1, 2. Bõe yĩng tɩ roagdb kẽer mi n maand yɩɩre, b biig sã n wa rat n dɩk a meng n kõ a Zeova n deeg lisgu?

YƲƲMD fãa, yaa Biibl karen-biis tusa n dɩkd b mens n kõt a Zeova n deegd lisgu. B wʋsg yaa kom-bɩɩs sẽn paam tɩ b roagdbã zãms-b Biiblã hal b yãadmẽ, tɩ b yãk yam n na n tũ a Zeova, n miẽ tɩ rẽ la b vɩɩmã na n tall barka. (Yɩɩn. 1:1-3) Y sã n yaa roagda, sambg kae tɩ y gũuda ne y sũur fãa tɩ y kambã wa rɩk b mens n kõ a Zeova n deeg lisgu.—Ges-y 3 Zã 4.

² La tõe tɩ y maanda yɩɩre. Tõe tɩ y mii kom-bɩɩs kẽer sẽn deeg lisgu, tɩ rẽ poor tɩ b wa maand sãmbse, n pa kɩs sɩd tɩ Wẽnnaam noyã yaa b neer yĩng ye. B sãnda meng wa n pa le tũud a Zeova ye. Tõe tɩ yaa rẽ n kɩt tɩ y maand yɩɩre, n yɛɛsdẽ tɩ y biig na n wa n sɩng a Zeova tũubu, tɩ tarẽ-n-tarẽ bɩ a wa pa le nong-a wa pĩndã ye. Y tõe n tagsdame tɩ yẽ me nengẽ na n wa yɩɩ wa Efɛɛz tigingã neb kẽere. A Zeezi ra yeel-b lame yaa: “Yãmb basa y pipi nonglmã.” (Vẽn. 2:4) Bõe la y tõe n maan n sõng y biig fãa t’a ket n nong a Zeova ne a sũur fãa,  t’a tẽebã bɩ sõma, t’a wa tõog n “paam fãagre”? (1 Pɩy. 2:2) Sẽn na yɩl n leoke, d na n goma a Tɩmote yelle.

3. a) Wakat bʋg la a Tɩmote lebg kiris-neda, la bõe n wilgd t’a ra tũuda bũmb nins a sẽn bãngã sõma? b) Wilg-y bũmb a tãabã a Poll sẽn yeel a Tɩmote wã.

³ Yaa yʋʋmd 47 wã sẽnes la tʋm-tʋmd a Poll kẽng Listr tẽngẽ wã pipi. Wõnda yaa wakat kãng la a Tɩmote bãng Kirist tũudmã. Rẽ t’a ra nan pa ta yʋʋm pisi, la a ra tũuda bũmb nins a sẽn bãngã sõma. Yʋʋm a yiib poor t’a ra tũuda a Poll n gilgd n moond koɛɛgã. Na maan yʋʋm 16 zugẽ, a Poll gʋlsa a Tɩmote lɛtre, n yeel-a yaa: “Kell n gãd bũmb ning fo sẽn zãmse, fo sẽn tẽed a soabã. Fo mii f sẽn zãms bõn-kãng ned ning nengẽ. Hal f yãadem wakate, fo bãnga Wẽnnaam sebrã [Biiblã babg ning b sẽn da gʋls ne ebre wã]. B tõe n kõo foom yam tɩ f tõog n paam fãagre, fo sẽn tẽed a Zeezi Kirisã.” (2 Tɩm. 3:14, 15) Bũmb a tãab la a Poll yeel a Tɩmote: 1) t’a bãnga Wẽnnaam sebrã, 2) t’a gãda bũmb ning b sẽn zãms-a, t’a tẽedã, la 3) tɩ tõe n kõ-a-la yam t’a tõog n paam fãagre, a sẽn tẽed a Zeezi Kiristã yĩnga.

4. Siglgã sẽn yiis bũmb ninsã sʋka, bʋg n sõng yãmb tɩ y zãms y kambã Biiblã tɩ kẽ-ba? (Ges-y sõsgã sɩngrẽ fotã.)

⁴ Y sã n yaa roagda, y ratame tɩ y biig fãa bãng Wẽnnaam sebrã, rat n yeel tɩ Biiblã babg ning b sẽn da gʋls ne ebre wã, la a babg ning b sẽn da gʋls ne gɛrkã. Baa kamb nins sẽn nan ket n paoodẽ wã tõe n zãmsa Biiblã kibayã. A Zeova siglgã yiisa sɛb wʋsgo, borsiir-dãmba, video-rãmb la bũmb a taab sẽn tõe n sõng roagdbã tɩ b zãms b kambã Biiblã. Bʋs n be yãmb buud-gomdã pʋgẽ? Tẽeg-y tɩ yaa y kambã sã n bãng Biiblã sõma la b na n tõog n tall zood sõma ne a Zeova.

