrino: “Kiˈne mine mintinanniri mishshine agurtinoonni kinchi isooti; isi dhaawate kincho ikkino.”—Soq. 3:15; 4:5-11; 1 Phe. 2:5-7.

9. Faarso 118:22 te aana hiikkonne dhagge ikkanno coye kulloonni?

⁹ Ee, lowo xibbi diri albaanni Faarso 118:22 te aana kao heedhannota masaalloonni. Mesihicha gimbanni, hattono shinanni; ikkollana isi reyotenni kae woˈmunkura umo woy dhaawate kincho ikkanno. Kuni reyotenni kaˈˈannohu Maganu beetti ‘gatote hasiissannonkeha mannaho uyinoonni’ suˈma baala roorinoha afiˈrinoha ikkanno.—Soq. 4:12; Efe. 1:20.

10. (a) Faarso 16:9 te aana mayine masaalloonni? (b) Faarso 16:9 Daawiti aana woˈmitinokkita mayinni anfeemmo?

¹⁰ Hanni kao heedhannota balanxe masaalloonniha wole qummeeshsha laˈno. Konne qummeeshsha borreessinoonnihu mitto kume saˈˈanno diri albaanniiti; tini qaale eˈnihunni lowo diri gedensaannino reyino manni kaˈˈannota ammanneemmo gede assitannonke. Faarso 16te aana Daawiti togo yiino: “Lubboˈya jeennaateho [woy, waammate] diagurattose. Qullaawikki hoqara worte diagurattosi.” (Far. 16:9) Daawiti togo yiinohu ani direyeemmo woy mannu eanno waamma dieˈˈeemmo yaate diˈˈikkino. Maganu Qaali Daawiti geedhinota xawise kulanno. Hakkiinni isi “annuwasinte gede reenna Yerusaalamete Daawiti katama yinannihura madaarrisi.” (1 Mot. 2:1, 10) Ikkina Faarso 16:9 aye daafira kultanni no?

11. Pheexiroosi Faarso 16:9 te aana noo hedo xawisinohu mamarooti?

¹¹ Qullaawu Maxaafi tenne daafira kulannonke. Hattenne faarso borreessinihunni mitto kume saˈˈanno diri gedensaanni yaano Yesuusi reyotenni kaihunni shiima lamala gedensaanni Pheexiroosi Ayihudetenna Yihudimmate soorramino mannira Faarso 16:9 aana noo hedo xawisinonsa. (Soqqamaasinete Looso 2:29-32 nabbawi.) Pheexiroosi Daawiti reyenna madaarroonnita kulinonsa. Hakko noo manni tenne afino. Pheexiroosi lede Daawiti “Maganu albillitte assara noore balaxe afe, Kiristoosi reyotenni kaˈˈannota” coyiˈrino yiino; Qullaawu Maxaafi Pheexiroosi hatto yii yannara hakko noo manni giddo tennera huluullaminohu noota dikulanno.

12. Faarso 16:9 woˈmitinohu hiittoonniiti? Tini masaalo woˈmase kaote hexxo daafira maa kultannonke?

¹² Pheexiroosi Faarso 110:1te aana noota Daawiti borreessino hedo qummi asse coyiˈrinori halaale ikkinota buuxisino. (Soqqamaasinete Looso 2:33-36 nabbawi.) Pheexiroosi konni garinni Qullaawa Borro horoonsiˈre xawisasi, batinyu manni Yesuusi “Mootichanna Kiristoosa” ikkinota ammananno gede assitino. Qoleno mannu Yesuusi reyotenni kai yannara Faarso 16:9 woˈmitinota huwatino. Yannate gedensaanni soqqamaasinchu Phaawuloosino Phisidiyu giddo noohu Antsookiya yinanni katamira heedhanno Ayihudera rosiisi yannara tenne taje horoonsiˈrino. Phaawuloosi rosiisinonsari baxisinonsa daafira wole woteno daye rosiisansara xaˈmidhino. (Soqqamaasinete Looso 13:32-37, 42 nabbawi.) Tini Qullaawu Maxaafi masaalo lowo xibbi diri albaanni  masaalloonnita ikkiturono woˈmitinota ninkeno ammana dandiineemmo.

