Punta kaq yachatsikïchö parlanqantsik Diäna warmiqa, alläpa llakishqa karmi mas seguïdu washkuta upyar qallëkurqan. Bibliaqa manam michäkuntsu washkuta ichikllata upyëtaqa, peru “vïnuta alläpa upyaqkunawanqa ama juntakïtsu” ninmi (Proverbius 23:20). Qeshyëman, pï mëwan pleytukïman y wanïmanmi alläpa upyëqa chätsimënintsikta puëdin. Peru Bibliapa consëjunkunata nunakuna wiyakuyaptinqa, manam tsë mana allikunaman chäyanmantsu.

Diänaqa Bibliapa consëjuntam wiyakurqan y kënömi nin: “Upyanqäwanqa llakikïnïkuna mana ushakänampaq kaqtam cuentata qokurirqä. Filipensis 4:6, 7 textu kënö ninqanmi yanapamarqan: ‘Ama imapaqpis yarpachakur kayëtsu, sinöqa [...] yarpachakïnikikunata Diosta musyatsiyë’. Cada paqas imëka yarpachakïkuna peqäman chäramuptinmi, Diosman mañakoq kä y kënö sientikunqätam willaq kä: shonqüchö nanatsikunqäta, piñashqa këkanqäta y imatapis rurëta mana puëdinqäta. Jinamampis, tsë problëmäkunaman mana yarparäkunäpaqmi mañakurqä. Tsëpitanam kallpachakurqä problëmäkunallaman mana yarparäkunäpaq. Jehoväman mañakunqämi yanapamarqan kapamanqankunaman yarparänapaq, y oqranqäkunamanqa manana alläpa yarparänäpaq. Tsëmi manana upyanäpaq decidirirqä, porqui yamënam kawakïkarqä y tsënömi imëpis kawakïta munarqä”.

Mana casädu këkar oqllanakur ruranakïqa, imëkapitapis masmi llakikïta y sufrimientuta apamun. Peru Bibliapa consëjunkunaqa tsëman mana ishkinapaqmi yanapakun, porqui pitapis enamorëpa tratë, pornografïata rikë y maskuna tsëman chätsikunqampitam Bibliaqa willakun. Samuel jutiyoq jövinmi kënö nin: “Pitapis enamorëpa tratëqa fäcil-llam kaq... Höraqa mana gustëkämaptimpis, cuentatam qokureq kä noqa gustanqäta y tsënö sientikïqa alläpa shumaqmi karqan”. Höraqa mana munëkarpis, Samuelqa pitapis enamorëpam tratareq y tsërëkurmi pï më acusayaq. Tsëmi ardëpana ruranampaq decidirirqan, peru conciencianqa tsë ruranqampitam llakitseq. Kananqa kënönam nin: “Pitapis enamorëpa tratëqa alläpa mana allim, porqui tsëta rurarqa manam wakinkunamanqa pensankinatsu”.

Samuelqa jw.org nishqan päginachömi, jövinkunapaq parlaq yachatsikïta leyirqan. Jinamampis, Proverbius 20:11 textu kënö ninqanmanmi pensarqan: “Juk jövinqa rurëninkunawanmi rikätsikun, imatapis ruranqan alli o limpiu kanqanta”. ¿Imanötaq kë consëju yanaparqan? Samuelqa cuentatam qokurirqan, pitapis enamorëpa tratëqa ni alli ni limpiu kanqanta. Pëmi kënö nin: “Tsëta rurarqa mana alli qowa kanäpaq kaqtam entiendirirqä. Juk warmita enamorëpa parlapaptï, majäpaq kaq warmi imanö sientikunampaq kaqtam pensarqä. Y cuentatam qokurirqä pitapis enamorëpa tratë fäcil-lla kaptimpis, mana alliman chätsikunqanta”. Samuelqa cambiarqanmi y tsëmi yanaparqan rakcha rurëkunaman mana ishkinampaq.

Antoniuqa mas peormanmi chäkïkarqan, porqui pëtaqa pornografïa rikëmi alläpa gustaq. Warminta alläpa kuyarnimpis, pornografïataqa rikëkarqanllam. 1 Pëdru 5:8 textu alläpa yanapanqantam nirqan, tsëchömi kënö nin: “¡Alli juiciuyoq imëpis këkäyë! ¡Mäkoq mäkoqlla këkäyë! Chikiyäshoqniki Diabluqa qapareq qayareq leonnömi purikan, pitapis tragakurkïta tïrar”. Antonium kënö nin: “Më tsëchömi rakcha rurëkunataqa rikantsik, y tsëkunaqa peqantsikchömi quedarin. Tsë textum, rakcha rurëkuna peqäman chämunqan höra mëpita shamunqanta yarpänäpaq yanapamarqan. Kananqa alleqmi musyä yachaq kanäpaq Jehovälla yanapamëta puëdinqanta, jina pensënïkunata, munënïkunata y casädu kawakïnïta cuidanäpaqpis pëlla yanapamanqanta”. Antoniuqa tsë viciuta jaqinampaqmi yanapakïta tarirqan. Y tsënöpam mas problëmakunaman charqannatsu.

Bibliapa consëjunkunaqa mas problëmakunaman mana chänapaq alläpa yanapakunqantam rikärirquntsik. Peru ¿problëmantsikkuna mas peorakurkuptin y mana altsakaqnö kaptinqa? Tsë cäsukunachö Diospa Palabran imanö yanapamanqantsikta rikärishun.