NGƆƆ lɛ kaa o ngɛ nyɛɛe gbɔkuɛ ko ngɛ blɔ nɛ nɔ wo diblii nɔ. E ngɛ mi kaa pu ɔ nɔ si kɛ mohu, se o yi gbeye kaa du bu, ejakaa o hɛɛ kane nɛ nya wa ngɛ o dɛ mi. Ke o kɛ tsɔɔ zugba a, o kɛ hyɛɛ o nane nya heii. Nɛ ke o kɛ tsɔɔ o hɛ kpɛ ɔ, e la nɛ nya wa a kpɛɔ kɛ yaa tsitsaa kɛ hyɛɛ o blɔ ɔ nɔ.

Ngɛ blɔ ko nɔ ɔ, Baiblo ɔ ngɛ kaa jamɛ kane ɔ. Kaa bɔ nɛ wa susu he ngɛ munyuhi nɛ sɛ hlami ɔ mi ɔ, Mawu munyu ɔ ma nyɛ maa ye bua wɔ nɛ waa na níhi nɛ ngɛ wa hɛ mi haa a nɛ ji daa ligbi mi nyagbahi nɛ wɔ tsuo waa kɛ kpeɔ ngɛ je yaya nɛ ɔ mi. Se pi lɔ ɔ pɛ nɛ Baiblo ɔ peeɔ. E tsɔɔ wɔ bɔ nɛ si himi ɔ ma tsake hwɔɔ se ha, e yeɔ bua wɔ nɛ wa naa blɔ nɛ haa nɔ tsui nɔɔ e mi nɛ́ e kɛ nɔ yaa bua jɔmi nɛ ngɛ daa a mi. (La 119: 105) Ngɛ mɛni blɔ nɔ?

Ha nɛ wa susu blɔhi enyɔ nɔ nɛ Baiblo ɔ guu kɛ haa wɔ hwɔɔ se hɛ nɔ kami nitsɛnitsɛ: 1 E yeɔ bua wɔ nɛ wa naa yi mi tomi je nɛ wa ngɛ wami mi. 2 E tsɔɔ wɔ blɔ nɔ nɛ wa maa gu konɛ huɛ bɔmi kpakpa nɛ hi waa kɛ wa Bɔlɔ ɔ wa kpɛti kɛ ya neneene.

Ga womi kpakpahi nɛ wa ma nyɛ ma kɛ tsu wa nyagba amɛ a he ní ngɛ Baiblo ɔ mi. Se pi blɔ tsɔɔmi womi ko kɛkɛ ji Baiblo ɔ. Baiblo ɔ tsɔɔ wɔ kaa e sɛ nɛ waa ngɔ wa juɛmi tsuo kɛ ma wa nyagba amɛ a nɔ, mohu ɔ, e haa nɛ wa leɔ hu kaa sane ngua ko ngɛ nɛ kɔɔ wa he. Ja wa nu bɔ nɛ sane ɔ kɔɔ wa he haa sisi loko wa bua maa jɔ ngɛ si himi mi.

Mo susu Baiblo ɔ mi sisi tomi mlaa nɛ ɔ he nɛ o hyɛ: “Bua jɔmi babauu ngɛ nɔ́ hami mi pe nɔ́ ngɔmi.” (Ní tsumi 20:35) Anɛ o kai be ko nɛ o ye bua nɔ ko kɛ sika hyɛ lo? Aloo eko ɔ, be ko nɛ o bu huɛ ko nɛ de mo bɔ nɛ e ngɛ lɛ pee ha tsuo ɔ tue? Anɛ o tsui nɔɛ o mi kaa o pee nɔ́ kpakpa ko kɛ ye bua nɔ ko jamɛ a ligbi ɔ lo?

Ke wa je wa tsui mi kɛ ye bua nihi nɛ wa hyɛ we blɔ kaa a to wɔ nane mi ɔ, wa náa bua jɔmi nɛ hí kalemi. Womi ngmalɔ ko de ke: “Ke wa ma de ɔ, ke  o ngɔ o he kɛ ha faa a, kokooko ɔ, o ma ná he se pe bɔ nɛ o ha ke o kɛ o juɛmi mɛ hiɔwo ko nɛ o ma ná a nɔ.” Se ke wa ngɔ wa he kɛ ha faa titli kɛ ye bua nihi nɛ a be nyɛe maa to wɔ nane mi ɔ, wa náa hiɔwo ko. Wa yɔseɔ kaa Mawu kɛ wɔ ngɛ nɔ́ ko tsue. Waa kɛ Bɔlɔ ɔ nitsɛ peeɔ kake kɛ tsuɔ ní, nɛ e naa mimi himi ní peemi nɛ ɔmɛ kaa nɔ́ ko nɛ waa kɛ pa lɛ. (Abɛ 19:17) E bua jɔɔ níhi nɛ wa peeɔ ha nihi nɛ a ní ngɛ mɔbɔ ɔ he wawɛɛ, nɛ e wo wɔ si kaa e ma ha wɔ neneene wami ngɛ paradeiso zugba a nɔ. Ngɛ anɔkuale mi ɔ, e ji hwɔɔ se hɛ nɔ kami nɛ ngɛ bua jɔmi nitsɛ!​—La 37:29; Luka 14:12-14. *

