Mga Magurang—Tabangan an mga Aki Nindo na Magkaigwa nin “Kadunungan Para sa Kaligtasan”
“Puon sa pagkaaki may aram ka na sa banal na Kasuratan, na makakatao sa saimo nin kadunungan para sa kaligtasan.”—2 TIM. 3:15.
1, 2. Taano ta tibaad nahahadit an nagkapirang magurang pag gusto nang magdusay asin magpabawtismo kan saindang mga aki?
RINIBONG tinutukduan sa Bibliya an nagdudusay ki Jehova asin nagpapabawtismo. An dakul sa sainda mga hoben na nagdakula sa pamilyang Saksi asin pinili an pinakamarahay na buhay. (Sal. 1:1-3) Kun ika Kristiyanong magurang, siguradong hinahalat-halat mong umabot an aldaw na mapabawtismo an saimong aki.—Ikumparar an 3 Juan 4.
2 Pero, tibaad may mga ikinakahadit ka pa man giraray. Tibaad may midbid kang mga hoben na nagpabawtismo pero pag-abot nin panahon nagdududa na kun baga sarong kadunungan na mamuhay kauyon kan mga pamantayan nin Diyos. May mga nagbaya pa ngani sa katotoohan. Kaya, tibaad mahadit ka na sa primero lang maglilingkod ki Jehova an saimong aki, pero pag-abot nin panahon magbabago siya asin mawawara an inot na pagkamuot sa katotoohan. Tibaad magin arog siya kan nagkapira sa kongregasyon sa Efeso kan inot na siglo. Kap. 2:4) Ano an puwede mong gibuhon tanganing dai iyan mangyari sa saimong aki asin matabangan siya na “magtalubo asin maligtas”? (1 Ped. 2:2) Para masimbag iyan, pag-ulayan ta an halimbawa ni Timoteo.
Sinabi ni Jesus dapit sa sainda: “Binayaan mo an pagkamuot na yaon sa saimo kan primero.” (“MAY ARAM KA NA SA BANAL NA KASURATAN”
3. (a) Paano nagin Kristiyano si Timoteo, asin paano niya inaplikar an Kristiyanong mga katukduan? (b) Anong tulong aspekto nin pakanuod an sinabi ni Pablo sa sadol niya ki Timoteo?
3 Posibleng naaraman ni Timoteo an dapit sa Kristiyanong mga katukduan kan inot na pagbisita ni apostol Pablo sa Listra kan 47 C.E. Dawa posibleng tin-edyer pa sana siya kan panahon na iyan, siguradong inaplikar niya an mga nanudan niya. Pakalihis nin duwang taon, nagin kaiba-iba siya ni Pablo sa pagbiyahe. Mga 16 na taon pakalihis kaiyan, nagsurat si Pablo ki Timoteo: “Magpadagos ka sa mga bagay na nanudan mo asin na nakumbinsir kang paniwalaan, huling aram mo kun kiisay mo iyan nanudan asin puon sa pagkaaki may aram ka na sa banal na Kasuratan [an Hebreong Kasuratan], na makakatao sa saimo nin kadunungan para sa kaligtasan paagi sa pagtubod ki Cristo Jesus.” (2 Tim. 3:14, 15) Mangnuhon an sinabi ni Pablo na si Timoteo (1) may aram na sa banal na Kasuratan, (2) nakumbinsir na paniwalaan an mga bagay na saiyang nanudan, asin (3) nagin madunong para sa kaligtasan paagi sa pagtubod ki Cristo Jesus.
4. Anong mga pantabang an nahiling mong epektibo sa pagtukdo sa saimong mga aki? (Hilingon an ritrato sa kapinunan kan artikulo.)
