1, 2. Ниййергутӕ цӕбӕл фӕттухсунцӕ, сӕ сувӕллӕнтти сӕхе Йеговӕн иснивонд кӕнун ӕма донаргъуд райсун ку фӕффӕндуй, уӕд?

АЛЛИ анз дӕр Библи ка ахур кӕнуй, уонӕй цалдӕр мин адӕймаги сӕ цард Йеговӕн иснивонд кӕнунцӕ ӕма донаргъуд райсунцӕ. Се ’хсӕн фӕууй, рӕстдзийнади ка исгъомбӕл ӕй, ӕма царди тӕккӕ хуӕздӕр над ка равзурста, берӕ уӕхӕн ӕригӕнттӕ дӕр (Пс. 1:1–3). Кӕд ду дӕр Йегови Ӕвдесӕн дӕ ӕма дин сувӕллӕнттӕ ес, уӕд, ӕвӕдзи, хъӕбӕр ӕнгъӕлмӕ кӕсис, дӕ кизгӕ кенӕ дӕ биццеу донаргъуд кӕд райсдзӕй, еци бонмӕ. (Рабарӕ 3 Иоанни 4.)

² Фал, ка ’й зонуй, тухсис. Ӕвӕдзи, зонис, ӕригонӕй донаргъуд ка райста, фал фӕстӕдӕр Хуцауи уагӕвӕрдтӕбӕл гурусхӕ кӕнун ка райдӕдта, уӕхӕн киристӕнтти. Кадӕртӕ ма си рӕстдзийнадӕ дӕр ниууагътонцӕ.  Уомӕ гӕсгӕ, ӕвӕдзи, ду дӕр тухсис, дӕу сувӕллон дӕр донаргъуди фӕсте ку ӕруазал уа ӕма ’й Йеговӕн лӕггадӕ кӕнун ку нӕбал фӕндӕуа, уобӕл. Ӕвӕдзи ин тӕрсис, е дӕр фиццаг ӕноси Ефеси цӕрӕг киристӕнтти хузӕн ку исуа, уомӕй. Еци горӕти ӕмбурдӕн Киристе бауайдзӕф кодта: «Райдайӕни дӕмӕ ци уарзондзийнадӕ адтӕй, е дӕмӕ нӕбал ес» (Рарг. 2:4). Дӕ бон ци ӕй кӕнун, цӕмӕй дӕ сувӕллонӕн ӕ уарзондзийнадӕ ма ӕруазал уа, ӕма фӕййервӕза? (1 Пет. 2:2). Ӕркӕсӕн Тимофеййи хабармӕ.

3. а) Тимофей киристон куд иссӕй ӕма ци базонидӕ, е ӕ цардбӕл куд рабӕрӕг уидӕ? б) Павел Тимофеййӕн цӕхуӕн ӕртӕ гъуддагей кой кодта?

³ Апостол Павел фиццаг хатт Листрӕмӕ ӕрбацудӕй н. э. 47 анзи. Уӕд ма Тимофей ирӕзгӕ кари адтӕй, ӕма Киристей туххӕй дӕр, ӕвӕдзи, гъе уӕд фегъуста. Ци базонидӕ, уой ӕ царди дӕр ӕнхӕст кодта, ӕма дууӕ анзей фӕсте Павели хӕццӕ балций рандӕ ’й. Еу ӕхсӕрдӕс анзей фӕсте имӕ Павел ниффинста: «Ци базудтай ӕма дӕ федарӕй цӕбӕл баууӕндун кодтонцӕ, уобӕл амӕй фӕстӕмӕ дӕр федар хуӕцӕ, уомӕн ӕма зонис, ка дин сӕ байамудта, уони. Удта ду дӕ минкъийӕй фӕстӕмӕ зонис сугъдӕг Финститӕ [Дзиуиттаг Финститӕ] – етӕ дин ратдзӕнцӕ уӕхӕн зунд, цӕмӕй фӕййервӕзай, Йесо Киристебӕл ке ӕууӕндис, уой фӕрци» (2 Тим. 3:14, 15). Дӕ гъос ӕрдарӕ, Павел Тимофеййӕн цӕхуӕн ӕртӕ гъуддагей кой кодта, уомӕ: 1) Сугъдӕг Финститӕ зонун, 2) федарӕй ӕууӕндун ӕма 3) агорун зунд, цӕмӕй фӕййервӕза.

