Jonyuol Konyuru Nyithindu Obed ‘Mariek Mondo Giyud Warruok’
“Chakre kane in nyathi matin ahinya, isebedo king’eyo ndiko maler ma nyalo miyo ibed mariek mondo iyud warruok.”—2 TIM. 3:15.
1, 2. Ang’o momiyo jonyuol moko chunygi chandore sama nyithindgi dwaro chiwore mondo obatisgi?
JOPUONJRE mag Muma alufe gi alufe chiworega ne Jehova kendo ibatisogi. Thothgi gin rowere ma jonyuolgi gin Joneno mag Jehova kendo giyiero ngima maberie moloyo. (Zab. 1:1-3) Ka in janyuol ma Jakristo, donge en adier ni irito gi siso neno ka itiso nyathini?—Pim gi 3 Johana 4.
2 Kata kamano, samoro chunyi pod nyalo chandore. Samoro iseneno rowere moko mosebatis ma bang’e bedo gi kiawa ka be luwo chike mag Jehova en gima ber. Moko to oseweyo adiera. Omiyo in bende chunyi nyalo chandore ni nyathini biro chako achaka maber ka en Jakristo to bang’e oweyo hero adiera. Onyalo bedo kaka Jokristo ma ne ni e kanyakla ma Efeso ma Yesu nowachonegi niya: “Iseweyo hera ma ne in-go kar chakruok.” (Fwe. 2:4) Ere kaka inyalo konyo nyathini mondo odhi nyime hero adiera mondo ‘odong ma ochop e warruok’? (1 Pet. 2:2) Mondo wayud dwoko mar penjono, wane ane ranyisi mar Timotheo.
“ISEBEDO KING’EYO NDIKO MALER”
3. (a) Ere kaka Timotheo nobedo Jakristo, to notimo nang’o ka ne osepuonje adiera e wi Yesu? (b) Gin gik mage adek ma Paulo nojiwo Timotheo mondo odhi nyime timo?
3 Nyalo bedo ni Timotheo nopuonjore adiera e wi Yesu ka ne jaote Paulo ohango limo kanyakla ma ne ni Listra e higa mar 47. Kata obedo ni Timotheo ne en rawera e kindego, nyaka bed ni noluwo puonjgo gi chunye duto. Higni ariyo bang’e, nochako dhi gi Paulo e wuodhene mag misonari. Higni 16 bang’e, Paulo nondiko ne Timotheo konyise niya: “Sik kuom weche misepuonjori kendo ma ne okonyi yie kuomgi chuth, king’eyo ni gin ng’a gini ma ne ipuonjori kuomgi. Bende, ng’e ni chakre kane in nyathi matin ahinya, isebedo king’eyo ndiko maler [Ndiko mag Dho-Hibrania] ma nyalo miyo ibed mariek mondo iyud warruok kokalo kuom yie kuom Kristo Yesu.” (2 Tim. 3:14, 15) Ne ni Paulo wuoyo e wi (1) ng’eyo ndiko maler, (2) konyo ng’ato oyie gi gik mopuonjore, kod (3) bedo mariek mondo ng’ato oyud warruok kokalo kuom yie kuom Kristo Yesu.
4. Gin ang’o ma iseyudo ka konyi ahinya e puonjo nyithindi? (Ne picha manie chak sulani.)
4 Kaka janyuol ma Jakristo, in bende diher ni nyathini ong’e ndiko maler ma sani oriwo Ndiko mag Dho-Hibrania kod Ndiko mag Dho-Grik. Kata mana nyithindo matindo nyalo ng’eyo joma iwuoyo kuomgi e Muma kod gik ma notimore e kinde Muma kaluwore gi nyalogi. Riwruok mar oganda Jehova oseloso gik mopogore opogore ma jonyuol nyalo tiyogo mondo gikony nyithindgi. Be ing’eyo moko kuomgi ma yudore e dhou? Par ni ng’eyo ndiko e mise mar bedo gi winjruok maber gi Jehova.
KONY NYITHINDI MONDO GIYIE GI GIK MA GIPUONJORE
5. (a) Ang’o ma nyalo konyo ng’ato mondo oyie gi gik mopuonje? (b) Wang’eyo nade ni ne okony Timotheo mondo oyie gi wach maber e wi Yesu?
