Айразиккон статьяй ке туххӕй дзурдтан, еци силгоймаг Динӕбӕл устур бӕллӕхтӕ ку ’рцудӕй, уӕд ӕхе ци фӕккодтайдӕ, уой нӕбал зудта, ӕма ниуӕзтӕбӕл фӕцӕй. Библи уотӕ нӕ зӕгъуй, ӕма ниуазун ӕппундӕр не ’нгъезуй. Фал си финст ес: «Сӕнӕй бӕрцӕ ка нӕ зонуй... уони хӕццӕ ма уо» (Ӕмбесӕндтӕ 23:20). Фудниуӕзти туххӕй адӕймагӕн е ’нӕнездзийнадӕ хъӕбӕр ӕрхауй, ӕ бийнонти цард фехӕлуй ӕма е ’мбӕлттӕй раидард уй. Удта фудниуӕзти туххӕй алли анз дӕр милиуангай адӕн цардгъӕуагӕй рамӕлунцӕ. Адӕн Библий унаффитӕмӕ ку игъустайуонцӕ, уӕд аци бӕллӕхтӕй беретӕй сӕхе багъӕуай кодтайуонцӕ.

Динӕ байгъуста Библий унаффитӕмӕ. Е загъта: «Ба ’й лӕдӕрдтӕн, ниуӕзтӕ мӕ мӕ сагъӕстӕй ке не ’суӕгъдӕ кӕндзӕнцӕ ӕма Филиппӕгтӕмӕ 4:6, 7 ци унаффӕ ес, уомӕ гӕсгӕ архайун райдӕдтон: „Мацӕбӕл мӕтӕ кӕнтӕ, фал... [Хуцауӕй] коретӕ, ци уӕ гъӕуй, уой“. Ӕхсӕвӕ мин мӕ сагъӕстӕ ӕнцойнӕ ку нӕбал лӕвардтонцӕ, уӕд Йеговӕмӕ ковун райдайинӕ. Мӕ зӕрди ци адтӕй, уой ин дзурдтон, неци си сосӕг кодтон. Зӕгъинӕ ин, мӕстгун ке кӕнун, мӕ зӕрдӕ рист ке ӕй ӕма мӕ нифс ке басастӕй. Ӕма ин лигъстӕ кодтон, цӕмӕй мин банхус кодтайдӕ хуарз естӕбӕл сагъӕс кӕнун. Сӕумӕй ку райгъал уинӕ, уӕд архайдтон мӕ сӕрӕй лӕгъуз сагъӕстӕ сорун. Ӕма мӕхе уотӕ ке исахур кодтон. Уой фӕрци фулдӕр сагъӕс кодтон, ци мин ес, уобӕл, ци мин нӕбал ес, уобӕл нӕ, фал. Ӕз мӕхецӕн загътон, ниуӕзтӕбӕл ӕмбӕлгӕ дӕр ке нӕбал бакӕндзӕн.  Ци фарнӕй исхайгин дӕн, е мин уотӕ хъазар адтӕй, ӕма мӕ нӕ фӕндадтӕй, цӕмӕй ӕй естӕй туххӕй фесафтайнӕ».

Тӕккӕ устурдӕр маст ци гъуддӕгтӕ ӕрхӕссунцӕ, уонӕй еу ӕй хӕтундзийнадӕ. Фал нин Библий унаффитӕ ӕнхус кӕнунцӕ, цӕмӕй си нӕхе гъӕуай кӕнӕн. Библи нӕ фӕдзӕхсуй, хӕтундзийнадӕмӕ ка ӕркӕнуй, уӕхӕн гъуддӕгтӕй, зӕгъӕн, порнографийӕй кенӕ гацца миутӕй. Еу ӕригон биццеу, Сэмюэл, загъта: «Кизгутти зӕрдӕ балхӕнун мин хъӕбӕр ӕнцон адтӕй. Хатгай кизгӕ мӕ зӕрдӕмӕ дӕр нӕ цӕуидӕ, фал ӕ зӕрдӕмӕ ке цӕун, уой ку балӕдӕринӕ, уӕдта мӕхе уотӕ дарун райдайинӕ, цума мӕн зӕрдӕмӕ дӕр цӕуй – уотид хе райерхӕфсунмӕ». Сэмюэлӕн хъӕбӕр арӕх бауайдзӕф кӕниуонцӕ, кизгуттӕн дӕхе уарзун кӕнис, зӕгъгӕ,– кӕд ӕ сӕри къуми дӕр неци уидӕ, уӕддӕр,– ӕма фӕстагмӕ ӕхе барӕй дӕр уотӕ дарун райдӕдта. Фал уой фӕсте ӕхецӕй фефсӕрми ӕй. Сэмюэл зӕгъуй: «Еци гъуддаг зианӕй уӕлдай неци хаста, уомӕн ӕма айдагъ мӕхе сагъӕс кодтон».

