1, 2. Ano an bangin mga ginkakabarak-an han pipira nga kag-anak kon an ira mga anak naruruyag na magdedikar kan Jehova ngan magpabawtismo?

YINUKOT nga estudyante ha Biblia an nagdidedikar kan Jehova ngan nagpapabawtismo. Damu ha ira an mga batan-on nga ginpadaku ha kamatuoran ngan nagpili han pinakamaopay nga klase han pagkinabuhi. (Sal. 1:1-3) Kon usa ka nga Kristiano nga kag-anak, sigurado nga ginpapamulat mo an adlaw nga magpapabawtismo an imo anak.​—Itanding an 3 Juan 4.

² Pero bangin may mga ginkakabarak-an ka. Bangin naobserbaran mo nga may pipira nga batan-on nga nagpabawtismo pero ha urhi nagtikang pagruhaduha kon maaramon ba an pagkinabuhi uyon ha mga suruklan han Dios. An pipira binaya pa ngani ha kamatuoran. Salit bangin mabaraka ka nga an imo anak magtikang ha pagkinabuhi sugad nga Kristiano pero ha urhi magbag-o ngan mawad-an han iya gugma ha kamatuoran.  Bangin magin pariho hiya han pipira nga Kristiano ha Efeso han siyahan nga siglo nga ginsidngan ni Jesus: ‘Ginbayaan niyo an iyo gugma ha tinikangan.’ (Pah. 2:4) Paonan-o mo mabubuligan an imo anak nga malikyan an sugad nga kahimtang basi ‘magtubo ngan matalwas’ hiya? (1 Ped. 2:2) Ha pagbaton hito, aton hisgotan an ehemplo ni Timoteo.

3. (a) Paonan-o nagin Kristiano hi Timoteo, ngan ano an iya ginbuhat han hinbaroan niya an katutdoan han mga Kristiano? (b) Ano an tulo nga punto nga ginpabug-atan ni Pablo kan Timoteo?

³ Posible nga hinbaroan ni Timoteo an katutdoan han mga Kristiano han siyahan nga pagbisita ni apostol Pablo ha Listra han 47 C.E. Bisan kon bangin tin-edyer pa la hi Timoteo hito nga panahon, gin-aplikar gud niya an iya mga nahibaroan. Paglabay hin duha ka tuig, nagin kaupod hiya ni Pablo ha pagmisyonero. Paglabay hin mga 16 ka tuig tikang hito, hi Pablo nagsurat kan Timoteo: “Padayon nga buhata an mga butang nga imo hinbaroan ngan nakombinse ka nga toohan, kay maaram ka kon hin-o an nagtutdo hito ha imo ngan tikang ha imo katawo hinbaroan mo an baraan nga mga sinurat [an Hebreo nga Kasuratan], nga nakakabulig ha imo nga magin maaramon para ha katalwasan pinaagi han pagtoo kan Kristo Jesus.” (2 Tim. 3:14, 15) Tigamni nga gin-unabi ni Pablo an (1) paghibaro han baraan nga mga sinurat, (2) nakombinse nga tumoo ha mga butang nga hinbaroan, ngan (3) pagin maaramon para ha katalwasan pinaagi han pagtoo kan Kristo Jesus.

4. Ano nga mga garamiton an naobserbaran mo nga epektibo gamiton ha pagtutdo ha imo mga anak? (Kitaa an retrato ha tinikangan hini nga artikulo.)

⁴ Sugad nga Kristiano nga kag-anak, karuyag mo nga mahibaro an imo anak han baraan nga mga sinurat, nga yana nag-uupod han Hebreo nga Kasuratan ngan han Kristiano Griego nga Kasuratan. Bisan an gudtiay nga mga anak, depende han ira abilidad, mahimo mahibaro hin simple nga leksyon mahitungod han mga tawohan ngan panhitabo nga mababasa ha Biblia. An organisasyon ni Jehova nagtatagana hin damu nga garamiton nga magagamit han mga kag-anak ha pagbulig ha ira mga anak. Nahuhunahuna mo ba an pipira hito nga may-ada ha iyo linggwahe? Hinumdumi nga an pagkaada kahibaro ha Kasuratan amo an pundasyon han marig-on nga relasyon kan Jehova.

5. (a) Ano an iginpapasabot han ‘nakombinse nga tumoo’? (b) Paonan-o kita nahibaro nga hi Timoteo nakombinse nga tumoo ha maopay nga sumat mahitungod kan Jesus?