5 Ng’eyo ndiko maler en gima dwarore ahinya. Kata kamano, puonjo nyithindo mondo obed gi winjruok maber gi Nyasaye oriwo puonjogi gik mathoth moloyo mana konyogi ng’eyo joma iwuoyo kuomgi e Muma kod gik ma notimore e kinde Muma. Timotheo ne okony mondo oyie gi gik ma nopuonjore. Konyo ng’ato mondo oyie gi gimoro en lerone tiend wach minyise e yo mamiyo oyie e chunye ni gima onyiseno en adiera chuth. Timotheo nong’eyo Ndiko mag Dho-Hibrania ka ne pod en nyathi matin. Bang’e, nopuonjore weche ma nomiyo oyie ni Yesu en Mesia. Gik ma Timotheo nomedo puonjore e ma nomiyo obedo gi yie motegno. Bedo gi yie motegno kuom wach maber nomiyo obatise kendo nodhi gi Paulo e wuodhene mag misonari.
6. Ere kaka inyalo konyo nyathini mondo oyie gi gik ma opuonjore e Muma?
6 Ere kaka inyalo konyo nyithindi mondo oyie gi weche ma ipuonjogi mana kaka nokony Timotheo? Mokwongo, bed ng’at ma hore. Ng’ato ok nyal yie ayiea dichiel gi gik mopuonjore. E wi mano, ok ochuno ni ka iyie gi gimoro to nyithindi bende biro yie gi gino. Nyathi ka nyathi nyaka ti gi ‘nyalone mar paro’ mondo oyie gi adiera mag Muma. (Som Jo-Rumi 12:1.) In kaka janyuol, in gi ting’ maduong’ ahinya e konyo nyathini mondo oti gi nyalone mar paro, to ahinya ahinya seche ma openji penjo moko. Ne ane ranyisi ma luwoni.
7, 8. (a) Ere kaka owadwa moro nyiso horuok sama opuonjo nyare? (b) Gin kinde mage ma dwarore ni ihori gi nyathini?
7 Thomas, ma nyare jahigni 11 wacho kama: “Nyara samoro penjaga niya, ‘Be dibed ni Jehova notiyo gi gik ma nosieko kendgi mondo ochuego gik mangima manie piny?’ kata ni, ‘Ang’o momiyo ok wadonjre e gik ma ji timo kama wadakie, kaka goyo ombulu, mondo wan bende walos pinywa obed kama ber?’ Atemoga ahinya mondo kik amiye duoko ma nyise mana gima onego oyiego. Mondo ikony ng’ato oyie gi wach moro, ok ochuno ni inyise gik mang’eny ma siro wachno nyadichiel. Weche matin tin ma inyiso ng’ato e ma konye kaluwore gi penjo mopenjo.”
8 Thomas ong’eyo ni nyaka ohore sama opuonjo nyare. Kiwacho awacha adier, Jokristo duto onego obed joma hore. (Kol. 3:12) Thomas ong’eyo ni mondo nyare oyie gi puonj moro, nyaka owuo kode e wi puonjno nyadinwoya kendo kuom kinde malach. Ong’eyo ni nyaka okonye kotiyo gi Ndiko mondo oyie gi gik ma ipuonje. Thomas wacho kama: “An gi jaoda wadwaro bedo gadier kabe nyarwa oyie gi gik ma wapuonje kod ka be puonjgo donjone maber. Sama openjowa penjo moko, mano en gima bernwa ahinya. Kiwacho adier, chunya nyalo chandore ka oyie gi gimoro ma ok openjo penjo.”
9. Ere kaka inyalo konyo nyithindi mondo oyie gi gima Muma puonjo?
9 Ka jonyuol opuonjo nyithindgi gi horuok, mos mos gibiro ng’eyo ‘lach gi bor gi tut’ mar gik ma ipuonjogi. (Efe. 3:18) Jonyuol nyalo puonjogi ka gitiyo gi gik ma owinjore gi hikgi kod nyalogi. Kaka gimedo yie ni gik ma gipuonjorego gin adier, gibiro bedo gi chir mar lero ne jomoko gigo, moriwo nyaka nyithi skul wetegi. (1 Pet. 3:15) Kuom ranyisi, be nyithindi nyalo lero gima Muma wacho ni timore sama ng’ato otho? Be gima Muma puonjo e wi wachno donjonegi maber? * Puonjo nyathini Wach Nyasaye en gima dwaro horuok, kata kamano, kinda mitimo ok bi dhi nono.—Rap. 6:6, 7.