Сэмюэл Йегови Ӕвдесӕнти сайти бакастӕй, ӕригӕнттӕн финст ка адтӕй, уӕхӕн статья, ӕма расагъӕс кодта Ӕмбесӕндти 20:11 финст дзурдтӕбӕл: «Сувӕллонӕн ӕ миутӕмӕ гӕсгӕ дӕр бӕрӕг фӕууй, ци кӕнуй, е кӕдзос ӕма раст ӕй ӕви нӕ». Е ин куд банхус кодта? Сэмюэл балӕдӕрдтӕй: кизгутти хӕццӕ ӕхе уотӕ ке дардта, е нӕдӕр кӕдзос адтӕй, нӕдӕр раст. Удта ма загъта: «Уой дӕр балӕдӕрдтӕн, ӕма, ӕхе уотӕ ка даруй, уомӕй хуарз цардӕмбал зинтӕй рауайдзӕй. Ӕз расагъӕс кодтон, зӕгъун мин бийнойнаг ку адтайдӕ ӕма мӕ еске хӕццӕ уӕхӕн миутӕ кӕнгӕ ку фӕууидтайдӕ, уӕд ин куд адтайдӕ. Уӕд мӕхецӕн загътон, мӕхе уотӕ ке нӕбал дардзӕн. Цидӕр дин ӕнцонтӕй ке уайуй, е уобӕл дзорӕг нӕма ӕй, ӕма раст ӕй». Сэмюэл ӕ зундахаст раййивта, ӕма уой фӕрци ӕхе багъӕуай кодта устурдӕр бӕллӕхӕй – хӕтундзийнадӕй.

Антониойӕн ба хӕтундзийнадӕй никки тӕссагдӕр адтӕй, уомӕн ӕма порнографимӕ кӕсунбӕл фӕццӕфстӕй. Кӕд ин бийнойнаг адтӕй ӕма ’й уарзгӕ дӕр хъӕбӕр кодта, уӕддӕр еци илгъаг гъуддагмӕ еухаттӕй иннӕ хатмӕ раздӕхидӕ. Фал ин устур ӕнхус фӕцӕнцӕ 1 Петури 5:8 финст дзурдтӕ: «Къӕрцгъос уотӕ, ма бафунӕй уотӕ, уомӕн ӕма уе знаг, Сайтан, богътӕгӕнагӕ домбаййи хузӕн разелӕ-базелӕ кӕнуй ӕма агоруй, ке ранихъуӕра, уой». Антонио зӕгъуй: «Аци дуйне порнографийӕй идзаг ӕй, алли рауӕн дӕр ӕй ес фӕууинӕн. Ӕма ’й ку фӕууинай, удта ин феронх кӕнӕн нӕбал фӕууй. Фал Библий финст дзурдти фӕрци балӕдӕрдтӕн, уонӕй мӕ ка фӕлваруй, уой. Гъӕуама мӕхе исахур кодтайнӕ, ихӕлд хузтӕ ку рауинон, уӕд ӕргъуди кӕнун, кӕмӕй цӕунцӕ, уой. Нур ӕй зонун, ӕрмӕстдӕр мин Йегови бон ке ӕй банхус кӕнун, цӕмӕй къӕрцгъос уон ӕма мӕ зунд, мӕ зӕрдӕ, удта мӕ бийнонти цард багъӕуай кӕнон». Антонио ӕнхус ракурдта, ӕма ин еци лӕгъуз гъуддагӕй фӕййервӕзун бантӕстӕй. Уой фӕрци ӕхе устурдӕр бӕллӕхӕй багъӕуай кодта.

Мадта бӕрӕг ӕй: Библий унаффити фӕрци нӕхе берӕ зиндзийнӕдтӕй багъӕуай кӕндзиан. Фал нин, зӕгъӕн, цӕхуӕндӕр гъуддӕгтӕй кенӕ гъудитӕй фӕййервӕзун хъӕбӕр зин ӕй, уӕдта? Ӕркӕсӕн, уӕхӕн уавӕрти нин Хуцауи Дзурд куд банхус кӕндзӕй, уомӕ.