Blɔ nɛ hi pe kulaa nɛ Baiblo ɔ tsɔɔ kaa wa ma nyɛ maa gu nɔ kɛ ná bua jɔmi ngɛ si himi ji nɛ wa ma ja anɔkuale Mawu, Yehowa. E munyu ɔ woɔ wɔ he wami konɛ waa ngɔ yi jemi, bu kɛ tue bumi nɛ sa lɛ ɔ kɛ ha lɛ. (Fiɛlɔ 12:13; Kpojemi 4: 11) Ke wa pee jã a, wa tsu nɔ́ ko nɛ ji he blɔ ngua kaa wa maa pee. Wa taa wa Bɔlɔ ɔ tsui he. Niinɛ, e de ke: ‘Pee o he ní lelɔ, nɛ ma na bua jɔmi.’ (Abɛ 27:11) Moo lɛɛ moo hyɛ oo, ke wa da Baiblo sisi tomi mlaahi a nɔ nɛ wa mwɔ wa yi mi kpɔ ngɛ nile mi ɔ, wa haa nɛ wa hiɔwe Tsɛ ɔ tsui nya a. Mɛni he je? Ejakaa e susuɔ wa he nɛ e suɔ nɛ waa kɛ e blɔ tsɔɔmihi nɛ tsu ní konɛ e hi ha wɔ nitsɛmɛ. (Yesaya 48:17, 18) Niinɛ, nɔ́ nɛ pe kulaa nɛ ma nyɛ ma ha nɛ wa ná yi mi tomi ngɛ si himi mi ji je mluku ɔ tsuo Nyɔmtsɛ ɔ nɛ wa ma ja kɛ bɔ nɛ wa maa hi si ha konɛ e bua nɛ jɔ!

Baiblo ɔ tsɔɔ wɔ hu kaa waa kɛ wa Bɔlɔ ɔ nɛ nu huɛ. Ngmami ɔ de ke “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.” (Yakobo 4:8) Be komɛ ɔ, wa he we yi kaa niinɛ ɔ, waa kɛ wa Bɔlɔ nɛ e ji ope ɔ ma nyɛ maa nu huɛ. Se Baiblo ɔ ha nɛ wa le kaa ke wa “hla Mawu se blɔ” ɔ, wa maa “na lɛ niinɛ,” ejakaa “e kɛ wa ti nɔ fɛɛ nɔ he kɛ we.” (Ní Tsumi 17:27) Ga nɛ Baiblo ɔ wo wɔ kaa waa kɛ Mawu nɛ pee huɛ ɔ ji nɔ́ ko nɛ he hia wawɛɛ nɛ maa sa wa hwɔɔ se he. Ngɛ mɛni blɔ nɔ?

Mo susu he nɛ o hyɛ: Ngɛ mɔde tsuo nɛ adesahi maa bɔ se ɔ, wa ti nɔ ko be nyɛe nɛ e tu he nyɛlɔ nɛ ji gbenɔ ɔ nya fo. (1 Korintobi 15:26) Se Mawu lɛɛ e ngɛ daa. E be gboe ligbi ko ligbi ko, nɛ e suɔ kaa e huɛmɛ nɛ a hi si kɛ ya daa hulɔ. Baiblo ɔ tsɔɔ nɔ́ nɛ Yehowa ngɛ hlae ha nihi nɛ hlaa e se blɔ ɔ. Munyu ɔ ngɛ kpiti nɛ e ngɔɔ kaa nɔ́ ko: “A bua maa jɔ a he kɛ maa ya neneene.”​—La 22:26.

Mɛni blɔ nɔ o kɛ Mawu ma ná kikɛmɛ huɛ bɔmi nɛ maa hi si daa a? Yaa nɔ nɛ o kase e he ní ngɛ e Munyu, nɛ ji Baiblo ɔ mi. (Yohane 17:3; 2 Timoteo 3:16) Bi nɛ e ye bua mo nɛ o nu Ngmami ɔmɛ a sisi. Baiblo ɔ ha wa le kaa ke wa ‘ya nɔ nɛ wa bi Mawu’ kaa e ha wɔ nile ɔ, e ma ha wɔ. * (Yakobo 1:5) Jehanɛ ɔ, mia o hɛ mi nɛ o kɛ nɔ́ nɛ o kase ɔ nɛ tsu ní, ha nɛ Mawu Munyu ɔ nɛ pee kaa “kane ngɛ o nane nya” kɛ “la ngɛ o blɔ mi”​—kɛ je piɔ kɛ ya neneene.​—La 119:105.