13. Kaote daafira hiikkuri xaˈmuwa xaˈminammora dandiineemmo?

¹³ Qaale eˈnihunni lowo diri gedensaannino reyino manni kaˈˈannota afanke jawaachishshannonke. Ikkirono mittu manchi togo yee hedara dandaanno: ‘Shiiroommo manninni xaadate konni gedensaanni lowo diro agadheemmo yaate? Reyino manni kaˈˈannohu mamarooti?’ Yesuusi rosaanosira insa afa dandiitannokki coyi noota kulinonsa. Yesuusi ‘Annu [Yihowa] roorresinni hirqino [woy, murino] yannanna diri’ noota coyiˈrino. (Soq. 1:6, 7; Yoh. 16:12) Hatto yaa kayinni reyitinori kaˈanno yanna afa horo didandiineemmo yaa diˈˈikkino.

14. Yesuusi kao wolu manni kaonni baxxitannohu hiittoonniiti?

¹⁴ Tenne afate hanni Qullaawu Maxaafi giddo noota reyotenni kaˈinori daafira kultanno xagge qaagi. Kuri kao giddo baalanta roortannoti Yesuusi kaooti. Yesuusi reyotenni kainokkiha ikkoommero, shiiˈnoommo manni ledo galagalle xaandeemmo yine hexxa didandiineemmo. Yesuusira albaanni reyotenni kaˈinori lawishshaho, Eeliyaasinna Elsai kayisino manni hegerera diheeˈrino. Insa galagale reyino, hattono waammate giddo bushsha ikkite gattino. Yesuusi kayinni ‘reyotenni kaino daafira, layinkimeeshsho reyannokkitanna reyono isi aana wolqa afidhinokkita’ anfoommo. Isi iima ‘hegerera’ heeˈranno, hattono layinkimeeshsho direyanno.—Rom. 6:9; Aju. 1:5, 18; Qol. 1:18; 1 Phe. 3:18.

15. Yesuusi ‘umiha ikke’ reyotenni kaˈˈasi mayi horo afidhino?

¹⁵ Mite yee iima heeˈrate reyotenni kainohu Yesuusaati; qoleno isi kao baalanta roore kaooti. (Soq. 26:23) Kayinni ayyaanu kalaqo ikke iima heeˈrate reyotenni kainohu Yesuusa calla diˈˈikkino. Yesuusi ammanantino soqqamaasinesira iima ledosi gashshitannota kulinonsa. (Luq. 22:28-30) Insa konne baˈraarsha afiˈrate balaxxe reya hasiissannonsa. Hakkunni gedensaanni insa Kiristoosi gede ayyaanu biso uddidhe reyotenni kaˈanno. Phaawuloosi, “Kiristoosi reyitinorira reyotenni kaˈˈate umiha ikke, halaalinta reyotenni kaino” yee borreessino. Hakkiinni Phaawuloosi iima heeˈrate reyotenni kaˈannori noota coyiˈrino; togo yiino: “Kuni ikkannohuno bado badosinniiti: Umiha ikke Kiristoosi kaˈˈanno; isi daanno woyite [“bayicho amadanno wote,” NW] isire ikkitinori kaˈanno.—1 Qor. 15:20, 23.

16. Iima heeˈrate kaˈannori mamoote kaˈannoro anfeemmo gede kaaˈlannonkeri maati?

¹⁶ Phaawuloosi coyiˈrinori iima heeˈrate kaˈannori mamoote kaˈannoro anfeemmo gede kaaˈlannonke. Kuni ikkannohu Yesuusi  “bayicho amadanno” yannaraati. Yihowa Farciˈraasine Qullaawa Borro xiinxallite Yesuusi 1914nni kayise ‘bayicho amade nootanna’ tini alame baˈanno yanna gambissinota ammantanno.

17, 18. Kiristoosi bayicho amadanno yannara, mitu buuramino Kiristaani ma ikkanno?

