1, 2. Ano sapatafangaw to tireng mamicada to inoˈko wawa i, wa calemcem ko wama wina to manan hani?

TO MIHECAHECAAN, mataˈlifay ko 20 ˈofad minanamay to Fangcalay Cudad a tamdaw, patafang to tireng ci Yihofaan micada to inoˈ. ˈAlomanay ko itiniay i soˈlinay kimad a lomahad a wawa, o sangaˈayay ko mipiliˈan nangra. (ˈOlic 1:1-3) Ano o Krisciyang a wama wina kiso, hinatalaay kiso to picadaan no wawa iso to inoˈa romiˈad.​—Nengnengen ko 3 Yohani 4.

² Kawraan, na maˈaraway iso ko roma kaemangay micadaay to inoˈ, ikor cisasaay to palinian no Kawas, mangalef miliyasay to soˈlinay kimad. Maˈaraw ko hatiniay a demak, wa calemcem kiso ikor no malo Krisciyang ko wawa no niyah, palidlid sa mafasaw ko olah to soˈlinay kimad, mahecad isaka cecay hahekalan a Ifisoay a Krisciyang, miliyasay to “iˈayaway a olah.” (Paˈarawan 2:4) Ano hatiraay, wa samaan kiso padama to wawa lomahad i noˈadingoan a ‘malidong’ hani? (1 Pitiro 2:2) Nohatini, nengnengen ita ko taˈarawan ni Timoti.

3. (1) Samaanay ci Timoti a malo Kriscyang? Samanay ko pilingat no soˈlinay kimad cingranan? (2) Palimoˈotan ni Pawlo ci Timoti misinanot to manan a tolo kalimelaan?

³ Maedeng isaka 47 miheca, sakina cecay ni Pawlo milisoˈto Listra i, o Krisciyangto ci Timoti. O kaemangayho ci Timoti itiya, kawra, kalasaka dademakan ningra ko soˈlinay kimad i nokaˈorip. Ikor no 2 miheca, misatapangay cingra kalacafay ci Pawloan milisoˈto kasakopang. Maedeng ikor no 16 miheca, patikamian ni Pawlo ci Timoti, sanay: “Kararid kiso a maˈimer to ninanaman ato nipasoˈlinan iso a sifanaˈ. Mafanaˈkiso to nika cima ko singsi iso. Maharateng iso, nano kaemanganho iso a mafanaˈkiso to Fangcalay Cudad [Hipray Sowal Fangcalay Cudad]. Onini a Fangcalay Cudad ko pakafanaˈay tisowanan a papitiˈer i ci Yis Kristoan [ira ko taneng] ta mapaˈorip kiso.” (2 Timoti 3:14, 15) Sinanoten ko masowalay ni Pawlo ko tolo a kalimelaan: (1) Mafanaˈ to Fangcalay Cudad, (2) Micada ato mapalimoˈot a pasoˈlinan a demak, ato (3) Pasoˈlin ci Kristo Yisan, ira ko taneng ngaˈay malidong.

4. Haratengen iso, o manan a lalakaw ko sapasifanaˈto mimingay a wawa tada ciepocay hani? (Nengnengen ko satapangan coka.)

⁴ O Krisciyang a wama wina, mitokelay kiso mafanaˈto Fangcalay Cudad ko wawa no niyah, o Hipray Sowal Fangcalay Cudad ato Krisiya Sowal Fangcalay Cudad. Ngaˈayay tooren iso ko inaneng no wawa a pasifanaˈcangranan to Fangcalay Cudad, soˈlin kaemingayho a wawa, wa ngaˈay mafanaˈto tawcikel no Fangcalay Cudad. Adihayay ko misadayan no likakawa ni Yihofa a lalakaw, padama to wama wina, maharatengay iso ko manan a lalakaw, ngaˈay a pasifanaˈto wawa hani? Haratengen, saka iraaw no tangongolay a kalawidang no wawa aci Yihofa, kalimelaan ko sifanaˈto Fangcalay Cudad.

5. (1) ‘Mapalimoˈot a pasoˈlin,’ o manan ko tatodong? (2) Samanay kita mafanaˈto pakasoˈlinay ci Timoti to ngaˈayay lihaf ni Yis?

⁵ Kalimelaan ko sifanaˈto Fangcalay Cudad, kawra, o pasifanaˈaca to wawa to tawcikel no Fangcalay Cudad cangoˈotayho. Sowalen no Fangcalay Cudad ci Timoti mapalimoˈotay a pasoˈlin, itini Krisiya a tilid, tatodong noniya sowal i, ‘pasoˈlin to matatodongay konini a demak.’ Ci Timoti mimingho mafanaˈayto Hipray Sowal Fangcalay Cudad, ikorto, maˈaraway ningra ko wacay pasoˈlinto ci Misiya ci Yis, pakasoˈlinay to ngaˈayay lihaf ni Yis, micada to inoˈ, malo Krisciyang, halo kalacafay ci Pawloan talacowacowa a mitosil.

