1, 2. Lande na kakoka ambutshi amɔtshi ndjakiyanya naka anawɔ wolanga ndjakimɔ le Jehowa ndo batizama?

NUNU di’ambeki wa Bible wekɔ lo ndjakimɔ le Jehowa ndo wekɔ lo batizama. Efula wekɔ ɛlɔngɔlɔngɔ wakodiama lo akambo wa mɛtɛ ndo wakasɔnɛ yoho ya lɔsɛnɔ yoleki dimɛna. (Os. 1:1-3) Naka wɛ ekɔ ombutshi w’Okristo, kete ondo wɛ ekɔ lo kongɛɛ lushi layobatizama ɔnayɛ.—Ɛdika la 3 Joani 4.

² Koko wɛ koka ndjakiyanya. Ondo wɛ ambɛnaka ɛlɔngɔlɔngɔ ɛmɔtshi wakabatizama, koko wakayotatɛ ndjambola kana ekɔ ohomba mɛtɛ dia vɔ nsɛna lo yoho yɔtɔnɛ l’atɔndɔ wa Nzambi. Amɔtshi wakakome polo lo ntshika akambo wa mɛtɛ. Diakɔ diele, wɛ koka ndjakiyanya dia kana ɔnayɛ ayotatɛ kambɛ Jehowa  ko ndjotshika nanga akambo wa mɛtɛ. Ɔnayɛ koka ndjonga oko Akristo amɔtshi wa l’Ɛfɛsɔ wa lo ntambe ka ntondo. Yeso akawatɛ ate: “Wɛ ambotshika ngandji kaki la yɛ ntondo.” (Ɛny. 2:4) Ngande wakokayɛ nkimanyiya ɔnayɛ dia ntetemala “mpama dia ndjokondja panda”? (1 Pe. 2:2) Sho kokaka nkondja wetshelo oma l’ɛnyɛlɔ ka Timɔte.

3. a) Ngande wakonge Timɔte Okristo, ndo kakɔna kakandasale la kɛnɛ kakandeke? b) Naa akambo asato wendana la wekelo wakate Pɔɔlɔ lo dikambo dia Timɔte?

³ Ɔpɔstɔlɔ Pɔɔlɔ akatshu ntondo dia tembola Lustɛra lo ɔnɔnyi 47. Ondo etena kɛsɔ mbakeke Timɔte laki eke mangase wetshelo wa Yeso. Nde akakambe la kɛnɛ kakandeke ndo l’ɔkɔngɔ w’ɛnɔnyi ehende, nde akatatɛ mbeteta la Pɔɔlɔ. Ɛnɔnyi oko 16 l’ɔkɔngɔ wa laasɔ, Pɔɔlɔ akafundɛ Timɔte ɔnɛ: “Tetemala lo akambo wakayeke ndo wakawakokimanyiya dia mbetawɔ, eeya oma le onto akɔna akayawaeke ndo ɔnɛ oma ko kiɛndakɛnda yayɛ, wɛ akeye efundelo w’ekila wakoka kosha lomba layokokimanyiya dia nkondja panda lo tshimbo ya mbetawɔ le Kristo Yeso.” (2 Tim. 3:14, 15) Tolembete dia Pɔɔlɔ akate dia Timɔte 1) akeye efundelo w’ekila, 2) wakawokimanyiya dia mbetawɔ awui wakandeke, ndo 3) akonge la lomba lakokimanyiya dia nkondja panda lo tshimbo ya mbetawɔ le Kristo Yeso.

4. Kakɔna katokambaka la yɛ dia mbetsha anayɛ w’akɛnda? (Enda osato wele lo mbɔtwɛlɔ.)

⁴ Oko weyɛ ombutshi w’Okristo, wɛ nangaka di’ɔnayɛ mbeya efundelo w’ekila wendana ɛlɔ kɛnɛ la Afundelo wa lo Hɛbɛru ndo Afundelo w’Akristo wa lo Grɛkɛ. Kaanga ana weke akɛnda efula kokaka mbeka awui wendana l’anto ndo akambo wa lo Bible. Okongamelo wa Jehowa ambototondjɛ abuku efula, tobukubu ndo tovidɛo takoka ambutshi nkamba la tɔ dia nkimanyiya anawɔ. Dihomɔ diakɔna l’atei adiɔ diele l’ɔtɛkɛta ayɛ? Ɔnayɛ ekɔ l’ohomba wa mbeya kɛnɛ kele lo Bible dia nde nkeketsha diɔtɔnganelo diasande la Jehowa.