¹⁷ Qullaawu Maxaafi iima heeˈrate reyotenni kaˈannori daafira kulanni lede togo yaanno: “Reyino mannire baddine affinara hasiˈneemmo. Yesuusi reyinotanna reyotenni kainota ammannoommo. Konnira Yesuusa ammante heedhe reyitinore Maganu isi ledo haaˈre abbannonsa. . . . Mootichu daanno [“bayicho amadanno,” NW] yanna geeshsha lubbotenni heeˈneemmori reyitinore dibalanxeemmo. Mootichu hajajote hirbinni . . . dukkisame gordunni daanno. Kiristoosa ammante heedhe reyitinori balaxxe kaˈanno. Hakkunni gedensaanni lubbotenni heeˈnoommori Mootichu ledo bubbete aana xaandammora, insa ledo gomichu giddora hawulukammeemmo. Mootichu ledono hegerera heeˈneemmo.”—1 Tes. 4:13-17.

¹⁸ Umi kao hanaffinohu Kiristoosi ‘bayicho amadihunni’ shiima yanna gedensaanniiti. Bayiru qarri yannara lubbotenni noo buuramaasine ‘gomichu giddora hawulukantanno.’ (Mat. 24:31) ‘Gomichu giddora hawulukantannori’ reyite lowo yanna keeshshitannokki daafira ‘direyitanno’ yaa dandiinanni. Insa ‘goofimarchu xurumba ufuunfanni woyite baalunku mitte higge illete lipheessi giddo soorrantanno.’—1 Qor. 15:51, 52.

19. ‘Roore kao’ yiniti hiitteeti?

¹⁹ Yannankera rooriidi Kiristaani buuraminoha ikkinokki daafira Yesuusi ledo gashshate iimira dihaˈranno. Hatteentenni insa Yihowa “barra” tini busha alame baˈanno yanna agadhitanno. Tini alame baˈanno yanna afino manchi dino; ikkirono taje tini yanna rakkinota leellishshanno. (1 Tes. 5:1-3) Haaro alame dagganno wote addi addi manni gannate ikkitino uullara heeˈrate reyotenni kaˈˈanno. Reyotenni kaˈˈanno manni gale hose guuta ikkanno, hattono galagale direyanno. Alba reyotenni kaino manni galagale reyino; konni daafira albillitte heedhanno kao ‘roore kaooti.’—Ibi. 11:35.

20. Reyino manni reyotenni kaˈˈannohu qinaawino garinniiti yineemmohu mayiraati?

²⁰ Qullaawu Maxaafi iima heeˈrate kaˈnanni kao daafira kulanni mittu mittunku ‘bado badosinni’ kaˈˈanno yaanno. (1 Qor. 15:23) Uullate aana heeˈrate kaˈˈanno mannino qinaawino garinni kaˈˈannota addaxxa dandiineemmo. Hatti hagiirsiissanno yannaati. Gedeˈne reyino manni Kiristoosihu Kumu Diri Gashshooti hanafanno yannara balaxe kae baxanno manni ledo xaadanno ikka? Maganu manna massagate dandoo noonsari hunda heedhinori Maganu soqqamaano haaro alamera manna qineessate balaxxe kaˈanno ikka? Yihowa magansiˈra hanafikki reyino manni hiikkanno? Insa reyotenni kaˈˈannohu hiitte yannaraati? Woy kaˈˈannohu hiikkooti? Tenne daafira lowo xaˈmo xaˈminammora dandiineemmo. Kayinni xaa yannara kuri coyibba hendanni mitiiˈma hasiissannonkeni? Mayi ikkannoro marranni anfummoro diwoyyanno? Hatte yannara Yihowa kuri coyibba assanno gara laˈneemmo wote dhagge assiˈnammora dandiineemmo.

21. Ati reyino manni daafira maa hexxatto?

²¹ Hakka geeshsha Yihowara noonke ammana kaajjishiˈra hasiissannonke; Isi Yesuusi widoonni reyitinore qaage kayisannonsata kulinonke. (Yoh. 5:28, 29; 11:23) Mitte hige Yesuusi Yihowara reyitinore kayisate wolqa noosita buuxisate, Abirihaami, Yisihaaqinna Yaaiqoobi “Isira [Maganoho] heedhannoreeti” yiino. (Luq. 20:37, 38) Konni daafira, ninkeno Phaawuloosi gede “Maganu cubbaataammanna keeraano reyotenni kayisanno” yine coyiˈra dandiineemmo.—Soq. 24:15.