Batswadi—Thušang Bana ba Lena Gore ba Hlalefe e le Gore ba tle ba Phologe
“Go tloga boseeng o tsebile mangwalo a makgethwa, ao a kgonago go go hlalefišetša phologo.”—2 TIM. 3:15.
DIKOPELO: 130, 88
1, 2. Ke ka baka la’ng batswadi ba bangwe ba ka ikwa ba tshwenyega ge bana ba bona ba nyaka go kolobetšwa?
NGWAGA o mongwe le o mongwe barutwana ba diketekete ba Beibele ba ineela go Jehofa gomme ba kolobetšwa. Ba bantši ba bona ke bana le bafsa bao ba godišitšwego ke batswadi bao e lego Dihlatse tša Jehofa, gomme ba kgethile bophelo bjo bokaonekaone bja go hlankela Jehofa. (Ps. 1:1-3) Ge e ba o le motswadi wa Mokriste, ga go pelaelo gore o fela pelo ya go tlo bona morwa goba morwedi wa gago a kolobetšwa.—Bapiša le 3 Joh. 4.
2 Lega go le bjalo, o ka ikwa o tshwenyega. Mohlomongwe o bone bafsa ba bangwe ba kolobetšwa gomme ka morago wa bona ba thoma go belaela ge e ba go phela ka melao ya Modimo go tloga go le bohlokwa. Ba bantši ba bona ba ile ba ba ba tlogela phuthego. Ka baka leo, o ka tshwenywa ke gore ngwana wa gago a ka thoma a hlankela Jehofa gabotse, eupša ka morago a fetoga gomme a se sa rata Modimo. A ka swana le Bakriste ba lekgolong la pele la Mengwaga ba kua Efeso bao Jesu a ilego a ba botša gore: ‘Le tlogetše lerato leo le bego le na Kut. 2:4) O ka thuša bjang ngwana wa gago gore a dule a rata Jehofa gomme a “golele phologong”? (1 Pet. 2:2) E le gore re arabe potšišo ye, a re ithuteng mohlaleng wa Timotheo.
le lona pele.’ (“O TSEBILE MANGWALO A MAKGETHWA”
3. (a) Go tlile bjang gore Timotheo e be Mokriste, gona o ile a diriša bjang seo a bego a ithuta sona? (b) Ke dilo dife tše tharo tšeo Paulo a ilego a di bolela ka Timotheo tabeng ya go ithuta?
3 Go ka direga gore Timotheo o ithutile bophelo bja Bokriste ka ngwaga wa bo-47 ge Moapostola Paulo a be a etetše Lisitara ka lekga la pele. Le ge go ka direga gore ka nako yeo Timotheo e be e sa le yo mofsa, o swanetše go ba a be a itshwere gabotse. O ile a diriša seo a bego a ithuta sona. Ka morago ga mengwaga e mebedi, o ile a thekga Paulo modirong wa bosepedi. Ke moka mengwaga e 16 ka morago ga moo, Paulo o ile a ngwalela Timotheo gore: “Tšwela pele dilong tše o ithutilego tšona gomme wa kgodišwa gore o di dumele, o tseba batho bao o ithutilego tšona go bona le gore go tloga boseeng o tsebile mangwalo a makgethwa [a Seheberu], ao a kgonago go go hlalefišetša phologo yeo e lego mabapi le Kriste Jesu.” (2 Tim. 3:14, 15) Hlokomela gore Paulo o ile a bolela gore Timotheo (1) o tsebile mangwalo a makgethwa, (2) o kgodišitšwe go dumela dilo tšeo a ithutilego tšona le gore (3) o hlalefišeditšwe phologo yeo e lego mabapi le Kriste Jesu.
4. Ke dilo dife tšeo wena o bonego di go thuša ge o ruta ngwana wa gago go tseba Jehofa? (Bona seswantšho seo se lego mathomong a sehlogo.)
