1, 2. Alaghga ishima ia za mbamaren mbagenev iyol shighe u mbayev vev ve soo u tseghan ayol a ve shi eren batisema la sha ci u nyi?

MBAHENEN Bibilo udubu imôngo ka ve tsegha ayol a ve sha ci u Yehova, nahan i er ve batisema. Ve kpishi ka agumaior a i yese a ken mimi shi a tsough u dondon gbenda u hemban doon cii ken uma yô. (Ps. 1:​1-3) Aluer u ngu Orkristu u u lu ormaren yô, alaghga u ngu veren ashe a iyange i wan wou u nomso shin u kwase una er batisema la je, ka u henen a hen ga.​—⁠Nenge 3 Yohane 4.

² Nahan kpa, alaghga ishima ia za u iyol sha kwagh ne. Adooga u nenge agumaior agen er batisema, kpa shighe kar yô, ve hii u lun a akperan ér kwaghfan ngu ken kwagh u kuran atindi a Aôndo la ga. Mbagenev kpishi ve undu gbenda u mimi la je kpaa. Nahan kpa, alaghga ishima ia za u iyol wer, wan wou una hii u zan sha gbenda u Kristu la, kpa una va de, maa mimi una kera doo un ishima er sha hiihii la ga. Alaghga wan wou u nomso shin u kwase la una hingir er ior mba ken tiônnongo u ken Efese u sha ayange a mbaapostoli, u Yesu  ôr kwagh na la nahan, ér: “U undu dooshima wou u hiihii la.” (Mpa. 2:⁠4) Nahan u er nan ve u nôngo u palegh imbakwagh ne shi u wase wan wou u ‘vesen zan ken myomo’? (1 Pet. 2:⁠2) De se time nen sha ikyav i Timoteu la tsô, se zua a mlumun sha mpin la.

3. (a) Timoteu yange hingir Orkristu nena, man yange dondo kwagh u lu henen la nena? (b) Ka avegher atar a henen kwagh a nyi Paulu kaa a Timoteu ér a dondo?

³ A shi nan kpa, Timoteu hii henen kwagh u Kristu shighe u apostoli Paulu za ken Lisetera sha kwa hiihii ken inyom i 47 la. Er adooga Timoteu lu gumor hen shighe ne nahan kpa, nôngo kpoghuloo dondo kwagh u lu henen la. Anyom ahar nga kar yô, hingir u zenden vea Paulu, eren tom u Aôndo. Anyom er 16 nahan nga kar yô, Paulu nger Timoteu washika kaa ér: “Lu ken akaa a i tese u, u ne a jighjigh la, gadia u fa ve mba u hen sha ikyev ve la. Man shi u fa er hii iyev je u kav icighanruamabera [u ken Zwa Heberu] u una fatyô u nan we kwaghfan u zan ken myom sha jighjigh u nan u ken Kristu Yesu la yô.” (2 Tim. 3:​14, 15, NW) Umbur wer Paulu kaa ér: (1) kav icighanruamabera, (2) akaa a i tese u, u ne a jighjigh la, man (3) kwaghfan u zan ken myom ken Kristu Yesu la.

4. Ka akaa a nyi ka wea er tom a mi u tesen mbayev ou mba kiriki ve i hemba wasen ve? (Nenge foto u a lu sha mhii u ngeren ne la.)

⁴ Er u lu Orkristu u u lu ormaren yô, u soo wer wan wou a kav icighanruamabera, u ainge a lu Ruamabera u ken Zwa Heberu man Ruamabera u Mbakristu u ken Zwa Grika la. Mbayev mba kiriki je kpa, vea fatyô u henen akaa a kiriki sha kwagh u ior man akaa a a er i nger ken Bibilo la, er ve fetyô la. Nongo u Yehova due a ityakerada man antyakeradav kua uvidio mba henen kwagh a mi kpishi mba mbamaren vea fatyô u eren tom a mi u wasen mbayev vev yô. Ka akaa ne a me u lu a mi ken zwa wouwe? Umbur wer, aluer wan wou zua a mfe u ken Ruamabera la yô, kwagh u vesen ne una wase un u yan ikyar kôôsôô a Yehova.