⁵ Importante an pagkaada kahibaro ha baraan nga mga sinurat. Pero labaw pa ha pagtutdo mahitungod han mga tawohan ngan panhitabo ha Biblia an ginkikinahanglan basi maipasilsil ha imo mga anak an espirituwal nga mga butang. Tigamni nga hi Timoteo ‘nakombinse nga tumoo.’ Ha orihinal nga linggwahe, ini nga mga pulong nagpapasabot hin “pagin sigurado nga tinuod an usa nga butang.” Hinbaroan ni Timoteo an Hebreo nga Kasuratan tikang pa ha kabata. Pero ha urhi, nakombinse hiya tungod han masasarigan nga mga ebidensya nga hi Jesus an Mesias. Ha simple nga pagkayakan, nagin kombinsido hiya tungod han iya kahibaro. Ngani, natoo gud hi Timoteo ha maopay nga sumat nga tungod hito nagpabawtismo hiya sugad nga disipulo ngan inupod kan Pablo ha pagmisyonero.

6. Paonan-o mo mabubuligan an imo anak basi makombinse nga tumoo ha iya mga nahibabaroan tikang ha Pulong han Dios?

⁶ Paonan-o niyo mabubuligan an iyo mga anak nga makombinse nga tumoo, pariho kan Timoteo? Siyahan, magin pasensyoso. Diri awtomatiko an pagkaada pagtoo; diri liwat ito napapanunod han imo mga anak tungod la kay nakombinse ka nga tumoo. Kinahanglan gamiton han tagsa nga bata an iya “abilidad ha paghunahuna” basi magkaada pagtoo ha mga kamatuoran ha Biblia. (Basaha an Roma 12:1.) Sugad nga kag-anak, may importante ka nga papel basi mahimo ito han imo anak, labi  na kon may iginpapakiana hiya. Tagda an usa nga ehemplo.

7, 8. (a) Paonan-o iginpakita han usa nga Kristiano nga tatay an pagin pasensyoso ha pagtutdo ha iya anak? (b) San-o mo kinahanglan nga magin pasensyoso ha imo anak?

⁷ Hi Thomas, nga tatay han 11 anyos nga daragita, nagsiring: “An akon anak usahay nagpapakiana, ‘Posible ba nga gin-gamit ni Jehova an ebolusyon basi magkaada kinabuhi dinhi ha tuna?’ o, ‘Kay ano nga diri kita naapi ha mga buruhaton ha komunidad​—sugad han pagbutos—​basi magin maopay an mga butang?’ Usahay kinahanglan ko pugngan an akon kalugaringon nga diri bumaton ha paagi nga mapipiritan la hiya nga tumoo. Kay kon huhunahunaon, an pagtoo diri resulta han paghibaro ha usa nga daku nga kamatuoran. Nagtitikang ito ha damu nga gudtiay nga ebidensya.”

⁸ Maaram liwat hi Thomas nga kinahanglan niya magin pasensyoso ha pagtutdo. Ngani, an ngatanan nga Kristiano kinahanglan magin pasensyoso. (Col. 3:12) Nasantop ni Thomas nga ginkikinahanglan an damu ka beses nga pakiistorya ha sulod hin pipira ka panahon. Kinahanglan niya mangatadongan tikang ha Kasuratan basi magkaada pagtoo an iya anak ha iya mga nahibabaroan. Hi Thomas nagsiring: “Labi na ha importante nga mga punto, karuyag namon nga mag-asawa nga masabtan kon natoo gud ba an amon anak ha iya nahibabaroan ngan kon makatadunganon ba ito para ha iya. Kon may mga pakiana hiya, maopay ito. Ha tinuod la, mababaraka ako kon kakarawaton niya an usa nga butang nga diri nagpapakiana.”

9. Paonan-o mo maipapasilsil an Pulong han Dos ha imo mga anak?

⁹ Kon pasensyoso an mga kag-anak ha pagtutdo ha ira mga anak, hinay-hinay nga masasabtan han mga anak an “kahilapad, kahilaba, kahitaas, ngan kahilarom han espirituwal nga mga butang.” (Efe. 3:18) Mahimo naton ipahiuyon ha ira edad ngan abilidad an aton pagtutdo. Samtang nagigin kombinsido hira ha ira nahibabaroan, mas madidepensahan nira ha iba, pati na ha ira mga kaeskwela, an ira mga gintotoohan. (1 Ped. 3:15) Pananglitan, maisasaysay ba han imo mga anak tikang ha Biblia kon ano an nahitatabo ha mga patay? Kombinsido ba hira han igintututdo han Biblia? * Ginkikinahanglan gud an pagin pasensyoso basi maipasilsil ha imo mga anak an Pulong han Dios, pero bawi gud an imo mga pangalimbasog.​—Deut. 6:6, 7.