4. Дӕ сувӕллӕнтти ахур кӕнгӕй дӕ бон цӕхуӕн ӕрмӕгӕй ӕй пайда кӕнун? (Кӕсӕ хузӕмӕ статьяй райдайӕни.)

⁴ Куд ниййерӕг уотӕ дӕу дӕр, ӕвӕдзи, фӕндуй, цӕмӕй дӕ сувӕллон зона Сугъдӕг Финститӕ – Дзиуиттаг Финститӕ ӕма Киристон Грекъаг Финститӕ. Сауӕнгӕ ма минкъий сувӕллӕнтти бон дӕр ӕй Библийӕй цӕхуӕндӕр хабӕрттӕ кенӕ си ци адӕни туххӕй финст ес, уони нигъгъуди кӕнун. Йегови организаций фӕрци ниййергутӕн сӕ сувӕллӕнтти ахур кӕнунмӕ берӕ мадзӕлттӕ ес. Зӕгъӕн, киунугутӕ, брошюритӕ ӕма видороликтӕ. Дӕу ӕвзагбӕл ба цӕхуӕн ӕрмӕг ес? Иронх ди ма уӕд, цӕмӕй дӕ сувӕллонӕн Йегови хӕццӕ федар лимӕндзийнадӕ уа, уой туххӕй ин сугъдӕг Финститӕ зонун ӕнӕмӕнгӕ гъуддаг ӕй.

5. а) Цӕбӕл баууӕндтӕ, уобӕл федарӕй хуӕцун ци нисан кӕнуй? б) Тимофей Киристей хабарбӕл федарӕй ке ӕууӕндтӕй, е цӕмӕй бӕрӕг ӕй?

⁵ Библий ци хабӕрттӕ финст ес ӕма си ци адӕни кой цӕуй, сувӕллонӕн айдагъ уони амонун фагӕ нӕй. Тимофей дӕр федар хуӕстӕй «цӕбӕл баууӕндтӕй», уобӕл. Дзиуиттаг Финститӕ «минкъийӕй фӕстӕмӕ» зудта ӕма фӕстӕдӕр федарӕй баууӕндтӕй, Йесо Мессийӕ ке адтӕй, уобӕл. Тимофеййӕн е ’ууӕндундзийнадӕ уойбӕрцӕбӕл федар иссӕй,  ӕма донаргъуд дӕр райста, уой фӕсте ба Павели хӕццӕ миссионерӕй лӕггадӕ кӕнун райдӕдта.

6. Ниййергути бон куд ӕй сӕ сувӕллӕнттӕн банхус кӕнун, цӕмӕй цӕбӕл баууӕндтӕнцӕ, уобӕл федар хуӕцонцӕ?

⁶ Дӕ бон куд ӕй дӕ сувӕллонӕн банхус кӕнун, цӕмӕй е дӕр Тимофеййи хузӕн, цӕбӕл баууӕндтӕй, уобӕл федар хуӕца? Фиццаг: фӕразон уо. Цӕмӕй естӕбӕл федарӕй баууӕндай, уомӕн рӕстӕг гъӕуй. Удта ду цӕбӕлдӕр ке ӕууӕндис, е уобӕл дзорӕг нӕма ӕй, ӕма дӕ сувӕллон дӕр уобӕл ӕууӕнддзӕй. Цӕмӕй е ’ууӕндундзийнадӕ федар уа, уой туххӕй гъӕуама ӕхуӕдӕг сагъӕс кӕна. (Бакӕсӕ Ромӕгтӕмӕ 12:1.) Ниййергутӕ, еци гъуддаги уӕ сувӕллонӕн уӕхецӕй хуӕздӕр неке банхус кӕндзӕй, уӕлдайдӕр ба фарстатӕ ку дӕтта, уӕд. Ӕркӕсӕн еу хабармӕ.

7, 8. а) Еу ниййерӕг ӕ кизги фӕразонӕй куд ахур кӕнуй? б) Уӕхӕн фӕразондзийнадӕ уӕлдай хъӕбӕрдӕр кӕд багъӕуй?