6. Samaan kiso padama to wawa, pakasoˈlinto mananamay nai Fangcalay Cudad a soˈlinay kimad hani?

⁶ Wa samaan kiso padama to wawa no niyah mahecad ci Timotian, mafanaˈto soˈlinay ko sifanaˈno Fangcalay Cudad hani? Salakat, misaaliay to mihadidiay a falocoˈ. Ano sapakasoˈlinaw to cecay a demak i, misaaliay to toki. Nolatekay, o pakasoˈlinan iso a demak i, cowa pakasoˈlin ko wawa iso halatek. Cipinang ko wawa ngaˈ, mapalahad ko pasoˈlin no niyah to kimad no Fangcalay Cudad. (ˈOsien ko Loma 12:1.) O wama wina, itini pinanam no wawa kalimelaan ko saaroˈan no miso, ano milicay ko wawa, sasamaanen iso a pacaˈof hani? Nengnengen ita ko tinakoan no cecay wama.

7, 8. (1) O cecay wama ci Tomas, samanay paihekal to mihadidiay i fafahiyan wawa no niyah? (2) Sowalen hena, ano pasifanaˈkiso to wawa, itini masamaanay pakayraan misaaliay to sapadotocaw a mihadidi?

⁷ O cecay wama ci Tomas, iraay ko 11 miheca a fafahiyan a wawa ningra, sanay ko sowal ningra: “Milicayay ko wawa ako to roma salicay, tinakoen, pakaynian ni Yihofa i sinkalon misangaˈko kihecod han? Hano caka ngaˈay kita misingkiw, misalof toni hahekal  hani? Miceriday kako miˈimer to niyah, eca ka tangsol sa pasowal to wawa pakasoˈlin to maanan, hamaan pasoˈlin to maanan, samanen o pasoˈlinay falocoˈo adihayay a wacay palidlid hananay patireng.”

⁸ Mafanaˈay ci Tomas pasifanaˈto wawa kalimelaan ko mahadidiay falocoˈ. O polong a Krisciyang kalimelaan ko mihadidiay a capeling. (Kolosay 3:12) Cipinangay cingra, sapadamaaw to wawa patireng to pakasoˈlinay falocoˈ, palaken ko toki malalengo to wawa. Saka dademaken ningra ko Fangcalay Cudad padama to wawa misaharaterateng, mihaen ngaˈpakasoˈlin ko wawa to minanaman a soˈlinay kimad. Padotocay ci Tomas a pasowal: “Itini i kalimelaan a safalod no Fangcalay Cudad, mikiriwiˈay kako ato fafahi misinanot to cipinangay a pakasoˈlin ko wawa to minanaman. Milicay ko wawa, o ngaˈayay a demak, ano caka pilicay cingra, o picada aca, wa calemcem kako.”

9. Samaan kiso ngangaˈay mirinaˈto sowal no Kawas i falocoˈno wawa?

⁹ Itini pihadidi no wama wina a pasifanaˈto wawa, wa palidlid saan a “mihapinang to nika hakowa ko kakahad, kakayaˈ, takaraw ato talolong,” noˈadingoan a demak. (Ifiso 3:18) Wa ngaˈay tooren ita ko mihecaan ato inaneng no wawa a pasifanaˈ, mataˈlif ko toki, matongal ko pasoˈlin no wawa to soˈlinay kimad ko minanaman no niyah, itini ˈaˈayaw no tao ato cafay micudad, wa ira ko taneng a midama to pidoyongan no niyah. (1 Pitiro 3:15) Tinakoen, wa ngaˈay ko wawa iso misaka dademak to Fangcalay Cudad, mitadtad to samanay ko pakayraan no mapatayay han? Mihayay cangra to matatodongay ko pitadtad no Fangcalay Cudad han? * Hamaan mapawan, sapirinaˈaw to sowal no Kawas i falocoˈno wawa misaaliay to mihadidiay a falocoˈ, soˈlin a maroray kawra taˈangayay ko epoc.​—Limoˈot 6:6, 7.

