GO KONG ni itye ka wot i yo mo macol adada i otyeno. Kadi bed ni dong ceng opoto wa con, ipe ki lworo mo keken pien itye ki mac matar i cingi me menyo yo. Ka icaro ka tyeni, ineno jami ducu ma tye ka tyeni. Dok ka icaro anyim, ineno jami ducu ma tye anyim ka mabor.

I yo acel-li, Baibul tye calo mac meno. Kit ma waneno kwede i pwony mukato-ni, lok pa Lubanga konyowa me lweny ki peko ma wakemme kwede nino ducu. Ento Baibul timo makato meno. Miyo waniang jami ma bitimme i anyim, dok konyowa me neno ki lubo yo ma weko wabedo ki yomcwiny ki kwo maber nakanaka. (Jabuli 119:105) Meno timme nining?

Kong dong waneno yo aryo ma Baibul konyowa kwede me bedo ki gen pi anyim: 1 konyowa me bedo ki kwo matir, ki dok 2 pwonyowa kit me bedo ki wat maber ki Lacwecwa.

Baibul miniwa tam matir kit me lweny ki peko maber, kadi bed pe obedo buk ma kicoyo mere me konyo dano keken. Ma ka cuko cwinywa me keto tamwa i kom parwa keken, Baibul pwonyowa pe me lungo wiwa i cobo mitiwa keken. Meno aye gin ma weko wabedo ki kwo maber.

Me labolle, tam kom i kom cik ma iye lac me Baibul ma waco ni: “Miyo mot kelo gum [yomcwiny] ma kato gamo agama.” (Tic pa Lukwena 20:35) Tika wii po i kom nino mo ma ikonyo ngat mo ma mito kony? Nyo ijalo cawani kun iciko iti me winyo lok pa ngat mo ma cwinye otur? Tika cwinyi pe obedo yom pien ikonyo ngat mukene?

Wabedo ki yomcwiny madit ka wamiyo kony labongo genone ni myero kiculwa pire. Lacoc  mo acel owaco ni: “Tek tutwal me jalle me timo gin moni labongo nongo gin mo maber i ngeye makato ma itimo​—tekki itimo labongo gen ni myero kicul wange lacen.” Ka wakonyo jo mukene​—tuwalle jo ma pe gitwero culo wange​—ci kibiculowa pire. Nongo pe watye ka keto cwinywa i cobo mitiwa keken. Ki lok ada, nongo watye ka tic kacel ki Lacwec kikome, ma neno cwiny me kica ma wanyuto bot jo mukene calo obedo banya ma myero eculwa pire. (Carolok 19:17) En tye ki pwoc madit adada pi jami ma watimo pi jo ma gimito kony, dok en ocikke me culo wange ki miniwa kwo ma pe tum i lobo paradic ​—man obedo gen mamwonya adada pi anyim!​—Jabuli 37:29; Luka 14:12-14. *

Ma dong pire tek loyo, Baibul pwonyowa ni watwero bedo ki kwo maber ka waworo Lubanga me ada, Jehovah. Lok pa Lubanga cuko cwinywa me mine pak, deyo, ki woro ma en opore me nongo. (Latitlok 12:13; Niyabo 4:11) Ka watimo meno, ci nongo watimo gin mo maber makato ducu: Bikelo yomcwiny bot Lacwecwa. En cuko cwinywa ni: ‘Bed ryek wek iyom cwinya.’ (Carolok 27:11) Tam kong​—ka wamoko tam me ryeko ma cung i kom cik ma igi lac me Baibul, wayomo cwiny Wonwa me polo. Pingo? Pien en paro piwa dok mito ni wanong adwogi maber ma bino pi lubo tirane. (Icaya 48:17, 18) Ki lok ada, kit kwo mene maber loyo woro Lalo polo ki lobo ki dok kwo i yo ma yomo cwinye?

Baibul cuko cwinywa me bedo ki wat macok ki Lacwecwa. Ginacoya wacciwa ni: “Wunyik cok bot Lubanga, ci en bene binyiko cok botwu.” (Yakobo 4:8) I cawa mukene watwero bedo ki akalakala kace twere me bedo larem Won Twer Ducu. Ento Baibul cuko cwinywa ni ka ‘wayenyo Lubanga,’ ci ‘wabinonge’ “pien en pe tye cen ka mabor ki bot ngat acel acel i kinwa.” (Tic pa Lukwena 17:27) Tam ma Baibul miyo me mako lirem macok ki Lubanga obedo tam me ryeko adada pi kare me anyim. I yo mene?

Tam kong: Kadi dong watute nining ki kerowa kenwa, pe tye ngat mo ma twero bwot ki i kom lakworwa​—to. (1 Jo Korint 15:26) Ento, Lubanga bedo nakanaka. En pe bito, dok bene mito ni lureme bene gukwo pi naka. Baibul nyuto ka maleng ni Jehovah mito ni jo ma yenye: ‘myero gubed ki kwo maber nakanaka!’​—Jabuli 22:26.

Itwero dongo lirem ma kit meno ki Lubanga won twer ducu nining? Medde ki pwonyo lok i kome kun ikwano Lokke. (Jon 17:3; 2 Temceo 3:16) Leg pi konye wek iniang Ginacoya. Baibul cuko cwinywa ni ka ‘walego Lubanga’ ki cwinywa ducu pi ryeko, ci en biminiwa. * (Yakobo 1:5) Me agikkine, tute me keto gin ma ipwonyo i tic, wek lok pa Lubanga oti macalo ‘tara ma menyo ka tyeni’ ki dok mac ma ‘menyo yo ma iwoto iye.’​—kombeddi-ni ki pi naka.​—Jabuli 119:105.