⁷ 11-анздзуд кизгӕ кӕмӕн ес, еу уӕхӕн ӕнсувӕр, Томӕс, зӕгъгӕ, загъта: «Еуӕй-еухатт мӕ мӕ кизгӕ рафӕрсуй: „Цума Йеговӕ Дун-дуйне ку кодта, уӕд ӕ бон н’ адтӕй эволюцийӕй испайда кӕнун? Адӕни царди гъуддӕгти ку архайӕн, уӕд уоми лӕгъузӕй ци ес, зӕгъӕн, ӕвзарӕнтӕмӕ ку цӕуӕн?“» Уӕхӕн уавӕри гъӕуама дӕхебӕл фӕххуӕцай, цӕмӕй ин уотӕ ма зӕгъай, «мах уӕхӕн цӕбӕлдӕрти не ’ууӕндӕн» кенӕ «е раст нӕй», зӕгъгӕ. Федар ӕууӕндундзийнадӕ еу устур бӕлвурдгӕнӕни фӕрци нӕ фӕззиндзӕй, фал ма берӕ листӕг хабӕрттӕ дӕр зонун гъӕуй.

⁸ Томӕс ӕй хуарз зонуй, сувӕллони ахур кӕнгӕй фӕразондзийнадӕ ке гъӕуй. Ӕнӕуой еци менеуӕг еугур киристӕнтти дӕр гъӕуй (Кол. 3:12). Томӕс ӕй балӕдӕрдтӕй, хатгай еци еу гъуддӕгтӕбӕл цалдӕр хатти радзорун дӕр ке багъӕуй. Удта сувӕллони хӕццӕ дзоргӕй хъӕбӕр ӕхсидзгӕ ӕй Библийӕй пайда кӕнун. Томӕс зӕгъуй: «Мӕ бийнойнаги хӕццӕ лӕмбунӕг фӕккӕсӕн нӕ кизгӕ ци базудта, уобӕл ӕцӕгӕйдӕр ӕууӕндуй ӕма имӕ раст кӕсуй ӕви нӕ, уомӕ. Ӕма фарстатӕ ку дӕтта, уӕд е хуарз ӕй. Раст зӕгъгӕй, алцӕбӕлдӕр ку арази кодтайдӕ, уӕд мӕмӕ е ӕнахур фӕккастайдӕ».

9. Дӕ бон куд ӕй дӕ сувӕллонӕн банхус кӕнун, цӕмӕй Хуцауи Дзурдбӕл ӕууӕнда?

⁹ Ниййергутӕ сӕ сувӕллӕнтти фӕразонӕй ку ахур кӕнонцӕ, уӕд сувӕллӕнттӕ сабургай лӕдӕрун райдайдзӕнцӕ «рӕстдзийнадӕн ӕ уӕрхӕ ӕма ӕ дӕргъӕ, ӕ бӕрзӕндӕ ӕмӕ ӕ арф» (Еф. 3:18). Ахур сӕ гъӕуама кӕнӕн, сӕ карӕ ӕма цӕйбӕрцӕ лӕдӕрун сӕ бон ӕй, уомӕ гӕсгӕ. Уотемӕй се ’ууӕндундзийнадӕ федардӕр кӕндзӕй ӕма син ӕнцондӕр уодзӕй, цӕбӕл ӕууӕндунцӕ, уой туххӕй иннетӕн дзорун, сауӕнгӕ ма се ’мкъласонтӕн дӕр (1 Пет. 3:15). Зӕгъӕн, дӕ сувӕллони бон ӕй Библий фӕрци балӕдӕрун кӕнун, мӕрдти ести ес ӕви нӕ, уой? Еци фарста Библи куд лӕдӕрун кӕнуй, е имӕ раст кӕсуй? Иронх ди ма уӕд, цӕмӕй сувӕллон Хуцауи Дзурдбӕл ӕууӕнда, уой туххӕй ӕй фӕразонӕй ахур кӕнун гъӕуй, фал е уой аргъ ӕй (Дук. з. 6:6, 7).

10. Сувӕллӕнтти ахур кӕнгӕй ма ӕхсидзгӕ ци ӕй?

