Delfina, wapopiwa konthyimbi yonthele, tyina ankho elitehelela okuti una unene otyiho ankho wovola okunwa ovikunwa vikoleswa. Ombimbiliya kailika okunwa ovikunwa vikoleswa monkhalelo yapola pokati, yati: “Uhakale pokati kononkholwa.” (Provérbios 23:20) Okunwa unene tyeta ovitateka ovinene viekongoko iya kese nima kunkhia ovanthu ovanyingi-yingi mokonda yokunwa unene. Ovitateka ovio ñgeno velityilika-vio ankho ovanthu vaendelele monondonga mbo Mbimbiliya.

Delfina watumbulwa-le wati: “Nanoñgonoka okuti ovikunwa vikoleswa kavimpholo otyiho. Nanoñgonoka okuti okuendela monondonga mbuvasiwa mu Filipenses 4:6, 7 ounongo. yati: ‘Muhakalei notyiho notyipuka natyike, mahi . . . noñgonokesei omasukalalo enyi ku Huku.’ Kese nthiki tyina ankho ndyilitehelela okuti ndyina otyiho, ame ankho ndyityipopila Jeova. Nelisoka umwe ame muene okuti apeho tyina ndyilitehelela okuti nepuila, naihamenwa iya nasoya mandyiiti ku Huku opo ankhuateseko iya tupu opo ndyikale nomalusoke aviuka. Nthiki imwe komuhuka nelitehelele okuti ankho nepuila iya ankho nesukisa okuyekapo omalusoke ana omavi. Otyituwa tyokulikuambela ku Jeova tyankhuatesako okukala nomalusoke aviuka. Andyiimbuka okuti ankho nesukisa okulinga omapiluluko. Mahi opo ndyilinge omapiluluko ankho katyapepukile. Andyitokola okuhanwa-anwa vali ovikunwa vikoleswa. Ankho hipondola okukondoka vali konyima, mokonda ombembwa navasa ongwa unene pala okuipumbwa.”

Mokonda yovitateka ovinyingi ovanthu velitehelela omapita iya vaihamenwa. Mahi Onondonga mbo Mbimbiliya mbupondola okutukuatesako okulityilika kese tyitateka mokonda tupondola okumona ine okuvasa.—Mongeleka, ngo kulikuata-kuata na umwe uhelinepele nae ine okutala ovipuka vihongiliya ovinepo viasila. Otyo omukuendye umwe utiwa Samuel apopia “konthele yokulikuata-kuata.” Ayawisa-ko okuti: “Pamwe ame hitale omunthu ngatyina ndyimuhanda, mahi inkha ndyiimbuka okuti omunthu una ulinga ngoti unthyanda opo tyokulikuata-kuata tyikala vali nawa.” Samuel waimbuka okuti tyokulikuata-kuata katyikahi nawa—namphila ankho ahahande okulinga ngotyo. Mahi atokola okuyekapo otyituwa otyo tyokulikuata-kuata. Mahi otyipuka otyo ankho tyimunumanesa. “Otyituwa otyo otyivi unene,” ayawisa-ko okuti, “mokonda okukala notyituwa otyo tyipondola okutuala kokuhanda vali ovipuka ovikuavo.”

Samuel watanga onthele imwe yovakuendye mo internete jw.org. Iya asoko konthele ya Provérbios 20:11, yati: “Aloo umwe omona omututu ulekesa oñgeni ekahi pokati konontheto mbae, inkha una umwe onondunge.” Oñgeni otyo tyikukuatesako? Samuel wati: “Okulikuata-kuata tyapenga. Tupu nelilongesa okuti okulikuata-kuata otyituwa tyimwe tyapenga tyipondola okueta ovitateka motyinepo. Nasoka oñgeni ha omukai wange komutwe wandyila apondola okulitehelela inkha amona okuti ndyinyana omalele nomukai omukuavo. Namona okuti ndyina okulityilika otyituwa otyo mokonda ndyipondola okutyityiliya. Tyotyili okulinga otyipuka otyo hatyiwa-ko.” Samuel walinga omapiluluko. Pahe ulityilika okulikuata-kuata tupu tyimukuatesako okuhalingi omaundalelapo.

Antonio wali motyiponga tyimwe otyinene tyo maundalelapo wati: ankho utyihole tyokutala ovipuka vihongiliya ovinepo viasila. Namphila ankho anepa-le omukai umwe ehole unene, ankho otyituwa otyo utyihole. Wapopia okuti okusoka konthele ya 1 Pedro 5:8 tyotyili tyemukuatesako. Otestu oyo yati: “Lungukei, nokutala nawa, mokonda ondyale yenyi Eliapu, likahi nokuenda-enda ngatyina onkheyama ikoma yovola ou maili.” Antonio wati: “Omalutalatu ovanthu vahavalele mouye uno eliyandyana unene iya apondola okukala momutwe wetu. O testu oyo yakuatesako okusoka konthele yokulityilika omahongiliyo omavi. Ankho nesukisa okusoka liwa opo ndyiimbuke okuti omalutalatu ana alinga onthele yeliapu. Pahetyino ndyii okuti o Jeova vala upondola okukuatesako opo ‘ndyitualeko nounongo wokupunga nokukala tyalunguka’ ngotyo ame ndyipondola okuyunga nawa omalusoke ange, no mutima wange iya notyinepo tyange.” Antonio wakuatesuako muetyi ankho esukisa, wali novituwa ovivi kohale. Pahe uhole okukuatesuako okulityilika ovitateka.

Tyotyili, Ombimbiliya ipondola okutukuatesako okutetulula ovitateka ovinene. Mahi omokonda yatyi ovitateka vimwe vihevililwa okutetulula mahi vitualako vala? Tutalei Oñgeni Ondaka ya Huku ipondola okutukuatesako okutetulula kese tyitateka tyipondola okumoneka-po.