5. a) A Poll sẽn yeel t’a Tɩmote ‘tẽeda’ bũmb nins a sẽn zãmsã, rat n yeelame tɩ bõe? b) Bõe n kɩt tɩ d miẽ t’a Tɩmote ra kɩsa sɩd ne a Zeezi koe-noogã?

⁵ La y sã n sõng y biig fãa t’a bãng Biiblã kibayã, rẽ bal pa sek ye. Tẽeg-y t’a Poll yeelame t’a Tɩmote ra ‘tẽeda’ bũmb nins a sẽn zãmsã. Gɛrkã pʋgẽ, gom-bil ning a Poll sẽn pʋdã rat n yeelame tɩ “kɩs sɩd ne bũmbu,” bɩ “bas f yam tɩ bũmb yaa sɩda.” A Tɩmote ra mii Biiblã babg ning b sẽn da gʋls ne ebre wã hal a “yãadem wakate.” La a wa n bãnga bũmb wʋsg sẽn kɩt t’a kɩs sɩd t’a Zeezi n yaa Mesi wã. Yaa rẽ n paas a tẽebã pãnga. Sɩd me, a ra kɩsa sɩd ne a Zeezi koe-noogã, hal n dɩk a meng n kõ a Zeova n deeg lisgu, la a wa lebg misioneere, n tũud a Poll n gilgd n moond koɛɛgã.

6. Bõe la y tõe n maan n sõng y kambã tɩ b kɩs sɩd ne bũmb nins b sẽn zãmsd Biiblã pʋgẽ wã?

⁶ Bõe la y tõe n maan n sõng y kambã tɩ b tẽebã tall pãng wa a Tɩmote, tɩ bãmb me kɩs sɩd ne bũmb nins y sẽn zãmsd-bã? Yaa tɩlɛ tɩ y tall sũ-mare. Pa zĩig pʋgẽ la kambã na n tẽ y sẽn zãmsd-bã ye. Leb n pa yãmb sẽn kɩs sɩd ne bũmb la y kambã me na n kɩs sɩd ne rẽ ye. Sẽn na yɩl tɩ biig fãa kɩs sɩd ne Biiblã sẽn yetã, yaa tɩlɛ t’a tagsd a toore, n tõog n wa ‘mi sõma ne wẽng n bake.’ (Karm-y Ebre-rãmb 5:14.) Roagdba, yãmb tõe n maana bũmb wʋsg n sõng y kambã tɩ b bɩɩs b tẽebã, sẽn yɩɩd fãa b sã n wa tar sogsgo. Bɩ d ges roagd a ye sẽn maand to-to.

7, 8. a) Bõe la rao a ye maanda, tɩ wilgdẽ t’a zãmsda a bi-puglã ne sũ-mare? b) Wakat bʋg la yɩ tɩlɛ tɩ y maan sũ-mar ne y biiga?

⁷ A Toma tara bi-pugl yʋʋm sẽn zems  11. A yeelame: “Mam bi-puglã mi n soka maam yaa: ‘Rẽ yĩnga, a Zeova pa tũnug ne evolisiyõ wã n naan bũmb nins sẽn be tẽngã zugã?’ Pa rẽ bɩ a sok tɩ: ‘Bõe yĩng tɩ d pa kẽesd d toog tẽngã bɩ buudã yɛlẽ, wala makre, n naag n vote, n paam tɩ nebã vɩɩm maneg bilfu?’ Wakat ninga, yaa tɩlɛ tɩ m yõk m meng wʋsgo, n da togs-a zĩig pʋgẽ a sẽn tog n tẽ wã bal ye. Sɩd me, f sã n dat tɩ ned kɩs sɩd tɩ bũmb yaa sɩda, pa f sẽn na n togs-a rẽ vãs zĩig pʋgẽ la a na n tẽ ye. Yaa f sẽn na n vẽnegd-a bilf-bilfu.”