10. Ano an sadang magin importante nga bahin han imo pagtutdo?

¹⁰ Syempre, importante liwat an imo susbaranan ha pagbulig ha imo anak nga magkaada pagtoo. Hi Stephanie, nga may tulo nga anak, nagsiring: “Tikang han gudtiay pa an akon mga anak, ginpapakianhan ko na an akon kalugaringon, ‘Ginsusumatan ko ba an akon mga anak kon kay ano nga kombinsido ako nga naeksister hi Jehova, mahigugmaon hiya, ngan matadong an iya mga paagi? Nakikita ba han akon mga anak nga hinigugma ko gud hi Jehova?’ Diri ako makakalaom nga magigin kombinsido an akon mga anak kon ako mismo diri kombinsido.”

11, 12. Ano an kinaadman, ngan kay ano nga makakasiring kita nga diri la ito nakadepende ha edad han usa nga tawo?

¹¹ Sugad han aton hinbaroan, hi Timoteo may (1) kahibaro ha Kasuratan ngan (2) kombinsido ha iya mga gintotoohan. Pero ano an karuyag sidngon ni Pablo han nagsiring hiya nga an baraan nga mga sinurat makakahimo kan Timoteo nga magin “maaramon para ha katalwasan”?

¹² An Kaunawaan sa Kasulatan, Tomo 2, nagsasaysay nga ha Biblia, an kinaadman nag-uupod han “abilidad nga gamiton hin maopay an kahibaro ngan pagsabot basi masulbad an mga problema, malikyan o mapugngan an mga peligro, makab-ot an mga tumong, o sagdonan an iba ha pagbuhat hini. Kabaliktaran ito ha kalurongan.” An Biblia nasiring nga “an kalurongan iginsasangbud  ha kasingkasing han usa nga bata.” (Prob. 22:15) Makatadunganon la nga an kinaadman​—an kabaliktaran han kalurongan—​usa nga ebidensya han pagin hamtong. An pagin hamtong ha espirituwal kasagaran na nga diri nakadepende ha edad han usa kondi ha pagkaada husto nga kahadlok kan Jehova ngan pagin andam ha pagsugot ha iya mga sugo.​—Basaha an Salmos 111:10.

13. Paonan-o maipapakita han usa nga batan-on nga maaramon hiya para ha katalwasan?

¹³ An mga batan-on nga hamtong na ha espirituwal diri “gin-aanod-anod han mga balud ngan ginpapalid-palid” han ira mga hingyap o han mga pagsari tikang ha ira mga igkasi-batan-on. (Efe. 4:14) Lugod, ginbabansay nira an ira “abilidad ha pagsabot pinaagi ha paggamit hito basi makakilala han husto ngan sayop.” (Heb. 5:14) Iginpapakita nira nga nag-uuswag hira ha pagin hamtong pinaagi ha paghimo hin maaramon nga mga desisyon​—bisan kon diri nagkikita ha ira an ira mga kag-anak o an iba nga mga adulto. (Fil. 2:12) Importante an sugad nga kinaadman para ha katalwasan. (Basaha an Proberbios 24:14.) Paonan-o mo mabubuligan an imo mga anak nga magkaada hito? Siyahan ha ngatanan, siguroha nga naipatin-aw mo ha imo mga anak nga tikang ha Biblia an imo mga prinsipyo. Ipakita pinaagi ha imo pulong ngan ehemplo nga ginsusunod mo an mga prinsipyo han Pulong han Dios.​—Roma 2:21-23.

14, 15. (a) Ano nga importante nga mga butang an sadang hunahunaon han usa nga batan-on nga naruruyag na magpabawtismo? (b) Paonan-o mo mabubuligan an imo mga anak nga hunahunaon an mga bendisyon nga resulta ha pagin masinugtanon ha mga balaud han Dios?

¹⁴ Pero labaw pa an nahiuupod kay ha pagsumat la ha imo mga anak kon ano an husto ngan kon ano an sayop. Makakaopay liwat kon bubuligan mo hira nga mangatadongan ha mga pakiana sugad han: ‘Kay ano nga igindidiri han Biblia an mga butang nga nakakadani ha unod? Kay ano nga kombinsido ako nga an mga suruklan ha Biblia makakaopay pirme ha akon?’​—Isa. 48:17, 18.

¹⁵ An usa nga batan-on nga naruruyag na magpabawtismo sadang buligan nga hunahunaon hin maopay an usa pa nga butang​—kon ano an iya inaabat ha mga responsabilidad nga nahiuupod ha pagin Kristiano. Ano an mga kapulsanan hito? Ano nga mga sakripisyo an kinahanglan himoon? Kay ano nga mas damu an kapulsanan hito kay ha  mga sakripisyo? (Mar. 10:29, 30) Ito an pipira nga butang nga posible nga atubangon han usa katapos han bawtismo. Salit kinahanglan hunahunaon hin maopay ito nga mga butang antes maghimo hinin seryoso nga desisyon. Kon ginbubuligan an mga anak nga hunahunaon hin maopay an mga bendisyon tungod ha pagin masinugtanon ngan an maraot nga mga resulta tungod ha pagin diri masinugtanon, posible nga magin kombinsido gud hira. Ha ano? Nga an pagsunod ha mga suruklan ha Biblia pirme makakaopay ha ira.​—Deut. 30:19, 20.