4 Ka ge o le motswadi wa Mokriste, o nyaka gore ngwana wa gago a tsebe mangwalo a makgethwa ao lehono a dirwago ke Mangwalo a Seheberu le Mangwalo a Bakriste a Segerika. Go ithekgile ka gore ba kwešiša go fihla bokgoleng bofe, bana ba banyenyane ba ka tseba dithuto tše bohlokwa tša batho ba ka Beibeleng le ditiragalo tša ka Beibeleng. Mokgatlo wa Jehofa o tšweleditše dilo tše dintši tšeo batswadi ba ka di dirišago go ruta bana ba bona. Na go na le tšeo di le go gona ka leleme la geno tšeo o ka di dirišago? Gopola gore ngwana wa gago o swanetše go tseba Mangwalo a makgethwa e le gore a be le tswalano e tiilego le Jehofa.
GO “KGODIŠWA GORE O DI DUMELE”
5. (a) Timotheo o be a kgodišegile ka’ng? (b) Re tseba bjang gore Timotheo o ile a kgodišwa gore a dumele ditaba tše dibotse ka Jesu?
5 Go tseba mangwalo a makgethwa go bohlokwa kudu. Lega go le bjalo, go na le mo gontši mo go nyakegago gore o nweletše dithuto tša Mangwalo baneng ba gago go e na le go no ba ruta ka batho ba ka Beibeleng le ditiragalo tša ka Beibeleng. Timotheo le yena o ile a ‘kgodišwa gore a dumele’ seo a bego a ithuta sona ka Beibeleng. Ka mantšu a mangwe, o ile a dumela ka pelo ka moka gore seo a bego a se rutwa e be e le nnete. Timotheo o tsebile Mangwalo a Seheberu go tloga boseeng. Eupša nakong e nngwe o ile a kgodišwa ke mabaka a mangwe a kwagalago a go dumela gore Jesu e be e le Mesia. Ge e le gabotse, tumelo ya Timotheo e be e tiile kudu moo e lego gore o ile a kolobetšwa gomme a šoma le moapostola Paulo modirong wa boromiwa.
6. O ka thuša bjang bana ba gago gore ba kgodišege gore seo ba ithutago sona ka Beibeleng ke nnete?
6 O ka thuša bana ba gago bjang gore ba kgodišege gore seo ba ithutago sona ka Beibeleng ke nnete go swana le ge Timotheo a ile a kgodišega? Sa mathomo, o se ke wa fela pelo. Go kgodišega ga go no itlela; ga se leabela, go ka se no fetela go bana ba gago ka gobane wena o dumela seo o ithutago sona ka Beibeleng. Ngwana yo mongwe le yo mongwe o swanetše go diriša ‘matla a gagwe a tlhaologanyo’ gore a kgodišege gore seo a ithutago sona ka Beibeleng ke nnete. (Bala Baroma 12:1.) Ka ge o le motswadi, o na le boikarabelo bja go thuša ngwana wa gago gore a kgodišege gore seo a ithutago sona ka Beibeleng ke nnete, kudukudu ge a botšiša dipotšišo. Ela hloko mohlala wo o latelago.
7, 8. (a) Tate yo mongwe wa Mokriste o bontšha bjang go se fele pelo ge a ruta morwedi wa gagwe? (b) Ke neng moo wena o ilego wa swanelwa ke go bontšha go se fele pelo ge o ruta ngwana wa gago?
7 Thomas, yo e lego tatago ngwanenyana wa mengwaga e 11 o re: “Morwedi wa ka o fela a mpotšiša gore, ‘O ra gore Jehofa ga se yena a dirilego gore dilo di itire e le gore bophelo bo be gona?’ goba a mpotšiša gore, ‘Ke ka baka la’ng re sa dire dilo tšeo batho ba bantši ba di dirago, go swana le go bouta goba go leka go kaonefatša maemo a mo lefaseng?’ Ka dinako tše dingwe ke leka go se mmotše karabo di sa tloga fase. Ge e le gabotse, go kgodiša motho ga se gore o swanetše go mmotša dilo tše dintši ka nako e tee, eupša o swanetše go mmontšha bohlatse ganyenyane-ganyenyane.”