5. (a) Inja i ishember i “akaa a i tese u, u ne a jighjigh” la ér nyi? (b) Se fa ser yange i tese Timoteu sha gbenda u una na jighjigh a akaa a i tese un la nena?

⁵ Gba hange hange u mbayev vea kav icighanruamabera. Nahan kpa, gba u se er kwagh a hemba di u tesen mbayev asev akaa a ken jijingi, a sha kwagh u ior man akaa a a er i nger ken Bibilo la. Yange i tese Timoteu sha gbenda u una ‘na jighjigh a akaa a i tese un’ la yô. Ken zwa Grika yô, ishember i “akaa a i tese u, u ne a jighjigh” la, inja na yô ér “u lun a vangertiôr sha kwagh” shin “u lumun shi fan mimi u kwagh wang.” Timoteu yange kav Ruamabera u ken Zwa Heberu la hii shighe u lu iyev la je. Shighe kar yô, time sha akav a tesen ér Yesu ka Mesiya la, nahan lumun ér Yesu ka Mesiya. Se fatyô u ôron kwagh ne sha gbenda ugen ser, mfe u Timoteu zua a mi la, wase un seer lumun a kwagh u i tese un la. Jighilii yô, Timoteu lumun a kwagh u i tese un sha kwagh u loho u dedoo la je yô, er batisema hingir orhenen shi kohol Paulu ken tom u mishen la.

6. U fatyô u wasen mbayev ou vea na jighjigh a kwagh u ve lu henen ken Mkaanem ma Aôndo la nena?

⁶ U er nan ve u fatyô u wasen mbayev ou vea lumun a kwagh u u lu tesen ve la, sha er vea na jighjigh a mi, er Timoteu nahana? Kwagh u hiihii yô, lu a ishimawan. Cii man wan wou a lumun a kwagh u u lu tesen un la yô, a gba u shighe a kar. Shi aluer u lumun a kwagh u i tese u la, nahan u na jighjigh a mi tsô maa, mbayev ou kpa vea na jighjigh a mi ga. Gba u hanmô wan u nomso shin u kwase yô, nana er tom a mkav u nan sha u “paven kwagh u dedoo a kwagh u bo,” sha er nana lumun a mimi u Bibilo la yô. (Ôr Mbaheberu 5:14.) Er u lu ormaren yô, u ngu a tom u hange hange sha gbaa ne, hemban je yô, shighe u wan wou a lu pinen we mbampin la. Nenge ase ikyav ne.

7, 8. (a) Ter ugen u a lu Orkristu yô, ka a tese ishimawan shighe u a lu tesen wan na u kwase la nena? (b) U nenge wer gba u u lu a imba ishimawan la nena?

 ⁷ Anmgbian Thomas, u a lu ter u wankwase ugen u lun anyom 11 la kaa ér: “Ashighe agen wan wam u kwase la ka a pinem mbampin er, ‘Alaghga Yehova yange de akaa a uma gba duen tsô ga zee?’ shin ‘Hii nan ve se eren pati vea ior mba hen ijiir yase sha er se nôngo akaa a za i doo ga?’ Ashighe agen yô, ka m palegh u ôron un kwagh u m soo mer a na jighjigh a mi tseegh tsô la. Kera ga je kpa, ka u henen akaa a mimi kpishi icin i môm la, ka a na ve or lumun a kwagh ga. Kpa or ka nan hingir u lumun a kwagh shighe u nan va zough a akav a kiriki kpishi a tesen mimi u kwagh shon yô.”

