Delphine we ha ambiwa nga hae kha thero yo fhiraho, o pfa u nga thaidzo dze a vha e nadzo dzo ita uri a nwe halwa nga nḓila yo kalulaho. Bivhili a yo ngo dzivhisa u nwa halwa nga nḓila yo teaho, fhedzi yo ri: “U songo dzula na vhadzia-u-nwa.” (Mirero 23:20) U nwesa halwa zwi ita uri ri vhe na thaidzo dza mutakalo, zwi tshinya vhushaka nahone zwi ita uri vhathu vha dzimilioni vha lovhe ṅwaha muṅwe na muṅwe. Vhathu vha nga kona u iledza dzenedzo thaidzo arali vha tevhedza nyeletshedzo ine ya vha Bivhilini.

Delphine o ita nga u ralo. O amba uri: “Ndo ṱhogomela uri nwesa halwa a zwo ngo tandulula thaidzo dzanga. Ndo shumisa nyeletshedzo ine ya vha kha Vhafilipi 4:6, 7, ine ya ri: ‘Ni songo vhilaela nga tshithu na tshithihi, fhedzi . . . zwine na zwi ṱoḓa ni humbele Mudzimu.’ Vhusiku vhuṅwe na vhuṅwe musi ndi tshi kundelwa u eḓela nahone ndi tshi thoma u vhilaela, ndi amba na Yehova nga thabelo. Ndo mu vhudza nḓila ine nda ḓipfa ngayo, zwine zwa ntsinyusa, zwine zwa mmbaisa na zwine zwa ntsikeledza nahone ndo mu humbela uri a nthuse uri ndi ḓipfe ndi khwine. Musi ndi tshi vuwa, ndi ita vhungoho ha uri ndi hangwe nga ha zwenezwo zwithu zwine zwa ntsikeledza. U dzula ndi tshi rabela Yehova uri a nthuse, zwo ita uri ndi livhise ṱhogomelo kha zwine nda vha nazwo nṱhani ha u livhisa ṱhogomelo kha zwine nda si vhe nazwo. Ndo litsha u nwa halwa. Nga nṱhani ha uri mulalo une nda vha nawo zwino ndi wa ndeme vhukuma, a thi ṱoḓi u xelelwa ngawo na luthihi.”

U ḓifara luvhi ndi zwiṅwe zwa zwithu zwine zwa ḓisa makhaulambilu na vhuṱungu. Fhedzi zwine Bivhili ya zwi funza zwi nga ri thusa u iledza dzenedzo thaidzo ngauri i ri vhudza zwithu zwine zwa vhanga dzenedzo thaidzo. Sa tsumbo, u tamba nga lufuno na u ṱalela zwifanyiso zwa vhathu vha songo ambaraho. Muṅwe muṱhannga ane a pfi Samuel o ri: “Zwo vha zwo leluwa vhukuma u tamba nga lufuno. Nga zwiṅwe zwifhinga, ndo pfa ndi sa kungei nga muṅwe muthu, fhedzi ndo vha ndi tshi kona u zwi vhona uri u a ntakalela nahone zwenezwo zwo ita uri u tamba nga lufuno zwi ntakadze.” Kanzhi Samuel o vha a tshi pomokwa uri u tamba nga lufuno naho o vha a tshi zwi ita a songo ḓiimisela nahone zwenezwo zwo ita uri a thome u zwi ita o ḓiimisela. Fhedzi zwenezwo zwithu zwo vha zwi tshi mu dina. Samuel o ri, “Zwo vha zwi na khombo ngauri zwi ita uri muthu a humbulele ene muṋe fhedzi.”

Samuel o vhala iṅwe thero ine ya amba nga ha vhaswa kha website ya jw.org. O humbula nga ha luṅwalo lwa Mirero 20:11, lune lwa ri: “Na mutukana, kana mishumo yawe i tshi ḓo naka ya luga, u ḓihwa nga zwiito zwawe.” Zwenezwo zwo mu thusa hani? O ṱhogomela uri u tamba nga lufuno a si zwavhuḓi nahone zwo khakhea. O ri: “Ndo dovha nda guda uri muswa ane a tamba nga lufuno u vha tshi khou ṱahulela pfaneleo dzine dza ita uri a vhe mufarisi a si wavhuḓi wa mbingano. Ndo thoma u humbula nga ha nḓila ine muthu ane nda ḓo mu vhinga a ḓo ḓipfa ngayo arali a mmbona ndi tshi khou sumbedza dzangalelo kha muṅwe mufumakadzi. Zwenezwo zwo ita uri ndi ṱhogomele uri u tamba nga lufuno zwi na khombo. Naho u tamba nga lufuno zwo leluwa, fhedzi zwenezwo a zwi ambi uri a zwo ngo khakhea.” Samuel o shanduka. U iledza u tamba nga lufuno zwo dovha zwa mu thusa uri a iledze u ḓifara luvhi.

Antonio o vha e khomboni ya u ḓifara luvhi: O vha e na nḓowelo ya u ṱalela zwifanyiso zwa vhathu vha songo ambaraho. Naho o vha o mala mufumakadzi ane a mu funa vhukuma, o vha a tshi kha ḓi vha na yeneyo nḓowelo. O amba uri u humbula nga ha luṅwalo lwa 1 Petro 5:8 zwo mu thusa vhukuma. Lu ri: “Dzulani no dzivhuluwa, ni fhaṱuwe. Swina ḽaṋu Diabolo u mona-mona sa ndau i vhombaho, a tshi ṱoḓa ane a nga mu mila.” Antonio o ri: “Zwifanyiso zwa vhathu vha songo ambaraho zwo phaḓalala ḽifhasini ḽoṱhe nahone zwenezwo zwifanyiso zwi a dzula muhumbuloni wa muthu. Yeneyi ndimana yo nthusa uri ndi humbule nga ha zwine zwa ita uri yeneyi milingo i vhe hone. Ndo vha ndi tshi fanela u ṱavhanya u humbula uri zwenezwo zwifanyiso zwa vhathu vha songo ambaraho zwi bva ha Diabolo. Zwino ndi vho ḓivha uri ndi Yehova fhedzi ane a nga nthusa uri ndi ‘dzule ndo dzivhuluwa na u fhaṱuwa’ u itela uri ndi kone u kunda zwenezwo zwithu zwi re muhumbuloni, mbiluni na mbinganoni yanga.” Antonio o wana thuso ye a vha a tshi i ṱoḓa nahone o fhedza o litsha nḓowelo ye a vha e nayo. Zwenezwo zwo dovha zwa mu thusa uri a kone u kunda na thaidzo khulwane.

Zwi khagala uri Bivhili i na nyeletshedzo dzi shumaho dzine dza nga ri thusa u kunda thaidzo khulwane. Fhedzi hu pfi mini nga ha thaidzo dzo no nwelelaho dzine dza vhonala dzi tshi konḓa u dzi tandulula? Kha ri vhone nḓila ine Bivhili ya nga ri thusa ngayo u tandulula dzenedzi thaidzo dzi konḓaho.