1, 2. Dahaka dainai tama sina haida na e lalohekwarahimu, bema natudia e uramu edia mauri bae gwauhamatalaia bona bae bapatiso?

BAIBUL stadi taudia tausen momo na Iehova enai edia mauri e gwauhamatalaiamu bona e bapatisomu. Idia momo na hereva momokani ai e tubu dae bona mauri dalana namona e abia hidi matamata taudia. (Sal. 1:1-3) Bema oi na Kristen tama o sina ta, bo uramu natumu baine bapatiso negana ba itaia.​—⁠3 Ioane 4 ba itaia.

² To, reana bo lalohekwarahimu. Badina o itaiamu matamata taudia haida na e bapatiso to gabeai Dirava ena taravatu ibadinana karana ena namo na e daradaralaiamu. Bona momo na hereva momokani e rakatania. Reana bo lalohekwarahimu badina bo laloamu natumu na Kristen dalana e badinaiamu, to gabeai hereva momokani iura henina karana be haboioamu. Bona Efeso  kongrigeisen taudia heḡereḡeredia be karamu, Iesu ese idia na ini e hamaorodia toma: “Emu lalokau gunana vada o negea.” (Apok. 2:4) Edena dala ai natumu ba durua diba ena lalokau baine hagoadaia bona “hahemauri” baine abia? (1 Pet. 2:2) Una baita haerelaia totona, mani Timoteo ena haheitalai aita laloa.

3. (a) Edena dala ai Timoteo na Kristen tauna ai ela, bona e diba ḡaudia be ede e lalodia toma? (b) Paulo ese Timoteo be dahaka ḡau toi e hadibaia?

³ Laḡani 47 C.E. ai, aposetolo Paulo na ena nega ginigunana Lustra ela, una negai Timoteo ese Iesu ena hahediba herevadia e diba. Ena be una negai Timoteo na do matamata, to e diba ḡaudia na e badina namonamova. Laḡani rua muridiai, ia na Paulo e bamoa matama. Laḡani 16 muridiai, Paulo ese Timoteo e tore henia: “Vada o diba bona vada o abi dae herevadia na ba kahu tarika-tarika; daidia ese e hadibalaimu vada dibamu. Maraḡimu negana ema, revareva helaḡadia [Heberu Revarevadia] vada o manadalai; idia ese bae ha-aonegamu ela bona hahemauri ba davaria, Keriso Iesu ikamonai-henina lalonai.” (2 Tim. 3:14, 15) Paulo ese ḡau toi e herevalai, (1) revareva helaḡadia ba manadalai, (2) o diba bona o abi dae herevadia ba kahu tarika-tarika, bona (3) ba he-aonega ela bona hahemauri ba davaria Keriso Iesu ikamonai-henina karana ai.

4. Natumu o hadibadiamu neganai, ededia tulu o ḡaukaralaimu? (Rau 18 ai laulau ba itaia.)

⁴ Umui na Kristen tama sina dainai, o uramu natumui na revareva helaḡadia baine diba, hari ina negai unu na Heberu Revarevadia bona Kristen Grik Revarevadia. Natu maraḡidia na edia laloparara heḡereḡerena ai, Baibul ese e herevalaidia taudia sivaraidia bae dibadia diba. Iehova ena orea ese tulu idauidau e heḡaeḡaelai, unu amo tama sina ese bae ḡaukaralai diba natudia bae durudia. Emu gado ai e halasi tuludia haida o lalodiamu, a? Ba helalotao, Revareva Helaḡadia idibadia karana ese natu ta bae durua diba, ena hetura karana Iehova ida baine hagoadaia totona.

5. (a) Ina hereva, “o abi dae herevadia na ba kahu tarika-tarika” anina be dahaka? (b) Edena dala ai ta dibamu Timoteo ese Iesu sivaraina namona na e abia dae momokani?