⁸ Er Thomas a fe nahan, ka i gba u or a lu a ishimawan ve nana tese orgen ye. Jighilii yô, gba hange hange u Mbakristu cii vea lu a ishimawan. (Kol. 3:12) Thomas kav ér alaghga a gba u una lam vea wan na acin imôngo shighe a wa karen. Ka i gba u una time vea wan na u kwase ne sha avur a Ruamabera a a wase un u lumun a kwagh u a lu henen la yô. Thomas kaa ér: “Mo vea kwase wam ka se soo u fan aluer wan wase u kwase ne na jighjigh a kwagh u a lu henen la a ishima i môm shi a kav un yô, hemban je yô, shighe u se lu lamen vea na sha akaa a hange hange yô. Ka una pine mbampin yô, i doo se. Sha kpôô yô, ka una lumun a ma kwagh a u pinen mbampin shio yô, ishima i zam iyol.”

9. U fatyô u tesen mbayev ou Mkaanem ma Aôndo nena?

⁹ Aluer mbamaren mba tesen mbayev vev sha ishimawan yô, tegh tegh tsô, mbayev mbara vea hii u fan “igbanger man iniembe man mtav man mze” u jighjigh ve u nan la. (Ef. 3:18) Se fatyô u tesen ve kwagh u a zough sha anyom a ve la tseegh, shi una taver ve u kaven ga yô. Vea lumun a kwagh u ve lu henen la yô, a hemba lun ve ican ga u pasen mbagenev kua mba ve ze makeranta môm a ve la, akaa a ve ne jighjigh a mi la. (1 Pet. 3:15) Ikyav i tesen yô, mbayev ou vea fatyô u pasen kwagh u ka a za hemen zum u or kpe la ken Bibilo kpa? Ve kav kwagh u Bibilo i pase la kpa? * Mimi yô, a gba u u lu a ishimawan ve u fatyô u tesen wan wou Mkaanem ma Aôndo ye, kpa iniôngon la ia saa gbilin ga.​—⁠Dut. 6:​6, 7.

10. Shighe u u lu tesen mbayev ou yô, ka nyi i gbe hange hange u u ere?

¹⁰ Jighilii yô, ikyav you i dedoo la kpa ka kwagh u hange hange ugen u una wase mbayev ou vea na jighjigh a kwagh u u lu tesen ve la yô. Anmgbian u kwase Stephanie, u a mar ônov mba kasev utar la kaa ér: “Hii shighe u mbayev av lu iyev la je, ka m pinen iyol yam mer, ‘M ôron mbayev av er i hii ve m ne jighjigh mer Yehova ngu shi ngu a dooshima shi igbenda na ka i vough kpa? Mbayev av vea fatyô u nengen wang ér Yehova doom ishima sha mimi kpa?’ Me fatyô u veren ishima mer mbayev av ve na jighjigh a kwagh u m lu tesen ve la ga, saa mo iyol yam me vande lumun ityesen shon.”

11, 12. Ka nyi i lu kwaghfana, man se fatyô u kuren ikyaa ser ka sha anyom a or tseegh i fe ér nan ngu a kwaghfan ga sha ci u nyi?

¹¹ Er se nenge nahan, Timoteu yange (1) lu a mfe u Ruamabera la, shi (2) lumun a akaa a i tese un la. Kpa inja i kwagh u Paulu kaa ér icighanruamabera una fatyô u nan Timoteu “kwaghfan u zan ken myom” la ér nyi?

¹² Takerada u Insight on the Scriptures, Tihi u sha 2 la pase ér, ken Bibilo yô, kwaghfan ka “tahav mbu eren tom a mfe man mkav sha inja sha u kuren mbamzeyol shi palegh shin yangen kwaghbo shin kuren mbaawashima mbagenev shin wan mbagenev kwagh, wer ve kpa ve er nahan. Kwaghfan kaha a lanegh.” Bibilo kaa ér, “lanegh kange wanye ken ishima.” (Anz. 22:15)  Sha nahan yô, kwaghfan u a kaha a lanegh la, ka ikyav igen i tesen ér or via. Ka sha anyom a or tseegh i fe ér nan via ken jijingi ga, kpa ka sha mcie u nan lu cian Yehova sha mimi shi keghen iyol u kuran atindi a na la.​—⁠Ôr Pasalmi 111:⁠10.