 ¹⁰ Ке зӕгъун ӕй гъӕуй, цӕмӕй дӕ сувӕллон рӕстдзийнади ӕрфедар уа, уой туххӕй ин дӕхуӕдӕг дӕр фӕнзуйнаг гъӕуама уай. Ӕртӕ сувӕллоней мадӕ, Стефӕни, зӕгъгӕ, зӕгъуй: «Мӕ кизгуттӕ ма минкъий ку адтӕнцӕ, гъе уӕд райдӕдтон мӕхе фӕрсун: „Мӕ сувӕллӕнттӕн дзорун, Йеговӕ ӕцӕг Хуцау ке ӕй, уарзгӕ нӕ ке кӕнуй ӕма нӕ раст надбӕл ке аразуй, уобӕл мӕхуӕдӕг цӕмӕн ӕууӕндун, уой? Мӕ сувӕллӕнттӕ ’й уинунцӕ, ӕз Йегови ӕцӕгӕйдӕр ке уарзун, уой?“ Мӕхемӕ федар ӕууӕндундзийнадӕ ку нӕ уа, уӕд ӕй мӕ сувӕллӕнттӕй куд агорон?»

11, 12. Курухон зунд ци ӕй ӕма фиццагидӕр цӕй фӕрци фӕззиннуй?

¹¹ Мах ӕй базудтан, Тимофей 1) Сугъдӕг Финститӕ ке зудта ӕма 2) раст ке ’нцӕ уобӕл федарӕй, ке баууӕндтӕй. Фал Павели дзурдтӕ, Сугъдӕг Финститӕ «дин ратдзӕнцӕ уӕхӕн зунд, цӕмӕй фӕййервӕзай», зӕгъгӕ, куд лӕдӕргӕ ’нцӕ?

¹² Энциклопедий «Понимание Писания» финст ӕй: «Курухон адӕймагӕн ӕ бон ӕй зонундзийнӕдтӕ ӕма лӕдӕргӕдзийнади фӕрци зиндзийнӕдти сӕрти хезун, тӕссаг уавӕртӕй ӕхе еуварс дарун, ӕ нисӕнттӕмӕ тундзун ӕма ма иннетӕн дӕр еци гъуддаги ӕнхус кӕнун. Курухон зунд арӕх ӕвӕрд цӕуй ӕнӕзунддзийнади нихмӕ». Библи зӕгъуй: «Ӕнӕзунддзийнадӕ арф бадуй сувӕллони зӕрди» (Ӕмб. 22:15). Мадта курухон зундӕн ӕнӕзунддзийнади хӕццӕ еумӕйагӕй неци ес. Уӕхӕн зунд фӕлтӕрдгун адӕймаги бӕрӕггӕнӕн ӕй. Адӕймаг курухон исуй, фиццагидӕр Хуцауӕй ке тӕрсуй ӕма имӕ ке игъосуй, уой фӕрци, ӕнзтӕ ибӕл ке рацудӕй, уой фӕрци нӕ, фал. (Бакӕсӕ Псалом 111:10.)

13. Ӕригӕнтти бон куд ӕй ӕвдесун, уӕхӕн зунд сӕмӕ ке ес, цӕмӕй фӕййервӕзонцӕ?

¹³ Фӕлтӕрдгун ка иссӕй, еци ӕригӕнттӕ «улӕнтӕ [ке] рагӕлдзӕ-багӕлдзӕ кӕнунцӕ», уӕхӕн сувӕллӕнтти хузӕн нӕ ’нцӕ. Удта се ’нгӕртти зундбӕл ӕма сӕ бауӕри фӕндти фӕдбӕл нӕ цӕунцӕ (Еф. 4:14). Етӕ исахур ӕнцӕ, «раст ци ӕй ӕма ци нӕй», уой лӕдӕрун (Дзиуит. 5:14). Уой фӕрци сӕ бон уодзӕй зундгин унаффитӕ хӕссун, сӕ ниййергутӕ кенӕ ӕндӕр хестӕртӕ сӕ ку нӕ уинонцӕ, уӕддӕр (Фил. 2:12). Фӕййервӕзунмӕ сӕ гъе уӕхӕн зунд гъӕуй. (Бакӕсӕ Ӕмбесӕндтӕ 24:14.) Уӕ бон куд ӕй уӕ сувӕллӕнттӕн еци гъуддаги банхус кӕнун? Фиццагидӕр син лӕдӕрун кӕнтӕ, цӕхуӕн уагӕвӕрдтӕмӕ гӕсгӕ цӕретӕ, уой. Удта ӕй уӕ дзурдтӕй ӕма уӕ гъуддӕгтӕй уинӕнтӕ, уӕ цард Библий уагӕвӕрдтӕмӕ гӕсгӕ ке аразетӕ (Ром. 2:21–23).