10. Sama ipuonjo nyithindi, en ang’o machielo maduong’ ma wiyi ok onego owilgo?
10 En adier ni ranyisi miketo en gima duong’ ahinya e konyo nyathini mondo oyie gi gik mopuonjore. Stephanie, ma nigi nyiri adek wacho niya: “Chakre ka ne nyithinda pod tindo, asebedo ka apenjora ni, ‘Be anyisoga nyithinda gimomiyo an gadier chuth ni Jehova en Nyasaye ma nitie, ni ohera, kendo ni chikene e ma beyo? Be nyithinda nyalo neno ayanga gik ma nyiso ni ahero Jehova?’ Ok anyal geno ni nyithinda biro yie gi gigo ka an awuon ok ayie kodgi.”
KONY NYITHINDI OBED MARIEK MONDO GIYUD WARRUOK
11, 12. Rieko en ang’o, to ang’o momiyo hik ng’ato ok e ma nyis ni oriek?
11 Mana kaka waseneno, Timotheo ne (1) ong’eyo Ndiko kendo (2) noyie gi gik ma nopuonjore. Kata kamano, Paulo ne temo wacho ang’o ka ne owacho ni ndiko maler ne nyalo miyo Timotheo ‘obed mariek mondo oyud warruok’?
12 Buk mar Insight on the Scriptures, Buk mar 2 wacho ni rieko “en nyalo mar tiyo gi gik ma ng’ato osepuonjore kod moseng’eyo mondo olo chandruok moro momake, ogeng’ gik ma nyalo kelone hinyruok, Nge. 22:15) Omiyo, sama nyathini ochako timo gik ma nyiso rieko, mano nyiso ni osechako bedo ng’at ma pache otegno. Hik ng’ato ok e ma nyis ni koro osebedo motegno e wach Nyasaye, kar mano, yo ma omiyogo Jehova luor kod kaka oikore luwo chikene e ma nyiso ni otegno.—Som Zaburi 111:10.
ochop gik modwaro timo, kata mondo okonygo jomoko. Ng’at ma kamano opogore ahinya gi ng’at mofuwo.” Muma wacho ni “kit chuny nyathi en fuwo.” (13. Ere kaka rawera nyalo nyiso ni en gi rieko ma biro miyo oyud warruok?
13 Rowere mosebedo motegno e wach Nyasaye ok yie mondo gombogi giwegi kata mbesegi ‘oyukgi kendo otergi koni gi koni kaka yie ma apaka kod yamo tago.’ (Efe. 4:14) Kar mano, gitimo dongruok mondo gibed ‘joma tiego nyalogi mar ng’eyo tiend weche mondo gipog gik ma kare kod gik ma ok kare.’ (Hib. 5:14) Ginyiso ni gitimo dongruok mondo gibed joma otegno e wach Nyasaye kuom timo yiero mabeyo, kata seche ma jonyuolgi kata joma dongo onge. (Fil. 2:12) Rieko ma kamano e ma dwarore mondo giyud warruok. (Som Ngeche 24:14.) Inyalo konyo nyathini nade mondo obed g rieko ma kamano? Mokwongo, nyis nyithindi e yo maler puonj mabeyo ma yudore e Muma. Wecheni kod ranyisi miketonegi onego okonygi gine maler ni kuom adier puonj ma yudore e Wach Nyasaye osekonyi gadier.—Rumi 2:21-23.
Ang’o momiyo dwarore ni janyuol odhi nyime timo kinda e konyo nyathine? (Ne paragraf mar 14-18)
14, 15. (a) Rawera ma dwaro ni mondo obatise onego opar weche mage? (b) Ere kaka inyalo konyo nyithindi mondo opar matut gueth ma ng’ato yudo koluwo chike Nyasaye?
14 En adier ni puonjo nyithindi ok en mana nyisogi gima ber kod gima rach. Onego item konyogi paro matut e wi penjo kaka: ‘Ang’o momiyo Muma kwerowa ni kik waher gik ringruok? Ang’o momiyo an gadier ni chike mag Muma oketi mondo okonya?’—Isa. 48:17, 18.