8 Thomas le yena o a tseba gore ge o ruta motho ga se wa swanela go fela pelo. Ge e le gabotse, Mokriste yo mongwe le yo mongwe ga se a swanela go fela pelo. (Bakol. 3:12) Thomas o lemogile gore ge o ithuta le motho, dilo tše dingwe o tla di kwešiša ge nako e dutše e eya. O ruta morwedi wa gagwe a diriša Mangwalo e le gore a tle a kgone go kgodišega ka seo a ithutago sona. Thomas o re: “Ge go tliwa ditabeng tše bohlokwa, nna le mosadi wa ka re nyaka go tseba ge e ba morwedi wa rena a tloga a dumela seo a ithutago sona, le ge e ba a se kwešiša. Re a thaba ge a re botšiša dipotšišo. Ge e le gabotse ge a ka no dumela selo ntle le go botšiša dipotšišo, seo se ka ntshwenya.”
9. O ka nweletša bjang Lentšu la Modimo pelong ya ngwana wa gago?
9 Ge batswadi ba sa felele bana ba bona pelo ge ba ba ruta, ganyenyane-ganyenyane bana bao ba tla thoma go kwešiša “bophara le botelele le bophagamo le go iša” ga tumelo. (Baef. 3:18) Re ka ba ruta dilo tšeo ba ka di kwešišago go ya ka mengwaga ya bona. Ge ba dutše ba kgodišega ka seo ba ithutago sona, ba ka se tšhabe go hlalosetša batho ba bangwe ditumelo tša bona, go akaretša le bao ba tsenago le bona sekolo. (1 Pet. 3:15) Ka mohlala, na bana ba gago ba ka kgona go diriša Beibele go hlalosetša motho yo mongwe mabapi le seo se diregago ge motho a hwile? Na seo Beibele e se hlalosago tabeng ye le tše dingwe se a kwagala go bona? * Nnete ke gore go nweletša Lentšu la Modimo ngwaneng wa gago go nyaka maiteko a magolo, eupša go na le meputso.—Doit. 6:6, 7.
10. Selo se bohlokwa ke sefe tabeng ya go ruta bana ba gago?
10 O se ke wa lebala gore mohlala wa gago le wona o bohlokwa gore bana ba gago ba be le kgodišego ya gore seo ba ithutago sona ka Beibeleng ke nnete. Ka mohlala, Stephanie, yo e lego mmago banenyana ba bararo o re: “Go tloga ge bana ba ka e sa le ba banyenyane, ke ile ka swanelwa ke go ipotšiša gore, ‘Na ke botša bana ba ka gore ke ka baka la’ng ke kgodišegile gore Jehofa o gona, o na le lerato e bile ditsela tša gagwe di lokile? Na bana ba ka ba a bona gore ke tloga ke rata Jehofa?’ Nka se letele gore bana ba ka ba kgodišege mola nna ke sa kgodišege gore seo ke ithutago sona ka Beibeleng ke nnete.”
GO ‘HLALEFIŠETŠWA PHOLOGO’
11, 12. Bohlale ke’ng, gona ke ka baka la’ng re ka se re bo ithekgile ka gore motho ke yo mo kaaka’ng?
11 Ka ge re kwele, Timotheo o be a (1) tseba Mangwalo a makgethwa e bile (2) a kgodišegile ka ditumelo tša gagwe. Eupša Paulo o be a e ra gore’ng ge a be a re Mangwalo a makgethwa a ka dira gore Timotheo a ‘hlalefišetšwe phologo’?
12 Puku ya Insight on the Scriptures, Bolumo 2, e hlalosa gore go ya ka Beibele bohlale bo akaretša “bokgoni bja go diriša tsebo le kwešišo bakeng sa go rarolla mathata, go phema dikotsi, go fihlelela dipakane goba go nea keletšo e kwagalago. Bo fapana le bošilo.” Beibele e re bošilo bo Die. 22:15) Ka ge bohlale bo fapane le bošilo, ge motho a na le bohlale o bontšha gore o gotše monaganong. Go gola moyeng ga go ye ka gore motho ke yo mo kaakaang, eupša go ya le gore o boifa Jehofa gakaakaang le gore o kwa ditaelo tša gagwe gakaakaang.—Bala Psalme 111:10.
kgokeletšwe pelong ya ngwana. (13. Bafsa le bana ba ka bontšha bjang go hlalefa e le gore ba tle ba phologe?