4 Bilang Kristiyanong magurang, gusto mong manudan kan mga aki mo an banal na Kasuratan, na kompuwesto na ngunyan kan Hebreong Kasuratan asin kan Kristiyanong Griegong Kasuratan. Depende sa saindang kakayahan, dawa an saradit pang mga aki puwede nang makanuod nin simpleng impormasyon dapit sa mga karakter asin pangyayari sa Bibliya. An organisasyon ni Jehova nagtatao nin dakul na pantabang na magagamit kan mga magurang tanganing tabangan an saindang mga aki. Anong mga pantabang an igwa sa lengguwahe nindo? Tandaan, an pagkaigwa nin kaaraman dapit sa Kasuratan an pundasyon sa pagkaigwa nin makusog na relasyon ki Jehova.
‘NAKUMBINSIR NA MANIWALA’
5. (a) Ano an buot sabihon kan ‘nakumbinsir na maniwala’? (b) Taano ta masasabi tang nakumbinsir si Timoteo na paniwalaan an maugmang bareta dapit ki Jesus?
5 Mahalaga an pagkaigwa nin kaaraman dapit sa banal na Kasuratan. Pero, bako sanang pagtukdo kan dapit sa mga karakter asin pangyayari sa Bibliya an kaipuhan sa pagtutukdo sa mga aki dapit sa espirituwal na mga bagay. Si Timoteo ‘nakumbinsir na maniwala.’ Sa ibang pagtaram, talagang nagtubod siya na an mga nanudan niya totoo. Pamilyar si Timoteo sa Hebreong Kasuratan puon pagkaaki. Asin pag-abot nin panahon, nakumbinsir siya kan makusog na ebidensiya na si Jesus an Mesiyas. Sa katunayan, kumbinsido siyang marhay sa maugmang bareta kaya nagpabawtismo siya bilang disipulo asin nag-iba ki Pablo sa pagmimisyonero.
6. Paano mo matatabangan an saimong mga aki na magkaigwa nin kumbiksiyon sa Tataramon nin Diyos?
6 Paano mo man matatabangan an saimong mga aki na mapakusog an saindang kumbiksiyon sa saindang mga tinutubod arog ni Timoteo? Inot, magin mapasensiya. Dai sana basta nagkakaigwa nin kumbiksiyon an saro. Dai buot sabihon na miling nakumbinsir kang maniwala sa sarong bagay, awtomatiko na man na maniniwala diyan an mga aki mo. An lambang aki kaipuhan na gamiton an saiyang “kakayahan na mag-isip” tanganing kumusog an kumbiksiyon niya mapadapit sa katotoohan sa Bibliya. (Basahon an Roma 12:1.) Bilang magurang, mahalaga an papel mo sa prosesong ini lalo na kun may mga hapot an saimong aki. Pag-isipan an sarong halimbawa.
7, 8. (a) Paano nagin mapasensiya an sarong ama sa pagtukdo sa saiyang aki? (b) Sa anong mga pagkakataon kinaipuhan mo man na magpahiling nin arog kaiyan na pagpapasensiya sa saimong aki?
7 Si Thomas na may 11 anyos na aking babayi nagsabi: “Kun minsan naghahapot an aki ko, ‘Posible daw na ebolusyon an ginamit ni Jehova sa paglalang nin buhay sa daga?’ o, ‘Taano ta dai kita nagpapartisipar sa mga aktibidad sa komunidad—halimbawa sa eleksiyon—para maparahay an mga bagay-bagay?’ Kun minsan kaipuhan kong pugulan an sadiri ko na magin dogmatiko sa pagsimbag. Tutal, dai mo makukumbinsir an saro paagi sana sa pagsabi kan sarong katotoohan kundi paagi sa dakul na saradit na ebidensiya.”
