1, 2. Yini lengenta batali bakhatsateke nangabe bantfwana babo bafuna kutinikela futsi babhajatiswe?

TINKHULUNGWANE tebantfu labafundza liBhayibheli tiyatinikela kuJehova futsi tibhajatiswe. Labanyenti babo bantfu labasebasha labakhuliswe BoFakazi futsi bakhetse indlela lencono kakhulu yekuphila. (Hla. 1:1-3) Nangabe ungumtali longumKhristu, asingabati kutsi uyalilangatelela lilanga lekubhajatiswa kwemntfwana wakho.​—Catsanisa na-3 Johane 4.

² Noma kunjalo, kukhona lokungakukhatsata. Kungenteka ubabonile labasebasha babhajatiswa, kepha ngekuhamba kwesikhatsi babese bayangabata kutsi kukuhlakanipha kuphila ngetimiso taNkulunkulu. Labanyenti babo bayalishiya liciniso. Ngako ungahle ukhatsateke ngekutsi umntfwana wakho utawucale akhonte Jehova kepha ngekuhamba kwesikhatsi bese lutsandvo lanalo ngemaciniso luyaphola. Angagcine asafana nebazalwane  bangelikhulu lekucala ebandleni lase-Efesu, Jesu latsi kubo: ‘Senite lutsandvo lobeninalo ekucaleni.’ (Semb. 2:4) Ungakugwema njani kutsi umntfwana wakho abe sesimeni lesifanako futsi umsite ‘akhulele ensindzisweni’? (1 Phet. 2:2) Kute siphendvule lombuto asesicoce ngesibonelo saThimothi.

3. (a) Thimothi waba ngumKhristu ngephasi kwatiphi timo, futsi yini layenta ngaloko lebekakufundzile? (b) Ngutiphi tintfo letintsatfu Pawula latifundzisa Thimothi?

³ Kungenteka Thimothi waba ngumKhristu nga-47 C.E., ngesikhatsi umphostoli Pawula avakashela kwekucala eListra. Ngisho noma Thimothi bekaseminyakeni yekutfomba, wafundza ngetimfundziso taJesu Khristu. Ngemuva kweminyaka lemibili, wacala kuhamba nemphostoli Pawula nakavakashela emabandla. Nase kuphele iminyaka lengu-16, Pawula wabhalela Thimothi watsi: “Chubeka etintfweni lowatifundza nalowentiwa kutsi utikholwe, wati kutsi watifundza kubani, nekutsi kusukela useluswane wayati imibhalo lengcwele [yesiHebheru], leyo lengakwenta uhlakaniphe kuze usindziswe ngekukholwa kuKhristu Jesu.” (2 Thim. 3:14, 15) Naka kutsi Pawula wakhuluma (1) ngekwati imibhalo lengcwele, (2) ngekwentiwa kutsi utikholwe tintfo lowatifundza, (3)  kanye nangekuhlakanipha kuze usindziswe ngekukholwa kuKhristu Jesu.

4. Ngumaphi emathuluzi lowatfole alusito ekufundziseni bantfwana bakho? (Buka sitfombe lesisekucaleni kwalesihloko.)

⁴ Njengemtali longumKhristu ufuna kutsi umntfwana wakho ayati yonkhe imiBhalo yesiHebheru neyesiGriki. Ngisho noma basebancane, ungabafundzisa ngetindzaba letiseBhayibhelini kanye nangebantfu lokukhulunywa ngabo, kuye ngekwelizinga labo. Inhlangano yaJehova inikete batali emathuluzi labangawasebentisa kute basite bantfwana babo. Cabanga ngemathuluzi latfolakala ngelulwimi lwakho. Khumbula kutsi kubaluleke kakhulu kutsi siyati imiBhalo kute sibe nebuhlobo lobuhle naJehova.

5. (a) Kusho kutsini ‘kwentiwa kutsi ukholwe’ intfo letsite? (b) Sati ngani kutsi Thimothi wentiwa kutsi akholelwe tindzaba letimnandzi ngaJesu?

