Bibliajj sum jakasiñatakiw yanaptʼistu
WALI chʼamak arumansa mä thaknam saraskasma ukham amuytʼañäni. Mä jachʼa linterna aptʼatätawa, ukatwa wali arumäjjchisa, thakejj kawknamsa saraski uk uñjtajja. Linternamp oraqer qhantʼaykta ukhajja, kunas juma nayraqatan utji ukwa uñjtajja. Nayräjjar qhantʼayasasti, thakejj kunjamäskisa ukwa uñjaraktajja.
Bibliajj mä linternamp sasirakiwa. Kunjamtï pasïr yatichäwinakan uñjawayktanjja, Diosan Arupajj kunas jiwas nayraqatan utji uk uñjañatakiw yanaptʼistu, mä arunjja sapür jan waltʼäwinakan uñjasktan ukanakar saykatañatakiw yanaptʼistu. Janiw ukakïkiti, Bibliajj kunas nayräjjan utji uk uñjañatakiw yanaptʼarakistu, mä arunjja wiñayataki kusisit jakasiñatakiw yanaptʼistu (Salmo 119:105).
Bibliajj kunjamsa sum jakasiñatak yanaptʼistaspa ukwa jichhajj pä toqet uñjañäni. Biblian yanaptʼapampejja, 1 jakäwisajj janiw inamayäkiti, 2 taqe kun luriri Diosampiw wiñayatak sum apasiraksna.
JAKÄWISAJJ JANIW INAMAYÄKITI
Bibliajja, jan waltʼäwinakan uñjasktan ukanakar saykatañatakejj suma ewjjtʼanakwa churistu, ukampis Bibliajj janiw aleq yanaptʼir mä librokïkiti. Llakinakasat sinti lupʼiñat sipansa, mayninakat llakisiñatakiw yaticharakistu. Ukarjam lurañäni ukhajja, jakäwisajj janiw inamayäkaniti.
Biblian aka yatichäwipat amuytʼañäni: “Katoqañat sipansa churañanwa jukʼamp kusisiñajj utji” (Hechos 20:35). Pisin uñjasiri maynir yanaptʼasasa, jan ukajj wali llakitäkäna uka amigomar sum istʼañataki tiempo apstʼasisasa, ¿kunjamakis jikjjatasirïta? Mayninakar ukham yanaptʼasajja, ¿janit kusisit jikjjataskayäta?
Jan kun katoqañ suyasa mayninakar yanaptʼtan ukhajja, wali kusisitaw jikjjatastanjja. Libronak qellqeri mä chachajj akham sänwa: “Mayninakar yanaptʼtan ukhajja, churktan ukhat jukʼampunwa katoqtanjja. Ukampis ukham katoqañatakejja, taqe chuymaw yanaptʼañasa, janiw kun katoqañ laykukejj yanaptʼañasäkiti” sasa. Mayninakaru, yamas pisin jakasirinakar yanaptʼañajja, janiw inamayäkiti. Ukham lurasajj Diosaruw yanaptʼasktanjja, ‘mayninakar yanaptʼirejj Diosaruw maytʼaski, ukatsti Dios pachpaw uka manjja phoqjjani’ sasaw Bibliajj yatichi (Proverbios 19:17). Mayninakar yanaptʼañatak kuntï lurktan ukajja, Diosatakejj wali valoraniwa. Ukhamajj jiwasatï mayninakar yanaptʼañäni ukhajja, Diosajj paraisoptayat mä suma oraqenwa wiñay jakañ churistani. ¿Janit ukajj wali kusiskañäki? (Salmo 37:29; Lucas 14:12-14). *
Taqe kunat sipansa, jiwasatï cheqa Diosaru, mä arunjja Jehová Diosar adorañäni ukhajja, jakäwisajj janiw inamayäkaniti, ukwa Bibliajj yaticharakistu. Diosar istʼañataki, jachʼañchañataki ukat honra churañatakiw Bibliajj chʼamañchtʼistu, Diosajj ukham uñjatäñapawa (Eclesiastés 12:13; Apocalipsis 4:11). Ukham uñjtan ukhajja, Diosar wal kusisiytanjja. Jupa pachpaw akham sistu: “Munat wawajjay, yatiñanïmaya, nayarojj kusisiyitätawa” sasa (Proverbios 27:11). Kunapachatï Biblian ewjjtʼanakaparjam suma amtanakar purtan ukhajja, alajjpachankiri Awkisaruw kusisiytanjja. ¿Kunatsa? Diosajj jiwasat wal llakisi, ukatwa kusisit jakañasatakejj Jupar istʼañas muni (Isaías 48:17, 18). Jiwasatï Taqe Kunjjar Munañani Diosar serviñäni, chuymapsa kusisiyañäni ukhajja, jakäwisajj janiw inamayäkaniti.