8 Aram ni Thomas na kaipuhan na magin mapasensiya sa pagtutukdo. An totoo, mahalaga na an gabos na Kristiyano magin mapasensiya. (Col. 3:12) Aram ni Thomas na posibleng mangaipo iyan nin halawig na panahon asin dakul na beses na pakikipag-ulay. Kaipuhan niyang mangatanusan gamit an Kasuratan tanganing magkaigwa nin kumbiksiyon an saiyang aki sa mga nanunudan kaini. Sinabi ni Thomas: “Lalo na pag-abot sa mahalagang mga punto, gusto ming maaraman ni agom kun talagang naniniwala an aki mi sa mga nanunudan niya saka kun talagang nasasabutan niya iyan. Kun may mga hapot siya, marahay ngani iyan. An totoo, mas mahahadit ako kun naniwala siya sa sarong bagay tapos dai lamang naghapot.”
9. Paano mo maitatadom sa saimong mga aki an Tataramon nin Diyos?
9 Kun mapasensiyang tutukduan kan mga magurang an saindang mga aki, luway-luway na masasabutan kan mga ini “an lakbang asin laba asin langkaw saka rarom” kan pagtubod. (Efe. 3:18) Puwede niyatong ibagay an satong pagtutukdo sa edad asin kakayahan ninda. Mantang nagigin kumbinsido sinda sa mga nanunudan ninda, magigin mas madali na sa sainda na idepensa sa iba an saindang mga tinutubod, pati sa mga kaklase ninda. (1 Ped. 3:15) Halimbawa, kaya daw kan saindong mga aki na ipaliwanag gamit an Bibliya kun ano an kamugtakan kan mga gadan? Nasasabutan daw talaga ninda an paliwanag kan Bibliya? * Totoo na kaipuhan mong magin mapasensiya tanganing maitadom sa saimong aki an Tataramon nin Diyos, pero magigin sulit nanggad iyan!—Deut. 6:6, 7.
10. Ano an dapat na magin mahalagang kabtang kan saimong pagtutukdo?
10 Siyempre, mahalaga man an saimong halimbawa para mapakusog an kumbiksiyon kan saimong mga aki. Si Stephanie, na may tulong aking babayi, nagsabi: “Dawa kaidtong saradit pa an mga aki ko, ihinahapot ko na sa sadiri ko, ‘Ipinapakipag-ulay ko daw sa mga aki ko kun taano ta kumbinsido ako na nag-eeksister si Jehova, na namumutan niya kita, asin na matanos an saiyang mga dalan? Malinaw daw na nahihiling sa sako kan mga aki ko na talagang namumutan ko si Jehova?’ Dai ko malalauman na makukumbinsir an mga aki ko kun ako mismo bakong kumbinsido.”
“KADUNUNGAN PARA SA KALIGTASAN”
11, 12. Ano an kadunungan, asin taano ta masasabi niyatong dai iyan panginot na nakadepende sa edad nin saro?
11 Arog kan napag-ulayan ta, si Timoteo (1) may kaaraman na sa Kasuratan asin (2) may kumbiksiyon sa saiyang mga tinutubod. Pero ano an buot sabihon ni Pablo kan sabihon niyang paagi sa banal na Kasuratan puwedeng magkaigwa nin ‘kadunungan si Timoteo para sa kaligtasan’?
12 Ipinapaliwanag kan Insight on the Scriptures, Volume 2, na sa Bibliya, kaiba sa kadunungan an “kakayahan na gamiton sa epektibong paagi an kaaraman asin pakasabot tanganing maresolberan an mga problema, malikayan an mga peligro, maabot an partikular na mga pasuhan, o makatao nin sadol sa iba para magibo an mga iyan. An kadunungan kabaliktaran nin kalulungan.” Sinasabi Pr. [Tal.] 22:15, An Banal na Biblia) Kun siring, an kadunungan—an kabaliktaran nin kalulungan—sarong tanda nin pagkamaygurang. An pagigin maygurang sa espirituwal dai panginot na nakadepende sa edad, kundi sa pagkaigwa nin tamang pagkatakot ki Jehova asin sa pagigin andam na magkuyog sa Saiyang mga pagbuot.—Basahon an Salmo 111:10.
kan Bibliya na an ‘kalulungan nakagakod sa puso’ nin aki. (13. Paano maipapahiling nin sarong hoben na igwa siya nin kadunungan para sa kaligtasan?