5. a) ‘Kimanyiyama dia mbetawɔ’ kɛdikɛdi na? b) Ngande weyaso dia Timɔte akakimanyiyama dia mbetawɔ lokumu l’ɔlɔlɔ lendana la Yeso?

⁵ Tanyokomɛke tsho lo mbetsha ana awui wendana l’anto ndo akambo watɛkɛtama lo Bible. Nyohɔ dia Timɔte ‘akakimanyiyama dia mbetawɔ.’ Etelo ka lo Grɛkɛ kakakambe la Pɔɔlɔ lanɛ nembetshiyaka “monga l’eshikikelo ka” kana “mbetawoyama ndo nshikikɛ dia dui dimɔtshi diekɔ mɛtɛ.” Timɔte akeyaka Afundelo wa lo Hɛbɛru “oma ko kiɛndakɛnda,” mbuta ate oma ko etena kakinde dikɛnda efula. L’ɔkɔngɔ diko, nde akayetawɔ dia Yeso ekɔ Mɛsiya. Timɔte akayala la mbetawɔ ka wolo, ko nde akabatizama ndo akakambe la Pɔɔlɔ oko misiɔnɛrɛ.

6. Ngande wakokayɛ nkimanyiya anayɛ dia monga la mbetawɔ lo Ɔtɛkɛta wa Nzambi?

⁶ Ngande wakokayɛ nkimanyiya anayɛ dia monga la mbetawɔ oko Timɔte l’oyango wa vɔ la wɔ ‘kimanyiyama dia mbetawɔ’? Ntondotondo, nyonge la solo dia lotutsha. Nɔmbamaka etena k’otale dia monga la mbetawɔ ka wolo. Ndo naka nyu nyambetawɔ dui dimɔtshi, kete dui sɔ halembetshiya ɔnɛ ndo ananyu wayodietawɔ mbala kakɔ ɔtɔi. Ɔna tshɛ pombaka nkamba la “akoka an[de] w’ekanelo ka yimba” dia monga la mbetawɔ lo Bible. (Adia Rɔmɔ 12:1.) Oko weyɛ ombutshi, wɛ kokaka nsala akambo efula dia nkimanyiya anayɛ dia nkeketsha mbetawɔ kawɔ, djekoleko etena kokawɔ ambola.  Tayanga mɛna wetshelo wakokaso nkondja oma l’ɛnyɛlɔ k’ombutshi ɔmɔtshi wa pami.

7, 8. a) Ngande wɛnya ombutshi ɔmɔtshi w’Okristo solo dia lotutsha etena ketshande ɔnande? b) Etena kakɔna kahombayɛ monga la solo dia lotutsha otsha le ɔnayɛ?

⁷ Thomas, lele l’ɔna womoto lele l’ɛnɔnyi 11 mbutaka dia nde mbookaka ambola lo tena dimɔtshi ɔnɛ: “Onde Jehowa akakoke nkamba la ohilwelo dia lɔsɛnɔ monga la nkɛtɛ?” Kana ɔnɛ: “Lande na kahatayasha lo awui wasala anto, ɛnyɛlɔ vɔtɛ dia ndowanya akambo?” Lo tena dimɔtshi, nde mbewɔka dia mbofundɛ kɛnɛ kahombande mbetawɔ. Thomas mbeyaka dia aha paka dui dia woke mbetawoya onto akambo wa mɛtɛ, koko towuiwui efula ta totshitshɛ.