14, 15. а) Сувӕллони донаргъуд райсун ку фӕнда, уӕд цӕбӕл гъӕуама расагъӕс кӕна? б) Дӕ бон куд ӕй дӕ сувӕллонӕн банхус кӕнун, Хуцауи закъӕнттӕмӕ гӕсгӕ цӕрун ци арфӕдзийнӕдтӕ хӕссуй, уой балӕдӕрун?

¹⁴ Фал цӕмӕй сувӕллонӕн е ’ууӕндундзийнадӕ федар уа, уой туххӕй ин раст ци ӕй ӕма ци нӕй, уой дзорун фагӕ нӕй. Гъӕуама ’й баразӕнгард  кӕнай уӕхӕн фарстатӕбӕл расагъӕс кӕнун: «Библимӕ гӕсгӕ цӕхуӕндӕр гъуддӕгтӕ раст цӕмӕннӕ ’нцӕ, кӕд кедӕрти зӕрдӕмӕ цӕунцӕ, уӕддӕр? Библий уагӕвӕрдтӕмӕ гӕсгӕ ку цӕрон, уӕд мин е алкӕддӕр пайда ке уодзӕй, уобӕл мӕ бон федарӕй ӕууӕндун цӕмӕн ӕй?» (Ис. 48:17, 18).

¹⁵ Кӕд дӕ сувӕллони донаргъуд райсун фӕндуй, уӕд ин банхус кӕнӕ, е Хуцауи рази цӕхуӕн устур ихӕс ӕй, уой балӕдӕрун. Еци ихӕстӕ ӕнхӕст кӕнунмӕ цӕттӕ ӕй? Лӕдӕруй ӕй, ӕ цард Хуцауӕн ку иснивонд кӕна, уӕд ин е цӕхуӕн арфӕдзийнӕдтӕ ӕрхӕсдзӕй ӕма цӕхуӕн зиндзийнӕдтӕбӕл исӕмбӕлдзӕй, уой? Цӕмӕн ес зӕгъӕн, ӕма арфӕдзийнӕдтӕ зиндзийнӕдтӕй берӕ фулдӕр уодзӕнцӕ? (Мар. 10:29, 30). Аци фарстатӕбӕл сувӕллон гъӕуама расагъӕс кӕна, цалинмӕ донаргъуд нӕма райста, уӕдмӕ. Удта ма гъӕуама расагъӕс кӕна, Хуцаумӕ ку игъоса, уӕд ин е цӕхуӕн арфӕдзийнӕдтӕ ӕрхӕсдзӕй ӕма ку нӕ игъоса, уӕд ӕй е цӕмӕ ӕркӕндзӕй, уобӕл. Уотемӕй ӕй ӕхуӕдӕг балӕдӕрдзӕй, Библий уагӕвӕрдтӕмӕ гӕсгӕ цӕрун алкӕддӕр хуӕздӕр ке ӕй (Дук. з. 30:19, 20).

16. Ниййергутӕ куд гъӕуама архайонцӕ, сӕ сувӕллон донаргъуди фӕсте рӕстдзийнадӕбӕл гурусхӕ кӕнун ку райдайа, уӕд?

¹⁶ Фал дӕ сувӕллон донаргъуди фӕсте рӕстдзийнадӕбӕл гурусхӕ кӕнун ку райдайа, удта? Зӕгъӕн, ӕ зӕрдӕ аци дуйней гъуддӕгтӕмӕ ӕхсайун райдӕдта кенӕ дузӕрдуг кӕнуй, Библий уагӕвӕрдтӕмӕ гӕсгӕ цӕрун пайда ке ӕй, уобӕл (Пс. 73:1–3, 12, 13). Уӕхӕн уавӕри ниййерӕг ӕхе куд дардзӕй, уомӕй берӕ кӕнгӕ ’й. Дӕ сувӕллон цийфӕнди кари ма уа, уӕддӕр ӕ хӕццӕ уотӕ дзорӕ, цӕмӕй ӕй уина, е ’знаг ке нӕ дӕ. Гъӕуама ’й лӕдӕра, уарзгӕ ’й ке кӕнис ӕма ин ӕ хуарзбӕл ке тухсис, уой.