13 An mga hoben na maygurang na sa espirituwal dai “pig-aanod-anod nin mga alon asin pigpapadpad kun sain-sain” kan saindang mga pagmawot o kan panggigipit kan saindang mga kairiba. (Efe. 4:14) Imbes, ‘sinasanay ninda an saindang isip na mamidbid an kalainan kan tama asin kan sala.’ (Heb. 5:14) Ipinapahiling ninda na nag-uuswag sinda sa pagkamaygurang kun naggigibo sinda nin madunong na mga desisyon—dawa kun dai nakahiling an saindang mga magurang o iba pang adulto. (Fil. 2:12) An siring na kadunungan kaipuhan para sa kaligtasan. (Basahon an Talinhaga 24:14.) Paano mo matatabangan an saimong mga aki na magkaigwa kaiyan? Inot sa gabos, siguraduhon na aram ninda kun ano an saimong basado sa Bibliyang mga pamantayan. Paagi sa tataramon asin gibo, ipahiling sa mga aki mo na an mga pamantayan sa Tataramon nin Diyos iyo man an mga pamantayan mo.—Roma 2:21-23.
Taano ta mahalagang padagos na maghinguwa an mga magurang? (Hilingon an parapo 14-18)
14, 15. (a) Ano an mga dapat pag-isipan nin sarong hoben na nagpaplano nang magpabawtismo? (b) Paano mo matatabangan an saimong mga aki na isip-isipon an mga bendisyon na makakamtan ninda sa pagsunod sa mga pagbuot nin Diyos?
14 Alagad, an kaipuhan bako sanang basta pagsabi sa mga aki mo kan tama asin sala. Kaipuhan mo man sindang tabangan kun paano sisimbagon an mga hapot arog kan: ‘Taano ta ipinagbabawal kan Bibliya an mga bagay na tibaad kaakit-akit para sa mga tawo? Taano ta kumbinsido ako na pirming para sa ikakarahay ko an pagsunod sa mga pamantayan kan Bibliya?’—Isa. 48:17, 18.
15 Kun an aki mo gusto nang magpabawtismo, tabangan siya na pag-isipan na marhay an dapit sa mga paninimbagan kan pagigin Kristiyano. Ano an mga pakinabang? Ano an mga kaipuhan na isakripisyo? Taano ta mas nakakalabi an mga pakinabang kisa sa mga sakripisyo? (Mar. 10:29, 30) Iyan an mga bagay na posibleng mapaatubang sa saro pagkatapos niyang mabawtismuhan. Kaya, mahalaga na pag-isipan niyang marhay an mga ini bago niya gibuhon an seryosong lakdang na iyan. Kun tatabangan mo an saimong mga aki na isip-isipon an mga bendisyon kan pagkuyog asin an mga konsekwensiya kan pagsuway, posibleng marhay na magkakaigwa siya nin personal na kumbiksiyon na an pagsunod sa mga pamantayan kan Bibliya pirming para sa ikakarahay niya.—Deut. 30:19, 20.
KUN NAGLULUYA AN PAGTUBOD NIN SARONG BAWTISADONG HOBEN
16. Ano an dapat isaisip nin magurang kun nagluluya an pagtubod kan saiyang bawtisado nang aki?
16 Pero, paano kun nagpupuon nang magduda sa katotoohan an saimong aki pagkatapos na siya mabawtismuhan? Halimbawa, an sarong bawtisadong tin-edyer tibaad naaakit sa mga bagay sa kinaban o tibaad kinukuwestiyon na niya kun baga sarong kadunungan an mamuhay kauyon kan mga prinsipyo sa Bibliya. (Sal. 73:1-3, 12, 13) Bilang magurang, tandaan na an magigin reaksiyon mo sa pagkuwestiyon kan saimong aki puwedeng magkaigwa nin epekto sa saiyang desisyon—kun baga mapadagos siya o mapundo na sa paglilingkod ki Jehova. Likayan na makiargumento sa saimong aki dapit sa isyung ini, siya man akion pa o tin-edyer na. An dapat na magin pasuhan mo iyo na ipamati sa saiya na namumutan mo siya asin na gusto mo siyang tabangan.