⁵ Revareva helaḡadia idibadia karana na mai anina bada. To, natu ediai Baibul ese e herevalaidia taudia sivaraidia ba hadibalaidia mo na dia heḡereḡere. Timoteo ese ‘e abi dae herevadia na e kahu tarika-tarika.’ Kristen Grik Revarevadia ai, una hereva anina na ta na e “diba momokanimu” eiava e “dibamu e abia daemu ḡauna na momokani.” Timoteo na maraḡina negana amo Heberu Revarevadia e diba. Gabeai, e abia dae momokani Iesu na Mesia. Oibe, Timoteo ese sivarai namona na e abia dae momokani dainai, e bapatiso bona Paulo ida misinari ḡaukara e karaiava.

6. Edena dala ai natumu ba durudia Dirava ena Hereva amo e dibamu ḡaudia bae abi dae totona?

⁶ Edena dalai natumu edia abidadama ba hagoadaia unu amo e abi daemu herevadia bae kahu tarika-tarika, Timoteo e kara heḡereḡerena? Ḡau ginigunana na, ba haheauka. Natu ena abidadama na taina ruana be hagoadaiamu; bona dia emu abidadama dainai o abi daemu ḡaudia na natumu ese danu be abi daemu. Natu ta ta ese “namo bona dika toadia” bae diba na namo, unu amo Baibul ena hereva momokani bae abia dae. (Heberu 5:14 ba duahia) Umui tama sina emui maduna na, natumui ena henanadai ba haerelaidia. Mani haheitalai ta aita laloa.

7, 8. (a) Edena dala ai Kristen tama ta na natuna ihadibana totona haheauka karana e hahedinaraia? (b) Ededia negai haheauka karana ba hahedinaraia na namo?

 ⁷ Thomas, natuna kekenina laḡanina 11, na e gwa: “Natugu kekenina na nega haida e henanadaiva, ‘Iehova be evolusen amo tanobada ai mauri ḡaudia e havara, a?’ eiava, ‘Dahaka dainai eda kominiti​—⁠heḡereḡere, election​—ai na asita hedurumu namo ihavarana totona?’ Nega haida na auka haere maorona baina henia totona. Ta ese ena abidadama ihagoadana totona, hereva momokani tamona baine dibaia mo na dia heḡereḡere. Namona na hahemomokani ḡaudia ma haida baine dibadia.”

⁸ Thomas na mai dibana, natuna baine hadibaia totona baine haheauka na namo. Momokani, Kristen taudia iboudiai bae haheauka na mai anina bada. (Kol. 3:12) Thomas na e laloparara nega bada lalonai ḡau momo baine herevalaidia na namo. Namona na Baibul baine herevalaia namonamo, unu amo natuna ese e dibamu ḡaudia baine abi dae momokani. Thomas na e gwa: “Lau bona adavagu na a uramu baia diba bema natumai na e dibamu ḡaudia e lalopararalaimu bona e abi daemu eiava lasi. Bema mai ena henanadai, una na namo. Badina bema ḡau haida na basine henanadailai gunamu bena be abi daemu, ba lalohekwarahimu.”

9. Edena dala ai natumu na Dirava ena Hereva ba hadibalaia diba?

⁹ Bema tama sina na mai haheaukadia ida natudia be hadibadiamu, natudia na taina ruana abidadama “lababana bona rohana bona harana-latana bona dobuna” be dibamu. (Efe. 3:18) Namona na laḡanidia bona edia laloparara heḡereḡerena ai baita hadibadia. Natu na e dibamu ḡaudia be abi daemu neganai, turadia bona ma haida vairadiai edia abidadama be gwauraia hedinarai dibamu. (1 Pet. 3:15) Heḡereḡere, natumu ese Baibul amo mase taudia ediai e varamu ḡauna be gwauraia hedinarai dibamu, a? Baibul ese e herevalaia dalana e lalopararalaiamu, a? * Momokani, natumu na Dirava ena Hereva ba hadibalaia totona, ba haheauka na mai anina bada, bona una ese anina namona be havaraiamu.​—⁠Deu. 6:6, 7.