17, 18. Е ’ууӕндундзийнадӕ кӕмӕн ӕрлӕмӕгъ ӕй, уӕхӕн сувӕллонӕн ниййергути бон куд ӕй банхус кӕнун?

¹⁷ Сувӕллон донаргъуд ке райста, е уобӕл дзорӕг ӕй, ӕма ӕ цард Хуцауӕн иснивонд кодта. Ӕндӕр загъдӕй, Йеговӕн дзурд равардта, ке ’й уарздзӕй ӕма, цийфӕнди ма ӕрцӕуа, уӕддӕр ин ке лӕггадӕ кӕндзӕй. (Бакӕсӕ Марки 12:30.) Уӕхӕн дзурд раттун Йегови цӕсти хумӕтӕг гъуддаг нӕй ӕма имӕ мах дӕр гъӕуама уой цӕстӕй кӕсӕн (Еккл. 5:4, 5). Рӕстӕгӕй-рӕстӕгмӕ дӕ сувӕллони хӕццӕ уобӕл фӕлмӕнӕй радзорисӕ. Фал бал уой размӕ ӕркӕсӕ, нӕ публикацити ниййергутӕн ци унаффитӕ ес, уонӕмӕ. Уӕд дӕ бон уодзӕй, дӕ сувӕллонӕн ӕ зӕрдӕбӕл ӕрлӕуун кӕнун, дӕхе Йеговӕн иснивонд кӕнун ӕма донаргъуд райсун цӕхуӕн устур ихӕс ӕй ӕма ци берӕ арфӕдзийнӕдтӕ хӕссуй, уой.

¹⁸ Нӕ организаци ӕригӕнттӕн ци киунугутӕ рауагъта, уонӕй еуеми ниййергутӕн ес уӕхӕн унаффӕ: «Уайтагъд уӕхӕн гъудимӕ ма ӕрцо, ӕма дӕ сувӕллони рӕстдзийнадӕ ниууадзун фӕндуй. Арӕх гъуддаг ӕндӕр цӕйдӕр медӕг фӕууй. Ӕвӕдзи ’й е ’нгӕрттӕ сӕ зундбӕл цӕун кӕнунцӕ. Кенӕ ба имӕ, ка ’й зонуй, уотӕ кӕсуй, ӕма неке гъӕуй. Кенӕ ӕмбурди иннӕ ӕригӕнттӕмӕ кӕсгӕй уотӕ сагъӕс кӕнуй, ӕма ин уойбӕрцӕ неци ӕнтӕсуй». Еци киунуги идарддӕр финст ес: «Кӕд аци гъуддӕгтӕй ескӕци дӕ сувӕллони къулумпи кӕнуй, уӕддӕр е уобӕл дзорӕг нӕй, ӕма ’й рӕстдзийнадӕ ниууадзун фӕндуй». Идарддӕр си ес хуарз унаффитӕ, сувӕллон рӕстдзийнадӕбӕл гурусхӕ кӕнун ку райдайа, уӕд ин куд ес банхус кӕнӕн, уой фӕдбӕл.

19. Ниййергутӕ сӕ сувӕллонӕн куд банхус кӕндзӕнцӕ, уӕхӕн зунд иссерун, цӕмӕй фӕййервӕза?

¹⁹ Сувӕллӕнтти «гъомбӕл кӕнун, Йеговӕ куд амонуй, уотӕ, ӕма сӕ ӕ зундбӕл аразун» устур кадӕ ӕма устур ихӕс ӕй (Еф. 6:4). Куд ӕй фӕууидтан, уотемӕй сувӕллонӕн ӕрмӕстдӕр Библий ци финст ес, уой амонун фагӕ нӕй, гъӕуама ин ӕнхус кӕнай, цӕмӕй ци базудта, уобӕл ӕууӕндгӕ дӕр кӕна. Е ’ууӕндундзийнадӕ федар ку уа, уӕд ӕй бафӕнддзӕй, ӕ цард Йеговӕн иснивонд кӕнун, ӕма ин ӕгас зӕрдӕй лӕггадӕ кӕнун. Хуцауи Дзурд, ӕ сугъдӕг хъаурӕ ӕма дӕ хъиамӕттӕ дӕ сувӕллонӕн банхус кӕндзӕнцӕ уӕхӕн зунд иссерун, цӕмӕй фӕййервӕза.