15 Ka nyathini onyisi ni doher ni obatise, onego ikonye mondo opar matut e wi Mar. 10:29, 30) Mago gin gik ma ng’ato nyaka romgo bang’ batiso. Omiyo, dwarore ni ng’ato opar wechego kapok obatise. Ka jonyuol okonyo nyithindgi opar matut gueth ma yudore kuom rito chike mag Jehova kod chandruoge ma ginyalo yudo ka ok giluwo chikego, yot mondo nyithindogo obed gadier ni luwo chike kod puonj mag Muma konyo kinde duto.—Rap. 30:19, 20.
ting’ ma Jakristo bedogo ka osebatise. Be ong’eyo gueth ma ng’ato yudo nikech bedo Jakristo? To gin pek mage monyalo romogo? Ere kaka gueth moyudo kuom bedo Jakristo ohewo pekgo? (KA RAWERA MA OSEBATIS OCHAKO BAGNI
16. Janyuol nyalo timo nang’o ka nyathi ma osebatisi ochako bedo gi kiawa?
16 Inyalo timo nang’o ka nyathini ochako bedo gi kiawa e wi weche moko ka osebatise? Kuom ranyisi, rawera mosebatisi nyalo chako hero gik piny kata onyalo bedo gi kiawa kabe luwo puonj mag Muma konyo gadier. (Zab. 73:1-3, 12, 13) Yo ma ilosogo wach ma chando nyathini nyalo miyo odhi nyime tiyo ne Jehova kata owe tiyone. Tem ahinya mondo kik iyaw lweny gi nyathini e wi weche ma kamago, bed ni pod en nyathi matin kata en rawera. Kar mano, tim gik moko e yo ma nyiso ni ihere kendo ni idwaro konye.
17, 18. Ere kaka jonyuol nyalo konyo rawera ma nigi kiawa e wi gik ma osepuonjore?
17 En adier ni rawera ma osebatisi en ng’at ma osechiwore ne Jehova. Mano nyiso ni osesingore mar hero Nyasaye moloyo gimoro amora. (Som Mariko 12:30.) Jehova okawo singono mapek, kendo ng’at ma otimo singono bende onego okawe mapek. (Ekl. 5:4, 5) Par ne nyathini wechego e yo mamuol kendo e seche mowinjore. Kapok iwuoyo kode, kwong itim nonro e buge ma riwruok mar oganda Jehova oiko ne jonyuol mondo okonygo nyithindgi. Timo kamano biro konye mondo one gimomiyo onego ochop singruok ma notimo ka nochiwore ne Jehova mobatise kod gueth mobiro yudo.
18 Kuom ranyisi, jonyuol nyalo yudo paro moko mabeyo e apendiks ma wiye wacho ni “Maswali Ambayo Wazazi Huuliza,” ma yudore e bug Maswali Ambayo Vijana Huuliza—Majibu Yafanyayo Kazi, Buk 1. Kanyo wacho kama: “Kik ing’ad piyo piyo ni nyathini otamore luwo adiera. Nyaka bed ni nitie wach moro ma chande.” Samoro mbesene e ma thung’e mondo otim gik ma ong’eyo ni rach. Seche moko nyalo bedo ni oneno ni oonge gi osiepe kata nyalo bedo ni oparo ni rowere moko timo dongruok moloye e kanyakla. Apendiksno dhi nyime wacho ni “gik moko kaka mago ok nyis ni nyathini ok oyie gi adiera ma ne ipuonje. En mana ni sani oromo gi gik ma miyo luwo adiera bedone matek.” Apendiksno chiwo paro mopogore opogore mathoth ma janyuol nyalo tiyogo mondo okony nyathine kik bagni e yie.
19. Ere kaka jonyuol nyalo konyo nyithindgi ‘obed mariek mondo giyud warruok’?
19 Jonyuol nigi ting’ kod migawo mar konyo nyithindgi ka ‘girieyogi kendo puonjogi kaka Jehova dwaro.’ (Efe. 6:4) To mana kaka waseneno, mano oriwo puonjogi gima Muma wacho kendo konyogi mondo gibed gadier gi gik ma gipuonjore. Sama nyithindo obedo gi yie motegno ni gik ma gipuonjore gin adier, mano biro konyogi mondo gichiwre ne Jehova kendo gitine gi chunygi duto. Wageno ni Muma, roho maler, kod kinda ma itimo e puonjo nyithindi biro miyo ‘gibed mariek mondo giyud warruok.’
^ par. 9 Pej ma wiye wacho ni “Biblia Inafundisha Nini?” oting’o sula ma beyo ahinya ma nyalo konyo rowere e lero ne jomoko puonj mopogore opogore mag Muma. Sulago yudore e jw.org e dhok mang’eny. Di kama wacho ni MAFUNDISHO YA BIBLIA > VIFAA VYA KUJIFUNZIA BIBLIA.