13 Bafsa le bana bao ba gotšego moyeng ga ba ‘akgaakgwe bjalo ka ge eka ba akgaakgwa ke maphoto le go išwa kua le kua’ ke dikganyogo tša bona goba go dira dilo tšeo dithaka tša bona di ba gapeletšago go di dira. (Baef. 4:14) Go e na le moo, ba tšwela pele ba “[tlwaetša] matla a bona a go hlatha, . . . e le gore ba kgethologanye se se nepagetšego le se se fošagetšego.” (Baheb. 5:14) Ba bontšha gore ba gola moyeng ka go dira diphetho tše bohlale maphelong a bona—gaešita le ge batswadi ba bona goba batho ba bangwe ba bagolo ba sa ba bone. (Bafil. 2:12) Bohlale bjo bjalo bo a nyakega e le gore motho a tle a phologe. (Bala Diema 24:14.) O ka thuša bana ba gago bjang gore ba be le bjona? O swanetše go kgonthišetša gore o ruta bana ba gago ka melao ya Modimo ya ka Beibeleng. Dilo tšeo o di bolelago le tšeo o di dirago di swanetše go bontšha gore o tšeela godimo melao ya Modimo.—Baroma 2:21-23.
Ke ka baka la’ng go le bohlokwa gore motswadi a se kgaotše go dira maiteko a go ruta ngwana wa gagwe? (Bona dirapa 14-18)
14, 15. (a) Ngwana yo a nyakago go kolobetšwa o swanetše go naganišiša ka’ng? (b) O ka thuša bjang ngwana wa gago gore a naganišiše ka ditšhegofatšo tšeo di tlišwago ke go kwa ditaelo tša Modimo?
14 Le ge o ka botša bana ba gago seo se nepagetšego le se se fošagetšego, go sa na le mo gontši moo o swanetšego go go dira. O swanetše go ba thuša gore ba kgone go araba dipotšišo tša go swana le gore: ‘Ke ka baka la’ng Beibele e thibela batho go dira dilo tšeo di ka bonagalago di kgahliša? Ke dilo dife tšeo di nkgodišago gore ka mehla ge ke latela melao ya Modimo ke tla holega?’—Jes. 48:17, 18.
15 Ge e ba ngwana wa gago a nyaka go kolobetšwa, mo thuše gore a naganišiše ka maikarabelo ao a tlišwago ke go kolobetšwa. O ka mmotšiša gore: ‘O ikwa bjang ka maikarabelo ao? Mehola ya go kolobetšwa ke efe? Mathata ao a tlišwago ke go kolobetšwa ke afe? Ke ka baka la’ng mehola Mar. 10:29, 30) Tše ke dipotšišo tšeo motho a swanetšego go ipotšiša tšona pele a kolobetšwa. Thuša ngwana wa gago gore a naganišiše ka ditšhegofatšo tšeo di tlišwago ke go kwa ditaelo tša Modimo, le ditlamorago tše mpe tšeo di ka tlišwago ke go se di kwe. Ke moka ngwana wa gago o tla kgodišega gore ka mehla ge a latela ditaelo tša Modimo o tla holega.—Doit. 30:19, 20.
yeo motho a e hwetšago ge a kolobeditšwe e feta kgole diteko tšeo di mo welago ge a kolobeditšwe?’ (GE MOFSA GOBA NGWANA YO A KOLOBEDITŠWEGO A EBA LE MATHATA
16. Batswadi ba swanetšego go dira’ng ge ngwana wa bona yo a kolobeditšwego a thoma go fokola tumelong?
16 Go thwe’ng ge e ba morwa goba morwedi wa gago a thoma go belaela seo a ithutago sona ka Beibeleng ka morago ga gore a kolobetšwe? Ka mohlala, mofsa yo a kolobeditšwego a ka thoma go rata dilo tša lefase, goba a thoma go ipotšiša ge e ba go phela ka melao ya Modimo go na le mehola. (Ps. 73:1-3, 12, 13) Bjalo ka motswadi o swanetše go tseba gore tsela yeo o tlago go swaragana le bothata bja ngwana wa gago, e ka dira gore a tšwele pele a kopanela le phuthego goba a kgaotše go kopanela le yona. O se ke wa lwa le ngwana wa gago ge a le boemong bjoo, go sa šetšwe gore ke yo monyenyane goba ke mofsa. Maikemišetšo a gago e swanetše go ba go thekga ngwana wa gago ka tsela e lerato e le gore a boele tseleng.