16. Ano an sadang ikonsiderar han mga kag-anak kon nagluluya an pagtoo han ira batan-on nga anak nga bawtismado na?

¹⁶ Pero ano man kon katapos han bawtismo han imo anak nagtikang hiya pagruhaduha ha mga kamatuoran? Pananglitan, an usa nga bawtismado nga tin-edyer bangin madani ha mga butang ha kalibotan o magkwestyon kon maaramon ba an pagkinabuhi uyon ha mga prinsipyo ha Biblia. (Sal. 73:1-3, 12, 13) Sugad nga kag-anak, hinumdumi nga an imo reaksyon ha mga pagruhaduha han imo anak mahimo makaimpluwensya kon kakarawaton o isasalikway ba niya an imo gintotoohan. Pangalimbasog nga diri makiglantugi ha imo anak mahitungod hini nga butang, bata pa man hiya o tin-edyer na. An imo sadang magin tumong amo an pagbulig ha iya ha mahigugmaon ngan makakombinse nga paagi.

17, 18. Paonan-o mahimo mabuligan han mga kag-anak an ira batan-on nga anak nga may mga pagruhaduha?

¹⁷ Syempre, an usa nga batan-on nga bawtismado naghimo hin seryoso nga dedikasyon kan Jehova. Usa ito nga saad nga hihigugmaon niya an Dios ngan uunahon an Iya kaburut-on labaw han iba nga butang. (Basaha an Marcos 12:30.) Para kan Jehova, seryoso gud ito nga saad, ngan diri ito sadang igbalewaray han bisan hin-o nga nagsaad hito. (Ekles. 5:4, 5) Ha angayan nga panahon ngan ha buotan nga paagi, ipahinumdom ito ha imo anak. Pero antes mo ito himoon, pag-admi an mga materyal nga igintatagana han organisasyon ni Jehova para ha mga kag-anak. Kon bubuhaton mo ini, mahibabaroan mo kon paonan-o papabug-atan ha imo anak an pagkaseryoso ngan an mga bendisyon han pagdedikar kan Jehova ngan han pagin bawtismado nga Kristiano.

¹⁸ Pananglitan, may mag-opay nga sagdon nga makikita ha apendise nga may ulohan nga “Tanong ng mga Magulang,” ha kataposan nga bahin han libro nga Ang mga Tanong ng mga Kabataan​—Mga Sagot na Lumulutas, Tomo 1. Nasiring ito: “Ayaw dayon hunahunaa nga an imo anak nadiri han imo relihiyon. Makakaopay kon hibabaroan mo kon kay ano nga nawarayan hiya interes ha espirituwal nga mga butang.” Bangin tungod ito ha impluwensya han mga kaupod. An iba pa nga posible nga hinungdan amo an kamingaw o an pag-abat nga mas nag-uuswag ha espirituwal an iba nga batan-on nga Kristiano. An apendise nagpadayon: “Sugad han ginhisgotan nga mga rason, bangin nakukurian la hiya ha iya sitwasyon yana, pero diri man niya ginhuhunahuna nga sayop an imo mga gintotoohan.” Salit an apendise naghahatag hin pipira nga suhestyon kon paonan-o mahimo mabuligan han Kristiano nga kag-anak an iya batan-on nga anak nga nagluluya an pagtoo.

19. Paonan-o mabubuligan han mga kag-anak an ira mga anak nga magin “maaramon para ha katalwasan”?

¹⁹ Sugad nga kag-anak, may-ada ka daku nga responsabilidad ngan pribilehiyo nga atamanon an imo mga anak “uyon ha disiplina ngan sagdon ni Jehova.” (Efe. 6:4) Sugad han aton hinbaroan, nagpapasabot ito nga kinahanglan mo tutdoan an imo mga anak diri la ha kon ano an ginsisiring han Biblia kondi buligan liwat hira nga magkaada pagtoo ha ira hinbabaroan. Oo, kinahanglan nira hin marig-on nga pagtoo nga magpapagios ha ira nga magdedikar kan Jehova ngan mag-alagad ha iya ha bug-os nga kasingkasing. Hinaot an Pulong ni Jehova, an iya espiritu, ngan an iyo pangalimbasog sugad nga mga kag-anak makabulig ha iyo mga anak nga magin “maaramon para ha katalwasan.”