⁵ Kubalulekile kwati imiBhalo lengcwele. Nanobe kunjalo, kufundzisa bantfwana kusho lokungetulu nje kwekubafundzisa tindzaba letiseBhayibhelini kanye nangebantfu lokukhulunywa ngabo. Thimothi waphindze “wentiwa kutsi atikholwe” tintfo labetifundzile. Ngelulwimi lwesiGriki, loku kusho “kucinisekiswa ngekutsi intfo letsite iliciniso.” Kusukela aseluswane, Thimothi bekayati imiBhalo yesiHebheru. Kepha ngemuva kwesikhashana, wase utfola bufakazi lobamcinisekisa kutsi Jesu unguMesiya. Ngalamanye emavi, lwati Thimothi lebekanalo beluhambisana nekukholwa. Kukholwa kwakhe etindzabeni letimnandzi bekucine kakhulu kangangekutsi wabhajatiswa futsi wahamba naPawula emsebentini wekuba sitfunywa selivangeli.

6. Ungabasita njani bantfwana bakho kutsi bakukholelwe labakufundza eVini laNkulunkulu??

⁶ Ungabasita njani bantfwana bakho kutsi babe nekukholwa lokucinile njengaThimothi? Kwekucala kufanele ube nesineke. Kukholwa akumane nje kutivelele futsi angeke bantfwana bakho bakholwe ngenca yekutsi wena uyakholwa. Umntfwana ngamunye kufanele asebentise ‘emandla akhe ekucabanga’ kute awakholelwe emaciniso laseBhayibhelini. (Fundza Roma 12:1.) Njengemtali, udlala indzima lebalulekile ekusiteni umntfwana wakho ikakhulukati ekuphendvuleni imibuto yakhe. Cabanga nganasi sibonelo.

7, 8. (a) Lomunye babe longumKhristu ukhombisa njani kutsi unesineke nakafundzisa indvodzakati yakhe? (b) Kunini lapho kudzingeke ube nesineke nemntfwana wakho?

 ⁷ Thomas longubabe wentfombatana leneminyaka lengu-11 utsi: “Indvodzakati yami ingahle ibute kutsi, ‘Jehova wasebentisa kutigucukela kwemvelo yini nakadala umhlaba?’ noma ‘Kwentiwa yini kutsi tsine singatenti tintfo letentiwa emmangweni, njengekuyovota kute setame kutfutfukisa live?’ Ngaletinye tikhatsi kudzingeka ngitibambe kute ngingamphendvuli kabi. Umuntfu akakholwa ngenca yekutsi ufundziswe intfo yinye, kepha bufakazi lobunyenti ngibo lobungamenta akholwe.”

⁸ Thomas uyati kutsi kute ufundzise kahle, kudzingeka ube nesineke. Ecinisweni kubalulekile kutsi onkhe emaKhristu abe nesineke. (Khol. 3:12) Uyati nekutsi ngekuhamba kwesikhatsi, kunyenti lokufanele akuchazele indvodzakati yakhe. Kubalulekile kutsi abonisane nayo ngemiBhalo kute ikukholelwe loko layifundzisa kona. Thomas utsi: “Nasikhuluma ngemaphuzu labalulekile, mine nemkami siye sifune kwati kutsi indvodzakati yetfu ikukholelwa mbamba yini loko lesiyifundzisa kona futsi ikutfola kunengcondvo. Siyajabula nangabe inemibuto. Ecinisweni bengingakhatsateka nangabe ingamane nje yemukele lesiyifundzisa kona ngaphandle kwekubuta imibuto.”

9. Ungatinamatsisela njani timfundziso teliBhayibheli kubantfwana bakho?

⁹ Nangabe ubafundzisa ngesineke bantfwana bakho, batawukhona “kubucondzisisa bubanti, budze, kuphakama, kanye nekujula” kwemaciniso. (Ef. 3:18) Kufanele ubafundzise tintfo letihambisana neminyaka yabo nalabangakhona kuticondza. Njengobe bakukholelwa loko labakufundzako, batawukhona kukumelela kulabanye lokufaka ekhatsi labafundza nabo. (1 Phet. 3:15) Nasi sibonelo, bantfwana bakho bangakhona yini kuchaza kutsi liBhayibheli litsi kwentekani kumuntfu nakafa? Bakucondza kahle yini loko lokushiwo liBhayibheli? * Kuliciniso kutsi kunamatsisela timfundziso teliBhayibheli kubantfwana bakho kudzinga sineke, kepha kuletsa imiphumela lemihle.​—Dut. 6:6, 7.