⁸ A Toma ra miime tɩ yɩl n zãms a bi-puglã bũmbu, yaa tɩlɛ t’a tall sũ-mare. Sɩd-sɩdã, sũ-mar yaa tɩlɛ ne kiris-ned fãa. (Kol. 3:12) A Toma miime tɩ yɩlẽ t’a biigã kɩs sɩd ne a sẽn zãmsd-a wã, yaa tɩlɛ tɩ b sõs ne taab naoor wʋsgo, la tɩ na n kaoosa bilfu. Yaa tɩlɛ t’a sõng-a t’a tags a toore, n tõog n kɩs sɩd ne Biiblã sẽn yetã. A Toma yeelame: “Sẽn yɩɩd fãa, sã n yaa bũmb sẽn tar yõod wʋsg la d zãms d bi-puglã, maam ne m pagã na n bao n bãnga a sã n sɩd tẽeda d sẽn zãms-a wã, la a mengã sã n wʋmda a võore. A sã n tar sogsgo, rẽ la sõma. Togs sɩdã, d sã n wilg-a bũmb t’a reeg woto bal n pa sok n na n wʋm a võore, m yam pa gãe ye.”

9. Bõe la y tõe n maan n sõng y kambã tɩ b kɩs sɩd ne Biiblã sẽn yetã?

⁹ Roagdbã sã n zãmsd b kambã ne sũ-mare, b wat n bãnga sɩdã “yalem la a woglem la a zulum ne a zãntlem” sõma. (Efɛ. 3:18) D tõe n zãms-b-la bũmb sẽn zems ne b yʋʋmã, tɩ b tõe n wʋm a võor nana-nana. B tẽebã sã n wa paamd pãnga, b na n tõogd n gomda ne b karen-bi-taasã la neb a taaba, n wilgd b sẽn tẽed bũmb ninsã, la b sẽn tẽed rẽ wã võore. (1 Pɩy. 3:15) Wala makre, yãmb kambã tõe n talla Biiblã n wilg bũmb ning sẽn maand ned kũum poorã bɩ? Rẽ yĩnga, b wʋmda Biiblã sẽn yet bũmb ning kũumã wɛɛngẽ wã võor sõma bɩ? * Tẽeg-y tɩ yɩl n sõng y kambã tɩ b wa kɩs sɩd ne Biiblã sẽn yetã, yaa tɩlɛ tɩ y tall sũ-mare, la y modgrã pa na n yɩ zaalem ye.—Tõo. 6:6, 7.

10. Yɩl n sõng y kambã tɩ b tẽebã paam pãnga, bõe me n yaa tɩlɛ?

¹⁰ Y sã n dat tɩ y kambã tẽebã wa paam pãnga, yaa tɩlɛ me tɩ y kõ-b mak-sõngo. A Ɛstefani yaa pag sẽn tar kom-pugli a tãabo. A yeelame: “Hal baa m kambã sẽn wa n ket n yaa kɩdsã, m da sokda m meng yaa: ‘Rẽ yĩnga, m wilgda m kambã bũmb nins sẽn kɩt tɩ mam kɩs sɩd t’a Zeova sɩd beeme, t’a nonga tõndo, la t’a sẽn maand fãa yaa tɩrgã bɩ? Yaa vẽeneg ne m kambã tɩ mam sɩd nonga a Zeova bɩ?’ Mam mengã sã n pa tẽed bũmb nins m sẽn zãmsd m kambã, b na n yɩɩ wãn n tẽ?”

11, 12. Bõe n wilgd tɩ ned tara yam, la bõe yĩng tɩ pa be ne a soabã yʋʋmã?

¹¹ D yãame t’a Tɩmote 1) ra mii Wẽnnaam sebrã, la 2) t’a ra gãda bũmb ning b sẽn zãms-a, t’a tẽedã. La a Poll sẽn yeel a Tɩmote tɩ Wẽnnaam sebrã ‘tõe n kõ-a-la yam t’a tõog n paam fãagrã’ rat n yeelame tɩ bõe?