DIOSAMPIW SUM APASSNA
Taqe kun luriri Diosampejj kunjamsa sum apassna ukwa Bibliajj yaticharakistu. Ukatwa akham ewjjtʼistu: “Diosar jakʼachasipjjam, jupajj jumanakar jakʼachasirakiniwa” sasa (Santiago 4:8). Taqe chʼamani Diosampejj kunjamarak mä jaqejj sum apasispasti sasin inas amuysta. Diosan Aruparjamajja, jiwasatï Jupar thaqañäni ukhajja, jikjjatañäniwa, “[Diosajj] janiw sapa mayni jiwasanakat jayankkiti” (Hechos 17:27). Diosamp sum apasiñatak chʼamachasiñäni ukhajja, jutïr urunakatakiw wakichtʼasiñäni. ¿Kunatsa ukham sistan?
Aka toqet amuytʼañäni, walsa chʼamachaskchiñänejja, janiw jiwañat salvasksnati (1 Corintios 15:26). Ukampis Diosajj wiñay Diosawa. Janipuniw jiwkaniti, Jupamp sum apasipki ukanakas wiñayatak jakasipjjaspa ukwa munaraki. Servirinakapan kunjam jakasipjjañapsa muni ukjja, mä qhawqha suma arunakampiw Jehová Diosajj yatiyistu, Jupajj akham siwa: “Walja maranak jakapjjarakim” sasa (Salmo 22:26).
¿Kunjamsa Diosamp wiñayatak sum apasisma? Jupan Arupata, mä arunjja Bibliat yateqaskakiñamawa (Juan 17:3; 2 Timoteo 3:16). Biblia sum amuyañatakejja, maynin yanaptʼapwa mayisma. Jiwasatï Diosan yatiñap taqe chuyma mayiskakiñäni ukhajja, Jupajj churistaniwa sasaw Bibliajj yatichi * (Santiago 1:5). Ukatjja, kuntï yateqta ukarjam sarnaqañatakiw chʼamachasiñama, ukhamatwa Diosan Arupajj wiñayatak ‘sarnaqäwiman mä qhanänejja, thakimansa qhantarakini’ (Salmo 119:105).
^ Párrafo 8 Jaqenakajj wiñayatakiw aka oraqen jakasipjjani sasin Diosajj arsuwayki uka toqet jukʼamp yatiñatakejja, ¿Kunsa Bibliajj yatichistu? sat libron 3 yatichäwip uñjjattʼäta, ukajj Jehová Diosan Testigonakapan luratawa.
^ Párrafo 13 Jehová Diosan Testigonakapajj qollqe jan mayisakiw Bibliat yatichapjjerisma. Jumatï uka toqet jukʼamp yatiñ munsta ukhajja, ¿Kunjamsa Bibliat yatichasi? sat video Internetan jw.org cheqan uñtañamatakiw chʼamañchtʼapjjsma.
Wiñay Diosajja, jupan amigonakapajj wiñayatak jakasipjjaspa ukwa muni