⁸ Thomas mbeyaka nto dia nde pombaka monga la solo dia lotutsha dia mbetsha ɔnande. Lo mɛtɛ, Akristo tshɛ pombaka monga la solo dia lotutsha. (Kɔl. 3:12) Thomas akashihodia ɔnɛ ayɔsa etena k’otale ndo asawo efula dia nkimanyiya ɔnande dia nkeketsha dietawɔ diande. Nde akahombaka nkana yimba la ɔnande lo kɛnɛ kakandekaka oma lo Bible. Thomas mbutaka ate: “Djekoleko lo awui w’ohomba, dimi la wadɛmi nangaka mbeya dia kana ɔnaso mbetawɔka mɛtɛ kɛnɛ kekande ndo kana nde kiɔsaka la nɛmɔ. Naka nde ekɔ la ambola, kete ekɔ dimɛna. Lo mɛtɛ, dimi ndjakiyanyaka naka nde ambetawɔ dui dimɔtshi aha la mboka ambola.”

9. Ngande wakokayɛ nkimanyiya anayɛ dia mbetawɔ Ɔtɛkɛta wa Nzambi?

⁹ Naka ambutshi mbetsha la solo dia lotutsha tshɛ, kete anawɔ wayoyotatɛ nshihodia “wekeke, otale, wemema ndo ɔhɔngɔ” wa mbetawɔ. (Ɛf. 3:18) Nyu koka mbaetsha lo yoho yɔtɔnɛ la ɛnɔnyi awɔ ndo yakokawɔ nshihodia. Etena katakeketala mbetawɔ kawɔ lo kɛnɛ kekawɔ, mbataleke monga dui dia wɔdu le wɔ dia mamɛ dietawɔ diawɔ la ntondo k’anto akina ndo asekawɔ wa la kalasa. (1 Pe. 3:15) Ɛnyɛlɔ, onde anayɛ koka nkamba la Bible dia nembetshiya woho wayala onto l’ɔkɔngɔ wa nyɔi? Onde vɔ mbɔsaka elembetshielo w’oma lo Bible la nɛmɔ? * Ohɔ dia wɛ pombaka monga la solo dia lotutsha dia nkimanyiya ɔnayɛ dia monga la mbetawɔ lo Ɔtɛkɛta wa Nzambi, koko ekɔ ohomba nsala dui sɔ.​—Eoh. 6:6, 7.

10. Kakɔna kahomba monga etenyi k’ohomba ka lo wetshelo ayɛ?

¹⁰ Lo mɛtɛ, ɛnyɛlɔ kayɛ kekɔ nto ohomba dia nkimanyiya anayɛ dia monga la mbetawɔ. Stephanie, ombutshi wele l’ana wa wamato asato mbutaka ate: “Oma ko etena kaki anami akɛnda efula, lakahombaka ndjambola ɔnɛ: ‘Onde dimi lekɔ lo sawola l’anami dia vɔ mbeya lande na ketawɔmi ɔnɛ Jehowa ekɔ, mbokanaka ngandji ndo mboka yande yekɔ osembɔki? Onde anami mɛnaka hwe dia dimi mɛtɛ nangaka Jehowa?’ Halokoke nongamɛ di’anami mbetawoyama naka dimi haletawɔ.”

11, 12. Lomba kɛdikɛdi na, ndo ngande weyaso ɔnɛ halolemanɛ l’ɛnɔnyi wele l’onto?

¹¹ Tambɛna dia Timɔte 1) akeyaka Afundelo ndo 2) aki l’eshikikelo lo kɛnɛ kakandetawɔka. Ko kakɔna kakalange Pɔɔlɔ mbuta etena kakandate di’efundelo w’ekila wakakoke mbisha Timɔte “lomba [lakoo]kimanyiya dia nkondja panda”?

¹² Étude perspicace des Écritures, Volume 2, nembetshiyaka ɔnɛ, lo Bible lomba mendanaka  la “dikoka dia nkamba la ewo ndo yimba lo yoho ya dimɛna dia nkandola ekakatanu, mbewɔ waale, nkotsha eyango ɛmɔtshi kana ndaka anto akina dia nsala dui sɔ. Enginya hasale akambo lo yoho shɔ.” Bible mbutaka dia “awui w’enginya kelekama lo otema w’ɔna dikɛnda.” (Tok. 22:15) Lam’ele lomba ntshikitana l’awui w’enginya, lomba ekɔ djembetelo y’onto lambotshunda. Onto tshundaka lo nyuma l’ɔtɛ wokande Jehowa wɔma ndo walangande mbokitanyiya, koko aha tsho l’ɔtɛ wayande opalanga.​—Adia Osambo 111:10.