10. Pakayni i pasifanaˈto wawa, samaan ko demak no wama wina o masaka limelaan hani?

¹⁰ O roma i, patireng to ngaˈayay taˈarawan ko wama wina, wa ngaˈay padama to wawa palahad to pasoˈlinay a falocoˈ. Ci Sitifeni tatoloay ko fafahiyan wawa, sanay cingra: “Kaemangho ko wawa ako, milicayan ako ko niyah, pasowalan ako ko wawa to samaanay, hano pakasoˈlin kako to iraay matelek ci Yihofa, maolahay Cingra takowanan, masadafdafay ko demak hokira? Mahapinangay no wawa ako to soˈlinay kako a maolah ci Yihofaan han? Ano cowa pasoˈlin kako to mananamay no niyah, cowa ko papakasoˈlin ko wawa.”

11, 12. O manan ko tatodong no taneng hani? O tamdaw o citanengay hokira, hano cowa ko mihecaan ko piˈarawan hani?

¹¹ Maˈaraway ita ci Timoti (1) mafanaˈay to Fangcalay Cudad ato (2) pasoˈlin to pidoyongan noniyah. Kawra, sowal ni Pawlo o Fangcalay Cudad ko padamaay ci Timotian ‘ira ko taneng ngaˈay malidong,’ o manan ko tatodong onini hani?

¹² Itini i Sapicalep Mafanaˈ to Fangcalay Cudad, Saka 2, ira ko mitadtaday, itini i Fangcalay Cudad, “ciˈicelay ko taneng, ngaˈay saka dademaken no tamdaw ko sifanaˈ, ato cipinangay a misaysay to pasangaray a demak. Miliyas to katalawan, malaˈosi ko patosokan, anca pakalalok to tao mihaen to demak. O felih no taneng o mafolaay.” Sowal no Fangcalay Cudad: ‘O mafolaay miapohay to falocoˈno wawa.’ (Taneng 22:15) O citanengay a tamdaw oha paihekal to malohemay a capelin. O kalohem no tamdaw i noˈadingoan, cowa ko mihecaan ko piˈarawan, o malohemay i noˈadingoan a tamdaw,  wa mangodo ci Yihofaan, makalim a midofdof to sarikec Ningra.​—ˈOsien ko ˈOlic 111:10.

13. Samaan ko demak no kaemangay tamdaw, paihekalayto iraay ko taneng no niyah, o ngangaˈay a malidong hani?

¹³ O malohemay i noˈadingoan a kaemangay tamdaw, cowa ko papakayni coos no niyah, anca malingat no roma tamdaw, “o mapawpaway no tapelik ato naicowacowaay a fali.” (Ifiso 4:14) Oha mamisaˈicel cangra malo “mafanaˈayto a mihapinang to ngaˈayay ato tatiihay a matanengayto a tamdaw.” (Hipray 5:14) Itini cowa kaˈaraw no wama wina anca matoˈasay tamdaw a kitiraan, wa inaneng ko misaˈosian nangra, paihekal to o malohemay ko niyah. (Filipi 2:12) O hatiniay a taneng, wa ngaˈay milidong to tamdaw. (ˈOsien ko Taneng 24:14.) O wama wina, wa ngaˈay kiso misamaan padama to wawa no niyah, milifok to mahaenay a taneng hani? Salakat, ihekalen pasifanaˈko wawa to mahecaday ko palinian iso to Fangcalay Cudad. Mikitini sowal ato waywayan iso, wa mahapinang no wawa to soˈlinay kiso a midofdof to palinian no Fangcalay Cudad.​—Loma 2:21-23.

14, 15. (1) O mamicada to inoˈa kaemangay tamdaw, wa miharateng to maanan a salicay? (2) Samaanen iso padama ko wawa cipinang, ano midofdof to sarikec no Kawas, wa ira ko sapalemed hani?

¹⁴ Kawra, o pifanaˈ aca to wawa o manan ko ngaˈayay ato tatiihay cowa kaedeng, pasifanaˈenho cangra ano tahalifa to pasangaray sasamaan misaharaterateng, o roma a demak hato kahemekan, kawra hano miconged ko Fangcalay Cudad hokira? Hano pakasoˈlin kako to o sakangaˈay ako ko palinian no Fangcalay Cudad?​—Isaya 48:17, 18.

¹⁵ Ano sapicadaaw ko wawa to inoˈ, papadamaen no wama wina cangra misongilaˈa miharateng—o maanan ko ˈinorong no Krisciyang, samanay ko pinengneng no wawa toniya ˈinorong. Malo Krisciyang wa ira ko maanan a epoc? Kakinafalah to maanan? Misamanay hano ciepocay konini? (Marko 10:29, 30) Oniya salicay o mamasiˈayaw nangra ikor no micada to inoˈ. Padamaen ko wawa iso miharateng, o aira ko maanan a  sapalemed ano midofdof to Kawas, ano eca pidofdof to Kawas wa ira ko masamaanay tatiihay a teloc. Mihaen wa ngaˈay padama cangranan palahad to pasoˈlinay falocoˈ, pasoˈlin ano midofdof to palinian no Fangcalay Cudad, wa ira ko sakangaˈay no niyah.​—Limoˈot 30:19, 20.