17, 18. Kun an aki may mga pagduda, paano siya matatabangan kan saiyang mga magurang?
17 Siyempre, an sarong hoben na nagpabawtismo naggibo nin sagradong pagdusay ki Jehova. An pagdusay na iyan sarong panuga na mamumutan niya an Diyos asin na iinuton niya an Saiyang kabutan kisa sa gabos na iba pang bagay. (Basahon an Marcos 12:30.) Seryosong bagay iyan para ki Jehova kaya arog man kaiyan an dapat na magin pagmansay kan naggibo kan panugang iyan. (Par. 5:4, 5) Sa angay na panahon asin sa mabuot na paagi, ipagirumdom an mga iyan sa saimong aki. Pero bago mo iyan gibuhon, basahon asin pag-adalan nguna an mga materyal na itinatao kan organisasyon ni Jehova para sa mga magurang. Paagi kaiyan, maiduduon mo sa saimong aki na an pagigin dusay ki Jehova asin an pagigin bawtisadong Kristiyano seryosong bagay asin magbubunga nin dakul na bendisyon.
18 Halimbawa, sa likod kan librong Questions Young People Ask—Answers That Work, Volume 1, may kapaki-pakinabang na sadol na mahihiling sa apendise na may titulong “Questions Parents Ask.” Sinasabi kaiyan: “Dai tulos magkongklusyon na habo kan saimong aking tin-edyer sa relihiyon mo. Sa kadaklan na kaso, bako man talaga iyan an isyu.” Posibleng nakakaeksperyensiya siya nin panggigipit nin kairiba o nin kamunduan. O tibaad pagmati niya mas marahay an espirituwalidad kan ibang Kristiyanong hoben kisa sa saiya. Sinabi pa sa apendise: “Maririsa mo na an mga isyung ini mayo man nin koneksiyon sa mga doktrina kan saimong relihiyon. Mas konektado iyan sa mga sitwasyon na temporaryo man sanang nakakaulang sa saiya na maglingkod ki Jehova.” Dangan nagtao an apendise nin nagkapirang suhestiyon kun paano matatabangan nin Kristiyanong magurang an saiyang hoben na aki na nagluluya an kumbiksiyon sa katotoohan.
19. Paano matatabangan kan mga magurang an saindang mga aki na magkaigwa nin “kadunungan para sa kaligtasan”?
19 Bilang magurang, igwa ka nin dakulang responsabilidad—asin pribilehiyo—na padakulaon an saimong mga aki “sa disiplina asin sadol ni Jehova.” (Efe. 6:4) Arog kan pinag-ulayan ta, nangangahulugan iyan na dai mo sana sinda tutukduan kan sinasabi kan Bibliya kundi tatabangan mo man sinda na magkaigwa nin kumbiksiyon sa mga nanunudan ninda. Iyo, kaipuhan ninda an makusog na kumbiksiyon na mapahiro sa sainda na magdusay ki Jehova asin bilog na pusong maglingkod sa saiya. Lugod na an Tataramon ni Jehova, an saiyang espiritu, asin an saimong paghihinguwa bilang magurang makatabang sa saimong mga aki na magkaigwa nin “kadunungan para sa kaligtasan.”
^ par. 9 An mga giya sa pag-adal sa “What Does the Bible Really Teach?” epektibong kasangkapan na magagamit sa pagtabang sa mga hoben asin mga adulto na masabutan saka maipaliwanag an mga katotoohan sa Bibliya. Mahihiling iyan sa jw.org sa dakul na lengguwahe. Hilingon sa BIBLE TEACHINGS > BIBLE STUDY TOOLS.