13. Ngande wakoka ɛlɔngɔlɔngɔ l’esekaseka mɛnya dia vɔ wekɔ la lomba layowakimanyiya dia nkondja panda?

¹³ Ɛlɔngɔlɔngɔ l’esekaseka wambotshunda lo nyuma lo yoho yakoka bu “oko anto wɛmbama la asuku w’ashi ndo wɛmbama lɛnɛ la lɛnɛ” oma lo nsaki yawɔ kana oma lo tɔsɛngiya t’ɛlɔngɔlɔngɔ ekina. (Ɛf. 4:14) Koko, “wolo wa shɛnɔdi yawɔ” wekɔ lo “[m]bekiyama dia ntshikitanya ɔlɔlɔ la kɔlɔ.” (Hɛb. 5:14) Diakɔ diele, vɔ mbɔsaka tɛdikɔ ta lomba kaanga naka ambutshi awɔ kana epalanga ekina hawowaɛnyi. (Flpɛ. 2:12) Lomba la ngasɔ lekɔ ohomba efula dia nkondja panda. (Adia Tokedi 24:14.) Ngande wakokayɛ nkimanyiya anayɛ dia monga la lomba la ngasɔ? Wɛ pombaka mbakimanyiya dia vɔ mbeya awui wɔsayɛ la nɛmɔ. Oma lo kɛnɛ katayɛ ndo kasalayɛ, vɔ pombaka mɛna dia wɛ ekɔ lo nsala la wolo dia nsɛna lo ndjela atɔndɔ wa lo Bible.​—Rɔmɔ 2:21-23.

14, 15. a) Lo akambo akɔna wahomba ɛlɔngɔlɔngɔ l’esekaseka walanga batizama takanyi yimba? b) Ngande wakokayɛ nkimanyiya anayɛ dia nkana yimba lo ɛtshɔkɔ waya lo nkitanyiya ɛlɛmbɛ wa Nzambi?

¹⁴ Koko dia nkimanyiya anayɛ dia monga la mbetawɔ, tokomɛke tsho lo mbatɛ kɛnɛ kele ɔlɔlɔ la kɛnɛ kele kɔlɔ. Wɛ pombaka mbakimanyiya nto dia nkana yimba la ambola wele oko anɛ: ‘Lande na kashimba Bible awui wɛnama oko amɛna? Ndande wakokami monga l’eshikikelo ɔnɛ atɔndɔ wa lo Bible mongaka tena tshɛ amɛna le mi?’—Isa. 48:17, 18.

¹⁵ Naka ɔnayɛ olanga batizama, kete kimanyiyande nto dia nkana yimba efula lo kɛnɛ  kendana la ɛkɛndɛ wonga l’onto lambobatizama. Ngande wawaɔsande? Ɛlɔlɔ akɔna wonga la dui sɔ? Ekakatanu akɔna wayonga la nde? Lande na kele ɛlɔlɔ wayondokondja wayoleka ekakatanu? (Makɔ 10:29, 30) Ekɔ ohomba efula dia nkana yimba la yambalo tshɛ l’awui asɔ ntondo ka batizama. Kimanyiya ɔnayɛ dia nkana yimba lo ɛtshɔkɔ waya lo monga l’okitanyiya ndo etombelo wa kɔlɔ waya lo monga l’ohendodi. Oma laasɔ, ondo nde ayoleka mbetawɔ ɔnɛ ndjela atɔndɔ wa lo Bible ayongaka tena tshɛ dimɛna le nde.—Eoh. 30:19, 20.

16. Ambutshi ahombawɔ nsala naka mbetawɔ k’ɔnawɔ lakabatizama kambotatɛ mbɔla?

¹⁶ Akokayɛ nsala naka ɔnayɛ ambotatɛ monga la taamu dikambo di’akambo wa mɛtɛ l’ɔkɔngɔ wa batizama? Ɛnyɛlɔ, mbeyaka monga ko ɔnayɛ ambokutwama lo akambo wa l’andja ɔnɛ. Kana mbeyaka monga ko ɔnayɛ ambotatɛ ndjambola dia kana ndjela atɔndɔ wa lo Bible ekɔ mɛtɛ yoho ya lɔsɛnɔ yoleki dimɛna. (Os. 73:1-3, 12, 13) Yoho yayoyosala akambo koka mbɔsɛngiya dia ntetemala kambɛ Jehowa kana bu. Tokakatanake l’ɔnayɛ l’ɔtɛ wa dui sɔ, oyadi nde eke dikɛnda efula kana aya mangase. Koko, nsala la wolo dia mbokimanyiya dia nde mbeya dia wɛ mbolangaka ndo nangaka mbokimanyiya.