16. Ano micadaay to inoˈko wawa iso, ikor cisasa to soˈlinay kimad, wa samaan ko demak no wama wina hani?

¹⁶ Kawra, ano micadaay to inoˈko wawa iso, ikor cisasa to soˈlinay kimad, wa samaan to hani? Tinakoen, o roma a kaemangay tamdaw, masolotay noniya hekal, halatek cisasa cangra, mitoor to safalod no Fangcalay Cudad a maˈorip, soˈlinay o sangaˈayay han? (ˈOlic 73:1-3, 12, 13) Ano masiˈayaw ko hatiniay a demak, songilaˈen no wama wina a misaysay, samanen oha mamilingat konini to papadotoc ko wawa iso mihodop ci Yihofaan. Ano kaemangho anca o kapahto ko wawa, hamaan malacongis to wawa. O patosokan iso tano siniˈadaay a padama to wawa, wa milifok to falocoˈno wawa.

17, 18. Ano cisasa ko kaemangay tamdaw to soˈlinay kimad, samanen no wama wina a padama cangranan?

¹⁷ Micada to inoˈko kaemangay tamdaw, paihekalay to patafangay ko niyah ci Yihofaan, miketon to falocoˈmaolah Cingranan ato misakareteng minengneng to araaw no Kawas. (ˈOsien ko Marko 12:30.) Misakaretengay ci Yihofa minengneng to patafangay to tireng a miketonan, ano miketonay to falocoˈa tamdaw, wa mihaen a misakareteng. (Patnakay 5:4, 5) Samanen iso patalipaˈelal ko wawa to miketonan ningra hani? Salakat, songilaˈen a miˈosi ko misadayan no likakawa ni Yihofa a lalakaw, ato siniˈada a patalipaˈelal to wawa, soˈlin, karetengay ko ˈinorong no Krisciyang, kawra mamilifok to adihayay sapalemed.

¹⁸ Ngaˈayay minengneng ko wama wina to Salicay no Kapah—Iraay ko Ciepocay a Caˈof, Saka 1 (no kowaping). Sapatongal lalakaw, “Salicay no Wama Wina”, ilalomaˈadihayay ko ngaˈayay a sapaini, sanay: “Hamaan tangsol sa misaˈosi to cowa kaolah to soˈlinay kimad ko wawa. Ano nengnengen ko wawa hato cowa ka olah to noˈadingoan a demak, soˈlinay i, o tahalifaay to pasangray a demak.” Nolatekay, oniya pasangaray mahawpay ko saroero no cafacafay ato matoˈolay, anca ikakaay ko roma Krisciyang tono niyah. Padotocay ko lalakaw a somowal: “Sinanoten, ira ko hatiniay a pasangaray no wawa, cowa pakasoˈlin to soˈlinay kimad no Fangcalay Cudad, cowa ka saan. Alatek iraay ko roma a demak, hato macongeday cingra mitengil to limoˈot no Fangcalay Cudad. Alatek o harateng no wawa, ano mitoor to limoˈot no Fangcalay Cudad nohatini, cowa ka dolo, sanay.” Oniya lalakaw, adihayay ko sapaini, wa ngaˈay ko Krisciyang a wama wina, padama to wawa miliyaw a tanoktok ko pakasoˈlinay falocoˈ.

19. Samanen no wama wina a padama ko wawa, ‘ira ko taneng ngaˈay malidong’?

¹⁹ O wama wina, itini palahad to wawa, iraay ko ˈinorong kao ni Yihofa a “pasifanaˈato palimoˈot ko sapalatamdawaw iso to wawa iso,” misalof to harateng nangra. O sapalemed ni Yihofa tisowanan koni. (Ifiso 6:4) O wama wina cowa ko pasifanaˈaca to wawa to sifanaˈno Fangcalay Cudad, padamaenho ko wawa cipinang to o soˈlinay a kimad ko minanaman no niyah. Mihaen, tanoktokto ko pasoˈlin no falocoˈno wawa, wa makalimto cangra patafang to niyah ci Yihofaan, hanaca misarocod to falocoˈa mihodop Cingranan. Pakayni i sowal ni Yihofa ato fangcalay saocor, ato misadakan iso a ˈicel, wa ngaˈay padama to wawa iso, ‘ira ko taneng ngaˈay malidong.’