17, 18. Batswadi ba ka thuša bjang ngwana wa bona yo a fokolago tumelong?
17 Ke nnete gore mofsa yo a kolobeditšwego o bontšhitše gore o ineetše go Jehofa. Boineelo bjoo ke go tshepiša Jehofa gore o a mo rata le gore o tla dira thato ya gagwe pele ga dilo ka moka. (Bala Mareka 12:30.) Jehofa ga a tšee tshepišo yeo gabohwefo, le gona motho yo mongwe le yo mongwe yo a e dirilego ga se a swanela go e tšea gabohwefo. (Mmo. 5:4, 5) Gopotša ngwana wa gago taba ye ka nako e swanetšego le ka tsela e botho. Eupša pele o dira seo, bala dikgatišo tšeo mokgatlo wa Jehofa o di lokišeditšego batswadi gomme o naganišiše ka seo o se badilego. Ge o ka dira bjalo, o tla kgona go thuša ngwana wa gago gore a bone gore phetho yeo a e tšerego ya go ineela go Jehofa le go kolobetšwa e bohlokwa e bile e tlo mo tlišetša ditšhegofatšo.
18 Ka mohlala, o ka hwetša thušo ka go lemetletšo sehlogong se se rego “Dipotšišo tša Batswadi” seo se tšwelelago mafelelong a puku ya Dipotšišo tša Bafsa le Dikarabo tše Šomago, Bolumo 1. Sehlogo seo se re: “O se ke wa fo akgofela go phetha ka gore ngwana wa gago yo a lego mahlalagading [goba yo a tsenago bofseng] o ganne tumelo ya gago. Mabakeng a mantši, go na le sebaki sa bothata.” A ka ba a dirwa ke go nyaka go kgahliša dithaka, a lewa ke bodutu, goba a nagana gore bafsa ba bangwe ba Bakriste ba hlankela Jehofa go mo phala. Lemetletšo leo le tšwela pele ka gore: “Ke therešo gore ditaba tše bjalo ka tše ga di kgome kudu melao ya motheo ya tumelo ya gago. Di kgoma kudu maemo ao a dirago gore go bontšha tumelo e be tlhohlo—mohlomongwe mo nakong ye.” Ke moka lemetletšo leo le tšweletša ditšhišinyo tšeo di ka thušago motswadi wa Mokriste gore a thuše ngwana wa gagwe yoo tumelo ya gagwe e fokolago.
19. Batswadi ba ka thuša bjang bana ba bona go hlalefa e le gore ba tle ba phologe?
19 Ka ge o le motswadi, o na le boikarabelo bjo bogolo kudu e bile o na le tokelo ya go godiša bana ba gago “ka tayo le temošo ya Jehofa.” (Baef. 6:4) Bjalo ka ge re bone sehlogong se, go nyakega maiteko a magolo kudu gore o thuše bana ba gago go kgodišega ka seo ba ithutago sona ka Beibeleng go e na le go no ba ruta seo Beibele e se bolelago. Bafsa le bana ba swanetše go ba le kgodišego e tseneletšego yeo e tlago go ba thuša go ineela go Jehofa le go mo hlankela ka dipelo tša bona ka moka. Lentšu la Jehofa, moya wa gagwe o mokgethwa, le maiteko a gago, di ka thuša bana ba gago go hlalefa e le gore ba tle ba phologe.
^ par. 9 Karolo ya Tlhahlo ya go Ithuta ya puku ya “Ke Eng Seo ge e le Gabotse Beibele e se Rutago?” e ka thuša bana le batho ba bagolo go kwešiša Beibele. E hwetšagala go jw.org ka maleme a mantši. Eya ka tlase ga DITHUTO TŠA BEIBELE > DIDIRIŠWA TŠA GO ITHUTA BEIBELE.