17, 18. Naka ɔlɔngɔlɔngɔ kana osekaseka aya la taamu, ngande wakoka ambutshi ande mbokimanyiya?

¹⁷ Onto lakabatizama akayakimɔ le Jehowa. Nde akatshike dɔkɔlɔkɔ dia mbokambɛka ndo mbolangaka oleki oseka ɛngɔ tshɛ. (Adia Makɔ 12:30.) Jehowa mbɔsaka ndjakimɔ oko dɔkɔlɔkɔ di’ohomba efula ndo sho la wɔ pombaka diɔsa ngasɔ. (Ond. 5:4, 5) Ohola ɔnayɛ dui sɔ. Koko ntondotondo, adia ndo eka awui watondja okongamelo wa Jehowa lo dikambo di’ambutshi. Oma laasɔ, la ngandji tshɛ ndo l’etena ka dimɛna, tɛ ɔnayɛ dia yɛdikɔ yakandɔshi ndamɛ ya ndjakimɔ le Jehowa ndo batizama yaki ohomba efula ndo yayowela ɛtshɔkɔ efula.

¹⁸ Ɛnyɛlɔ, wɛ koka ntana alako w’amɛna lo apandisɛ wele l’ɔtɛ a dui ɔnɛ “Les parents s’interrogent” l’ekomelo ka dibuku Les jeunes s’interrogent. Réponses pratiques, Volume 1. Vɔ ndakaka ambutshi diaha vɔ mfɔnya esadi eto ɔnɛ ɔnawɔ la mangase ambotona akambo wa mɛtɛ, koko vɔ pombaka nyanga dia mbeya okakatanu wele la nde. Mbeyaka monga l’ɔtɛ wa tɔsɛngiya t’oma le asekande kana l’ɔtɛ wayaokande opoko. Kana mbeyaka monga ko ɔna ekɔ lo ndjaoka di’ɛlɔngɔlɔngɔ ekina wekɔ lo nsala akambo efula l’olimu wa Jehowa mboleka. Apandisɛ akɔ nembetshiyaka nto di’awui asɔ hɛnya mɛtɛ di’ɔnayɛ ekɔ lo ntona dietawɔ diayɛ. Tena efula, vɔ wekɔ etombelo w’oma l’ekakatanu ekina wele la nde. Oma laasɔ, apandisɛ akɔ mbishaka alako wɛnya woho wakoka ombutshi nkimanyiya ɔna laya la taamu lo kɛnɛ kendana l’akambo wa mɛtɛ.

19. Ngande wakoka ambutshi nkimanyiya anawɔ dia monga la “lomba layo[wa]kimanyiya dia nkondja panda”?

¹⁹ Oko weyɛ ombutshi, wɛ ekɔ l’ɔkɛndɛ ndo diɛsɛ di’ohomba efula dia mbodia anayɛ lo “ohokwelo ndo lo alako wa Jehowa.” (Ɛf. 6:4) Oko wambotɛna, dui sɔ nembetshiyaka dia wɛ pombaka mbetsha anayɛ kɛnɛ kata Bible ndo mbakimanyiya dia monga l’eshikikelo lo kɛnɛ kekawɔ. Etena kayowonga la mbetawɔ ka wolo, vɔ wayotshutshuyama dia ndjakimɔ vɔamɛ le Jehowa ndo mbosha kɛnɛ koleki ɔlɔlɔ le wɔ. Ɔnkɔnɛ, Ɔtɛkɛta wa Jehowa, nyuma kande ndo welo wadjayɛ wakimanyiya anayɛ dia monga la “lomba layo[wa]kimanyiya dia nkondja panda.”