10. Emu hahediba karana ai dahaka na mai anina bada?

¹⁰ Momokani, emu haheitalai na mai anina bada, natumu ena abidadama ba hagoadaia totona. Stephanie, natuna kekenidia tatoi, na e gwa: “Natugu na maraḡidia negana amo, sibogu na henanadaiva, ‘Lau ese natugu na hadibadiamu dahaka dainai na abia daemu Iehova na e nohomu, ia na mai ena lalokau, bona ena dala na maoromaoro, a? Natugu ese e itaiamu lau be Iehova na lalokau henia momokanimu, a?’ Bema na uramu natugu ese hereva momokani bae abia dae, namona na egu kara amo una baina hahedinaraia.”

11, 12. Aonega anina be dahaka, bona dahaka dainai baita gwau dibamu ta na dia laḡanina bada dainai lo Kristen tauna ai e laomu?

¹¹ Tame herevalaia heḡereḡerena, Timoteo na (1) revareva helaḡadia e manadalai, bona (2) e abi dae herevadia na e kahu tarika-tarika. To Paulo ena hereva, revareva helaḡadia ese Timoteo bae ‘ha-aonegaia ela bona hahemauri baine davaria,’ anina be dahaka?

¹² Insight on the Scriptures, Volium 2 na e gwa, Baibul lalonai, aonega anina na “diba bona lalo-parara baita ḡaukaralai namonamo hekwakwanai baita hamaoromaoro, dika baita dadarai, eda ura ḡaudia haida baita haḡuḡuru, eiava ma haida baita hagoadadia. Ia na kavakava karana amo idau.”  Baibul na e gwa: “Kavakava na meromero lalonai mia.” (Her. 22:15) Oibe, aonega na lo tauna ena kara ta. Ta na lo Kristen tauna ai e laomu badina na dia laḡanina bada dainai, to ia ese Iehova e gari heniamu bona ena haheḡani e badinamu dainai.​—⁠Salamo 111:10 ba duahia.

13. Edena dala ai matamata tauna ta ese baine hahedinaraia ia na e he-aonegamu hahemauri baine abia totona?

¹³ Lauma dalanai e goadamu matamata taudia na sibodia edia ura ḡaudia eiava turadia edia lalo-ani karadia ese asie ‘huredia dae huredia dihomu.’ (Efe. 4:14) To, idia na ‘daradia’ e ḡaukaralai namonamomu, “maoro bona kerere edia idau” bae diba namonamo totona. (Heb. 5:14, NWT) Abi hidi maorodia e karamu neganai e hahedinaraiamu idia na e uramu lo taudia ai baela​—⁠ena be tamadia sinadia eiava ma haida ese asie itadiamu. (Fili. 2:12) Una aonega karana amo hahemauri bae davaria diba. (Hereva Lada-isidia 24:14 ba duahia.) Edena dala ai natumu ba durua baine he-aonega totona? Ḡau ginigunana na, Baibul ai o abi daemu herevadia ba hadibalaia. Danu, emu hereva bona haheitalai amo ba hahedinaraia, Dirava ena Hereva ese e gwauraia ḡaudia na o abi dae momokanimu.​—⁠Roma 2:21-23.

14, 15. (a) Bapatiso e uramu baine abi matamata tauna ese dahaka ḡau haida baine haerodia na namo? (b) Edena dala ai natumu ba durudia diba Dirava ena taravatu ibadinadia karana ena hahenamo bae laloa bada?

¹⁴ To, natumu ediai maoro bona kerere edia idau ba herevalaia mo na dia heḡereḡere. Namona na ba durudia ini henanadai bae lalodia: ‘Dahaka dainai Baibul ese tauanina ena ura ḡaudia haida na e taravatudia? Dahaka dainai na abia dae momokanimu Baibul ena taravatu ese bae durugu diba?’​—⁠Isa. 48:17, 18.

¹⁵ Bema natu ta na e uramu baine bapatiso, namona na ba durua Kristen tauna ena maduna idauidau baine lalopararalai totona. Una ena namo be dahaka? Dahaka hekwakwanai be davarimu? Edena dala ai be abimu hahenamodia ese be davarimu hekwakwanaidia na e hereadia? (Mar. 10:29, 31) Unu na ta be bapatisomu  murinai enai be varamu ḡaudia haida. Una dainai, do se bapatiso neganai unu ḡau baine haerodia guna na mai anina bada. Danu, bema natumu bo durudiamu kamonai karana ena namo bona gwau-edeede karana ena dika bae haerodia totona, una ese edia abidadama na be hagoadaiamu. Unu amo be abia daemu hanaihanai Baibul ena taravatu ibadinadia karana na mai ena hahenamo.​—⁠Deu. 30:19, 20.