10. Yini lebalulekile kute ufundzise bantfwana bakho?

¹⁰ Kubalulekile nekutsi ube sibonelo lesihle kute bantfwana bakho babe nekukholwa. Stephanie longumake wemantfombatane lamatsatfu utsi: “Kusukela bantfwana bami basebancane, bengisolo ngitibuta kutsi, ‘Ngiyakhuluma yini nabo mayelana nekutsi yini lengenta ngiciniseke kutsi Jehova ukhona mbamba, uyasitsandza futsi tindlela takhe tilungile? Bantfwana bami babona ngalokucacile yini kutsi ngimtsandza mbamba Jehova?’ Angeke ngilindzele kutsi bantfwana bami babe nekukholwa kepha mine ngibe ngite.”

11, 12. Kuyini kuhlakanipha, futsi kungani singatsi akubonakali ngeminyaka umuntfu lanayo?

¹¹ Njengobe sesifundzile, Thimothi (1) bekanelwati ngemiBhalo futsi (2) abeciniseka ngaloko labekukholelwa. Kodvwa bekasho kutsini Pawula nakatsi imibhalo lengcwele beyingenta Thimothi ‘ahlakaniphe kuze asindziswe’?

¹² Incwadzi letsi “Insight on the Scriptures” umculu 2 ichaza kutsi eBhayibhelini kuhlakanipha kufaka ekhatsi “likhono lekusebentisa lwati kanye nekucondza kute ukhone kucatulula tinkinga, ubalekele tingoti, ufinyelele imigomo letsite noma usite labanye bente kanjalo. Kuhlakanipha kuphambene  nebulima.” LiBhayibheli litsi “bulima buboshelwe engcondvweni yemntfwana.” (Taga 22:15) Kunengcondvo kutsi sitsi kuhlakanipha kuluphawu lwekuvutfwa. Kuvutfwa akubonakali ngeminyaka umuntfu lanayo, kepha kubonakala ngekutsi umuntfu esabe Jehova futsi atimisele kugcina imiyalo yakhe.​—Fundza Tihlabelelo 111:10.

13. Umuntfu losemusha angakhombisa njani kutsi uhlakaniphile kute asindziswe?

¹³ Bantfwana labavutsiwe nalabanebuhlobo lobuhle naNkulunkulu abamane nje ‘bajikijeleke shengatsi bajikijelwa ngemagagasi,’ futsi ‘abayiswa lena nalena’ bontsanga yabo noma tifiso tabo. (Ef. 4:14) Esikhundleni saloko, bayatfutfuka ekusebentiseni “imicondvo yabo kuze yehlukanise lokulungile nalokungakalungi.” (Heb. 5:14) Bakhombisa kutsi batfutfukela ekuvutfweni nangabe benta tincumo letihlakaniphile ngisho noma kute umuntfu lomdzala lobabonako. (Fil. 2:12) Kuhlakanipha lokunjalo kubalulekile kute basindziswe. (Fundza Taga 24:14.) Ungabasita njani bantfwana bakho kutsi basindziswe? Lokubaluleke kakhulu kutsi ubafundzise ngalokucacile timiso letisekelwe eBhayibhelini. Ngemavi nangetento, bakhombise kutsi uphila ngetimiso letitfolakala eBhayibhelini.​—Rom. 2:21-23.

14, 15. (a) Yini lebalulekile umuntfu losemusha lokufanele acabange ngayo nakafuna kubhajatiswa? (b) Ungabasita njani bantfwana bakho kutsi bacabangisise ngetibusiso letitfolakala ngekulalela imitsetfo yaNkulunkulu?

¹⁴ Noma kunjalo, kunyenti lokufanele ukwente kunekumane nje utjele bantfwana bakho kutsi yini lelungile nalengakalungi. Kungaba kuhle nekutsi ubasite bacabange ngetimphendvulo temibuto letsi: ‘Kungani liBhayibheli litilahla tintfo letibonakala titinhle emehlweni ebantfu? Yini lengicinisekisa kutsi timiso teliBhayibheli tizuzisa mine?’​—Isa. 48:17, 18.

¹⁵ Umntfwana lofuna kubhajatiswa kufanele asitwe acabangisise ngekutsi utiva njani ngaloko lokulindzeleke kutsi akwente nasekangumKhristu. Tiyini tinzuzo tekubhajatiswa? Ngutiphi tinkinga langahlabetana nato? Kungani tinzuzo titinyenti kunetinkinga langahlangabetana nato? (Mak.  10:29, 30) Leto tinkinga umKhristu langahlangabetana nato ngemuva kwekubhajatiswa. Ngako kubalulekile kutsi ucabange ngalemibuto ngaphambi kwekutsatsa lesincumo lesibalulekile. Sita bantfwana bakho kutsi bacabangisise ngetibusiso letitfolakala ngekulalela kanye nemiphumela lebuhlungu yekungalaleli. Loko kutawubenta baciniseke kutsi kuphila ngetimiso teliBhayibheli kuhlale kusita bona.​—Dut. 30:19, 20.