13. Gumor shin gumkwase nana fatyô u tesen ér nan ngu a kwaghfan u zan ken myom la nena?

¹³ Agumaior a a we vian ken jijingi la nga lumun ér asaren a ve shin mkighir u mbakov a “daase a ve i yem a ve wue wue” ga. (Ef. 4:14) Kpa ka ve za hemen u vesen ken jijingi sha u tsaase ‘mkav ve u ken ishima la, sha er a hoghor ve u paven kwagh u dedoo a kwagh u bo’ yô. (Heb. 5:14) Ka ve tese ér mba vesen zan sha iaven i za vian ken jijingi la sha u tsuan akaa a vea er la sha kwaghfan, shighe u mbamaren vev shin mbaganden mbagenev ve lu her ga je kpaa. (Fil. 2:12) Gba hange hange u vea lu a imba kwaghfan ne ve vea zua a myom ye. (Ôr Anzaakaa 24:14.) U fatyô u wasen mbayev ou u zuan a kwaghfan ne nena? Kwagh u hiihii yô, nenge wer u pase mbayev ou ve kav akaainjaa a ou a a har sha Bibilo la wang. Tese ve sha mkaan man sha ieren you ve fa ér, akaawan a a lu ken Mkaanem ma Aôndo la, we kpa a doo u ishima.​—⁠Rom. 2:​21-23.

14, 15. (a) Gba u gumor u nan soo u eren batisema la, nana hen sha akaa a vesen a nyi? (b) U fatyô u wasen mbayev ou u henen sha averen a vea zua a mi sha u ungwan imo i Aôndo la nena?

¹⁴ Nahan cii kpa, gba u u er kwagh a hemba di u ôron mbayev ou kwagh u a lu u shami man u a lu u shami ga tseegh tsô la. Shi doo u u wase ve vea hen sha mbampin er mban nahan, ér: ‘Bibilo venda akaa a i lu inja er a doo se ishima la sha ci u nyi? Ka nyi i ne ve m ne jighjigh mer atindiakaa a Bibilo la doo sha ci wam hanma shighe ciilii?’​—⁠Yes. 48:​17, 18.

¹⁵ Aluer wanye soo u eren batisema yô, gba u a wase nan nana hen sha ikyaa igen ne kpaa. Ikyaa shon yô ér, wanye shon nenge akaa a i gbe u nana gema eren shighe u nan hingir Orkristu la nena? Ka mbamtsera mba nyi nana zua a mi sha u eren akaa shono? Ka mbamtaver mba nyi nana tagher a mini? Mbamtsera mba nana zua a mi la, hemba mbamtaver mba nana tagher a mi la ica je nena? (Mar. 10:​29, 30) Ka akaa a alaghga or a tagher a mi shighe u nan er batisema kera je la. Sha nahan yô, gba hange hange u wanye nana hen sha akaa ne cii ve  nana mase eren batisema u a lu kwagh u numben a mi ga la ye. Ka a wase mbayev vea hen zulee sha averen a vea zua a mi sha u ungwan imo i Yehova man akaabo a vea tagher a mi, aluer ve ungwa imo i Yehova ga la yô, alaghga tsô ve hemba lumun a kwagh u i lu tesen ve la. Ka hanma kwagh vea hemba lumun a mini? Vea hemba lumun a atindiakaa a Bibilo la ér, a hemba doon hanma shighe cii.​—⁠Dut. 30:​19, 20.

16. Aluer jighjigh u nan u ma wanye u nan er batisema la hii u ndôhôr yô, gba u mbamaren mba nan vea er nena?

¹⁶ Nahan kpa, aluer wan wou u nomso shin kwase u u nan er batisema la, nan va hii u lun a akperan sha anshighe ugen di ye? Ikyav i tesen yô, alaghga ma gumor shin gumkwase u nan er batisema yô, nana hii u soon akaa a taregh shin nana hii u lun a akperan ér kwaghfan ngu ken kwagh u dondon akaawan a Bibilo la ga. (Ps. 73:​1-3, 12, 13) Er u lu ormaren yô, fa wer, gbenda u u lam a wan wou u nomso shin u kwase u nan lu a akperan la, ua na yô, nana lumun a kwagh u u ne jighjigh a mi la, shin nana lumun a mi ga. Kpa kange ishima wer u hingir num a wan wou sha ikyaa ne ga, aluer nan ngu wanye u kiriki shin nan gande kera kpaa. Awashima wou a lu u suen nan sha dooshima shi wasen nan sha gbenda u nana hemba zayol ne yô.