¹² Étude perspicace des Écritures sebrã volim a 2 wã wilgame tɩ Biiblã pʋgẽ, b sã n yeel tɩ ned tara yam, rat n yeelame t’a “tara bãngre, n tõe n wʋm bũmb võor me, la a tõe n kɩt tɩ rẽ sõng-a t’a welg zu- loɛɛga, wall a gil yelle, la a tõog n maan bũmb a sẽn yãk yam n dat n maane, pa rẽ bɩ a sõng neb a taaba, tɩ bãmb me tõog n maan woto. Yam ne yalemd yaa toor fasɩ.” Biiblã yeelame tɩ “biig sũur pida ne yalemdo.” (Yel. 22:15) Woto wã, ned sẽn tar yam yaa ned sẽn bɩ. Pa ned yʋʋm la b get n bãng a tẽebã sã n bɩɩme ye. Yaa a sã n tar wẽn-zoeere, n dat ne a sũur fãa n sak a Zeova.—Karm-y Yɩɩn-sõamyã 111:10.

13. Bõe la bi-bɩɩg tõe n maan tɩ wilg t’a tara yam ning sẽn na n kɩt t’a wa paam fãagrã?

¹³ Kom-bɩɩs nins tẽeb sẽn bɩ wã pa basd tɩ bãmb mensã tʋlsem wall b taabã raab kɩt tɩ b lebg wa neb ko-pɛm sẽn tar n lengdẽ, n “rɩkd-b n loogdẽ” ye. (Efɛ. 4:14) B minim n tagsdame, tɩ sõngd-b tɩ b tõe n bãng ‘sõma ne wẽng n bake.’ (Ebre. 5:14) B sã n wa tõe n bãng n yãk yam baa b roagdbã wall kãsem a to pa be yambẽ, wilgdame tɩ b tẽebã bɩtame. (Fili. 2:12) Yaa sẽn tar-a yam woto wã n na n wa paam fãagrã. (Karm-y Yel-bũn 24:14.) Bõe la y tõe n maan n sõng y kambã tɩ b paam yam a woto? Yaa tɩlɛ tɩ y reng n sõng-b tɩ b bãng tɩ yaa sẽn be Biiblã pʋgẽ wã la yãmb kɩs sɩd ne n yɩɩda. Ne y no-goamã la y tʋʋm-tʋmdɩ wã, maan-y tɩ b bãng tɩ yaa Biiblã sẽn yetã la yãmb maood n tũudẽ.—Rom. 2:21-23.

14, 15. a) Bi-bɩɩg sã n dat n deeg lisgu, yɩta sõma t’a reng n tags bõe zugu? b) Bõe la y tõe n maan n sõng y kambã tɩ b bʋgs Wẽnnaam noyã tũub sẽn wat ne bark ninsã zugu?

¹⁴ Y sã n togs y kambã bũmb nins sẽn yaa sõma wã n bak ne sẽn yaa wẽngã, rẽ bal pa sek na sõng-b tɩ b bɩɩs b tẽebã ye. Yɩta sõma me tɩ y sõng-b tɩ b maag b yĩng n tags sogsg kẽer zugu. Wala makre, ‘Bõe yĩng tɩ Biiblã gɩdg bũmb kẽer sẽn noom nebã? Bõe yĩng tɩ m tõe n kɩs sɩd tɩ wakat fãa, Biiblã noyã la a saglsã tũub nafda neda?’—Eza. 48:17, 18.

¹⁵ Y biig sã n wa rat n deeg lisgu, yɩta sõma tɩ y sõng-a t’a bãng tɩ ned sã n deeg lisg n lebg kiris-neda, bũmb kẽer n lebg  tɩlɛ ne-a. A segd n maaga a yĩng me n bʋgs rẽ zugu. A tagsg yaa wãn ne rẽ? A sã n deeg lisgu, nafa wã na n yɩɩ bõe? Bõe n pa na n yɩ nana ne-a? Bõe yĩng tɩ bark nins a sẽn na n paamã yɩɩd zu-loeesã hal zĩig sẽn zãre? (Mark 10:29, 30) Yɩta sõma t’a reng n tags woto fãa zug neere. Y sã n sõng y kambã tɩ b bʋgs a Zeova noyã sakr sẽn wat ne bark ninsã, la a noyã kɩɩsg sẽn wat ne yɛl ninsã, b na n maneg n kɩsa sɩd tɩ wakat fãa, Biiblã saglsã la a noyã tũub nafd-b lame.—Tõo. 30:19, 20.