16. Yini batali lokufanele bayente nangabe umntfwana losabhajatisiswe sekanekukholwa lokubutsakatsaka?

¹⁶ Kutsiwani nangabe indvodzana noma indvodzakati yakho icala kungabata ngemuva kwekubhajatiswa? Nasi sibonelo, umuntfu losemusha loseminyakeni yekutfomba, angakhangwa tintfo talelive noma acale kungabata kutsi kukuhlakanipha kuphila ngetimiso teliBhayibheli. (Hla. 73:1-3, 12, 13) Njengemtali, naka kutsi indlela lowenta ngayo ingabangela umtfwana wakho kutsi asondzelane naJehova noma akhweshe kuye. Timisele kungamlwisi umntfwana wakho ngesincumo lasentako, ngisho asemncane noma sekakhulile. Umgomo wakho kufanele kube kumsekela ngelutsandvo futsi umsite.

17, 18. Batali bangamsita njani umuntfu losemusha lonekungabata?

¹⁷ Kuliciniso kutsi umuntfu losemusha lobhajatisiwe usuke atinikele ngalokuphelele kuJehova. Nakatinikela usuke etsembisa kutsi utawutsandza Nkulunkulu futsi kwenta intsandvo yakhe kutawuta kucala ekuphileni kwakhe. (Fundza Makho 12:30.) Jehova usitsatsa njengalesibalulekile lesetsembiso, futsi noma ngubani losentako naye kufanele asitsatse njengalesibalulekile. (Shu. 5:4, 5) Ngesikhatsi lesifanele nangemusa, kufanele ukhumbute umntfwana wakho ngaleliciniso lelibalulekile. Ngaphambi kwekutsi wente njalo, sebentisa emathuluzi inhlangano yaJehova lewentele batali. Kwenta njalo kungakusita kutsi ukhone kumchazela ngekubaluleka kanye nangetibusiso tekutinikela kuJehova futsi ube ngumKhristu lobhajatisiwe.

¹⁸ Nasi sibonelo, ungatfola seluleko lesilusito esihlokweni lesitsi “Imibuzo Ebuzwa Abazali,” lesisekugcineni kwencwadzi letsi “Intsha Iyabuza​—Izimpendulo Ezisebenzayo,” Umculu  1. Lesihloko sitsi: “Ungasheshi uphetse ngekutsi umntfwana wakho loseminyakeni yekutfomba sewulishiyile liciniso. Etimeni letinyenti kusuke kukhona lokumbangela kutsi ente njalo.” Kungaba kucindzetelwa bontsanga, situnge, noma kucabanga kutsi bontsanga yakhe bachuba kahle ekukhonteni Nkulunkulu. Lesihloko sichubeka sitsi: “Tintfo letifana naleti atisho kutsi umntfwana wakho akakholwa. Kwanyalo, ubhekana netimo letenta kube matima kumelela kukholwa kwakhe.” Lesihloko siphindze sikhulume ngetindlela letinyenti batali labangemaKhristu labangatisebentisa kute basite bantfwana babo labanekukholwa lokubutsakatsaka.

19. Batali bangabasita njani bantfwana babo kutsi ‘bahlakaniphe kuze basindziswe’?

¹⁹ Njengemtali, unemsebenti lobalulekile wekukhulisa bantfwana bakho “ngekubayala nangesicondziso saJehova” futsi lelo lilungelo lelikhulu. (Ef. 6:4) Njengobe sesibonile, kufanele ungagcini nje ngekubafundzisa loko lokushiwo liBhayibheli, kepha kufanele uphindze ubasite bakukholelwe loko labakufundzako. Badzinga kukholwa lokucinile kute batinikele kuJehova futsi bamkhonte ngenhlitiyo yonkhe. Shengatsi liVi laJehova, umoya wakhe longcwele kanye nemetamo yakho njengemtali ingasita bantfwana bakho kutsi ‘bahlakaniphe kuze basindziswe.’