17, 18. Aluer ma gumor shin gumkwase nan hii u lun a akperan sha kwagh u mimi yô, mbamaren vea fatyô u wasen nan nena?

¹⁷ Jighilii yô, gumor shin gumkwase u nan er batisema la nan tsegha iyol i nan sha ci u Yehova a ishima i nan. Iyoltseghan ne ka iceghzwa i u er wer u soo Aôndo shi mcivir na hemba u hanma kwagh ugen cii yô. (Ôr Marku 12:30.) Yehova nenge iceghzwa ne ér ka beerkwagh ga, nahan gba u hanma or u nan er i la cii, nana nenge i beelee ga. (Orpa. 5:​4, 5) Nahan umbur nan akaa a mimi ne, sha shighe u i doo yô, man ken bem. Nahan kpa, cii man u er kwagh la yô, er tom a akaa a nongo u Yehova u er sha ci u mbamaren la sha inja. Aluer u er nahan yô, alaghga kwagh ne una wase u u tesen wan wou er iyoltseghan man batisema u eren, hingir Orkristu la, i lu beerkwagh ga, shi a ve or a averen kpishi yô.

¹⁸ Ikyav i tesen yô, mbamaren vea fatyô u zuan a kwaghwan u injaa ken ngeren u seer u a lu a itinekwagh ér “Questions Parents Ask” (Mbampin mba Mbamaren Ve Pin Ve La), ken mkur u takerada u Questions Young People Ask​—⁠Answers That Work, Tihi u sha 1 la. Ngeren la kaa ér: “De kur ikyaa fese wer wan wou u a lu anyom pue kar a kar la venda mimi ga. Ashighe kpishi, ityôkyaa ka i lu i i ne ve wanye la nan lu eren kwagh nahan yô.” Alaghga tsô, mbakwav mba nan mba kighir nan. Akaa agen a alaghga a a na nana hingir u eren kwagh nahan yô, ka mtswenem shin mnenge u nan lu a mi ér agumaior agen nga hemban zan ikyura ken jijingi a nan la. Ngeren u seer la shi kaa ér: “Ambaakaa la, nga a tese ér wan wou nyiman akaa a u ne jighjigh a mi la keng ga. Akaa ne ka a hemba haren sha mbamlu mba ka ve na ve i taver mbayev kpishi u pasen jighjigh ve u nan shighe u ve lu iyev la yô.” Ngeren la maa due a mbamhen kpishi mba ve tese gbenda u Orkristu u nan lu ormaren la nana fatyô u wasen ma gumor shin gumkwase u nan hii u lun a akperan sha kwagh u mimi la yô.

19. Mbamaren vea fatyô u wasen mbayev vev u zuan a “kwaghfan u zan ken myom” la nena?

¹⁹ Er u lu ormaren yô, u ngu a tom u vesen man ian i civirigh i yesen mbayev ou “sha mkôôm man kwaghwan u Ter.” (Ef. 6:⁠4) Er se nenge nahan, gba u u tese mbayev ou kwagh u Bibilo i er la tseegh ga, kpa gba u u wase ve vea lumun a kwagh u ve lu henen la. Mimi yô, gba u vea na jighjigh tsung je yô, kwagh la una mgbegha ve u tseghan ayol a ve sha ci u Yehova shi civir un a ishima i môm. Yô, Mkaanem ma Yehova man icighan jijingi na kua iniôngon you i ormaren la, i wase mbayev ou u zuan a “kwaghfan u zan ken myom” la.