16. Y biig sã n deeg lisgu, t’a tẽebã wa sɩng komsgo, bõe la y tõe n maane?

¹⁶ Y biig sã n deeg lisgu, n wa maand sãmbs tõnd tũudmã yɛl kẽer wɛɛngẽ, y maanda wãna? Wala makre, dũniyã yɛl kẽer tõe n wa noom-a lame, wall a sokd a meng sã n sɩd yaa Biiblã noyã tũub n kɩtd tɩ ned vɩɩm tall barka. (Yɩɩn. 73:1-3, 12, 13) Bãng-y tɩ y manesem sẽn na n yɩ to-to wã tõe n sõngame tɩ y biigã kell n tũ a Zeova, wall kɩt t’a bas-a menga. A ket n paoodame, t’a zoe n yaa bi-bɩɩg me, y segd n maoome n da yik zabr ne-a rẽ poorẽ ye. Maan-y y sẽn tõe fãa t’a bãng tɩ y nong-a lame, la tɩ y rata ne y sũur fãa n sõng-a.

17, 18. Bi-bɩɩg sã n wa maand sãmbs d tũudmã yɛl kẽer wɛɛngẽ, bõe la a roagdbã tõe n maan n sõng-a?

¹⁷ Bi-bɩɩg sẽn deeg lisg wilga nebã taoor t’a rɩka a meng n kõ a Zeova. A pʋlma a Zeova t’a na n nong-a lame, la a lʋɩɩs a raabã taoor bũmb fãa pʋgẽ. (Karm-y Mark 12:30.) A Zeova nifẽ, pʋleng a woto pa reem yell ye. Segd n yɩɩ woto ne tõnd me. (Koɛ. 5:3, 4) Bao-y wakat sẽn zemse, n gom ne y biigã ne bʋgsem, n tẽeg-a rẽ. La yɩta sõma tɩ y reng n ges bũmb nins a Zeova siglgã sẽn yiis roagdbã yĩngã, tɩ sõng-yã. Y sã n maan woto, y na n tõog n sõnga y biigã t’a tẽeg t’a sẽn dɩk a meng n kõ a Zeova wã pa reem yelle, la t’a sẽn deeg lisg n lebg kiris-nedã na n kɩtame t’a paam bark ka tɛka.

¹⁸ Y tõe n paama sagls a taab Les jeunes s’interrogent — Réponses pratiques sebrã volim a 1 wã baasgẽ. Zĩig n be be tɩ b gʋls tɩ “Les parents s’interrogent.” Be, b yeela roagdbã tɩ b “ra yɩ tao-tao n tags tɩ biigã zãgsa b tũudmã ye. Naoor wʋsgo, yaa bũmb a to n namsd biigã. Tõe tɩ yaa a taabã n pirsd-a n dat t’a maan sẽn pa segde. Tõe me t’a tagsdame tɩ nebã pa nong a zĩigẽ, tɩ tar-a n namsdẽ, wall a getame tɩ tigingã kom-bɩɩs a taabã tʋmda a Zeova tʋʋmã wʋsg n yɩɩd yẽ.” Sebrã paasame tɩ pa wakat fãa la woto wilgd tɩ biigã pa le rat n sak a roagdbã sẽn tẽeb bũmb ninsã ye. Naoor wʋsgo, yaa yell ning bal n namsd-a, n kɩt tɩ yaa toog ne-a t’a tũ a tũudmã. Sebrã kõo sagls a wãn roagdbã sẽn tõe n tũ, n tõog n sõng biig tẽeb sẽn dat n komse.

19. Bõe la roagdbã tõe n maane, n sõng b kambã tɩ b yɩ yam dãmba, n wa “paam fãagre”?

¹⁹ Roagdba, yaa yãmb n segd n wub y kambã, “n sagl-ba, la y keoog-b wa sẽn zems Zu-soabã raabo.” Yãmb tʋʋmd la rẽ, la yaa zu-zẽkre. (Efɛ. 6:4) D yãame tɩ yɩl n maan woto, y segd n sõng-b lame tɩ b bãng Biiblã sẽn yetã. La pa rẽ bal ye. Yaa tɩlɛ me tɩ y sõng-b tɩ b kɩs sɩd ne b sẽn zãmsdã. Segdame tɩ b tẽebã paam pãnga, hal n kɩt tɩ b rɩk b meng n kõ a Zeova n tũ-a ne b sũur fãa. Bɩ a Zeova Gomdã ne a vʋʋsem sõngã, n paas yãmb mensã modgrã sõng y kambã tɩ b yɩ yam dãmba, n wa “paam fãagre.”