16. Tama sina be dahaka bae kara bema natudia na e bapatiso murinai hereva momokani e daradaralaiamu?

¹⁶ Bema natumu na e bapatiso murinai hereva momokani baine daradaralaia, dahaka ba kara diba? Heḡereḡere, natumu na tanobada ḡaudia baine ura henidia eiava Baibul ena hahekau herevadia ibadinadia ena namo baine daradaralaia matama. (Sal. 73:1-3, 12, 13) Umui tama sina, namona na ba laloparara natumui bo kara heniamu dalana ese ena hetura karana Dirava ida be hagoadaiamu eiava Dirava ena amo be daudaumu. Dia namo natumui ena kara dainai ia ida ba hepapahuahu, ena be ia na maraḡi eiava bada. To namona na mai emui lalokau ida ba durudia edia abidadama bae hagoadaia totona.

17, 18. Bema natu ta na e daradaramu, edena dala ai tama sina ese bae durua diba?

¹⁷ Momokani, e bapatisomu matamata tauna na Iehova enai ena mauri e gwauhamatalaiamu. Anina na e gwauhamata Dirava baine lalokau henia bona ena ura baine ato guna. (Mareko 12:30 ba duahia.) Iehova ese una gwauhamata na e laloa badamu, bona una gwauhamata e karaia tauna ese una danu baine laloa bada na namo. (Koh. 5:4, 5) Nega maorona ai bona mai gado namomu ida, natumu enai unu ba herevalai. To, una do so karaia neganai, namona na Iehova ena orea ese tama sina idurudia totona e halasi ḡaudia ba ḡaukaralaidia namonamo. Unu bo kara tomamu neganai, natumu na be lalopararamu Iehova enai ena mauri e gwauhamatalaia bona e bapatiso karana na mai anina bada bona mai ena hahenamo.

¹⁸ Heḡereḡere, heduru herevadia haida na Questions Young People Ask​—⁠Answers That Work, Volium 1 ena apendiks ai, sinado ladana “Questions Parents Ask” ai bo davari dibamu. E gwa: “Namona na basio laloa natumu ese hereva momokani na e dadaraiamu. Nega momo, idia na badi haida daidiai unu e kara tomamu.” Reana turadia edia laloani herevadia daidiai. Eiava e laloamu idia na asi turadia o e itaiamu Kristen matamata taudia ma haida na lauma dalanai e goadamu. Una apendiks na ma e gwa: “To, una ese na se hahedinaraiamu, natumu na o abi daemu ḡaudia e dadaraiamu. Reana e lalohekwarahilaimu ḡaudia haida ese edia abidadama na e tohoamu.” Una apendiks ese tama sina bae kara ḡaudia haida e herevalai, unu amo natudia bae durudia edia abidadama bae hagoadaia totona.

19. Edena dala ai tama sina ese natudia bae durudia diba bae ‘he-aonega ela bona hahemauri bae davaria’?

¹⁹ Umui tama sina emui maduna badana​—⁠bona hahenamo​—⁠na Iehova ena “hahediba herevadia bona ena sisiba herevadia” na natumui ba hadibalaidia. (Efe. 6:4) Una anina na dia Baibul ena hereva mo ba hadibalaidia, to ba durudia e dibamu ḡaudia bae abi dae momokani. Oibe, e dibamu ḡaudia bae abi dae momokani na namo, unu amo edia mauri na Iehova enai bae gwauhamatalaia bona mai kudoudia idoinai ida bae hesiai henia. Namona na Iehova ena Hereva, ena lauma helaḡa, bona umui tama sina emui ḡaukara goada karana amo natumui ba durudia bae ‘he-aonega ela bona hahemauri bae davaria.’